| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
86. දිසංගමිකාදිවත්‌ථු
86. Disaṃgamikādivatthu
163. තෙන ඛො පන සමයෙන සම්‌බහුලා භික්‌ඛූ බාලා අබ්‍යත්‌තා දිසංගමිකා ආචරියුපජ්‌ඣායෙ න ආපුච්‌ඡිංසු 1. භගවතො එතමත්‌ථං ආරොචෙසුං.
163. Tena kho pana samayena sambahulā bhikkhū bālā abyattā disaṃgamikā ācariyupajjhāye na āpucchiṃsu 2. Bhagavato etamatthaṃ ārocesuṃ.
ඉධ පන, භික්‌ඛවෙ, සම්‌බහුලා භික්‌ඛූ බාලා අබ්‍යත්‌තා දිසංගමිකා ආචරියුපජ්‌ඣායෙ න ආපුච්‌ඡන්‌ති 3. තෙ 4, භික්‌ඛවෙ, ආචරියුපජ්‌ඣායෙහි පුච්‌ඡිතබ්‌බා – ‘‘කහං ගමිස්‌සථ, කෙන සද්‌ධිං ගමිස්‌සථා’’ති? තෙ චෙ, භික්‌ඛවෙ, බාලා අබ්‍යත්‌තා අඤ්‌ඤෙ බාලෙ අබ්‍යත්‌තෙ අපදිසෙය්‍යුං, න, භික්‌ඛවෙ, ආචරියුපජ්‌ඣායෙහි අනුජානිතබ්‌බා. අනුජානෙය්‍යුං චෙ, ආපත්‌ති දුක්‌කටස්‌ස. තෙ ච, භික්‌ඛවෙ, බාලා අබ්‍යත්‌තා අනනුඤ්‌ඤාතා ආචරියුපජ්‌ඣායෙහි ගච්‌ඡෙය්‍යුං චෙ, ආපත්‌ති දුක්‌කටස්‌ස.
Idha pana, bhikkhave, sambahulā bhikkhū bālā abyattā disaṃgamikā ācariyupajjhāye na āpucchanti 5. Te 6, bhikkhave, ācariyupajjhāyehi pucchitabbā – ‘‘kahaṃ gamissatha, kena saddhiṃ gamissathā’’ti? Te ce, bhikkhave, bālā abyattā aññe bāle abyatte apadiseyyuṃ, na, bhikkhave, ācariyupajjhāyehi anujānitabbā. Anujāneyyuṃ ce, āpatti dukkaṭassa. Te ca, bhikkhave, bālā abyattā ananuññātā ācariyupajjhāyehi gaccheyyuṃ ce, āpatti dukkaṭassa.
ඉධ පන, භික්‌ඛවෙ, අඤ්‌ඤතරස්‌මිං ආවාසෙ සම්‌බහුලා භික්‌ඛූ විහරන්‌ති බාලා අබ්‍යත්‌තා. තෙ න ජානන්‌ති උපොසථං වා උපොසථකම්‌මං වා, පාතිමොක්‌ඛං වා පාතිමොක්‌ඛුද්‌දෙසං වා. තත්‌ථ අඤ්‌ඤො භික්‌ඛු ආගච්‌ඡති බහුස්‌සුතො ආගතාගමො ධම්‌මධරො විනයධරො මාතිකාධරො පණ්‌ඩිතො බ්‍යත්‌තො මෙධාවී ලජ්‌ජී කුක්‌කුච්‌චකො සික්‌ඛාකාමො. තෙහි, භික්‌ඛවෙ, භික්‌ඛූහි සො භික්‌ඛු සඞ්‌ගහෙතබ්‌බො අනුග්‌ගහෙතබ්‌බො උපලාපෙතබ්‌බො උපට්‌ඨාපෙතබ්‌බො චුණ්‌ණෙන මත්‌තිකාය දන්‌තකට්‌ඨෙන මුඛොදකෙන. නො චෙ සඞ්‌ගණ්‌හෙය්‍යුං අනුග්‌ගණ්‌හෙය්‍යුං උපලාපෙය්‍යුං උපට්‌ඨාපෙය්‍යුං චුණ්‌ණෙන මත්‌තිකාය දන්‌තකට්‌ඨෙන මුඛොදකෙන, ආපත්‌ති දුක්‌කටස්‌ස.
Idha pana, bhikkhave, aññatarasmiṃ āvāse sambahulā bhikkhū viharanti bālā abyattā. Te na jānanti uposathaṃ vā uposathakammaṃ vā, pātimokkhaṃ vā pātimokkhuddesaṃ vā. Tattha añño bhikkhu āgacchati bahussuto āgatāgamo dhammadharo vinayadharo mātikādharo paṇḍito byatto medhāvī lajjī kukkuccako sikkhākāmo. Tehi, bhikkhave, bhikkhūhi so bhikkhu saṅgahetabbo anuggahetabbo upalāpetabbo upaṭṭhāpetabbo cuṇṇena mattikāya dantakaṭṭhena mukhodakena. No ce saṅgaṇheyyuṃ anuggaṇheyyuṃ upalāpeyyuṃ upaṭṭhāpeyyuṃ cuṇṇena mattikāya dantakaṭṭhena mukhodakena, āpatti dukkaṭassa.
ඉධ පන, භික්‌ඛවෙ, අඤ්‌ඤතරස්‌මිං ආවාසෙ තදහුපොසථෙ සම්‌බහුලා භික්‌ඛූ විහරන්‌ති බාලා අබ්‍යත්‌තා. තෙ න ජානන්‌ති උපොසථං වා උපොසථකම්‌මං වා, පාතිමොක්‌ඛං වා පාතිමොක්‌ඛුද්‌දෙසං වා. තෙහි, භික්‌ඛවෙ, භික්‌ඛූහි එකො භික්‌ඛු සාමන්‌තා ආවාසා සජ්‌ජුකං පාහෙතබ්‌බො – ‘‘ගච්‌ඡාවුසො, සංඛිත්‌තෙන වා විත්‌ථාරෙන වා පාතිමොක්‌ඛං පරියාපුණිත්‌වා ආගච්‌ඡා’’ති. එවඤ්‌චෙතං ලභෙථ, ඉච්‌චෙතං කුසලං. නො චෙ ලභෙථ, තෙහි, භික්‌ඛවෙ, භික්‌ඛූහි සබ්‌බෙහෙව යත්‌ථ ජානන්‌ති උපොසථං වා උපොසථකම්‌මං වා පාතිමොක්‌ඛං වා පාතිමොක්‌ඛුද්‌දෙසං වා, සො ආවාසො ගන්‌තබ්‌බො . නො චෙ ගච්‌ඡෙය්‍යුං, ආපත්‌ති දුක්‌කටස්‌ස.
Idha pana, bhikkhave, aññatarasmiṃ āvāse tadahuposathe sambahulā bhikkhū viharanti bālā abyattā. Te na jānanti uposathaṃ vā uposathakammaṃ vā, pātimokkhaṃ vā pātimokkhuddesaṃ vā. Tehi, bhikkhave, bhikkhūhi eko bhikkhu sāmantā āvāsā sajjukaṃ pāhetabbo – ‘‘gacchāvuso, saṃkhittena vā vitthārena vā pātimokkhaṃ pariyāpuṇitvā āgacchā’’ti. Evañcetaṃ labhetha, iccetaṃ kusalaṃ. No ce labhetha, tehi, bhikkhave, bhikkhūhi sabbeheva yattha jānanti uposathaṃ vā uposathakammaṃ vā pātimokkhaṃ vā pātimokkhuddesaṃ vā, so āvāso gantabbo . No ce gaccheyyuṃ, āpatti dukkaṭassa.
ඉධ පන, භික්‌ඛවෙ, අඤ්‌ඤතරස්‌මිං ආවාසෙ සම්‌බහුලා භික්‌ඛූ වස්‌සං වසන්‌ති බාලා අබ්‍යත්‌තා. තෙ න ජානන්‌ති උපොසථං වා උපොසථකම්‌මං වා පාතිමොක්‌ඛං වා පාතිමොක්‌ඛුද්‌දෙසං වා. තෙහි, භික්‌ඛවෙ, භික්‌ඛූහි එකො භික්‌ඛු සාමන්‌තා ආවාසා සජ්‌ජුකං පාහෙතබ්‌බො – ‘‘ගච්‌ඡාවුසො, සංඛිත්‌තෙන වා විත්‌ථාරෙන වා පාතිමොක්‌ඛං පරියාපුණිත්‌වා ආගච්‌ඡා’’ති. එවඤ්‌චෙතං ලභෙථ, ඉච්‌චෙතං කුසලං. නො චෙ ලභෙථ, එකො භික්‌ඛු සත්‌තාහකාලිකං පාහෙතබ්‌බො – ‘‘ගච්‌ඡාවුසො, සංඛිත්‌තෙන වා විත්‌ථාරෙන වා පාතිමොක්‌ඛං පරියාපුණිත්‌වා ආගච්‌ඡා’’ති. එවඤ්‌චෙතං ලභෙථ, ඉච්‌චෙතං කුසලං. නො චෙ ලභෙථ, න, භික්‌ඛවෙ, තෙහි භික්‌ඛූහි තස්‌මිං ආවාසෙ වස්‌සං වසිතබ්‌බං. වසෙය්‍යුං චෙ, ආපත්‌ති දුක්‌කටස්‌සාති.
Idha pana, bhikkhave, aññatarasmiṃ āvāse sambahulā bhikkhū vassaṃ vasanti bālā abyattā. Te na jānanti uposathaṃ vā uposathakammaṃ vā pātimokkhaṃ vā pātimokkhuddesaṃ vā. Tehi, bhikkhave, bhikkhūhi eko bhikkhu sāmantā āvāsā sajjukaṃ pāhetabbo – ‘‘gacchāvuso, saṃkhittena vā vitthārena vā pātimokkhaṃ pariyāpuṇitvā āgacchā’’ti. Evañcetaṃ labhetha, iccetaṃ kusalaṃ. No ce labhetha, eko bhikkhu sattāhakālikaṃ pāhetabbo – ‘‘gacchāvuso, saṃkhittena vā vitthārena vā pātimokkhaṃ pariyāpuṇitvā āgacchā’’ti. Evañcetaṃ labhetha, iccetaṃ kusalaṃ. No ce labhetha, na, bhikkhave, tehi bhikkhūhi tasmiṃ āvāse vassaṃ vasitabbaṃ. Vaseyyuṃ ce, āpatti dukkaṭassāti.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / දිසංගමිකාදිවත්‌ථුකථා • Disaṃgamikādivatthukathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / දිසංගමිකාදිවත්‌ථුකථාවණ්‌ණනා • Disaṃgamikādivatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / දිසංගමිකාදිවත්‌ථුකථාවණ්‌ණනා • Disaṃgamikādivatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / පක්‌ඛගණනාදිඋග්‌ගහණානුජානනකථාදිවණ්‌ණනා • Pakkhagaṇanādiuggahaṇānujānanakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 86. දිසංගමිකාදිවත්‌ථුකථා • 86. Disaṃgamikādivatthukathā
