| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
4. தீ³க⁴னக²ஸுத்தவண்ணனா
4. Dīghanakhasuttavaṇṇanā
201. க²னநங் க²தங், ஸூகரஸ்ஸ க²தங் எத்த² அத்தீ²தி ஸூகரக²தா, ஸூகரஸ்ஸ வா இமஸ்மிங் பு³த்³து⁴ப்பாதே³ பட²மங் க²தங் உபாதா³ய ஸூகரக²தா, தாய. ஏவங்னாமகேதி ஏவங் இத்தி²லிங்க³வஸேன லத்³த⁴னாமகே. பங்ஸுதோ⁴தேதி தோ⁴தபங்ஸுகே. ஓதரித்வா அபி⁴ருஹிதப்³ப³ந்தி பகதிபூ⁴மிதோ அனேகேஹி ஸோபானப²லகேஹி ஓதரித்வா புன லேணத்³வாரங் கதிபயேஹி அபி⁴ருஹிதப்³ப³ங்.
201. Khananaṃ khataṃ, sūkarassa khataṃ ettha atthīti sūkarakhatā, sūkarassa vā imasmiṃ buddhuppāde paṭhamaṃ khataṃ upādāya sūkarakhatā, tāya. Evaṃnāmaketi evaṃ itthiliṅgavasena laddhanāmake. Paṃsudhoteti dhotapaṃsuke. Otaritvā abhiruhitabbanti pakatibhūmito anekehi sopānaphalakehi otaritvā puna leṇadvāraṃ katipayehi abhiruhitabbaṃ.
டி²தகோவாதி மாதுலஸ்ஸ டி²தத்தா தத்த² ஸகா³ரவஸபதிஸ்ஸவஸேன டி²தகோவ. கிஞ்சாபி ஸப்³ப³-ஸத்³தோ³ அவிஸேஸதோ அனவஸேஸபரியாதா³யகோ, வத்து²அதி⁴ப்பாயானுரோதீ⁴ பன ஸத்³த³ப்பயோகோ³தி தமத்த²ங் ஸந்தா⁴ய பரிப்³பா³ஜகோ ‘‘ஸப்³ப³ங் மே நக்க²மதீ’’தி ஆஹ. யா லோகே மனுஸ்ஸஉபபத்தியோதிஆதி³கா உபபத்தியோ, தா அனத்த²ஸமுதா³க³தா தத்த² தத்தே²வ ஸத்தானங் உச்சி²ஜ்ஜனதோ, தஸ்மா ஸமயவாதீ³ஹி வுச்சமானா ஸப்³பா³ ஆயதிங் உப்பஜ்ஜனஉபபத்தி ந ஹோதி. ஜலபு³ப்³பு³ளகா விய ஹி இமே ஸத்தா தத்த² தத்த² ஸமயே உப்பஜ்ஜித்வா பி⁴ஜ்ஜந்தி, தேஸங் தத்த² படிஸந்தி⁴ நத்தீ²தி அஸ்ஸ அதி⁴ப்பாயோ. தேனாஹ ‘‘படிஸந்தி⁴யோ’’திஆதி³. அஸ்ஸ அதி⁴ப்பாயங் முஞ்சித்வாதி யேனாதி⁴ப்பாயேன பரிப்³பா³ஜகோ ‘‘ஸப்³ப³ங் மே நக்க²மதீ’’தி ஆஹ, தங் தஸ்ஸ அதி⁴ப்பாயங் ஜானந்தோபி அஜானந்தோ விய ஹுத்வா தஸ்ஸ அக்க²ரே தாவ தோ³ஸங் த³ஸ்ஸெந்தோதி பதே³ஸஸப்³ப³ங் ஸந்தா⁴ய தேன வுத்தங், ஸப்³ப³ஸப்³ப³விஸயங் கத்வா தத்த² தோ³ஸங் க³ண்ஹந்தோ. யதா² லோகே கேனசி ‘‘ஸப்³ப³ங் வுத்தங், தங் முஸா’’தி வுத்தே தஸ்ஸ வசனஸ்ஸ ஸப்³ப³ந்தோக³த⁴த்தா முஸாபா⁴வோ ஆபஜ்ஜெய்ய, ஏவங் இமஸ்ஸபி ‘‘ஸப்³ப³ங் மே நக்க²மதீ’’தி வத³தோ ததா² பவத்தா தி³ட்டி²பி நக்க²மதீதி அத்த²தோ ஆபன்னமேவ ஹோதி. தேனாஹ ப⁴க³வா – ‘‘ஏஸாபி தே தி³ட்டி² நக்க²மதீ’’தி. யதா² பன கேனசி ‘‘ஸப்³ப³ங் வுத்தங் முஸா’’தி வுத்தே அதி⁴ப்பாயானுரோதி⁴னீ ஸத்³த³ப்பவத்தி, தஸ்ஸ வசனங் முஞ்சித்வா தத³ஞ்ஞேஸமேவ முஸாபா⁴வோ ஞாயாக³தோ, ஏவமிதா⁴பி ‘‘ஸப்³ப³ங் மே நக்க²மதீ’’தி வசனதோ யஸ்ஸா தி³ட்டி²யா வஸேன ‘‘ஸப்³ப³ங் மே நக்க²மதீ’’தி தேன வுத்தங், தங் தி³ட்டி²ங் முஞ்சித்வா தத³ஞ்ஞமேவ யதா²தி⁴ப்பேதங் ஸப்³ப³ங் நக்க²மதீதி அயமத்தோ² ஞாயாக³தோ, ப⁴க³வா பன வாதீ³வரோ ஸுகு²மாய ஆணியா தூ²லங் ஆணிங் நீஹரந்தோ விய உபாயேன தஸ்ஸ தி³ட்டி²க³தங் நீஹரிதுங் தஸ்ஸ அதி⁴ப்பாயேன அவத்வா ஸத்³த³வஸேன தாவ லப்³ப⁴மானங் தோ³ஸங் த³ஸ்ஸெந்தோ ‘‘யாபி கோ² தே’’திஆதி³மாஹ. தேன வுத்தங் – ‘‘அஸ்ஸ அதி⁴ப்பாயங் முஞ்சித்வா அக்க²ரே தாவ தோ³ஸங் த³ஸ்ஸெந்தோ’’தி.
Ṭhitakovāti mātulassa ṭhitattā tattha sagāravasapatissavasena ṭhitakova. Kiñcāpi sabba-saddo avisesato anavasesapariyādāyako, vatthuadhippāyānurodhī pana saddappayogoti tamatthaṃ sandhāya paribbājako ‘‘sabbaṃ me nakkhamatī’’ti āha. Yā loke manussaupapattiyotiādikā upapattiyo, tā anatthasamudāgatā tattha tattheva sattānaṃ ucchijjanato, tasmā samayavādīhi vuccamānā sabbā āyatiṃ uppajjanaupapatti na hoti. Jalabubbuḷakā viya hi ime sattā tattha tattha samaye uppajjitvā bhijjanti, tesaṃ tattha paṭisandhi natthīti assa adhippāyo. Tenāha ‘‘paṭisandhiyo’’tiādi. Assa adhippāyaṃ muñcitvāti yenādhippāyena paribbājako ‘‘sabbaṃ me nakkhamatī’’ti āha, taṃ tassa adhippāyaṃ jānantopi ajānanto viya hutvā tassa akkhare tāva dosaṃ dassentoti padesasabbaṃ sandhāya tena vuttaṃ, sabbasabbavisayaṃ katvā tattha dosaṃ gaṇhanto. Yathā loke kenaci ‘‘sabbaṃ vuttaṃ, taṃ musā’’ti vutte tassa vacanassa sabbantogadhattā musābhāvo āpajjeyya, evaṃ imassapi ‘‘sabbaṃ me nakkhamatī’’ti vadato tathā pavattā diṭṭhipi nakkhamatīti atthato āpannameva hoti. Tenāha bhagavā – ‘‘esāpi te diṭṭhi nakkhamatī’’ti. Yathā pana kenaci ‘‘sabbaṃ vuttaṃ musā’’ti vutte adhippāyānurodhinī saddappavatti, tassa vacanaṃ muñcitvā tadaññesameva musābhāvo ñāyāgato, evamidhāpi ‘‘sabbaṃ me nakkhamatī’’ti vacanato yassā diṭṭhiyā vasena ‘‘sabbaṃ me nakkhamatī’’ti tena vuttaṃ, taṃ diṭṭhiṃ muñcitvā tadaññameva yathādhippetaṃ sabbaṃ nakkhamatīti ayamattho ñāyāgato, bhagavā pana vādīvaro sukhumāya āṇiyā thūlaṃ āṇiṃ nīharanto viya upāyena tassa diṭṭhigataṃ nīharituṃ tassa adhippāyena avatvā saddavasena tāva labbhamānaṃ dosaṃ dassento ‘‘yāpi kho te’’tiādimāha. Tena vuttaṃ – ‘‘assa adhippāyaṃ muñcitvā akkhare tāva dosaṃ dassento’’ti.
பரிப்³பா³ஜகோ பன யங் ஸந்தா⁴ய ‘‘ஸப்³ப³ங் மே நக்க²மதீ’’தி மயா வுத்தங், ‘‘அயங் ஸோ’’தி யதா²வுத்ததோ³ஸபரிஹரணத்த²ங் தஸ்மிங் அத்தே² வுச்சமானே ஏஸ தோ³ஸோ ஸப்³போ³ ந ஹோதி, ஏவம்பி ஸமணோ கோ³தமோ மம வாதே³ தோ³ஸமேவ ஆரோபெய்யாதி அத்தனோ அஜ்ஜா²ஸயங் நிகு³ஹித்வா யதா²வுத்ததோ³ஸங் பரிஹரிதுகாமோ ‘‘ஏஸா மே’’திஆதி³மாஹ. தத்த² தம்பஸ்ஸ தாதி³ஸமேவாதி யங் ‘‘ஸப்³ப³ங் மே நக்க²மதீ’’தி க³ஹிதங் வத்து², தம்பி தாதி³ஸமேவ ப⁴வெய்யாதி. அயஞ்ச ஸப்³ப³ந்தோக³த⁴தி³ட்டி² மய்ஹம்பி தி³ட்டி²வத்து², தங் மே க²மெய்யவாதி. யஸ்மா பன ‘‘ஏஸாபி தி³ட்டி² துய்ஹங் நக்க²மதீ’’தி யாபி தி³ட்டி² வுத்தா ப⁴வதா கோ³தமேன, ஸாபி மய்ஹங் நக்க²மதி, தஸ்மா ஸப்³ப³ங் மே நக்க²மதேவாதி பரிப்³பா³ஜகஸ்ஸ அதி⁴ப்பாயோ. தேனாஹ – ‘‘தங் பரிஹராமீதி ஸஞ்ஞாய வத³தீ’’தி. ததா² ச வக்க²தி ‘‘தஸ்மாபி உச்சே²த³தி³ட்டி² மய்ஹங் நக்க²மதீ’’தி. ‘‘ஏஸா மே தி³ட்டீ²’’தி யா டி²திபூ⁴தா தி³ட்டி², தாய ‘‘ஸப்³ப³ங் மே நக்க²மதீ’’தி பனெத்த² ஸப்³ப³க்³க³ஹணேன க³ஹிதத்தா ஆஹ – ‘‘அத்த²தோ பனஸ்ஸ ஏஸா தி³ட்டி² ந மே க²மதீதி ஆபஜ்ஜதீ’’தி. அயங் தோ³ஸோதி த³ஸ்ஸெந்தோ ஆஹ ‘‘யஸ்ஸ பனா’’திஆதி³. ஏஸாதி தி³ட்டி². ருசிதந்தி தி³ட்டி²த³ஸ்ஸனேன அபி⁴னிவிஸித்வா ரோசெத்வா க³ஹிதங். தேன ஹி தி³ட்டி²அக்க²மேன அருசிதேன ப⁴விதப்³ப³ந்தி ஸதி தி³ட்டி²யா அக்க²மபா⁴வே ததோ தாய க³ஹிதாய க²மெய்ய ருச்செய்ய யதா², ஏவங் ஸப்³ப³ஸ்ஸ அக்க²மபா⁴வேதி அபரபா⁴கே³ ஸப்³ப³ங் க²மதி ருச்சதீதி ஆபஜ்ஜதி. ந பனேஸ தங் ஸம்படிச்ச²தீதி ஏஸ ‘‘ஸப்³ப³ங் மே நக்க²மதீ’’தி ஏவங் வத³ந்தோ உச்சே²த³வாதீ³ தங் வுத்தனயேன ஸப்³ப³ஸ்ஸ க²மனங் ருச்சனங் ந ஸம்படிச்ச²தி. ஞாயேன வுத்தமத்த²ங் கத²ங் ந ஸம்படிச்ச²தீதி ஆஹ ‘‘கேவலங் தஸ்ஸாபி உச்சே²த³தி³ட்டி²யா உச்சே²த³மேவ க³ண்ஹாதீ’’தி. ஸப்³பே³ஸஞ்ஹி த⁴ம்மானங் ஆயதிங் உப்பாத³ங் அருச்சித்வா தங் ஸந்தா⁴ய அயங் ‘‘ஸப்³ப³ங் மே நக்க²மதீ’’தி வத³தி, உச்சே²த³தி³ட்டி²கேஸு ச உச்சி²ன்னேஸு குதோ உச்சே²த³தி³ட்டி²ஸபா⁴வோதி.
Paribbājako pana yaṃ sandhāya ‘‘sabbaṃ me nakkhamatī’’ti mayā vuttaṃ, ‘‘ayaṃ so’’ti yathāvuttadosapariharaṇatthaṃ tasmiṃ atthe vuccamāne esa doso sabbo na hoti, evampi samaṇo gotamo mama vāde dosameva āropeyyāti attano ajjhāsayaṃ niguhitvā yathāvuttadosaṃ pariharitukāmo ‘‘esā me’’tiādimāha. Tattha tampassa tādisamevāti yaṃ ‘‘sabbaṃ me nakkhamatī’’ti gahitaṃ vatthu, tampi tādisameva bhaveyyāti. Ayañca sabbantogadhadiṭṭhi mayhampi diṭṭhivatthu, taṃ me khameyyavāti. Yasmā pana ‘‘esāpi diṭṭhi tuyhaṃ nakkhamatī’’ti yāpi diṭṭhi vuttā bhavatā gotamena, sāpi mayhaṃ nakkhamati, tasmā sabbaṃ me nakkhamatevāti paribbājakassa adhippāyo. Tenāha – ‘‘taṃ pariharāmīti saññāya vadatī’’ti. Tathā ca vakkhati ‘‘tasmāpi ucchedadiṭṭhi mayhaṃ nakkhamatī’’ti. ‘‘Esā me diṭṭhī’’ti yā ṭhitibhūtā diṭṭhi, tāya ‘‘sabbaṃ me nakkhamatī’’ti panettha sabbaggahaṇena gahitattā āha – ‘‘atthato panassa esā diṭṭhi na me khamatīti āpajjatī’’ti. Ayaṃ dosoti dassento āha ‘‘yassa panā’’tiādi. Esāti diṭṭhi. Rucitanti diṭṭhidassanena abhinivisitvā rocetvā gahitaṃ. Tena hi diṭṭhiakkhamena arucitena bhavitabbanti sati diṭṭhiyā akkhamabhāve tato tāya gahitāya khameyya rucceyya yathā, evaṃ sabbassa akkhamabhāveti aparabhāge sabbaṃ khamati ruccatīti āpajjati. Na panesa taṃ sampaṭicchatīti esa ‘‘sabbaṃ me nakkhamatī’’ti evaṃ vadanto ucchedavādī taṃ vuttanayena sabbassa khamanaṃ ruccanaṃ na sampaṭicchati. Ñāyena vuttamatthaṃ kathaṃ na sampaṭicchatīti āha ‘‘kevalaṃ tassāpi ucchedadiṭṭhiyā ucchedameva gaṇhātī’’ti. Sabbesañhi dhammānaṃ āyatiṃ uppādaṃ aruccitvā taṃ sandhāya ayaṃ ‘‘sabbaṃ me nakkhamatī’’ti vadati, ucchedadiṭṭhikesu ca ucchinnesu kuto ucchedadiṭṭhisabhāvoti.
தேனாதி தேன காரணேன, யஸ்மா இதே⁴கச்சே ஸத்தா ஈதி³ஸங் தி³ட்டி²ங் பக்³க³ய்ஹ திட்ட²ந்தி, தஸ்மாதி வுத்தங் ஹோதி. பஜஹனகேன வா சித்தேன ஏகஜ்ஜ²ங் க³ஹெத்வா பஜஹனகேஹி அப்பஜஹனகே நித்³தா⁴ரேதுங் ப⁴க³வா ‘‘அதோ…பே॰… ப³ஹுதரா’’தி அவோசாதி ஆஹ – ‘‘பஜஹனகேஸு நிஸ்ஸக்க’’ந்தி யதா² ‘‘பஞ்சஸீலேஹி பபா⁴வனா பஞ்ஞவந்ததரா’’தி. ‘‘ப³ஹூ’’தி வத்வா ந கேவலங் ப³ஹூ, அத² கோ² அதிவிய ப³ஹூதி த³ஸ்ஸெந்தோ ‘‘ப³ஹுதரா’’தி ஆஹ. ‘‘ப³ஹூ ஹீ’’தி நயித³ங் நிஸ்ஸக்கவசனங், அத² கோ² பச்சத்தவசனங். கத²ங் ஹி-ஸத்³தோ³தி ஆஹ ‘‘ஹி-காரோ நிபாதமத்த’’ந்தி. அனிஸ்ஸக்கவசனங் தாவ தஸ்ஸ பஜஹனகானங் ப³ஹுபா⁴வதோ தேபி பரதோ ‘‘ப³ஹுதரா’’தி வுச்சீயந்தி. மூலத³ஸ்ஸனந்தி யே தாதி³ஸங் த³ஸ்ஸனங் பட²மங் உபாதி³யந்தி, தஜ்ஜாதிகமேவ பச்சா² க³ஹிதத³ஸ்ஸனங். விஜாதியஞ்ஹி பட²மங் க³ஹிதத³ஸ்ஸனங் அப்பஹாய விஜாதியஸ்ஸ க³ஹணங் ந ஸம்ப⁴வதி விருத்³த⁴ஸ்ஸ அபி⁴னிவேஸஸ்ஸ ஸஹ அனவட்டா²னதோ . அவிருத்³த⁴ங் பன மூலத³ஸ்ஸனங் அவிஸ்ஸஜ்ஜித்வா விஸயாதி³பே⁴த³பி⁴ன்னங் அபரத³ஸ்ஸனங் க³ஹேதுங் லப்³ப⁴தி. தேனாஹ ‘‘எத்த² சா’’திஆதி³.
Tenāti tena kāraṇena, yasmā idhekacce sattā īdisaṃ diṭṭhiṃ paggayha tiṭṭhanti, tasmāti vuttaṃ hoti. Pajahanakena vā cittena ekajjhaṃ gahetvā pajahanakehi appajahanake niddhāretuṃ bhagavā ‘‘ato…pe… bahutarā’’ti avocāti āha – ‘‘pajahanakesu nissakka’’nti yathā ‘‘pañcasīlehi pabhāvanā paññavantatarā’’ti. ‘‘Bahū’’ti vatvā na kevalaṃ bahū, atha kho ativiya bahūti dassento ‘‘bahutarā’’ti āha. ‘‘Bahū hī’’ti nayidaṃ nissakkavacanaṃ, atha kho paccattavacanaṃ. Kathaṃ hi-saddoti āha ‘‘hi-kāro nipātamatta’’nti. Anissakkavacanaṃ tāva tassa pajahanakānaṃ bahubhāvato tepi parato ‘‘bahutarā’’ti vuccīyanti. Mūladassananti ye tādisaṃ dassanaṃ paṭhamaṃ upādiyanti, tajjātikameva pacchā gahitadassanaṃ. Vijātiyañhi paṭhamaṃ gahitadassanaṃ appahāya vijātiyassa gahaṇaṃ na sambhavati viruddhassa abhinivesassa saha anavaṭṭhānato . Aviruddhaṃ pana mūladassanaṃ avissajjitvā visayādibhedabhinnaṃ aparadassanaṃ gahetuṃ labbhati. Tenāha ‘‘ettha cā’’tiādi.
தத்த² கிஞ்சாபி ஏகச்சஸஸ்ஸதவாதோ³ ஸஸ்ஸதுச்சே²தா³பி⁴னிவேஸானங் வஸேன யதா²க்கமங் ஸஸ்ஸதுச்சே²த³க்³கா³ஹனஜாதிகோ, உச்சே²த³க்³கா³ஹேன பன ஸஸ்ஸதாபி⁴னிவேஸஸ்ஸ தங்கா³ஹேன ச அஸஸ்ஸதாபி⁴னிவேஸஸ்ஸ விருஜ்ஜ²னதோ உப⁴யத்த²பி ‘‘ஏகச்சஸஸ்ஸதங் வா க³ஹேதுங் ந ஸக்கா’’தி வுத்தங், ததா² ‘‘ஸஸ்ஸதங் வா உச்சே²த³ங் வா ந ஸக்கா க³ஹேது’’ந்தி ச. மூலஸஸ்ஸதஞ்ஹி பட²மங் க³ஹிதங். ஆயதனேஸுபி யோஜேதப்³ப³ந்தி பட²மங் சக்கா²யதனங் ஸஸ்ஸதந்தி க³ஹெத்வா அபரபா⁴கே³ ந கேவலங் சக்கா²யதனமேவ ஸஸ்ஸதங், ஸோதாயதனம்பி ஸஸ்ஸதங், கா⁴னாயதனாதி³பி ஸஸ்ஸதந்தி க³ண்ஹாதீதிஆதி³னா யோஜேதப்³ப³ங். ஆயதனேஸுபீதி பி-ஸத்³தே³ன தா⁴தூனங் இந்த்³ரியானம்பி கா³ஹோ த³ட்ட²ப்³போ³. இத³ங் ஸந்தா⁴யாதி ‘‘மூலே ஸஸ்ஸத’’ந்திஆதி³னா வுத்தபட²மக்³கா³ஹஸ்ஸ ஸமானஜாதியங் அபரக்³கா³ஹங் ஸந்தா⁴ய.
Tattha kiñcāpi ekaccasassatavādo sassatucchedābhinivesānaṃ vasena yathākkamaṃ sassatucchedaggāhanajātiko, ucchedaggāhena pana sassatābhinivesassa taṃgāhena ca asassatābhinivesassa virujjhanato ubhayatthapi ‘‘ekaccasassataṃ vā gahetuṃ na sakkā’’ti vuttaṃ, tathā ‘‘sassataṃ vā ucchedaṃ vā na sakkā gahetu’’nti ca. Mūlasassatañhi paṭhamaṃ gahitaṃ. Āyatanesupi yojetabbanti paṭhamaṃ cakkhāyatanaṃ sassatanti gahetvā aparabhāge na kevalaṃ cakkhāyatanameva sassataṃ, sotāyatanampi sassataṃ, ghānāyatanādipi sassatanti gaṇhātītiādinā yojetabbaṃ. Āyatanesupīti pi-saddena dhātūnaṃ indriyānampi gāho daṭṭhabbo. Idaṃ sandhāyāti ‘‘mūle sassata’’ntiādinā vuttapaṭhamaggāhassa samānajātiyaṃ aparaggāhaṃ sandhāya.
து³தியவாரே பட²மவாரே வுத்தஸதி³ஸங் வுத்தனயேனேவ வேதி³தப்³ப³ங். தத்த² ஆதீ³னவங் தி³ஸ்வாதி ‘‘யதி³ ரூபங் ஸஸ்ஸதங் ஸியா, நயித³ங் ஆபா³தா⁴ய ஸங்வத்தெய்ய. யஸ்மா ச கோ² இத³ங் ரூபங் அஸஸ்ஸதங், தஸ்மா அபி⁴ண்ஹபடிபீளனட்டே²ன உத³யவயவந்ததாய ரூபங் அனிச்சங் ஸங்க²தங் படிச்சஸமுப்பன்னங், ஸஸ்ஸதாபி⁴னிவேஸோ மிச்சா²’’திஆதி³னா தத்த² ஸஸ்ஸதவாதே³ ஆதீ³னவங் தோ³ஸங் தி³ஸ்வா. ஓளாரிகந்தி தஸ்மா படிபீளனட்டே²ன அயாதா²வக்³கா³ஹதாய ரூபங் ந ஸண்ஹங் ஓளாரிகமேவ. வேத³னாதீ³னம்பி அனிச்சாதி³பா⁴வத³ஸ்ஸனங் ரூபவேத³னாஆதீ³னங் ஸமானயோக³க்க²மத்தா. விஸ்ஸஜ்ஜேதீதி பஜஹதி.
Dutiyavāre paṭhamavāre vuttasadisaṃ vuttanayeneva veditabbaṃ. Tattha ādīnavaṃ disvāti ‘‘yadi rūpaṃ sassataṃ siyā, nayidaṃ ābādhāya saṃvatteyya. Yasmā ca kho idaṃ rūpaṃ asassataṃ, tasmā abhiṇhapaṭipīḷanaṭṭhena udayavayavantatāya rūpaṃ aniccaṃ saṅkhataṃ paṭiccasamuppannaṃ, sassatābhiniveso micchā’’tiādinā tattha sassatavāde ādīnavaṃ dosaṃ disvā. Oḷārikanti tasmā paṭipīḷanaṭṭhena ayāthāvaggāhatāya rūpaṃ na saṇhaṃ oḷārikameva. Vedanādīnampi aniccādibhāvadassanaṃ rūpavedanāādīnaṃ samānayogakkhamattā. Vissajjetīti pajahati.
திஸ்ஸோ லத்³தி⁴யோதி ஸஸ்ஸதுச்சே²த³ஏகச்சஸஸ்ஸததி³ட்டி²யோ. யஸ்மா ஸஸ்ஸததி³ட்டி²கா வட்டே ரஜ்ஜனஸ்ஸ ஆஸன்னா. ததா² ஹி தே ஓலீயந்தீதி வுச்சந்தி, ப⁴வாப⁴வதி³ட்டீ²னங் வஸேன இமேஸங் ஸத்தானங் ஸங்ஸாரதோ ஸீஸுக்கி²பனங் நத்தீ²தி ஏதாவ திஸ்ஸோ விஸேஸதோ க³ஹேதப்³பா³.
Tisso laddhiyoti sassatucchedaekaccasassatadiṭṭhiyo. Yasmā sassatadiṭṭhikā vaṭṭe rajjanassa āsannā. Tathā hi te olīyantīti vuccanti, bhavābhavadiṭṭhīnaṃ vasena imesaṃ sattānaṃ saṃsārato sīsukkhipanaṃ natthīti etāva tisso visesato gahetabbā.
இத⁴லோகங் பரலோகஞ்ச அத்தீ²தி ஜானாதீதி எத்தாவதா ஸஸ்ஸதத³ஸ்ஸனஸ்ஸ அப்பஸாவஜ்ஜதாகாரணமாஹ, வட்டங் அஸ்ஸாதே³தி, அபி⁴னந்த³தீதி இமினா த³ந்த⁴விராக³தாய. தேனாஹ ‘‘தஸ்மா’’திஆதி³. இத⁴லோகங் பரலோகஞ்ச அத்தீ²தி ஜானாதீதி இமினா தாஸு தாஸு க³தீஸு ஸத்தானங் ஸங்ஸரணங் படிக்கி²பதீதி த³ஸ்ஸேதி, ஸுகதது³க்கடானங் கம்மானங் ப²லங் அத்தீ²தி ஜானாதீதி இமினா கம்மப²லங். குஸலங் ந கரோதீதி இமினா கம்மங், அகுஸலங் கரொந்தோ ந பா⁴யதீதி இமினா புஞ்ஞாபுஞ்ஞானி ஸபா⁴வதோ ஜாயந்தீதி த³ஸ்ஸேதி. வட்டங் அஸ்ஸாதே³தி அபி⁴னந்த³தி தன்னின்னபா⁴வதோ . ஸீக⁴ங் லத்³தி⁴ங் ஜஹிதுங் ந ஸக்கோதி வட்டுபச்சே²த³ஸ்ஸ அருச்சனதோ. உச்சே²த³வாதீ³ ஹி தஸ்மிங் ப⁴வே உச்சே²த³ங் மஞ்ஞதி. ததோ பரங் இத⁴லோகங் பரலோகஞ்ச அத்தீ²தி ஜானாதி ஸுகதது³க்கடானங் ப²லங் அத்தீ²தி ஜானாதி கம்மப²லவாதீ³பா⁴வதோ. யேபு⁴ய்யேன ஹி உச்சே²த³வாதீ³ ஸபா⁴வனியதியதி³ச்சா²பி⁴னிவேஸேஸு அஞ்ஞத்ராபி⁴னிவேஸோ ஹோதி. ஸீக⁴ங் த³ஸ்ஸனங் பஜஹதி வட்டாபி⁴ரதியா அபா⁴வதோ. பாரமியோ பூரேதுங் ஸக்கொந்தோ பச்சேகபு³த்³தோ⁴ ஹுத்வா, லோகவோஹாரமத்தேனேவ ஸோ ஸம்மாஸம்பு³த்³தோ⁴ ஹுத்வா பரினிப்³பா³யதீதி யோஜனா. அஸக்கொந்தோதி பு³த்³தோ⁴ ஹோதுங் அஸக்கொந்தோ. அபி⁴னீஹாரங் கத்வா அக்³க³ஸாவகாதி³பா⁴வஸ்ஸ அபி⁴னீஹாரங் ஸம்பாதெ³த்வா. ஸாவகோ ஹுத்வாதி அக்³க³ஸாவகோ மஹாஸாவகோ ஹுத்வா, தத்தா²பி தேவிஜ்ஜோ ச²ளபி⁴ஞ்ஞோ படிஸம்பி⁴தா³ப்பத்தோ வா ஸுக்க²விபஸ்ஸகோ ஏவ வா பு³த்³த⁴ஸாவகோ ஹுத்வா பரினிப்³பா³யதி. ஸப்³ப³மித³ங் உச்சே²த³வாதி³னோ கல்யாணமித்தனிஸ்ஸயேன ஸம்மத்தனியாமோக்கமனே கி²ப்பவிராக³தாத³ஸ்ஸனத்த²ங் ஆக³தங். தேனாஹ ‘‘தஸ்மா’’திஆதி³.
Idhalokaṃ paralokañca atthīti jānātīti ettāvatā sassatadassanassa appasāvajjatākāraṇamāha, vaṭṭaṃ assādeti, abhinandatīti iminā dandhavirāgatāya. Tenāha ‘‘tasmā’’tiādi. Idhalokaṃ paralokañca atthīti jānātīti iminā tāsu tāsu gatīsu sattānaṃ saṃsaraṇaṃ paṭikkhipatīti dasseti, sukatadukkaṭānaṃ kammānaṃ phalaṃ atthīti jānātīti iminā kammaphalaṃ. Kusalaṃ na karotīti iminā kammaṃ, akusalaṃ karonto na bhāyatīti iminā puññāpuññāni sabhāvato jāyantīti dasseti. Vaṭṭaṃ assādeti abhinandati tanninnabhāvato . Sīghaṃ laddhiṃ jahituṃ na sakkoti vaṭṭupacchedassa aruccanato. Ucchedavādī hi tasmiṃ bhave ucchedaṃ maññati. Tato paraṃ idhalokaṃ paralokañca atthīti jānāti sukatadukkaṭānaṃ phalaṃ atthīti jānāti kammaphalavādībhāvato. Yebhuyyena hi ucchedavādī sabhāvaniyatiyadicchābhinivesesu aññatrābhiniveso hoti. Sīghaṃ dassanaṃ pajahati vaṭṭābhiratiyā abhāvato. Pāramiyo pūretuṃ sakkonto paccekabuddho hutvā, lokavohāramatteneva so sammāsambuddho hutvā parinibbāyatīti yojanā. Asakkontoti buddho hotuṃ asakkonto. Abhinīhāraṃkatvā aggasāvakādibhāvassa abhinīhāraṃ sampādetvā. Sāvako hutvāti aggasāvako mahāsāvako hutvā, tatthāpi tevijjo chaḷabhiñño paṭisambhidāppatto vā sukkhavipassako eva vā buddhasāvako hutvā parinibbāyati. Sabbamidaṃ ucchedavādino kalyāṇamittanissayena sammattaniyāmokkamane khippavirāgatādassanatthaṃ āgataṃ. Tenāha ‘‘tasmā’’tiādi.
202. கஞ்ஜியேனேவாதி ஆரனாளேன. கஞ்ஜியஸதி³ஸேன உச்சே²த³த³ஸ்ஸனேன. பூரிதோதி பரிபுண்ணஜ்ஜா²ஸயோ. ஸோதி பரிப்³பா³ஜகோ. அப்பஹாயாதி அபி⁴ந்தி³த்வா. விக்³க³ஹோதி கலஹோ இத³மேவ ஸச்சங், மோக⁴மஞ்ஞந்தி அஞ்ஞமஞ்ஞங் விருத்³த⁴க்³கா³ஹோதி கத்வா. விவாத³ந்தி விருத்³த⁴வாத³ங். விகா⁴தந்தி விரோத⁴ஹேதுகங் சித்தவிகா⁴தங். விஹேஸந்தி விக்³க³ஹவிவாத³னிமித்தங் காயிகங் சேதஸிகஞ்ச கிலமத²ங். ஆதீ³னவங் தி³ஸ்வாதி ஏதாஸங் தி³ட்டீ²னங் ஏவரூபோ ஆதீ³னவோ, அனிய்யானிகபா⁴வதாய பன ஸம்பதி ஆயதிஞ்ச மஹாதீ³னவோதி ஏவங் ஆதீ³னவங் தி³ஸ்வா.
202.Kañjiyenevāti āranāḷena. Kañjiyasadisena ucchedadassanena. Pūritoti paripuṇṇajjhāsayo. Soti paribbājako. Appahāyāti abhinditvā. Viggahoti kalaho idameva saccaṃ, moghamaññanti aññamaññaṃ viruddhaggāhoti katvā. Vivādanti viruddhavādaṃ. Vighātanti virodhahetukaṃ cittavighātaṃ. Vihesanti viggahavivādanimittaṃ kāyikaṃ cetasikañca kilamathaṃ. Ādīnavaṃ disvāti etāsaṃ diṭṭhīnaṃ evarūpo ādīnavo, aniyyānikabhāvatāya pana sampati āyatiñca mahādīnavoti evaṃ ādīnavaṃ disvā.
205. ‘‘ஏஸோஹமஸ்மி, ஏஸோ மே அத்தா’’திஆதி³னா (ம॰ நி॰ 1.241; ஸங்॰ நி॰ 3.8) காயங் அன்வேதீதி காயன்வயோ, ஸோயேவ, தஸ்ஸ வா ஸமூஹோ காயன்வயதா, காயபடிப³த்³தோ⁴ கிலேஸோ. தேனாஹ ‘‘காயங்…பே॰… அத்தோ²’’தி.
205. ‘‘Esohamasmi, eso me attā’’tiādinā (ma. ni. 1.241; saṃ. ni. 3.8) kāyaṃ anvetīti kāyanvayo, soyeva, tassa vā samūho kāyanvayatā, kāyapaṭibaddho kileso. Tenāha ‘‘kāyaṃ…pe… attho’’ti.
அஸம்மிஸ்ஸபா⁴வந்தி அஸங்கரதோ வவத்தி²தபா⁴வங். தேன தாஸங் யதா²ஸகங் பச்சயானங் உப்பஜ்ஜித்வா விக³மங் த³ஸ்ஸேதி. ஏவஞ்ஹி தாஸங் கதா³சிபி ஸங்கரோ நத்தி². தேனாஹ ‘‘தத்ராயங் ஸங்கே²பத்தோ²’’திஆதி³. ஸரூபங் அக்³க³ஹெத்வா ‘‘அஞ்ஞா வேத³னா’’தி அனியமேன வுத்தத்தா தமேவ விக³மங் த³ஸ்ஸெந்தோ ‘‘அனுப்பன்னாவ ஹொந்தி அந்தரஹிதா வா’’தி ஆஹ. ஸரூபதோ நியமெத்வா வுச்சமானே காசி அனுப்பன்னா வா ஹோதி, காசி அந்தரஹிதா வாதி. சுண்ணவிசுண்ணபா⁴வத³ஸ்ஸனத்த²ந்தி க²ணே க²ணே பி⁴ஜ்ஜமானபா⁴வத³ஸ்ஸனத்த²ங்.
Asammissabhāvanti asaṅkarato vavatthitabhāvaṃ. Tena tāsaṃ yathāsakaṃ paccayānaṃ uppajjitvā vigamaṃ dasseti. Evañhi tāsaṃ kadācipi saṅkaro natthi. Tenāha ‘‘tatrāyaṃ saṅkhepattho’’tiādi. Sarūpaṃ aggahetvā ‘‘aññā vedanā’’ti aniyamena vuttattā tameva vigamaṃ dassento ‘‘anuppannāva honti antarahitā vā’’ti āha. Sarūpato niyametvā vuccamāne kāci anuppannā vā hoti, kāci antarahitā vāti. Cuṇṇavicuṇṇabhāvadassanatthanti khaṇe khaṇe bhijjamānabhāvadassanatthaṃ.
ந கேனசி ஸங்வத³தீதி கேனசி புக்³க³லேன ஸத்³தி⁴ங் தி³ட்டி²ராக³வஸேன ஸங்கிலிட்ட²சித்தோ ந வத³தி. தேனாஹ ‘‘ஸஸ்ஸதங் க³ஹெத்வா’’திஆதி³. ந விவத³தீதி விருத்³த⁴பா⁴வோ ஹுத்வா ந விவத³தி. பரிவத்தெத்வாதி உச்சே²த³ங் க³ஹெத்வா ஏகச்சஸஸ்ஸதங் க³ஹெத்வா ஏவங் வுத்தனயேன தயோபி வாதா³ பரிவத்தெத்வா யோஜேதப்³பா³ . தேன வோஹரதீதி தேன லோகவோஹாரேன லோகஸமஞ்ஞங் அனதிதா⁴வந்தோ ஸத்தோ புரிஸோ புக்³க³லோதிஆதி³னா வோஹரதி, ந பன இதோ பா³ஹிரகா விய அபி⁴னிவிஸதி. தேனாஹ ‘‘அபராமஸந்தோ’’தி. கஞ்சி த⁴ம்மந்தி ரூபாதீ³ஸு ஏகங் த⁴ம்மம்பி. பராமாஸக்³கா³ஹேன அக்³க³ண்ஹந்தோதி ‘‘நிச்ச’’ந்திஆதி³னா, ‘‘ஏதங் மமா’’திஆதி³னா ச த⁴ம்மஸபா⁴வங் அதிக்கமித்வா பரதோ ஆமஸித்வா க³ஹணேன அக்³க³ண்ஹந்தோ.
Na kenacisaṃvadatīti kenaci puggalena saddhiṃ diṭṭhirāgavasena saṃkiliṭṭhacitto na vadati. Tenāha ‘‘sassataṃ gahetvā’’tiādi. Na vivadatīti viruddhabhāvo hutvā na vivadati. Parivattetvāti ucchedaṃ gahetvā ekaccasassataṃ gahetvā evaṃ vuttanayena tayopi vādā parivattetvā yojetabbā . Tena voharatīti tena lokavohārena lokasamaññaṃ anatidhāvanto satto puriso puggalotiādinā voharati, na pana ito bāhirakā viya abhinivisati. Tenāha ‘‘aparāmasanto’’ti. Kañci dhammanti rūpādīsu ekaṃ dhammampi. Parāmāsaggāhena aggaṇhantoti ‘‘nicca’’ntiādinā, ‘‘etaṃ mamā’’tiādinā ca dhammasabhāvaṃ atikkamitvā parato āmasitvā gahaṇena aggaṇhanto.
கதாவீதி கதகிச்சோ. ஸோ வதெ³ய்யாதி கீ²ணாஸவோ பி⁴க்கு² அஹங்காரமமங்காரேஸு ஸப்³ப³ஸோ ஸமுச்சி²ன்னேஸுபி அஹங் வதா³மீதி வதெ³ய்ய. தத்த² அஹந்தி நியகஜ்ஜ²த்தஸந்தானே. மமந்தி தஸ்ஸ ஸந்தகபூ⁴தே வத்து²ஸ்மிங் லோகனிருள்ஹே. ஸமஞ்ஞந்தி தத்த² ஸுகுஸலதாய லோகே ஸமஞ்ஞா குஸலோ விதி³த்வா. வோஹாரமத்தேனாதி கேவலங் பச்சேகபு³த்³தோ⁴ ஹுத்வா மஹாபோ³தி⁴பாரமியோ பூரேதுங் அஸக்கொந்தோ ஸாவகோ ஹுத்வா தே³ஸவோஹாரமத்தேன ந அப்பஹீனதண்ஹோ விய அந்த⁴புது²ஜ்ஜனோ அபி⁴னிவேஸனவஸேன.
Katāvīti katakicco. So vadeyyāti khīṇāsavo bhikkhu ahaṅkāramamaṅkāresu sabbaso samucchinnesupi ahaṃ vadāmīti vadeyya. Tattha ahanti niyakajjhattasantāne. Mamanti tassa santakabhūte vatthusmiṃ lokaniruḷhe. Samaññanti tattha sukusalatāya loke samaññā kusalo viditvā. Vohāramattenāti kevalaṃ paccekabuddho hutvā mahābodhipāramiyo pūretuṃ asakkonto sāvako hutvā desavohāramattena na appahīnataṇho viya andhaputhujjano abhinivesanavasena.
206. ஸஸ்ஸதாதீ³ஸூதி ஸஸ்ஸதாபி⁴னிவேஸாதீ³ஸு. தேஸங் தேஸங் த⁴ம்மானந்தி நித்³தா⁴ரணே ஸாமிவசனங். ஸஸ்ஸதங் அபி⁴ஞ்ஞாயாதி ஸஸ்ஸததி³ட்டி²ங் ஸமுத³யதோ அத்த²ங்க³மதோ அஸ்ஸாத³தோ நிஸ்ஸரணதோ அபி⁴விஸிட்டா²ய பஞ்ஞாய படிவிஜ்ஜி²த்வா. பஹானந்தி அச்சந்தப்பஹானங் ஸமுச்சே²த³ங். ரூபஸ்ஸ பஹானந்தி ரூபஸ்ஸ தப்படிப³த்³த⁴ஸஞ்ஞோஜனப்பஹானேன பஹானங். அனுப்பாத³னிரோதே⁴ன நிருத்³தே⁴ஹி ஆஸவேஹி அக்³க³ஹெத்வாவ சித்தங் விமுச்சி. ‘‘ஆஸவேஹி சித்தங் விமுச்சீ’’தி எத்த² கிஞ்சிபி அக்³க³ஹெத்வா அஸேஸெத்வா. ஸோளஸ பஞ்ஞாதி மஹாபஞ்ஞாதி³கா ஸோளஸ பஞ்ஞா. சதுரங்க³ஸமன்னாக³தோதி புண்ணஉபோஸத²தி³வஸதா, கேனசி அனாமந்திதமேவ அனேகஸதானங்யேவ அனேகஸஹஸ்ஸானங் வா பி⁴க்கூ²னங் ஸன்னிபதிததா, ஸப்³பே³ஸங் ஏஹிபி⁴க்கு²பா⁴வேன உபஸம்பன்னதா, ச²ளபி⁴ஞ்ஞதா சாதி. தேனாஹ ‘‘தத்ரிமானி அங்கா³னீ’’திஆதி³. யங் பனெத்த² அத்த²தோ அவிப⁴த்தங், தங் ஸுவிஞ்ஞெய்யமேவ.
206.Sassatādīsūti sassatābhinivesādīsu. Tesaṃ tesaṃ dhammānanti niddhāraṇe sāmivacanaṃ. Sassataṃ abhiññāyāti sassatadiṭṭhiṃ samudayato atthaṅgamato assādato nissaraṇato abhivisiṭṭhāya paññāya paṭivijjhitvā. Pahānanti accantappahānaṃ samucchedaṃ. Rūpassa pahānanti rūpassa tappaṭibaddhasaññojanappahānena pahānaṃ. Anuppādanirodhena niruddhehi āsavehi aggahetvāva cittaṃ vimucci. ‘‘Āsavehi cittaṃ vimuccī’’ti ettha kiñcipi aggahetvā asesetvā. Soḷasa paññāti mahāpaññādikā soḷasa paññā. Caturaṅgasamannāgatoti puṇṇauposathadivasatā, kenaci anāmantitameva anekasatānaṃyeva anekasahassānaṃ vā bhikkhūnaṃ sannipatitatā, sabbesaṃ ehibhikkhubhāvena upasampannatā, chaḷabhiññatā cāti. Tenāha ‘‘tatrimāni aṅgānī’’tiādi. Yaṃ panettha atthato avibhattaṃ, taṃ suviññeyyameva.
தீ³க⁴னக²ஸுத்தவண்ணனாய லீனத்த²ப்பகாஸனா ஸமத்தா.
Dīghanakhasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. தீ³க⁴னக²ஸுத்தங் • 4. Dīghanakhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 4. தீ³க⁴னக²ஸுத்தவண்ணனா • 4. Dīghanakhasuttavaṇṇanā
