| Library / Tipiṭaka / ติปิฎก • Tipiṭaka / พุทฺธวํสปาฬิ • Buddhavaṃsapāḷi |
๓. ทีปงฺกรพุทฺธวํโส
3. Dīpaṅkarabuddhavaṃso
๑.
1.
ตทา เต โภชยิตฺวาน, สสงฺฆํ โลกนายกํ;
Tadā te bhojayitvāna, sasaṅghaṃ lokanāyakaṃ;
อุปคจฺฉุํ สรณํ ตสฺส, ทีปงฺกรสฺส สตฺถุโนฯ
Upagacchuṃ saraṇaṃ tassa, dīpaṅkarassa satthuno.
๒.
2.
สรณาคมเน กญฺจิ, นิเวเสสิ ตถาคโต;
Saraṇāgamane kañci, nivesesi tathāgato;
กญฺจิ ปญฺจสุ สีเลสุ, สีเล ทสวิเธ ปรํฯ
Kañci pañcasu sīlesu, sīle dasavidhe paraṃ.
๓.
3.
กสฺสจิ เทติ สามญฺญํ, จตุโร ผลมุตฺตเม;
Kassaci deti sāmaññaṃ, caturo phalamuttame;
กสฺสจิ อสเม ธเมฺม, เทติ โส ปฎิสมฺภิทาฯ
Kassaci asame dhamme, deti so paṭisambhidā.
๔.
4.
กสฺสจิ วรสมาปตฺติโย, อฎฺฐ เทติ นราสโภ;
Kassaci varasamāpattiyo, aṭṭha deti narāsabho;
ติโสฺส กสฺสจิ วิชฺชาโย, ฉฬภิญฺญา ปเวจฺฉติฯ
Tisso kassaci vijjāyo, chaḷabhiññā pavecchati.
๕.
5.
เตน โยเคน ชนกายํ, โอวทติ มหามุนิ;
Tena yogena janakāyaṃ, ovadati mahāmuni;
เตน วิตฺถาริกํ อาสิ, โลกนาถสฺส สาสนํฯ
Tena vitthārikaṃ āsi, lokanāthassa sāsanaṃ.
๖.
6.
มหาหนุสภกฺขโนฺธ , ทีปงฺกรสฺส นามโก;
Mahāhanusabhakkhandho , dīpaṅkarassa nāmako;
พหู ชเน ตารยติ, ปริโมเจติ ทุคฺคติํฯ
Bahū jane tārayati, parimoceti duggatiṃ.
๗.
7.
โพธเนยฺยํ ชนํ ทิสฺวา, สตสหเสฺสปิ โยชเน;
Bodhaneyyaṃ janaṃ disvā, satasahassepi yojane;
ขเณน อุปคนฺตฺวาน, โพเธติ ตํ มหามุนิฯ
Khaṇena upagantvāna, bodheti taṃ mahāmuni.
๘.
8.
ปฐมาภิสมเย พุโทฺธ, โกฎิสตมโพธยิ;
Paṭhamābhisamaye buddho, koṭisatamabodhayi;
ทุติยาภิสมเย นาโถ, นวุติโกฎิมโพธยิฯ
Dutiyābhisamaye nātho, navutikoṭimabodhayi.
๙.
9.
ยทา จ เทวภวนมฺหิ, พุโทฺธ ธมฺมมเทสยิ;
Yadā ca devabhavanamhi, buddho dhammamadesayi;
นวุติโกฎิสหสฺสานํ, ตติยาภิสมโย อหุฯ
Navutikoṭisahassānaṃ, tatiyābhisamayo ahu.
๑๐.
10.
สนฺนิปาตา ตโย อาสุํ, ทีปงฺกรสฺส สตฺถุโน;
Sannipātā tayo āsuṃ, dīpaṅkarassa satthuno;
โกฎิสตสหสฺสานํ, ปฐโม อาสิ สมาคโมฯ
Koṭisatasahassānaṃ, paṭhamo āsi samāgamo.
๑๑.
11.
ปุน นารทกูฎมฺหิ, ปวิเวกคเต ชิเน;
Puna nāradakūṭamhi, pavivekagate jine;
ขีณาสวา วีตมลา, สมิํสุ สตโกฎิโยฯ
Khīṇāsavā vītamalā, samiṃsu satakoṭiyo.
๑๒.
12.
ยมฺหิ กาเล มหาวีโร, สุทสฺสนสิลุจฺจเย;
Yamhi kāle mahāvīro, sudassanasiluccaye;
นวโกฎิสหเสฺสหิ, ปวาเรสิ มหามุนิฯ
Navakoṭisahassehi, pavāresi mahāmuni.
๑๓.
13.
ทสวีสสหสฺสานํ, ธมฺมาภิสมโย อหุ;
Dasavīsasahassānaṃ, dhammābhisamayo ahu;
เอกทฺวินฺนํ อภิสมยา, คณนาโต อสงฺขิยาฯ
Ekadvinnaṃ abhisamayā, gaṇanāto asaṅkhiyā.
๑๔.
14.
วิตฺถาริกํ พาหุชญฺญํ, อิทฺธํ ผีตํ อหู ตทา;
Vitthārikaṃ bāhujaññaṃ, iddhaṃ phītaṃ ahū tadā;
ทีปงฺกรสฺส ภควโต, สาสนํ สุวิโสธิตํฯ
Dīpaṅkarassa bhagavato, sāsanaṃ suvisodhitaṃ.
๑๕.
15.
จตฺตาริ สตสหสฺสานิ, ฉฬภิญฺญา มหิทฺธิกา;
Cattāri satasahassāni, chaḷabhiññā mahiddhikā;
ทีปงฺกรํ โลกวิทุํ, ปริวาเรนฺติ สพฺพทาฯ
Dīpaṅkaraṃ lokaviduṃ, parivārenti sabbadā.
๑๖.
16.
เย เกจิ เตน สมเยน, ชหนฺติ มานุสํ ภวํ;
Ye keci tena samayena, jahanti mānusaṃ bhavaṃ;
อปตฺตมานสา เสขา, ครหิตา ภวนฺติ เตฯ
Apattamānasā sekhā, garahitā bhavanti te.
๑๗.
17.
สุปุปฺผิตํ ปาวจนํ, อรหเนฺตหิ ตาทิหิ;
Supupphitaṃ pāvacanaṃ, arahantehi tādihi;
ขีณาสเวหิ วิมเลหิ, อุปโสภติ สพฺพทาฯ
Khīṇāsavehi vimalehi, upasobhati sabbadā.
๑๘.
18.
นครํ รมฺมวตี นาม, สุเทโว นาม ขตฺติโย;
Nagaraṃ rammavatī nāma, sudevo nāma khattiyo;
สุเมธา นาม ชนิกา, ทีปงฺกรสฺส สตฺถุโนฯ
Sumedhā nāma janikā, dīpaṅkarassa satthuno.
๑๙.
19.
หํสา โกญฺจา มยูรา จ, ตโย ปาสาทมุตฺตมาฯ
Haṃsā koñcā mayūrā ca, tayo pāsādamuttamā.
๒๐.
20.
ตีณิสตสหสฺสานิ, นาริโย สมลงฺกตา;
Tīṇisatasahassāni, nāriyo samalaṅkatā;
ปทุมา นาม สา นารี, อุสภกฺขโนฺธ อตฺรโชฯ
Padumā nāma sā nārī, usabhakkhandho atrajo.
๒๑.
21.
นิมิเตฺต จตุโร ทิสฺวา, หตฺถิยาเนน นิกฺขมิ;
Nimitte caturo disvā, hatthiyānena nikkhami;
อนูนทสมาสานิ, ปธาเน ปทหี ชิโนฯ
Anūnadasamāsāni, padhāne padahī jino.
๒๒.
22.
ปธานจารํ จริตฺวาน, อพุชฺฌิ มานสํ มุนิ;
Padhānacāraṃ caritvāna, abujjhi mānasaṃ muni;
พฺรหฺมุนา ยาจิโต สโนฺต, ทีปงฺกโร มหามุนิฯ
Brahmunā yācito santo, dīpaṅkaro mahāmuni.
๒๓.
23.
นิสิโนฺน สิรีสมูลมฺหิ, อกา ติตฺถิยมทฺทนํฯ
Nisinno sirīsamūlamhi, akā titthiyamaddanaṃ.
๒๔.
24.
สุมงฺคโล จ ติโสฺส จ, อเหสุํ อคฺคสาวกา;
Sumaṅgalo ca tisso ca, ahesuṃ aggasāvakā;
๒๕.
25.
นนฺทา เจว สุนนฺทา จ, อเหสุํ อคฺคสาวิกา;
Nandā ceva sunandā ca, ahesuṃ aggasāvikā;
โพธิ ตสฺส ภควโต, ปิปฺผลีติ ปวุจฺจติฯ
Bodhi tassa bhagavato, pipphalīti pavuccati.
๒๖.
26.
สิริมา โกณา อุปฎฺฐิกา, ทีปงฺกรสฺส สตฺถุโนฯ
Sirimā koṇā upaṭṭhikā, dīpaṅkarassa satthuno.
๒๗.
27.
อสีติหตฺถมุเพฺพโธ, ทีปงฺกโร มหามุนิ;
Asītihatthamubbedho, dīpaṅkaro mahāmuni;
โสภติ ทีปรุโกฺขว, สาลราชาว ผุลฺลิโตฯ
Sobhati dīparukkhova, sālarājāva phullito.
๒๘.
28.
สตสหสฺสวสฺสานิ, อายุ ตสฺส มเหสิโน;
Satasahassavassāni, āyu tassa mahesino;
ตาวตา ติฎฺฐมาโน โส, ตาเรสิ ชนตํ พหุํฯ
Tāvatā tiṭṭhamāno so, tāresi janataṃ bahuṃ.
๒๙.
29.
โชตยิตฺวาน สทฺธมฺมํ, สนฺตาเรตฺวา มหาชนํ;
Jotayitvāna saddhammaṃ, santāretvā mahājanaṃ;
ชลิตฺวา อคฺคิกฺขโนฺธว, นิพฺพุโต โส สสาวโกฯ
Jalitvā aggikkhandhova, nibbuto so sasāvako.
๓๐.
30.
สา จ อิทฺธิ โส จ ยโส, ตานิ จ ปาเทสุ จกฺกรตนานิ;
Sā ca iddhi so ca yaso, tāni ca pādesu cakkaratanāni;
๓๑.
31.
ทีปงฺกโร ชิโน สตฺถา, นนฺทารามมฺหิ นิพฺพุโต;
Dīpaṅkaro jino satthā, nandārāmamhi nibbuto;
ตเตฺถวสฺส ชินถูโป, ฉตฺติํสุเพฺพธโยชโนติฯ
Tatthevassa jinathūpo, chattiṃsubbedhayojanoti.
ทีปงฺกรสฺส ภควโต วํโส ปฐโมฯ
Dīpaṅkarassa bhagavato vaṃso paṭhamo.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / พุทฺธวํส-อฎฺฐกถา • Buddhavaṃsa-aṭṭhakathā / ๓. ทีปงฺกรพุทฺธวํสวณฺณนา • 3. Dīpaṅkarabuddhavaṃsavaṇṇanā
