| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
১৪৮. দিগুণাদিউপাহনপটিক্খেপো
148. Diguṇādiupāhanapaṭikkhepo
২৪৫. অথ খো ভগৰা ভিক্খূ আমন্তেসি – ‘‘এৰং খো, ভিক্খৰে, কুলপুত্তা অঞ্ঞং ব্যাকরোন্তি, অত্থো চ ৰুত্তো, অত্তা চ অনুপনীতো। অথ চ, পনিধেকচ্চে মোঘপুরিসা হসমানকং, মঞ্ঞে, অঞ্ঞং ব্যাকরোন্তি, তে পচ্ছা ৰিঘাতং আপজ্জন্তী’’তি। অথ খো ভগৰা আযস্মন্তং সোণং আমন্তেসি – ‘‘ত্ৰং খোসি, সোণ, সুখুমালো। অনুজানামি তে, সোণ, একপলাসিকং উপাহন’’ন্তি। ‘‘অহং খো, ভন্তে, অসীতিসকটৰাহে হিরঞ্ঞং ওহায অগারস্মা অনগারিযং পব্বজিতো, সত্তহত্থিকঞ্চ অনীকং। অথাহং ভন্তে একপলাসিকং চে উপাহনং পরিহরিস্সামি, তস্স মে ভৰিস্সন্তি ৰত্তারো ‘সোণো কোল়িৰিসো অসীতিসকটৰাহে হিরঞ্ঞং ওহায অগারস্মা অনগারিযং পব্বজিতো, সত্তহত্থিকঞ্চ অনীকং। সো দানাযং একপলাসিকাসু উপাহনাসু সত্তো’তি। সচে ভগৰা ভিক্খুসঙ্ঘস্স অনুজানিস্সতি অহম্পি পরিভুঞ্জিস্সামি; নো চে ভগৰা ভিক্খুসঙ্ঘস্স অনুজানিস্সতি, অহম্পি ন পরিভুঞ্জিস্সামী’’তি। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, একপলাসিকং উপাহনং। ন, ভিক্খৰে, দিগুণা উপাহনা ধারেতব্বা। ন তিগুণা উপাহনা ধারেতব্বা। ন গুণঙ্গুণূপাহনা 1 ধারেতব্বা। যো ধারেয্য, আপত্তি দুক্কটস্সা’’তি।
245. Atha kho bhagavā bhikkhū āmantesi – ‘‘evaṃ kho, bhikkhave, kulaputtā aññaṃ byākaronti, attho ca vutto, attā ca anupanīto. Atha ca, panidhekacce moghapurisā hasamānakaṃ, maññe, aññaṃ byākaronti, te pacchā vighātaṃ āpajjantī’’ti. Atha kho bhagavā āyasmantaṃ soṇaṃ āmantesi – ‘‘tvaṃ khosi, soṇa, sukhumālo. Anujānāmi te, soṇa, ekapalāsikaṃ upāhana’’nti. ‘‘Ahaṃ kho, bhante, asītisakaṭavāhe hiraññaṃ ohāya agārasmā anagāriyaṃ pabbajito, sattahatthikañca anīkaṃ. Athāhaṃ bhante ekapalāsikaṃ ce upāhanaṃ pariharissāmi, tassa me bhavissanti vattāro ‘soṇo koḷiviso asītisakaṭavāhe hiraññaṃ ohāya agārasmā anagāriyaṃ pabbajito, sattahatthikañca anīkaṃ. So dānāyaṃ ekapalāsikāsu upāhanāsu satto’ti. Sace bhagavā bhikkhusaṅghassa anujānissati ahampi paribhuñjissāmi; no ce bhagavā bhikkhusaṅghassa anujānissati, ahampi na paribhuñjissāmī’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, ekapalāsikaṃ upāhanaṃ. Na, bhikkhave, diguṇā upāhanā dhāretabbā. Na tiguṇā upāhanā dhāretabbā. Na guṇaṅguṇūpāhanā 2 dhāretabbā. Yo dhāreyya, āpatti dukkaṭassā’’ti.
দিগুণাদিউপাহনপটিক্খেপো নিট্ঠিতো।
Diguṇādiupāhanapaṭikkhepo niṭṭhito.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / দিগুণাদিউপাহনপটিক্খেপকথা • Diguṇādiupāhanapaṭikkhepakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / দিগুণাদিউপাহনপটিক্খেপকথাৰণ্ণনা • Diguṇādiupāhanapaṭikkhepakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১৪৮. দিগুণাদিউপাহনপটিক্খেপকথা • 148. Diguṇādiupāhanapaṭikkhepakathā
