| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
৮৬. দিসংগমিকাদিৰত্থু
86. Disaṃgamikādivatthu
১৬৩. তেন খো পন সমযেন সম্বহুলা ভিক্খূ বালা অব্যত্তা দিসংগমিকা আচরিযুপজ্ঝাযে ন আপুচ্ছিংসু 1। ভগৰতো এতমত্থং আরোচেসুং।
163. Tena kho pana samayena sambahulā bhikkhū bālā abyattā disaṃgamikā ācariyupajjhāye na āpucchiṃsu 2. Bhagavato etamatthaṃ ārocesuṃ.
ইধ পন, ভিক্খৰে, সম্বহুলা ভিক্খূ বালা অব্যত্তা দিসংগমিকা আচরিযুপজ্ঝাযে ন আপুচ্ছন্তি 3। তে 4, ভিক্খৰে, আচরিযুপজ্ঝাযেহি পুচ্ছিতব্বা – ‘‘কহং গমিস্সথ, কেন সদ্ধিং গমিস্সথা’’তি? তে চে, ভিক্খৰে, বালা অব্যত্তা অঞ্ঞে বালে অব্যত্তে অপদিসেয্যুং, ন, ভিক্খৰে, আচরিযুপজ্ঝাযেহি অনুজানিতব্বা। অনুজানেয্যুং চে, আপত্তি দুক্কটস্স। তে চ, ভিক্খৰে, বালা অব্যত্তা অননুঞ্ঞাতা আচরিযুপজ্ঝাযেহি গচ্ছেয্যুং চে, আপত্তি দুক্কটস্স।
Idha pana, bhikkhave, sambahulā bhikkhū bālā abyattā disaṃgamikā ācariyupajjhāye na āpucchanti 5. Te 6, bhikkhave, ācariyupajjhāyehi pucchitabbā – ‘‘kahaṃ gamissatha, kena saddhiṃ gamissathā’’ti? Te ce, bhikkhave, bālā abyattā aññe bāle abyatte apadiseyyuṃ, na, bhikkhave, ācariyupajjhāyehi anujānitabbā. Anujāneyyuṃ ce, āpatti dukkaṭassa. Te ca, bhikkhave, bālā abyattā ananuññātā ācariyupajjhāyehi gaccheyyuṃ ce, āpatti dukkaṭassa.
ইধ পন, ভিক্খৰে, অঞ্ঞতরস্মিং আৰাসে সম্বহুলা ভিক্খূ ৰিহরন্তি বালা অব্যত্তা। তে ন জানন্তি উপোসথং ৰা উপোসথকম্মং ৰা, পাতিমোক্খং ৰা পাতিমোক্খুদ্দেসং ৰা। তত্থ অঞ্ঞো ভিক্খু আগচ্ছতি বহুস্সুতো আগতাগমো ধম্মধরো ৰিনযধরো মাতিকাধরো পণ্ডিতো ব্যত্তো মেধাৰী লজ্জী কুক্কুচ্চকো সিক্খাকামো। তেহি, ভিক্খৰে, ভিক্খূহি সো ভিক্খু সঙ্গহেতব্বো অনুগ্গহেতব্বো উপলাপেতব্বো উপট্ঠাপেতব্বো চুণ্ণেন মত্তিকায দন্তকট্ঠেন মুখোদকেন। নো চে সঙ্গণ্হেয্যুং অনুগ্গণ্হেয্যুং উপলাপেয্যুং উপট্ঠাপেয্যুং চুণ্ণেন মত্তিকায দন্তকট্ঠেন মুখোদকেন, আপত্তি দুক্কটস্স।
Idha pana, bhikkhave, aññatarasmiṃ āvāse sambahulā bhikkhū viharanti bālā abyattā. Te na jānanti uposathaṃ vā uposathakammaṃ vā, pātimokkhaṃ vā pātimokkhuddesaṃ vā. Tattha añño bhikkhu āgacchati bahussuto āgatāgamo dhammadharo vinayadharo mātikādharo paṇḍito byatto medhāvī lajjī kukkuccako sikkhākāmo. Tehi, bhikkhave, bhikkhūhi so bhikkhu saṅgahetabbo anuggahetabbo upalāpetabbo upaṭṭhāpetabbo cuṇṇena mattikāya dantakaṭṭhena mukhodakena. No ce saṅgaṇheyyuṃ anuggaṇheyyuṃ upalāpeyyuṃ upaṭṭhāpeyyuṃ cuṇṇena mattikāya dantakaṭṭhena mukhodakena, āpatti dukkaṭassa.
ইধ পন, ভিক্খৰে, অঞ্ঞতরস্মিং আৰাসে তদহুপোসথে সম্বহুলা ভিক্খূ ৰিহরন্তি বালা অব্যত্তা। তে ন জানন্তি উপোসথং ৰা উপোসথকম্মং ৰা, পাতিমোক্খং ৰা পাতিমোক্খুদ্দেসং ৰা। তেহি, ভিক্খৰে, ভিক্খূহি একো ভিক্খু সামন্তা আৰাসা সজ্জুকং পাহেতব্বো – ‘‘গচ্ছাৰুসো, সংখিত্তেন ৰা ৰিত্থারেন ৰা পাতিমোক্খং পরিযাপুণিত্ৰা আগচ্ছা’’তি। এৰঞ্চেতং লভেথ, ইচ্চেতং কুসলং। নো চে লভেথ, তেহি, ভিক্খৰে, ভিক্খূহি সব্বেহেৰ যত্থ জানন্তি উপোসথং ৰা উপোসথকম্মং ৰা পাতিমোক্খং ৰা পাতিমোক্খুদ্দেসং ৰা, সো আৰাসো গন্তব্বো । নো চে গচ্ছেয্যুং, আপত্তি দুক্কটস্স।
Idha pana, bhikkhave, aññatarasmiṃ āvāse tadahuposathe sambahulā bhikkhū viharanti bālā abyattā. Te na jānanti uposathaṃ vā uposathakammaṃ vā, pātimokkhaṃ vā pātimokkhuddesaṃ vā. Tehi, bhikkhave, bhikkhūhi eko bhikkhu sāmantā āvāsā sajjukaṃ pāhetabbo – ‘‘gacchāvuso, saṃkhittena vā vitthārena vā pātimokkhaṃ pariyāpuṇitvā āgacchā’’ti. Evañcetaṃ labhetha, iccetaṃ kusalaṃ. No ce labhetha, tehi, bhikkhave, bhikkhūhi sabbeheva yattha jānanti uposathaṃ vā uposathakammaṃ vā pātimokkhaṃ vā pātimokkhuddesaṃ vā, so āvāso gantabbo . No ce gaccheyyuṃ, āpatti dukkaṭassa.
ইধ পন, ভিক্খৰে, অঞ্ঞতরস্মিং আৰাসে সম্বহুলা ভিক্খূ ৰস্সং ৰসন্তি বালা অব্যত্তা। তে ন জানন্তি উপোসথং ৰা উপোসথকম্মং ৰা পাতিমোক্খং ৰা পাতিমোক্খুদ্দেসং ৰা। তেহি, ভিক্খৰে, ভিক্খূহি একো ভিক্খু সামন্তা আৰাসা সজ্জুকং পাহেতব্বো – ‘‘গচ্ছাৰুসো, সংখিত্তেন ৰা ৰিত্থারেন ৰা পাতিমোক্খং পরিযাপুণিত্ৰা আগচ্ছা’’তি। এৰঞ্চেতং লভেথ, ইচ্চেতং কুসলং। নো চে লভেথ, একো ভিক্খু সত্তাহকালিকং পাহেতব্বো – ‘‘গচ্ছাৰুসো, সংখিত্তেন ৰা ৰিত্থারেন ৰা পাতিমোক্খং পরিযাপুণিত্ৰা আগচ্ছা’’তি। এৰঞ্চেতং লভেথ, ইচ্চেতং কুসলং। নো চে লভেথ, ন, ভিক্খৰে, তেহি ভিক্খূহি তস্মিং আৰাসে ৰস্সং ৰসিতব্বং। ৰসেয্যুং চে, আপত্তি দুক্কটস্সাতি।
Idha pana, bhikkhave, aññatarasmiṃ āvāse sambahulā bhikkhū vassaṃ vasanti bālā abyattā. Te na jānanti uposathaṃ vā uposathakammaṃ vā pātimokkhaṃ vā pātimokkhuddesaṃ vā. Tehi, bhikkhave, bhikkhūhi eko bhikkhu sāmantā āvāsā sajjukaṃ pāhetabbo – ‘‘gacchāvuso, saṃkhittena vā vitthārena vā pātimokkhaṃ pariyāpuṇitvā āgacchā’’ti. Evañcetaṃ labhetha, iccetaṃ kusalaṃ. No ce labhetha, eko bhikkhu sattāhakālikaṃ pāhetabbo – ‘‘gacchāvuso, saṃkhittena vā vitthārena vā pātimokkhaṃ pariyāpuṇitvā āgacchā’’ti. Evañcetaṃ labhetha, iccetaṃ kusalaṃ. No ce labhetha, na, bhikkhave, tehi bhikkhūhi tasmiṃ āvāse vassaṃ vasitabbaṃ. Vaseyyuṃ ce, āpatti dukkaṭassāti.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / দিসংগমিকাদিৰত্থুকথা • Disaṃgamikādivatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / দিসংগমিকাদিৰত্থুকথাৰণ্ণনা • Disaṃgamikādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / দিসংগমিকাদিৰত্থুকথাৰণ্ণনা • Disaṃgamikādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পক্খগণনাদিউগ্গহণানুজাননকথাদিৰণ্ণনা • Pakkhagaṇanādiuggahaṇānujānanakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৮৬. দিসংগমিকাদিৰত্থুকথা • 86. Disaṃgamikādivatthukathā
