| Library / Tipiṭaka / តិបិដក • Tipiṭaka / ពុទ្ធវំសបាឡិ • Buddhavaṃsapāḷi |
៣. ទីបង្ករពុទ្ធវំសោ
3. Dīpaṅkarabuddhavaṃso
១.
1.
តទា តេ ភោជយិត្វាន, សសង្ឃំ លោកនាយកំ;
Tadā te bhojayitvāna, sasaṅghaṃ lokanāyakaṃ;
ឧបគច្ឆុំ សរណំ តស្ស, ទីបង្ករស្ស សត្ថុនោ។
Upagacchuṃ saraṇaṃ tassa, dīpaṅkarassa satthuno.
២.
2.
សរណាគមនេ កញ្ចិ, និវេសេសិ តថាគតោ;
Saraṇāgamane kañci, nivesesi tathāgato;
កញ្ចិ បញ្ចសុ សីលេសុ, សីលេ ទសវិធេ បរំ។
Kañci pañcasu sīlesu, sīle dasavidhe paraṃ.
៣.
3.
កស្សចិ ទេតិ សាមញ្ញំ, ចតុរោ ផលមុត្តមេ;
Kassaci deti sāmaññaṃ, caturo phalamuttame;
កស្សចិ អសមេ ធម្មេ, ទេតិ សោ បដិសម្ភិទា។
Kassaci asame dhamme, deti so paṭisambhidā.
៤.
4.
កស្សចិ វរសមាបត្តិយោ, អដ្ឋ ទេតិ នរាសភោ;
Kassaci varasamāpattiyo, aṭṭha deti narāsabho;
តិស្សោ កស្សចិ វិជ្ជាយោ, ឆឡភិញ្ញា បវេច្ឆតិ។
Tisso kassaci vijjāyo, chaḷabhiññā pavecchati.
៥.
5.
តេន យោគេន ជនកាយំ, ឱវទតិ មហាមុនិ;
Tena yogena janakāyaṃ, ovadati mahāmuni;
តេន វិត្ថារិកំ អាសិ, លោកនាថស្ស សាសនំ។
Tena vitthārikaṃ āsi, lokanāthassa sāsanaṃ.
៦.
6.
មហាហនុសភក្ខន្ធោ , ទីបង្ករស្ស នាមកោ;
Mahāhanusabhakkhandho , dīpaṅkarassa nāmako;
ពហូ ជនេ តារយតិ, បរិមោចេតិ ទុគ្គតិំ។
Bahū jane tārayati, parimoceti duggatiṃ.
៧.
7.
ពោធនេយ្យំ ជនំ ទិស្វា, សតសហស្សេបិ យោជនេ;
Bodhaneyyaṃ janaṃ disvā, satasahassepi yojane;
ខណេន ឧបគន្ត្វាន, ពោធេតិ តំ មហាមុនិ។
Khaṇena upagantvāna, bodheti taṃ mahāmuni.
៨.
8.
បឋមាភិសមយេ ពុទ្ធោ, កោដិសតមពោធយិ;
Paṭhamābhisamaye buddho, koṭisatamabodhayi;
ទុតិយាភិសមយេ នាថោ, នវុតិកោដិមពោធយិ។
Dutiyābhisamaye nātho, navutikoṭimabodhayi.
៩.
9.
យទា ច ទេវភវនម្ហិ, ពុទ្ធោ ធម្មមទេសយិ;
Yadā ca devabhavanamhi, buddho dhammamadesayi;
នវុតិកោដិសហស្សានំ, តតិយាភិសមយោ អហុ។
Navutikoṭisahassānaṃ, tatiyābhisamayo ahu.
១០.
10.
សន្និបាតា តយោ អាសុំ, ទីបង្ករស្ស សត្ថុនោ;
Sannipātā tayo āsuṃ, dīpaṅkarassa satthuno;
កោដិសតសហស្សានំ, បឋមោ អាសិ សមាគមោ។
Koṭisatasahassānaṃ, paṭhamo āsi samāgamo.
១១.
11.
បុន នារទកូដម្ហិ, បវិវេកគតេ ជិនេ;
Puna nāradakūṭamhi, pavivekagate jine;
ខីណាសវា វីតមលា, សមិំសុ សតកោដិយោ។
Khīṇāsavā vītamalā, samiṃsu satakoṭiyo.
១២.
12.
យម្ហិ កាលេ មហាវីរោ, សុទស្សនសិលុច្ចយេ;
Yamhi kāle mahāvīro, sudassanasiluccaye;
នវកោដិសហស្សេហិ, បវារេសិ មហាមុនិ។
Navakoṭisahassehi, pavāresi mahāmuni.
១៣.
13.
ទសវីសសហស្សានំ, ធម្មាភិសមយោ អហុ;
Dasavīsasahassānaṃ, dhammābhisamayo ahu;
ឯកទ្វិន្នំ អភិសមយា, គណនាតោ អសង្ខិយា។
Ekadvinnaṃ abhisamayā, gaṇanāto asaṅkhiyā.
១៤.
14.
វិត្ថារិកំ ពាហុជញ្ញំ, ឥទ្ធំ ផីតំ អហូ តទា;
Vitthārikaṃ bāhujaññaṃ, iddhaṃ phītaṃ ahū tadā;
ទីបង្ករស្ស ភគវតោ, សាសនំ សុវិសោធិតំ។
Dīpaṅkarassa bhagavato, sāsanaṃ suvisodhitaṃ.
១៥.
15.
ចត្តារិ សតសហស្សានិ, ឆឡភិញ្ញា មហិទ្ធិកា;
Cattāri satasahassāni, chaḷabhiññā mahiddhikā;
ទីបង្ករំ លោកវិទុំ, បរិវារេន្តិ សព្ពទា។
Dīpaṅkaraṃ lokaviduṃ, parivārenti sabbadā.
១៦.
16.
យេ កេចិ តេន សមយេន, ជហន្តិ មានុសំ ភវំ;
Ye keci tena samayena, jahanti mānusaṃ bhavaṃ;
អបត្តមានសា សេខា, គរហិតា ភវន្តិ តេ។
Apattamānasā sekhā, garahitā bhavanti te.
១៧.
17.
សុបុប្ផិតំ បាវចនំ, អរហន្តេហិ តាទិហិ;
Supupphitaṃ pāvacanaṃ, arahantehi tādihi;
ខីណាសវេហិ វិមលេហិ, ឧបសោភតិ សព្ពទា។
Khīṇāsavehi vimalehi, upasobhati sabbadā.
១៨.
18.
នគរំ រម្មវតី នាម, សុទេវោ នាម ខត្តិយោ;
Nagaraṃ rammavatī nāma, sudevo nāma khattiyo;
សុមេធា នាម ជនិកា, ទីបង្ករស្ស សត្ថុនោ។
Sumedhā nāma janikā, dīpaṅkarassa satthuno.
១៩.
19.
ហំសា កោញ្ចា មយូរា ច, តយោ បាសាទមុត្តមា។
Haṃsā koñcā mayūrā ca, tayo pāsādamuttamā.
២០.
20.
តីណិសតសហស្សានិ, នារិយោ សមលង្កតា;
Tīṇisatasahassāni, nāriyo samalaṅkatā;
បទុមា នាម សា នារី, ឧសភក្ខន្ធោ អត្រជោ។
Padumā nāma sā nārī, usabhakkhandho atrajo.
២១.
21.
និមិត្តេ ចតុរោ ទិស្វា, ហត្ថិយានេន និក្ខមិ;
Nimitte caturo disvā, hatthiyānena nikkhami;
អនូនទសមាសានិ, បធានេ បទហី ជិនោ។
Anūnadasamāsāni, padhāne padahī jino.
២២.
22.
បធានចារំ ចរិត្វាន, អពុជ្ឈិ មានសំ មុនិ;
Padhānacāraṃ caritvāna, abujjhi mānasaṃ muni;
ព្រហ្មុនា យាចិតោ សន្តោ, ទីបង្ករោ មហាមុនិ។
Brahmunā yācito santo, dīpaṅkaro mahāmuni.
២៣.
23.
និសិន្នោ សិរីសមូលម្ហិ, អកា តិត្ថិយមទ្ទនំ។
Nisinno sirīsamūlamhi, akā titthiyamaddanaṃ.
២៤.
24.
សុមង្គលោ ច តិស្សោ ច, អហេសុំ អគ្គសាវកា;
Sumaṅgalo ca tisso ca, ahesuṃ aggasāvakā;
២៥.
25.
នន្ទា ចេវ សុនន្ទា ច, អហេសុំ អគ្គសាវិកា;
Nandā ceva sunandā ca, ahesuṃ aggasāvikā;
ពោធិ តស្ស ភគវតោ, បិប្ផលីតិ បវុច្ចតិ។
Bodhi tassa bhagavato, pipphalīti pavuccati.
២៦.
26.
សិរិមា កោណា ឧបដ្ឋិកា, ទីបង្ករស្ស សត្ថុនោ។
Sirimā koṇā upaṭṭhikā, dīpaṅkarassa satthuno.
២៧.
27.
អសីតិហត្ថមុព្ពេធោ, ទីបង្ករោ មហាមុនិ;
Asītihatthamubbedho, dīpaṅkaro mahāmuni;
សោភតិ ទីបរុក្ខោវ, សាលរាជាវ ផុល្លិតោ។
Sobhati dīparukkhova, sālarājāva phullito.
២៨.
28.
សតសហស្សវស្សានិ, អាយុ តស្ស មហេសិនោ;
Satasahassavassāni, āyu tassa mahesino;
តាវតា តិដ្ឋមានោ សោ, តារេសិ ជនតំ ពហុំ។
Tāvatā tiṭṭhamāno so, tāresi janataṃ bahuṃ.
២៩.
29.
ជោតយិត្វាន សទ្ធម្មំ, សន្តារេត្វា មហាជនំ;
Jotayitvāna saddhammaṃ, santāretvā mahājanaṃ;
ជលិត្វា អគ្គិក្ខន្ធោវ, និព្ពុតោ សោ សសាវកោ។
Jalitvā aggikkhandhova, nibbuto so sasāvako.
៣០.
30.
សា ច ឥទ្ធិ សោ ច យសោ, តានិ ច បាទេសុ ចក្ករតនានិ;
Sā ca iddhi so ca yaso, tāni ca pādesu cakkaratanāni;
៣១.
31.
ទីបង្ករោ ជិនោ សត្ថា, នន្ទារាមម្ហិ និព្ពុតោ;
Dīpaṅkaro jino satthā, nandārāmamhi nibbuto;
តត្ថេវស្ស ជិនថូបោ, ឆត្តិំសុព្ពេធយោជនោតិ។
Tatthevassa jinathūpo, chattiṃsubbedhayojanoti.
ទីបង្ករស្ស ភគវតោ វំសោ បឋមោ។
Dīpaṅkarassa bhagavato vaṃso paṭhamo.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ពុទ្ធវំស-អដ្ឋកថា • Buddhavaṃsa-aṭṭhakathā / ៣. ទីបង្ករពុទ្ធវំសវណ្ណនា • 3. Dīpaṅkarabuddhavaṃsavaṇṇanā
