| Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya |
१०. दिट्ठधम्मनिब्बानसुत्तं
10. Diṭṭhadhammanibbānasuttaṃ
५१. ‘‘‘दिट्ठधम्मनिब्बानं दिट्ठधम्मनिब्बान’न्ति, आवुसो, वुच्चति। कित्तावता नु खो, आवुसो दिट्ठधम्मनिब्बानं वुत्तं भगवता’’ति?
51. ‘‘‘Diṭṭhadhammanibbānaṃ diṭṭhadhammanibbāna’nti, āvuso, vuccati. Kittāvatā nu kho, āvuso diṭṭhadhammanibbānaṃ vuttaṃ bhagavatā’’ti?
‘‘इधावुसो, भिक्खु विविच्चेव कामेहि …पे॰… पठमं झानं उपसम्पज्ज विहरति। एत्तावतापि खो, आवुसो, दिट्ठधम्मनिब्बानं वुत्तं भगवता परियायेन …पे॰…।
‘‘Idhāvuso, bhikkhu vivicceva kāmehi …pe… paṭhamaṃ jhānaṃ upasampajja viharati. Ettāvatāpi kho, āvuso, diṭṭhadhammanibbānaṃ vuttaṃ bhagavatā pariyāyena …pe….
‘‘पुन चपरं, आवुसो, भिक्खु सब्बसो नेवसञ्ञानासञ्ञायतनं समतिक्कम्म सञ्ञावेदयितनिरोधं उपसम्पज्ज विहरति, पञ्ञाय चस्स दिस्वा आसवा परिक्खीणा होन्ति। एत्तावतापि खो, आवुसो, दिट्ठधम्मनिब्बानं वुत्तं भगवता निप्परियायेना’’ति। दसमं।
‘‘Puna caparaṃ, āvuso, bhikkhu sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharati, paññāya cassa disvā āsavā parikkhīṇā honti. Ettāvatāpi kho, āvuso, diṭṭhadhammanibbānaṃ vuttaṃ bhagavatā nippariyāyenā’’ti. Dasamaṃ.
सामञ्ञवग्गो पञ्चमो।
Sāmaññavaggo pañcamo.
तस्सुद्दानं –
Tassuddānaṃ –
सम्बाधो कायसक्खी पञ्ञा,
Sambādho kāyasakkhī paññā,
उभतोभागो सन्दिट्ठिका द्वे।
Ubhatobhāgo sandiṭṭhikā dve;
निब्बानं परिनिब्बानं,
Nibbānaṃ parinibbānaṃ,
तदङ्गदिट्ठधम्मिकेन चाति॥
Tadaṅgadiṭṭhadhammikena cāti.
पठमपण्णासकं समत्तं।
Paṭhamapaṇṇāsakaṃ samattaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / ५-१०. सन्दिट्ठिकधम्मसुत्तादिवण्णना • 5-10. Sandiṭṭhikadhammasuttādivaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / १-१०. सम्बाधसुत्तादिवण्णना • 1-10. Sambādhasuttādivaṇṇanā
