| Library / Tipiṭaka / ติปิฎก • Tipiṭaka / ปริวาร-อฎฺฐกถา • Parivāra-aṭṭhakathā |
ทิฎฺฐาวิกมฺมวคฺควณฺณนา
Diṭṭhāvikammavaggavaṇṇanā
๔๒๕. ทิฎฺฐาวิกมฺมวเคฺค – ทิฎฺฐาวิกมฺมาติ ทิฎฺฐีนํ อาวิกมฺมานิ; ลทฺธิปฺปกาสนานิ อาปตฺติเทสนาสงฺขาตานํ วินยกมฺมานเมตํ อธิวจนํฯ อนาปตฺติยา ทิฎฺฐิํ อาวิ กโรตีติ อนาปตฺติเมว อาปตฺตีติ เทเสตีติ อโตฺถ ฯ อเทสนาคามินิยาติ ครุกาปตฺติยา ทิฎฺฐิํ อาวิกโรติ; สงฺฆาทิเสสญฺจ ปาราชิกญฺจ เทเสตีติ อโตฺถฯ เทสิตายาติ ลหุกาปตฺติยาปิ เทสิตาย ทิฎฺฐิํ อาวิกโรติ; เทสิตํ ปุน เทเสตีติ อโตฺถฯ
425. Diṭṭhāvikammavagge – diṭṭhāvikammāti diṭṭhīnaṃ āvikammāni; laddhippakāsanāni āpattidesanāsaṅkhātānaṃ vinayakammānametaṃ adhivacanaṃ. Anāpattiyā diṭṭhiṃ āvi karotīti anāpattimeva āpattīti desetīti attho . Adesanāgāminiyāti garukāpattiyā diṭṭhiṃ āvikaroti; saṅghādisesañca pārājikañca desetīti attho. Desitāyāti lahukāpattiyāpi desitāya diṭṭhiṃ āvikaroti; desitaṃ puna desetīti attho.
จตูหิ ปญฺจหิ ทิฎฺฐินฺติ ยถา จตูหิ ปญฺจหิ ทิฎฺฐิ อาวิกตา โหติ, เอวํ อาวิกโรติ; จตฺตาโร ปญฺจ ชนา เอกโต อาปตฺติํ เทเสนฺตีติ อโตฺถฯ มโนมานเสนาติ มนสงฺขาเตน มานเสน ทิฎฺฐิํ อาวิกโรติ; วจีเภทํ อกตฺวา จิเตฺตเนว อาปตฺติํ เทเสตีติ อโตฺถฯ
Catūhi pañcahi diṭṭhinti yathā catūhi pañcahi diṭṭhi āvikatā hoti, evaṃ āvikaroti; cattāro pañca janā ekato āpattiṃ desentīti attho. Manomānasenāti manasaṅkhātena mānasena diṭṭhiṃ āvikaroti; vacībhedaṃ akatvā citteneva āpattiṃ desetīti attho.
นานาสํวาสกสฺสาติ ลทฺธินานาสํวาสกสฺส วา กมฺมนานาสํวาสกสฺส วา สนฺติเก ทิฎฺฐิํ อาวิกโรติ; อาปตฺติํ เทเสตีติ อโตฺถฯ นานาสีมายาติ สมานสํวาสกสฺสาปิ นานาสีมาย ฐิตสฺส สนฺติเก อาวิกโรติฯ มาฬกสีมาย หิ ฐิเตน สีมนฺตริกาย ฐิตสฺส สีมนฺตริกาย วา ฐิเตน อวิปฺปวาสสีมาย ฐิตสฺสาปิ อาปตฺติํ เทเสตุํ น วฎฺฎติฯ อปกตตฺตสฺสาติ อุกฺขิตฺตกสฺส วา, ยสฺส วา อุโปสถปวารณา ฐปิตา โหนฺติ, ตสฺส สนฺติเก เทเสตีติ อโตฺถฯ
Nānāsaṃvāsakassāti laddhinānāsaṃvāsakassa vā kammanānāsaṃvāsakassa vā santike diṭṭhiṃ āvikaroti; āpattiṃ desetīti attho. Nānāsīmāyāti samānasaṃvāsakassāpi nānāsīmāya ṭhitassa santike āvikaroti. Māḷakasīmāya hi ṭhitena sīmantarikāya ṭhitassa sīmantarikāya vā ṭhitena avippavāsasīmāya ṭhitassāpi āpattiṃ desetuṃ na vaṭṭati. Apakatattassāti ukkhittakassa vā, yassa vā uposathapavāraṇā ṭhapitā honti, tassa santike desetīti attho.
๔๓๐. นาลํ โอกาสกมฺมํ กาตุนฺติ น ปริยตฺตํ กาตุํ; น กาตพฺพนฺติ อโตฺถฯ อิธาปิ อปกตโตฺต อุกฺขิตฺตโก จ ฐปิตอุโปสถปวารโณ จฯ จาวนาธิปฺปาโยติ สาสนโต จาเวตุกาโมฯ
430.Nālaṃ okāsakammaṃ kātunti na pariyattaṃ kātuṃ; na kātabbanti attho. Idhāpi apakatatto ukkhittako ca ṭhapitauposathapavāraṇo ca. Cāvanādhippāyoti sāsanato cāvetukāmo.
๔๓๒. มนฺทตฺตา โมมูหตฺตาติ มนฺทภาเวน โมมูหภาเวน วิสฺสชฺชิตมฺปิ ชานิตุํ อสมโตฺถ, เกวลํ อตฺตโน โมมูหภาวํ ปกาเสโนฺตเยว ปุจฺฉติ อุมฺมตฺตโก วิยฯ ปาปิโจฺฉติ ‘‘เอวํ มํ ชโน สมฺภาเวสฺสตี’’ติ ปาปิกาย อิจฺฉาย ปุจฺฉติฯ ปริภวาติ ปริภวํ อาโรเปตุกาโม หุตฺวา ปุจฺฉติฯ อญฺญพฺยากรเณสุปิ เอเสว นโยฯ เสสํ สพฺพตฺถ อุตฺตานเมวาติฯ อตฺตาทานวเคฺค จ ธุตงฺควเคฺค จ ยํ วตฺตพฺพํ สิยา, ตํ สพฺพํ เหฎฺฐา วุตฺตเมวฯ
432.Mandattāmomūhattāti mandabhāvena momūhabhāvena vissajjitampi jānituṃ asamattho, kevalaṃ attano momūhabhāvaṃ pakāsentoyeva pucchati ummattako viya. Pāpicchoti ‘‘evaṃ maṃ jano sambhāvessatī’’ti pāpikāya icchāya pucchati. Paribhavāti paribhavaṃ āropetukāmo hutvā pucchati. Aññabyākaraṇesupi eseva nayo. Sesaṃ sabbattha uttānamevāti. Attādānavagge ca dhutaṅgavagge ca yaṃ vattabbaṃ siyā, taṃ sabbaṃ heṭṭhā vuttameva.
ทิฎฺฐาวิกมฺมวคฺควณฺณนา นิฎฺฐิตาฯ
Diṭṭhāvikammavaggavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / ปริวารปาฬิ • Parivārapāḷi / ๔. ทิฎฺฐาวิกมฺมวโคฺค • 4. Diṭṭhāvikammavaggo
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ทิฎฺฐาวิกมฺมวคฺควณฺณนา • Diṭṭhāvikammavaggavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ทิฎฺฐาวิกมฺมวคฺควณฺณนา • Diṭṭhāvikammavaggavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / โวหารวคฺคาทิวณฺณนา • Vohāravaggādivaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / ทิฎฺฐาวิกมฺมวคฺควณฺณนา • Diṭṭhāvikammavaggavaṇṇanā
