| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༢. དིཊྛིསུཏྟཾ
2. Diṭṭhisuttaṃ
༢༢༢. ‘‘ཙཏཱུཧི, བྷིཀྑཝེ, དྷམྨེཧི སམནྣཱགཏོ བཱལོ ཨབྱཏྟོ ཨསཔྤུརིསོ ཁཏཾ ཨུཔཧཏཾ ཨཏྟཱནཾ པརིཧརཏི, སཱཝཛྫོ ཙ ཧོཏི སཱནུཝཛྫོ ཙ ཝིཉྙཱུནཾ; བཧུཉྩ ཨཔུཉྙཾ པསཝཏི། ཀཏམེཧི ཙཏཱུཧི? ཀཱཡདུཙྩརིཏེན, ཝཙཱིདུཙྩརིཏེན, མནོདུཙྩརིཏེན, མིཙྪཱདིཊྛིཡཱ – ཨིམེཧི ཁོ, བྷིཀྑཝེ, ཙཏཱུཧི དྷམྨེཧི སམནྣཱགཏོ བཱལོ ཨབྱཏྟོ ཨསཔྤུརིསོ ཁཏཾ ཨུཔཧཏཾ ཨཏྟཱནཾ པརིཧརཏི, སཱཝཛྫོ ཙ ཧོཏི སཱནུཝཛྫོ ཙ ཝིཉྙཱུནཾ, བཧུཉྩ ཨཔུཉྙཾ པསཝཏི།
222. ‘‘Catūhi, bhikkhave, dhammehi samannāgato bālo abyatto asappuriso khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ; bahuñca apuññaṃ pasavati. Katamehi catūhi? Kāyaduccaritena, vacīduccaritena, manoduccaritena, micchādiṭṭhiyā – imehi kho, bhikkhave, catūhi dhammehi samannāgato bālo abyatto asappuriso khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ, bahuñca apuññaṃ pasavati.
‘‘ཙཏཱུཧི, བྷིཀྑཝེ, དྷམྨེཧི སམནྣཱགཏོ པཎྜིཏོ ཝིཡཏྟོ སཔྤུརིསོ ཨཀྑཏཾ ཨནུཔཧཏཾ ཨཏྟཱནཾ པརིཧརཏི, ཨནཝཛྫོ ཙ ཧོཏི ཨནནུཝཛྫོ ཝིཉྙཱུནཾ, བཧུཉྩ པུཉྙཾ པསཝཏི། ཀཏམེཧི ཙཏཱུཧི? ཀཱཡསུཙརིཏེན, ཝཙཱིསུཙརིཏེན, མནོསུཙརིཏེན, སམྨཱདིཊྛིཡཱ – ཨིམེཧི ཁོ, བྷིཀྑཝེ, ཙཏཱུཧི དྷམྨེཧི སམནྣཱགཏོ པཎྜིཏོ ཝིཡཏྟོ སཔྤུརིསོ ཨཀྑཏཾ ཨནུཔཧཏཾ ཨཏྟཱནཾ པརིཧརཏི, ཨནཝཛྫོ ཙ ཧོཏི ཨནནུཝཛྫོ ཝིཉྙཱུནཾ; བཧུཉྩ པུཉྙཾ པསཝཏཱི’’ཏི། དུཏིཡཾ།
‘‘Catūhi, bhikkhave, dhammehi samannāgato paṇḍito viyatto sappuriso akkhataṃ anupahataṃ attānaṃ pariharati, anavajjo ca hoti ananuvajjo viññūnaṃ, bahuñca puññaṃ pasavati. Katamehi catūhi? Kāyasucaritena, vacīsucaritena, manosucaritena, sammādiṭṭhiyā – imehi kho, bhikkhave, catūhi dhammehi samannāgato paṇḍito viyatto sappuriso akkhataṃ anupahataṃ attānaṃ pariharati, anavajjo ca hoti ananuvajjo viññūnaṃ; bahuñca puññaṃ pasavatī’’ti. Dutiyaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / (༢༣) ༣. དུཙྩརིཏཝགྒཝཎྞནཱ • (23) 3. Duccaritavaggavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / (༢༣) ༣. དུཙྩརིཏཝགྒཝཎྞནཱ • (23) 3. Duccaritavaggavaṇṇanā
