| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༢༧༢. དཱིགྷཱཝུཝཏྠུ
272. Dīghāvuvatthu
༤༥༨. ཨཐ ཁོ བྷགཝཱ བྷིཀྑཱུ ཨཱམནྟེསི – ‘‘བྷཱུཏཔུབྦཾ, བྷིཀྑཝེ, བཱརཱཎསིཡཾ 1 བྲཧྨདཏྟོ ནཱམ ཀཱསིརཱཛཱ ཨཧོསི ཨཌྜྷོ མཧདྡྷནོ མཧཱབྷོགོ མཧབྦལོ མཧཱཝཱཧནོ མཧཱཝིཛིཏོ པརིཔུཎྞཀོསཀོཊྛཱགཱརོ། དཱིགྷཱིཏི ནཱམ ཀོསལརཱཛཱ ཨཧོསི དལིདྡོ ཨཔྤདྷནོ ཨཔྤབྷོགོ ཨཔྤབལོ ཨཔྤཝཱཧནོ ཨཔྤཝིཛིཏོ ཨཔརིཔུཎྞཀོསཀོཊྛཱགཱརོ། ཨཐ ཁོ, བྷིཀྑཝེ, བྲཧྨདཏྟོ ཀཱསིརཱཛཱ ཙཏུརངྒིནིཾ སེནཾ སནྣཡ྄ཧིཏྭཱ དཱིགྷཱིཏིཾ ཀོསལརཱཛཱནཾ ཨབྦྷུཡྻཱསི། ཨསྶོསི ཁོ, བྷིཀྑཝེ, དཱིགྷཱིཏི ཀོསལརཱཛཱ – ‘‘བྲཧྨདཏྟོ ཀིར ཀཱསིརཱཛཱ ཙཏུརངྒིནིཾ སེནཾ སནྣཡ྄ཧིཏྭཱ མམཾ ཨབྦྷུཡྻཱཏོ’’ཏི། ཨཐ ཁོ, བྷིཀྑཝེ, དཱིགྷཱིཏིསྶ ཀོསལརཉྙོ ཨེཏདཧོསི – ‘‘བྲཧྨདཏྟོ ཁོ ཀཱསིརཱཛཱ ཨཌྜྷོ མཧདྡྷནོ མཧཱབྷོགོ མཧབྦལོ མཧཱཝཱཧནོ མཧཱཝིཛིཏོ པརིཔུཎྞཀོསཀོཊྛཱགཱརོ, ཨཧཾ པནམྷི དལིདྡོ ཨཔྤདྷནོ ཨཔྤབྷོགོ ཨཔྤབལོ ཨཔྤཝཱཧནོ ཨཔྤཝིཛིཏོ ཨཔརིཔུཎྞཀོསཀོཊྛཱགཱརོ, ནཱཧཾ པཊིབལོ བྲཧྨདཏྟེན ཀཱསིརཉྙཱ ཨེཀསངྒྷཱཏམྤི སཧིཏུཾ། ཡཾནཱུནཱཧཾ པཊིཀཙྩེཝ ནགརམྷཱ ནིཔྤཏེཡྻ’’ནྟི།
458. Atha kho bhagavā bhikkhū āmantesi – ‘‘bhūtapubbaṃ, bhikkhave, bārāṇasiyaṃ 2 brahmadatto nāma kāsirājā ahosi aḍḍho mahaddhano mahābhogo mahabbalo mahāvāhano mahāvijito paripuṇṇakosakoṭṭhāgāro. Dīghīti nāma kosalarājā ahosi daliddo appadhano appabhogo appabalo appavāhano appavijito aparipuṇṇakosakoṭṭhāgāro. Atha kho, bhikkhave, brahmadatto kāsirājā caturaṅginiṃ senaṃ sannayhitvā dīghītiṃ kosalarājānaṃ abbhuyyāsi. Assosi kho, bhikkhave, dīghīti kosalarājā – ‘‘brahmadatto kira kāsirājā caturaṅginiṃ senaṃ sannayhitvā mamaṃ abbhuyyāto’’ti. Atha kho, bhikkhave, dīghītissa kosalarañño etadahosi – ‘‘brahmadatto kho kāsirājā aḍḍho mahaddhano mahābhogo mahabbalo mahāvāhano mahāvijito paripuṇṇakosakoṭṭhāgāro, ahaṃ panamhi daliddo appadhano appabhogo appabalo appavāhano appavijito aparipuṇṇakosakoṭṭhāgāro, nāhaṃ paṭibalo brahmadattena kāsiraññā ekasaṅghātampi sahituṃ. Yaṃnūnāhaṃ paṭikacceva nagaramhā nippateyya’’nti.
ཨཐ ཁོ, བྷིཀྑཝེ, དཱིགྷཱིཏི ཀོསལརཱཛཱ མཧེསིཾ ཨཱདཱཡ པཊིཀཙྩེཝ ནགརམྷཱ ནིཔྤཏི། ཨཐ ཁོ, བྷིཀྑཝེ, བྲཧྨདཏྟོ ཀཱསིརཱཛཱ དཱིགྷཱིཏིསྶ ཀོསལརཉྙོ བལཉྩ ཝཱཧནཉྩ ཛནཔདཉྩ ཀོསཉྩ ཀོཊྛཱགཱརཉྩ ཨབྷིཝིཛིཡ ཨཛ྄ཛྷཱཝསཏི། ཨཐ ཁོ, བྷིཀྑཝེ, དཱིགྷཱིཏི ཀོསལརཱཛཱ སཔཛཱཔཏིཀོ ཡེན ཝཱརཱཎསཱི ཏེན པཀྐཱམི། ཨནུཔུབྦེན ཡེན བཱརཱཎསཱི ཏདཝསརི། ཏཏྲ སུདཾ, བྷིཀྑཝེ, དཱིགྷཱིཏི ཀོསལརཱཛཱ སཔཛཱཔཏིཀོ བཱརཱཎསིཡཾ ཨཉྙཏརསྨིཾ པཙྩནྟིམེ ཨོཀཱསེ ཀུམྦྷཀཱརནིཝེསནེ ཨཉྙཱཏཀཝེསེན པརིབྦཱཛཀཙྪནྣེན པཊིཝསཏི། ཨཐ ཁོ, བྷིཀྑཝེ, དཱིགྷཱིཏིསྶ ཀོསལརཉྙོ མཧེསཱི ནཙིརསྶེཝ གབྦྷིནཱི ཨཧོསི། ཏསྶཱ ཨེཝརཱུཔོ དོཧལོ༹ ཨུཔྤནྣོ ཧོཏི – ‘‘ཨིཙྪཏི སཱུརིཡསྶ ཨུགྒམནཀཱལེ ཙཏུརངྒིནིཾ སེནཾ སནྣདྡྷཾ ཝམྨིཀཾ སུབྷཱུམེ ཋིཏཾ པསྶིཏུཾ , ཁགྒཱནཉྩ དྷོཝནཾ པཱཏུཾ’’། ཨཐ ཁོ, བྷིཀྑཝེ, དཱིགྷཱིཏིསྶ ཀོསལརཉྙོ མཧེསཱི དཱིགྷཱིཏིཾ ཀོསལརཱཛཱནཾ ཨེཏདཝོཙ – ‘‘གབྦྷིནཱིམྷི, དེཝ། ཏསྶཱ མེ ཨེཝརཱུཔོ དོཧལོ༹ ཨུཔྤནྣོ – ཨིཙྪཱམི སཱུརིཡསྶ ཨུགྒམནཀཱལེ ཙཏུརངྒིནིཾ སེནཾ སནྣདྡྷཾ ཝམྨིཀཾ 3 སུབྷཱུམེ ཋིཏཾ པསྶིཏུཾ, ཁགྒཱནཉྩ དྷོཝནཾ པཱཏུ’’ནྟི། ‘‘ཀུཏོ, དེཝི, ཨམྷཱཀཾ དུགྒཏཱནཾ ཙཏུརངྒིནཱི སེནཱ སནྣདྡྷཱ ཝམྨིཀཱ སུབྷཱུམེ ཋིཏཱ, ཁགྒཱནཉྩ དྷོཝནཾ པཱཏུ’’ནྟི 4 ‘‘སཙཱཧཾ, དེཝ, ན ལབྷིསྶཱམི, མརིསྶཱམཱི’’ཏི།
Atha kho, bhikkhave, dīghīti kosalarājā mahesiṃ ādāya paṭikacceva nagaramhā nippati. Atha kho, bhikkhave, brahmadatto kāsirājā dīghītissa kosalarañño balañca vāhanañca janapadañca kosañca koṭṭhāgārañca abhivijiya ajjhāvasati. Atha kho, bhikkhave, dīghīti kosalarājā sapajāpatiko yena vārāṇasī tena pakkāmi. Anupubbena yena bārāṇasī tadavasari. Tatra sudaṃ, bhikkhave, dīghīti kosalarājā sapajāpatiko bārāṇasiyaṃ aññatarasmiṃ paccantime okāse kumbhakāranivesane aññātakavesena paribbājakacchannena paṭivasati. Atha kho, bhikkhave, dīghītissa kosalarañño mahesī nacirasseva gabbhinī ahosi. Tassā evarūpo dohaḷo uppanno hoti – ‘‘icchati sūriyassa uggamanakāle caturaṅginiṃ senaṃ sannaddhaṃ vammikaṃ subhūme ṭhitaṃ passituṃ , khaggānañca dhovanaṃ pātuṃ’’. Atha kho, bhikkhave, dīghītissa kosalarañño mahesī dīghītiṃ kosalarājānaṃ etadavoca – ‘‘gabbhinīmhi, deva. Tassā me evarūpo dohaḷo uppanno – icchāmi sūriyassa uggamanakāle caturaṅginiṃ senaṃ sannaddhaṃ vammikaṃ 5 subhūme ṭhitaṃ passituṃ, khaggānañca dhovanaṃ pātu’’nti. ‘‘Kuto, devi, amhākaṃ duggatānaṃ caturaṅginī senā sannaddhā vammikā subhūme ṭhitā, khaggānañca dhovanaṃ pātu’’nti 6 ‘‘sacāhaṃ, deva, na labhissāmi, marissāmī’’ti.
༤༥༩. ཏེན ཁོ པན སམཡེན, བྲཧྨདཏྟསྶ ཀཱསིརཉྙོ པུརོཧིཏོ བྲཱཧྨཎོ དཱིགྷཱིཏིསྶ ཀོསལརཉྙོ སཧཱཡོ ཧོཏི ། ཨཐ ཁོ, བྷིཀྑཝེ, དཱིགྷཱིཏི ཀོསལརཱཛཱ ཡེན བྲཧྨདཏྟསྶ ཀཱསིརཉྙོ པུརོཧིཏོ བྲཱཧྨཎོ ཏེནུཔསངྐམི, ཨུཔསངྐམིཏྭཱ བྲཧྨདཏྟསྶ ཀཱསིརཉྙོ པུརོཧིཏཾ བྲཱཧྨཎཾ ཨེཏདཝོཙ – ‘‘སཁཱི ཏེ, སམྨ, གབྦྷིནཱི། ཏསྶཱ ཨེཝརཱུཔོ དོཧལོ༹ ཨུཔྤནྣོ – ཨིཙྪཏི སཱུརིཡསྶ ཨུགྒམནཀཱལེ ཙཏུརངྒིནིཾ སེནཾ སནྣདྡྷཾ ཝམྨིཀཾ སུབྷཱུམེ ཋིཏཾ པསྶིཏུཾ, ཁགྒཱནཉྩ དྷོཝནཾ པཱཏུ’’ནྟི། ‘‘ཏེན ཧི, དེཝ, མཡམྤི དེཝིཾ པསྶཱམཱ’’ཏི། ཨཐ ཁོ, བྷིཀྑཝེ, དཱིགྷཱིཏིསྶ ཀོསལརཉྙོ མཧེསཱི ཡེན བྲཧྨདཏྟསྶ ཀཱསིརཉྙོ པུརོཧིཏོ བྲཱཧྨཎོ ཏེནུཔསངྐམི། ཨདྡསཱ ཁོ, བྷིཀྑཝེ, བྲཧྨདཏྟསྶ ཀཱསིརཉྙོ པུརོཧིཏོ བྲཱཧྨཎོ དཱིགྷཱིཏིསྶ ཀོསལརཉྙོ མཧེསིཾ དཱུརཏོཝ ཨཱགཙྪནྟིཾ, དིསྭཱན ཨུཊྛཱཡཱསནཱ ཨེཀཾསཾ ཨུཏྟརཱསངྒཾ ཀརིཏྭཱ ཡེན དཱིགྷཱིཏིསྶ ཀོསལརཉྙོ མཧེསཱི ཏེནཉྫལིཾ པཎཱམེཏྭཱ ཏིཀྑཏྟུཾ ཨུདཱནཾ ཨུདཱནེསི – ‘‘ཀོསལརཱཛཱ ཝཏ བྷོ ཀུཙྪིགཏོ, ཀོསལརཱཛཱ ཝཏ བྷོ ཀུཙྪིགཏོ’’ཏི། ཨཏྟམནཱ 7, དེཝི, ཧོཧི། ལཙྪསི སཱུརིཡསྶ ཨུགྒམནཀཱལེ ཙཏུརངྒིནིཾ སེནཾ སནྣདྡྷཾ ཝམྨིཀཾ སུབྷཱུམེ ཋིཏཾ པསྶིཏུཾ, ཁགྒཱནཉྩ དྷོཝནཾ པཱཏུནྟི།
459. Tena kho pana samayena, brahmadattassa kāsirañño purohito brāhmaṇo dīghītissa kosalarañño sahāyo hoti . Atha kho, bhikkhave, dīghīti kosalarājā yena brahmadattassa kāsirañño purohito brāhmaṇo tenupasaṅkami, upasaṅkamitvā brahmadattassa kāsirañño purohitaṃ brāhmaṇaṃ etadavoca – ‘‘sakhī te, samma, gabbhinī. Tassā evarūpo dohaḷo uppanno – icchati sūriyassa uggamanakāle caturaṅginiṃ senaṃ sannaddhaṃ vammikaṃ subhūme ṭhitaṃ passituṃ, khaggānañca dhovanaṃ pātu’’nti. ‘‘Tena hi, deva, mayampi deviṃ passāmā’’ti. Atha kho, bhikkhave, dīghītissa kosalarañño mahesī yena brahmadattassa kāsirañño purohito brāhmaṇo tenupasaṅkami. Addasā kho, bhikkhave, brahmadattassa kāsirañño purohito brāhmaṇo dīghītissa kosalarañño mahesiṃ dūratova āgacchantiṃ, disvāna uṭṭhāyāsanā ekaṃsaṃ uttarāsaṅgaṃ karitvā yena dīghītissa kosalarañño mahesī tenañjaliṃ paṇāmetvā tikkhattuṃ udānaṃ udānesi – ‘‘kosalarājā vata bho kucchigato, kosalarājā vata bho kucchigato’’ti. Attamanā 8, devi, hohi. Lacchasi sūriyassa uggamanakāle caturaṅginiṃ senaṃ sannaddhaṃ vammikaṃ subhūme ṭhitaṃ passituṃ, khaggānañca dhovanaṃ pātunti.
ཨཐ ཁོ, བྷིཀྑཝེ, བྲཧྨདཏྟསྶ ཀཱསིརཉྙོ པུརོཧིཏོ བྲཱཧྨཎོ ཡེན བྲཧྨདཏྟོ ཀཱསིརཱཛཱ ཏེནུཔསངྐམི, ཨུཔསངྐམིཏྭཱ བྲཧྨདཏྟཾ ཀཱསིརཱཛཱནཾ ཨེཏདཝོཙ – ‘‘ཏཐཱ, དེཝ, ནིམིཏྟཱནི དིསྶནྟི, སྭེ སཱུརིཡུགྒམནཀཱལེ ཙཏུརངྒིནཱི སེནཱ སནྣདྡྷཱ ཝམྨིཀཱ སུབྷཱུམེ ཏིཊྛཏུ, ཁགྒཱ ཙ དྷོཝིཡནྟཱུ’’ཏི། ཨཐ ཁོ, བྷིཀྑཝེ, བྲཧྨདཏྟོ ཀཱསིརཱཛཱ མནུསྶེ ཨཱཎཱཔེསི – ‘‘ཡཐཱ, བྷཎེ, པུརོཧིཏོ བྲཱཧྨཎོ ཨཱཧ ཏཐཱ ཀརོཐཱ’’ཏི། ཨལབྷི ཁོ, བྷིཀྑཝེ, དཱིགྷཱིཏིསྶ ཀོསལརཉྙོ མཧེསཱི སཱུརིཡསྶ ཨུགྒམནཀཱལེ ཙཏུརངྒིནིཾ སེནཾ སནྣདྡྷཾ ཝམྨིཀཾ སུབྷཱུམེ ཋིཏཾ པསྶིཏུཾ, ཁགྒཱནཉྩ དྷོཝནཾ པཱཏུཾ། ཨཐ ཁོ, བྷིཀྑཝེ, དཱིགྷཱིཏིསྶ ཀོསལརཉྙོ མཧེསཱི ཏསྶ གབྦྷསྶ པརིཔཱཀམནྭཱཡ པུཏྟཾ ཝིཛཱཡི། ཏསྶ དཱིགྷཱཝཱུཏི ནཱམཾ ཨཀཾསུ། ཨཐ ཁོ, བྷིཀྑཝེ, དཱིགྷཱཝུ ཀུམཱརོ ནཙིརསྶེཝ ཝིཉྙུཏཾ པཱཔུཎི། ཨཐ ཁོ, བྷིཀྑཝེ, དཱིགྷཱིཏིསྶ ཀོསལརཉྙོ ཨེཏདཧོསི – ‘‘ཨཡཾ ཁོ བྲཧྨདཏྟོ ཀཱསིརཱཛཱ བཧུནོ ཨམྷཱཀཾ ཨནཏྠསྶ ཀཱརཀོ, ཨིམིནཱ ཨམྷཱཀཾ བལཉྩ ཝཱཧནཉྩ ཛནཔདོ ཙ ཀོསོ ཙ ཀོཊྛཱགཱརཉྩ ཨཙྪིནྣཾ, སཙཱཡཾ ཨམྷེ ཛཱནིསྶཏི, སབྦེཝ ཏཡོ གྷཱཏཱཔེསྶཏི, ཡཾནཱུནཱཧཾ དཱིགྷཱཝུཾ ཀུམཱརཾ བཧིནགརེ ཝཱསེཡྻ’’ནྟི། ཨཐ ཁོ བྷིཀྑཝེ དཱིགྷཱིཏི ཀོསལརཱཛཱ དཱིགྷཱཝུཾ ཀུམཱརཾ བཧིནགརེ ཝཱསེསི། ཨཐ ཁོ བྷིཀྑཝེ དཱིགྷཱཝུ ཀུམཱརོ བཧིནགརེ པཊིཝསནྟོ ནཙིརསྶེཝ སབྦསིཔྤཱནི སིཀྑི།
Atha kho, bhikkhave, brahmadattassa kāsirañño purohito brāhmaṇo yena brahmadatto kāsirājā tenupasaṅkami, upasaṅkamitvā brahmadattaṃ kāsirājānaṃ etadavoca – ‘‘tathā, deva, nimittāni dissanti, sve sūriyuggamanakāle caturaṅginī senā sannaddhā vammikā subhūme tiṭṭhatu, khaggā ca dhoviyantū’’ti. Atha kho, bhikkhave, brahmadatto kāsirājā manusse āṇāpesi – ‘‘yathā, bhaṇe, purohito brāhmaṇo āha tathā karothā’’ti. Alabhi kho, bhikkhave, dīghītissa kosalarañño mahesī sūriyassa uggamanakāle caturaṅginiṃ senaṃ sannaddhaṃ vammikaṃ subhūme ṭhitaṃ passituṃ, khaggānañca dhovanaṃ pātuṃ. Atha kho, bhikkhave, dīghītissa kosalarañño mahesī tassa gabbhassa paripākamanvāya puttaṃ vijāyi. Tassa dīghāvūti nāmaṃ akaṃsu. Atha kho, bhikkhave, dīghāvu kumāro nacirasseva viññutaṃ pāpuṇi. Atha kho, bhikkhave, dīghītissa kosalarañño etadahosi – ‘‘ayaṃ kho brahmadatto kāsirājā bahuno amhākaṃ anatthassa kārako, iminā amhākaṃ balañca vāhanañca janapado ca koso ca koṭṭhāgārañca acchinnaṃ, sacāyaṃ amhe jānissati, sabbeva tayo ghātāpessati, yaṃnūnāhaṃ dīghāvuṃ kumāraṃ bahinagare vāseyya’’nti. Atha kho bhikkhave dīghīti kosalarājā dīghāvuṃ kumāraṃ bahinagare vāsesi. Atha kho bhikkhave dīghāvu kumāro bahinagare paṭivasanto nacirasseva sabbasippāni sikkhi.
༤༦༠. ཏེན ཁོ པན སམཡེན དཱིགྷཱིཏིསྶ ཀོསལརཉྙོ ཀཔྤཀོ བྲཧྨདཏྟེ ཀཱསིརཉྙེ པཊིཝསཏི། ཨདྡསཱ ཁོ, བྷིཀྑཝེ, དཱིགྷཱིཏིསྶ ཀོསལརཉྙོ ཀཔྤཀོ དཱིགྷཱིཏིཾ ཀོསལརཱཛཱནཾ སཔཛཱཔཏིཀཾ བཱརཱཎསིཡཾ ཨཉྙཏརསྨིཾ པཙྩནྟིམེ ཨོཀཱསེ ཀུམྦྷཀཱརནིཝེསནེ ཨཉྙཱཏཀཝེསེན པརིབྦཱཛཀཙྪནྣེན པཊིཝསནྟཾ, དིསྭཱན ཡེན བྲཧྨདཏྟོ ཀཱསིརཱཛཱ ཏེནུཔསངྐམི, ཨུཔསངྐམིཏྭཱ བྲཧྨདཏྟཾ ཀཱསིརཱཛཱནཾ ཨེཏདཝོཙ – ‘‘དཱིགྷཱིཏི, དེཝ, ཀོསལརཱཛཱ སཔཛཱཔཏིཀོ བཱརཱཎསིཡཾ ཨཉྙཏརསྨིཾ པཙྩནྟིམེ ཨོཀཱསེ ཀུམྦྷཀཱརནིཝེསནེ ཨཉྙཱཏཀཝེསེན པརིབྦཱཛཀཙྪནྣེན པཊིཝསཏཱི’’ཏི། ཨཐ ཁོ, བྷིཀྑཝེ, བྲཧྨདཏྟོ ཀཱསིརཱཛཱ མནུསྶེ ཨཱཎཱཔེསི – ‘‘ཏེན ཧི, བྷཎེ, དཱིགྷཱིཏིཾ ཀོསལརཱཛཱནཾ སཔཛཱཔཏིཀཾ ཨཱནེཐཱ’’ཏི། ‘‘ཨེཝཾ, དེཝཱ’’ཏི ཁོ, བྷིཀྑཝེ, ཏེ མནུསྶཱ བྲཧྨདཏྟསྶ ཀཱསིརཉྙོ པཊིསྶུཏྭཱ དཱིགྷཱིཏིཾ ཀོསལརཱཛཱནཾ སཔཛཱཔཏིཀཾ ཨཱནེསུཾ། ཨཐ ཁོ, བྷིཀྑཝེ, བྲཧྨདཏྟོ ཀཱསིརཱཛཱ མནུསྶེ ཨཱཎཱཔེསི – ‘‘ཏེན ཧི, བྷཎེ, དཱིགྷཱིཏིཾ ཀོསལརཱཛཱནཾ སཔཛཱཔཏིཀཾ དལ༹ྷཱཡ རཛྫུཡཱ པཙྪཱབཱཧཾ གཱལ༹ྷབནྡྷནཾ བནྡྷིཏྭཱ ཁུརམུཎྜཾ ཀརིཏྭཱ ཁརསྶརེན པཎཝེན རཐིཀཱཡ རཐིཀཾ སིངྒྷཱཊཀེན སིངྒྷཱཊཀཾ པརིནེཏྭཱ དཀྑིཎེན དྭཱརེན ནིཀྑཱམེཏྭཱ དཀྑིཎཏོ ནགརསྶ ཙཏུདྷཱ ཚིནྡིཏྭཱ ཙཏུདྡིསཱ བིལཱནི ནིཀྑིཔཐཱ’’ཏི། ‘‘ཨེཝཾ, དེཝཱ’’ཏི ཁོ, བྷིཀྑཝེ, ཏེ མནུསྶཱ བྲཧྨདཏྟསྶ ཀཱསིརཉྙོ པཊིསྶུཏྭཱ དཱིགྷཱིཏིཾ ཀོསལརཱཛཱནཾ སཔཛཱཔཏིཀཾ དལ༹ྷཱཡ རཛྫུཡཱ པཙྪཱབཱཧཾ གཱལ༹ྷབནྡྷནཾ བནྡྷིཏྭཱ ཁུརམུཎྜཾ ཀརིཏྭཱ ཁརསྶརེན པཎཝེན རཐིཀཱཡ རཐིཀཾ སིངྒྷཱཊཀེན སིངྒྷཱཊཀཾ པརིནེནྟི།
460. Tena kho pana samayena dīghītissa kosalarañño kappako brahmadatte kāsiraññe paṭivasati. Addasā kho, bhikkhave, dīghītissa kosalarañño kappako dīghītiṃ kosalarājānaṃ sapajāpatikaṃ bārāṇasiyaṃ aññatarasmiṃ paccantime okāse kumbhakāranivesane aññātakavesena paribbājakacchannena paṭivasantaṃ, disvāna yena brahmadatto kāsirājā tenupasaṅkami, upasaṅkamitvā brahmadattaṃ kāsirājānaṃ etadavoca – ‘‘dīghīti, deva, kosalarājā sapajāpatiko bārāṇasiyaṃ aññatarasmiṃ paccantime okāse kumbhakāranivesane aññātakavesena paribbājakacchannena paṭivasatī’’ti. Atha kho, bhikkhave, brahmadatto kāsirājā manusse āṇāpesi – ‘‘tena hi, bhaṇe, dīghītiṃ kosalarājānaṃ sapajāpatikaṃ ānethā’’ti. ‘‘Evaṃ, devā’’ti kho, bhikkhave, te manussā brahmadattassa kāsirañño paṭissutvā dīghītiṃ kosalarājānaṃ sapajāpatikaṃ ānesuṃ. Atha kho, bhikkhave, brahmadatto kāsirājā manusse āṇāpesi – ‘‘tena hi, bhaṇe, dīghītiṃ kosalarājānaṃ sapajāpatikaṃ daḷhāya rajjuyā pacchābāhaṃ gāḷhabandhanaṃ bandhitvā khuramuṇḍaṃ karitvā kharassarena paṇavena rathikāya rathikaṃ siṅghāṭakena siṅghāṭakaṃ parinetvā dakkhiṇena dvārena nikkhāmetvā dakkhiṇato nagarassa catudhā chinditvā catuddisā bilāni nikkhipathā’’ti. ‘‘Evaṃ, devā’’ti kho, bhikkhave, te manussā brahmadattassa kāsirañño paṭissutvā dīghītiṃ kosalarājānaṃ sapajāpatikaṃ daḷhāya rajjuyā pacchābāhaṃ gāḷhabandhanaṃ bandhitvā khuramuṇḍaṃ karitvā kharassarena paṇavena rathikāya rathikaṃ siṅghāṭakena siṅghāṭakaṃ parinenti.
ཨཐ ཁོ, བྷིཀྑཝེ, དཱིགྷཱཝུསྶ ཀུམཱརསྶ ཨེཏདཧོསི – ‘‘ཙིརཾདིཊྛཱ ཁོ མེ མཱཏཱཔིཏརོ། ཡཾནཱུནཱཧཾ མཱཏཱཔིཏརོ པསྶེཡྻ’’ནྟི། ཨཐ ཁོ, བྷིཀྑཝེ, དཱིགྷཱཝུ ཀུམཱརོ བཱརཱཎསིཾ པཝིསིཏྭཱ ཨདྡས མཱཏཱཔིཏརོ དལ༹ྷཱཡ རཛྫུཡཱ པཙྪཱབཱཧཾ གཱལ༹ྷབནྡྷནཾ བནྡྷིཏྭཱ ཁུརམུཎྜཾ ཀརིཏྭཱ ཁརསྶརེན པཎཝེན རཐིཀཱཡ རཐིཀཾ སིངྒྷཱཊཀེན སིངྒྷཱཊཀཾ པརིནེནྟེ, དིསྭཱན ཡེན མཱཏཱཔིཏརོ ཏེནུཔསངྐམི། ཨདྡསཱ ཁོ, བྷིཀྑཝེ, དཱིགྷཱིཏི ཀོསལརཱཛཱ དཱིགྷཱཝུཾ ཀུམཱརཾ དཱུརཏོཝ ཨཱགཙྪནྟཾ; དིསྭཱན དཱིགྷཱཝུཾ ཀུམཱརཾ ཨེཏདཝོཙ – ‘‘མཱ ཁོ ཏྭཾ, ཏཱཏ དཱིགྷཱཝུ, དཱིགྷཾ པསྶ, མཱ རསྶཾ། ན ཧི, ཏཱཏ དཱིགྷཱཝུ, ཝེརེན ཝེརཱ སམྨནྟི; ཨཝེརེན ཧི, ཏཱཏ དཱིགྷཱཝུ, ཝེརཱ སམྨནྟཱི’’ཏི། ཨེཝཾ ཝུཏྟེ, བྷིཀྑཝེ, ཏེ མནུསྶཱ དཱིགྷཱིཏིཾ ཀོསལརཱཛཱནཾ ཨེཏདཝོཙུཾ – ‘‘ཨུམྨཏྟཀོ ཨཡཾ དཱིགྷཱིཏི ཀོསལརཱཛཱ ཝིཔྤལཔཏི། ཀོ ཨིམསྶ དཱིགྷཱཝུ? ཀཾ ཨཡཾ ཨེཝམཱཧ – ‘མཱ ཁོ ཏྭཾ, ཏཱཏ དཱིགྷཱཝུ, དཱིགྷཾ པསྶ, མཱ རསྶཾ། ན ཧི, ཏཱཏ དཱིགྷཱཝུ, ཝེརེན ཝེརཱ སམྨནྟི; ཨཝེརེན ཧི, ཏཱཏ དཱིགྷཱཝུ, ཝེརཱ སམྨནྟཱི’’ཏི། ‘‘ནཱཧཾ, བྷཎེ, ཨུམྨཏྟཀོ ཝིཔྤལཔཱམི, ཨཔི ཙ ཡོ ཝིཉྙཱུ སོ ཝིབྷཱཝེསྶཏཱི’’ཏི། དུཏིཡམྤི ཁོ, བྷིཀྑཝེ…པེ॰… ཏཏིཡམྤི ཁོ, བྷིཀྑཝེ, དཱིགྷཱིཏི ཀོསལརཱཛཱ དཱིགྷཱཝུཾ ཀུམཱརཾ ཨེཏདཝོཙ – ‘‘མཱ ཁོ ཏྭཾ, ཏཱཏ དཱིགྷཱཝུ, དཱིགྷཾ པསྶ, མཱ རསྶཾ། ན ཧི, ཏཱཏ དཱིགྷཱཝུ, ཝེརེན ཝེརཱ སམྨནྟི; ཨཝེརེན ཧི, ཏཱཏ དཱིགྷཱཝུ, ཝེརཱ སམྨནྟཱི’’ཏི། ཏཏིཡམྤི ཁོ, བྷིཀྑཝེ, ཏེ མནུསྶཱ དཱིགྷཱིཏིཾ ཀོསལརཱཛཱནཾ ཨེཏདཝོཙུཾ – ‘‘ཨུམྨཏྟཀོ ཨཡཾ དཱིགྷཱིཏི ཀོསལརཱཛཱ ཝིཔྤལཔཏི། ཀོ ཨིམསྶ དཱིགྷཱཝུ ? ཀཾ ཨཡཾ ཨེཝམཱཧ – མཱ ཁོ ཏྭཾ, ཏཱཏ དཱིགྷཱཝུ, དཱིགྷཾ པསྶ, མཱ རསྶཾ། ན ཧི, ཏཱཏ དཱིགྷཱཝུ, ཝེརེན ཝེརཱ སམྨནྟི; ཨཝེརེན ཧི, ཏཱཏ དཱིགྷཱཝུ, ཝེརཱ སམྨནྟཱི’’ཏི། ‘‘ནཱཧཾ, བྷཎེ, ཨུམྨཏྟཀོ ཝིཔྤལཔཱམི, ཨཔི ཙ ཡོ ཝིཉྙཱུ སོ ཝིབྷཱཝེསྶཏཱི’’ཏི། ཨཐ ཁོ, བྷིཀྑཝེ, ཏེ མནུསྶཱ དཱིགྷཱིཏིཾ ཀོསལརཱཛཱནཾ སཔཛཱཔཏིཀཾ རཐིཀཱཡ རཐིཀཾ སིངྒྷཱཊཀེན སིངྒྷཱཊཀཾ པརིནེཏྭཱ དཀྑིཎེན དྭཱརེན ནིཀྑཱམེཏྭཱ དཀྑིཎཏོ ནགརསྶ ཙཏུདྷཱ ཚིནྡིཏྭཱ ཙཏུདྡིསཱ བིལཱནི ནིཀྑིཔིཏྭཱ གུམྦཾ ཋཔེཏྭཱ པཀྐམིཾསུ། ཨཐ ཁོ, བྷིཀྑཝེ, དཱིགྷཱཝུ ཀུམཱརོ བཱརཱཎསིཾ པཝིསིཏྭཱ སུརཾ ནཱིཧརིཏྭཱ གུམྦིཡེ པཱཡེསི། ཡདཱ ཏེ མཏྟཱ ཨཧེསུཾ པཏིཏཱ, ཨཐ ཀཊྛཱནི སཾཀཌྜྷིཏྭཱ ཙིཏཀཾ ཀརིཏྭཱ མཱཏཱཔིཏཱུནཾ སརཱིརཾ ཙིཏཀཾ ཨཱརོཔེཏྭཱ ཨགྒིཾ དཏྭཱ པཉྫལིཀོ ཏིཀྑཏྟུཾ ཙིཏཀཾ པདཀྑིཎཾ ཨཀཱསི།
Atha kho, bhikkhave, dīghāvussa kumārassa etadahosi – ‘‘ciraṃdiṭṭhā kho me mātāpitaro. Yaṃnūnāhaṃ mātāpitaro passeyya’’nti. Atha kho, bhikkhave, dīghāvu kumāro bārāṇasiṃ pavisitvā addasa mātāpitaro daḷhāya rajjuyā pacchābāhaṃ gāḷhabandhanaṃ bandhitvā khuramuṇḍaṃ karitvā kharassarena paṇavena rathikāya rathikaṃ siṅghāṭakena siṅghāṭakaṃ parinente, disvāna yena mātāpitaro tenupasaṅkami. Addasā kho, bhikkhave, dīghīti kosalarājā dīghāvuṃ kumāraṃ dūratova āgacchantaṃ; disvāna dīghāvuṃ kumāraṃ etadavoca – ‘‘mā kho tvaṃ, tāta dīghāvu, dīghaṃ passa, mā rassaṃ. Na hi, tāta dīghāvu, verena verā sammanti; averena hi, tāta dīghāvu, verā sammantī’’ti. Evaṃ vutte, bhikkhave, te manussā dīghītiṃ kosalarājānaṃ etadavocuṃ – ‘‘ummattako ayaṃ dīghīti kosalarājā vippalapati. Ko imassa dīghāvu? Kaṃ ayaṃ evamāha – ‘mā kho tvaṃ, tāta dīghāvu, dīghaṃ passa, mā rassaṃ. Na hi, tāta dīghāvu, verena verā sammanti; averena hi, tāta dīghāvu, verā sammantī’’ti. ‘‘Nāhaṃ, bhaṇe, ummattako vippalapāmi, api ca yo viññū so vibhāvessatī’’ti. Dutiyampi kho, bhikkhave…pe… tatiyampi kho, bhikkhave, dīghīti kosalarājā dīghāvuṃ kumāraṃ etadavoca – ‘‘mā kho tvaṃ, tāta dīghāvu, dīghaṃ passa, mā rassaṃ. Na hi, tāta dīghāvu, verena verā sammanti; averena hi, tāta dīghāvu, verā sammantī’’ti. Tatiyampi kho, bhikkhave, te manussā dīghītiṃ kosalarājānaṃ etadavocuṃ – ‘‘ummattako ayaṃ dīghīti kosalarājā vippalapati. Ko imassa dīghāvu ? Kaṃ ayaṃ evamāha – mā kho tvaṃ, tāta dīghāvu, dīghaṃ passa, mā rassaṃ. Na hi, tāta dīghāvu, verena verā sammanti; averena hi, tāta dīghāvu, verā sammantī’’ti. ‘‘Nāhaṃ, bhaṇe, ummattako vippalapāmi, api ca yo viññū so vibhāvessatī’’ti. Atha kho, bhikkhave, te manussā dīghītiṃ kosalarājānaṃ sapajāpatikaṃ rathikāya rathikaṃ siṅghāṭakena siṅghāṭakaṃ parinetvā dakkhiṇena dvārena nikkhāmetvā dakkhiṇato nagarassa catudhā chinditvā catuddisā bilāni nikkhipitvā gumbaṃ ṭhapetvā pakkamiṃsu. Atha kho, bhikkhave, dīghāvu kumāro bārāṇasiṃ pavisitvā suraṃ nīharitvā gumbiye pāyesi. Yadā te mattā ahesuṃ patitā, atha kaṭṭhāni saṃkaḍḍhitvā citakaṃ karitvā mātāpitūnaṃ sarīraṃ citakaṃ āropetvā aggiṃ datvā pañjaliko tikkhattuṃ citakaṃ padakkhiṇaṃ akāsi.
༤༦༡. ཏེན ཁོ པན སམཡེན བྲཧྨདཏྟོ ཀཱསིརཱཛཱ ཨུཔརིཔཱསཱདཝརགཏོ ཧོཏི། ཨདྡསཱ ཁོ, བྷིཀྑཝེ, བྲཧྨདཏྟོ ཀཱསིརཱཛཱ དཱིགྷཱཝུཾ ཀུམཱརཾ པཉྫལིཀཾ ཏིཀྑཏྟུཾ ཙིཏཀཾ པདཀྑིཎཾ ཀརོནྟཾ, དིསྭཱནསྶ ཨེཏདཧོསི – ‘‘ནིསྶཾསཡཾ ཁོ སོ མནུསྶོ དཱིགྷཱིཏིསྶ ཀོསལརཉྙོ ཉཱཏི ཝཱ སཱལོཧིཏོ ཝཱ, ཨཧོ མེ ཨནཏྠཏོ, ན ཧི ནཱམ མེ ཀོཙི ཨཱརོཙེསྶཏཱི’’ཏི། ཨཐ ཁོ, བྷིཀྑཝེ, དཱིགྷཱཝུ ཀུམཱརོ ཨརཉྙཾ གནྟྭཱ ཡཱཝདཏྠཾ ཀནྡིཏྭཱ རོདིཏྭཱ ཁཔྤཾ 9 པུཉྪིཏྭཱ བཱརཱཎསིཾ པཝིསིཏྭཱ ཨནྟེཔུརསྶ སཱམནྟཱ ཧཏྠིསཱལཾ གནྟྭཱ ཧཏྠཱཙརིཡཾ ཨེཏདཝོཙ – ‘‘ཨིཙྪཱམཧཾ, ཨཱཙརིཡ, སིཔྤཾ སིཀྑིཏུ’’ནྟི། ‘‘ཏེན ཧི, བྷཎེ མཱཎཝཀ, སིཀྑསྶཱུ’’ཏི། ཨཐ ཁོ, བྷིཀྑཝེ, དཱིགྷཱཝུ ཀུམཱརོ རཏྟིཡཱ པཙྩཱུསསམཡཾ པཙྩུཊྛཱཡ ཧཏྠིསཱལཱཡཾ མཉྫུནཱ སརེན གཱཡི, ཝཱིཎཉྩ ཝཱདེསི། ཨསྶོསི ཁོ, བྷིཀྑཝེ, བྲཧྨདཏྟོ ཀཱསིརཱཛཱ རཏྟིཡཱ པཙྩཱུསསམཡཾ པཙྩུཊྛཱཡ ཧཏྠིསཱལཱཡཾ མཉྫུནཱ སརེན གཱིཏཾ ཝཱིཎཉྩ ཝཱདིཏཾ, སུཏྭཱན མནུསྶེ པུཙྪི – ‘‘ཀོ, བྷཎེ, རཏྟིཡཱ པཙྩཱུསསམཡཾ པཙྩུཊྛཱཡ ཧཏྠིསཱལཱཡཾ མཉྫུནཱ སརེན གཱཡི, ཝཱིཎཉྩ ཝཱདེསཱི’’ཏི? ‘‘ཨམུཀསྶ, དེཝ, ཧཏྠཱཙརིཡསྶ ཨནྟེཝཱསཱི མཱཎཝཀོ རཏྟིཡཱ པཙྩཱུསསམཡཾ པཙྩུཊྛཱཡ ཧཏྠིསཱལཱཡཾ མཉྫུནཱ སརེན གཱཡི, ཝཱིཎཉྩ ཝཱདེསཱི’’ཏི། ‘‘ཏེན ཧི, བྷཎེ, ཏཾ མཱཎཝཀཾ ཨཱནེཐཱ’’ཏི། ‘‘ཨེཝཾ, དེཝཱ’’ཏི ཁོ, བྷིཀྑཝེ, ཏེ མནུསྶཱ བྲཧྨདཏྟསྶ ཀཱསིརཉྙོ པཊིསྶུཏྭཱ དཱིགྷཱཝུཾ ཀུམཱརཾ ཨཱནེསུཾ། ‘‘ཏྭཾ བྷཎེ མཱཎཝཀ, རཏྟིཡཱ པཙྩཱུསསམཡཾ པཙྩུཊྛཱཡ ཧཏྠིསཱལཱཡཾ མཉྫུནཱ སརེན གཱཡི, ཝཱིཎཉྩ ཝཱདེསཱི’’ཏི? ‘‘ཨེཝཾ, དེཝཱ’’ཏི། ‘‘ཏེན ཧི ཏྭཾ, བྷཎེ མཱཎཝཀ, གཱཡསྶུ, ཝཱིཎཉྩ ཝཱདེཧཱི’’ཏི། ‘‘ཨེཝཾ, དེཝཱ’’ཏི ཁོ, བྷིཀྑཝེ, དཱིགྷཱཝུ ཀུམཱརོ བྲཧྨདཏྟསྶ ཀཱསིརཉྙོ པཊིསྶུཏྭཱ ཨཱརཱདྷཱཔེཀྑོ མཉྫུནཱ སརེན གཱཡི , ཝཱིཎཉྩ ཝཱདེསི། ‘‘ཏྭཾ, བྷཎེ མཱཎཝཀ, མཾ ཨུཔཊྛཧཱ’’ཏི། ‘‘ཨེཝཾ, དེཝཱ’’ཏི ཁོ, བྷིཀྑཝེ, དཱིགྷཱཝུ ཀུམཱརོ བྲཧྨདཏྟསྶ ཀཱསིརཉྙོ པཙྩསྶོསི། ཨཐ ཁོ, བྷིཀྑཝེ, དཱིགྷཱཝུ ཀུམཱརོ བྲཧྨདཏྟསྶ ཀཱསིརཉྙོ པུབྦུཊྛཱཡཱི ཨཧོསི པཙྪཱནིཔཱཏཱི ཀིངྐཱརཔཊིསྶཱཝཱི མནཱཔཙཱརཱི པིཡཝཱདཱི། ཨཐ ཁོ, བྷིཀྑཝེ, བྲཧྨདཏྟོ ཀཱསིརཱཛཱ དཱིགྷཱཝུཾ ཀུམཱརཾ ནཙིརསྶེཝ ཨབྦྷནྟརིམེ ཝིསྶཱསིཀཊྛཱནེ ཋཔེསི།
461. Tena kho pana samayena brahmadatto kāsirājā uparipāsādavaragato hoti. Addasā kho, bhikkhave, brahmadatto kāsirājā dīghāvuṃ kumāraṃ pañjalikaṃ tikkhattuṃ citakaṃ padakkhiṇaṃ karontaṃ, disvānassa etadahosi – ‘‘nissaṃsayaṃ kho so manusso dīghītissa kosalarañño ñāti vā sālohito vā, aho me anatthato, na hi nāma me koci ārocessatī’’ti. Atha kho, bhikkhave, dīghāvu kumāro araññaṃ gantvā yāvadatthaṃ kanditvā roditvā khappaṃ 10 puñchitvā bārāṇasiṃ pavisitvā antepurassa sāmantā hatthisālaṃ gantvā hatthācariyaṃ etadavoca – ‘‘icchāmahaṃ, ācariya, sippaṃ sikkhitu’’nti. ‘‘Tena hi, bhaṇe māṇavaka, sikkhassū’’ti. Atha kho, bhikkhave, dīghāvu kumāro rattiyā paccūsasamayaṃ paccuṭṭhāya hatthisālāyaṃ mañjunā sarena gāyi, vīṇañca vādesi. Assosi kho, bhikkhave, brahmadatto kāsirājā rattiyā paccūsasamayaṃ paccuṭṭhāya hatthisālāyaṃ mañjunā sarena gītaṃ vīṇañca vāditaṃ, sutvāna manusse pucchi – ‘‘ko, bhaṇe, rattiyā paccūsasamayaṃ paccuṭṭhāya hatthisālāyaṃ mañjunā sarena gāyi, vīṇañca vādesī’’ti? ‘‘Amukassa, deva, hatthācariyassa antevāsī māṇavako rattiyā paccūsasamayaṃ paccuṭṭhāya hatthisālāyaṃ mañjunā sarena gāyi, vīṇañca vādesī’’ti. ‘‘Tena hi, bhaṇe, taṃ māṇavakaṃ ānethā’’ti. ‘‘Evaṃ, devā’’ti kho, bhikkhave, te manussā brahmadattassa kāsirañño paṭissutvā dīghāvuṃ kumāraṃ ānesuṃ. ‘‘Tvaṃ bhaṇe māṇavaka, rattiyā paccūsasamayaṃ paccuṭṭhāya hatthisālāyaṃ mañjunā sarena gāyi, vīṇañca vādesī’’ti? ‘‘Evaṃ, devā’’ti. ‘‘Tena hi tvaṃ, bhaṇe māṇavaka, gāyassu, vīṇañca vādehī’’ti. ‘‘Evaṃ, devā’’ti kho, bhikkhave, dīghāvu kumāro brahmadattassa kāsirañño paṭissutvā ārādhāpekkho mañjunā sarena gāyi , vīṇañca vādesi. ‘‘Tvaṃ, bhaṇe māṇavaka, maṃ upaṭṭhahā’’ti. ‘‘Evaṃ, devā’’ti kho, bhikkhave, dīghāvu kumāro brahmadattassa kāsirañño paccassosi. Atha kho, bhikkhave, dīghāvu kumāro brahmadattassa kāsirañño pubbuṭṭhāyī ahosi pacchānipātī kiṅkārapaṭissāvī manāpacārī piyavādī. Atha kho, bhikkhave, brahmadatto kāsirājā dīghāvuṃ kumāraṃ nacirasseva abbhantarime vissāsikaṭṭhāne ṭhapesi.
༤༦༢. ཨཐ ཁོ, བྷིཀྑཝེ, བྲཧྨདཏྟོ ཀཱསིརཱཛཱ དཱིགྷཱཝུཾ ཀུམཱརཾ ཨེཏདཝོཙ – ‘‘ཏེན ཧི, བྷཎེ མཱཎཝཀ, རཐཾ ཡོཛེཧི, མིགཝཾ གམིསྶཱམཱ’’ཏི། ‘‘ཨེཝཾ, དེཝཱ’’ཏི ཁོ, བྷིཀྑཝེ, དཱིགྷཱཝུ ཀུམཱརོ བྲཧྨདཏྟསྶ ཀཱསིརཉྙོ པཊིསྶུཏྭཱ རཐཾ ཡོཛེཏྭཱ བྲཧྨདཏྟཾ ཀཱསིརཱཛཱནཾ ཨེཏདཝོཙ – ‘‘ཡུཏྟོ ཁོ ཏེ, དེཝ, རཐོ, ཡསྶ དཱནི ཀཱལཾ མཉྙསཱི’’ཏི། ཨཐ ཁོ, བྷིཀྑཝེ, བྲཧྨདཏྟོ ཀཱསིརཱཛཱ རཐཾ ཨབྷིརུཧི། དཱིགྷཱཝུ ཀུམཱརོ རཐཾ པེསེསི། ཏཐཱ ཏཐཱ རཐཾ པེསེསི ཡཐཱ ཡཐཱ ཨཉྙེནེཝ སེནཱ ཨགམཱསི ཨཉྙེནེཝ རཐོ། ཨཐ ཁོ, བྷིཀྑཝེ, བྲཧྨདཏྟོ ཀཱསིརཱཛཱ དཱུརཾ གནྟྭཱ དཱིགྷཱཝུཾ ཀུམཱརཾ ཨེཏདཝོཙ – ‘‘ཏེན ཧི, བྷཎེ མཱཎཝཀ, རཐཾ མུཉྩསྶུ, ཀིལནྟོམྷི, ནིཔཛྫིསྶཱམཱི’’ཏི། ‘‘ཨེཝཾ, དེཝཱ’’ཏི ཁོ, བྷིཀྑཝེ, དཱིགྷཱཝུ ཀུམཱརོ བྲཧྨདཏྟསྶ ཀཱསིརཉྙོ པཊིསྶུཏྭཱ རཐཾ མུཉྩིཏྭཱ པཐཝིཡཾ པལླངྐེན ནིསཱིདི། ཨཐ ཁོ, བྷིཀྑཝེ, བྲཧྨདཏྟོ ཀཱསིརཱཛཱ དཱིགྷཱཝུསྶ ཀུམཱརསྶ ཨུཙྪངྒེ སཱིསཾ ཀཏྭཱ སེཡྻཾ ཀཔྤེསི། ཏསྶ ཀིལནྟསྶ མུཧུཏྟཀེནེཝ ནིདྡཱ ཨོཀྐམི། ཨཐ ཁོ, བྷིཀྑཝེ, དཱིགྷཱཝུསྶ ཀུམཱརསྶ ཨེཏདཧོསི – ‘‘ཨཡཾ ཁོ བྲཧྨདཏྟོ ཀཱསིརཱཛཱ བཧུནོ ཨམྷཱཀཾ ཨནཏྠསྶ ཀཱརཀོ། ཨིམིནཱ ཨམྷཱཀཾ བལཉྩ ཝཱཧནཉྩ ཛནཔདོ ཙ ཀོསོ ཙ ཀོཊྛཱགཱརཉྩ ཨཙྪིནྣཾ། ཨིམིནཱ ཙ མེ མཱཏཱཔིཏརོ ཧཏཱ། ཨཡཾ ཁྭསྶ ཀཱལོ ཡོཧཾ ཝེརཾ ཨཔྤེཡྻ’’ནྟི ཀོསིཡཱ ཁགྒཾ ནིབྦཱཧི། ཨཐ ཁོ, བྷིཀྑཝེ, དཱིགྷཱཝུསྶ ཀུམཱརསྶ ཨེཏདཧོསི – ‘‘པིཏཱ ཁོ མཾ མརཎཀཱལེ ཨཝཙ ‘མཱ ཁོ ཏྭཾ, ཏཱཏ དཱིགྷཱཝུ, དཱིགྷཾ པསྶ, མཱ རསྶཾ། ན ཧི, ཏཱཏ དཱིགྷཱཝུ, ཝེརེན ཝེརཱ སམྨནྟི; ཨཝེརེན ཧི, ཏཱཏ དཱིགྷཱཝུ, ཝེརཱ སམྨནྟཱི’ཏི། ན ཁོ མེཏཾ པཏིརཱུཔཾ , ཡྭཱཧཾ པིཏུཝཙནཾ ཨཏིཀྐམེཡྻ’’ནྟི ཀོསིཡཱ ཁགྒཾ པཝེསེསི། དུཏིཡམྤི ཁོ, བྷིཀྑཝེ, དཱིགྷཱཝུསྶ ཀུམཱརསྶ ཨེཏདཧོསི – ‘‘ཨཡཾ ཁོ བྲཧྨདཏྟོ ཀཱསིརཱཛཱ བཧུནོ ཨམྷཱཀཾ ཨནཏྠསྶ ཀཱརཀོ, ཨིམིནོ ཨམྷཱཀཾ བལཉྩ ཝཱཧནཉྩ ཛནཔདོ ཙ ཀོསོ ཙ ཀོཊྛཱགཱརཉྩ ཨཙྪིནྣཾ, ཨིམིནཱ ཙ མེ མཱཏཱཔིཏརོ ཧཏཱ, ཨཡཾ ཁྭསྶ ཀཱལོ ཡོཧཾ ཝེརཾ ཨཔྤེཡྻ’’ནྟི ཀོསིཡཱ ཁགྒཾ ནིབྦཱཧི། དུཏིཡམྤི ཁོ, བྷིཀྑཝེ, དཱིགྷཱཝུསྶ ཀུམཱརསྶ ཨེཏདཧོསི – ‘‘པིཏཱ ཁོ མཾ མརཎཀཱལེ ཨཝཙ ‘མཱ ཁོ ཏྭཾ ཏཱཏ དཱིགྷཱཝུ, དཱིགྷཾ པསྶ, མཱ རསྶཾ, ན ཧི ཏཱཏ དཱིགྷཱཝུ ཝེརེན ཝེརཱ སམྨནྟི; ཨཝེརེན ཧི, ཏཱཏ དཱིགྷཱཝུ, ཝེརཱ སམྨནྟཱི’ཏི། ན ཁོ མེཏཾ པཏིརཱུཔཾ, ཡྭཱཧཾ པིཏུཝཙནཾ ཨཏིཀྐམེཡྻ’’ནྟི། པུནདེཝ ཀོསིཡཱ ཁགྒཾ པཝེསེསི། ཏཏིཡམྤི ཁོ, བྷིཀྑཝེ, དཱིགྷཱཝུསྶ ཀུམཱརསྶ ཨེཏདཧོསི – ‘‘ཨཡཾ ཁོ བྲཧྨདཏྟོ ཀཱསིརཱཛཱ བཧུནོ ཨམྷཱཀཾ ཨནཏྠསྶ ཀཱརཀོ། ཨིམིནཱ ཨམྷཱཀཾ བལཉྩ ཝཱཧནཉྩ ཛནཔདོ ཙ ཀོསོ ཙ ཀོཊྛཱགཱརཉྩ ཨཙྪིནྣཾ། ཨིམིནཱ ཙ མེ མཱཏཱཔིཏརོ ཧཏཱ། ཨཡཾ ཁྭསྶ ཀཱལོ ཡོཧཾ ཝེརཾ ཨཔྤེཡྻ’’ནྟི ཀོསིཡཱ ཁགྒཾ ནིབྦཱཧི། ཏཏིཡམྤི ཁོ, བྷིཀྑཝེ, དཱིགྷཱཝུསྶ ཀུམཱརསྶ ཨེཏདཧོསི – ‘‘པིཏཱ ཁོ མཾ མརཎཀཱལེ ཨཝཙ ‘མཱ ཁོ ཏྭཾ, ཏཱཏ དཱིགྷཱཝུ, དཱིགྷཾ པསྶ, མཱ རསྶཾ། ན ཧི, ཏཱཏ དཱིགྷཱཝུ, ཝེརེན ཝེརཱ སམྨནྟི; ཨཝེརེན ཧི, ཏཱཏ དཱིགྷཱཝུ, ཝེརཱ སམྨནྟཱི’ཏི། ན ཁོ མེཏཾ པཏིརཱུཔཾ, ཡྭཱཧཾ པིཏུཝཙནཾ ཨཏིཀྐམེཡྻ’’’ནྟི པུནདེཝ ཀོསིཡཱ ཁགྒཾ པཝེསེསི། ཨཐ ཁོ, བྷིཀྑཝེ, བྲཧྨདཏྟོ ཀཱསིརཱཛཱ བྷཱིཏོ ཨུབྦིགྒོ ཨུསྶངྐཱི ཨུཏྲསྟོ སཧསཱ ཝུཊྛཱསི། ཨཐ ཁོ, བྷིཀྑཝེ, དཱིགྷཱཝུ ཀུམཱརོ བྲཧྨདཏྟཾ ཀཱསིརཱཛཱནཾ ཨེཏདཝོཙ – ‘‘ཀིསྶ ཏྭཾ , དེཝ, བྷཱིཏོ ཨུབྦིགྒོ ཨུསྶངྐཱི ཨུཏྲསྟོ སཧསཱ ཝུཊྛཱསཱི’’ཏི? ཨིདྷ མཾ, བྷཎེ མཱཎཝཀ, དཱིགྷཱིཏིསྶ ཀོསལརཉྙོ པུཏྟོ དཱིགྷཱཝུ ཀུམཱརོ སུཔིནནྟེན ཁགྒེན པརིཔཱཏེསི། ཏེནཱཧཾ བྷཱིཏོ ཨུབྦིགྒོ ཨུསྶངྐཱི ཨུཏྲསྟོ སཧསཱ ཝུཊྛཱསིནྟི། ཨཐ ཁོ, བྷིཀྑཝེ, དཱིགྷཱཝུ ཀུམཱརོ ཝཱམེན ཧཏྠེན བྲཧྨདཏྟསྶ ཀཱསིརཉྙོ སཱིསཾ པརཱམསིཏྭཱ དཀྑིཎེན ཧཏྠེན ཁགྒཾ ནིབྦཱཧེཏྭཱ བྲཧྨདཏྟཾ ཀཱསིརཱཛཱནཾ ཨེཏདཝོཙ – ‘‘ཨཧཾ ཁོ སོ, དེཝ, དཱིགྷཱིཏིསྶ ཀོསལརཉྙོ པུཏྟོ དཱིགྷཱཝུ ཀུམཱརོ། བཧུནོ ཏྭཾ ཨམྷཱཀཾ ཨནཏྠསྶ ཀཱརཀོ། ཏཡཱ ཨམྷཱཀཾ བལཉྩ ཝཱཧནཉྩ ཛནཔདོ ཙ ཀོསོ ཙ ཀོཊྛཱགཱརཉྩ ཨཙྪིནྣཾ། ཏཡཱ ཙ མེ མཱཏཱཔིཏརོ ཧཏཱ། ཨཡཾ ཁྭསྶ ཀཱལོ ཡྭཱཧཾ ཝེརཾ ཨཔྤེཡྻ’’ནྟི། ཨཐ ཁོ, བྷིཀྑཝེ, བྲཧྨདཏྟོ ཀཱསིརཱཛཱ དཱིགྷཱཝུསྶ ཀུམཱརསྶ པཱདེསུ སིརསཱ ནིཔཏིཏྭཱ དཱིགྷཱཝུཾ ཀུམཱརཾ ཨེཏདཝོཙ – ‘‘ཛཱིཝིཏཾ མེ, ཏཱཏ དཱིགྷཱཝུ, དེཧི། ཛཱིཝིཏཾ མེ, ཏཱཏ དཱིགྷཱཝུ, དེཧཱི’’ཏི། ‘‘ཀྱཱཧཾ ཨུསྶཧཱམི དེཝསྶ ཛཱིཝིཏཾ དཱཏུཾ ? དེཝོ ཁོ མེ ཛཱིཝིཏཾ དདེཡྻཱ’’ཏི། ‘‘ཏེན ཧི, ཏཱཏ དཱིགྷཱཝུ, ཏྭཉྩེཝ མེ ཛཱིཝིཏཾ དེཧི, ཨཧཉྩ ཏེ ཛཱིཝིཏཾ དམྨཱི’’ཏི། ཨཐ ཁོ, བྷིཀྑཝེ, བྲཧྨདཏྟོ ཙ ཀཱསིརཱཛཱ དཱིགྷཱཝུ ཙ ཀུམཱརོ ཨཉྙམཉྙསྶ ཛཱིཝིཏཾ ཨདཾསུ, པཱཎིཉྩ ཨགྒཧེསུཾ, སཔཐཉྩ ཨཀཾསུ ཨདྡཱུབྷཱཡ 11།
462. Atha kho, bhikkhave, brahmadatto kāsirājā dīghāvuṃ kumāraṃ etadavoca – ‘‘tena hi, bhaṇe māṇavaka, rathaṃ yojehi, migavaṃ gamissāmā’’ti. ‘‘Evaṃ, devā’’ti kho, bhikkhave, dīghāvu kumāro brahmadattassa kāsirañño paṭissutvā rathaṃ yojetvā brahmadattaṃ kāsirājānaṃ etadavoca – ‘‘yutto kho te, deva, ratho, yassa dāni kālaṃ maññasī’’ti. Atha kho, bhikkhave, brahmadatto kāsirājā rathaṃ abhiruhi. Dīghāvu kumāro rathaṃ pesesi. Tathā tathā rathaṃ pesesi yathā yathā aññeneva senā agamāsi aññeneva ratho. Atha kho, bhikkhave, brahmadatto kāsirājā dūraṃ gantvā dīghāvuṃ kumāraṃ etadavoca – ‘‘tena hi, bhaṇe māṇavaka, rathaṃ muñcassu, kilantomhi, nipajjissāmī’’ti. ‘‘Evaṃ, devā’’ti kho, bhikkhave, dīghāvu kumāro brahmadattassa kāsirañño paṭissutvā rathaṃ muñcitvā pathaviyaṃ pallaṅkena nisīdi. Atha kho, bhikkhave, brahmadatto kāsirājā dīghāvussa kumārassa ucchaṅge sīsaṃ katvā seyyaṃ kappesi. Tassa kilantassa muhuttakeneva niddā okkami. Atha kho, bhikkhave, dīghāvussa kumārassa etadahosi – ‘‘ayaṃ kho brahmadatto kāsirājā bahuno amhākaṃ anatthassa kārako. Iminā amhākaṃ balañca vāhanañca janapado ca koso ca koṭṭhāgārañca acchinnaṃ. Iminā ca me mātāpitaro hatā. Ayaṃ khvassa kālo yohaṃ veraṃ appeyya’’nti kosiyā khaggaṃ nibbāhi. Atha kho, bhikkhave, dīghāvussa kumārassa etadahosi – ‘‘pitā kho maṃ maraṇakāle avaca ‘mā kho tvaṃ, tāta dīghāvu, dīghaṃ passa, mā rassaṃ. Na hi, tāta dīghāvu, verena verā sammanti; averena hi, tāta dīghāvu, verā sammantī’ti. Na kho metaṃ patirūpaṃ , yvāhaṃ pituvacanaṃ atikkameyya’’nti kosiyā khaggaṃ pavesesi. Dutiyampi kho, bhikkhave, dīghāvussa kumārassa etadahosi – ‘‘ayaṃ kho brahmadatto kāsirājā bahuno amhākaṃ anatthassa kārako, imino amhākaṃ balañca vāhanañca janapado ca koso ca koṭṭhāgārañca acchinnaṃ, iminā ca me mātāpitaro hatā, ayaṃ khvassa kālo yohaṃ veraṃ appeyya’’nti kosiyā khaggaṃ nibbāhi. Dutiyampi kho, bhikkhave, dīghāvussa kumārassa etadahosi – ‘‘pitā kho maṃ maraṇakāle avaca ‘mā kho tvaṃ tāta dīghāvu, dīghaṃ passa, mā rassaṃ, na hi tāta dīghāvu verena verā sammanti; averena hi, tāta dīghāvu, verā sammantī’ti. Na kho metaṃ patirūpaṃ, yvāhaṃ pituvacanaṃ atikkameyya’’nti. Punadeva kosiyā khaggaṃ pavesesi. Tatiyampi kho, bhikkhave, dīghāvussa kumārassa etadahosi – ‘‘ayaṃ kho brahmadatto kāsirājā bahuno amhākaṃ anatthassa kārako. Iminā amhākaṃ balañca vāhanañca janapado ca koso ca koṭṭhāgārañca acchinnaṃ. Iminā ca me mātāpitaro hatā. Ayaṃ khvassa kālo yohaṃ veraṃ appeyya’’nti kosiyā khaggaṃ nibbāhi. Tatiyampi kho, bhikkhave, dīghāvussa kumārassa etadahosi – ‘‘pitā kho maṃ maraṇakāle avaca ‘mā kho tvaṃ, tāta dīghāvu, dīghaṃ passa, mā rassaṃ. Na hi, tāta dīghāvu, verena verā sammanti; averena hi, tāta dīghāvu, verā sammantī’ti. Na kho metaṃ patirūpaṃ, yvāhaṃ pituvacanaṃ atikkameyya’’’nti punadeva kosiyā khaggaṃ pavesesi. Atha kho, bhikkhave, brahmadatto kāsirājā bhīto ubbiggo ussaṅkī utrasto sahasā vuṭṭhāsi. Atha kho, bhikkhave, dīghāvu kumāro brahmadattaṃ kāsirājānaṃ etadavoca – ‘‘kissa tvaṃ , deva, bhīto ubbiggo ussaṅkī utrasto sahasā vuṭṭhāsī’’ti? Idha maṃ, bhaṇe māṇavaka, dīghītissa kosalarañño putto dīghāvu kumāro supinantena khaggena paripātesi. Tenāhaṃ bhīto ubbiggo ussaṅkī utrasto sahasā vuṭṭhāsinti. Atha kho, bhikkhave, dīghāvu kumāro vāmena hatthena brahmadattassa kāsirañño sīsaṃ parāmasitvā dakkhiṇena hatthena khaggaṃ nibbāhetvā brahmadattaṃ kāsirājānaṃ etadavoca – ‘‘ahaṃ kho so, deva, dīghītissa kosalarañño putto dīghāvu kumāro. Bahuno tvaṃ amhākaṃ anatthassa kārako. Tayā amhākaṃ balañca vāhanañca janapado ca koso ca koṭṭhāgārañca acchinnaṃ. Tayā ca me mātāpitaro hatā. Ayaṃ khvassa kālo yvāhaṃ veraṃ appeyya’’nti. Atha kho, bhikkhave, brahmadatto kāsirājā dīghāvussa kumārassa pādesu sirasā nipatitvā dīghāvuṃ kumāraṃ etadavoca – ‘‘jīvitaṃ me, tāta dīghāvu, dehi. Jīvitaṃ me, tāta dīghāvu, dehī’’ti. ‘‘Kyāhaṃ ussahāmi devassa jīvitaṃ dātuṃ ? Devo kho me jīvitaṃ dadeyyā’’ti. ‘‘Tena hi, tāta dīghāvu, tvañceva me jīvitaṃ dehi, ahañca te jīvitaṃ dammī’’ti. Atha kho, bhikkhave, brahmadatto ca kāsirājā dīghāvu ca kumāro aññamaññassa jīvitaṃ adaṃsu, pāṇiñca aggahesuṃ, sapathañca akaṃsu addūbhāya 12.
ཨཐ ཁོ, བྷིཀྑཝེ, བྲཧྨདཏྟོ ཀཱསིརཱཛཱ དཱིགྷཱཝུཾ ཀུམཱརཾ ཨེཏདཝོཙ – ‘‘ཏེན ཧི, ཏཱཏ དཱིགྷཱཝུ, རཐཾ ཡོཛེཧི , གམིསྶཱམཱ’’ཏི། ‘‘ཨེཝཾ, དེཝཱ’’ཏི ཁོ, བྷིཀྑཝེ, དཱིགྷཱཝུ ཀུམཱརོ བྲཧྨདཏྟསྶ ཀཱསིརཉྙོ པཊིསྶུཏྭཱ རཐཾ ཡོཛེཏྭཱ བྲཧྨདཏྟཾ ཀཱསིརཱཛཱནཾ ཨེཏདཝོཙ – ‘‘ཡུཏྟོ ཁོ ཏེ, དེཝ, རཐོ, ཡསྶ དཱནི ཀཱལཾ མཉྙསཱི’’ཏི། ཨཐ ཁོ, བྷིཀྑཝེ, བྲཧྨདཏྟོ ཀཱསིརཱཛཱ རཐཾ ཨབྷིརུཧི། དཱིགྷཱཝུ ཀུམཱརོ རཐཾ པེསེསི། ཏཐཱ ཏཐཱ རཐཾ པེསེསི ཡཐཱ ཡཐཱ ནཙིརསྶེཝ སེནཱཡ སམཱགཉྪི། ཨཐ ཁོ, བྷིཀྑཝེ, བྲཧྨདཏྟོ ཀཱསིརཱཛཱ བཱརཱཎསིཾ པཝིསིཏྭཱ ཨམཙྩེ པཱརིསཛྫེ སནྣིཔཱཏཱཔེཏྭཱ ཨེཏདཝོཙ – ‘‘སཙེ, བྷཎེ, དཱིགྷཱིཏིསྶ ཀོསལརཉྙོ པུཏྟཾ དཱིགྷཱཝུཾ ཀུམཱརཾ པསྶེཡྻཱཐ, ཀིནྟི ནཾ ཀརེཡྻཱཐཱ’’ཏི? ཨེཀཙྩེ ཨེཝམཱཧཾསུ – ‘‘མཡཾ, དེཝ, ཧཏྠེ ཚིནྡེཡྻཱམ། མཡཾ, དེཝ, པཱདེ ཚིནྡེཡྻཱམ། མཡཾ, དེཝ, ཧཏྠཔཱདེ ཚིནྡེཡྻཱམ། མཡཾ, དེཝ, ཀཎྞེ ཚིནྡེཡྻཱམ། མཡཾ, དེཝ, ནཱསཾ ཚིནྡེཡྻཱམ། མཡཾ, དེཝ, ཀཎྞནཱསཾ ཚིནྡེཡྻཱམ། མཡཾ, དེཝ, སཱིསཾ ཚིནྡེཡྻཱམཱ’’ཏི། ‘‘ཨཡཾ ཁོ, བྷཎེ, དཱིགྷཱིཏིསྶ ཀོསལརཉྙོ པུཏྟོ དཱིགྷཱཝུ ཀུམཱརོ། ནཱཡཾ ལབྦྷཱ ཀིཉྩི ཀཱཏུཾ། ཨིམིནཱ ཙ མེ ཛཱིཝིཏཾ དིནྣཾ, མཡཱ ཙ ཨིམསྶ ཛཱིཝིཏཾ དིནྣ’’ནྟི།
Atha kho, bhikkhave, brahmadatto kāsirājā dīghāvuṃ kumāraṃ etadavoca – ‘‘tena hi, tāta dīghāvu, rathaṃ yojehi , gamissāmā’’ti. ‘‘Evaṃ, devā’’ti kho, bhikkhave, dīghāvu kumāro brahmadattassa kāsirañño paṭissutvā rathaṃ yojetvā brahmadattaṃ kāsirājānaṃ etadavoca – ‘‘yutto kho te, deva, ratho, yassa dāni kālaṃ maññasī’’ti. Atha kho, bhikkhave, brahmadatto kāsirājā rathaṃ abhiruhi. Dīghāvu kumāro rathaṃ pesesi. Tathā tathā rathaṃ pesesi yathā yathā nacirasseva senāya samāgañchi. Atha kho, bhikkhave, brahmadatto kāsirājā bārāṇasiṃ pavisitvā amacce pārisajje sannipātāpetvā etadavoca – ‘‘sace, bhaṇe, dīghītissa kosalarañño puttaṃ dīghāvuṃ kumāraṃ passeyyātha, kinti naṃ kareyyāthā’’ti? Ekacce evamāhaṃsu – ‘‘mayaṃ, deva, hatthe chindeyyāma. Mayaṃ, deva, pāde chindeyyāma. Mayaṃ, deva, hatthapāde chindeyyāma. Mayaṃ, deva, kaṇṇe chindeyyāma. Mayaṃ, deva, nāsaṃ chindeyyāma. Mayaṃ, deva, kaṇṇanāsaṃ chindeyyāma. Mayaṃ, deva, sīsaṃ chindeyyāmā’’ti. ‘‘Ayaṃ kho, bhaṇe, dīghītissa kosalarañño putto dīghāvu kumāro. Nāyaṃ labbhā kiñci kātuṃ. Iminā ca me jīvitaṃ dinnaṃ, mayā ca imassa jīvitaṃ dinna’’nti.
༤༦༣. ཨཐ ཁོ, བྷིཀྑཝེ, བྲཧྨདཏྟོ ཀཱསིརཱཛཱ དཱིགྷཱཝུཾ ཀུམཱརཾ ཨེཏདཝོཙ – ‘‘ཡཾ ཁོ ཏེ, ཏཱཏ དཱིགྷཱཝུ, པིཏཱ མརཎཀཱལེ ཨཝཙ ‘མཱ ཁོ ཏྭཾ, ཏཱཏ དཱིགྷཱཝུ, དཱིགྷཾ པསྶ, མཱ རསྶཾ། ན ཧི, ཏཱཏ དཱིགྷཱཝུ, ཝེརེན ཝེརཱ སམྨནྟི; ཨཝེརེན ཧི, ཏཱཏ དཱིགྷཱཝུ, ཝེརཱ སམྨནྟཱི’ཏི, ཀིཾ ཏེ པིཏཱ སནྡྷཱཡ ཨཝཙཱ’’ཏི? ‘‘ཡཾ ཁོ མེ , དེཝ, པིཏཱ མརཎཀཱལེ ཨཝཙ ‘མཱ དཱིགྷ’ནྟི མཱ ཙིརཾ ཝེརཾ ཨཀཱསཱིཏི། ཨིམཾ ཁོ མེ, དེཝ, པིཏཱ མརཎཀཱལེ ཨཝཙ མཱ དཱིགྷནྟི། ཡཾ ཁོ མེ, དེཝ, པིཏཱ མརཎཀཱལེ ཨཝཙ ‘མཱ རསྶ’ནྟི མཱ ཁིཔྤཾ མིཏྟེཧི བྷིཛྫིཏྠཱ’’ཏི། ཨིམཾ ཁོ མེ, དེཝ, པིཏཱ མརཎཀཱལེ ཨཝཙ མཱ རསྶནྟི། ཡཾ ཁོ མེ, དེཝ, པིཏཱ མརཎཀཱལེ ཨཝཙ ‘‘ན ཧི, ཏཱཏ དཱིགྷཱཝུ, ཝེརེན ཝེརཱ སམྨནྟི, ཨཝེརེན ཧི, ཏཱཏ དཱིགྷཱཝུ, ཝེརཱ སམྨནྟཱི’’ཏི དེཝེན མེ མཱཏཱཔིཏརོ ཧཏཱཏི། སཙཱཧཾ དེཝཾ ཛཱིཝིཏཱ ཝོརོཔེཡྻཾ, ཡེ དེཝསྶ ཨཏྠཀཱམཱ ཏེ མཾ ཛཱིཝིཏཱ ཝོརོཔེཡྻུཾ, ཡེ མེ ཨཏྠཀཱམཱ ཏེ ཏེ ཛཱིཝིཏཱ ཝོརོཔེཡྻུཾ – ཨེཝཾ ཏཾ ཝེརཾ ཝེརེན ན ཝཱུཔསམེཡྻ། ཨིདཱནི ཙ པན མེ དེཝེན ཛཱིཝིཏཾ དིནྣཾ, མཡཱ ཙ དེཝསྶ ཛཱིཝིཏཾ དིནྣཾ། ཨེཝཾ ཏཾ ཝེརཾ ཨཝེརེན ཝཱུཔསནྟཾ། ཨིམཾ ཁོ མེ, དེཝ, པིཏཱ མརཎཀཱལེ ཨཝཙ – ན ཧི, ཏཱཏ དཱིགྷཱཝུ, ཝེརེན ཝེརཱ སམྨནྟི; ཨཝེརེན ཧི , ཏཱཏ དཱིགྷཱཝུ, ཝེརཱ སམྨནྟཱི’’ཏི། ཨཐ ཁོ, བྷིཀྑཝེ, བྲཧྨདཏྟོ ཀཱསིརཱཛཱ – ‘‘ཨཙྪརིཡཾ ཝཏ བྷོ! ཨབྦྷུཏཾ ཝཏ བྷོ! ཡཱཝ པཎྜིཏོ ཨཡཾ དཱིགྷཱཝུ ཀུམཱརོ, ཡཏྲ ཧི ནཱམ པིཏུནོ སཾཁིཏྟེན བྷཱསིཏསྶ ཝིཏྠཱརེན ཨཏྠཾ ཨཱཛཱནིསྶཏཱི’’ཏི པེཏྟིཀཾ བལཉྩ ཝཱཧནཉྩ ཛནཔདཉྩ ཀོསཉྩ ཀོཊྛཱགཱརཉྩ པཊིཔཱདེསི, དྷཱིཏརཉྩ ཨདཱསི། ཏེསཉྷི ནཱམ, བྷིཀྑཝེ, རཱཛཱུནཾ ཨཱདིནྣདཎྜཱནཾ ཨཱདིནྣསཏྠཱནཾ ཨེཝརཱུཔཾ ཁནྟིསོརཙྩཾ བྷཝིསྶཏི། ཨིདྷ ཁོ པན ཏཾ, བྷིཀྑཝེ , སོབྷེཐ ཡཾ ཏུམྷེ ཨེཝཾ སྭཱཀྑཱཏེ དྷམྨཝིནཡེ པབྦཛིཏཱ སམཱནཱ ཁམཱ ཙ བྷཝེཡྻཱཐ སོརཏཱ ཙཱཏི? ཏཏིཡམྤི ཁོ བྷགཝཱ ཏེ བྷིཀྑཱུ ཨེཏདཝོཙ – ‘‘ཨལཾ, བྷིཀྑཝེ, མཱ བྷཎྜནཾ མཱ ཀལཧཾ མཱ ཝིགྒཧཾ མཱ ཝིཝཱད’’ནྟི། ཏཏིཡམྤི ཁོ སོ ཨདྷམྨཝཱདཱི བྷིཀྑུ བྷགཝནྟཾ ཨེཏདཝོཙ – ‘‘ཨཱགམེཏུ, བྷནྟེ, བྷགཝཱ དྷམྨསྶཱམཱི; ཨཔྤོསྶུཀྐོ, བྷནྟེ, བྷགཝཱ དིཊྛདྷམྨསུཁཝིཧཱརམནུཡུཏྟོ ཝིཧརཏུ། མཡམེཏེན བྷཎྜནེན ཀལཧེན ཝིགྒཧེན ཝིཝཱདེན པཉྙཱཡིསྶཱམཱ’’ཏི། ཨཐ ཁོ བྷགཝཱ – པརིཡཱདིནྣརཱུཔཱ ཁོ ཨིམེ མོགྷཔུརིསཱ, ནཡིམེ སུཀརཱ སཉྙཱཔེཏུནྟི – ཨུཊྛཱཡཱསནཱ པཀྐཱམི།
463. Atha kho, bhikkhave, brahmadatto kāsirājā dīghāvuṃ kumāraṃ etadavoca – ‘‘yaṃ kho te, tāta dīghāvu, pitā maraṇakāle avaca ‘mā kho tvaṃ, tāta dīghāvu, dīghaṃ passa, mā rassaṃ. Na hi, tāta dīghāvu, verena verā sammanti; averena hi, tāta dīghāvu, verā sammantī’ti, kiṃ te pitā sandhāya avacā’’ti? ‘‘Yaṃ kho me , deva, pitā maraṇakāle avaca ‘mā dīgha’nti mā ciraṃ veraṃ akāsīti. Imaṃ kho me, deva, pitā maraṇakāle avaca mā dīghanti. Yaṃ kho me, deva, pitā maraṇakāle avaca ‘mā rassa’nti mā khippaṃ mittehi bhijjitthā’’ti. Imaṃ kho me, deva, pitā maraṇakāle avaca mā rassanti. Yaṃ kho me, deva, pitā maraṇakāle avaca ‘‘na hi, tāta dīghāvu, verena verā sammanti, averena hi, tāta dīghāvu, verā sammantī’’ti devena me mātāpitaro hatāti. Sacāhaṃ devaṃ jīvitā voropeyyaṃ, ye devassa atthakāmā te maṃ jīvitā voropeyyuṃ, ye me atthakāmā te te jīvitā voropeyyuṃ – evaṃ taṃ veraṃ verena na vūpasameyya. Idāni ca pana me devena jīvitaṃ dinnaṃ, mayā ca devassa jīvitaṃ dinnaṃ. Evaṃ taṃ veraṃ averena vūpasantaṃ. Imaṃ kho me, deva, pitā maraṇakāle avaca – na hi, tāta dīghāvu, verena verā sammanti; averena hi , tāta dīghāvu, verā sammantī’’ti. Atha kho, bhikkhave, brahmadatto kāsirājā – ‘‘acchariyaṃ vata bho! Abbhutaṃ vata bho! Yāva paṇḍito ayaṃ dīghāvu kumāro, yatra hi nāma pituno saṃkhittena bhāsitassa vitthārena atthaṃ ājānissatī’’ti pettikaṃ balañca vāhanañca janapadañca kosañca koṭṭhāgārañca paṭipādesi, dhītarañca adāsi. Tesañhi nāma, bhikkhave, rājūnaṃ ādinnadaṇḍānaṃ ādinnasatthānaṃ evarūpaṃ khantisoraccaṃ bhavissati. Idha kho pana taṃ, bhikkhave , sobhetha yaṃ tumhe evaṃ svākkhāte dhammavinaye pabbajitā samānā khamā ca bhaveyyātha soratā cāti? Tatiyampi kho bhagavā te bhikkhū etadavoca – ‘‘alaṃ, bhikkhave, mā bhaṇḍanaṃ mā kalahaṃ mā viggahaṃ mā vivāda’’nti. Tatiyampi kho so adhammavādī bhikkhu bhagavantaṃ etadavoca – ‘‘āgametu, bhante, bhagavā dhammassāmī; appossukko, bhante, bhagavā diṭṭhadhammasukhavihāramanuyutto viharatu. Mayametena bhaṇḍanena kalahena viggahena vivādena paññāyissāmā’’ti. Atha kho bhagavā – pariyādinnarūpā kho ime moghapurisā, nayime sukarā saññāpetunti – uṭṭhāyāsanā pakkāmi.
དཱིགྷཱཝུབྷཱཎཝཱརོ ནིཊྛིཏོ པཋམོ།
Dīghāvubhāṇavāro niṭṭhito paṭhamo.
༤༦༤. 13 ཨཐ ཁོ བྷགཝཱ པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ ཀོསམྦིཾ པིཎྜཱཡ པཱཝིསི། ཀོསམྦིཡཾ པིཎྜཱཡ ཙརིཏྭཱ པཙྪཱབྷཏྟཾ པིཎྜཔཱཏཔཊིཀྐནྟོ སེནཱསནཾ སཾསཱམེཏྭཱ པཏྟཙཱིཝརམཱདཱཡ སངྒྷམཛ྄ཛྷེ ཋིཏཀོཝ ཨིམཱ གཱཐཱཡོ ཨབྷཱསི –
464.14 Atha kho bhagavā pubbaṇhasamayaṃ nivāsetvā pattacīvaramādāya kosambiṃ piṇḍāya pāvisi. Kosambiyaṃ piṇḍāya caritvā pacchābhattaṃ piṇḍapātapaṭikkanto senāsanaṃ saṃsāmetvā pattacīvaramādāya saṅghamajjhe ṭhitakova imā gāthāyo abhāsi –
སངྒྷསྨིཾ བྷིཛྫམཱནསྨིཾ, ནཱཉྙཾ བྷིཡྻོ ཨམཉྙརུཾ༎
Saṅghasmiṃ bhijjamānasmiṃ, nāññaṃ bhiyyo amaññaruṃ.
ཡཱཝིཙྪནྟི མུཁཱཡཱམཾ, ཡེན ནཱིཏཱ ན ཏཾ ཝིདཱུ༎
Yāvicchanti mukhāyāmaṃ, yena nītā na taṃ vidū.
ཡེ ཙ ཏཾ ཨུཔནཡ྄ཧནྟི, ཝེརཾ ཏེསཾ ན སམྨཏི༎
Ye ca taṃ upanayhanti, veraṃ tesaṃ na sammati.
ཡེ ཙ ཏཾ ནུཔནཡ྄ཧནྟི, ཝེརཾ ཏེསཱུཔསམྨཏི༎
Ye ca taṃ nupanayhanti, veraṃ tesūpasammati.
ཨཝེརེན ཙ སམྨནྟི, ཨེསདྷམྨོ སནནྟནོ༎
Averena ca sammanti, esadhammo sanantano.
ཡེ ཙ ཏཏྠ ཝིཛཱནནྟི, ཏཏོ སམྨནྟི མེདྷགཱ༎
Ye ca tattha vijānanti, tato sammanti medhagā.
རཊྛཾ ཝིལུམྤམཱནཱནཾ, ཏེསམྤི ཧོཏི སངྒཏི༎
Raṭṭhaṃ vilumpamānānaṃ, tesampi hoti saṅgati.
‘‘ཀསྨཱ ཏུམྷཱཀ ནོ སིཡཱ།
‘‘Kasmā tumhāka no siyā;
སདྡྷིཾཙརཾ སཱདྷུཝིཧཱརི དྷཱིརཾ།
Saddhiṃcaraṃ sādhuvihāri dhīraṃ;
ཨབྷིབྷུཡྻ སབྦཱནི པརིསྶཡཱནི།
Abhibhuyya sabbāni parissayāni;
ཙརེཡྻ ཏེནཏྟམནོ སཏཱིམཱ༎
Careyya tenattamano satīmā.
སདྡྷིཾ ཙརཾ སཱདྷུཝིཧཱརི དྷཱིརཾ།
Saddhiṃ caraṃ sādhuvihāri dhīraṃ;
རཱཛཱཝ རཊྛཾ ཝིཛིཏཾ པཧཱཡ།
Rājāva raṭṭhaṃ vijitaṃ pahāya;
ཨེཀོ ཙརེ མཱཏངྒརཉྙེཝ ནཱགོ༎
Eko care mātaṅgaraññeva nāgo.
ནཏྠི བཱལེ སཧཱཡཏཱ།
Natthi bāle sahāyatā;
ཨེཀོ ཙརེ ན ཙ པཱཔཱནི ཀཡིརཱ།
Eko care na ca pāpāni kayirā;
ཨཔྤོསྶུཀྐོ མཱཏངྒརཉྙེཝ ནཱགོ’’ཏི༎
Appossukko mātaṅgaraññeva nāgo’’ti.
དཱིགྷཱཝུཝཏྠུ ནིཊྛིཏཾ།
Dīghāvuvatthu niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / ཀོསམྦཀཝིཝཱདཀཐཱ • Kosambakavivādakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / དཱིགྷཱཝུཝཏྠུཀཐཱཝཎྞནཱ • Dīghāvuvatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / དཱིགྷཱཝུཝཏྠུཀཐཱཝཎྞནཱ • Dīghāvuvatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཀོསམྦཀཝིཝཱདཀཐཱཝཎྞནཱ • Kosambakavivādakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༢༧༡. ཀོསམྦཀཝིཝཱདཀཐཱ • 271. Kosambakavivādakathā
