| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
4. දීපිනියඞ්‌ගපඤ්‌හො
4. Dīpiniyaṅgapañho
4. ‘‘භන්‌තෙ නාගසෙන, ‘දීපිනියා එකං අඞ්‌ගං ගහෙතබ්‌බ’න්‌ති යං වදෙසි, කතමං තං එකං අඞ්‌ගං ගහෙතබ්‌බ’’න්‌ති? ‘‘යථා, මහාරාජ, දීපිනී සකිං යෙව ගබ්‌භං ගණ්‌හාති, න පුනප්‌පුනං පුරිසං උපෙති? එවමෙව ඛො, මහාරාජ, යොගිනා යොගාවචරෙන ආයතිං පටිසන්‌ධිං උප්‌පත්‌තිං ගබ්‌භසෙය්‍යං චුතිං භෙදං ඛයං විනාසං සංසාරභයං දුග්‌ගතිං විසමං සම්‌පීළිතං දිස්‌වා ‘පුනබ්‌භවෙ නප්‌පටිසන්‌දහිස්‌සාමී’ති යොනිසො මනසිකාරො කරණීයො. ඉදං, මහාරාජ, දීපිනියා එකං අඞ්‌ගං ගහෙතබ්‌බං. භාසිතම්‌පෙතං, මහාරාජ, භගවතා දෙවාතිදෙවෙන සුත්‌තනිපාතෙ ධනියගොපාලකසුත්‌තෙ –
4. ‘‘Bhante nāgasena, ‘dīpiniyā ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, dīpinī sakiṃ yeva gabbhaṃ gaṇhāti, na punappunaṃ purisaṃ upeti? Evameva kho, mahārāja, yoginā yogāvacarena āyatiṃ paṭisandhiṃ uppattiṃ gabbhaseyyaṃ cutiṃ bhedaṃ khayaṃ vināsaṃ saṃsārabhayaṃ duggatiṃ visamaṃ sampīḷitaṃ disvā ‘punabbhave nappaṭisandahissāmī’ti yoniso manasikāro karaṇīyo. Idaṃ, mahārāja, dīpiniyā ekaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena suttanipāte dhaniyagopālakasutte –
‘‘‘උසභොරිව ඡෙත්‌ව බන්‌ධනානි, නාගො පූතිලතංව දාලයිත්‌වා;
‘‘‘Usabhoriva chetva bandhanāni, nāgo pūtilataṃva dālayitvā;
නාහං පුනුපෙස්‌සං ගබ්‌භසෙය්‍යං, අථ චෙ පත්‌ථයසී පවස්‌ස දෙවා’’’ති.
Nāhaṃ punupessaṃ gabbhaseyyaṃ, atha ce patthayasī pavassa devā’’’ti.
දීපිනියඞ්‌ගපඤ්‌හො චතුත්‌ථො.
Dīpiniyaṅgapañho catuttho.
