| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৮৬. দিসংগমিকাদিৰত্থুকথা
86. Disaṃgamikādivatthukathā
১৬৩. সংগহেতব্বোতিআদীনং চতুন্নং কিরিযাপদানং ৰিসেসং দস্সেন্তো আহ ‘‘সংগহেতব্বো’’তিআদি। সংগহসদ্দস্স সঙ্খেপগহণেসুপি ৰত্তনতো ইধ ‘‘অনুগ্গহত্থে’’তি দস্সেতুং পাল়িযং ৰুত্তং ‘‘অনুগ্গহেতব্বো’’তি। তেন ৰুত্তং ‘‘তথাকরণৰসেনা’’তি। উপলাপেতব্বোতি সঙ্ঘেন বহুস্সুতো ভিক্খু ভিক্খূহি উপগন্ত্ৰা লাপেতব্বো কথাপেতব্বো। উপট্ঠাপেতব্বোতি সঙ্ঘেন বহুস্সুতো ভিক্খু ভিক্খূহি উপ অচ্চনেন পূজনেন ঠাপেতব্বো। ‘‘সব্বেসং দুক্কট’’ন্তি ৰত্ৰা তদেৰ সমত্থেতুং ৰুত্তং ‘‘ইধ নেৰ থেরা, ন দহরা মুচ্চন্তী’’তি। তেনাতি বহুস্সুতেন ভিক্খুনা। এৰম্পি সতীতি এৰং অসাদিযনেপি সতি। সাযং পাতন্তি সাযঞ্চ পাতো চ সাযংপাতং। উপট্ঠানন্তি উপট্ঠানট্ঠানং, উপট্ঠানত্থায ৰা। তেনাতি বহুস্সুতেন ভিক্খুনা। তেসন্তি মহাথেরানং। অস্সাতি বহুস্সুতস্স ভিক্খুনো। সদ্ধিংচরাতি অত্তনা সদ্ধিং চরন্তীতি সদ্ধিংচরা। অথাপীতি যদিপি। একো ৰা ৰত্তসম্পন্নো ৰদতীতি যোজনা। এসো চ অহঞ্চাতি মযং। নামতুম্হঅম্হসদ্দেসু হি একসেসেন কত্তব্বেসু পরোৰ গহেতব্বো। ৰিহরন্তূতি ৰদন্তীতি যোজনা।
163.Saṃgahetabbotiādīnaṃ catunnaṃ kiriyāpadānaṃ visesaṃ dassento āha ‘‘saṃgahetabbo’’tiādi. Saṃgahasaddassa saṅkhepagahaṇesupi vattanato idha ‘‘anuggahatthe’’ti dassetuṃ pāḷiyaṃ vuttaṃ ‘‘anuggahetabbo’’ti. Tena vuttaṃ ‘‘tathākaraṇavasenā’’ti. Upalāpetabboti saṅghena bahussuto bhikkhu bhikkhūhi upagantvā lāpetabbo kathāpetabbo. Upaṭṭhāpetabboti saṅghena bahussuto bhikkhu bhikkhūhi upa accanena pūjanena ṭhāpetabbo. ‘‘Sabbesaṃ dukkaṭa’’nti vatvā tadeva samatthetuṃ vuttaṃ ‘‘idha neva therā, na daharā muccantī’’ti. Tenāti bahussutena bhikkhunā. Evampi satīti evaṃ asādiyanepi sati. Sāyaṃ pātanti sāyañca pāto ca sāyaṃpātaṃ. Upaṭṭhānanti upaṭṭhānaṭṭhānaṃ, upaṭṭhānatthāya vā. Tenāti bahussutena bhikkhunā. Tesanti mahātherānaṃ. Assāti bahussutassa bhikkhuno. Saddhiṃcarāti attanā saddhiṃ carantīti saddhiṃcarā. Athāpīti yadipi. Eko vā vattasampanno vadatīti yojanā. Eso ca ahañcāti mayaṃ. Nāmatumhaamhasaddesu hi ekasesena kattabbesu parova gahetabbo. Viharantūti vadantīti yojanā.
সো আৰাসো গন্তব্বোতি এত্থ কিমত্থায গন্তব্বো, কিং অনুদিৰসং গন্তব্বোতি আহ ‘‘উপোসথকরণত্থায অন্ৰদ্ধমাসং গন্তব্বো’’তি। সো চ খোতি আৰাসো। উতুৰস্সেযেৰাতি হেমন্তগিম্হেযেৰ। উতুৰস্সেযেৰ গন্তব্বোতি অত্থস্স ঞাতব্বভাৰং দস্সেন্তো আহ ‘‘ৰস্সানে পনা’’তিআদি। যন্তি কম্মং। তত্থাতি ‘‘ৰস্সং ৰসন্তী’’তিআদিৰচনে। সোতি পাতিমোক্খুদ্দেসকো ভিক্খু। অঞ্ঞস্মিন্তি অপরস্মিং পাতিমোক্খুদ্দেসকে। মাসদ্ৰযন্তি সাৰণমাসপুণ্ণমিতো যাৰ অস্সযুজপুণ্ণমী, তাৰ মাসদ্ৰযং ৰসিতব্বং। ইদং পুরিমৰস্সং উপগন্ত্ৰা পচ্ছিমিকায পক্কমনাদিং সন্ধায ৰুত্তং। সচে পচ্ছিমিকং উপগন্ত্ৰা অনন্তরমেৰ পক্কমনাদিং করোতি, মাসত্তযম্পি ৰসিতব্বং।
So āvāso gantabboti ettha kimatthāya gantabbo, kiṃ anudivasaṃ gantabboti āha ‘‘uposathakaraṇatthāya anvaddhamāsaṃ gantabbo’’ti. So ca khoti āvāso. Utuvasseyevāti hemantagimheyeva. Utuvasseyeva gantabboti atthassa ñātabbabhāvaṃ dassento āha ‘‘vassāne panā’’tiādi. Yanti kammaṃ. Tatthāti ‘‘vassaṃ vasantī’’tiādivacane. Soti pātimokkhuddesako bhikkhu. Aññasminti aparasmiṃ pātimokkhuddesake. Māsadvayanti sāvaṇamāsapuṇṇamito yāva assayujapuṇṇamī, tāva māsadvayaṃ vasitabbaṃ. Idaṃ purimavassaṃ upagantvā pacchimikāya pakkamanādiṃ sandhāya vuttaṃ. Sace pacchimikaṃ upagantvā anantarameva pakkamanādiṃ karoti, māsattayampi vasitabbaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৮৬. দিসংগমিকাদিৰত্থু • 86. Disaṃgamikādivatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / দিসংগমিকাদিৰত্থুকথা • Disaṃgamikādivatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / দিসংগমিকাদিৰত্থুকথাৰণ্ণনা • Disaṃgamikādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / দিসংগমিকাদিৰত্থুকথাৰণ্ণনা • Disaṃgamikādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পক্খগণনাদিউগ্গহণানুজাননকথাদিৰণ্ণনা • Pakkhagaṇanādiuggahaṇānujānanakathādivaṇṇanā
