| Library / Tipiṭaka / திபிடக • Tipiṭaka / வினயஸங்க³ஹ-அட்ட²கதா² • Vinayasaṅgaha-aṭṭhakathā |
1. தி³வாஸெய்யவினிச்ச²யகதா²
1. Divāseyyavinicchayakathā
1. தத்த² தி³வாஸெய்யாதி தி³வானிபஜ்ஜனங். தத்ராயங் வினிச்ச²யோ – ‘‘அனுஜானாமி, பி⁴க்க²வே, தி³வா படிஸல்லீயந்தேன த்³வாரங் ஸங்வரித்வா படிஸல்லீயிது’’ந்தி (பாரா॰ 77) வசனதோ தி³வா நிபஜ்ஜந்தேன த்³வாரங் ஸங்வரித்வா நிபஜ்ஜிதப்³ப³ங். எத்த² ச கிஞ்சாபி பாளியங் ‘‘அயங் நாம ஆபத்தீ’’தி ந வுத்தா, விவரித்வா நிபன்னதோ³ஸேன பன உப்பன்னே வத்து²ஸ்மிங் த்³வாரங் ஸங்வரித்வா நிபஜ்ஜிதுங் அனுஞ்ஞாதத்தா அஸங்வரித்வா நிபஜ்ஜந்தஸ்ஸ அட்ட²கதா²யங் து³க்கடங் (பாரா॰ அட்ட²॰ 1.77) வுத்தங். ப⁴க³வதோ ஹி அதி⁴ப்பாயங் ஞத்வா உபாலித்தே²ராதீ³ஹி அட்ட²கதா² ட²பிதா. ‘‘அத்தா²பத்தி தி³வா ஆபஜ்ஜதி, நோ ரத்தி’’ந்தி (பரி॰ 323) இமினாபி சேதங் ஸித்³த⁴ங்.
1. Tattha divāseyyāti divānipajjanaṃ. Tatrāyaṃ vinicchayo – ‘‘anujānāmi, bhikkhave, divā paṭisallīyantena dvāraṃ saṃvaritvā paṭisallīyitu’’nti (pārā. 77) vacanato divā nipajjantena dvāraṃ saṃvaritvā nipajjitabbaṃ. Ettha ca kiñcāpi pāḷiyaṃ ‘‘ayaṃ nāma āpattī’’ti na vuttā, vivaritvā nipannadosena pana uppanne vatthusmiṃ dvāraṃ saṃvaritvā nipajjituṃ anuññātattā asaṃvaritvā nipajjantassa aṭṭhakathāyaṃ dukkaṭaṃ (pārā. aṭṭha. 1.77) vuttaṃ. Bhagavato hi adhippāyaṃ ñatvā upālittherādīhi aṭṭhakathā ṭhapitā. ‘‘Atthāpatti divā āpajjati, no ratti’’nti (pari. 323) imināpi cetaṃ siddhaṃ.
2. கீதி³ஸங் பன த்³வாரங் ஸங்வரிதப்³ப³ங், கீதி³ஸங் ந ஸங்வரிதப்³ப³ங்? ருக்க²பத³ரவேளுபத³ரகிலஞ்ஜபண்ணாதீ³னங் யேன கேனசி கவாடங் கத்வா ஹெட்டா² உது³க்க²லே உபரி உத்தரபாஸகே ச பவேஸெத்வா கதங் பரிவத்தகத்³வாரமேவ ஸங்வரிதப்³ப³ங். அஞ்ஞங் கோ³ரூபானங் வஜேஸு விய ருக்க²ஸூசிகண்டகத்³வாரங், கா³மத²கனகங் சக்கலகயுத்தத்³வாரங், ப²லகேஸு வா கிடிகாஸு வா த்³வே தீணி சக்கலகானி யோஜெத்வா கதங் ஸங்ஸரணகிடிகத்³வாரங், ஆபணேஸு விய கதங் உக்³கா⁴டனகிடிகத்³வாரங், த்³வீஸு தீஸு டா²னேஸு வேளுஸலாகா கொ³ப்பெ²த்வா பண்ணகுடீஸு கதங் ஸலாகஹத்த²கத்³வாரங், து³ஸ்ஸஸாணித்³வாரந்தி ஏவரூபங் த்³வாரங் ந ஸங்வரிதப்³ப³ங். பத்தஹத்த²ஸ்ஸ கவாடப்பணாமனே பன ஏகங் து³ஸ்ஸஸாணித்³வாரமேவ அனாபத்திகரங், அவஸேஸானி பணாமெந்தஸ்ஸ ஆபத்தி. தி³வா படிஸல்லீயந்தஸ்ஸ பன பரிவத்தகத்³வாரமேவ ஆபத்திகரங், ஸேஸானி ஸங்வரித்வா வா அஸங்வரித்வா வா நிபஜ்ஜந்தஸ்ஸ ஆபத்தி நத்தி², ஸங்வரித்வா பன நிபஜ்ஜிதப்³ப³ங், ஏதங் வத்தங்.
2. Kīdisaṃ pana dvāraṃ saṃvaritabbaṃ, kīdisaṃ na saṃvaritabbaṃ? Rukkhapadaraveḷupadarakilañjapaṇṇādīnaṃ yena kenaci kavāṭaṃ katvā heṭṭhā udukkhale upari uttarapāsake ca pavesetvā kataṃ parivattakadvārameva saṃvaritabbaṃ. Aññaṃ gorūpānaṃ vajesu viya rukkhasūcikaṇṭakadvāraṃ, gāmathakanakaṃ cakkalakayuttadvāraṃ, phalakesu vā kiṭikāsu vā dve tīṇi cakkalakāni yojetvā kataṃ saṃsaraṇakiṭikadvāraṃ, āpaṇesu viya kataṃ ugghāṭanakiṭikadvāraṃ, dvīsu tīsu ṭhānesu veḷusalākā gopphetvā paṇṇakuṭīsu kataṃ salākahatthakadvāraṃ, dussasāṇidvāranti evarūpaṃ dvāraṃ na saṃvaritabbaṃ. Pattahatthassa kavāṭappaṇāmane pana ekaṃ dussasāṇidvārameva anāpattikaraṃ, avasesāni paṇāmentassa āpatti. Divā paṭisallīyantassa pana parivattakadvārameva āpattikaraṃ, sesāni saṃvaritvā vā asaṃvaritvā vā nipajjantassa āpatti natthi, saṃvaritvā pana nipajjitabbaṃ, etaṃ vattaṃ.
3. பரிவத்தகத்³வாரங் கித்தகேன ஸங்வுதங் ஹோதி? ஸூசிக⁴டிகாஸு தி³ன்னாஸு ஸங்வுதமேவ ஹோதி. அபிச கோ² ஸூசிமத்தேபி தி³ன்னே வட்டதி, க⁴டிகாமத்தேபி தி³ன்னே வட்டதி, த்³வாரபா³ஹங் பு²ஸித்வா ட²பிதமத்தேபி வட்டதி, ஈஸகங் அபு²ஸிதேபி வட்டதி, ஸப்³ப³ந்திமேன விதி⁴னா யாவதா ஸீஸங் நப்பவிஸதி, தாவதா அபு²ஸிதேபி வட்டதி. ஸசே ப³ஹூனங் வளஞ்ஜனட்டா²னங் ஹோதி, பி⁴க்கு²ங் வா ஸாமணேரங் வா ‘‘த்³வாரங், ஆவுஸோ, ஜக்³கா³ஹீ’’தி வத்வாபி நிபஜ்ஜிதுங் வட்டதி. அத² பி⁴க்கூ² சீவரகம்மங் வா அஞ்ஞங் வா கிஞ்சி கரொந்தா நிஸின்னா ஹொந்தி, ‘‘ஏதே த்³வாரங் ஜக்³கி³ஸ்ஸந்தீ’’தி ஆபோ⁴க³ங் கத்வாபி நிபஜ்ஜிதுங் வட்டதி. குருந்த³ட்ட²கதா²யங் பன ‘‘உபாஸகம்பி ஆபுச்சி²த்வா வா ‘ஏஸ ஜக்³கி³ஸ்ஸதீ’தி ஆபோ⁴க³ங் கத்வா வா நிபஜ்ஜிதுங் வட்டதி, கேவலங் பி⁴க்கு²னிங் வா மாதுகா³மங் வா ஆபுச்சி²துங் ந வட்டதீ’’தி வுத்தங், தங் யுத்தங். ஏவங் ஸப்³ப³த்த²பி யோ யோ தே²ரவாதோ³ வா அட்ட²கதா²வாதோ³ வா பச்சா² வுச்சதி, ஸோ ஸோவ பமாணந்தி க³ஹேதப்³ப³ங்.
3. Parivattakadvāraṃ kittakena saṃvutaṃ hoti? Sūcighaṭikāsu dinnāsu saṃvutameva hoti. Apica kho sūcimattepi dinne vaṭṭati, ghaṭikāmattepi dinne vaṭṭati, dvārabāhaṃ phusitvā ṭhapitamattepi vaṭṭati, īsakaṃ aphusitepi vaṭṭati, sabbantimena vidhinā yāvatā sīsaṃ nappavisati, tāvatā aphusitepi vaṭṭati. Sace bahūnaṃ vaḷañjanaṭṭhānaṃ hoti, bhikkhuṃ vā sāmaṇeraṃ vā ‘‘dvāraṃ, āvuso, jaggāhī’’ti vatvāpi nipajjituṃ vaṭṭati. Atha bhikkhū cīvarakammaṃ vā aññaṃ vā kiñci karontā nisinnā honti, ‘‘ete dvāraṃ jaggissantī’’ti ābhogaṃ katvāpi nipajjituṃ vaṭṭati. Kurundaṭṭhakathāyaṃ pana ‘‘upāsakampi āpucchitvā vā ‘esa jaggissatī’ti ābhogaṃ katvā vā nipajjituṃ vaṭṭati, kevalaṃ bhikkhuniṃ vā mātugāmaṃ vā āpucchituṃ na vaṭṭatī’’ti vuttaṃ, taṃ yuttaṃ. Evaṃ sabbatthapi yo yo theravādo vā aṭṭhakathāvādo vā pacchā vuccati, so sova pamāṇanti gahetabbaṃ.
4. அத² த்³வாரஸ்ஸ உது³க்க²லங் வா உத்தரபாஸகோ வா பி⁴ன்னோ ஹோதி அட்ட²பிதோ வா, ஸங்வரிதுங் ந ஸக்கோதி, நவகம்மத்த²ங் வா பன இட்ட²கபுஞ்ஜோ வா மத்திகாதீ³னங் வா ராஸி அந்தொத்³வாரே கதோ ஹோதி, அட்டங் வா ப³ந்த⁴ந்தி, யதா² ஸங்வரிதுங் ந ஸக்கோதி. ஏவரூபே அந்தராயே ஸதி அஸங்வரித்வாபி நிபஜ்ஜிதுங் வட்டதி. யதி³ பன கவாடங் நத்தி², லத்³த⁴கப்பமேவ. உபரி ஸயந்தேன நிஸ்ஸேணிங் ஆரோபெத்வா நிபஜ்ஜிதப்³ப³ங். ஸசே நிஸ்ஸேணிமத்த²கே த²கனகங் ஹோதி, த²கெத்வாபி நிபஜ்ஜிதப்³ப³ங். க³ப்³பே⁴ நிபஜ்ஜந்தேன க³ப்³ப⁴த்³வாரங் வா பமுக²த்³வாரங் வா யங் கிஞ்சி ஸங்வரித்வா நிபஜ்ஜிதுங் வட்டதி. ஸசே ஏககுட்டகே கே³ஹே த்³வீஸு பஸ்ஸேஸு த்³வாரானி கத்வா வளஞ்ஜந்தி, த்³வேபி த்³வாரானி ஜக்³கி³தப்³பா³னி, திபூ⁴மகேபி பாஸாதே³ த்³வாரங் ஜக்³கி³தப்³ப³மேவ. ஸசே பி⁴க்கா²சாரா படிக்கம்ம லோஹபாஸாத³ஸதி³ஸங் பாஸாத³ங் ப³ஹூ பி⁴க்கூ² தி³வாவிஹாரத்த²ங் பவிஸந்தி, ஸங்க⁴த்தே²ரேன த்³வாரபாலஸ்ஸ ‘‘த்³வாரங் ஜக்³கா³ஹீ’’தி வத்வா வா ‘‘த்³வாரஜக்³க³னங் நாம ஏதஸ்ஸ பா⁴ரோ’’தி ஆபோ⁴க³ங் கத்வா வா பவிஸித்வா நிபஜ்ஜிதப்³ப³ங். யாவ ஸங்க⁴னவகேன ஏவமேவ காதப்³ப³ங். புரே பவிஸந்தானங் ‘‘த்³வாரஜக்³க³னங் நாம பச்சி²மானங் பா⁴ரோ’’தி ஏவங் ஆபோ⁴க³ங் காதும்பி வட்டதி. அனாபுச்சா² வா ஆபோ⁴க³ங் அகத்வா வா அந்தோக³ப்³பே⁴ வா அஸங்வுதத்³வாரே ப³ஹி வா நிபஜ்ஜந்தானங் ஆபத்தி. க³ப்³பே⁴ வா ப³ஹி வா நிபஜ்ஜனகாலேபி ‘‘த்³வாரஜக்³க³னங் நாம மஹாத்³வாரே த்³வாரபாலஸ்ஸ பா⁴ரோ’’தி ஆபோ⁴க³ங் கத்வா நிபஜ்ஜிதுங் வட்டதியேவ. ஏவங் லோஹபாஸாதா³தீ³ஸு ஆகாஸதலே நிபஜ்ஜந்தேனபி த்³வாரங் ஸங்வரிதப்³ப³மேவ.
4. Atha dvārassa udukkhalaṃ vā uttarapāsako vā bhinno hoti aṭṭhapito vā, saṃvarituṃ na sakkoti, navakammatthaṃ vā pana iṭṭhakapuñjo vā mattikādīnaṃ vā rāsi antodvāre kato hoti, aṭṭaṃ vā bandhanti, yathā saṃvarituṃ na sakkoti. Evarūpe antarāye sati asaṃvaritvāpi nipajjituṃ vaṭṭati. Yadi pana kavāṭaṃ natthi, laddhakappameva. Upari sayantena nisseṇiṃ āropetvā nipajjitabbaṃ. Sace nisseṇimatthake thakanakaṃ hoti, thaketvāpi nipajjitabbaṃ. Gabbhe nipajjantena gabbhadvāraṃ vā pamukhadvāraṃ vā yaṃ kiñci saṃvaritvā nipajjituṃ vaṭṭati. Sace ekakuṭṭake gehe dvīsu passesu dvārāni katvā vaḷañjanti, dvepi dvārāni jaggitabbāni, tibhūmakepi pāsāde dvāraṃ jaggitabbameva. Sace bhikkhācārā paṭikkamma lohapāsādasadisaṃ pāsādaṃ bahū bhikkhū divāvihāratthaṃ pavisanti, saṅghattherena dvārapālassa ‘‘dvāraṃ jaggāhī’’ti vatvā vā ‘‘dvārajagganaṃ nāma etassa bhāro’’ti ābhogaṃ katvā vā pavisitvā nipajjitabbaṃ. Yāva saṅghanavakena evameva kātabbaṃ. Pure pavisantānaṃ ‘‘dvārajagganaṃ nāma pacchimānaṃ bhāro’’ti evaṃ ābhogaṃ kātumpi vaṭṭati. Anāpucchā vā ābhogaṃ akatvā vā antogabbhe vā asaṃvutadvāre bahi vā nipajjantānaṃ āpatti. Gabbhe vā bahi vā nipajjanakālepi ‘‘dvārajagganaṃ nāma mahādvāre dvārapālassa bhāro’’ti ābhogaṃ katvā nipajjituṃ vaṭṭatiyeva. Evaṃ lohapāsādādīsu ākāsatale nipajjantenapi dvāraṃ saṃvaritabbameva.
அயஞ்ஹெத்த² ஸங்கே²போ – இத³ங் தி³வாபடிஸல்லீயனங் யேன கேனசி பரிக்கி²த்தே ஸத்³வாரப³ந்தே⁴ டா²னே கதி²தங், தஸ்மா அப்³போ⁴காஸே வா ருக்க²மூலே வா மண்ட³பே வா யத்த² கத்த²சி ஸத்³வாரப³ந்தே⁴ நிபஜ்ஜந்தேன த்³வாரங் ஸங்வரித்வாவ நிபஜ்ஜிதப்³ப³ங். ஸசே மஹாபரிவேணங் ஹோதி மஹாபோ³தி⁴யங்க³ணலோஹபாஸாத³ங்க³ணஸதி³ஸங் ப³ஹூனங் ஓஸரணட்டா²னங், யத்த² த்³வாரங் ஸங்வுதம்பி ஸங்வுதட்டா²னே ந திட்ட²தி, த்³வாரங் அலப⁴ந்தா பாகாரங் ஆருஹித்வாபி விசரந்தி, தத்த² ஸங்வரணகிச்சங் நத்தி². ரத்திங் த்³வாரங் விவரித்வா நிபன்னோ அருணே உக்³க³தே வுட்டா²தி, அனாபத்தி. ஸசே பன பபு³ஜ்ஜி²த்வா புன ஸுபதி, ஆபத்தி. யோ பன ‘‘அருணே உக்³க³தே வுட்ட²ஹிஸ்ஸாமீ’’தி பரிச்சி²ந்தி³த்வாவ த்³வாரங் அஸங்வரித்வா ரத்திங் நிபஜ்ஜதி, யதா²பரிச்சே²த³மேவ வுட்டா²தி, தஸ்ஸ ஆபத்தியேவ. மஹாபச்சரியங் பன ‘‘ஏவங் நிபஜ்ஜந்தோ அனாத³ரியது³க்கடாபி ந முச்சதீ’’தி வுத்தங்.
Ayañhettha saṅkhepo – idaṃ divāpaṭisallīyanaṃ yena kenaci parikkhitte sadvārabandhe ṭhāne kathitaṃ, tasmā abbhokāse vā rukkhamūle vā maṇḍape vā yattha katthaci sadvārabandhe nipajjantena dvāraṃ saṃvaritvāva nipajjitabbaṃ. Sace mahāpariveṇaṃ hoti mahābodhiyaṅgaṇalohapāsādaṅgaṇasadisaṃ bahūnaṃ osaraṇaṭṭhānaṃ, yattha dvāraṃ saṃvutampi saṃvutaṭṭhāne na tiṭṭhati, dvāraṃ alabhantā pākāraṃ āruhitvāpi vicaranti, tattha saṃvaraṇakiccaṃ natthi. Rattiṃ dvāraṃ vivaritvā nipanno aruṇe uggate vuṭṭhāti, anāpatti. Sace pana pabujjhitvā puna supati, āpatti. Yo pana ‘‘aruṇe uggate vuṭṭhahissāmī’’ti paricchinditvāva dvāraṃ asaṃvaritvā rattiṃ nipajjati, yathāparicchedameva vuṭṭhāti, tassa āpattiyeva. Mahāpaccariyaṃ pana ‘‘evaṃ nipajjanto anādariyadukkaṭāpi na muccatī’’ti vuttaṃ.
5. யோ பன ப³ஹுதே³வ ரத்திங் ஜக்³கி³த்வா அத்³தா⁴னங் வா க³ந்த்வா தி³வா கிலந்தரூபோ மஞ்சே நிஸின்னோ பாதே³ பூ⁴மிதோ அமோசெத்வாவ நித்³தா³வஸேன நிபஜ்ஜதி, தஸ்ஸ அனாபத்தி. ஸசே ஓக்கந்தனித்³தோ³ அஜானந்தோபி பாதே³ மஞ்சகங் ஆரோபேதி, ஆபத்தியேவ. நிஸீதி³த்வா அபஸ்ஸாய ஸுபந்தஸ்ஸ அனாபத்தி. யோபி ச ‘‘நித்³த³ங் வினோதெ³ஸ்ஸாமீ’’தி சங்கமந்தோ பதித்வா ஸஹஸா வுட்டா²தி, தஸ்ஸபி அனாபத்தி. யோ பன பதித்வா தத்தே²வ ஸயதி, ந வுட்டா²தி, தஸ்ஸ ஆபத்தி.
5. Yo pana bahudeva rattiṃ jaggitvā addhānaṃ vā gantvā divā kilantarūpo mañce nisinno pāde bhūmito amocetvāva niddāvasena nipajjati, tassa anāpatti. Sace okkantaniddo ajānantopi pāde mañcakaṃ āropeti, āpattiyeva. Nisīditvā apassāya supantassa anāpatti. Yopi ca ‘‘niddaṃ vinodessāmī’’ti caṅkamanto patitvā sahasā vuṭṭhāti, tassapi anāpatti. Yo pana patitvā tattheva sayati, na vuṭṭhāti, tassa āpatti.
கோ முச்சதி, கோ ந முச்சதீதி? மஹாபச்சரியங் தாவ ‘‘ஏகப⁴ங்கே³ன நிபன்னகோ ஏவ முச்சதி. பாதே³ பன பூ⁴மிதோ மோசெத்வா நிபன்னோபி யக்க²க³ஹிதகோபி விஸஞ்ஞீபூ⁴தோபி ந முச்சதீ’’தி வுத்தங். குருந்த³ட்ட²கதா²யங் பன ‘‘ப³ந்தி⁴த்வா நிபஜ்ஜாபிதோவ முச்சதீ’’தி வுத்தங். மஹாஅட்ட²கதா²யங் பன ‘‘யோ சங்கமந்தோ முச்சி²த்வா பதிதோ தத்தே²வ ஸுபதி, தஸ்ஸபி அவிஸயதாய ஆபத்தி ந தி³ஸ்ஸதி. ஆசரியா பன ஏவங் ந கத²யந்தி, தஸ்மா ஆபத்தியேவாதி மஹாபது³மத்தே²ரேன வுத்தங். த்³வே பன ஜனா ஆபத்திதோ முச்சந்தியேவ, யோ ச யக்க²க³ஹிதகோ, யோ ச ப³ந்தி⁴த்வா நிபஜ்ஜாபிதோ’’தி.
Ko muccati, ko na muccatīti? Mahāpaccariyaṃ tāva ‘‘ekabhaṅgena nipannako eva muccati. Pāde pana bhūmito mocetvā nipannopi yakkhagahitakopi visaññībhūtopi na muccatī’’ti vuttaṃ. Kurundaṭṭhakathāyaṃ pana ‘‘bandhitvā nipajjāpitova muccatī’’ti vuttaṃ. Mahāaṭṭhakathāyaṃ pana ‘‘yo caṅkamanto mucchitvā patito tattheva supati, tassapi avisayatāya āpatti na dissati. Ācariyā pana evaṃ na kathayanti, tasmā āpattiyevāti mahāpadumattherena vuttaṃ. Dve pana janā āpattito muccantiyeva, yo ca yakkhagahitako, yo ca bandhitvā nipajjāpito’’ti.
இதி பாளிமுத்தகவினயவினிச்ச²யஸங்க³ஹே
Iti pāḷimuttakavinayavinicchayasaṅgahe
தி³வாஸெய்யவினிச்ச²யகதா² ஸமத்தா.
Divāseyyavinicchayakathā samattā.
