| Library / Tipiṭaka / திபிடக • Tipiṭaka / வினயாலங்கார-டீகா • Vinayālaṅkāra-ṭīkā |
1. தி³வாஸெய்யவினிச்ச²யகதா²
1. Divāseyyavinicchayakathā
1. ஏவங் பாளிமுத்தவினிச்ச²யகதா²னங் மாதிகங் ட²பெத்வா இதா³னி யதா²ட²பிதமாதிகானுக்கமேன நித்³தி³ஸந்தோ ‘‘தத்த² தி³வாஸெய்யாதி தி³வானிபஜ்ஜன’’ந்திஆதி³மாஹ. தத்த² தத்தா²தி தேஸு மாதிகாபதே³ஸு ஸமபி⁴னிவிட்ட²ஸ்ஸ ‘‘தி³வாஸெய்யா’’தி பத³ஸ்ஸ ‘‘தி³வானிபஜ்ஜன’’ந்தி அத்தோ² த³ட்ட²ப்³போ³தி யோஜனா. தத்த² தி³வா-ஸத்³தோ³ அஹவாசகோ ஆகாரந்தோ நிபாதோ. வுத்தஞ்ஹி அபி⁴தா⁴னப்பதீ³பிகாயங் ‘‘ஆனுகூல்யேது ஸத்³த⁴ஞ்ச, நத்தங் தோ³ஸோ தி³வா த்வஹே’’தி. ஸயனங் ஸெய்யா, கரஜகாயக³தரூபானங் உத்³த⁴ங் அனுக்³க³ந்த்வா தீ³க⁴வஸேன வித்தா²ரதோ பவத்தனஸங்கா²தோ இரியாபத²விஸேஸோ. தி³வாகாலஸ்மிங் ஸெய்யா தி³வாஸெய்யா. அருணுக்³க³மனதோ பட்டா²ய யாவ ஸூரியத்த²ங்க³மனா, ஏதஸ்மிங் காலே ஸயனஇரியாபத²கரணந்தி. தேனாஹ ‘‘தி³வானிபஜ்ஜனந்தி அத்தோ²’’தி.
1. Evaṃ pāḷimuttavinicchayakathānaṃ mātikaṃ ṭhapetvā idāni yathāṭhapitamātikānukkamena niddisanto ‘‘tattha divāseyyāti divānipajjana’’ntiādimāha. Tattha tatthāti tesu mātikāpadesu samabhiniviṭṭhassa ‘‘divāseyyā’’ti padassa ‘‘divānipajjana’’nti attho daṭṭhabboti yojanā. Tattha divā-saddo ahavācako ākāranto nipāto. Vuttañhi abhidhānappadīpikāyaṃ ‘‘ānukūlyetu saddhañca, nattaṃ doso divā tvahe’’ti. Sayanaṃ seyyā, karajakāyagatarūpānaṃ uddhaṃ anuggantvā dīghavasena vitthārato pavattanasaṅkhāto iriyāpathaviseso. Divākālasmiṃ seyyā divāseyyā. Aruṇuggamanato paṭṭhāya yāva sūriyatthaṅgamanā, etasmiṃ kāle sayanairiyāpathakaraṇanti. Tenāha ‘‘divānipajjananti attho’’ti.
தத்ராதி தஸ்மிங் தி³வாஸயனே அயங் வக்க²மானோ வினிச்ச²யோ வேதி³தப்³போ³தி யோஜனா. ‘‘அனுஜானாமி…பே॰… வசனதோ’’தி (பாரா॰ 77) அயங் பட²மபாராஜிகஸிக்கா²பத³ஸ்ஸ வினீதவத்தூ²ஸு ஆக³தோ ப⁴க³வதா ஆஹச்சபா⁴ஸிதோ ஞாபகபாடோ². தத்த² தி³வா படிஸல்லீயந்தேனாதி தி³வா நிபஜ்ஜந்தேன. த்³வாரங் ஸங்வரித்வா படிஸல்லீயிதுந்தி த்³வாரங் பித³ஹித்வா நிபஜ்ஜிதுங். ‘‘தி³வா…பே॰… நிபஜ்ஜிதப்³ப³ந்தி ஞாப்யங். நனு பாளியங் ‘‘அயங் நாம ஆபத்தீ’’தி ந வுத்தா, அத² கத²மெத்த² ஆபத்தி விஞ்ஞாயதீதி சோத³னங் ஸந்தா⁴யாஹ ‘‘எத்த² ச கிஞ்சாபீ’’திஆதி³. தத்த² எத்தா²தி ஏதஸ்மிங் தி³வானிபஜ்ஜனே. ச-ஸத்³தோ³ வாக்யாரம்ப⁴ஜோதகோ, கிஞ்சாபி-ஸத்³தோ³ நிபாதஸமுதா³யோ, யதி³பீத்யத்தோ². பாளியங் அயங் நாம ஆபத்தீதி கிஞ்சாபி ந வுத்தா, பன ததா²பி அஸங்வரித்வா நிபஜ்ஜந்தஸ்ஸ அட்ட²கதா²யங் (பாரா॰ அட்ட²॰ 1.77) து³க்கடங் யஸ்மா வுத்தங், தஸ்மா எத்த² ஆபத்தி விஞ்ஞாயதீதி யோஜனா. ஏவங் ஸந்தேபி அஸதி ப⁴க³வதோ வசனே கத²ங் அட்ட²கதா²யங் வுத்தங் ஸியாதி ஆஹ ‘‘விவரித்வா…பே॰… அனுஞ்ஞாதத்தா’’தி. ஏதேன ப⁴க³வதோ அனுஜானநம்பி தங் அகரொந்தஸ்ஸ ஆபத்திகாரணங் ஹோதீதி த³ஸ்ஸேதி.
Tatrāti tasmiṃ divāsayane ayaṃ vakkhamāno vinicchayo veditabboti yojanā. ‘‘Anujānāmi…pe… vacanato’’ti (pārā. 77) ayaṃ paṭhamapārājikasikkhāpadassa vinītavatthūsu āgato bhagavatā āhaccabhāsito ñāpakapāṭho. Tattha divā paṭisallīyantenāti divā nipajjantena. Dvāraṃ saṃvaritvā paṭisallīyitunti dvāraṃ pidahitvā nipajjituṃ. ‘‘Divā…pe… nipajjitabbanti ñāpyaṃ. Nanu pāḷiyaṃ ‘‘ayaṃ nāma āpattī’’ti na vuttā, atha kathamettha āpatti viññāyatīti codanaṃ sandhāyāha ‘‘ettha ca kiñcāpī’’tiādi. Tattha etthāti etasmiṃ divānipajjane. Ca-saddo vākyārambhajotako, kiñcāpi-saddo nipātasamudāyo, yadipītyattho. Pāḷiyaṃ ayaṃ nāma āpattīti kiñcāpi na vuttā, pana tathāpi asaṃvaritvā nipajjantassa aṭṭhakathāyaṃ (pārā. aṭṭha. 1.77) dukkaṭaṃ yasmā vuttaṃ, tasmā ettha āpatti viññāyatīti yojanā. Evaṃ santepi asati bhagavato vacane kathaṃ aṭṭhakathāyaṃ vuttaṃ siyāti āha ‘‘vivaritvā…pe… anuññātattā’’ti. Etena bhagavato anujānanampi taṃ akarontassa āpattikāraṇaṃ hotīti dasseti.
தத்த² ‘‘உப்பன்னே வத்து²ம்ஹீதி இத்தி²யா கதஅஜ்ஜா²சாரவத்து²ஸ்மி’’ந்தி விமதிவினோத³னியங் (வி॰ வி॰ டீ॰ 1.77) வுத்தங், ஸாரத்த²தீ³பனியங் (ஸாரத்த²॰ டீ॰ 2.77) பன ‘‘மேது²னவத்து²ஸ்மிங் உப்பன்னே’’தி வுத்தங், போராணடீகாயம்பி தமேவ க³ஹெத்வா ‘‘உப்பன்னே மேது²னவத்து²ஸ்மி’’ந்தி வுத்தங், ததே³தங் விசாரேதப்³ப³ங் மேது²னலக்க²ணஸ்ஸ அபா⁴வா. நனு ஸிக்கா²பத³பஞ்ஞாபனங் நாம பு³த்³த⁴விஸயோ, அத² கஸ்மா அட்ட²கதா²யங் து³க்கடங் வுத்தந்தி ஆஹ ‘‘ப⁴க³வதோ’’திஆதி³. ந கேவலங் உபாலித்தே²ராதீ³ஹி ஏவ அட்ட²கதா² ட²பிதா, அத² கோ² பாளிதோ ச அத்த²தோ ச பு³த்³தே⁴ன ப⁴க³வதா வுத்தோ. ந ஹி ப⁴க³வதா அப்³யாகதங் தந்திபத³ங் நாம அத்தி², ஸப்³பே³ஸங்யேவ அத்தோ² கதி²தோ, தஸ்மா ஸம்பு³த்³தே⁴னேவ திண்ணங் பிடகானங் அத்த²வண்ணனக்கமோபி பா⁴ஸிதோதி த³ட்ட²ப்³ப³ங். தத்த² தத்த² ஹி ப⁴க³வதா பவத்திதா பகிண்ணகதே³ஸனாயேவ அட்ட²கதா²தி.
Tattha ‘‘uppanne vatthumhīti itthiyā kataajjhācāravatthusmi’’nti vimativinodaniyaṃ (vi. vi. ṭī. 1.77) vuttaṃ, sāratthadīpaniyaṃ (sārattha. ṭī. 2.77) pana ‘‘methunavatthusmiṃ uppanne’’ti vuttaṃ, porāṇaṭīkāyampi tameva gahetvā ‘‘uppanne methunavatthusmi’’nti vuttaṃ, tadetaṃ vicāretabbaṃ methunalakkhaṇassa abhāvā. Nanu sikkhāpadapaññāpanaṃ nāma buddhavisayo, atha kasmā aṭṭhakathāyaṃ dukkaṭaṃ vuttanti āha ‘‘bhagavato’’tiādi. Na kevalaṃ upālittherādīhi eva aṭṭhakathā ṭhapitā, atha kho pāḷito ca atthato ca buddhena bhagavatā vutto. Na hi bhagavatā abyākataṃ tantipadaṃ nāma atthi, sabbesaṃyeva attho kathito, tasmā sambuddheneva tiṇṇaṃ piṭakānaṃ atthavaṇṇanakkamopi bhāsitoti daṭṭhabbaṃ. Tattha tattha hi bhagavatā pavattitā pakiṇṇakadesanāyeva aṭṭhakathāti.
கிங் பனெத்த² ஏதங் தி³வா த்³வாரங் அஸங்வரித்வா நிபஜ்ஜந்தஸ்ஸ து³க்கடாபத்திஆபஜ்ஜனங் அட்ட²கதா²யங் வுத்தத்தா ஏவ ஸித்³த⁴ங், உதா³ஹு அஞ்ஞேனபீதி ஆஹ ‘‘அத்தா²பத்தீ’’திஆதி³. ஏதங் து³க்கடாபத்திஆபஜ்ஜனங் ந கேவலங் அட்ட²கதா²யங் வுத்தத்தா ஏவ ஸித்³த⁴ங், அத² கோ² ‘‘அத்தா²பத்தி தி³வா ஆபஜ்ஜதி, நோ ரத்தி’’ந்தி (பரி॰ 323) இமினா பரிவாரபாடே²னபி ஸித்³த⁴ங் ஹோதீதி யோஜனா. கதரஸ்மிங் பன வத்து²ஸ்மிங் இத³ங் ஸிக்கா²பத³ங் வுத்தந்தி? ‘‘தேன கோ² பன ஸமயேன அஞ்ஞதரோ பி⁴க்கு² வேஸாலியங் மஹாவனே கூடாகா³ரஸாலாயங் தி³வா விஹாரக³தோ த்³வாரங் விவரித்வா நிபன்னோ அஹோஸி. தஸ்ஸ அங்க³மங்கா³னி வாதுபத்த²த்³தா⁴னி அஹேஸுங். தேன கோ² பன ஸமயேன ஸம்ப³ஹுலா இத்தி²யோ க³ந்த⁴ஞ்ச மாலஞ்ச ஆதா³ய விஹாரங் ஆக³மிங்ஸு விஹாரபெக்கி²காயோ. அத² கோ² தா இத்தி²யோ தங் பி⁴க்கு²ங் பஸ்ஸித்வா அங்க³ஜாதே அபி⁴னிஸீதி³த்வா யாவத³த்த²ங் கத்வா ‘புரிஸுஸபோ⁴ வதாய’ந்தி வத்வா க³ந்த⁴ஞ்ச மாலஞ்ச ஆரோபெத்வா பக்கமிங்ஸு. பி⁴க்கூ² கிலின்னங் பஸ்ஸித்வா ப⁴க³வதோ ஏதமத்த²ங் ஆரோசேஸுங். பஞ்சஹி, பி⁴க்க²வே, ஆகாரேஹி அங்க³ஜாதங் கம்மனியங் ஹோதி ராகே³ன, வச்சேன, பஸ்ஸாவேன, வாதேன, உச்சாலிங்க³பாணகத³ட்டே²ன. இமேஹி கோ², பி⁴க்க²வே, பஞ்சஹாகாரேஹி அங்க³ஜாதங் கம்மனியங் ஹோதி. அட்டா²னமேதங், பி⁴க்க²வே, அனவகாஸோ, யங் தஸ்ஸ பி⁴க்கு²னோ ராகே³ன அங்க³ஜாதங் கம்மனியங் அஸ்ஸ, அரஹங் ஸோ, பி⁴க்க²வே, பி⁴க்கு², அனாபத்தி பி⁴க்க²வே தஸ்ஸ பி⁴க்கு²னோ. அனுஜானாமி பி⁴க்க²வே தி³வா படிஸல்லீயந்தேன த்³வாரங் ஸங்வரித்வா படிஸல்லீயிது’’ந்தி (பாரா॰ 77) ஏதஸ்மிங் வத்து²ஸ்மிங் இத³ங் வுத்தந்தி த³ட்ட²ப்³ப³ங்.
Kiṃ panettha etaṃ divā dvāraṃ asaṃvaritvā nipajjantassa dukkaṭāpattiāpajjanaṃ aṭṭhakathāyaṃ vuttattā eva siddhaṃ, udāhu aññenapīti āha ‘‘atthāpattī’’tiādi. Etaṃ dukkaṭāpattiāpajjanaṃ na kevalaṃ aṭṭhakathāyaṃ vuttattā eva siddhaṃ, atha kho ‘‘atthāpatti divā āpajjati, no ratti’’nti (pari. 323) iminā parivārapāṭhenapi siddhaṃ hotīti yojanā. Katarasmiṃ pana vatthusmiṃ idaṃ sikkhāpadaṃ vuttanti? ‘‘Tena kho pana samayena aññataro bhikkhu vesāliyaṃ mahāvane kūṭāgārasālāyaṃ divā vihāragato dvāraṃ vivaritvā nipanno ahosi. Tassa aṅgamaṅgāni vātupatthaddhāni ahesuṃ. Tena kho pana samayena sambahulā itthiyo gandhañca mālañca ādāya vihāraṃ āgamiṃsu vihārapekkhikāyo. Atha kho tā itthiyo taṃ bhikkhuṃ passitvā aṅgajāte abhinisīditvā yāvadatthaṃ katvā ‘purisusabho vatāya’nti vatvā gandhañca mālañca āropetvā pakkamiṃsu. Bhikkhū kilinnaṃ passitvā bhagavato etamatthaṃ ārocesuṃ. Pañcahi, bhikkhave, ākārehi aṅgajātaṃ kammaniyaṃ hoti rāgena, vaccena, passāvena, vātena, uccāliṅgapāṇakadaṭṭhena. Imehi kho, bhikkhave, pañcahākārehi aṅgajātaṃ kammaniyaṃ hoti. Aṭṭhānametaṃ, bhikkhave, anavakāso, yaṃ tassa bhikkhuno rāgena aṅgajātaṃ kammaniyaṃ assa, arahaṃ so, bhikkhave, bhikkhu, anāpatti bhikkhave tassa bhikkhuno. Anujānāmi bhikkhave divā paṭisallīyantena dvāraṃ saṃvaritvā paṭisallīyitu’’nti (pārā. 77) etasmiṃ vatthusmiṃ idaṃ vuttanti daṭṭhabbaṃ.
2. இதா³னி த்³வாரவிஸேஸங் த³ஸ்ஸேதுங் ‘‘கீதி³ஸ’’ந்திஆதி³மாஹ. தத்த² பரிவத்தகத்³வாரமேவாதி ஸங்வரணவிவரணவஸேன இதோ சிதோ ச பரிவத்தனயொக்³க³த்³வாரமேவ. ருக்க²ஸூசிகண்டகத்³வாரந்தி ருக்க²ஸூசித்³வாரங் கண்டகத்³வாரஞ்ச. ‘‘ருக்க²ஸூசித்³வாரகண்டகத்³வார’’மிச்சேவ வா பாடோ². யங் உபோ⁴ஸு பஸ்ஸேஸு ருக்க²த்த²ம்பே⁴ நிக²னித்வா தத்த² விஜ்ஜி²த்வா மஜ்ஜே² த்³வே திஸ்ஸோ ருக்க²ஸூசியோ பவேஸெத்வா கரொந்தி, தங் ருக்க²ஸூசித்³வாரங் நாம. பவேஸனநிக்க²மனகாலே அபனெத்வா த²கனயொக்³க³ங் ஏகாய, ப³ஹூஹி வா கண்டகஸாகா²ஹி கதங் கண்டகத்³வாரங் நாம. கா³மத்³வாரஸ்ஸ பிதா⁴னத்த²ங் பத³ரேன வா கண்டகஸாகா²தீ³ஹி வா கதஸ்ஸ கவாடஸ்ஸ உது³க்க²லபாஸகரஹிததாய ஏகேன ஸங்வரிதுங் விவரிதுஞ்ச அஸக்குணெய்யஸ்ஸ ஹெட்டா² ஏகங் சக்கங் யோஜெந்தி, யேன பரிவத்தமானககவாடங் ஸுக²த²கனகங் ஹோதி, தங் ஸந்தா⁴ய வுத்தங் ‘‘சக்கலகயுத்தத்³வார’’ந்தி. சக்கமேவ ஹி லாதப்³ப³த்தே²ன ஸங்வரணவிவரணத்தா²ய க³ஹேதப்³ப³த்தே²ன சக்கலகங், தேன யுத்தகவாடம்பி சக்கலகங் நாம, தேன யுத்தத்³வாரங் சக்கலகயுத்தத்³வாரங்.
2. Idāni dvāravisesaṃ dassetuṃ ‘‘kīdisa’’ntiādimāha. Tattha parivattakadvāramevāti saṃvaraṇavivaraṇavasena ito cito ca parivattanayoggadvārameva. Rukkhasūcikaṇṭakadvāranti rukkhasūcidvāraṃ kaṇṭakadvārañca. ‘‘Rukkhasūcidvārakaṇṭakadvāra’’micceva vā pāṭho. Yaṃ ubhosu passesu rukkhatthambhe nikhanitvā tattha vijjhitvā majjhe dve tisso rukkhasūciyo pavesetvā karonti, taṃ rukkhasūcidvāraṃ nāma. Pavesananikkhamanakāle apanetvā thakanayoggaṃ ekāya, bahūhi vā kaṇṭakasākhāhi kataṃ kaṇṭakadvāraṃ nāma. Gāmadvārassa pidhānatthaṃ padarena vā kaṇṭakasākhādīhi vā katassa kavāṭassa udukkhalapāsakarahitatāya ekena saṃvarituṃ vivarituñca asakkuṇeyyassa heṭṭhā ekaṃ cakkaṃ yojenti, yena parivattamānakakavāṭaṃ sukhathakanakaṃ hoti, taṃ sandhāya vuttaṃ ‘‘cakkalakayuttadvāra’’nti. Cakkameva hi lātabbatthena saṃvaraṇavivaraṇatthāya gahetabbatthena cakkalakaṃ, tena yuttakavāṭampi cakkalakaṃ nāma, tena yuttadvāraṃ cakkalakayuttadvāraṃ.
மஹாத்³வாரேஸு பன த்³வே தீணி சக்கலகானி யோஜேதீதி ஆஹ ‘‘ப²லகேஸூ’’திஆதி³. கிடிகாஸூதி வேளுபேஸிகாதீ³ஹி கண்டகஸாகா²தீ³ஹி ச கதத²கனகேஸு. ஸங்ஸரணகிடிகத்³வாரந்தி சக்கலகயந்தேன ஸங்ஸரணகிடிகாயுத்தமஹாத்³வாரங். கொ³ப்பெ²த்வாதி ஆவுணித்வா, ரஜ்ஜூஹி க³ந்தெ²த்வா வா. ஏகங் து³ஸ்ஸஸாணித்³வாரமேவாதி எத்த² கிலஞ்ஜஸாணித்³வாரம்பி ஸங்க³ஹங் க³ச்ச²தி. வஜிரபு³த்³தி⁴டீகாயங் (வஜிர॰ டீ॰ பாராஜிக 76-77) பன ‘‘து³ஸ்ஸத்³வாரங் ஸாணித்³வாரஞ்ச து³ஸ்ஸஸாணித்³வாரங். து³ஸ்ஸஸாணி கிலஞ்ஜஸாணீதிஆதி³னா வுத்தங் ஸப்³ப³ம்பி து³ஸ்ஸஸாணியமேவ ஸங்க³ஹெத்வா வுத்தங், ஏகஸதி³ஸத்தா ஏகந்தி வுத்த’’ந்தி வுத்தங்.
Mahādvāresu pana dve tīṇi cakkalakāni yojetīti āha ‘‘phalakesū’’tiādi. Kiṭikāsūti veḷupesikādīhi kaṇṭakasākhādīhi ca katathakanakesu. Saṃsaraṇakiṭikadvāranti cakkalakayantena saṃsaraṇakiṭikāyuttamahādvāraṃ. Gopphetvāti āvuṇitvā, rajjūhi ganthetvā vā. Ekaṃ dussasāṇidvāramevāti ettha kilañjasāṇidvārampi saṅgahaṃ gacchati. Vajirabuddhiṭīkāyaṃ (vajira. ṭī. pārājika 76-77) pana ‘‘dussadvāraṃ sāṇidvārañca dussasāṇidvāraṃ. Dussasāṇi kilañjasāṇītiādinā vuttaṃ sabbampi dussasāṇiyameva saṅgahetvā vuttaṃ, ekasadisattā ekanti vutta’’nti vuttaṃ.
3. ஏவங் த்³வாரவிஸேஸங் த³ஸ்ஸெத்வா இதா³னி யத்தகேன த்³வாரங் ஸங்வுதங் ஹோதி, தங் பமாணங் த³ஸ்ஸேதுங் ‘‘கித்தகேன’’த்யாதி³மாஹ. தத்த² ஸூசீதி மஜ்ஜே² சி²த்³த³ங் கத்வா பவேஸிதா. க⁴டிகாதி உபரி யோஜிதா. இதா³னி யத்த² த்³வாரங் ஸங்வரித்வா நிபஜ்ஜிதுங் ந ஸக்கா ஹோதி, தத்த² காதப்³ப³விதி⁴ங் த³ஸ்ஸேதுங் ‘‘ஸசே ப³ஹூனங் வளஞ்ஜனட்டா²னங் ஹோதீ’’திஆதி³ வுத்தங். ப³ஹூனங் அவளஞ்ஜனட்டா²னேபி ஏகங் ஆபுச்சி²த்வா நிபஜ்ஜிதுங் வட்டதியேவ. அத² பி⁴க்கூ²…பே॰… நிஸின்னா ஹொந்தீதி இத³ங் தத்த² பி⁴க்கூ²னங் ஸன்னிஹிதபா⁴வத³ஸ்ஸனத்த²ங் வுத்தங், ந ஸேஸஇரியாபத²ஸமங்கி³தானிவத்தனத்த²ங், தஸ்மா நிபன்னேபி ஆபோ⁴க³ங் காதுங் வட்டதி. நிபஜ்ஜித்வா நித்³தா³யந்தே பன ஆபோ⁴க³ங் காதுங் ந வட்டதி. அஸந்தபக்கே² டி²தத்தா ரஹோ நிஸஜ்ஜாய விய த்³வாரஸங்வரணங் நாம மாதுகா³மானங் பவேஸனிவாரணத்த²ங் அனுஞ்ஞாதந்தி ஆஹ ‘‘கேவலங் பி⁴க்கு²னிங் வா’’திஆதி³.
3. Evaṃ dvāravisesaṃ dassetvā idāni yattakena dvāraṃ saṃvutaṃ hoti, taṃ pamāṇaṃ dassetuṃ ‘‘kittakena’’tyādimāha. Tattha sūcīti majjhe chiddaṃ katvā pavesitā. Ghaṭikāti upari yojitā. Idāni yattha dvāraṃ saṃvaritvā nipajjituṃ na sakkā hoti, tattha kātabbavidhiṃ dassetuṃ ‘‘sace bahūnaṃ vaḷañjanaṭṭhānaṃ hotī’’tiādi vuttaṃ. Bahūnaṃ avaḷañjanaṭṭhānepi ekaṃ āpucchitvā nipajjituṃ vaṭṭatiyeva. Atha bhikkhū…pe… nisinnā hontīti idaṃ tattha bhikkhūnaṃ sannihitabhāvadassanatthaṃ vuttaṃ, na sesairiyāpathasamaṅgitānivattanatthaṃ, tasmā nipannepi ābhogaṃ kātuṃ vaṭṭati. Nipajjitvā niddāyante pana ābhogaṃ kātuṃ na vaṭṭati. Asantapakkhe ṭhitattā raho nisajjāya viya dvārasaṃvaraṇaṃ nāma mātugāmānaṃ pavesanivāraṇatthaṃ anuññātanti āha ‘‘kevalaṃ bhikkhuniṃ vā’’tiādi.
எத்த² ச தங் யுத்தங், ஏவங் ஸப்³ப³த்த²பி யோ யோ தே²ரவாதோ³ வா அட்ட²கதா²வாதோ³ வா பச்சா² வுச்சதி, ஸோ ஸோவ பமாணந்தி க³ஹேதப்³ப³ந்தி இத³ங் அட்ட²கதா²வசனதோ அதிரேகங் ஆசரியஸ்ஸ வசனங். இதோ புப்³பா³பரவசனங் அட்ட²கதா²வசனமேவ. தத்த² தங் யுத்தந்தி ‘‘குருந்த³ட்ட²கதா²யங் பன…பே॰… ந வத்ததீ’’தி யங் வசனங் அட்ட²கதா²சரியேஹி வுத்தங், தங் வசனங் யுத்தந்தி அத்தோ². ஏவங்…பே॰… க³ஹேதப்³ப³ந்தி யதா² செத்த² குருந்தி³யங் வுத்தவசனங் யுத்தங், ஏவங் ஸப்³ப³த்த²பி வினிச்ச²யே யோ யோ தே²ரவாதோ³ வா அட்ட²கதா²வாதோ³ வா பச்சா² வுச்சதி, ஸோ ஸோவ பமாணந்தி க³ஹேதப்³ப³ங், புரே வுத்தோ தே²ரவாதோ³ வா அட்ட²கதா²வாதோ³ வா பமாணந்தி ந க³ஹேதப்³ப³ந்தி அதி⁴ப்பாயோ. இத³ங் வசனங் அட்டா²னே வுத்தங் விய தி³ஸ்ஸதி. கத²ங்? யங் தாவ வுத்தங், தங் யுத்தந்தி. தங் இமஸ்மிங் ஆபுச்ச²னஆபோ⁴க³கரணவினிச்ச²யே அஞ்ஞஸ்ஸ அயுத்தஸ்ஸ அட்ட²கதா²வாத³ஸ்ஸ வா தே²ரவாத³ஸ்ஸ வா அபா⁴வா வத்துங் ந ஸக்கா. ந ஹி புப்³ப³வாக்யே ‘‘பி⁴க்கூ² ஏவா’’தி அவதா⁴ரணங் கதங், அத² கோ² ஆஸன்னவஸேன வா பட்டா²னவஸேன வா ‘‘பி⁴க்கூ² சீவரகம்மங்’’இச்சாதி³கங்யேவ வுத்தங். யம்பி வுத்தங் ‘‘ஏவங் ஸப்³ப³த்த²பீ’’த்யாதி³, தம்பி அனோகாஸங். இமஸ்மிங் வினிச்ச²யே அஞ்ஞஸ்ஸ அட்ட²கதா²வாத³ஸ்ஸ வா ஆசரியவாத³ஸ்ஸ வா அவசனதோ புரே பச்சா²பா⁴வோ ச ந தி³ஸ்ஸதி, அயங் ‘‘பமாண’’ந்தி க³ஹேதப்³போ³, அயங் ‘‘ந க³ஹேதப்³போ³’’தி வத்தப்³ப³பா⁴வோ ச.
Ettha ca taṃ yuttaṃ, evaṃ sabbatthapi yo yo theravādo vā aṭṭhakathāvādo vā pacchā vuccati, so sova pamāṇanti gahetabbanti idaṃ aṭṭhakathāvacanato atirekaṃ ācariyassa vacanaṃ. Ito pubbāparavacanaṃ aṭṭhakathāvacanameva. Tattha taṃ yuttanti ‘‘kurundaṭṭhakathāyaṃ pana…pe… na vattatī’’ti yaṃ vacanaṃ aṭṭhakathācariyehi vuttaṃ, taṃ vacanaṃ yuttanti attho. Evaṃ…pe… gahetabbanti yathā cettha kurundiyaṃ vuttavacanaṃ yuttaṃ, evaṃ sabbatthapi vinicchaye yo yo theravādo vā aṭṭhakathāvādo vā pacchā vuccati, so sova pamāṇanti gahetabbaṃ, pure vutto theravādo vā aṭṭhakathāvādo vā pamāṇanti na gahetabbanti adhippāyo. Idaṃ vacanaṃ aṭṭhāne vuttaṃ viya dissati. Kathaṃ? Yaṃ tāva vuttaṃ, taṃ yuttanti. Taṃ imasmiṃ āpucchanaābhogakaraṇavinicchaye aññassa ayuttassa aṭṭhakathāvādassa vā theravādassa vā abhāvā vattuṃ na sakkā. Na hi pubbavākye ‘‘bhikkhū evā’’ti avadhāraṇaṃ kataṃ, atha kho āsannavasena vā paṭṭhānavasena vā ‘‘bhikkhū cīvarakammaṃ’’iccādikaṃyeva vuttaṃ. Yampi vuttaṃ ‘‘evaṃ sabbatthapī’’tyādi, tampi anokāsaṃ. Imasmiṃ vinicchaye aññassa aṭṭhakathāvādassa vā ācariyavādassa vā avacanato pure pacchābhāvo ca na dissati, ayaṃ ‘‘pamāṇa’’nti gahetabbo, ayaṃ ‘‘na gahetabbo’’ti vattabbabhāvo ca.
உபரி பன ‘‘கோ முச்சதி, கோ ந முச்சதீ’’தி இமஸ்ஸ பஞ்ஹஸ்ஸ விஸ்ஸஜ்ஜனே மஹாபச்சரிவாதோ³ ச குருந்தி³வாதோ³ ச மஹாஅட்ட²கதா²வாதோ³ சாதி தயோ அட்ட²கதா²வாதா³ ஆக³தா, ஏகோ மஹாபது³மத்தே²ரவாதோ³, தஸ்மா தத்தே²வ யுத்தாயுத்தபா⁴வோ ச பமாணாபமாணபா⁴வோ ச க³ஹேதப்³பா³க³ஹேதப்³ப³பா⁴வோ ச தி³ஸ்ஸதி, தஸ்மா தஸ்மிங்யேவ டா²னே வத்தப்³ப³ங் ஸியா, ஸுவிமலவிபுலபஞ்ஞாவெய்யத்தியஸமன்னாக³தேன பன ஆசரியாஸபே⁴ன அவத்தப்³ப³ட்டா²னே வுத்தங் ந ஸியா, தஸ்மா உபரி அட்ட²கதா²வாத³ஸங்ஸந்த³னாவஸானே மஹாபது³மத்தே²ரேன வுத்தந்தி இமஸ்ஸ வசனஸ்ஸ பச்ச²தோ வுத்தங் ஸியா, தங் பச்சா² லேக²கேஹி பரிவத்தெத்வா லிகி²தங் ப⁴வெய்ய, பாராஜிககண்ட³ட்ட²கதா²யஞ்ச இத³ங் வசனங் வுத்தங். டீகாயஞ்ச இமஸ்மிங் டா²னே ந வுத்தங், உபரியேவ வுத்தங், ‘‘யோ ச யக்க²க³ஹிதகோ, யோ ச ப³ந்தி⁴த்வா நிபஜ்ஜாபிதோ’’தி இமஸ்ஸ அட்ட²கதா²வாத³ஸ்ஸ பச்சி²மத்தா ஸோயேவ பமாணதோ க³ஹேதப்³போ³. ததா² ச வக்க²தி ‘‘ஸப்³ப³த்த² யோ யோ அட்ட²கதா²வாதோ³ வா தே²ரவாதோ³ வா பச்சா² வுச்சதி, ஸோ ஸோயேவ பமாணதோ த³ட்ட²ப்³போ³’’தி, தஸ்மா இத³மெத்த² விசாரெத்வா க³ஹேதப்³ப³ங்.
Upari pana ‘‘ko muccati, ko na muccatī’’ti imassa pañhassa vissajjane mahāpaccarivādo ca kurundivādo ca mahāaṭṭhakathāvādo cāti tayo aṭṭhakathāvādā āgatā, eko mahāpadumattheravādo, tasmā tattheva yuttāyuttabhāvo ca pamāṇāpamāṇabhāvo ca gahetabbāgahetabbabhāvo ca dissati, tasmā tasmiṃyeva ṭhāne vattabbaṃ siyā, suvimalavipulapaññāveyyattiyasamannāgatena pana ācariyāsabhena avattabbaṭṭhāne vuttaṃ na siyā, tasmā upari aṭṭhakathāvādasaṃsandanāvasāne mahāpadumattherena vuttanti imassa vacanassa pacchato vuttaṃ siyā, taṃ pacchā lekhakehi parivattetvā likhitaṃ bhaveyya, pārājikakaṇḍaṭṭhakathāyañca idaṃ vacanaṃ vuttaṃ. Ṭīkāyañca imasmiṃ ṭhāne na vuttaṃ, upariyeva vuttaṃ, ‘‘yo ca yakkhagahitako, yo ca bandhitvā nipajjāpito’’ti imassa aṭṭhakathāvādassa pacchimattā soyeva pamāṇato gahetabbo. Tathā ca vakkhati ‘‘sabbattha yo yo aṭṭhakathāvādo vā theravādo vā pacchā vuccati, so soyeva pamāṇato daṭṭhabbo’’ti, tasmā idamettha vicāretvā gahetabbaṃ.
4. இதா³னி த்³வாரங் ஸங்வரணஸ்ஸ அந்தராயே ஸதி அஸங்வரித்வாபி நிபஜ்ஜிதுங் வட்டதீதி த³ஸ்ஸேதுங் ‘‘அத² த்³வாரஸ்ஸ’’த்யாதி³மாஹ. நிஸ்ஸேணிங் ஆரோபெத்வாதி உபரிமதலங் ஆரோபெத்வா விஸங்க²ரித்வா பூ⁴மியங் பாதெத்வா, ச²ட்³டெ³த்வா வா நிபஜ்ஜிதுங் வட்டதி. இத³ங் ஏகாப³த்³த⁴தாய வுத்தங். த்³வேபி த்³வாரானி ஜக்³கி³தப்³பா³னீதி எத்த² ஸசே ஏகஸ்மிங் த்³வாரே கவாடங் வா நத்தி², ஹெட்டா² வுத்தனயேன ஸங்வரிதுங் வா ந ஸக்கா , இதரங் த்³வாரங் அஸங்வரித்வா நிபஜ்ஜிதுங் வட்டதி. த்³வாரபாலஸ்ஸாதி த்³வாரகொட்ட²கே மஹாத்³வாரே, நிஸ்ஸேணிமூலே வா ட²த்வா த்³வாரஜக்³க³னகஸ்ஸ. பச்சி²மானங் பா⁴ரோதி ஏகாப³த்³த⁴வஸேன ஆக³ச்ச²ந்தே ஸந்தா⁴ய வுத்தங். அஸங்வுதத்³வாரே அந்தோக³ப்³பே⁴ வாதி யோஜேதப்³ப³ங். ப³ஹி வாதி க³ப்³ப⁴தோ ப³ஹி. நிபஜ்ஜனகாலேபி…பே॰… வட்டதியேவாதி எத்த² த்³வாரஜக்³க³னகஸ்ஸ தத³தீ⁴னத்தா ததா³ தஸ்ஸ தத்த² ஸன்னிஹிதாஸன்னிஹிதபா⁴வங் அனுபதா⁴ரெத்வாபி ஆபோ⁴க³ங் காதுங் வட்டதியேவாதி வத³ந்தி.
4. Idāni dvāraṃ saṃvaraṇassa antarāye sati asaṃvaritvāpi nipajjituṃ vaṭṭatīti dassetuṃ ‘‘atha dvārassa’’tyādimāha. Nisseṇiṃ āropetvāti uparimatalaṃ āropetvā visaṅkharitvā bhūmiyaṃ pātetvā, chaḍḍetvā vā nipajjituṃ vaṭṭati. Idaṃ ekābaddhatāya vuttaṃ. Dvepi dvārāni jaggitabbānīti ettha sace ekasmiṃ dvāre kavāṭaṃ vā natthi, heṭṭhā vuttanayena saṃvarituṃ vā na sakkā , itaraṃ dvāraṃ asaṃvaritvā nipajjituṃ vaṭṭati. Dvārapālassāti dvārakoṭṭhake mahādvāre, nisseṇimūle vā ṭhatvā dvārajagganakassa. Pacchimānaṃ bhāroti ekābaddhavasena āgacchante sandhāya vuttaṃ. Asaṃvutadvāre antogabbhe vāti yojetabbaṃ. Bahi vāti gabbhato bahi. Nipajjanakālepi…pe… vaṭṭatiyevāti ettha dvārajagganakassa tadadhīnattā tadā tassa tattha sannihitāsannihitabhāvaṃ anupadhāretvāpi ābhogaṃ kātuṃ vaṭṭatiyevāti vadanti.
யேன கேனசி பரிக்கி²த்தேதி எத்த² பரிக்கே²பஸ்ஸ உப்³பே³த⁴தோ பமாணங் ஸஹஸெய்யப்பஹோனகே வுத்தஸதி³ஸமேவ. வுத்தஞ்ஹி ஸமந்தபாஸாதி³காயங் (பாசி॰ அட்ட²॰ 51) ‘‘யஞ்ஹி ஸேனாஸனங் உபரி பஞ்சஹி ச²த³னேஹி அஞ்ஞேன வா கேனசி ஸப்³ப³மேவ படிச்ச²ன்னங், அயங் ஸப்³ப³ச்ச²ன்னா நாம ஸெய்யா…பே॰… யங் பன ஸேனாஸனங் பூ⁴மிதோ பட்டா²ய யாவ ச²த³னங் ஆஹச்ச பாகாரேன வா அஞ்ஞேன வா கேனசி அந்தமஸோ வத்தே²னபி பரிக்கி²த்தங், அயங் ஸப்³ப³பரிச்ச²ன்னா நாம ஸெய்யா. ச²த³னங் அனாஹச்ச ஸப்³ப³ந்திமேன பரியாயேன தி³யட்³ட⁴ஹத்து²ப்³பே³தே⁴ன பாகாராதி³னா பரிக்கி²த்தாபி ஸப்³ப³பரிச்ச²ன்னாயேவாதி குருந்த³ட்ட²கதா²யங் வுத்த’’ந்தி. ‘‘தி³யட்³ட⁴ஹத்து²ப்³பே³தோ⁴ வட்³ட⁴கிஹத்தே²ன க³ஹேதப்³போ³’’தி ஸாரத்த²தீ³பனியங் (ஸாரத்த²॰ டீ॰ பாசித்திய 3.51) விமதிவினோத³னியஞ்ச (வி॰ வி॰ டீ॰ பாசித்திய 2.50-51) வுத்தங். மஹாபரிவேணந்தி மஹந்தங் அங்க³ணங். தேன ப³ஹுஜனஸஞ்சரணட்டா²னங் த³ஸ்ஸேதி. தேனாஹ ‘‘மஹாபோ³தீ⁴’’திஆதி³.
Yena kenaci parikkhitteti ettha parikkhepassa ubbedhato pamāṇaṃ sahaseyyappahonake vuttasadisameva. Vuttañhi samantapāsādikāyaṃ (pāci. aṭṭha. 51) ‘‘yañhi senāsanaṃ upari pañcahi chadanehi aññena vā kenaci sabbameva paṭicchannaṃ, ayaṃ sabbacchannā nāma seyyā…pe… yaṃ pana senāsanaṃ bhūmito paṭṭhāya yāva chadanaṃ āhacca pākārena vā aññena vā kenaci antamaso vatthenapi parikkhittaṃ, ayaṃ sabbaparicchannā nāma seyyā. Chadanaṃ anāhacca sabbantimena pariyāyena diyaḍḍhahatthubbedhena pākārādinā parikkhittāpi sabbaparicchannāyevāti kurundaṭṭhakathāyaṃ vutta’’nti. ‘‘Diyaḍḍhahatthubbedho vaḍḍhakihatthena gahetabbo’’ti sāratthadīpaniyaṃ (sārattha. ṭī. pācittiya 3.51) vimativinodaniyañca (vi. vi. ṭī. pācittiya 2.50-51) vuttaṃ. Mahāpariveṇanti mahantaṃ aṅgaṇaṃ. Tena bahujanasañcaraṇaṭṭhānaṃ dasseti. Tenāha ‘‘mahābodhī’’tiādi.
அருணே உக்³க³தே வுட்டா²தி, அனாபத்தி அனாபத்திகெ²த்தபூ⁴தாய ரத்தியா ஸுத்³த⁴சித்தேன நிபன்னத்தா. பபு³ஜ்ஜி²த்வா புன ஸுபதி, ஆபத்தீதி அருணே உக்³க³தே பபு³ஜ்ஜி²த்வா அருணுக்³க³மனங் ஞத்வா வா அஞத்வா வா அனுட்ட²ஹித்வா ஸயிதஸந்தானேன ஸுபதி, உட்ட²ஹித்வா கத்தப்³ப³ஸ்ஸ த்³வாரஸங்வரணாதி³னோ அகதத்தா அகிரியஸமுட்டா²னா ஆபத்தி ஹோதி அனாபத்திகெ²த்தே கதனிபஜ்ஜனகிரியாய அனங்க³த்தா. அயஞ்ஹி ஆபத்தி ஈதி³ஸே டா²னே அகிரியா, தி³வா த்³வாரங் அஸங்வரித்வா நிபஜ்ஜனக்க²ணே கிரியாகிரியா ச அசித்தகா சாதி வேதி³தப்³பா³. புராருணா பபு³ஜ்ஜி²த்வாபி யாவ அருணுக்³க³மனா ஸயந்தஸ்ஸபி புரிமனயேன ஆபத்தியேவ.
Aruṇe uggate vuṭṭhāti, anāpatti anāpattikhettabhūtāya rattiyā suddhacittena nipannattā. Pabujjhitvā puna supati, āpattīti aruṇe uggate pabujjhitvā aruṇuggamanaṃ ñatvā vā añatvā vā anuṭṭhahitvā sayitasantānena supati, uṭṭhahitvā kattabbassa dvārasaṃvaraṇādino akatattā akiriyasamuṭṭhānā āpatti hoti anāpattikhette katanipajjanakiriyāya anaṅgattā. Ayañhi āpatti īdise ṭhāne akiriyā, divā dvāraṃ asaṃvaritvā nipajjanakkhaṇe kiriyākiriyā ca acittakā cāti veditabbā. Purāruṇā pabujjhitvāpi yāva aruṇuggamanā sayantassapi purimanayena āpattiyeva.
அருணே உக்³க³தே வுட்ட²ஹிஸ்ஸாமீதி…பே॰… ஆபத்தியேவாதி எத்த² கதா³ அஸ்ஸ ஆபத்தீதி? வுச்சதே – ந தாவ ரத்தியங், ‘‘தி³வா ஆபஜ்ஜதி, நோ ரத்தி’’ந்தி (பரி॰ 323) வுத்தத்தா அனாத³ரியது³க்கடா ந முச்சதீதி வுத்தது³க்கடங் பன தி³வாஸயனது³க்கடமேவ ந ஹோதி அனாத³ரியது³க்கடத்தா ஏவ. ‘‘அருணுக்³க³மனே பன அசித்தகங் அகிரியஸமுட்டா²னங் ஆபத்திங் ஆபஜ்ஜதீதி வேதி³தப்³ப³’’ந்தி விமதிவினோத³னியங் (வி॰ வி॰ டீ॰ 1.77) வுத்தங், ஸாரத்த²தீ³பனியம்பி (ஸாரத்த²॰ டீ॰ பாராஜிக 2.77) ‘‘யதா²பரிச்சே²த³மேவ வுட்டா²தீதி அருணே உக்³க³தேயேவ உட்ட²ஹதி. தஸ்ஸ ஆபத்தீதி அஸுத்³த⁴சித்தேனேவ நிபன்னத்தா நித்³தா³யந்தஸ்ஸபி அருணே உக்³க³தே தி³வாபடிஸல்லானமூலிகா ஆபத்தி. ‘ஏவங் நிபஜ்ஜந்தோ அனாத³ரியது³க்கடாபி ந முச்சதீ’தி வுத்தத்தா அஸுத்³த⁴சித்தேன நிபஜ்ஜந்தோ அருணுக்³க³மனதோ புரேதரங் உட்ட²ஹந்தோபி அனுட்ட²ஹந்தோபி நிபஜ்ஜனகாலேயேவ அனாத³ரியது³க்கடங் ஆபஜ்ஜதி, தி³வாபடிஸல்லானமூலிகங் பன து³க்கடங் அருணேயேவ ஆபஜ்ஜதீ’’தி வுத்தங், தஸ்மா ஏவங் நிபஜ்ஜந்தஸ்ஸ த்³வே து³க்கடானி ஆபஜ்ஜந்தீதி வேதி³தப்³ப³ங்.
Aruṇe uggate vuṭṭhahissāmīti…pe… āpattiyevāti ettha kadā assa āpattīti? Vuccate – na tāva rattiyaṃ, ‘‘divā āpajjati, no ratti’’nti (pari. 323) vuttattā anādariyadukkaṭā na muccatīti vuttadukkaṭaṃ pana divāsayanadukkaṭameva na hoti anādariyadukkaṭattā eva. ‘‘Aruṇuggamane pana acittakaṃ akiriyasamuṭṭhānaṃ āpattiṃ āpajjatīti veditabba’’nti vimativinodaniyaṃ (vi. vi. ṭī. 1.77) vuttaṃ, sāratthadīpaniyampi (sārattha. ṭī. pārājika 2.77) ‘‘yathāparicchedameva vuṭṭhātīti aruṇe uggateyeva uṭṭhahati. Tassa āpattīti asuddhacitteneva nipannattā niddāyantassapi aruṇe uggate divāpaṭisallānamūlikā āpatti. ‘Evaṃ nipajjanto anādariyadukkaṭāpi na muccatī’ti vuttattā asuddhacittena nipajjanto aruṇuggamanato puretaraṃ uṭṭhahantopi anuṭṭhahantopi nipajjanakāleyeva anādariyadukkaṭaṃ āpajjati, divāpaṭisallānamūlikaṃ pana dukkaṭaṃ aruṇeyeva āpajjatī’’ti vuttaṃ, tasmā evaṃ nipajjantassa dve dukkaṭāni āpajjantīti veditabbaṃ.
ஸசே த்³வாரங் ஸங்வரித்வா அருணே உக்³க³தே உட்ட²ஹிஸ்ஸாமீதி நிபஜ்ஜதி, த்³வாரே ச அஞ்ஞேஹி அருணுக்³க³மனகாலே விவடேபி தஸ்ஸ அனாபத்தியேவ த்³வாரபித³ஹனஸ்ஸ ரத்திதி³வாபா⁴கே³ஸு விஸேஸாபா⁴வா. ஆபத்திஆபஜ்ஜனஸ்ஸேவ காலவிஸேஸோ இச்சி²தப்³போ³, ந தப்பரிஹாரஸ்ஸாதி க³ஹேதப்³ப³ங். ‘‘த்³வாரங் ஸங்வரித்வா ரத்திங் நிபஜ்ஜதீ’’தி (பாரா॰ அட்ட²॰ 1.77) ஹி வுத்தங். தி³வா ஸங்வரித்வா நிபன்னஸ்ஸ கேனசி விவடேபி த்³வாரே அனாபத்தியேவ, அத்தனாபி அனுட்ட²ஹித்வாவ ஸதி பச்சயே விவடேபி அனாபத்தீதி வத³ந்தி, இத³ம்பி விமதிவினோத³னியமேவ (வி॰ வி॰ டீ॰ 1.77) வுத்தங்.
Sace dvāraṃ saṃvaritvā aruṇe uggate uṭṭhahissāmīti nipajjati, dvāre ca aññehi aruṇuggamanakāle vivaṭepi tassa anāpattiyeva dvārapidahanassa rattidivābhāgesu visesābhāvā. Āpattiāpajjanasseva kālaviseso icchitabbo, na tapparihārassāti gahetabbaṃ. ‘‘Dvāraṃ saṃvaritvā rattiṃ nipajjatī’’ti (pārā. aṭṭha. 1.77) hi vuttaṃ. Divā saṃvaritvā nipannassa kenaci vivaṭepi dvāre anāpattiyeva, attanāpi anuṭṭhahitvāva sati paccaye vivaṭepi anāpattīti vadanti, idampi vimativinodaniyameva (vi. vi. ṭī. 1.77) vuttaṃ.
யதா²பரிச்சே²த³மேவ வுட்டா²தீதி அருணே உக்³க³தேயேவ வுட்டா²தி, ஆபத்தியேவாதி மூலாபத்திங் ஸந்தா⁴ய வுத்தங். அனாத³ரியஆபத்தி பன புராருணா உட்டி²தஸ்ஸபி தஸ்ஸ ஹோதேவ ‘‘து³க்கடா ந முச்சதீ’’தி வுத்தத்தா. து³க்கடா ந முச்சதீதி ச புராருணா உட்ட²ஹித்வா மூலாபத்தியா முத்தோபி அனாத³ரியது³க்கடா ந முச்சதீதி அதி⁴ப்பாயோ.
Yathāparicchedameva vuṭṭhātīti aruṇe uggateyeva vuṭṭhāti, āpattiyevāti mūlāpattiṃ sandhāya vuttaṃ. Anādariyaāpatti pana purāruṇā uṭṭhitassapi tassa hoteva ‘‘dukkaṭā na muccatī’’ti vuttattā. Dukkaṭā na muccatīti ca purāruṇā uṭṭhahitvā mūlāpattiyā muttopi anādariyadukkaṭā na muccatīti adhippāyo.
5. நித்³தா³வஸேன நிபஜ்ஜதீதி நித்³தா³பி⁴பூ⁴ததாய ஏகபஸ்ஸேன நிபஜ்ஜதி. ‘‘நித்³தா³வஸேன நிபஜ்ஜதீ’’தி வோஹாரவஸேன வுத்தங், பாதா³னங் பன பூ⁴மிதோ அமோசிதத்தா அயங் நிபன்னோ நாம ஹோதீதி தேனேவ அனாபத்தி வுத்தா. அபஸ்ஸாய ஸுபந்தஸ்ஸாதி கடிட்டி²தோ உத்³த⁴ங் பிட்டி²கண்டகே அப்பமத்தகங் பதே³ஸங் பூ⁴மிங் அபு²ஸாபெத்வா ஸுபந்தஸ்ஸ. கடிட்டி²ங் பன பூ⁴மிங் பு²ஸாபெந்தஸ்ஸ ஸயனங் நாம ந ஹோதி. பிட்டி²பஸாரணலக்க²ணா ஹி ஸெய்யா தீ³கா⁴, வந்த³னாதீ³ஸுபி திரியங் பிட்டி²கண்டகானங் பஸாரிதத்தா நிபஜ்ஜனமேவாதி ஆபத்தி பரிஹரிதப்³பா³வ. வந்த³னாபி ஹி பாத³மூலே நிபஜ்ஜதீதிஆதீ³ஸு நிபஜ்ஜனமேவ வுத்தா. ஸஹஸா வுட்டா²தீதி பக்க²லிதா பதிதோ விய ஸஹஸா வுட்டா²தி, தஸ்ஸபி அனாபத்தி பதனக்க²ணே அவிஸயத்தா, விஸயே ஜாதே ஸஹஸா வுட்டி²தத்தா ச. யஸ்ஸ பன விஸஞ்ஞிதாய பச்சா²பி அவிஸயோ ஏவ, தஸ்ஸ அனாபத்தியேவ பதனக்க²ணே விய. தத்தே²வ ஸயதி, ந வுட்டா²தீதி இமினா விஸயேபி அகரணங் த³ஸ்ஸேதி, தேனேவ தஸ்ஸ ஆபத்தீதி வுத்தங்.
5.Niddāvasena nipajjatīti niddābhibhūtatāya ekapassena nipajjati. ‘‘Niddāvasena nipajjatī’’ti vohāravasena vuttaṃ, pādānaṃ pana bhūmito amocitattā ayaṃ nipanno nāma hotīti teneva anāpatti vuttā. Apassāya supantassāti kaṭiṭṭhito uddhaṃ piṭṭhikaṇṭake appamattakaṃ padesaṃ bhūmiṃ aphusāpetvā supantassa. Kaṭiṭṭhiṃ pana bhūmiṃ phusāpentassa sayanaṃ nāma na hoti. Piṭṭhipasāraṇalakkhaṇā hi seyyā dīghā, vandanādīsupi tiriyaṃ piṭṭhikaṇṭakānaṃ pasāritattā nipajjanamevāti āpatti pariharitabbāva. Vandanāpi hi pādamūle nipajjatītiādīsu nipajjanameva vuttā. Sahasā vuṭṭhātīti pakkhalitā patito viya sahasā vuṭṭhāti, tassapi anāpatti patanakkhaṇe avisayattā, visaye jāte sahasā vuṭṭhitattā ca. Yassa pana visaññitāya pacchāpi avisayo eva, tassa anāpattiyeva patanakkhaṇe viya. Tattheva sayati, na vuṭṭhātīti iminā visayepi akaraṇaṃ dasseti, teneva tassa āpattīti vuttaṃ.
இதா³னி அட்ட²கதா²வாத³ஸங்ஸந்த³னங் காதுங் ‘‘கோ முச்சதி, கோ ந முச்சதீ’’திஆதி³மாஹ. தத்த² மஹாபச்சரியந்திஆதீ³ஸு பச்சரீதி உளும்பங் வுச்சதி, தஸ்மிங் நிஸீதி³த்வா கதத்தா தமேவ நாமங் ஜாதங். குருந்தி³வல்லிவிஹாரோ நாம அத்தி², தத்த² கதத்தா குருந்தீ³தி நாமங் ஜாதங். மஹாஅட்ட²கதா² நாம ஸங்கீ³தித்தயமாருள்ஹா தேபிடகஸ்ஸ பு³த்³த⁴வசனஸ்ஸ அட்ட²கதா². யா மஹாமஹிந்த³த்தே²ரேன தம்ப³பண்ணிதீ³பங் ஆப⁴தா, தம்ப³பண்ணியேஹி தே²ரேஹி பச்சா² ஸீஹளபா⁴ஸாய அபி⁴ஸங்க²தா ச ஹோதி. ஏகப⁴ங்கே³னாதி ஏகபஸ்ஸப⁴ஞ்ஜனேன பாதே³ பூ⁴மிதோ அமோசெத்வா ஏகபஸ்ஸேன ஸரீரங் ப⁴ஞ்ஜித்வா நிபன்னோதி வுத்தங் ஹோதி. மஹாஅட்ட²கதா²யங் பன மஹாபது³மத்தே²ரேன வுத்தந்தி ஸம்ப³ந்தோ⁴. தேன மஹாஅட்ட²கதா²ய லிகி²தமஹாபது³மத்தே²ரவாதே³ ‘‘அய’’ந்தி த³ஸ்ஸேதி. ‘‘முச்சி²த்வா பதிதத்தா அவிஸயத்தா ஆபத்தி ந தி³ஸ்ஸதீ’’தி தே²ரேன வுத்தங். ஆசரியா பன யதா² யக்க²க³ஹிதகோ ப³ந்தி⁴த்வா நிபஜ்ஜாபிதோ ச பரவஸோ ஹோதி, ஏவங் அபரவஸத்தா முச்சி²த்வா பதிதோ கஞ்சிகாலங் ஜானித்வா நிபஜ்ஜதீதி அனாபத்திங் ந வத³ந்தி, விஸஞ்ஞிதே பன ஸதி அனாபத்தியேவ.
Idāni aṭṭhakathāvādasaṃsandanaṃ kātuṃ ‘‘ko muccati, ko na muccatī’’tiādimāha. Tattha mahāpaccariyantiādīsu paccarīti uḷumpaṃ vuccati, tasmiṃ nisīditvā katattā tameva nāmaṃ jātaṃ. Kurundivallivihāro nāma atthi, tattha katattā kurundīti nāmaṃ jātaṃ. Mahāaṭṭhakathā nāma saṅgītittayamāruḷhā tepiṭakassa buddhavacanassa aṭṭhakathā. Yā mahāmahindattherena tambapaṇṇidīpaṃ ābhatā, tambapaṇṇiyehi therehi pacchā sīhaḷabhāsāya abhisaṅkhatā ca hoti. Ekabhaṅgenāti ekapassabhañjanena pāde bhūmito amocetvā ekapassena sarīraṃ bhañjitvā nipannoti vuttaṃ hoti. Mahāaṭṭhakathāyaṃ pana mahāpadumattherena vuttanti sambandho. Tena mahāaṭṭhakathāya likhitamahāpadumattheravāde ‘‘aya’’nti dasseti. ‘‘Mucchitvā patitattā avisayattā āpatti na dissatī’’ti therena vuttaṃ. Ācariyā pana yathā yakkhagahitako bandhitvā nipajjāpito ca paravaso hoti, evaṃ aparavasattā mucchitvā patito kañcikālaṃ jānitvā nipajjatīti anāpattiṃ na vadanti, visaññite pana sati anāpattiyeva.
த்³வே ஜனாதிஆதி³ மஹாஅட்ட²கதா²யமேவ வசனங், ததே³வ பச்சா² வுத்தத்தா பமாணங். யக்க²க³ஹிதக்³க³ஹணேனேவ செத்த² விஸஞ்ஞிபூ⁴தோபி ஸங்க³ஹிதோ, ஏகப⁴ங்கே³ன நிபன்னோ பன அனிபன்னத்தா ஆபத்திதோ முச்சதியேவாதி க³ஹேதப்³ப³ங். ஸாரத்த²தீ³பனியஞ்ச (ஸாரத்த²॰ டீ॰ 2.77) ‘‘யோ ச யக்க²க³ஹிதகோ, யோ ச ப³ந்தி⁴த்வா நிபஜ்ஜாபிதோ’’தி இமஸ்ஸ அட்ட²கதா²வாத³ஸ்ஸ பச்சி²மத்தா ஸோயேவ பமாணதோ க³ஹேதப்³போ³, ததா² ச வக்க²தி ‘‘ஸப்³ப³த்த² யோ யோ அட்ட²கதா²வாதோ³ வா பச்சா² வுச்சதி, ஸோ ஸோயேவ பமாணதோ க³ஹேதப்³போ³’’தி. இமஸ்மிங் டா²னே இமஸ்ஸ அட்ட²கதா²பாட²ஸ்ஸ ஆனீதத்தா இமஸ்மிங் வினயஸங்க³ஹப்பகரணேபி இமஸ்மிங்யேவ டா²னே ஸோ பாடோ² வத்தப்³போ³தி நோ க²ந்தி. எத்த² ச ‘‘ரத்திங் த்³வாரங் விவரித்வா நிபன்னோ அருணே உக்³க³தே உட்டா²தி, அனாபத்தீ’’திஆதி³வசனதோ அருணுக்³க³மனே ஸங்ஸயவினோத³னத்த²ங் அருணகதா² வத்தப்³பா³. தத்ரித³ங் வுச்சதி –
Dve janātiādi mahāaṭṭhakathāyameva vacanaṃ, tadeva pacchā vuttattā pamāṇaṃ. Yakkhagahitaggahaṇeneva cettha visaññibhūtopi saṅgahito, ekabhaṅgena nipanno pana anipannattā āpattito muccatiyevāti gahetabbaṃ. Sāratthadīpaniyañca (sārattha. ṭī. 2.77) ‘‘yo ca yakkhagahitako, yo ca bandhitvā nipajjāpito’’ti imassa aṭṭhakathāvādassa pacchimattā soyeva pamāṇato gahetabbo, tathā ca vakkhati ‘‘sabbattha yo yo aṭṭhakathāvādo vā pacchā vuccati, so soyeva pamāṇato gahetabbo’’ti. Imasmiṃ ṭhāne imassa aṭṭhakathāpāṭhassa ānītattā imasmiṃ vinayasaṅgahappakaraṇepi imasmiṃyeva ṭhāne so pāṭho vattabboti no khanti. Ettha ca ‘‘rattiṃ dvāraṃ vivaritvā nipanno aruṇe uggate uṭṭhāti, anāpattī’’tiādivacanato aruṇuggamane saṃsayavinodanatthaṃ aruṇakathā vattabbā. Tatridaṃ vuccati –
‘‘கோ ஏஸ அருணோ நாம;
‘‘Ko esa aruṇo nāma;
கேன ஸோ அருணோ ப⁴வே;
Kena so aruṇo bhave;
கீதி³ஸோ தஸ்ஸ வண்ணா து;
Kīdiso tassa vaṇṇā tu;
ஸண்டா²னங் கீதி³ஸங் ப⁴வே.
Saṇṭhānaṃ kīdisaṃ bhave.
‘‘கிஸ்மிங் காலே ச தே³ஸே ச, அருணோ ஸமுக³ச்ச²தி;
‘‘Kismiṃ kāle ca dese ca, aruṇo samugacchati;
கிங் பச்சக்க²ஸித்³தோ⁴ ஏஸோ, உதா³ஹு அனுமானதோ’’தி.
Kiṃ paccakkhasiddho eso, udāhu anumānato’’ti.
தத்த² கோ ஏஸ அருணோ நாமாதி எத்த² ஏஸ அருணோ நாம ஸூரியஸ்ஸ பபா⁴விஸேஸோ. வுத்தஞ்ஹேதங் அபி⁴தா⁴னப்பதீ³பிகாயங் –
Tattha ko esa aruṇo nāmāti ettha esa aruṇo nāma sūriyassa pabhāviseso. Vuttañhetaṃ abhidhānappadīpikāyaṃ –
‘‘ஸூரஸ்ஸோத³யதோ புப்³பு³ட்டி²தரங்ஸி ஸியாருணோ’’தி;
‘‘Sūrassodayato pubbuṭṭhitaraṃsi siyāruṇo’’ti;
தட்டீகாயஞ்ச ‘‘ஸூரஸ்ஸ உத³யதோ புப்³பே³ உட்டி²தரங்ஸி அருணோ நாம ஸியா’’தி. விமதிவினோத³னீனாமிகாயங் வினயடீகாயஞ்ச (வி॰ வி॰ டீ॰ 1.463) ‘‘அருணோதி செத்த² ஸூரியுக்³க³மனஸ்ஸ புரேசரோ வட்³ட⁴னக⁴னரத்தோ பபா⁴விஸேஸோதி த³ட்ட²ப்³போ³’’தி வுத்தங், தஸ்மா ஸூரியப்பபா⁴யேவ அருணோ நாம, ந அஞ்ஞோதி த³ட்ட²ப்³ப³ங். கேன ஸோ அருணோ ப⁴வேதி எத்த² அருணோ வண்ணோ அஸ்ஸாதி அருணோ, கிஞ்சிரத்தவண்ணஸமன்னாக³தோதி அத்தோ². அத² வா அரதி க³ச்ச²தி ரத்தவண்ணபா⁴வேன பவத்ததீதி அருணோ. வுத்தஞ்ஹேதங் அபி⁴தா⁴னப்பதீ³பிகாடீகாயங் ‘‘அருணவண்ணதாய அரதி க³ச்ச²தீதி அருணோ’’தி. கீதி³ஸோ தஸ்ஸ வண்ணோதி எத்த² அப்³யத்தரத்தவண்ணோ தஸ்ஸ வண்ணோ ப⁴வே. வுத்தஞ்ஹி அபி⁴தா⁴னப்பதீ³பிகாயங் ‘‘அருணோ கிஞ்சிரத்தோதா²’’தி. தட்டீகாயஞ்ச ‘‘கிஞ்சிரத்தோ அப்³யத்தரத்தவண்ணோ அருணோ நாம யதா² மச்ச²ஸ்ஸ அக்கீ²’’தி. விமதிவினோத³னியஞ்ச (வி॰ வி॰ டீ॰ 1.463) ‘‘வட்³ட⁴னக⁴னரத்தோ பபா⁴விஸேஸோ’’தி, தஸ்மா ஸூரியஸ்ஸ ரத்தப்பபா⁴யேவ அருணோ நாம, ந ஸேதப்பபா⁴த³யோதி த³ட்ட²ப்³ப³ங். யதி³ ஏவங் பாதிமொக்க²ட்ட²பனக்க²ந்த⁴கவண்ணனாய விமதிவினோத³னியங் (வி॰ வி॰ டீ॰ சூளவக்³க³ 2.383) ‘‘பாளியங் பன நந்தி³முகி²யாதி ஓதா³ததி³ஸாமுக²தாய துட்ட²முகி²யா’’தி வுத்தங், தங் கத²ங் யுஜ்ஜெய்யாதி, நோ ந யுஜ்ஜெய்ய. தத்த² ஹி அருணுக்³க³தகாலே அருணோபா⁴ஸேன ஓதா³ததி³ஸாமுக²பா⁴வோ வுத்தோ, ந அருணோபா⁴ஸஸ்ஸ ஓதா³தபா⁴வோ. வுத்தஞ்ஹேதங் உதா³னட்ட²கதா²யங் (உதா³॰ அட்ட²॰ 23) ‘‘நந்தி³முகி²யாதி அருணஸ்ஸ உக்³க³தத்தா ஏவ அருணோபா⁴ய ஸூரியாலோகூபஜீவினோ ஸத்தே நந்தா³பனமுகி²யா ரத்தியா ஜாதாய விபா⁴யமானாயாதி அத்தோ²’’தி.
Taṭṭīkāyañca ‘‘sūrassa udayato pubbe uṭṭhitaraṃsi aruṇo nāma siyā’’ti. Vimativinodanīnāmikāyaṃ vinayaṭīkāyañca (vi. vi. ṭī. 1.463) ‘‘aruṇoti cettha sūriyuggamanassa purecaro vaḍḍhanaghanaratto pabhāvisesoti daṭṭhabbo’’ti vuttaṃ, tasmā sūriyappabhāyeva aruṇo nāma, na aññoti daṭṭhabbaṃ. Kena so aruṇo bhaveti ettha aruṇo vaṇṇo assāti aruṇo, kiñcirattavaṇṇasamannāgatoti attho. Atha vā arati gacchati rattavaṇṇabhāvena pavattatīti aruṇo. Vuttañhetaṃ abhidhānappadīpikāṭīkāyaṃ ‘‘aruṇavaṇṇatāya arati gacchatīti aruṇo’’ti. Kīdiso tassa vaṇṇoti ettha abyattarattavaṇṇo tassa vaṇṇo bhave. Vuttañhi abhidhānappadīpikāyaṃ ‘‘aruṇo kiñcirattothā’’ti. Taṭṭīkāyañca ‘‘kiñciratto abyattarattavaṇṇo aruṇo nāma yathā macchassa akkhī’’ti. Vimativinodaniyañca (vi. vi. ṭī. 1.463) ‘‘vaḍḍhanaghanaratto pabhāviseso’’ti, tasmā sūriyassa rattappabhāyeva aruṇo nāma, na setappabhādayoti daṭṭhabbaṃ. Yadi evaṃ pātimokkhaṭṭhapanakkhandhakavaṇṇanāya vimativinodaniyaṃ (vi. vi. ṭī. cūḷavagga 2.383) ‘‘pāḷiyaṃ pana nandimukhiyāti odātadisāmukhatāya tuṭṭhamukhiyā’’ti vuttaṃ, taṃ kathaṃ yujjeyyāti, no na yujjeyya. Tattha hi aruṇuggatakāle aruṇobhāsena odātadisāmukhabhāvo vutto, na aruṇobhāsassa odātabhāvo. Vuttañhetaṃ udānaṭṭhakathāyaṃ (udā. aṭṭha. 23) ‘‘nandimukhiyāti aruṇassa uggatattā eva aruṇobhāya sūriyālokūpajīvino satte nandāpanamukhiyā rattiyā jātāya vibhāyamānāyāti attho’’ti.
ஜாதகட்ட²கதா²யஞ்ச –
Jātakaṭṭhakathāyañca –
‘‘ஜிக⁴ஞ்ஞரத்திங் அருணஸ்மிமுஹதே;
‘‘Jighaññarattiṃ aruṇasmimuhate;
யா தி³ஸ்ஸதி உத்தமரூபவண்ணினீ;
Yā dissati uttamarūpavaṇṇinī;
ததூ²பமா மங் படிபா⁴ஸி தே³வதே;
Tathūpamā maṃ paṭibhāsi devate;
ஆசிக்க² மே தங் கதமாஸி அச்ச²ரா’’தி. (ஜா॰ அட்ட²॰ 5.21.254);
Ācikkha me taṃ katamāsi accharā’’ti. (jā. aṭṭha. 5.21.254);
இமஸ்ஸ கா³தா²ய அத்த²வண்ணனாயங் ‘‘தத்த² ஜிக⁴ஞ்ஞரத்திந்தி பச்சி²மரத்திங், ரத்திபரியோஸானேதி அத்தோ². உஹதேதி அருணே உக்³க³தே. யாதி யா புரத்தி²மா தி³ஸா ரத்தவண்ணதாய உத்தமரூபத⁴ரா ஹுத்வா தி³ஸ்ஸதீ’’தி. ஏவங் அருணுக்³க³தஸமயே புரத்தி²மதி³ஸாய ரத்தவண்ணதா வுத்தா, தஸ்மா தஸ்மிங் ஸமயே அருணஸ்ஸ உட்டி²தத்தா புரத்தி²மாய தி³ஸாய ரத்தபா⁴கோ³ ஸூரியாலோகஸ்ஸ பத்த²டத்தா ஸேஸதி³ஸானங் ஓதா³தபா⁴வோ விஞ்ஞாயதி.
Imassa gāthāya atthavaṇṇanāyaṃ ‘‘tattha jighaññarattinti pacchimarattiṃ, rattipariyosāneti attho. Uhateti aruṇe uggate. Yāti yā puratthimā disā rattavaṇṇatāya uttamarūpadharā hutvā dissatī’’ti. Evaṃ aruṇuggatasamaye puratthimadisāya rattavaṇṇatā vuttā, tasmā tasmiṃ samaye aruṇassa uṭṭhitattā puratthimāya disāya rattabhāgo sūriyālokassa patthaṭattā sesadisānaṃ odātabhāvo viññāyati.
ஸண்டா²னங் கீதி³ஸங் ப⁴வேதி எத்த² அருணஸ்ஸ பாடேக்கங் ஸண்டா²னங் நாம நத்தி² ரஸ்மிமத்தத்தா. யத்தகங் பதே³ஸங் ப²ரதி, தத்தகங் தஸ்ஸ ஸண்டா²னந்தி த³ட்ட²ப்³ப³ங். அத² வா புரத்தி²மதி³ஸாஸண்டா²னங். வுத்தஞ்ஹி ஜாதகட்ட²கதா²யங் (ஜா॰ அட்ட²॰ 5.21.255) ‘‘புரத்தி²மதி³ஸா ரத்தவண்ணதாய உத்தமரூபத⁴ரா ஹுத்வா தி³ஸ்ஸதீ’’தி.
Saṇṭhānaṃkīdisaṃ bhaveti ettha aruṇassa pāṭekkaṃ saṇṭhānaṃ nāma natthi rasmimattattā. Yattakaṃ padesaṃ pharati, tattakaṃ tassa saṇṭhānanti daṭṭhabbaṃ. Atha vā puratthimadisāsaṇṭhānaṃ. Vuttañhi jātakaṭṭhakathāyaṃ (jā. aṭṭha. 5.21.255) ‘‘puratthimadisā rattavaṇṇatāya uttamarūpadharā hutvā dissatī’’ti.
கிஸ்மிங் காலே ச தே³ஸே ச, அருணோ ஸமுக³ச்ச²தீதி எத்த² ஏஸ அருணோ ஸூரியுக்³க³மனஸ்ஸ புரே காலே புரத்தி²மதி³ஸாயங் உக்³க³ச்ச²தி. வுத்தஞ்ஹேதங் உதா³னட்ட²கதா²யங் (உதா³॰ அட்ட²॰ 23) ‘‘உத்³த⁴ஸ்தே அருணேதி உக்³க³தே அருணே, அருணோ நாம புரத்தி²மதி³ஸாயங் ஸூரியோத³யதோ புரேதரமேவ உட்டி²தோபா⁴ஸோ’’தி. அபி⁴தா⁴னப்பதீ³பிகாயஞ்ச ‘‘ஸூரஸ்ஸோத³யதோ புப்³பு³ட்டி²தரங்ஸீ’’தி.
Kismiṃ kāle ca dese ca, aruṇo samugacchatīti ettha esa aruṇo sūriyuggamanassa pure kāle puratthimadisāyaṃ uggacchati. Vuttañhetaṃ udānaṭṭhakathāyaṃ (udā. aṭṭha. 23) ‘‘uddhaste aruṇeti uggate aruṇe, aruṇo nāma puratthimadisāyaṃ sūriyodayato puretarameva uṭṭhitobhāso’’ti. Abhidhānappadīpikāyañca ‘‘sūrassodayato pubbuṭṭhitaraṃsī’’ti.
கிங் பச்சக்க²ஸித்³தோ⁴ ஏஸோ, உதா³ஹு அனுமானதோதி எத்த² அயங் அருணோ நாம பச்சக்க²ஸித்³தோ⁴ ஏவ , ந அனுமானஸித்³தோ⁴. கஸ்மா விஞ்ஞாயதீதி சே? சக்கு²விஞ்ஞாணகோ³சரவண்ணாயதனபா⁴வதோ. அக்க²ஸ்ஸ பதீதி பச்சக்க²ங், சக்கு²ரூபானங் அபி⁴முக²பா⁴வேன ஆபாத²க³தத்தா சக்கு²விஞ்ஞாணங் ஹோதி. வுத்தஞ்ஹேதங் ப⁴க³வதா ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி (ம॰ நி॰ 1.204, 400; 3.421, 425, 426; ஸங்॰ நி॰ 2.43, 44, 45, ஸங்॰ நி॰ 4.60; கதா²॰ 465, 467), தஸ்மா அயங் அருணவண்ணோ சக்கு²னா தி³ஸ்வா ஜானிதப்³ப³தோ பச்சக்க²ஸித்³தோ⁴யேவ ஹோதி, ந ஏவங் ஸதி ஏவங் ப⁴வெய்யாதி அனுமானேன புனப்புனங் சிந்தனேன ஸித்³தோ⁴தி. இமங் பஞ்ஹவிஸ்ஸஜ்ஜனங் ஸாது⁴கங் மனஸி கரித்வா பண்டி³தேஹி ரத்தோபா⁴ஸோயேவ அருணோதி பச்சேதப்³போ³ ஸல்லக்கே²தப்³போ³தி.
Kiṃ paccakkhasiddho eso, udāhu anumānatoti ettha ayaṃ aruṇo nāma paccakkhasiddho eva , na anumānasiddho. Kasmā viññāyatīti ce? Cakkhuviññāṇagocaravaṇṇāyatanabhāvato. Akkhassa patīti paccakkhaṃ, cakkhurūpānaṃ abhimukhabhāvena āpāthagatattā cakkhuviññāṇaṃ hoti. Vuttañhetaṃ bhagavatā ‘‘cakkhuñca paṭicca rūpe ca uppajjati cakkhuviññāṇa’’nti (ma. ni. 1.204, 400; 3.421, 425, 426; saṃ. ni. 2.43, 44, 45, saṃ. ni. 4.60; kathā. 465, 467), tasmā ayaṃ aruṇavaṇṇo cakkhunā disvā jānitabbato paccakkhasiddhoyeva hoti, na evaṃ sati evaṃ bhaveyyāti anumānena punappunaṃ cintanena siddhoti. Imaṃ pañhavissajjanaṃ sādhukaṃ manasi karitvā paṇḍitehi rattobhāsoyeva aruṇoti paccetabbo sallakkhetabboti.
கஸ்மா பன இமஸ்மிங் டா²னே அருணகதா² வுத்தாதி? இமிஸ்ஸா அருணகதா²ய மஹாவிஸயபா⁴வதோ. கத²ங்? உபோஸதி²கா உபாஸகா ச உபாஸிகாயோ ச அருணுக்³க³மனங் தத²தோ அஜானந்தா அனுக்³க³தேயேவ அருணே உக்³க³தஸஞ்ஞாய கா²த³னீயங் வா கா²த³ந்தி, போ⁴ஜனீயங் வா பு⁴ஞ்ஜந்தி, மாலாக³ந்தா⁴தீ³னி வா தா⁴ரெந்தி, ததோ தேஸங் ஸீலங் பி⁴ஜ்ஜதி. ஸாமணேரா ததே²வ விகாலபோ⁴ஜனங் பு⁴ஞ்ஜித்வா ஸீலவினாஸங் பாபுணந்தி. நிஸ்ஸயபடிபன்னகா பி⁴க்கூ² ஆசரியுபஜ்ஜா²யேஹி வினா ப³ஹிஸீமே சரந்தா நிஸ்ஸயப்பஸ்ஸம்ப⁴னங் பாபுணந்தி, அந்தோவஸ்ஸே பி⁴க்கூ² உபசாரஸீமதோ ப³ஹிக³ச்ச²ந்தா வஸ்ஸச்சே²த³ங், தேசீவரிகா பி⁴க்கூ² அப³த்³த⁴ஸீமாயங் சீவரேன விப்பவஸந்தா நிஸ்ஸக்³கி³யபாசித்தியங், ததா² ஸத்தப்³ப⁴ந்தரஸீமாயங், ஸஹஸெய்யப்பஹோனகட்டா²னே அனுபஸம்பன்னமாதுகா³மேஹி ஸஹ ஸயந்தா பாசித்தியங், ததா² யாவகாலிகங் பு⁴ஞ்ஜந்தா பி⁴க்கூ², பாரிவாஸிகாத³யோ வத்தங் நிக்கி²பந்தா ரத்திச்சே²த³ங். ஏவமாதி³அனேகாதீ³னவஸம்ப⁴வதோ லஜ்ஜிபேஸலானங் பி⁴க்கூ²னங் தத²தோ அருணுக்³க³மனஸ்ஸ ஜானநத்த²ங் வுத்தாதி த³ட்ட²ப்³பா³.
Kasmā pana imasmiṃ ṭhāne aruṇakathā vuttāti? Imissā aruṇakathāya mahāvisayabhāvato. Kathaṃ? Uposathikā upāsakā ca upāsikāyo ca aruṇuggamanaṃ tathato ajānantā anuggateyeva aruṇe uggatasaññāya khādanīyaṃ vā khādanti, bhojanīyaṃ vā bhuñjanti, mālāgandhādīni vā dhārenti, tato tesaṃ sīlaṃ bhijjati. Sāmaṇerā tatheva vikālabhojanaṃ bhuñjitvā sīlavināsaṃ pāpuṇanti. Nissayapaṭipannakā bhikkhū ācariyupajjhāyehi vinā bahisīme carantā nissayappassambhanaṃ pāpuṇanti, antovasse bhikkhū upacārasīmato bahigacchantā vassacchedaṃ, tecīvarikā bhikkhū abaddhasīmāyaṃ cīvarena vippavasantā nissaggiyapācittiyaṃ, tathā sattabbhantarasīmāyaṃ, sahaseyyappahonakaṭṭhāne anupasampannamātugāmehi saha sayantā pācittiyaṃ, tathā yāvakālikaṃ bhuñjantā bhikkhū, pārivāsikādayo vattaṃ nikkhipantā ratticchedaṃ. Evamādianekādīnavasambhavato lajjipesalānaṃ bhikkhūnaṃ tathato aruṇuggamanassa jānanatthaṃ vuttāti daṭṭhabbā.
கேசி பன பி⁴க்கூ² அட்³ட⁴ரத்திஸமயே க⁴டிஸுஞ்ஞத்தா அட்³ட⁴ரத்திகாலங் அதிக்கம்ம அஞ்ஞதி³வஸோ ஹோதி, தஸ்மா தஸ்மிங் காலே அருணங் உட்டி²தங் நாம ஹோதீதி மஞ்ஞமானா அட்³ட⁴ரத்திங் அதிக்கம்ம கா²த³னீயபோ⁴ஜனீயாதீ³னி பு⁴ஞ்ஜந்தி, தே பன பு³த்³த⁴ஸமயங் அஜானந்தா வேத³ஸமயமேவ மனஸி கரொந்தா ஏவங் கரொந்தி, தஸ்மா தேஸங் தங்கரணங் பமாணங் ந ஹோதி. ப³ஹவோ பன பி⁴க்கூ² அருணஸ்ஸ பச்சக்க²பா⁴வங் அஜானந்தா அனுமானவஸேன சிந்திதுஞ்ச அஸக்கொந்தா அனுஸ்ஸவவஸேனேவ பரவசனங் ஸத்³த³ஹந்தா அம்ஹாகங் ஆசரியா அருணுக்³க³மனவேலாயங் உட்டா²ய க³ச்ச²ந்தா ஸூரியுக்³க³மனவேலாயங் த்³விஸஹஸ்ஸத³ண்ட³ப்பமாணங் டா²னங் பாபுணந்தி, திஸஹஸ்ஸத³ண்ட³ப்பமாணங் டா²னங் பாபுணந்தீதி ச வத³ந்தி. இமம்ஹா விஹாரா அஸுகங் நாம விஹாரங் அஸுகங் நாம சேதியங் அஸுகங் நாம கா³மங் பாபுணந்தீதிஆதீ³னி ச வத³ந்தீதி ஏவங் அனுஸ்ஸவவசனங் வத³ந்தி, தம்பி அப்பமாணங். கஸ்மா? அத்³தா⁴னங் நாம ப³லவந்தஸ்ஸ ஜவஸம்பன்னஸ்ஸ ச ரஸ்ஸங் ஹோதி, து³ப்³ப³லஸ்ஸ ஸந்தஸ்ஸ ச தீ³க⁴ங் ஹோதி. வுத்தஞ்ஹி ப⁴க³வதா –
Keci pana bhikkhū aḍḍharattisamaye ghaṭisuññattā aḍḍharattikālaṃ atikkamma aññadivaso hoti, tasmā tasmiṃ kāle aruṇaṃ uṭṭhitaṃ nāma hotīti maññamānā aḍḍharattiṃ atikkamma khādanīyabhojanīyādīni bhuñjanti, te pana buddhasamayaṃ ajānantā vedasamayameva manasi karontā evaṃ karonti, tasmā tesaṃ taṃkaraṇaṃ pamāṇaṃ na hoti. Bahavo pana bhikkhū aruṇassa paccakkhabhāvaṃ ajānantā anumānavasena cintituñca asakkontā anussavavaseneva paravacanaṃ saddahantā amhākaṃ ācariyā aruṇuggamanavelāyaṃ uṭṭhāya gacchantā sūriyuggamanavelāyaṃ dvisahassadaṇḍappamāṇaṃ ṭhānaṃ pāpuṇanti, tisahassadaṇḍappamāṇaṃ ṭhānaṃ pāpuṇantīti ca vadanti. Imamhā vihārā asukaṃ nāma vihāraṃ asukaṃ nāma cetiyaṃ asukaṃ nāma gāmaṃ pāpuṇantītiādīni ca vadantīti evaṃ anussavavacanaṃ vadanti, tampi appamāṇaṃ. Kasmā? Addhānaṃ nāma balavantassa javasampannassa ca rassaṃ hoti, dubbalassa santassa ca dīghaṃ hoti. Vuttañhi bhagavatā –
‘‘தீ³கா⁴ ஜாக³ரதோ ரத்தி, தீ³க⁴ங் ஸந்தஸ்ஸ யோஜனங்;
‘‘Dīghā jāgarato ratti, dīghaṃ santassa yojanaṃ;
தீ³கோ⁴ பா³லான ஸங்ஸாரோ, ஸத்³த⁴ம்மங் அவிஜானத’’ந்தி. (த⁴॰ ப॰ 60);
Dīgho bālāna saṃsāro, saddhammaṃ avijānata’’nti. (dha. pa. 60);
தஸ்மா அத்³தா⁴னங் நாம ஸப்³பே³ஸங் ஏகஸதி³ஸங் ந ஹோதீதி அருணுக்³க³மனஸ்ஸ லக்க²ணங் ப⁴விதுங் ந ஸக்கா, ந ச தே ஆயஸ்மந்தோ பிடகத்தயதோ கிஞ்சி ஸாத⁴கபூ⁴தங் வசனங் ஆஹரந்தி, அஸக்கி²கங் அட்³ட³ங் கரொந்தி விய யதா²ஜ்ஜா²ஸயமேவ வத³ந்தீதி பமாணங் ந ஹோதி.
Tasmā addhānaṃ nāma sabbesaṃ ekasadisaṃ na hotīti aruṇuggamanassa lakkhaṇaṃ bhavituṃ na sakkā, na ca te āyasmanto piṭakattayato kiñci sādhakabhūtaṃ vacanaṃ āharanti, asakkhikaṃ aḍḍaṃ karonti viya yathājjhāsayameva vadantīti pamāṇaṃ na hoti.
அஞ்ஞே பன –
Aññe pana –
‘‘அதீதரத்தியா யாமோ;
‘‘Atītarattiyā yāmo;
பச்சி²மொட்³ட⁴மமுஸ்ஸ வா;
Pacchimoḍḍhamamussa vā;
பா⁴வினியாதி³ப்பஹாரோ;
Bhāviniyādippahāro;
தத³ட்³ட⁴ங் வாஜ்ஜதெஹ்ய ஹோதி –
Tadaḍḍhaṃ vājjatehya hoti –
கச்சாயனஸாரப்பகரணாக³தங் கா³த²ங் வத்வா அதீதரத்தியா பச்சி²மோ யாமோ அஜ்ஜ பரியாபன்னோ, தஸ்மா பச்சி²மயாமஸ்ஸ ஆதி³தோ பட்டா²ய அருணங் உக்³க³ச்ச²தீ’’தி வத³ந்தி. அயங் வாதோ³ ஸகாரணஸஞ்ஞாபகத்தா புரிமேஹி ப³லவா ஹோதி, ஏவங் ஸந்தேபி அயுத்தோயேவ. கஸ்மா? அயஞ்ஹி கா³தா² பா³ஹிரஸத்³த³ஸத்தே² ஜங்க³தா³ஸப்பகரணே வுத்தனயேன அஜ்ஜ ப⁴வா அஜ்ஜதனீதி வுத்தஅஜ்ஜவோஹாரஸ்ஸ பவத்தனகாலங் த³ஸ்ஸேதுங் வுத்தா, ந பிடகத்தயே வுத்தஸ்ஸ அருணுக்³க³மனஸ்ஸ காலங் த³ஸ்ஸேதுங், தஸ்மா அஞ்ஞஸாத்⁴யஸ்ஸ அஞ்ஞஸாத⁴கேன ஸாதி⁴தத்தா அயுத்தோயேவ.
Kaccāyanasārappakaraṇāgataṃ gāthaṃ vatvā atītarattiyā pacchimo yāmo ajja pariyāpanno, tasmā pacchimayāmassa ādito paṭṭhāya aruṇaṃ uggacchatī’’ti vadanti. Ayaṃ vādo sakāraṇasaññāpakattā purimehi balavā hoti, evaṃ santepi ayuttoyeva. Kasmā? Ayañhi gāthā bāhirasaddasatthe jaṅgadāsappakaraṇe vuttanayena ajja bhavā ajjatanīti vuttaajjavohārassa pavattanakālaṃ dassetuṃ vuttā, na piṭakattaye vuttassa aruṇuggamanassa kālaṃ dassetuṃ, tasmā aññasādhyassa aññasādhakena sādhitattā ayuttoyeva.
அபரே பன ‘‘பஹாரோ யாமஸஞ்ஞிதோ’’தி அபி⁴தா⁴னப்பதீ³பிகாயங் வுத்தத்தா பஹாரயாமஸத்³தா³னங் ஏகத்த²த்தா தத்தே²வ ‘‘தியாமா ஸங்வரீ ப⁴வே’’தி வுத்தத்தா ரத்தியா ச தியாமபா⁴வதோ பாளியஞ்ச (உதா³॰ 45; சூளவ॰ 383) ‘‘அபி⁴க்கந்தா , ப⁴ந்தே, ரத்தி, நிக்க²ந்தோ பச்சி²மோ யாமோ, உத்³த⁴ஸ்தோ அருணோ’’தி ஆக³தத்தா இதா³னி ரத்தியா சதூஸு பஹாரேஸு ததியப்பஹாரஸ்ஸ அவஸானே அருணோ உக்³க³தோ, தஸ்மா அவஸேஸஏகப்பஹாரமத்தோ காலோ தி³வஸபா⁴க³ங் ப⁴ஜதீதி வதெ³ய்யுங், அயங் வாதோ³ ததியவாத³தோபி ப³லவதரோ. கஸ்மா? ஞாபகஞாப்யானங் அனுரூபபா⁴வதோ. ததா² ஹி ‘‘பஹாரோ யாமஸஞ்ஞிதோ’’தி அயங் ஞாபகோ பஹாரயாமானங் ஏகத்த²பா⁴வஸ்ஸ அனுரூபோ, ‘‘தியாமா ஸங்வரீப⁴வே’’தி அயங் ரத்தியா தியாமபா⁴வஸ்ஸ, ‘‘பாளியஞ்சா’’திஆதி³ ததியப்பஹாரஸ்ஸ அவஸானே அருணுக்³க³மனஸ்ஸ, ததா²பி அயுத்தோயேவ ஹோதி. கஸ்மா? ‘‘அவஸேஸஏகப்பஹாரமத்தோ காலோ தி³வஸபா⁴க³ங் ப⁴ஜதீ’’தி வசனஸ்ஸ விருத்³த⁴த்தா. மஜ்ஜி²மதே³ஸே ஹி த³ஸக⁴டிகாபமாணஸ்ஸ காலஸ்ஸ ஏகப்பஹாரத்தா ஸப்³பா³ ரத்தி தியாமாவ ஹோதி, ந சதுயாமா, இதா³னி பன பச்சந்தவிஸயேஸு ஸத்தட்ட²க⁴டிகாமத்தஸ்ஸ காலஸ்ஸ ஏகப்பஹாரகதத்தா சதுப்பஹாரா ப⁴வதி, தஸ்மா மஜ்ஜி²மதே³ஸவோஹாரங் க³ஹெத்வா அபி⁴தா⁴னப்பதீ³பிகாயஞ்ச ‘‘தியாமா ஸங்வரீ ப⁴வே’’தி வுத்தங், பாளியஞ்ச (உதா³॰ 45; சூளவ॰ 383) ‘‘நிக்க²ந்தோ பச்சி²மோ யாமோ, உத்³த⁴ஸ்தோ அருணோ’’தி, தஸ்மா ரத்திபரியோஸானேயேவ அருணோ உக்³க³தோதி த³ட்ட²ப்³போ³. ததா² ஹி வுத்தங் விமதிவினோத³னியங் (வி॰ வி॰ டீ॰ மஹாவக்³க³ 2.201) ‘‘ததா² பாரிவாஸிகாதீ³னம்பி அருணங் அனுட்டா²பெத்வா வத்தங் நிக்கி²பந்தானங் ரத்திச்சே²தோ³ வுத்தோ, உக்³க³தே அருணே நிக்கி²பிதப்³ப³ந்தி ஹி வுத்த’’ந்தி.
Apare pana ‘‘pahāro yāmasaññito’’ti abhidhānappadīpikāyaṃ vuttattā pahārayāmasaddānaṃ ekatthattā tattheva ‘‘tiyāmā saṃvarī bhave’’ti vuttattā rattiyā ca tiyāmabhāvato pāḷiyañca (udā. 45; cūḷava. 383) ‘‘abhikkantā , bhante, ratti, nikkhanto pacchimo yāmo, uddhasto aruṇo’’ti āgatattā idāni rattiyā catūsu pahāresu tatiyappahārassa avasāne aruṇo uggato, tasmā avasesaekappahāramatto kālo divasabhāgaṃ bhajatīti vadeyyuṃ, ayaṃ vādo tatiyavādatopi balavataro. Kasmā? Ñāpakañāpyānaṃ anurūpabhāvato. Tathā hi ‘‘pahāro yāmasaññito’’ti ayaṃ ñāpako pahārayāmānaṃ ekatthabhāvassa anurūpo, ‘‘tiyāmā saṃvarībhave’’ti ayaṃ rattiyā tiyāmabhāvassa, ‘‘pāḷiyañcā’’tiādi tatiyappahārassa avasāne aruṇuggamanassa, tathāpi ayuttoyeva hoti. Kasmā? ‘‘Avasesaekappahāramatto kālo divasabhāgaṃ bhajatī’’ti vacanassa viruddhattā. Majjhimadese hi dasaghaṭikāpamāṇassa kālassa ekappahārattā sabbā ratti tiyāmāva hoti, na catuyāmā, idāni pana paccantavisayesu sattaṭṭhaghaṭikāmattassa kālassa ekappahārakatattā catuppahārā bhavati, tasmā majjhimadesavohāraṃ gahetvā abhidhānappadīpikāyañca ‘‘tiyāmā saṃvarī bhave’’ti vuttaṃ, pāḷiyañca (udā. 45; cūḷava. 383) ‘‘nikkhanto pacchimo yāmo, uddhasto aruṇo’’ti, tasmā rattipariyosāneyeva aruṇo uggatoti daṭṭhabbo. Tathā hi vuttaṃ vimativinodaniyaṃ (vi. vi. ṭī. mahāvagga 2.201) ‘‘tathā pārivāsikādīnampi aruṇaṃ anuṭṭhāpetvā vattaṃ nikkhipantānaṃ ratticchedo vutto, uggate aruṇe nikkhipitabbanti hi vutta’’nti.
ஸஹஸெய்யஸிக்கா²பதே³பி (பாசி॰ 52-54) ‘‘அனுபஸம்பன்னேஹி ஸஹ நிவுத்த²பா⁴வபரிமோசனத்த²ங் புராருணா நிக்க²மித்வா’’திஆதி³ வுத்தங். ஏவங் சீவரவிப்பவாஸாதீ³ஸு ச ஸப்³ப³த்த² ரத்திபரியோஸானே ஆக³மனவஸேன அருணுக்³க³மனங் த³ஸ்ஸிதங், ந அதீதாருணவஸேனாதி. ஜாதகட்ட²கதா²யம்பி (ஜா॰ அட்ட²॰ 5.21.255) ‘‘ரத்திபரியோஸானேதி அத்தோ²’’தி. ந கேவலங் மஜ்ஜி²மதே³ஸேஸு ரத்தியாயேவ திப்பஹாரபா⁴வோ ஹோதி , அத² கோ² தி³வஸஸ்ஸபி. ததா² ஹி வுத்தங் அட்ட²ஸாலினியங் (த⁴॰ ஸ॰ அட்ட²॰ நிதா³னகதா²) ‘‘ஸம்மாஸம்பு³த்³த⁴ஸ்ஸ அபி⁴த⁴ம்மதே³ஸனாபரியோஸானஞ்ச தேஸங் பி⁴க்கூ²னங் ஸத்தப்பகரணஉக்³க³ஹணஞ்ச ஏகப்பஹாரேனேவ ஹோதீ’’தி, மூலடீகாயஞ்ச (த⁴॰ ஸ॰ மூலடீ॰ நிதா³னகதா²வண்ணனா) ‘‘ஏகப்பஹாரேனாதி எத்த² பஹாரோதி தி³வஸஸ்ஸ ததியபா⁴கோ³ வுச்சதீ’’தி, தஸ்மா ஏகோ ரத்திதி³வோ ச²ப்பஹாரோ ஹோதீதி விஞ்ஞாயதி. ஏவங் மஜ்ஜி²மதே³ஸவோஹாரேன தியாமஸங்கா²தஸ்ஸ திப்பஹாரஸ்ஸ அவஸானே ஸப்³ப³ரத்திபரியோஸானே உட்டி²தங் அருணங் பச்சந்ததே³ஸவோஹாரேன திப்பஹாரஸ்ஸ அவஸானேதி க³ஹெத்வா ஏகப்பஹாராவஸேஸகாலே அருணோ உக்³க³தோதி வுத்தத்தா அயம்பி வாதோ³ அயுத்தோயேவ ஹோதீதி த³ட்ட²ப்³போ³.
Sahaseyyasikkhāpadepi (pāci. 52-54) ‘‘anupasampannehi saha nivutthabhāvaparimocanatthaṃ purāruṇā nikkhamitvā’’tiādi vuttaṃ. Evaṃ cīvaravippavāsādīsu ca sabbattha rattipariyosāne āgamanavasena aruṇuggamanaṃ dassitaṃ, na atītāruṇavasenāti. Jātakaṭṭhakathāyampi (jā. aṭṭha. 5.21.255) ‘‘rattipariyosāneti attho’’ti. Na kevalaṃ majjhimadesesu rattiyāyeva tippahārabhāvo hoti , atha kho divasassapi. Tathā hi vuttaṃ aṭṭhasāliniyaṃ (dha. sa. aṭṭha. nidānakathā) ‘‘sammāsambuddhassa abhidhammadesanāpariyosānañca tesaṃ bhikkhūnaṃ sattappakaraṇauggahaṇañca ekappahāreneva hotī’’ti, mūlaṭīkāyañca (dha. sa. mūlaṭī. nidānakathāvaṇṇanā) ‘‘ekappahārenāti ettha pahāroti divasassa tatiyabhāgo vuccatī’’ti, tasmā eko rattidivo chappahāro hotīti viññāyati. Evaṃ majjhimadesavohārena tiyāmasaṅkhātassa tippahārassa avasāne sabbarattipariyosāne uṭṭhitaṃ aruṇaṃ paccantadesavohārena tippahārassa avasāneti gahetvā ekappahārāvasesakāle aruṇo uggatoti vuttattā ayampi vādo ayuttoyeva hotīti daṭṭhabbo.
ப³ஹவோ பன பண்டி³தா ‘‘கு²த்³த³ஸிக்கா²னிஸ்ஸயே வுத்தங் –
Bahavo pana paṇḍitā ‘‘khuddasikkhānissaye vuttaṃ –
‘ஸேதருணஞ்ச பட²மங், து³தியங் நந்தி³யாவட்டங்;
‘Setaruṇañca paṭhamaṃ, dutiyaṃ nandiyāvaṭṭaṃ;
ததியங் தம்ப³வண்ணஞ்ச, சதுத்த²ங் க³த்³ரப⁴ங் முக²’ந்தி. –
Tatiyaṃ tambavaṇṇañca, catutthaṃ gadrabhaṃ mukha’nti. –
இமங் கா³த²ங் நிஸ்ஸாய ஏகரத்தியங் அருணோ சதுக்க²த்துங் உட்ட²ஹதி, தத்த² பட²மங் ஸேதவண்ணங் ஹோதி, து³தியங் நந்தி³யாவட்டபுப்ப²வண்ணங் ஹோதி, ததியங் தம்ப³வண்ணங் ஹோதி, சதுத்த²ங் க³த்³ரப⁴முக²வண்ணங் ஹோதீ’’தி வத்வா ரத்தோபா⁴ஸதோ புரேதரங் அதீதரத்திகாலேயேவ வத்தனிக்கி²பனாதி³கம்மங் கரொந்தி. தேஸங் தங் கரணங் அனிஸம்மகாரிதங் ஆபஜ்ஜதி. அயஞ்ஹி கா³தா² நேவ பாளியங் தி³ஸ்ஸதி, ந அட்ட²கதா²யங், ந டீகாஸு, கேவலங் நிஸ்ஸயே ஏவ, நிஸ்ஸயேஸு ச ஏகஸ்மிங்யேவ கு²த்³த³ஸிக்கா²னிஸ்ஸயே தி³ஸ்ஸதி, ந அஞ்ஞனிஸ்ஸயேஸு, தத்தா²பி நேவ புப்³பா³பரஸம்ப³ந்தோ⁴ தி³ஸ்ஸதி, ந ஹேதுப²லாதி³பா⁴வோ, ந ச லிங்க³னியமோதி ந நிஸ்ஸயகாராசரியேன ட²பிதா ப⁴வெய்ய, அத² கோ² பச்சா² அஞ்ஞேஹி லேக²கேஹி வா அத்தனோ இச்சா²னுரூபங் லிகி²தா ப⁴வெய்ய, தஸ்மா அயங் கா³தா² குதோ ஆப⁴தா பாளிதோ வா அட்ட²கதா²தோ வா டீகாதோ வா வினயதோ வா ஸுத்தந்ததோ வா அபி⁴த⁴ம்மதோ வாதி பப⁴வங் அபரியேஸித்வா நிஸ்ஸயே தி³ட்ட²மத்தமேவ ஸாரதோ க³ஹெத்வா பாளியட்ட²கதா²டீகாஸு வுத்தவசனங் அனிஸாமெத்வா கதத்தா அனிஸம்மகாரிதங் ஆபஜ்ஜதி.
Imaṃ gāthaṃ nissāya ekarattiyaṃ aruṇo catukkhattuṃ uṭṭhahati, tattha paṭhamaṃ setavaṇṇaṃ hoti, dutiyaṃ nandiyāvaṭṭapupphavaṇṇaṃ hoti, tatiyaṃ tambavaṇṇaṃ hoti, catutthaṃ gadrabhamukhavaṇṇaṃ hotī’’ti vatvā rattobhāsato puretaraṃ atītarattikāleyeva vattanikkhipanādikammaṃ karonti. Tesaṃ taṃ karaṇaṃ anisammakāritaṃ āpajjati. Ayañhi gāthā neva pāḷiyaṃ dissati, na aṭṭhakathāyaṃ, na ṭīkāsu, kevalaṃ nissaye eva, nissayesu ca ekasmiṃyeva khuddasikkhānissaye dissati, na aññanissayesu, tatthāpi neva pubbāparasambandho dissati, na hetuphalādibhāvo, na ca liṅganiyamoti na nissayakārācariyena ṭhapitā bhaveyya, atha kho pacchā aññehi lekhakehi vā attano icchānurūpaṃ likhitā bhaveyya, tasmā ayaṃ gāthā kuto ābhatā pāḷito vā aṭṭhakathāto vā ṭīkāto vā vinayato vā suttantato vā abhidhammato vāti pabhavaṃ apariyesitvā nissaye diṭṭhamattameva sārato gahetvā pāḷiyaṭṭhakathāṭīkāsu vuttavacanaṃ anisāmetvā katattā anisammakāritaṃ āpajjati.
தத்ராயங் பாளி ‘‘தேன கோ² பன ஸமயேன பு³த்³தோ⁴ ப⁴க³வா ஸீதாஸு ஹேமந்திகாஸு ரத்தீஸு அந்தரட்ட²காஸு ஹிமபாதஸமயே ரத்திங் அஜ்ஜோ²காஸே ஏகசீவரோ நிஸீதி³, ந ப⁴க³வந்தங் ஸீதங் அஹோஸி. நிக்க²ந்தே பட²மே யாமே ஸீதங் ப⁴க³வந்தங் அஹோஸி, து³தியங் ப⁴க³வா சீவரங் பாருபி, ந ப⁴க³வந்தங் ஸீதங் அஹோஸி. நிக்க²ந்தே மஜ்ஜி²மே யாமே ஸீதங் ப⁴க³வந்தங் அஹோஸி, ததியங் ப⁴க³வா சீவரங் பாருபி, ந ப⁴க³வந்தங் ஸீதங் அஹோஸி. நிக்க²ந்தே பச்சி²மே யாமே உத்³த⁴ஸ்தே அருணே நந்தி³முகி²யா ரத்தியா ஸீதங் ப⁴க³வந்தங் அஹோஸி, சதுத்த²ங் ப⁴க³வா சீவரங் பாருபி, ந ப⁴க³வந்தங் ஸீதங் அஹோஸீ’’தி. அயங் மஹாவக்³கே³ (மஹாவ॰ 346) சீவரக்க²ந்த⁴காக³தா வினயபாளி. பாளியங் நந்தி³முகி²யாதி துட்டி²முகி²யா, பஸன்னதி³ஸாமுகா²யாதி அத்தோ². அயங் தங்ஸங்வண்ணனாய விமதிவினோத³னீபாடோ² (வி॰ வி॰ டீ॰ மஹாவக்³க³ 2.346).
Tatrāyaṃ pāḷi ‘‘tena kho pana samayena buddho bhagavā sītāsu hemantikāsu rattīsu antaraṭṭhakāsu himapātasamaye rattiṃ ajjhokāse ekacīvaro nisīdi, na bhagavantaṃ sītaṃ ahosi. Nikkhante paṭhame yāme sītaṃ bhagavantaṃ ahosi, dutiyaṃ bhagavā cīvaraṃ pārupi, na bhagavantaṃ sītaṃ ahosi. Nikkhante majjhime yāme sītaṃ bhagavantaṃ ahosi, tatiyaṃ bhagavā cīvaraṃ pārupi, na bhagavantaṃ sītaṃ ahosi. Nikkhante pacchime yāme uddhaste aruṇe nandimukhiyā rattiyā sītaṃ bhagavantaṃ ahosi, catutthaṃ bhagavā cīvaraṃ pārupi, na bhagavantaṃ sītaṃ ahosī’’ti. Ayaṃ mahāvagge (mahāva. 346) cīvarakkhandhakāgatā vinayapāḷi. Pāḷiyaṃ nandimukhiyāti tuṭṭhimukhiyā, pasannadisāmukhāyāti attho. Ayaṃ taṃsaṃvaṇṇanāya vimativinodanīpāṭho (vi. vi. ṭī. mahāvagga 2.346).
‘‘தேன கோ² பன ஸமயேன பு³த்³தோ⁴ ப⁴க³வா ஸாவத்தி²யங் விஹரதி புப்³பா³ராமே மிகா³ரமாதுபாஸாதே³ . தேன கோ² பன ஸமயேன ப⁴க³வா தத³ஹுபோஸதே² பி⁴க்கு²ஸங்க⁴பரிவுதோ நிஸின்னோ ஹோதி. அத² கோ² ஆயஸ்மா ஆனந்தோ³ அபி⁴க்கந்தாய ரத்தியா நிக்க²ந்தே பட²மே யாமே உட்டா²யாஸனா ஏகங்ஸங் உத்தராஸங்க³ங் கரித்வா யேன ப⁴க³வா தேனஞ்ஜலிங் பணாமெத்வா ப⁴க³வந்தங் ஏதத³வோச – அபி⁴க்கந்தா, ப⁴ந்தே ரத்தி, நிக்க²ந்தோ பட²மோ யாமோ, சிரனிஸின்னோ பி⁴க்கு²ஸங்கோ⁴, உத்³தி³ஸது, ப⁴ந்தே, ப⁴க³வா பி⁴க்கூ²னங் பாதிமொக்க²ந்தி. ஏவங் வுத்தே ப⁴க³வா துண்ஹீ அஹோஸி. து³தியம்பி கோ² ஆயஸ்மா ஆனந்தோ³ அபி⁴க்கந்தாய ரத்தியா நிக்க²ந்தே மஜ்ஜி²மே யாமே உட்டா²யாஸனா ஏகங்ஸங் உத்தராஸங்க³ங் கரித்வா யேன ப⁴க³வா தேனஞ்ஜலிங் பணாமெத்வா ப⁴க³வந்தங் ஏதத³வோச – அபி⁴க்கந்தா, ப⁴ந்தே, ரத்தி, நிக்க²ந்தோ மஜ்ஜி²மோ யாமோ, சிரனிஸின்னோ பி⁴க்கு²ஸங்கோ⁴, உத்³தி³ஸது, ப⁴ந்தே, ப⁴க³வா பி⁴க்கூ²னங் பாதிமொக்க²ந்தி. து³தியம்பி ப⁴க³வா துண்ஹீ அஹோஸி. ததியம்பி கோ² ஆயஸ்மா ஆனந்தோ³ அபி⁴க்கந்தாய ரத்தியா நிக்க²ந்தே பச்சி²மே யாமே உத்³த⁴ஸ்தே அருணே நந்தி³முகி²யா ரத்தியா உட்டா²யாஸனா ஏகங்ஸங் உத்தராஸங்க³ங் கரித்வா யேன ப⁴க³வா தேனஞ்ஜலிங் பணாமெத்வா ப⁴க³வந்தங் ஏதத³வோச – அபி⁴க்கந்தா, ப⁴ந்தே, ரத்தி, நிக்க²ந்தோ பச்சி²மோ யாமோ, உத்³த⁴ஸ்தங் அருணங், நந்தி³முகீ² ரத்தி, சிரனிஸின்னோ பி⁴க்கு²ஸங்கோ⁴, உத்³தி³ஸது ப⁴ந்தே ப⁴க³வா பி⁴க்கூ²னங் பாதிமொக்க²ந்தி. அபரிஸுத்³தா⁴, ஆனந்த³, பரிஸா’’தி (சூளவ॰ 383). அயங் சூளவக்³கே³ பாதிமொக்க²ட்ட²பனக்க²ந்த⁴காக³தா அபராபி வினயபாளி.
‘‘Tena kho pana samayena buddho bhagavā sāvatthiyaṃ viharati pubbārāme migāramātupāsāde . Tena kho pana samayena bhagavā tadahuposathe bhikkhusaṅghaparivuto nisinno hoti. Atha kho āyasmā ānando abhikkantāya rattiyā nikkhante paṭhame yāme uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – abhikkantā, bhante ratti, nikkhanto paṭhamo yāmo, ciranisinno bhikkhusaṅgho, uddisatu, bhante, bhagavā bhikkhūnaṃ pātimokkhanti. Evaṃ vutte bhagavā tuṇhī ahosi. Dutiyampi kho āyasmā ānando abhikkantāya rattiyā nikkhante majjhime yāme uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – abhikkantā, bhante, ratti, nikkhanto majjhimo yāmo, ciranisinno bhikkhusaṅgho, uddisatu, bhante, bhagavā bhikkhūnaṃ pātimokkhanti. Dutiyampi bhagavā tuṇhī ahosi. Tatiyampi kho āyasmā ānando abhikkantāya rattiyā nikkhante pacchime yāme uddhaste aruṇe nandimukhiyā rattiyā uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – abhikkantā, bhante, ratti, nikkhanto pacchimo yāmo, uddhastaṃ aruṇaṃ, nandimukhī ratti, ciranisinno bhikkhusaṅgho, uddisatu bhante bhagavā bhikkhūnaṃ pātimokkhanti. Aparisuddhā, ānanda, parisā’’ti (cūḷava. 383). Ayaṃ cūḷavagge pātimokkhaṭṭhapanakkhandhakāgatā aparāpi vinayapāḷi.
நந்தி³முகி²யா ரத்தியாதி அருணுட்டி²தகாலே பீதிமுகா² விய ரத்தி கா²யதி. தேனாஹ ‘‘நந்தி³முகி²யா’’தி (சூளவ॰ அட்ட²॰ 383) அயங் தங்ஸங்வண்ணனாபூ⁴தஸமந்தபாஸாதி³கட்ட²கதா²பாடோ². அபி⁴க்கந்தாதி பரிக்கீ²ணா. உத்³த⁴ஸ்தே அருணேதி உக்³க³தே அருணஸீஸே. நந்தி³முகி²யாதி துட்டி²முகி²யா. அயங் தங்ஸங்வண்ணனாபூ⁴தஸாரத்த²தீ³பனீபாடோ² (ஸாரத்த²॰ டீ॰ சூளவக்³க³ 3.383). பாளியங் நந்தி³முகி²யாதி ஓதா³ததி³ஸாமுகி²தாய துட்ட²முகி²யா. அயங் தங்ஸங்வண்ணனாய (வி॰ வி॰ டீ॰ சூளவக்³க³ 2.283) விமதிவினோத³னீபாடோ².
Nandimukhiyā rattiyāti aruṇuṭṭhitakāle pītimukhā viya ratti khāyati. Tenāha ‘‘nandimukhiyā’’ti (cūḷava. aṭṭha. 383) ayaṃ taṃsaṃvaṇṇanābhūtasamantapāsādikaṭṭhakathāpāṭho. Abhikkantāti parikkhīṇā. Uddhaste aruṇeti uggate aruṇasīse. Nandimukhiyāti tuṭṭhimukhiyā. Ayaṃ taṃsaṃvaṇṇanābhūtasāratthadīpanīpāṭho (sārattha. ṭī. cūḷavagga 3.383). Pāḷiyaṃ nandimukhiyāti odātadisāmukhitāya tuṭṭhamukhiyā. Ayaṃ taṃsaṃvaṇṇanāya (vi. vi. ṭī. cūḷavagga 2.283) vimativinodanīpāṭho.
‘‘ததியம்பி கோ² ஆயஸ்மா ஆனந்தோ³ அபி⁴க்கந்தாயரத்தியா நிக்க²ந்தே பச்சி²மே யாமே உத்³த⁴ஸ்தே அருணே நந்தி³முகி²யா ரத்தியா உட்டா²யாஸனா ஏகங்ஸங் சீவரங் கத்வா யேன ப⁴க³வா தேனஞ்ஜலிங் பணாமெத்வா ப⁴க³வந்தங் ஏதத³வோச – அபி⁴க்கந்தா, ப⁴ந்தே, ரத்தி, நிக்க²ந்தோ பச்சி²மோ யாமோ, உத்³த⁴ஸ்தோ அருணோ, நந்தி³முகீ² ரத்தி, சிரனிஸின்னா ஆக³ந்துகா பி⁴க்கூ², படிஸம்மோத³து, ப⁴ந்தே, ப⁴க³வா ஆக³ந்துகே பி⁴க்கூ²’’தி. அயங் உதா³னாக³தா ஸுத்தந்தபாளி (உதா³॰ 45). உத்³த⁴ஸ்தே அருணேதி உக்³க³தே அருணே. அருணோ நாம புரத்தி²மதி³ஸாயங் ஸூரியோத³யதோ புரேதரமேவ உட்டி²தோபா⁴ஸோ. நந்தி³முகி²யா ரத்தியாதி அருணஸ்ஸ உக்³க³தத்தா ஏவ அருணோபா⁴ய ஸூரியாலோகூபஜீவினோ ஸத்தே நந்தா³பனமுகி²யா ரத்தியா ஜாதாய, விபா⁴யமானாயாதி அத்தோ². அயங் தங்ஸங்வண்ணனாபூ⁴தா உதா³னட்ட²கதா² (உதா³॰ அட்ட²॰ 23).
‘‘Tatiyampi kho āyasmā ānando abhikkantāyarattiyā nikkhante pacchime yāme uddhaste aruṇe nandimukhiyā rattiyā uṭṭhāyāsanā ekaṃsaṃ cīvaraṃ katvā yena bhagavā tenañjaliṃ paṇāmetvā bhagavantaṃ etadavoca – abhikkantā, bhante, ratti, nikkhanto pacchimo yāmo, uddhasto aruṇo, nandimukhī ratti, ciranisinnā āgantukā bhikkhū, paṭisammodatu, bhante, bhagavā āgantuke bhikkhū’’ti. Ayaṃ udānāgatā suttantapāḷi (udā. 45). Uddhastearuṇeti uggate aruṇe. Aruṇo nāma puratthimadisāyaṃ sūriyodayato puretarameva uṭṭhitobhāso. Nandimukhiyā rattiyāti aruṇassa uggatattā eva aruṇobhāya sūriyālokūpajīvino satte nandāpanamukhiyā rattiyā jātāya, vibhāyamānāyāti attho. Ayaṃ taṃsaṃvaṇṇanābhūtā udānaṭṭhakathā (udā. aṭṭha. 23).
இதி எத்தகாஸு வினயஸுத்தந்தாக³தாஸு பாளியட்ட²கதா²டீகாஸு ஏகஸ்மிம்பிடா²னே அருணோ சதுக்க²த்துங் உக்³க³தோதி நத்தி², ஏகவாரமேவ வுத்தோ. சதுப்³பி³த⁴வண்ணஸமன்னாக³தோதிபி நத்தி², ஏகவண்ணோ ஏவ வுத்தோ. ஜாதகட்ட²கதா²யம்பி (ஜா॰ அட்ட²॰ 5.21.255) ரத்தவண்ணோ ஏவ வுத்தோ, ந ஸேதவண்ணாதி³கோ. நந்தி³முகீ²தி ச ஸத்தே நந்தா³பனதி³ஸாமுகீ² ரத்தி ஏவ வுத்தா, ந அருணஸ்ஸ நந்தி³யாவட்டபுப்ப²ஸதி³ஸவண்ணதா. தேனாஹ ‘‘ஸத்தே நந்தா³பனமுகி²யா ரத்தியா’’தி. ஏவங் அபி⁴தா⁴னப்பதீ³பிகாபகரணவசனேன விருத்³த⁴த்தா பாளியட்ட²கதா²தீ³ஹி அஸங்ஸந்த³னதோ து³ப்³ப³லஸாத⁴கத்தா ச அயம்பி வாதோ³ அயுத்தோயேவாதி த³ட்ட²ப்³போ³, தஸ்மா ஸம்மாஸம்பு³த்³த⁴ஸ்ஸ ஆணங் அனதிக்கந்தேன லஜ்ஜிபி⁴க்கு²னா யதி³ கேனசி அப்படிச்ச²ன்னே விவடோகாஸே ஹோதி, மச்ச²க்கி²ஸமானஅப்³யத்தரத்தோபா⁴ஸஸ்ஸ பஞ்ஞாயமானகாலதோ பட்டா²ய வத்தனிக்கி²பனாதி³கம்மங் காதப்³ப³ங்.
Iti ettakāsu vinayasuttantāgatāsu pāḷiyaṭṭhakathāṭīkāsu ekasmimpiṭhāne aruṇo catukkhattuṃ uggatoti natthi, ekavārameva vutto. Catubbidhavaṇṇasamannāgatotipi natthi, ekavaṇṇo eva vutto. Jātakaṭṭhakathāyampi (jā. aṭṭha. 5.21.255) rattavaṇṇo eva vutto, na setavaṇṇādiko. Nandimukhīti ca satte nandāpanadisāmukhī ratti eva vuttā, na aruṇassa nandiyāvaṭṭapupphasadisavaṇṇatā. Tenāha ‘‘satte nandāpanamukhiyā rattiyā’’ti. Evaṃ abhidhānappadīpikāpakaraṇavacanena viruddhattā pāḷiyaṭṭhakathādīhi asaṃsandanato dubbalasādhakattā ca ayampi vādo ayuttoyevāti daṭṭhabbo, tasmā sammāsambuddhassa āṇaṃ anatikkantena lajjibhikkhunā yadi kenaci appaṭicchanne vivaṭokāse hoti, macchakkhisamānaabyattarattobhāsassa paññāyamānakālato paṭṭhāya vattanikkhipanādikammaṃ kātabbaṃ.
யதி³ பன பப்³ப³தாதி³னா படிச்ச²ன்னட்டா²னங் ஹோதி, யத்தகேன காலேன விவடட்டா²னே ரத்தோபா⁴ஸோ பஞ்ஞாயதி, ஸூரியமண்ட³லஸ்ஸ தி³ஸ்ஸனகாலதோ ஏகக⁴டிகாமத்தேன வா த்³விக⁴டிகாமத்தேன வா தத்தகங் காலங் ஸல்லக்கெ²த்வா இமஸ்மிங் காலே அருணோ உக்³க³தோ ப⁴வெய்யாதி தக்கெத்வா காதப்³ப³ங், ஸங்ஸயங் அனிச்ச²ந்தேன ததோபி கஞ்சிகாலங் அதி⁴வாஸெத்வா நிஸ்ஸங்ஸயகாலே கத்தப்³ப³ங், அயங் தத்த² ஸாமீசி. அயங் பன வாதோ³ யதா²வுத்தப்பகரணவசனேஹி ஸுட்டு² ஸங்ஸந்த³தி யதா² க³ங்கோ³த³கேன யமுனோத³கங், தஸ்மா பண்டி³தேஹி புனப்புனங் புப்³பா³பரங் ஆலோளெந்தேன மனஸி காதப்³போ³. ஏவங் மனஸி கரித்வா அருணபடிஸங்யுத்தேஸு டா²னேஸு ஸங்ஸயோ சி²ந்தி³தப்³போ³, ஸங்ஸயங் சி²ந்தி³த்வா விஸாரதே³ன ஹுத்வா தங் தங் கம்மங் காதப்³ப³ந்தி.
Yadi pana pabbatādinā paṭicchannaṭṭhānaṃ hoti, yattakena kālena vivaṭaṭṭhāne rattobhāso paññāyati, sūriyamaṇḍalassa dissanakālato ekaghaṭikāmattena vā dvighaṭikāmattena vā tattakaṃ kālaṃ sallakkhetvā imasmiṃ kāle aruṇo uggato bhaveyyāti takketvā kātabbaṃ, saṃsayaṃ anicchantena tatopi kañcikālaṃ adhivāsetvā nissaṃsayakāle kattabbaṃ, ayaṃ tattha sāmīci. Ayaṃ pana vādo yathāvuttappakaraṇavacanehi suṭṭhu saṃsandati yathā gaṅgodakena yamunodakaṃ, tasmā paṇḍitehi punappunaṃ pubbāparaṃ āloḷentena manasi kātabbo. Evaṃ manasi karitvā aruṇapaṭisaṃyuttesu ṭhānesu saṃsayo chinditabbo, saṃsayaṃ chinditvā visāradena hutvā taṃ taṃ kammaṃ kātabbanti.
விஸுத்³த⁴த்தா²ய ஸீலஸ்ஸ, பி⁴க்கூ²னங் பியஸீலினங்;
Visuddhatthāya sīlassa, bhikkhūnaṃ piyasīlinaṃ;
கதாருணகதா² ஏஸா, ந ஸாரம்பா⁴தி³காரணா.
Katāruṇakathā esā, na sārambhādikāraṇā.
தஸ்மா ஸுட்டூ²பதா⁴ரெத்வா, யுத்தங் க³ண்ஹந்து ஸாத⁴வோ;
Tasmā suṭṭhūpadhāretvā, yuttaṃ gaṇhantu sādhavo;
அயுத்தஞ்சே ச²ட்³ட³யந்து, மா ஹொந்து து³ம்மனாத³யோதி.
Ayuttañce chaḍḍayantu, mā hontu dummanādayoti.
இதி வினயஸங்க³ஹஸங்வண்ணனாபூ⁴தே வினயாலங்காரே
Iti vinayasaṅgahasaṃvaṇṇanābhūte vinayālaṅkāre
தி³வாஸெய்யவினிச்ச²யகதா²லங்காரோ நாம
Divāseyyavinicchayakathālaṅkāro nāma
பட²மோ பரிச்சே²தோ³.
Paṭhamo paricchedo.
