| Library / Tipiṭaka / තිපිටක • Tipiṭaka / පරිවාර-අට්‌ඨකථා • Parivāra-aṭṭhakathā |
දිට්‌ඨාවිකම්‌මවග්‌ගවණ්‌ණනා
Diṭṭhāvikammavaggavaṇṇanā
425. දිට්‌ඨාවිකම්‌මවග්‌ගෙ – දිට්‌ඨාවිකම්‌මාති දිට්‌ඨීනං ආවිකම්‌මානි; ලද්‌ධිප්‌පකාසනානි ආපත්‌තිදෙසනාසඞ්‌ඛාතානං විනයකම්‌මානමෙතං අධිවචනං. අනාපත්‌තියා දිට්‌ඨිං ආවි කරොතීති අනාපත්‌තිමෙව ආපත්‌තීති දෙසෙතීති අත්‌ථො . අදෙසනාගාමිනියාති ගරුකාපත්‌තියා දිට්‌ඨිං ආවිකරොති; සඞ්‌ඝාදිසෙසඤ්‌ච පාරාජිකඤ්‌ච දෙසෙතීති අත්‌ථො. දෙසිතායාති ලහුකාපත්‌තියාපි දෙසිතාය දිට්‌ඨිං ආවිකරොති; දෙසිතං පුන දෙසෙතීති අත්‌ථො.
425. Diṭṭhāvikammavagge – diṭṭhāvikammāti diṭṭhīnaṃ āvikammāni; laddhippakāsanāni āpattidesanāsaṅkhātānaṃ vinayakammānametaṃ adhivacanaṃ. Anāpattiyā diṭṭhiṃ āvi karotīti anāpattimeva āpattīti desetīti attho . Adesanāgāminiyāti garukāpattiyā diṭṭhiṃ āvikaroti; saṅghādisesañca pārājikañca desetīti attho. Desitāyāti lahukāpattiyāpi desitāya diṭṭhiṃ āvikaroti; desitaṃ puna desetīti attho.
චතූහි පඤ්‌චහි දිට්‌ඨින්‌ති යථා චතූහි පඤ්‌චහි දිට්‌ඨි ආවිකතා හොති, එවං ආවිකරොති; චත්‌තාරො පඤ්‌ච ජනා එකතො ආපත්‌තිං දෙසෙන්‌තීති අත්‌ථො. මනොමානසෙනාති මනසඞ්‌ඛාතෙන මානසෙන දිට්‌ඨිං ආවිකරොති; වචීභෙදං අකත්‌වා චිත්‌තෙනෙව ආපත්‌තිං දෙසෙතීති අත්‌ථො.
Catūhi pañcahi diṭṭhinti yathā catūhi pañcahi diṭṭhi āvikatā hoti, evaṃ āvikaroti; cattāro pañca janā ekato āpattiṃ desentīti attho. Manomānasenāti manasaṅkhātena mānasena diṭṭhiṃ āvikaroti; vacībhedaṃ akatvā citteneva āpattiṃ desetīti attho.
නානාසංවාසකස්‌සාති ලද්‌ධිනානාසංවාසකස්‌ස වා කම්‌මනානාසංවාසකස්‌ස වා සන්‌තිකෙ දිට්‌ඨිං ආවිකරොති; ආපත්‌තිං දෙසෙතීති අත්‌ථො. නානාසීමායාති සමානසංවාසකස්‌සාපි නානාසීමාය ඨිතස්‌ස සන්‌තිකෙ ආවිකරොති. මාළකසීමාය හි ඨිතෙන සීමන්‌තරිකාය ඨිතස්‌ස සීමන්‌තරිකාය වා ඨිතෙන අවිප්‌පවාසසීමාය ඨිතස්‌සාපි ආපත්‌තිං දෙසෙතුං න වට්‌ටති. අපකතත්‌තස්‌සාති උක්‌ඛිත්‌තකස්‌ස වා, යස්‌ස වා උපොසථපවාරණා ඨපිතා හොන්‌ති, තස්‌ස සන්‌තිකෙ දෙසෙතීති අත්‌ථො.
Nānāsaṃvāsakassāti laddhinānāsaṃvāsakassa vā kammanānāsaṃvāsakassa vā santike diṭṭhiṃ āvikaroti; āpattiṃ desetīti attho. Nānāsīmāyāti samānasaṃvāsakassāpi nānāsīmāya ṭhitassa santike āvikaroti. Māḷakasīmāya hi ṭhitena sīmantarikāya ṭhitassa sīmantarikāya vā ṭhitena avippavāsasīmāya ṭhitassāpi āpattiṃ desetuṃ na vaṭṭati. Apakatattassāti ukkhittakassa vā, yassa vā uposathapavāraṇā ṭhapitā honti, tassa santike desetīti attho.
430. නාලං ඔකාසකම්‌මං කාතුන්‌ති න පරියත්‌තං කාතුං; න කාතබ්‌බන්‌ති අත්‌ථො. ඉධාපි අපකතත්‌තො උක්‌ඛිත්‌තකො ච ඨපිතඋපොසථපවාරණො ච. චාවනාධිප්‌පායොති සාසනතො චාවෙතුකාමො.
430.Nālaṃ okāsakammaṃ kātunti na pariyattaṃ kātuṃ; na kātabbanti attho. Idhāpi apakatatto ukkhittako ca ṭhapitauposathapavāraṇo ca. Cāvanādhippāyoti sāsanato cāvetukāmo.
432. මන්‌දත්‌තා මොමූහත්‌තාති මන්‌දභාවෙන මොමූහභාවෙන විස්‌සජ්‌ජිතම්‌පි ජානිතුං අසමත්‌ථො, කෙවලං අත්‌තනො මොමූහභාවං පකාසෙන්‌තොයෙව පුච්‌ඡති උම්‌මත්‌තකො විය. පාපිච්‌ඡොති ‘‘එවං මං ජනො සම්‌භාවෙස්‌සතී’’ති පාපිකාය ඉච්‌ඡාය පුච්‌ඡති. පරිභවාති පරිභවං ආරොපෙතුකාමො හුත්‌වා පුච්‌ඡති. අඤ්‌ඤබ්‍යාකරණෙසුපි එසෙව නයො. සෙසං සබ්‌බත්‌ථ උත්‌තානමෙවාති. අත්‌තාදානවග්‌ගෙ ච ධුතඞ්‌ගවග්‌ගෙ ච යං වත්‌තබ්‌බං සියා, තං සබ්‌බං හෙට්‌ඨා වුත්‌තමෙව.
432.Mandattāmomūhattāti mandabhāvena momūhabhāvena vissajjitampi jānituṃ asamattho, kevalaṃ attano momūhabhāvaṃ pakāsentoyeva pucchati ummattako viya. Pāpicchoti ‘‘evaṃ maṃ jano sambhāvessatī’’ti pāpikāya icchāya pucchati. Paribhavāti paribhavaṃ āropetukāmo hutvā pucchati. Aññabyākaraṇesupi eseva nayo. Sesaṃ sabbattha uttānamevāti. Attādānavagge ca dhutaṅgavagge ca yaṃ vattabbaṃ siyā, taṃ sabbaṃ heṭṭhā vuttameva.
දිට්‌ඨාවිකම්‌මවග්‌ගවණ්‌ණනා නිට්‌ඨිතා.
Diṭṭhāvikammavaggavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 4. දිට්‌ඨාවිකම්‌මවග්‌ගො • 4. Diṭṭhāvikammavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / දිට්‌ඨාවිකම්‌මවග්‌ගවණ්‌ණනා • Diṭṭhāvikammavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / දිට්‌ඨාවිකම්‌මවග්‌ගවණ්‌ණනා • Diṭṭhāvikammavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / වොහාරවග්‌ගාදිවණ්‌ණනා • Vohāravaggādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / දිට්‌ඨාවිකම්‌මවග්‌ගවණ්‌ණනා • Diṭṭhāvikammavaggavaṇṇanā
