86. தி³ஸங்க³மிகாதி³வத்து²கதா²

163. ஸங்க³ஹேதப்³போ³திஆதீ³னங் சதுன்னங் கிரியாபதா³னங் விஸேஸங் த³ஸ்ஸெந்தோ ஆஹ ‘‘ஸங்க³ஹேதப்³போ³’’திஆதி³. ஸங்க³ஹஸத்³த³ஸ்ஸ ஸங்கே²பக³ஹணேஸுபி வத்தனதோ இத⁴ ‘‘அனுக்³க³ஹத்தே²’’தி த³ஸ்ஸேதுங் பாளியங் வுத்தங் ‘‘அனுக்³க³ஹேதப்³போ³’’தி. தேன வுத்தங் ‘‘ததா²கரணவஸேனா’’தி. உபலாபேதப்³போ³தி ஸங்கே⁴ன ப³ஹுஸ்ஸுதோ பி⁴க்கு² பி⁴க்கூ²ஹி உபக³ந்த்வா லாபேதப்³போ³ கதா²பேதப்³போ³. உபட்டா²பேதப்³போ³தி ஸங்கே⁴ன ப³ஹுஸ்ஸுதோ பி⁴க்கு² பி⁴க்கூ²ஹி உப அச்சனேன பூஜனேன டா²பேதப்³போ³. ‘‘ஸப்³பே³ஸங் து³க்கட’’ந்தி வத்வா ததே³வ ஸமத்தே²துங் வுத்தங் ‘‘இத⁴ நேவ தே²ரா, ந த³ஹரா முச்சந்தீ’’தி. தேனாதி ப³ஹுஸ்ஸுதேன பி⁴க்கு²னா. ஏவம்பி ஸதீதி ஏவங் அஸாதி³யனேபி ஸதி. ஸாயங் பாதந்தி ஸாயஞ்ச பாதோ ச ஸாயங்பாதங். உபட்டா²னந்தி உபட்டா²னட்டா²னங், உபட்டா²னத்தா²ய வா. தேனாதி ப³ஹுஸ்ஸுதேன பி⁴க்கு²னா. தேஸந்தி மஹாதே²ரானங். அஸ்ஸாதி ப³ஹுஸ்ஸுதஸ்ஸ பி⁴க்கு²னோ. ஸத்³தி⁴ங்சராதி அத்தனா ஸத்³தி⁴ங் சரந்தீதி ஸத்³தி⁴ங்சரா. அதா²பீதி யதி³பி. ஏகோ வா வத்தஸம்பன்னோ வத³தீதி யோஜனா. ஏஸோ ச அஹஞ்சாதி மயங். நாமதும்ஹஅம்ஹஸத்³தே³ஸு ஹி ஏகஸேஸேன கத்தப்³பே³ஸு பரோவ க³ஹேதப்³போ³. விஹரந்தூதி வத³ந்தீதி யோஜனா.

ஸோ ஆவாஸோ க³ந்தப்³போ³தி எத்த² கிமத்தா²ய க³ந்தப்³போ³, கிங் அனுதி³வஸங் க³ந்தப்³போ³தி ஆஹ ‘‘உபோஸத²கரணத்தா²ய அன்வத்³த⁴மாஸங் க³ந்தப்³போ³’’தி. ஸோ ச கோ²தி ஆவாஸோ. உதுவஸ்ஸேயேவாதி ஹேமந்தகி³ம்ஹேயேவ. உதுவஸ்ஸேயேவ க³ந்தப்³போ³தி அத்த²ஸ்ஸ ஞாதப்³ப³பா⁴வங் த³ஸ்ஸெந்தோ ஆஹ ‘‘வஸ்ஸானே பனா’’திஆதி³. யந்தி கம்மங். தத்தா²தி ‘‘வஸ்ஸங் வஸந்தீ’’திஆதி³வசனே. ஸோதி பாதிமொக்கு²த்³தே³ஸகோ பி⁴க்கு². அஞ்ஞஸ்மிந்தி அபரஸ்மிங் பாதிமொக்கு²த்³தே³ஸகே. மாஸத்³வயந்தி ஸாவணமாஸபுண்ணமிதோ யாவ அஸ்ஸயுஜபுண்ணமீ, தாவ மாஸத்³வயங் வஸிதப்³ப³ங். இத³ங் புரிமவஸ்ஸங் உபக³ந்த்வா பச்சி²மிகாய பக்கமனாதி³ங் ஸந்தா⁴ய வுத்தங். ஸசே பச்சி²மிகங் உபக³ந்த்வா அனந்தரமேவ பக்கமனாதி³ங் கரோதி, மாஸத்தயம்பி வஸிதப்³ப³ங்.