| Library / Tipiṭaka / д̇ибидага • Tipiṭaka / махааваг̇г̇абаал̣и • Mahāvaggapāḷi |
86. д̣̇исам̣г̇амигаад̣̇ивад̇т̇у
86. Disaṃgamikādivatthu
163. д̇зна ко бана самаязна самб̣ахулаа бхигкуу б̣аалаа аб̣яад̇д̇аа д̣̇исам̣г̇амигаа аажарияубаж̇жхааяз на аабужчим̣су 1. бхаг̇авад̇о зд̇амад̇т̇ам̣ аарожзсум̣.
163. Tena kho pana samayena sambahulā bhikkhū bālā abyattā disaṃgamikā ācariyupajjhāye na āpucchiṃsu 2. Bhagavato etamatthaṃ ārocesuṃ.
ид̇ха бана, бхигкавз, самб̣ахулаа бхигкуу б̣аалаа аб̣яад̇д̇аа д̣̇исам̣г̇амигаа аажарияубаж̇жхааяз на аабужчанд̇и 3. д̇з 4, бхигкавз, аажарияубаж̇жхааязхи бужчид̇аб̣б̣аа – ‘‘гахам̣ г̇амиссат̇а, гзна сад̣̇д̇хим̣ г̇амиссат̇аа’’д̇и? д̇з жз, бхигкавз, б̣аалаа аб̣яад̇д̇аа ан̃н̃з б̣аалз аб̣яад̇д̇з абад̣̇исзяяум̣, на, бхигкавз, аажарияубаж̇жхааязхи ануж̇аанид̇аб̣б̣аа. ануж̇аанзяяум̣ жз, аабад̇д̇и д̣̇уггадасса. д̇з жа, бхигкавз, б̣аалаа аб̣яад̇д̇аа ананун̃н̃аад̇аа аажарияубаж̇жхааязхи г̇ажчзяяум̣ жз, аабад̇д̇и д̣̇уггадасса.
Idha pana, bhikkhave, sambahulā bhikkhū bālā abyattā disaṃgamikā ācariyupajjhāye na āpucchanti 5. Te 6, bhikkhave, ācariyupajjhāyehi pucchitabbā – ‘‘kahaṃ gamissatha, kena saddhiṃ gamissathā’’ti? Te ce, bhikkhave, bālā abyattā aññe bāle abyatte apadiseyyuṃ, na, bhikkhave, ācariyupajjhāyehi anujānitabbā. Anujāneyyuṃ ce, āpatti dukkaṭassa. Te ca, bhikkhave, bālā abyattā ananuññātā ācariyupajjhāyehi gaccheyyuṃ ce, āpatti dukkaṭassa.
ид̇ха бана, бхигкавз, ан̃н̃ад̇арасмим̣ ааваасз самб̣ахулаа бхигкуу вихаранд̇и б̣аалаа аб̣яад̇д̇аа. д̇з на ж̇аананд̇и убосат̇ам̣ ваа убосат̇агаммам̣ ваа, баад̇имогкам̣ ваа баад̇имогкуд̣̇д̣̇зсам̣ ваа. д̇ад̇т̇а ан̃н̃о бхигку ааг̇ажчад̇и б̣ахуссуд̇о ааг̇ад̇ааг̇амо д̇хаммад̇харо винаяад̇харо маад̇игаад̇харо бан̣д̣ид̇о б̣яад̇д̇о мзд̇хаавий лаж̇ж̇ий гуггужжаго сигкаагаамо. д̇зхи, бхигкавз, бхигкуухи со бхигку сан̇г̇ахзд̇аб̣б̣о ануг̇г̇ахзд̇аб̣б̣о убалаабзд̇аб̣б̣о убадтаабзд̇аб̣б̣о жун̣н̣зна мад̇д̇игааяа д̣̇анд̇агадтзна мукод̣̇агзна. но жз сан̇г̇ан̣хзяяум̣ ануг̇г̇ан̣хзяяум̣ убалаабзяяум̣ убадтаабзяяум̣ жун̣н̣зна мад̇д̇игааяа д̣̇анд̇агадтзна мукод̣̇агзна, аабад̇д̇и д̣̇уггадасса.
Idha pana, bhikkhave, aññatarasmiṃ āvāse sambahulā bhikkhū viharanti bālā abyattā. Te na jānanti uposathaṃ vā uposathakammaṃ vā, pātimokkhaṃ vā pātimokkhuddesaṃ vā. Tattha añño bhikkhu āgacchati bahussuto āgatāgamo dhammadharo vinayadharo mātikādharo paṇḍito byatto medhāvī lajjī kukkuccako sikkhākāmo. Tehi, bhikkhave, bhikkhūhi so bhikkhu saṅgahetabbo anuggahetabbo upalāpetabbo upaṭṭhāpetabbo cuṇṇena mattikāya dantakaṭṭhena mukhodakena. No ce saṅgaṇheyyuṃ anuggaṇheyyuṃ upalāpeyyuṃ upaṭṭhāpeyyuṃ cuṇṇena mattikāya dantakaṭṭhena mukhodakena, āpatti dukkaṭassa.
ид̇ха бана, бхигкавз, ан̃н̃ад̇арасмим̣ ааваасз д̇ад̣̇ахубосат̇з самб̣ахулаа бхигкуу вихаранд̇и б̣аалаа аб̣яад̇д̇аа. д̇з на ж̇аананд̇и убосат̇ам̣ ваа убосат̇агаммам̣ ваа, баад̇имогкам̣ ваа баад̇имогкуд̣̇д̣̇зсам̣ ваа. д̇зхи, бхигкавз, бхигкуухи зго бхигку сааманд̇аа ааваасаа саж̇ж̇угам̣ баахзд̇аб̣б̣о – ‘‘г̇ажчаавусо, сам̣кид̇д̇зна ваа вид̇т̇аарзна ваа баад̇имогкам̣ барияаабун̣ид̇ваа ааг̇ажчаа’’д̇и. зван̃жзд̇ам̣ лабхзт̇а, ижжзд̇ам̣ гусалам̣. но жз лабхзт̇а, д̇зхи, бхигкавз, бхигкуухи саб̣б̣зхзва яад̇т̇а ж̇аананд̇и убосат̇ам̣ ваа убосат̇агаммам̣ ваа баад̇имогкам̣ ваа баад̇имогкуд̣̇д̣̇зсам̣ ваа, со ааваасо г̇анд̇аб̣б̣о . но жз г̇ажчзяяум̣, аабад̇д̇и д̣̇уггадасса.
Idha pana, bhikkhave, aññatarasmiṃ āvāse tadahuposathe sambahulā bhikkhū viharanti bālā abyattā. Te na jānanti uposathaṃ vā uposathakammaṃ vā, pātimokkhaṃ vā pātimokkhuddesaṃ vā. Tehi, bhikkhave, bhikkhūhi eko bhikkhu sāmantā āvāsā sajjukaṃ pāhetabbo – ‘‘gacchāvuso, saṃkhittena vā vitthārena vā pātimokkhaṃ pariyāpuṇitvā āgacchā’’ti. Evañcetaṃ labhetha, iccetaṃ kusalaṃ. No ce labhetha, tehi, bhikkhave, bhikkhūhi sabbeheva yattha jānanti uposathaṃ vā uposathakammaṃ vā pātimokkhaṃ vā pātimokkhuddesaṃ vā, so āvāso gantabbo . No ce gaccheyyuṃ, āpatti dukkaṭassa.
ид̇ха бана, бхигкавз, ан̃н̃ад̇арасмим̣ ааваасз самб̣ахулаа бхигкуу вассам̣ васанд̇и б̣аалаа аб̣яад̇д̇аа. д̇з на ж̇аананд̇и убосат̇ам̣ ваа убосат̇агаммам̣ ваа баад̇имогкам̣ ваа баад̇имогкуд̣̇д̣̇зсам̣ ваа. д̇зхи, бхигкавз, бхигкуухи зго бхигку сааманд̇аа ааваасаа саж̇ж̇угам̣ баахзд̇аб̣б̣о – ‘‘г̇ажчаавусо, сам̣кид̇д̇зна ваа вид̇т̇аарзна ваа баад̇имогкам̣ барияаабун̣ид̇ваа ааг̇ажчаа’’д̇и. зван̃жзд̇ам̣ лабхзт̇а, ижжзд̇ам̣ гусалам̣. но жз лабхзт̇а, зго бхигку сад̇д̇аахагаалигам̣ баахзд̇аб̣б̣о – ‘‘г̇ажчаавусо, сам̣кид̇д̇зна ваа вид̇т̇аарзна ваа баад̇имогкам̣ барияаабун̣ид̇ваа ааг̇ажчаа’’д̇и. зван̃жзд̇ам̣ лабхзт̇а, ижжзд̇ам̣ гусалам̣. но жз лабхзт̇а, на, бхигкавз, д̇зхи бхигкуухи д̇асмим̣ ааваасз вассам̣ васид̇аб̣б̣ам̣. васзяяум̣ жз, аабад̇д̇и д̣̇уггадассаад̇и.
Idha pana, bhikkhave, aññatarasmiṃ āvāse sambahulā bhikkhū vassaṃ vasanti bālā abyattā. Te na jānanti uposathaṃ vā uposathakammaṃ vā pātimokkhaṃ vā pātimokkhuddesaṃ vā. Tehi, bhikkhave, bhikkhūhi eko bhikkhu sāmantā āvāsā sajjukaṃ pāhetabbo – ‘‘gacchāvuso, saṃkhittena vā vitthārena vā pātimokkhaṃ pariyāpuṇitvā āgacchā’’ti. Evañcetaṃ labhetha, iccetaṃ kusalaṃ. No ce labhetha, eko bhikkhu sattāhakālikaṃ pāhetabbo – ‘‘gacchāvuso, saṃkhittena vā vitthārena vā pātimokkhaṃ pariyāpuṇitvā āgacchā’’ti. Evañcetaṃ labhetha, iccetaṃ kusalaṃ. No ce labhetha, na, bhikkhave, tehi bhikkhūhi tasmiṃ āvāse vassaṃ vasitabbaṃ. Vaseyyuṃ ce, āpatti dukkaṭassāti.
Footnotes:
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / д̣̇исам̣г̇амигаад̣̇ивад̇т̇угат̇аа • Disaṃgamikādivatthukathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / д̣̇исам̣г̇амигаад̣̇ивад̇т̇угат̇ааван̣н̣анаа • Disaṃgamikādivatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / д̣̇исам̣г̇амигаад̣̇ивад̇т̇угат̇ааван̣н̣анаа • Disaṃgamikādivatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / багкаг̇ан̣анаад̣̇иуг̇г̇ахан̣аануж̇аананагат̇аад̣̇иван̣н̣анаа • Pakkhagaṇanādiuggahaṇānujānanakathādivaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 86. д̣̇исам̣г̇амигаад̣̇ивад̇т̇угат̇аа • 86. Disaṃgamikādivatthukathā
