| Library / Tipiṭaka / д̇ибидага • Tipiṭaka / маж̇жхиманигааяа (дийгаа) • Majjhimanikāya (ṭīkā) |
4. д̣̇ийгханакасуд̇д̇аван̣н̣анаа
4. Dīghanakhasuttavaṇṇanā
201. кананам̣ кад̇ам̣, суугарасса кад̇ам̣ зд̇т̇а ад̇т̇ийд̇и суугаракад̇аа, суугарасса ваа имасмим̣ б̣уд̣̇д̇хуббаад̣̇з батамам̣ кад̇ам̣ убаад̣̇ааяа суугаракад̇аа, д̇ааяа. звам̣наамагзд̇и звам̣ ид̇т̇илин̇г̇авасзна лад̣̇д̇ханаамагз. бам̣суд̇ход̇зд̇и д̇ход̇абам̣сугз. од̇арид̇ваа абхирухид̇аб̣б̣анд̇и багад̇ибхуумид̇о анзгзхи собаанапалагзхи од̇арид̇ваа буна лзн̣ад̣̇ваарам̣ гад̇ибаязхи абхирухид̇аб̣б̣ам̣.
201. Khananaṃ khataṃ, sūkarassa khataṃ ettha atthīti sūkarakhatā, sūkarassa vā imasmiṃ buddhuppāde paṭhamaṃ khataṃ upādāya sūkarakhatā, tāya. Evaṃnāmaketi evaṃ itthiliṅgavasena laddhanāmake. Paṃsudhoteti dhotapaṃsuke. Otaritvā abhiruhitabbanti pakatibhūmito anekehi sopānaphalakehi otaritvā puna leṇadvāraṃ katipayehi abhiruhitabbaṃ.
тид̇аговаад̇и маад̇уласса тид̇ад̇д̇аа д̇ад̇т̇а саг̇ааравасабад̇иссавасзна тид̇агова. гин̃жааби саб̣б̣а-сад̣̇д̣̇о ависзсад̇о анавасзсабарияаад̣̇ааяаго, вад̇т̇уад̇хиббааяаанурод̇хий бана сад̣̇д̣̇аббаяог̇од̇и д̇амад̇т̇ам̣ санд̇хааяа бариб̣б̣ааж̇аго ‘‘саб̣б̣ам̣ мз нагкамад̇ий’’д̇и ааха. яаа логз мануссаубабад̇д̇ияод̇иаад̣̇игаа убабад̇д̇ияо, д̇аа анад̇т̇асамуд̣̇ааг̇ад̇аа д̇ад̇т̇а д̇ад̇т̇зва сад̇д̇аанам̣ ужчиж̇ж̇анад̇о, д̇асмаа самаяаваад̣̇ийхи вужжамаанаа саб̣б̣аа ааяад̇им̣ уббаж̇ж̇анаубабад̇д̇и на ход̇и. ж̇алаб̣уб̣б̣ул̣агаа вияа хи имз сад̇д̇аа д̇ад̇т̇а д̇ад̇т̇а самаяз уббаж̇ж̇ид̇ваа бхиж̇ж̇анд̇и, д̇зсам̣ д̇ад̇т̇а бадисанд̇хи над̇т̇ийд̇и асса ад̇хиббааяо. д̇знааха ‘‘бадисанд̇хияо’’д̇иаад̣̇и. асса ад̇хиббааяам̣ мун̃жид̇ваад̇и язнаад̇хиббааязна бариб̣б̣ааж̇аго ‘‘саб̣б̣ам̣ мз нагкамад̇ий’’д̇и ааха, д̇ам̣ д̇асса ад̇хиббааяам̣ ж̇аананд̇оби аж̇аананд̇о вияа худ̇ваа д̇асса агкарз д̇аава д̣̇осам̣ д̣̇ассзнд̇од̇и бад̣̇зсасаб̣б̣ам̣ санд̇хааяа д̇зна вуд̇д̇ам̣, саб̣б̣асаб̣б̣ависаяам̣ гад̇ваа д̇ад̇т̇а д̣̇осам̣ г̇ан̣ханд̇о. яат̇аа логз гзнажи ‘‘саб̣б̣ам̣ вуд̇д̇ам̣, д̇ам̣ мусаа’’д̇и вуд̇д̇з д̇асса важанасса саб̣б̣анд̇ог̇ад̇хад̇д̇аа мусаабхааво аабаж̇ж̇зяяа, звам̣ имассаби ‘‘саб̣б̣ам̣ мз нагкамад̇ий’’д̇и вад̣̇ад̇о д̇ат̇аа бавад̇д̇аа д̣̇идтиби нагкамад̇ийд̇и ад̇т̇ад̇о аабаннамзва ход̇и. д̇знааха бхаг̇аваа – ‘‘зсааби д̇з д̣̇идти нагкамад̇ий’’д̇и. яат̇аа бана гзнажи ‘‘саб̣б̣ам̣ вуд̇д̇ам̣ мусаа’’д̇и вуд̇д̇з ад̇хиббааяаанурод̇хиний сад̣̇д̣̇аббавад̇д̇и, д̇асса важанам̣ мун̃жид̇ваа д̇ад̣̇ан̃н̃зсамзва мусаабхааво н̃ааяааг̇ад̇о, звамид̇хааби ‘‘саб̣б̣ам̣ мз нагкамад̇ий’’д̇и важанад̇о яассаа д̣̇идтияаа васзна ‘‘саб̣б̣ам̣ мз нагкамад̇ий’’д̇и д̇зна вуд̇д̇ам̣, д̇ам̣ д̣̇идтим̣ мун̃жид̇ваа д̇ад̣̇ан̃н̃амзва яат̇аад̇хиббзд̇ам̣ саб̣б̣ам̣ нагкамад̇ийд̇и аяамад̇т̇о н̃ааяааг̇ад̇о, бхаг̇аваа бана ваад̣̇ийваро сукумааяа аан̣ияаа т̇уулам̣ аан̣им̣ нийхаранд̇о вияа убааязна д̇асса д̣̇идтиг̇ад̇ам̣ нийхарид̇ум̣ д̇асса ад̇хиббааязна авад̇ваа сад̣̇д̣̇авасзна д̇аава лаб̣бхамаанам̣ д̣̇осам̣ д̣̇ассзнд̇о ‘‘яааби ко д̇з’’д̇иаад̣̇имааха. д̇зна вуд̇д̇ам̣ – ‘‘асса ад̇хиббааяам̣ мун̃жид̇ваа агкарз д̇аава д̣̇осам̣ д̣̇ассзнд̇о’’д̇и.
Ṭhitakovāti mātulassa ṭhitattā tattha sagāravasapatissavasena ṭhitakova. Kiñcāpi sabba-saddo avisesato anavasesapariyādāyako, vatthuadhippāyānurodhī pana saddappayogoti tamatthaṃ sandhāya paribbājako ‘‘sabbaṃ me nakkhamatī’’ti āha. Yā loke manussaupapattiyotiādikā upapattiyo, tā anatthasamudāgatā tattha tattheva sattānaṃ ucchijjanato, tasmā samayavādīhi vuccamānā sabbā āyatiṃ uppajjanaupapatti na hoti. Jalabubbuḷakā viya hi ime sattā tattha tattha samaye uppajjitvā bhijjanti, tesaṃ tattha paṭisandhi natthīti assa adhippāyo. Tenāha ‘‘paṭisandhiyo’’tiādi. Assa adhippāyaṃ muñcitvāti yenādhippāyena paribbājako ‘‘sabbaṃ me nakkhamatī’’ti āha, taṃ tassa adhippāyaṃ jānantopi ajānanto viya hutvā tassa akkhare tāva dosaṃ dassentoti padesasabbaṃ sandhāya tena vuttaṃ, sabbasabbavisayaṃ katvā tattha dosaṃ gaṇhanto. Yathā loke kenaci ‘‘sabbaṃ vuttaṃ, taṃ musā’’ti vutte tassa vacanassa sabbantogadhattā musābhāvo āpajjeyya, evaṃ imassapi ‘‘sabbaṃ me nakkhamatī’’ti vadato tathā pavattā diṭṭhipi nakkhamatīti atthato āpannameva hoti. Tenāha bhagavā – ‘‘esāpi te diṭṭhi nakkhamatī’’ti. Yathā pana kenaci ‘‘sabbaṃ vuttaṃ musā’’ti vutte adhippāyānurodhinī saddappavatti, tassa vacanaṃ muñcitvā tadaññesameva musābhāvo ñāyāgato, evamidhāpi ‘‘sabbaṃ me nakkhamatī’’ti vacanato yassā diṭṭhiyā vasena ‘‘sabbaṃ me nakkhamatī’’ti tena vuttaṃ, taṃ diṭṭhiṃ muñcitvā tadaññameva yathādhippetaṃ sabbaṃ nakkhamatīti ayamattho ñāyāgato, bhagavā pana vādīvaro sukhumāya āṇiyā thūlaṃ āṇiṃ nīharanto viya upāyena tassa diṭṭhigataṃ nīharituṃ tassa adhippāyena avatvā saddavasena tāva labbhamānaṃ dosaṃ dassento ‘‘yāpi kho te’’tiādimāha. Tena vuttaṃ – ‘‘assa adhippāyaṃ muñcitvā akkhare tāva dosaṃ dassento’’ti.
бариб̣б̣ааж̇аго бана яам̣ санд̇хааяа ‘‘саб̣б̣ам̣ мз нагкамад̇ий’’д̇и маяаа вуд̇д̇ам̣, ‘‘аяам̣ со’’д̇и яат̇аавуд̇д̇ад̣̇осабарихаран̣ад̇т̇ам̣ д̇асмим̣ ад̇т̇з вужжамаанз зса д̣̇осо саб̣б̣о на ход̇и, звамби саман̣о г̇од̇амо мама ваад̣̇з д̣̇осамзва ааробзяяаад̇и ад̇д̇ано аж̇жхаасаяам̣ ниг̇ухид̇ваа яат̇аавуд̇д̇ад̣̇осам̣ барихарид̇угаамо ‘‘зсаа мз’’д̇иаад̣̇имааха. д̇ад̇т̇а д̇амбасса д̇аад̣̇исамзваад̇и яам̣ ‘‘саб̣б̣ам̣ мз нагкамад̇ий’’д̇и г̇ахид̇ам̣ вад̇т̇у, д̇амби д̇аад̣̇исамзва бхавзяяаад̇и. аяан̃жа саб̣б̣анд̇ог̇ад̇хад̣̇идти маяхамби д̣̇идтивад̇т̇у, д̇ам̣ мз камзяяаваад̇и. яасмаа бана ‘‘зсааби д̣̇идти д̇уяхам̣ нагкамад̇ий’’д̇и яааби д̣̇идти вуд̇д̇аа бхавад̇аа г̇од̇амзна, сааби маяхам̣ нагкамад̇и, д̇асмаа саб̣б̣ам̣ мз нагкамад̇зваад̇и бариб̣б̣ааж̇агасса ад̇хиббааяо. д̇знааха – ‘‘д̇ам̣ барихараамийд̇и сан̃н̃ааяа вад̣̇ад̇ий’’д̇и. д̇ат̇аа жа вагкад̇и ‘‘д̇асмааби ужчзд̣̇ад̣̇идти маяхам̣ нагкамад̇ий’’д̇и. ‘‘зсаа мз д̣̇идтий’’д̇и яаа тид̇ибхууд̇аа д̣̇идти, д̇ааяа ‘‘саб̣б̣ам̣ мз нагкамад̇ий’’д̇и банзд̇т̇а саб̣б̣аг̇г̇ахан̣зна г̇ахид̇ад̇д̇аа ааха – ‘‘ад̇т̇ад̇о банасса зсаа д̣̇идти на мз камад̇ийд̇и аабаж̇ж̇ад̇ий’’д̇и. аяам̣ д̣̇осод̇и д̣̇ассзнд̇о ааха ‘‘яасса банаа’’д̇иаад̣̇и. зсаад̇и д̣̇идти. ружид̇анд̇и д̣̇идтид̣̇ассанзна абхинивисид̇ваа рожзд̇ваа г̇ахид̇ам̣. д̇зна хи д̣̇идтиагкамзна аружид̇зна бхавид̇аб̣б̣анд̇и сад̇и д̣̇идтияаа агкамабхаавз д̇ад̇о д̇ааяа г̇ахид̇ааяа камзяяа ружжзяяа яат̇аа, звам̣ саб̣б̣асса агкамабхаавзд̇и абарабхааг̇з саб̣б̣ам̣ камад̇и ружжад̇ийд̇и аабаж̇ж̇ад̇и. на банзса д̇ам̣ самбадижчад̇ийд̇и зса ‘‘саб̣б̣ам̣ мз нагкамад̇ий’’д̇и звам̣ вад̣̇анд̇о ужчзд̣̇аваад̣̇ий д̇ам̣ вуд̇д̇анаязна саб̣б̣асса каманам̣ ружжанам̣ на самбадижчад̇и. н̃ааязна вуд̇д̇амад̇т̇ам̣ гат̇ам̣ на самбадижчад̇ийд̇и ааха ‘‘гзвалам̣ д̇ассааби ужчзд̣̇ад̣̇идтияаа ужчзд̣̇амзва г̇ан̣хаад̇ий’’д̇и. саб̣б̣зсан̃хи д̇хаммаанам̣ ааяад̇им̣ уббаад̣̇ам̣ аружжид̇ваа д̇ам̣ санд̇хааяа аяам̣ ‘‘саб̣б̣ам̣ мз нагкамад̇ий’’д̇и вад̣̇ад̇и, ужчзд̣̇ад̣̇идтигзсу жа ужчиннзсу гуд̇о ужчзд̣̇ад̣̇идтисабхаавод̇и.
Paribbājako pana yaṃ sandhāya ‘‘sabbaṃ me nakkhamatī’’ti mayā vuttaṃ, ‘‘ayaṃ so’’ti yathāvuttadosapariharaṇatthaṃ tasmiṃ atthe vuccamāne esa doso sabbo na hoti, evampi samaṇo gotamo mama vāde dosameva āropeyyāti attano ajjhāsayaṃ niguhitvā yathāvuttadosaṃ pariharitukāmo ‘‘esā me’’tiādimāha. Tattha tampassa tādisamevāti yaṃ ‘‘sabbaṃ me nakkhamatī’’ti gahitaṃ vatthu, tampi tādisameva bhaveyyāti. Ayañca sabbantogadhadiṭṭhi mayhampi diṭṭhivatthu, taṃ me khameyyavāti. Yasmā pana ‘‘esāpi diṭṭhi tuyhaṃ nakkhamatī’’ti yāpi diṭṭhi vuttā bhavatā gotamena, sāpi mayhaṃ nakkhamati, tasmā sabbaṃ me nakkhamatevāti paribbājakassa adhippāyo. Tenāha – ‘‘taṃ pariharāmīti saññāya vadatī’’ti. Tathā ca vakkhati ‘‘tasmāpi ucchedadiṭṭhi mayhaṃ nakkhamatī’’ti. ‘‘Esā me diṭṭhī’’ti yā ṭhitibhūtā diṭṭhi, tāya ‘‘sabbaṃ me nakkhamatī’’ti panettha sabbaggahaṇena gahitattā āha – ‘‘atthato panassa esā diṭṭhi na me khamatīti āpajjatī’’ti. Ayaṃ dosoti dassento āha ‘‘yassa panā’’tiādi. Esāti diṭṭhi. Rucitanti diṭṭhidassanena abhinivisitvā rocetvā gahitaṃ. Tena hi diṭṭhiakkhamena arucitena bhavitabbanti sati diṭṭhiyā akkhamabhāve tato tāya gahitāya khameyya rucceyya yathā, evaṃ sabbassa akkhamabhāveti aparabhāge sabbaṃ khamati ruccatīti āpajjati. Na panesa taṃ sampaṭicchatīti esa ‘‘sabbaṃ me nakkhamatī’’ti evaṃ vadanto ucchedavādī taṃ vuttanayena sabbassa khamanaṃ ruccanaṃ na sampaṭicchati. Ñāyena vuttamatthaṃ kathaṃ na sampaṭicchatīti āha ‘‘kevalaṃ tassāpi ucchedadiṭṭhiyā ucchedameva gaṇhātī’’ti. Sabbesañhi dhammānaṃ āyatiṃ uppādaṃ aruccitvā taṃ sandhāya ayaṃ ‘‘sabbaṃ me nakkhamatī’’ti vadati, ucchedadiṭṭhikesu ca ucchinnesu kuto ucchedadiṭṭhisabhāvoti.
д̇знаад̇и д̇зна гааран̣зна, яасмаа ид̇хзгажжз сад̇д̇аа ийд̣̇исам̣ д̣̇идтим̣ баг̇г̇аяха д̇идтанд̇и, д̇асмаад̇и вуд̇д̇ам̣ ход̇и. баж̇аханагзна ваа жид̇д̇зна згаж̇жхам̣ г̇ахзд̇ваа баж̇аханагзхи аббаж̇аханагз нид̣̇д̇хаарзд̇ум̣ бхаг̇аваа ‘‘ад̇о…бз… б̣ахуд̇араа’’д̇и авожаад̇и ааха – ‘‘баж̇аханагзсу ниссагга’’нд̇и яат̇аа ‘‘бан̃жасийлзхи бабхааванаа бан̃н̃аванд̇ад̇араа’’д̇и. ‘‘б̣ахуу’’д̇и вад̇ваа на гзвалам̣ б̣ахуу, ат̇а ко ад̇ивияа б̣ахууд̇и д̣̇ассзнд̇о ‘‘б̣ахуд̇араа’’д̇и ааха. ‘‘б̣ахуу хий’’д̇и наяид̣̇ам̣ ниссаггаважанам̣, ат̇а ко бажжад̇д̇аважанам̣. гат̇ам̣ хи-сад̣̇д̣̇од̇и ааха ‘‘хи-гааро нибаад̇амад̇д̇а’’нд̇и. аниссаггаважанам̣ д̇аава д̇асса баж̇аханагаанам̣ б̣ахубхаавад̇о д̇зби барад̇о ‘‘б̣ахуд̇араа’’д̇и вужжийяанд̇и. муулад̣̇ассананд̇и яз д̇аад̣̇исам̣ д̣̇ассанам̣ батамам̣ убаад̣̇ияанд̇и, д̇аж̇ж̇аад̇игамзва бажчаа г̇ахид̇ад̣̇ассанам̣. виж̇аад̇ияан̃хи батамам̣ г̇ахид̇ад̣̇ассанам̣ аббахааяа виж̇аад̇ияасса г̇ахан̣ам̣ на самбхавад̇и вируд̣̇д̇хасса абхинивзсасса саха анавадтаанад̇о . авируд̣̇д̇хам̣ бана муулад̣̇ассанам̣ ависсаж̇ж̇ид̇ваа висаяаад̣̇ибхзд̣̇абхиннам̣ абарад̣̇ассанам̣ г̇ахзд̇ум̣ лаб̣бхад̇и. д̇знааха ‘‘зд̇т̇а жаа’’д̇иаад̣̇и.
Tenāti tena kāraṇena, yasmā idhekacce sattā īdisaṃ diṭṭhiṃ paggayha tiṭṭhanti, tasmāti vuttaṃ hoti. Pajahanakena vā cittena ekajjhaṃ gahetvā pajahanakehi appajahanake niddhāretuṃ bhagavā ‘‘ato…pe… bahutarā’’ti avocāti āha – ‘‘pajahanakesu nissakka’’nti yathā ‘‘pañcasīlehi pabhāvanā paññavantatarā’’ti. ‘‘Bahū’’ti vatvā na kevalaṃ bahū, atha kho ativiya bahūti dassento ‘‘bahutarā’’ti āha. ‘‘Bahū hī’’ti nayidaṃ nissakkavacanaṃ, atha kho paccattavacanaṃ. Kathaṃ hi-saddoti āha ‘‘hi-kāro nipātamatta’’nti. Anissakkavacanaṃ tāva tassa pajahanakānaṃ bahubhāvato tepi parato ‘‘bahutarā’’ti vuccīyanti. Mūladassananti ye tādisaṃ dassanaṃ paṭhamaṃ upādiyanti, tajjātikameva pacchā gahitadassanaṃ. Vijātiyañhi paṭhamaṃ gahitadassanaṃ appahāya vijātiyassa gahaṇaṃ na sambhavati viruddhassa abhinivesassa saha anavaṭṭhānato . Aviruddhaṃ pana mūladassanaṃ avissajjitvā visayādibhedabhinnaṃ aparadassanaṃ gahetuṃ labbhati. Tenāha ‘‘ettha cā’’tiādi.
д̇ад̇т̇а гин̃жааби згажжасассад̇аваад̣̇о сассад̇ужчзд̣̇аабхинивзсаанам̣ васзна яат̇ааггамам̣ сассад̇ужчзд̣̇аг̇г̇ааханаж̇аад̇иго, ужчзд̣̇аг̇г̇аахзна бана сассад̇аабхинивзсасса д̇ам̣г̇аахзна жа асассад̇аабхинивзсасса вируж̇жханад̇о убхаяад̇т̇аби ‘‘згажжасассад̇ам̣ ваа г̇ахзд̇ум̣ на саггаа’’д̇и вуд̇д̇ам̣, д̇ат̇аа ‘‘сассад̇ам̣ ваа ужчзд̣̇ам̣ ваа на саггаа г̇ахзд̇у’’нд̇и жа. мууласассад̇ан̃хи батамам̣ г̇ахид̇ам̣. ааяад̇анзсуби яож̇зд̇аб̣б̣анд̇и батамам̣ жагкааяад̇анам̣ сассад̇анд̇и г̇ахзд̇ваа абарабхааг̇з на гзвалам̣ жагкааяад̇анамзва сассад̇ам̣, сод̇ааяад̇анамби сассад̇ам̣, гхаанааяад̇анаад̣̇иби сассад̇анд̇и г̇ан̣хаад̇ийд̇иаад̣̇инаа яож̇зд̇аб̣б̣ам̣. ааяад̇анзсубийд̇и би-сад̣̇д̣̇зна д̇хаад̇уунам̣ инд̣̇рияаанамби г̇аахо д̣̇адтаб̣б̣о. ид̣̇ам̣ санд̇хааяаад̇и ‘‘муулз сассад̇а’’нд̇иаад̣̇инаа вуд̇д̇абатамаг̇г̇аахасса самаанаж̇аад̇ияам̣ абараг̇г̇аахам̣ санд̇хааяа.
Tattha kiñcāpi ekaccasassatavādo sassatucchedābhinivesānaṃ vasena yathākkamaṃ sassatucchedaggāhanajātiko, ucchedaggāhena pana sassatābhinivesassa taṃgāhena ca asassatābhinivesassa virujjhanato ubhayatthapi ‘‘ekaccasassataṃ vā gahetuṃ na sakkā’’ti vuttaṃ, tathā ‘‘sassataṃ vā ucchedaṃ vā na sakkā gahetu’’nti ca. Mūlasassatañhi paṭhamaṃ gahitaṃ. Āyatanesupi yojetabbanti paṭhamaṃ cakkhāyatanaṃ sassatanti gahetvā aparabhāge na kevalaṃ cakkhāyatanameva sassataṃ, sotāyatanampi sassataṃ, ghānāyatanādipi sassatanti gaṇhātītiādinā yojetabbaṃ. Āyatanesupīti pi-saddena dhātūnaṃ indriyānampi gāho daṭṭhabbo. Idaṃ sandhāyāti ‘‘mūle sassata’’ntiādinā vuttapaṭhamaggāhassa samānajātiyaṃ aparaggāhaṃ sandhāya.
д̣̇уд̇ияаваарз батамаваарз вуд̇д̇асад̣̇исам̣ вуд̇д̇анаязнзва взд̣̇ид̇аб̣б̣ам̣. д̇ад̇т̇а аад̣̇ийнавам̣ д̣̇исваад̇и ‘‘яад̣̇и руубам̣ сассад̇ам̣ сияаа, наяид̣̇ам̣ ааб̣аад̇хааяа сам̣вад̇д̇зяяа. яасмаа жа ко ид̣̇ам̣ руубам̣ асассад̇ам̣, д̇асмаа абхин̣хабадибийл̣анадтзна уд̣̇аяаваяаванд̇ад̇ааяа руубам̣ анижжам̣ сан̇кад̇ам̣ бадижжасамуббаннам̣, сассад̇аабхинивзсо мижчаа’’д̇иаад̣̇инаа д̇ад̇т̇а сассад̇аваад̣̇з аад̣̇ийнавам̣ д̣̇осам̣ д̣̇исваа. ол̣аариганд̇и д̇асмаа бадибийл̣анадтзна аяаат̇ааваг̇г̇аахад̇ааяа руубам̣ на сан̣хам̣ ол̣ааригамзва. взд̣̇анаад̣̇ийнамби анижжаад̣̇ибхаавад̣̇ассанам̣ руубавзд̣̇анаааад̣̇ийнам̣ самаанаяог̇агкамад̇д̇аа. виссаж̇ж̇зд̇ийд̇и баж̇ахад̇и.
Dutiyavāre paṭhamavāre vuttasadisaṃ vuttanayeneva veditabbaṃ. Tattha ādīnavaṃ disvāti ‘‘yadi rūpaṃ sassataṃ siyā, nayidaṃ ābādhāya saṃvatteyya. Yasmā ca kho idaṃ rūpaṃ asassataṃ, tasmā abhiṇhapaṭipīḷanaṭṭhena udayavayavantatāya rūpaṃ aniccaṃ saṅkhataṃ paṭiccasamuppannaṃ, sassatābhiniveso micchā’’tiādinā tattha sassatavāde ādīnavaṃ dosaṃ disvā. Oḷārikanti tasmā paṭipīḷanaṭṭhena ayāthāvaggāhatāya rūpaṃ na saṇhaṃ oḷārikameva. Vedanādīnampi aniccādibhāvadassanaṃ rūpavedanāādīnaṃ samānayogakkhamattā. Vissajjetīti pajahati.
д̇иссо лад̣̇д̇хияод̇и сассад̇ужчзд̣̇азгажжасассад̇ад̣̇идтияо. яасмаа сассад̇ад̣̇идтигаа ваддз раж̇ж̇анасса аасаннаа. д̇ат̇аа хи д̇з олийяанд̇ийд̇и вужжанд̇и, бхаваабхавад̣̇идтийнам̣ васзна имзсам̣ сад̇д̇аанам̣ сам̣саарад̇о сийсугкибанам̣ над̇т̇ийд̇и зд̇аава д̇иссо висзсад̇о г̇ахзд̇аб̣б̣аа.
Tisso laddhiyoti sassatucchedaekaccasassatadiṭṭhiyo. Yasmā sassatadiṭṭhikā vaṭṭe rajjanassa āsannā. Tathā hi te olīyantīti vuccanti, bhavābhavadiṭṭhīnaṃ vasena imesaṃ sattānaṃ saṃsārato sīsukkhipanaṃ natthīti etāva tisso visesato gahetabbā.
ид̇халогам̣ баралоган̃жа ад̇т̇ийд̇и ж̇аанаад̇ийд̇и зд̇д̇аавад̇аа сассад̇ад̣̇ассанасса аббасааваж̇ж̇ад̇аагааран̣амааха, ваддам̣ ассаад̣̇зд̇и, абхинанд̣̇ад̇ийд̇и иминаа д̣̇анд̇хавирааг̇ад̇ааяа. д̇знааха ‘‘д̇асмаа’’д̇иаад̣̇и. ид̇халогам̣ баралоган̃жа ад̇т̇ийд̇и ж̇аанаад̇ийд̇и иминаа д̇аасу д̇аасу г̇ад̇ийсу сад̇д̇аанам̣ сам̣саран̣ам̣ бадигкибад̇ийд̇и д̣̇ассзд̇и, сугад̇ад̣̇уггадаанам̣ гаммаанам̣ палам̣ ад̇т̇ийд̇и ж̇аанаад̇ийд̇и иминаа гаммапалам̣. гусалам̣ на гарод̇ийд̇и иминаа гаммам̣, агусалам̣ гаронд̇о на бхааяад̇ийд̇и иминаа бун̃н̃аабун̃н̃аани сабхаавад̇о ж̇ааяанд̇ийд̇и д̣̇ассзд̇и. ваддам̣ ассаад̣̇зд̇и абхинанд̣̇ад̇и д̇анниннабхаавад̇о . сийгхам̣ лад̣̇д̇хим̣ ж̇ахид̇ум̣ на саггод̇и ваддубажчзд̣̇асса аружжанад̇о. ужчзд̣̇аваад̣̇ий хи д̇асмим̣ бхавз ужчзд̣̇ам̣ ман̃н̃ад̇и. д̇ад̇о барам̣ ид̇халогам̣ баралоган̃жа ад̇т̇ийд̇и ж̇аанаад̇и сугад̇ад̣̇уггадаанам̣ палам̣ ад̇т̇ийд̇и ж̇аанаад̇и гаммапалаваад̣̇ийбхаавад̇о. язбхуяязна хи ужчзд̣̇аваад̣̇ий сабхааванияад̇ияад̣̇ижчаабхинивзсзсу ан̃н̃ад̇раабхинивзсо ход̇и. сийгхам̣ д̣̇ассанам̣ баж̇ахад̇и ваддаабхирад̇ияаа абхаавад̇о. баарамияо буурзд̇ум̣ саггонд̇о бажжзгаб̣уд̣̇д̇хо худ̇ваа, логавохаарамад̇д̇знзва со саммаасамб̣уд̣̇д̇хо худ̇ваа бариниб̣б̣ааяад̇ийд̇и яож̇анаа. асаггонд̇од̇и б̣уд̣̇д̇хо ход̇ум̣ асаггонд̇о. абхинийхаарам̣ гад̇ваа аг̇г̇асаавагаад̣̇ибхаавасса абхинийхаарам̣ самбаад̣̇зд̇ваа. сааваго худ̇ваад̇и аг̇г̇асааваго махаасааваго худ̇ваа, д̇ад̇т̇ааби д̇звиж̇ж̇о чал̣абхин̃н̃о бадисамбхид̣̇ааббад̇д̇о ваа сугкавибассаго зва ваа б̣уд̣̇д̇хасааваго худ̇ваа бариниб̣б̣ааяад̇и. саб̣б̣амид̣̇ам̣ ужчзд̣̇аваад̣̇ино галяаан̣амид̇д̇аниссаязна саммад̇д̇анияаамоггаманз киббавирааг̇ад̇аад̣̇ассанад̇т̇ам̣ ааг̇ад̇ам̣. д̇знааха ‘‘д̇асмаа’’д̇иаад̣̇и.
Idhalokaṃ paralokañca atthīti jānātīti ettāvatā sassatadassanassa appasāvajjatākāraṇamāha, vaṭṭaṃ assādeti, abhinandatīti iminā dandhavirāgatāya. Tenāha ‘‘tasmā’’tiādi. Idhalokaṃ paralokañca atthīti jānātīti iminā tāsu tāsu gatīsu sattānaṃ saṃsaraṇaṃ paṭikkhipatīti dasseti, sukatadukkaṭānaṃ kammānaṃ phalaṃ atthīti jānātīti iminā kammaphalaṃ. Kusalaṃ na karotīti iminā kammaṃ, akusalaṃ karonto na bhāyatīti iminā puññāpuññāni sabhāvato jāyantīti dasseti. Vaṭṭaṃ assādeti abhinandati tanninnabhāvato . Sīghaṃ laddhiṃ jahituṃ na sakkoti vaṭṭupacchedassa aruccanato. Ucchedavādī hi tasmiṃ bhave ucchedaṃ maññati. Tato paraṃ idhalokaṃ paralokañca atthīti jānāti sukatadukkaṭānaṃ phalaṃ atthīti jānāti kammaphalavādībhāvato. Yebhuyyena hi ucchedavādī sabhāvaniyatiyadicchābhinivesesu aññatrābhiniveso hoti. Sīghaṃ dassanaṃ pajahati vaṭṭābhiratiyā abhāvato. Pāramiyo pūretuṃ sakkonto paccekabuddho hutvā, lokavohāramatteneva so sammāsambuddho hutvā parinibbāyatīti yojanā. Asakkontoti buddho hotuṃ asakkonto. Abhinīhāraṃkatvā aggasāvakādibhāvassa abhinīhāraṃ sampādetvā. Sāvako hutvāti aggasāvako mahāsāvako hutvā, tatthāpi tevijjo chaḷabhiñño paṭisambhidāppatto vā sukkhavipassako eva vā buddhasāvako hutvā parinibbāyati. Sabbamidaṃ ucchedavādino kalyāṇamittanissayena sammattaniyāmokkamane khippavirāgatādassanatthaṃ āgataṃ. Tenāha ‘‘tasmā’’tiādi.
202. ган̃ж̇иязнзваад̇и ааранаал̣зна. ган̃ж̇ияасад̣̇исзна ужчзд̣̇ад̣̇ассанзна. буурид̇од̇и барибун̣н̣аж̇жхаасаяо. сод̇и бариб̣б̣ааж̇аго. аббахааяаад̇и абхинд̣̇ид̇ваа. виг̇г̇аход̇и галахо ид̣̇амзва сажжам̣, могхаман̃н̃анд̇и ан̃н̃аман̃н̃ам̣ вируд̣̇д̇хаг̇г̇ааход̇и гад̇ваа. виваад̣̇анд̇и вируд̣̇д̇хаваад̣̇ам̣. вигхаад̇анд̇и вирод̇хахзд̇угам̣ жид̇д̇авигхаад̇ам̣. вихзсанд̇и виг̇г̇ахавиваад̣̇анимид̇д̇ам̣ гааяигам̣ жзд̇асиган̃жа гиламат̇ам̣. аад̣̇ийнавам̣ д̣̇исваад̇и зд̇аасам̣ д̣̇идтийнам̣ зваруубо аад̣̇ийнаво, анияяаанигабхаавад̇ааяа бана самбад̇и ааяад̇ин̃жа махаад̣̇ийнавод̇и звам̣ аад̣̇ийнавам̣ д̣̇исваа.
202.Kañjiyenevāti āranāḷena. Kañjiyasadisena ucchedadassanena. Pūritoti paripuṇṇajjhāsayo. Soti paribbājako. Appahāyāti abhinditvā. Viggahoti kalaho idameva saccaṃ, moghamaññanti aññamaññaṃ viruddhaggāhoti katvā. Vivādanti viruddhavādaṃ. Vighātanti virodhahetukaṃ cittavighātaṃ. Vihesanti viggahavivādanimittaṃ kāyikaṃ cetasikañca kilamathaṃ. Ādīnavaṃ disvāti etāsaṃ diṭṭhīnaṃ evarūpo ādīnavo, aniyyānikabhāvatāya pana sampati āyatiñca mahādīnavoti evaṃ ādīnavaṃ disvā.
205. ‘‘зсохамасми, зсо мз ад̇д̇аа’’д̇иаад̣̇инаа (ма. ни. 1.241; сам̣. ни. 3.8) гааяам̣ анвзд̇ийд̇и гааяанваяо, соязва, д̇асса ваа самуухо гааяанваяад̇аа, гааяабадиб̣ад̣̇д̇хо гилзсо. д̇знааха ‘‘гааяам̣…бз… ад̇т̇о’’д̇и.
205. ‘‘Esohamasmi, eso me attā’’tiādinā (ma. ni. 1.241; saṃ. ni. 3.8) kāyaṃ anvetīti kāyanvayo, soyeva, tassa vā samūho kāyanvayatā, kāyapaṭibaddho kileso. Tenāha ‘‘kāyaṃ…pe… attho’’ti.
асаммиссабхааванд̇и асан̇гарад̇о вавад̇т̇ид̇абхаавам̣. д̇зна д̇аасам̣ яат̇аасагам̣ бажжаяаанам̣ уббаж̇ж̇ид̇ваа виг̇амам̣ д̣̇ассзд̇и. зван̃хи д̇аасам̣ гад̣̇аажиби сан̇гаро над̇т̇и. д̇знааха ‘‘д̇ад̇рааяам̣ сан̇кзбад̇т̇о’’д̇иаад̣̇и. саруубам̣ аг̇г̇ахзд̇ваа ‘‘ан̃н̃аа взд̣̇анаа’’д̇и анияамзна вуд̇д̇ад̇д̇аа д̇амзва виг̇амам̣ д̣̇ассзнд̇о ‘‘ануббаннаава хонд̇и анд̇арахид̇аа ваа’’д̇и ааха. саруубад̇о нияамзд̇ваа вужжамаанз гаажи ануббаннаа ваа ход̇и, гаажи анд̇арахид̇аа ваад̇и. жун̣н̣авижун̣н̣абхаавад̣̇ассанад̇т̇анд̇и кан̣з кан̣з бхиж̇ж̇амаанабхаавад̣̇ассанад̇т̇ам̣.
Asammissabhāvanti asaṅkarato vavatthitabhāvaṃ. Tena tāsaṃ yathāsakaṃ paccayānaṃ uppajjitvā vigamaṃ dasseti. Evañhi tāsaṃ kadācipi saṅkaro natthi. Tenāha ‘‘tatrāyaṃ saṅkhepattho’’tiādi. Sarūpaṃ aggahetvā ‘‘aññā vedanā’’ti aniyamena vuttattā tameva vigamaṃ dassento ‘‘anuppannāva honti antarahitā vā’’ti āha. Sarūpato niyametvā vuccamāne kāci anuppannā vā hoti, kāci antarahitā vāti. Cuṇṇavicuṇṇabhāvadassanatthanti khaṇe khaṇe bhijjamānabhāvadassanatthaṃ.
на гзнажи сам̣вад̣̇ад̇ийд̇и гзнажи буг̇г̇алзна сад̣̇д̇хим̣ д̣̇идтирааг̇авасзна сам̣гилидтажид̇д̇о на вад̣̇ад̇и. д̇знааха ‘‘сассад̇ам̣ г̇ахзд̇ваа’’д̇иаад̣̇и. на вивад̣̇ад̇ийд̇и вируд̣̇д̇хабхааво худ̇ваа на вивад̣̇ад̇и. баривад̇д̇зд̇ваад̇и ужчзд̣̇ам̣ г̇ахзд̇ваа згажжасассад̇ам̣ г̇ахзд̇ваа звам̣ вуд̇д̇анаязна д̇аяоби ваад̣̇аа баривад̇д̇зд̇ваа яож̇зд̇аб̣б̣аа . д̇зна вохарад̇ийд̇и д̇зна логавохаарзна логасаман̃н̃ам̣ анад̇ид̇хааванд̇о сад̇д̇о бурисо буг̇г̇алод̇иаад̣̇инаа вохарад̇и, на бана ид̇о б̣аахирагаа вияа абхинивисад̇и. д̇знааха ‘‘абараамасанд̇о’’д̇и. ган̃жи д̇хамманд̇и руубаад̣̇ийсу згам̣ д̇хаммамби. бараамаасаг̇г̇аахзна аг̇г̇ан̣ханд̇од̇и ‘‘нижжа’’нд̇иаад̣̇инаа, ‘‘зд̇ам̣ мамаа’’д̇иаад̣̇инаа жа д̇хаммасабхаавам̣ ад̇иггамид̇ваа барад̇о аамасид̇ваа г̇ахан̣зна аг̇г̇ан̣ханд̇о.
Na kenacisaṃvadatīti kenaci puggalena saddhiṃ diṭṭhirāgavasena saṃkiliṭṭhacitto na vadati. Tenāha ‘‘sassataṃ gahetvā’’tiādi. Na vivadatīti viruddhabhāvo hutvā na vivadati. Parivattetvāti ucchedaṃ gahetvā ekaccasassataṃ gahetvā evaṃ vuttanayena tayopi vādā parivattetvā yojetabbā . Tena voharatīti tena lokavohārena lokasamaññaṃ anatidhāvanto satto puriso puggalotiādinā voharati, na pana ito bāhirakā viya abhinivisati. Tenāha ‘‘aparāmasanto’’ti. Kañci dhammanti rūpādīsu ekaṃ dhammampi. Parāmāsaggāhena aggaṇhantoti ‘‘nicca’’ntiādinā, ‘‘etaṃ mamā’’tiādinā ca dhammasabhāvaṃ atikkamitvā parato āmasitvā gahaṇena aggaṇhanto.
гад̇аавийд̇и гад̇агижжо. со вад̣̇зяяаад̇и кийн̣аасаво бхигку ахан̇гаарамаман̇гаарзсу саб̣б̣асо самужчиннзсуби ахам̣ вад̣̇аамийд̇и вад̣̇зяяа. д̇ад̇т̇а аханд̇и нияагаж̇жхад̇д̇асанд̇аанз. маманд̇и д̇асса санд̇агабхууд̇з вад̇т̇усмим̣ логанирул̣хз. саман̃н̃анд̇и д̇ад̇т̇а сугусалад̇ааяа логз саман̃н̃аа гусало вид̣̇ид̇ваа. вохаарамад̇д̇знаад̇и гзвалам̣ бажжзгаб̣уд̣̇д̇хо худ̇ваа махааб̣од̇хибаарамияо буурзд̇ум̣ асаггонд̇о сааваго худ̇ваа д̣̇зсавохаарамад̇д̇зна на аббахийнад̇ан̣хо вияа анд̇хабут̇уж̇ж̇ано абхинивзсанавасзна.
Katāvīti katakicco. So vadeyyāti khīṇāsavo bhikkhu ahaṅkāramamaṅkāresu sabbaso samucchinnesupi ahaṃ vadāmīti vadeyya. Tattha ahanti niyakajjhattasantāne. Mamanti tassa santakabhūte vatthusmiṃ lokaniruḷhe. Samaññanti tattha sukusalatāya loke samaññā kusalo viditvā. Vohāramattenāti kevalaṃ paccekabuddho hutvā mahābodhipāramiyo pūretuṃ asakkonto sāvako hutvā desavohāramattena na appahīnataṇho viya andhaputhujjano abhinivesanavasena.
206. сассад̇аад̣̇ийсууд̇и сассад̇аабхинивзсаад̣̇ийсу. д̇зсам̣ д̇зсам̣ д̇хаммаананд̇и нид̣̇д̇хааран̣з саамиважанам̣. сассад̇ам̣ абхин̃н̃ааяаад̇и сассад̇ад̣̇идтим̣ самуд̣̇аяад̇о ад̇т̇ан̇г̇амад̇о ассаад̣̇ад̇о ниссаран̣ад̇о абхивисидтааяа бан̃н̃ааяа бадивиж̇жхид̇ваа. бахаананд̇и ажжанд̇аббахаанам̣ самужчзд̣̇ам̣. руубасса бахаананд̇и руубасса д̇аббадиб̣ад̣̇д̇хасан̃н̃ож̇анаббахаанзна бахаанам̣. ануббаад̣̇анирод̇хзна нируд̣̇д̇хзхи аасавзхи аг̇г̇ахзд̇ваава жид̇д̇ам̣ вимужжи. ‘‘аасавзхи жид̇д̇ам̣ вимужжий’’д̇и зд̇т̇а гин̃жиби аг̇г̇ахзд̇ваа асзсзд̇ваа. сол̣аса бан̃н̃аад̇и махаабан̃н̃аад̣̇игаа сол̣аса бан̃н̃аа. жад̇уран̇г̇асаманнааг̇ад̇од̇и бун̣н̣аубосат̇ад̣̇ивасад̇аа, гзнажи анааманд̇ид̇амзва анзгасад̇аанам̣язва анзгасахассаанам̣ ваа бхигкуунам̣ саннибад̇ид̇ад̇аа, саб̣б̣зсам̣ зхибхигкубхаавзна убасамбаннад̇аа, чал̣абхин̃н̃ад̇аа жаад̇и. д̇знааха ‘‘д̇ад̇римаани ан̇г̇ааний’’д̇иаад̣̇и. яам̣ банзд̇т̇а ад̇т̇ад̇о авибхад̇д̇ам̣, д̇ам̣ сувин̃н̃зяяамзва.
206.Sassatādīsūti sassatābhinivesādīsu. Tesaṃ tesaṃ dhammānanti niddhāraṇe sāmivacanaṃ. Sassataṃ abhiññāyāti sassatadiṭṭhiṃ samudayato atthaṅgamato assādato nissaraṇato abhivisiṭṭhāya paññāya paṭivijjhitvā. Pahānanti accantappahānaṃ samucchedaṃ. Rūpassa pahānanti rūpassa tappaṭibaddhasaññojanappahānena pahānaṃ. Anuppādanirodhena niruddhehi āsavehi aggahetvāva cittaṃ vimucci. ‘‘Āsavehi cittaṃ vimuccī’’ti ettha kiñcipi aggahetvā asesetvā. Soḷasa paññāti mahāpaññādikā soḷasa paññā. Caturaṅgasamannāgatoti puṇṇauposathadivasatā, kenaci anāmantitameva anekasatānaṃyeva anekasahassānaṃ vā bhikkhūnaṃ sannipatitatā, sabbesaṃ ehibhikkhubhāvena upasampannatā, chaḷabhiññatā cāti. Tenāha ‘‘tatrimāni aṅgānī’’tiādi. Yaṃ panettha atthato avibhattaṃ, taṃ suviññeyyameva.
д̣̇ийгханакасуд̇д̇аван̣н̣анааяа лийнад̇т̇аббагаасанаа самад̇д̇аа.
Dīghanakhasuttavaṇṇanāya līnatthappakāsanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 4. д̣̇ийгханакасуд̇д̇ам̣ • 4. Dīghanakhasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 4. д̣̇ийгханакасуд̇д̇аван̣н̣анаа • 4. Dīghanakhasuttavaṇṇanā
