| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
দিট্ঠাৰিকম্মৰগ্গৰণ্ণনা
Diṭṭhāvikammavaggavaṇṇanā
৪২৫. দিট্ঠাৰিকম্মৰগ্গে দিট্ঠাৰিকম্মাতি এত্থ আৰি করীযতে আৰিকম্মং, দিট্ঠীনং আৰিকম্মং দিট্ঠাৰিকম্মন্তি দস্সেন্তো আহ ‘‘দিট্ঠীনং আৰিকম্মানী’’তি। ‘‘লদ্ধিপকাসনান’’ন্তি ইমিনা দিট্ঠিসদ্দো লদ্ধিপরিযাযো, আৰিকম্মসদ্দো পকাসনপরিযাযোতি দস্সেতি। এতন্তি ‘‘দিট্ঠাৰিকম্মা’’তি নামং। অদেসনাগামিনী নাম অত্থতো গরুকন্তি আহ ‘‘গরুকাপত্তিযা’’তি। লহুকাযপীতি পিসদ্দো গরহত্থো। লহুকাযপি দেসিতায দিট্ঠাৰিকম্মং অধম্মিকং হোতি, পগেৰ গরুকাযাতি অত্থো।
425. Diṭṭhāvikammavagge diṭṭhāvikammāti ettha āvi karīyate āvikammaṃ, diṭṭhīnaṃ āvikammaṃ diṭṭhāvikammanti dassento āha ‘‘diṭṭhīnaṃ āvikammānī’’ti. ‘‘Laddhipakāsanāna’’nti iminā diṭṭhisaddo laddhipariyāyo, āvikammasaddo pakāsanapariyāyoti dasseti. Etanti ‘‘diṭṭhāvikammā’’ti nāmaṃ. Adesanāgāminī nāma atthato garukanti āha ‘‘garukāpattiyā’’ti. Lahukāyapīti pisaddo garahattho. Lahukāyapi desitāya diṭṭhāvikammaṃ adhammikaṃ hoti, pageva garukāyāti attho.
যথা …পে॰… হোতীতি যথা আৰিকতে চতূহি পঞ্চহি একীভূতেহি আৰিকতা হোতীতি যোজনা। চতূহি পঞ্চহীতি অন্তিমপরিচ্ছেদদস্সনং। ততো অতিরেকেহিপি একতো দেসেতুং ন ৰট্টতি, দেসিতা চ আপত্তি ন ৰুট্ঠাতি, দেসনাপচ্চযা দুক্কটঞ্চ হোতি। ‘‘চতূহি পঞ্চহী’’তি অন্তিমপরিচ্ছেদস্স দস্সিতত্তা দ্ৰীহি তীহি পন একতো দেসেতুং ৰট্টতীতি দট্ঠব্বং। মনোমানসেনাতি এত্থ মনোসদ্দেন মানসসদ্দস্স রাগঅরহত্তেসুপি পৰত্তনতো তদত্থে পটিক্খিপিত্ৰা চিত্তে এৰ ৰত্ততীতি দস্সেতি। তেন ৰুত্তং ‘‘মনসঙ্খাতেন মানসেনা’’তি। ইমিনা মনভূতং মানসং মনোমানসন্তি ৰচনত্থং দস্সেতি।
Yathā…pe… hotīti yathā āvikate catūhi pañcahi ekībhūtehi āvikatā hotīti yojanā. Catūhi pañcahīti antimaparicchedadassanaṃ. Tato atirekehipi ekato desetuṃ na vaṭṭati, desitā ca āpatti na vuṭṭhāti, desanāpaccayā dukkaṭañca hoti. ‘‘Catūhi pañcahī’’ti antimaparicchedassa dassitattā dvīhi tīhi pana ekato desetuṃ vaṭṭatīti daṭṭhabbaṃ. Manomānasenāti ettha manosaddena mānasasaddassa rāgaarahattesupi pavattanato tadatthe paṭikkhipitvā citte eva vattatīti dasseti. Tena vuttaṃ ‘‘manasaṅkhātena mānasenā’’ti. Iminā manabhūtaṃ mānasaṃ manomānasanti vacanatthaṃ dasseti.
সমানসংৰাসকস্সাপীতি পিসদ্দো সমানসংৰাসকস্সপি নানাসীমায ঠিতস্স সন্তিকে আৰিকম্মং অধম্মিকং হোতি, পগেৰ নানাসংৰাসকস্সাতি দস্সেতি। মাল়কসীমাযাতি খণ্ডসীমায অঙ্গণে। অৰিপ্পৰাসসীমাযাতি মহাসীমায, ঠিতস্সাপি সন্তিকেতি সম্বন্ধো। পিসদ্দেন ‘‘খণ্ডসীমায ঠিতস্সপী’’তি অত্থং সম্পিণ্ডেতি।
Samānasaṃvāsakassāpīti pisaddo samānasaṃvāsakassapi nānāsīmāya ṭhitassa santike āvikammaṃ adhammikaṃ hoti, pageva nānāsaṃvāsakassāti dasseti. Māḷakasīmāyāti khaṇḍasīmāya aṅgaṇe. Avippavāsasīmāyāti mahāsīmāya, ṭhitassāpi santiketi sambandho. Pisaddena ‘‘khaṇḍasīmāya ṭhitassapī’’ti atthaṃ sampiṇḍeti.
৪৩০. ন পরিযত্তন্তি ন সমত্থং। ইমিনা নালন্তি এত্থ অলংসদ্দো পরিযত্তত্থোৰ, নারহভূসনৰারণত্থোতি দস্সেতি। ইধাপীতি পঞ্চকেপি। পিসদ্দেন পুরিমপঞ্চকং অপেক্খতি। ‘‘সাসনতো’’তি ইমিনা চুধাতুযা অপাদানং দস্সেতি। ‘‘কামো’’তি ইমিনা অধিপ্পাযসদ্দো কামপরিযাযোতি দস্সেতি।
430.Na pariyattanti na samatthaṃ. Iminā nālanti ettha alaṃsaddo pariyattatthova, nārahabhūsanavāraṇatthoti dasseti. Idhāpīti pañcakepi. Pisaddena purimapañcakaṃ apekkhati. ‘‘Sāsanato’’ti iminā cudhātuyā apādānaṃ dasseti. ‘‘Kāmo’’ti iminā adhippāyasaddo kāmapariyāyoti dasseti.
৪৩২. মন্দত্তা মোমূহত্তাতি এত্থ ত্তপচ্চযস্স ভাৰত্থে, পঞ্চমীৰিভত্তিযা চ কারণত্থে পৰত্তভাৰং দস্সেন্তো আহ ‘‘মন্দভাৰেন মোমূহভাৰেনা’’তি। পরিভৰাতি এত্থ পরিভৰকামাতি অত্থং দস্সেন্তো আহ ‘‘পরিভৰং আরোপেতুকামো হুত্ৰা’’তি। অঞ্ঞব্যাকরণেসুপীতি অরহত্তব্যাকরণেসুপি। সব্বত্থাতি দিট্ঠাৰিকম্মৰগ্গে। যন্তি ৰচনং।
432.Mandattā momūhattāti ettha ttapaccayassa bhāvatthe, pañcamīvibhattiyā ca kāraṇatthe pavattabhāvaṃ dassento āha ‘‘mandabhāvena momūhabhāvenā’’ti. Paribhavāti ettha paribhavakāmāti atthaṃ dassento āha ‘‘paribhavaṃ āropetukāmo hutvā’’ti. Aññabyākaraṇesupīti arahattabyākaraṇesupi. Sabbatthāti diṭṭhāvikammavagge. Yanti vacanaṃ.
ইতি দিট্ঠাৰিকম্মৰগ্গৰণ্ণনায যোজনা সমত্তা।
Iti diṭṭhāvikammavaggavaṇṇanāya yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৪. দিট্ঠাৰিকম্মৰগ্গো • 4. Diṭṭhāvikammavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / দিট্ঠাৰিকম্মৰগ্গৰণ্ণনা • Diṭṭhāvikammavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / দিট্ঠাৰিকম্মৰগ্গৰণ্ণনা • Diṭṭhāvikammavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / দিট্ঠাৰিকম্মৰগ্গৰণ্ণনা • Diṭṭhāvikammavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৰোহারৰগ্গাদিৰণ্ণনা • Vohāravaggādivaṇṇanā
