| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
দিট্ঠাৰিকম্মৰগ্গৰণ্ণনা
Diṭṭhāvikammavaggavaṇṇanā
৪২৫. দিট্ঠাৰিকম্মৰগ্গে – দিট্ঠাৰিকম্মাতি দিট্ঠীনং আৰিকম্মানি; লদ্ধিপ্পকাসনানি আপত্তিদেসনাসঙ্খাতানং ৰিনযকম্মানমেতং অধিৰচনং। অনাপত্তিযা দিট্ঠিং আৰি করোতীতি অনাপত্তিমেৰ আপত্তীতি দেসেতীতি অত্থো । অদেসনাগামিনিযাতি গরুকাপত্তিযা দিট্ঠিং আৰিকরোতি; সঙ্ঘাদিসেসঞ্চ পারাজিকঞ্চ দেসেতীতি অত্থো। দেসিতাযাতি লহুকাপত্তিযাপি দেসিতায দিট্ঠিং আৰিকরোতি; দেসিতং পুন দেসেতীতি অত্থো।
425. Diṭṭhāvikammavagge – diṭṭhāvikammāti diṭṭhīnaṃ āvikammāni; laddhippakāsanāni āpattidesanāsaṅkhātānaṃ vinayakammānametaṃ adhivacanaṃ. Anāpattiyā diṭṭhiṃ āvi karotīti anāpattimeva āpattīti desetīti attho . Adesanāgāminiyāti garukāpattiyā diṭṭhiṃ āvikaroti; saṅghādisesañca pārājikañca desetīti attho. Desitāyāti lahukāpattiyāpi desitāya diṭṭhiṃ āvikaroti; desitaṃ puna desetīti attho.
চতূহি পঞ্চহি দিট্ঠিন্তি যথা চতূহি পঞ্চহি দিট্ঠি আৰিকতা হোতি, এৰং আৰিকরোতি; চত্তারো পঞ্চ জনা একতো আপত্তিং দেসেন্তীতি অত্থো। মনোমানসেনাতি মনসঙ্খাতেন মানসেন দিট্ঠিং আৰিকরোতি; ৰচীভেদং অকত্ৰা চিত্তেনেৰ আপত্তিং দেসেতীতি অত্থো।
Catūhi pañcahi diṭṭhinti yathā catūhi pañcahi diṭṭhi āvikatā hoti, evaṃ āvikaroti; cattāro pañca janā ekato āpattiṃ desentīti attho. Manomānasenāti manasaṅkhātena mānasena diṭṭhiṃ āvikaroti; vacībhedaṃ akatvā citteneva āpattiṃ desetīti attho.
নানাসংৰাসকস্সাতি লদ্ধিনানাসংৰাসকস্স ৰা কম্মনানাসংৰাসকস্স ৰা সন্তিকে দিট্ঠিং আৰিকরোতি; আপত্তিং দেসেতীতি অত্থো। নানাসীমাযাতি সমানসংৰাসকস্সাপি নানাসীমায ঠিতস্স সন্তিকে আৰিকরোতি। মাল়কসীমায হি ঠিতেন সীমন্তরিকায ঠিতস্স সীমন্তরিকায ৰা ঠিতেন অৰিপ্পৰাসসীমায ঠিতস্সাপি আপত্তিং দেসেতুং ন ৰট্টতি। অপকতত্তস্সাতি উক্খিত্তকস্স ৰা, যস্স ৰা উপোসথপৰারণা ঠপিতা হোন্তি, তস্স সন্তিকে দেসেতীতি অত্থো।
Nānāsaṃvāsakassāti laddhinānāsaṃvāsakassa vā kammanānāsaṃvāsakassa vā santike diṭṭhiṃ āvikaroti; āpattiṃ desetīti attho. Nānāsīmāyāti samānasaṃvāsakassāpi nānāsīmāya ṭhitassa santike āvikaroti. Māḷakasīmāya hi ṭhitena sīmantarikāya ṭhitassa sīmantarikāya vā ṭhitena avippavāsasīmāya ṭhitassāpi āpattiṃ desetuṃ na vaṭṭati. Apakatattassāti ukkhittakassa vā, yassa vā uposathapavāraṇā ṭhapitā honti, tassa santike desetīti attho.
৪৩০. নালং ওকাসকম্মং কাতুন্তি ন পরিযত্তং কাতুং; ন কাতব্বন্তি অত্থো। ইধাপি অপকতত্তো উক্খিত্তকো চ ঠপিতউপোসথপৰারণো চ। চাৰনাধিপ্পাযোতি সাসনতো চাৰেতুকামো।
430.Nālaṃ okāsakammaṃ kātunti na pariyattaṃ kātuṃ; na kātabbanti attho. Idhāpi apakatatto ukkhittako ca ṭhapitauposathapavāraṇo ca. Cāvanādhippāyoti sāsanato cāvetukāmo.
৪৩২. মন্দত্তা মোমূহত্তাতি মন্দভাৰেন মোমূহভাৰেন ৰিস্সজ্জিতম্পি জানিতুং অসমত্থো, কেৰলং অত্তনো মোমূহভাৰং পকাসেন্তোযেৰ পুচ্ছতি উম্মত্তকো ৰিয। পাপিচ্ছোতি ‘‘এৰং মং জনো সম্ভাৰেস্সতী’’তি পাপিকায ইচ্ছায পুচ্ছতি। পরিভৰাতি পরিভৰং আরোপেতুকামো হুত্ৰা পুচ্ছতি। অঞ্ঞব্যাকরণেসুপি এসেৰ নযো। সেসং সব্বত্থ উত্তানমেৰাতি। অত্তাদানৰগ্গে চ ধুতঙ্গৰগ্গে চ যং ৰত্তব্বং সিযা, তং সব্বং হেট্ঠা ৰুত্তমেৰ।
432.Mandattāmomūhattāti mandabhāvena momūhabhāvena vissajjitampi jānituṃ asamattho, kevalaṃ attano momūhabhāvaṃ pakāsentoyeva pucchati ummattako viya. Pāpicchoti ‘‘evaṃ maṃ jano sambhāvessatī’’ti pāpikāya icchāya pucchati. Paribhavāti paribhavaṃ āropetukāmo hutvā pucchati. Aññabyākaraṇesupi eseva nayo. Sesaṃ sabbattha uttānamevāti. Attādānavagge ca dhutaṅgavagge ca yaṃ vattabbaṃ siyā, taṃ sabbaṃ heṭṭhā vuttameva.
দিট্ঠাৰিকম্মৰগ্গৰণ্ণনা নিট্ঠিতা।
Diṭṭhāvikammavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৪. দিট্ঠাৰিকম্মৰগ্গো • 4. Diṭṭhāvikammavaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / দিট্ঠাৰিকম্মৰগ্গৰণ্ণনা • Diṭṭhāvikammavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / দিট্ঠাৰিকম্মৰগ্গৰণ্ণনা • Diṭṭhāvikammavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৰোহারৰগ্গাদিৰণ্ণনা • Vohāravaggādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / দিট্ঠাৰিকম্মৰগ্গৰণ্ণনা • Diṭṭhāvikammavaggavaṇṇanā
