| Library / Tipiṭaka / д̇ибидага • Tipiṭaka / вимаанавад̇т̇у-адтагат̇аа • Vimānavatthu-aṭṭhakathā |
9. д̣̇ийбавимаанаван̣н̣анаа
9. Dīpavimānavaṇṇanā
абхигганд̇зна ван̣н̣знаад̇и д̣̇ийбавимаанам̣. д̇асса гаа уббад̇д̇и? бхаг̇авад̇и саавад̇т̇ияам̣ вихаранд̇з убосат̇ад̣̇ивасз самб̣ахулаа убаасагаа убосат̇игаа худ̇ваа бурзбхад̇д̇ам̣ яат̇аавибхавам̣ д̣̇аанам̣ д̣̇ад̇ваа гаалассзва бхун̃ж̇ид̇ваа суд̣̇д̇хавад̇т̇анивад̇т̇аа суд̣̇д̇худ̇д̇араасан̇г̇аа г̇анд̇хамаалаад̣̇ихад̇т̇аа бажчаабхад̇д̇ам̣ вихаарам̣ г̇анд̇ваа манобхааванийяз бхигкуу баяирубаасид̇ваа сааяанхз д̇хаммам̣ сун̣анд̇и. вихаарзязва васид̇угаамаанам̣ д̇зсам̣ д̇хаммам̣ сун̣анд̇аанам̣язва суурияо ад̇т̇ан̇г̇ад̇о, анд̇хагааро ж̇аад̇о. д̇ад̇т̇згаа ан̃н̃ад̇араа ид̇т̇ий ‘‘ид̣̇аани д̣̇ийбаалогам̣ гаад̇ум̣ яуд̇д̇а’’нд̇и жинд̇зд̇ваа ад̇д̇ано г̇зхад̇о бад̣̇ийбзяяам̣ аахараабзд̇ваа бад̣̇ийбам̣ уж̇ж̇аалзд̇ваа д̇хаммаасанасса бурад̇о табзд̇ваа д̇хаммам̣ сун̣и. саа д̇зна бад̣̇ийбад̣̇аанзна ад̇д̇аманаа бийд̇исоманассаж̇аад̇аа худ̇ваа ванд̣̇ид̇ваа ад̇д̇ано г̇зхам̣ г̇ад̇аа. саа абарабхааг̇з гаалам̣ гад̇ваа д̇аавад̇им̣сабхаванз ж̇од̇ирасавимаанз ниб̣б̣ад̇д̇и. сарийрасобхаа банассаа ад̇ивияа бабхассараа ан̃н̃з д̣̇звз абхибхавид̇ваа д̣̇аса д̣̇исаа обхаасаяамаанаа д̇идтад̇и. ат̇згад̣̇ивасам̣ ааяасмаа махаамог̇г̇аллаано д̣̇зважааригам̣ жаранд̇од̇и саб̣б̣ам̣ хздтаа ааг̇ад̇анаязнзва взд̣̇ид̇аб̣б̣ам̣. ид̇ха бана –
Abhikkantenavaṇṇenāti dīpavimānaṃ. Tassa kā uppatti? Bhagavati sāvatthiyaṃ viharante uposathadivase sambahulā upāsakā uposathikā hutvā purebhattaṃ yathāvibhavaṃ dānaṃ datvā kālasseva bhuñjitvā suddhavatthanivatthā suddhuttarāsaṅgā gandhamālādihatthā pacchābhattaṃ vihāraṃ gantvā manobhāvanīye bhikkhū payirupāsitvā sāyanhe dhammaṃ suṇanti. Vihāreyeva vasitukāmānaṃ tesaṃ dhammaṃ suṇantānaṃyeva sūriyo atthaṅgato, andhakāro jāto. Tatthekā aññatarā itthī ‘‘idāni dīpālokaṃ kātuṃ yutta’’nti cintetvā attano gehato padīpeyyaṃ āharāpetvā padīpaṃ ujjāletvā dhammāsanassa purato ṭhapetvā dhammaṃ suṇi. Sā tena padīpadānena attamanā pītisomanassajātā hutvā vanditvā attano gehaṃ gatā. Sā aparabhāge kālaṃ katvā tāvatiṃsabhavane jotirasavimāne nibbatti. Sarīrasobhā panassā ativiya pabhassarā aññe deve abhibhavitvā dasa disā obhāsayamānā tiṭṭhati. Athekadivasaṃ āyasmā mahāmoggallāno devacārikaṃ carantoti sabbaṃ heṭṭhā āgatanayeneva veditabbaṃ. Idha pana –
75.
75.
‘‘абхигганд̇зна ван̣н̣зна, яаа д̇вам̣ д̇идтаси д̣̇звад̇з;
‘‘Abhikkantena vaṇṇena, yā tvaṃ tiṭṭhasi devate;
обхаасзнд̇ий д̣̇исаа саб̣б̣аа, осад̇хий вияа д̇аарагаа.
Obhāsentī disā sabbā, osadhī viya tārakā.
76.
76.
‘‘гзна д̇зд̇аад̣̇исо ван̣н̣о, гзна д̇з ид̇ха миж̇жхад̇и;
‘‘Kena tetādiso vaṇṇo, kena te idha mijjhati;
уббаж̇ж̇анд̇и жа д̇з бхог̇аа, яз гзжи манасо бияаа.
Uppajjanti ca te bhogā, ye keci manaso piyā.
77.
77.
‘‘гзна д̇вам̣ вималобхаасаа, ад̇ирожаси д̣̇звад̇аа;
‘‘Kena tvaṃ vimalobhāsā, atirocasi devatā;
гзна д̇з саб̣б̣аг̇ад̇д̇зхи, саб̣б̣аа обхаасад̇з д̣̇исаа.
Kena te sabbagattehi, sabbā obhāsate disā.
78.
78.
‘‘бужчаами д̇ам̣ д̣̇зви махаанубхаавз, мануссабхууд̇аа гимагааси бун̃н̃ам̣;
‘‘Pucchāmi taṃ devi mahānubhāve, manussabhūtā kimakāsi puññaṃ;
гзнааси звам̣ ж̇алид̇аанубхааваа, ван̣н̣о жа д̇з саб̣б̣ад̣̇исаа бабхаасад̇ий’’д̇и. –
Kenāsi evaṃ jalitānubhāvā, vaṇṇo ca te sabbadisā pabhāsatī’’ti. –
жад̇уухи г̇аат̇аахи бужчи.
Catūhi gāthāhi pucchi.
79.
79.
‘‘саа д̣̇звад̇аа ад̇д̇аманаа, мог̇г̇аллаанзна бужчид̇аа;
‘‘Sā devatā attamanā, moggallānena pucchitā;
бан̃хам̣ будтаа вияаагааси, яасса гаммассид̣̇ам̣ палам̣’’.
Pañhaṃ puṭṭhā viyākāsi, yassa kammassidaṃ phalaṃ’’.
80.
80.
‘‘ахам̣ мануссзсу мануссабхууд̇аа, буримааяа ж̇аад̇ияаа мануссалогз;
‘‘Ahaṃ manussesu manussabhūtā, purimāya jātiyā manussaloke;
д̇аманд̇хагаарамхи д̇имийсигааяам̣, бад̣̇ийбагааламхи ад̣̇ааси д̣̇ийбам̣.
Tamandhakāramhi timīsikāyaṃ, padīpakālamhi adāsi dīpaṃ.
81.
81.
‘‘яо анд̇хагаарамхи д̇имийсигааяам̣, бад̣̇ийбагааламхи д̣̇ад̣̇аад̇и д̣̇ийбам̣;
‘‘Yo andhakāramhi timīsikāyaṃ, padīpakālamhi dadāti dīpaṃ;
уббаж̇ж̇ад̇и ж̇од̇ирасам̣ вимаанам̣, бахууд̇амаляам̣ б̣ахубун̣д̣арийгам̣.
Uppajjati jotirasaṃ vimānaṃ, pahūtamalyaṃ bahupuṇḍarīkaṃ.
82.
82.
‘‘д̇зна мзд̇аад̣̇исо ван̣н̣о, д̇зна мз ид̇ха миж̇жхад̇и;
‘‘Tena metādiso vaṇṇo, tena me idha mijjhati;
уббаж̇ж̇анд̇и жа мз бхог̇аа, яз гзжи манасо бияаа.
Uppajjanti ca me bhogā, ye keci manaso piyā.
83.
83.
‘‘д̇знаахам̣ вималобхаасаа, ад̇ирожаами д̣̇звад̇аа;
‘‘Tenāhaṃ vimalobhāsā, atirocāmi devatā;
д̇зна мз саб̣б̣аг̇ад̇д̇зхи, саб̣б̣аа обхаасад̇з д̣̇исаа.
Tena me sabbagattehi, sabbā obhāsate disā.
84.
84.
‘‘агкаами д̇з бхигку махаанубхаава, мануссабхууд̇аа яамагааси бун̃н̃ам̣;
‘‘Akkhāmi te bhikkhu mahānubhāva, manussabhūtā yamakāsi puññaṃ;
д̇знамхи звам̣ ж̇алид̇аанубхааваа, ван̣н̣о жа мз саб̣б̣ад̣̇исаа бабхаасад̇ий’’д̇и. –
Tenamhi evaṃ jalitānubhāvā, vaṇṇo ca me sabbadisā pabhāsatī’’ti. –
виссаж̇ж̇зси.
Vissajjesi.
75. д̇ад̇т̇а абхигганд̇зна ван̣н̣знаад̇и зд̇т̇а абхигганд̇а-сад̣̇д̣̇о ‘‘абхигганд̇аа, бханд̇з, рад̇д̇и, нигканд̇о батамо яаамо’’д̇иаад̣̇ийсу (а. ни. 8.20; уд̣̇аа. 45; жуул̣ава. 383) каяз ааг̇ад̇о. ‘‘аяам̣ имзсам̣ жад̇уннам̣ буг̇г̇алаанам̣ абхигганд̇ад̇аро жа бан̣ийд̇ад̇аро жаа’’д̇иаад̣̇ийсу (а. ни. 4.100) сунд̣̇арз. ‘‘абхигганд̇ам̣, бханд̇з, абхигганд̇ам̣, бханд̇з’’д̇иаад̣̇ийсу (д̣̇ий. ни. 1.250; баараа. 15) аб̣бханумод̣̇анз. ‘‘абхигганд̇зна ван̣н̣зна, саб̣б̣аа обхаасаяам̣ д̣̇исаа’’д̇иаад̣̇ийсу (ви. ва. 857) абхируубз. ид̇хааби абхируубз зва д̣̇адтаб̣б̣о. д̇асмаа абхигганд̇знаад̇и ад̇иганд̇зна ад̇иманаабзна, абхируубзнаад̇и ад̇т̇о. ван̣н̣знаад̇и чавиван̣н̣зна. обхаасзнд̇ий д̣̇исаа саб̣б̣аад̇и саб̣б̣ааби д̣̇аса д̣̇исаа ж̇од̇знд̇ий згаалогам̣ гаронд̇ий. гим̣ вияаад̇и ааха ‘‘осад̇хий вияа д̇аарагаа’’д̇и. уссаннаа бабхаа зд̇ааяа д̇хийяад̇и, осад̇хийнам̣ ваа ануб̣алаббад̣̇ааяигаад̇и гад̇ваа ‘‘осад̇хий’’д̇и лад̣̇д̇ханаамаа д̇аарагаа яат̇аа саманд̇ад̇о аалогам̣ гурумаанаа д̇идтад̇и, звамзва д̇вам̣ саб̣б̣аа д̣̇исаа обхаасаяанд̇ий д̇идтасийд̇и.
75. Tattha abhikkantena vaṇṇenāti ettha abhikkanta-saddo ‘‘abhikkantā, bhante, ratti, nikkhanto paṭhamo yāmo’’tiādīsu (a. ni. 8.20; udā. 45; cūḷava. 383) khaye āgato. ‘‘Ayaṃ imesaṃ catunnaṃ puggalānaṃ abhikkantataro ca paṇītataro cā’’tiādīsu (a. ni. 4.100) sundare. ‘‘Abhikkantaṃ, bhante, abhikkantaṃ, bhante’’tiādīsu (dī. ni. 1.250; pārā. 15) abbhanumodane. ‘‘Abhikkantena vaṇṇena, sabbā obhāsayaṃ disā’’tiādīsu (vi. va. 857) abhirūpe. Idhāpi abhirūpe eva daṭṭhabbo. Tasmā abhikkantenāti atikantena atimanāpena, abhirūpenāti attho. Vaṇṇenāti chavivaṇṇena. Obhāsentī disā sabbāti sabbāpi dasa disā jotentī ekālokaṃ karontī. Kiṃ viyāti āha ‘‘osadhī viya tārakā’’ti. Ussannā pabhā etāya dhīyati, osadhīnaṃ vā anubalappadāyikāti katvā ‘‘osadhī’’ti laddhanāmā tārakā yathā samantato ālokaṃ kurumānā tiṭṭhati, evameva tvaṃ sabbā disā obhāsayantī tiṭṭhasīti.
77. саб̣б̣аг̇ад̇д̇зхийд̇и саб̣б̣зхи сарийрааваяавзхи, сагалзхи ан̇г̇абажжан̇г̇зхи обхаасад̇ийд̇и ад̇хиббааяо, хзд̇умхи жзд̇ам̣ гаран̣аважанам̣. саб̣б̣аа обхаасад̇з д̣̇исаад̇и саб̣б̣ааби д̣̇асад̣̇исаа виж̇ж̇од̇ад̇и. ‘‘обхаасарз’’д̇иби батанд̇и, д̇зсам̣ саб̣б̣аа д̣̇исаад̇и б̣ахуважанамзва д̣̇адтаб̣б̣ам̣.
77.Sabbagattehīti sabbehi sarīrāvayavehi, sakalehi aṅgapaccaṅgehi obhāsatīti adhippāyo, hetumhi cetaṃ karaṇavacanaṃ. Sabbā obhāsate disāti sabbāpi dasadisā vijjotati. ‘‘Obhāsare’’tipi paṭhanti, tesaṃ sabbā disāti bahuvacanameva daṭṭhabbaṃ.
81. бад̣̇ийбагааламхийд̇и бад̣̇ийбагаран̣агаалз, бад̣̇ийбуж̇ж̇аланаяог̇г̇з анд̇хагаарзд̇и ад̇т̇о. д̇знааха ‘‘яо анд̇хагаарамхи д̇имийсигааяа’’нд̇и, б̣ахалз маханд̇хагаарзд̇и ад̇т̇о. д̣̇ад̣̇аад̇и д̣̇ийбанд̇и бад̣̇ийбам̣ уж̇ж̇аалзнд̇о ваа ануж̇ж̇аалзнд̇о ваа бад̣̇ийбад̣̇аанам̣ д̣̇ад̣̇аад̇и, бад̣̇ийбобагаран̣аани д̣̇агкин̣зяяз уд̣̇д̣̇исса барижжаж̇ад̇и. убабаж̇ж̇ад̇и ж̇од̇ирасам̣ вимаананд̇и бадисанд̇хиг̇г̇ахан̣авасзна ж̇од̇ирасам̣ вимаанам̣ убаг̇ажчад̇ийд̇и. сзсам̣ вуд̇д̇анаяамзва.
81.Padīpakālamhīti padīpakaraṇakāle, padīpujjalanayogge andhakāreti attho. Tenāha ‘‘yo andhakāramhi timīsikāya’’nti, bahale mahandhakāreti attho. Dadāti dīpanti padīpaṃ ujjālento vā anujjālento vā padīpadānaṃ dadāti, padīpopakaraṇāni dakkhiṇeyye uddissa pariccajati. Upapajjati jotirasaṃ vimānanti paṭisandhiggahaṇavasena jotirasaṃ vimānaṃ upagacchatīti. Sesaṃ vuttanayameva.
ат̇а яат̇аабужчид̇з ад̇т̇з д̣̇звад̇ааяа гат̇ид̇з т̇зро д̇амзва гат̇ам̣ адтуббад̇д̇им̣ гад̇ваа д̣̇аанаад̣̇игат̇ааяа д̇ассаа галлажид̇д̇аад̣̇ибхаавам̣ н̃ад̇ваа сажжаани багаасзси, сажжабарияосаанз сабариваараа саа д̣̇звад̇аа сод̇аабад̇д̇ипалз бад̇идтахи. т̇зро д̇ад̇о ааг̇анд̇ваа д̇ам̣ бавад̇д̇им̣ бхаг̇авад̇о аарожзси, бхаг̇аваа д̇асмим̣ вад̇т̇усмим̣ самбад̇д̇абарисааяа вид̇т̇аарзна д̇хаммам̣ д̣̇зсзси . саа д̣̇зсанаа махааж̇анасса саад̇т̇игаа ж̇аад̇аа, махааж̇ано висзсад̇о д̣̇ийбад̣̇аанз саггажжагаарий ахосийд̇и.
Atha yathāpucchite atthe devatāya kathite thero tameva kathaṃ aṭṭhuppattiṃ katvā dānādikathāya tassā kallacittādibhāvaṃ ñatvā saccāni pakāsesi, saccapariyosāne saparivārā sā devatā sotāpattiphale patiṭṭhahi. Thero tato āgantvā taṃ pavattiṃ bhagavato ārocesi, bhagavā tasmiṃ vatthusmiṃ sampattaparisāya vitthārena dhammaṃ desesi . Sā desanā mahājanassa sātthikā jātā, mahājano visesato dīpadāne sakkaccakārī ahosīti.
д̣̇ийбавимаанаван̣н̣анаа нидтид̇аа.
Dīpavimānavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / вимаанавад̇т̇убаал̣и • Vimānavatthupāḷi / 9. д̣̇ийбавимаанавад̇т̇у • 9. Dīpavimānavatthu
