| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
தி³ட்டா²விகம்மவக்³க³வண்ணனா
Diṭṭhāvikammavaggavaṇṇanā
425. தி³ட்டா²விகம்மவக்³கே³ – தி³ட்டா²விகம்மாதி தி³ட்டீ²னங் ஆவிகம்மானி; லத்³தி⁴ப்பகாஸனானி ஆபத்திதே³ஸனாஸங்கா²தானங் வினயகம்மானமேதங் அதி⁴வசனங். அனாபத்தியா தி³ட்டி²ங் ஆவி கரோதீதி அனாபத்திமேவ ஆபத்தீதி தே³ஸேதீதி அத்தோ² . அதே³ஸனாகா³மினியாதி க³ருகாபத்தியா தி³ட்டி²ங் ஆவிகரோதி; ஸங்கா⁴தி³ஸேஸஞ்ச பாராஜிகஞ்ச தே³ஸேதீதி அத்தோ². தே³ஸிதாயாதி லஹுகாபத்தியாபி தே³ஸிதாய தி³ட்டி²ங் ஆவிகரோதி; தே³ஸிதங் புன தே³ஸேதீதி அத்தோ².
425. Diṭṭhāvikammavagge – diṭṭhāvikammāti diṭṭhīnaṃ āvikammāni; laddhippakāsanāni āpattidesanāsaṅkhātānaṃ vinayakammānametaṃ adhivacanaṃ. Anāpattiyā diṭṭhiṃ āvi karotīti anāpattimeva āpattīti desetīti attho . Adesanāgāminiyāti garukāpattiyā diṭṭhiṃ āvikaroti; saṅghādisesañca pārājikañca desetīti attho. Desitāyāti lahukāpattiyāpi desitāya diṭṭhiṃ āvikaroti; desitaṃ puna desetīti attho.
சதூஹி பஞ்சஹி தி³ட்டி²ந்தி யதா² சதூஹி பஞ்சஹி தி³ட்டி² ஆவிகதா ஹோதி, ஏவங் ஆவிகரோதி; சத்தாரோ பஞ்ச ஜனா ஏகதோ ஆபத்திங் தே³ஸெந்தீதி அத்தோ². மனோமானஸேனாதி மனஸங்கா²தேன மானஸேன தி³ட்டி²ங் ஆவிகரோதி; வசீபே⁴த³ங் அகத்வா சித்தேனேவ ஆபத்திங் தே³ஸேதீதி அத்தோ².
Catūhi pañcahi diṭṭhinti yathā catūhi pañcahi diṭṭhi āvikatā hoti, evaṃ āvikaroti; cattāro pañca janā ekato āpattiṃ desentīti attho. Manomānasenāti manasaṅkhātena mānasena diṭṭhiṃ āvikaroti; vacībhedaṃ akatvā citteneva āpattiṃ desetīti attho.
நானாஸங்வாஸகஸ்ஸாதி லத்³தி⁴னானாஸங்வாஸகஸ்ஸ வா கம்மனானாஸங்வாஸகஸ்ஸ வா ஸந்திகே தி³ட்டி²ங் ஆவிகரோதி; ஆபத்திங் தே³ஸேதீதி அத்தோ². நானாஸீமாயாதி ஸமானஸங்வாஸகஸ்ஸாபி நானாஸீமாய டி²தஸ்ஸ ஸந்திகே ஆவிகரோதி. மாளகஸீமாய ஹி டி²தேன ஸீமந்தரிகாய டி²தஸ்ஸ ஸீமந்தரிகாய வா டி²தேன அவிப்பவாஸஸீமாய டி²தஸ்ஸாபி ஆபத்திங் தே³ஸேதுங் ந வட்டதி. அபகதத்தஸ்ஸாதி உக்கி²த்தகஸ்ஸ வா, யஸ்ஸ வா உபோஸத²பவாரணா ட²பிதா ஹொந்தி, தஸ்ஸ ஸந்திகே தே³ஸேதீதி அத்தோ².
Nānāsaṃvāsakassāti laddhinānāsaṃvāsakassa vā kammanānāsaṃvāsakassa vā santike diṭṭhiṃ āvikaroti; āpattiṃ desetīti attho. Nānāsīmāyāti samānasaṃvāsakassāpi nānāsīmāya ṭhitassa santike āvikaroti. Māḷakasīmāya hi ṭhitena sīmantarikāya ṭhitassa sīmantarikāya vā ṭhitena avippavāsasīmāya ṭhitassāpi āpattiṃ desetuṃ na vaṭṭati. Apakatattassāti ukkhittakassa vā, yassa vā uposathapavāraṇā ṭhapitā honti, tassa santike desetīti attho.
430. நாலங் ஓகாஸகம்மங் காதுந்தி ந பரியத்தங் காதுங்; ந காதப்³ப³ந்தி அத்தோ². இதா⁴பி அபகதத்தோ உக்கி²த்தகோ ச ட²பிதஉபோஸத²பவாரணோ ச. சாவனாதி⁴ப்பாயோதி ஸாஸனதோ சாவேதுகாமோ.
430.Nālaṃ okāsakammaṃ kātunti na pariyattaṃ kātuṃ; na kātabbanti attho. Idhāpi apakatatto ukkhittako ca ṭhapitauposathapavāraṇo ca. Cāvanādhippāyoti sāsanato cāvetukāmo.
432. மந்த³த்தா மோமூஹத்தாதி மந்த³பா⁴வேன மோமூஹபா⁴வேன விஸ்ஸஜ்ஜிதம்பி ஜானிதுங் அஸமத்தோ², கேவலங் அத்தனோ மோமூஹபா⁴வங் பகாஸெந்தோயேவ புச்ச²தி உம்மத்தகோ விய. பாபிச்சோ²தி ‘‘ஏவங் மங் ஜனோ ஸம்பா⁴வெஸ்ஸதீ’’தி பாபிகாய இச்சா²ய புச்ச²தி. பரிப⁴வாதி பரிப⁴வங் ஆரோபேதுகாமோ ஹுத்வா புச்ச²தி. அஞ்ஞப்³யாகரணேஸுபி ஏஸேவ நயோ. ஸேஸங் ஸப்³ப³த்த² உத்தானமேவாதி. அத்தாதா³னவக்³கே³ ச து⁴தங்க³வக்³கே³ ச யங் வத்தப்³ப³ங் ஸியா, தங் ஸப்³ப³ங் ஹெட்டா² வுத்தமேவ.
432.Mandattāmomūhattāti mandabhāvena momūhabhāvena vissajjitampi jānituṃ asamattho, kevalaṃ attano momūhabhāvaṃ pakāsentoyeva pucchati ummattako viya. Pāpicchoti ‘‘evaṃ maṃ jano sambhāvessatī’’ti pāpikāya icchāya pucchati. Paribhavāti paribhavaṃ āropetukāmo hutvā pucchati. Aññabyākaraṇesupi eseva nayo. Sesaṃ sabbattha uttānamevāti. Attādānavagge ca dhutaṅgavagge ca yaṃ vattabbaṃ siyā, taṃ sabbaṃ heṭṭhā vuttameva.
தி³ட்டா²விகம்மவக்³க³வண்ணனா நிட்டி²தா.
Diṭṭhāvikammavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 4. தி³ட்டா²விகம்மவக்³கோ³ • 4. Diṭṭhāvikammavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / தி³ட்டா²விகம்மவக்³க³வண்ணனா • Diṭṭhāvikammavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / தி³ட்டா²விகம்மவக்³க³வண்ணனா • Diṭṭhāvikammavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / வோஹாரவக்³கா³தி³வண்ணனா • Vohāravaggādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / தி³ட்டா²விகம்மவக்³க³வண்ணனா • Diṭṭhāvikammavaggavaṇṇanā
