| Library / Tipiṭaka / තිපිටක • Tipiṭaka / විමානවත්‌ථුපාළි • Vimānavatthupāḷi |
9. දීපවිමානවත්‌ථු
9. Dīpavimānavatthu
75.
75.
‘‘අභික්‌කන්‌තෙන වණ්‌ණෙන, යා ත්‌වං තිට්‌ඨසි දෙවතෙ;
‘‘Abhikkantena vaṇṇena, yā tvaṃ tiṭṭhasi devate;
ඔභාසෙන්‌තී දිසා සබ්‌බා, ඔසධී විය තාරකා.
Obhāsentī disā sabbā, osadhī viya tārakā.
76.
76.
‘‘කෙන තෙතාදිසො වණ්‌ණො, කෙන තෙ ඉධ මිජ්‌ඣති;
‘‘Kena tetādiso vaṇṇo, kena te idha mijjhati;
උප්‌පජ්‌ජන්‌ති ච තෙ භොගා, යෙ කෙචි මනසො පියා.
Uppajjanti ca te bhogā, ye keci manaso piyā.
77.
77.
කෙන තෙ සබ්‌බගත්‌තෙහි, සබ්‌බා ඔභාසතෙ දිසා.
Kena te sabbagattehi, sabbā obhāsate disā.
78.
78.
‘‘පුච්‌ඡාමි තං දෙවි මහානුභාවෙ, මනුස්‌සභූතා කිමකාසි පුඤ්‌ඤං;
‘‘Pucchāmi taṃ devi mahānubhāve, manussabhūtā kimakāsi puññaṃ;
කෙනාසි එවං ජලිතානුභාවා, වණ්‌ණො ච තෙ සබ්‌බදිසා පභාසතී’’ති.
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
79.
79.
සා දෙවතා අත්‌තමනා, මොග්‌ගල්‌ලානෙන පුච්‌ඡිතා;
Sā devatā attamanā, moggallānena pucchitā;
පඤ්‌හං පුට්‌ඨා වියාකාසි, යස්‌ස කම්‌මස්‌සිදං ඵලං.
Pañhaṃ puṭṭhā viyākāsi, yassa kammassidaṃ phalaṃ.
80.
80.
‘‘අහං මනුස්‌සෙසු මනුස්‌සභූතා, පුරිමාය ජාතියා මනුස්‌සලොකෙ;
‘‘Ahaṃ manussesu manussabhūtā, purimāya jātiyā manussaloke;
තමන්‌ධකාරම්‌හි තිමීසිකායං, පදීපකාලම්‌හි අදාසි දීපං 3.
Tamandhakāramhi timīsikāyaṃ, padīpakālamhi adāsi dīpaṃ 4.
81.
81.
‘‘යො අන්‌ධකාරම්‌හි තිමීසිකායං, පදීපකාලම්‌හි දදාති දීපං;
‘‘Yo andhakāramhi timīsikāyaṃ, padīpakālamhi dadāti dīpaṃ;
උප්‌පජ්‌ජති ජොතිරසං විමානං, පහූතමල්‍යං බහුපුණ්‌ඩරීකං.
Uppajjati jotirasaṃ vimānaṃ, pahūtamalyaṃ bahupuṇḍarīkaṃ.
82.
82.
‘‘තෙන මෙතාදිසො වණ්‌ණො, තෙන මෙ ඉධ මිජ්‌ඣති;
‘‘Tena metādiso vaṇṇo, tena me idha mijjhati;
උප්‌පජ්‌ජන්‌ති ච මෙ භොගා, යෙ කෙචි මනසො පියා.
Uppajjanti ca me bhogā, ye keci manaso piyā.
83.
83.
‘‘තෙනාහං විමලොභාසා, අතිරොචාමි දෙවතා;
‘‘Tenāhaṃ vimalobhāsā, atirocāmi devatā;
තෙන මෙ සබ්‌බගත්‌තෙහි, සබ්‌බා ඔභාසතෙ දිසා.
Tena me sabbagattehi, sabbā obhāsate disā.
84.
84.
‘‘අක්‌ඛාමි තෙ භික්‌ඛු මහානුභාව, මනුස්‌සභූතා යමකාසි පුඤ්‌ඤං;
‘‘Akkhāmi te bhikkhu mahānubhāva, manussabhūtā yamakāsi puññaṃ;
තෙනම්‌හි එවං ජලිතානුභාවා, වණ්‌ණො ච මෙ සබ්‌බදිසා පභාසතී’’ති.
Tenamhi evaṃ jalitānubhāvā, vaṇṇo ca me sabbadisā pabhāsatī’’ti.
දීපවිමානං නවමං.
Dīpavimānaṃ navamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / විමානවත්‌ථු-අට්‌ඨකථා • Vimānavatthu-aṭṭhakathā / 9. දීපවිමානවණ්‌ණනා • 9. Dīpavimānavaṇṇanā
