| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
10. දීඝට්‌ඨිපඤ්‌හො
10. Dīghaṭṭhipañho
10. රාජා ආහ ‘‘භන්‌තෙ නාගසෙන, තුම්‌හෙ එවං භණථ ‘අට්‌ඨිකානි දීඝානි යොජනසතිකානිපී’ති, රුක්‌ඛොපි තාව නත්‌ථි යොජනසතිකො, කුතො පන අට්‌ඨිකානි දීඝානි යොජනසතිකානි භවිස්‌සන්‌තී’’ති?
10. Rājā āha ‘‘bhante nāgasena, tumhe evaṃ bhaṇatha ‘aṭṭhikāni dīghāni yojanasatikānipī’ti, rukkhopi tāva natthi yojanasatiko, kuto pana aṭṭhikāni dīghāni yojanasatikāni bhavissantī’’ti?
‘‘තං කිං මඤ්‌ඤසි, මහාරාජ, සුතං තෙ ‘මහාසමුද්‌දෙ පඤ්‌චයොජනසතිකාපි මච්‌ඡා අත්‌ථී’’’ති? ‘‘ආම, භන්‌තෙ, සුත’’න්‌ති. ‘‘නනු මහාරාජ, පඤ්‌චයොජනසතිකස්‌ස මච්‌ඡස්‌ස අට්‌ඨිකානි දීඝානි භවිස්‌සන්‌ති යොජනසතිකානිපී’’ති?
‘‘Taṃ kiṃ maññasi, mahārāja, sutaṃ te ‘mahāsamudde pañcayojanasatikāpi macchā atthī’’’ti? ‘‘Āma, bhante, suta’’nti. ‘‘Nanu mahārāja, pañcayojanasatikassa macchassa aṭṭhikāni dīghāni bhavissanti yojanasatikānipī’’ti?
‘‘කල්‌ලොසි , භන්‌තෙ නාගසෙනා’’ති.
‘‘Kallosi , bhante nāgasenā’’ti.
දීඝට්‌ඨිපඤ්‌හො දසමො.
Dīghaṭṭhipañho dasamo.
