| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya |
੨. ਦੋਣਬ੍ਰਾਹ੍ਮਣਸੁਤ੍ਤਂ
2. Doṇabrāhmaṇasuttaṃ
੧੯੨. ਅਥ ਖੋ ਦੋਣੋ ਬ੍ਰਾਹ੍ਮਣੋ ਯੇਨ ਭਗવਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਭਗવਤਾ ਸਦ੍ਧਿਂ ਸਮ੍ਮੋਦਿ। ਸਮ੍ਮੋਦਨੀਯਂ ਕਥਂ ਸਾਰਣੀਯਂ વੀਤਿਸਾਰੇਤ੍વਾ ਏਕਮਨ੍ਤਂ ਨਿਸੀਦਿ। ਏਕਮਨ੍ਤਂ ਨਿਸਿਨ੍ਨੋ ਖੋ ਦੋਣੋ ਬ੍ਰਾਹ੍ਮਣੋ ਭਗવਨ੍ਤਂ ਏਤਦવੋਚ –
192. Atha kho doṇo brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho doṇo brāhmaṇo bhagavantaṃ etadavoca –
‘‘ਸੁਤਂ ਮੇਤਂ, ਭੋ ਗੋਤਮ – ‘ਨ ਸਮਣੋ ਗੋਤਮੋ ਬ੍ਰਾਹ੍ਮਣੇ ਜਿਣ੍ਣੇ વੁਡ੍ਢੇ ਮਹਲ੍ਲਕੇ ਅਦ੍ਧਗਤੇ વਯੋਅਨੁਪ੍ਪਤ੍ਤੇ ਅਭਿવਾਦੇਤਿ વਾ ਪਚ੍ਚੁਟ੍ਠੇਤਿ વਾ ਆਸਨੇਨ વਾ ਨਿਮਨ੍ਤੇਤੀ’ਤਿ। ਤਯਿਦਂ, ਭੋ ਗੋਤਮ, ਤਥੇવ। ਨ ਹਿ ਭવਂ ਗੋਤਮੋ ਬ੍ਰਾਹ੍ਮਣੇ ਜਿਣ੍ਣੇ વੁਡ੍ਢੇ ਮਹਲ੍ਲਕੇ ਅਦ੍ਧਗਤੇ વਯੋਅਨੁਪ੍ਪਤ੍ਤੇ ਅਭਿવਾਦੇਤਿ વਾ ਪਚ੍ਚੁਟ੍ਠੇਤਿ વਾ ਆਸਨੇਨ વਾ ਨਿਮਨ੍ਤੇਤਿ। ਤਯਿਦਂ, ਭੋ ਗੋਤਮ, ਨ ਸਮ੍ਪਨ੍ਨਮੇવਾ’’ਤਿ। ‘‘ਤ੍વਮ੍ਪਿ ਨੋ, ਦੋਣ, ਬ੍ਰਾਹ੍ਮਣੋ ਪਟਿਜਾਨਾਸੀ’’ਤਿ? ‘‘ਯਞ੍ਹਿ ਤਂ, ਭੋ ਗੋਤਮ, ਸਮ੍ਮਾ વਦਮਾਨੋ વਦੇਯ੍ਯ – ‘ਬ੍ਰਾਹ੍ਮਣੋ ਉਭਤੋ ਸੁਜਾਤੋ – ਮਾਤਿਤੋ ਚ ਪਿਤਿਤੋ ਚ, ਸਂਸੁਦ੍ਧਗਹਣਿਕੋ, ਯਾવ ਸਤ੍ਤਮਾ ਪਿਤਾਮਹਯੁਗਾ ਅਕ੍ਖਿਤੋ ਅਨੁਪਕ੍ਕੁਟ੍ਠੋ ਜਾਤਿવਾਦੇਨ, ਅਜ੍ਝਾਯਕੋ ਮਨ੍ਤਧਰੋ, ਤਿਣ੍ਣਂ વੇਦਾਨਂ ਪਾਰਗੂ ਸਨਿਘਣ੍ਡੁਕੇਟੁਭਾਨਂ ਸਾਕ੍ਖਰਪ੍ਪਭੇਦਾਨਂ ਇਤਿਹਾਸਪਞ੍ਚਮਾਨਂ, ਪਦਕੋ વੇਯ੍ਯਾਕਰਣੋ ਲੋਕਾਯਤਮਹਾਪੁਰਿਸਲਕ੍ਖਣੇਸੁ ਅਨવਯੋ’ਤਿ, ਮਮੇવ ਤਂ, ਭੋ ਗੋਤਮ, ਸਮ੍ਮਾ વਦਮਾਨੋ વਦੇਯ੍ਯ। ਅਹਞ੍ਹਿ, ਭੋ ਗੋਤਮ, ਬ੍ਰਾਹ੍ਮਣੋ ਉਭਤੋ ਸੁਜਾਤੋ – ਮਾਤਿਤੋ ਚ ਪਿਤਿਤੋ ਚ, ਸਂਸੁਦ੍ਧਗਹਣਿਕੋ, ਯਾવ ਸਤ੍ਤਮਾ ਪਿਤਾਮਹਯੁਗਾ ਅਕ੍ਖਿਤ੍ਤੋ ਅਨੁਪਕ੍ਕੁਟ੍ਠੋ ਜਾਤਿવਾਦੇਨ, ਅਜ੍ਝਾਯਕੋ ਮਨ੍ਤਧਰੋ, ਤਿਣ੍ਣਂ વੇਦਾਨਂ ਪਾਰਗੂ ਸਨਿਘਣ੍ਡੁਕੇਟੁਭਾਨਂ ਸਾਕ੍ਖਰਪ੍ਪਭੇਦਾਨਂ ਇਤਿਹਾਸਪਞ੍ਚਮਾਨਂ, ਪਦਕੋ વੇਯ੍ਯਾਕਰਣੋ ਲੋਕਾਯਤਮਹਾਪੁਰਿਸਲਕ੍ਖਣੇਸੁ ਅਨવਯੋ’’ਤਿ।
‘‘Sutaṃ metaṃ, bho gotama – ‘na samaṇo gotamo brāhmaṇe jiṇṇe vuḍḍhe mahallake addhagate vayoanuppatte abhivādeti vā paccuṭṭheti vā āsanena vā nimantetī’ti. Tayidaṃ, bho gotama, tatheva. Na hi bhavaṃ gotamo brāhmaṇe jiṇṇe vuḍḍhe mahallake addhagate vayoanuppatte abhivādeti vā paccuṭṭheti vā āsanena vā nimanteti. Tayidaṃ, bho gotama, na sampannamevā’’ti. ‘‘Tvampi no, doṇa, brāhmaṇo paṭijānāsī’’ti? ‘‘Yañhi taṃ, bho gotama, sammā vadamāno vadeyya – ‘brāhmaṇo ubhato sujāto – mātito ca pitito ca, saṃsuddhagahaṇiko, yāva sattamā pitāmahayugā akkhito anupakkuṭṭho jātivādena, ajjhāyako mantadharo, tiṇṇaṃ vedānaṃ pāragū sanighaṇḍukeṭubhānaṃ sākkharappabhedānaṃ itihāsapañcamānaṃ, padako veyyākaraṇo lokāyatamahāpurisalakkhaṇesu anavayo’ti, mameva taṃ, bho gotama, sammā vadamāno vadeyya. Ahañhi, bho gotama, brāhmaṇo ubhato sujāto – mātito ca pitito ca, saṃsuddhagahaṇiko, yāva sattamā pitāmahayugā akkhitto anupakkuṭṭho jātivādena, ajjhāyako mantadharo, tiṇṇaṃ vedānaṃ pāragū sanighaṇḍukeṭubhānaṃ sākkharappabhedānaṃ itihāsapañcamānaṃ, padako veyyākaraṇo lokāyatamahāpurisalakkhaṇesu anavayo’’ti.
‘‘ਯੇ ਖੋ, ਤੇ ਦੋਣ, ਬ੍ਰਾਹ੍ਮਣਾਨਂ ਪੁਬ੍ਬਕਾ ਇਸਯੋ ਮਨ੍ਤਾਨਂ ਕਤ੍ਤਾਰੋ ਮਨ੍ਤਾਨਂ ਪવਤ੍ਤਾਰੋ, ਯੇਸਮਿਦਂ ਏਤਰਹਿ ਬ੍ਰਾਹ੍ਮਣਾ ਪੋਰਾਣਂ ਮਨ੍ਤਪਦਂ ਗੀਤਂ ਪવੁਤ੍ਤਂ ਸਮਿਹਿਤਂ ਤਦਨੁਗਾਯਨ੍ਤਿ ਤਦਨੁਭਾਸਨ੍ਤਿ ਭਾਸਿਤਮਨੁਭਾਸਨ੍ਤਿ ਸਜ੍ਝਾਯਿਤਮਨੁਸਜ੍ਝਾਯਨ੍ਤਿ વਾਚਿਤਮਨੁવਾਚੇਨ੍ਤਿ, ਸੇਯ੍ਯਥਿਦਂ – ਅਟ੍ਠਕੋ, વਾਮਕੋ, વਾਮਦੇવੋ, વੇਸ੍ਸਾਮਿਤ੍ਤੋ, ਯਮਦਗ੍ਗਿ 1, ਅਙ੍ਗੀਰਸੋ, ਭਾਰਦ੍વਾਜੋ, વਾਸੇਟ੍ਠੋ, ਕਸ੍ਸਪੋ, ਭਗੁ; ਤ੍ਯਾਸ੍ਸੁ’ਮੇ ਪਞ੍ਚ ਬ੍ਰਾਹ੍ਮਣੇ ਪਞ੍ਞਾਪੇਨ੍ਤਿ – ਬ੍ਰਹ੍ਮਸਮਂ, ਦੇવਸਮਂ, ਮਰਿਯਾਦਂ, ਸਮ੍ਭਿਨ੍ਨਮਰਿਯਾਦਂ, ਬ੍ਰਾਹ੍ਮਣਚਣ੍ਡਾਲਂਯੇવ ਪਞ੍ਚਮਂ। ਤੇਸਂ ਤ੍વਂ ਦੋਣ, ਕਤਮੋ’’ਤਿ?
‘‘Ye kho, te doṇa, brāhmaṇānaṃ pubbakā isayo mantānaṃ kattāro mantānaṃ pavattāro, yesamidaṃ etarahi brāhmaṇā porāṇaṃ mantapadaṃ gītaṃ pavuttaṃ samihitaṃ tadanugāyanti tadanubhāsanti bhāsitamanubhāsanti sajjhāyitamanusajjhāyanti vācitamanuvācenti, seyyathidaṃ – aṭṭhako, vāmako, vāmadevo, vessāmitto, yamadaggi 2, aṅgīraso, bhāradvājo, vāseṭṭho, kassapo, bhagu; tyāssu’me pañca brāhmaṇe paññāpenti – brahmasamaṃ, devasamaṃ, mariyādaṃ, sambhinnamariyādaṃ, brāhmaṇacaṇḍālaṃyeva pañcamaṃ. Tesaṃ tvaṃ doṇa, katamo’’ti?
‘‘ਨ ਖੋ ਮਯਂ, ਭੋ ਗੋਤਮ, ਪਞ੍ਚ ਬ੍ਰਾਹ੍ਮਣੇ ਜਾਨਾਮ, ਅਥ ਖੋ ਮਯਂ ਬ੍ਰਾਹ੍ਮਣਾਤ੍વੇવ ਜਾਨਾਮ। ਸਾਧੁ ਮੇ ਭવਂ ਗੋਤਮੋ ਤਥਾ ਧਮ੍ਮਂ ਦੇਸੇਤੁ ਯਥਾ ਅਹਂ ਇਮੇ ਪਞ੍ਚ ਬ੍ਰਾਹ੍ਮਣੇ ਜਾਨੇਯ੍ਯ’’ਨ੍ਤਿ। ‘‘ਤੇਨ ਹਿ, ਬ੍ਰਾਹ੍ਮਣ, ਸੁਣੋਹਿ, ਸਾਧੁਕਂ ਮਨਸਿ ਕਰੋਹਿ; ਭਾਸਿਸ੍ਸਾਮੀ’’ਤਿ। ‘‘ਏવਂ ਭੋ’’ਤਿ ਖੋ ਦੋਣੋ ਬ੍ਰਾਹ੍ਮਣੋ ਭਗવਤੋ ਪਚ੍ਚਸ੍ਸੋਸਿ। ਭਗવਾ ਏਤਦવੋਚ –
‘‘Na kho mayaṃ, bho gotama, pañca brāhmaṇe jānāma, atha kho mayaṃ brāhmaṇātveva jānāma. Sādhu me bhavaṃ gotamo tathā dhammaṃ desetu yathā ahaṃ ime pañca brāhmaṇe jāneyya’’nti. ‘‘Tena hi, brāhmaṇa, suṇohi, sādhukaṃ manasi karohi; bhāsissāmī’’ti. ‘‘Evaṃ bho’’ti kho doṇo brāhmaṇo bhagavato paccassosi. Bhagavā etadavoca –
‘‘ਕਥਞ੍ਚ, ਦੋਣ, ਬ੍ਰਾਹ੍ਮਣੋ ਬ੍ਰਹ੍ਮਸਮੋ ਹੋਤਿ? ਇਧ, ਦੋਣ, ਬ੍ਰਾਹ੍ਮਣੋ ਉਭਤੋ ਸੁਜਾਤੋ ਹੋਤਿ – ਮਾਤਿਤੋ ਚ ਪਿਤਿਤੋ ਚ, ਸਂਸੁਦ੍ਧਗਹਣਿਕੋ, ਯਾવ ਸਤ੍ਤਮਾ ਪਿਤਾਮਹਯੁਗਾ ਅਕ੍ਖਿਤ੍ਤੋ ਅਨੁਪਕ੍ਕੁਟ੍ਠੋ ਜਾਤਿવਾਦੇਨ। ਸੋ ਅਟ੍ਠਚਤ੍ਤਾਲੀਸવਸ੍ਸਾਨਿ ਕੋਮਾਰਬ੍ਰਹ੍ਮਚਰਿਯਂ 3 ਚਰਤਿ ਮਨ੍ਤੇ ਅਧੀਯਮਾਨੋ। ਅਟ੍ਠਚਤ੍ਤਾਲੀਸવਸ੍ਸਾਨਿ ਕੋਮਾਰਬ੍ਰਹ੍ਮਚਰਿਯਂ ਚਰਿਤ੍વਾ ਮਨ੍ਤੇ ਅਧੀਯਿਤ੍વਾ ਆਚਰਿਯਸ੍ਸ ਆਚਰਿਯਧਨਂ ਪਰਿਯੇਸਤਿ ਧਮ੍ਮੇਨੇવ, ਨੋ ਅਧਮ੍ਮੇਨ।
‘‘Kathañca, doṇa, brāhmaṇo brahmasamo hoti? Idha, doṇa, brāhmaṇo ubhato sujāto hoti – mātito ca pitito ca, saṃsuddhagahaṇiko, yāva sattamā pitāmahayugā akkhitto anupakkuṭṭho jātivādena. So aṭṭhacattālīsavassāni komārabrahmacariyaṃ 4 carati mante adhīyamāno. Aṭṭhacattālīsavassāni komārabrahmacariyaṃ caritvā mante adhīyitvā ācariyassa ācariyadhanaṃ pariyesati dhammeneva, no adhammena.
‘‘ਤਤ੍ਥ ਚ, ਦੋਣ, ਕੋ ਧਮ੍ਮੋ? ਨੇવ ਕਸਿਯਾ ਨ વਣਿਜ੍ਜਾਯ ਨ ਗੋਰਕ੍ਖੇਨ ਨ ਇਸ੍ਸਤ੍ਥੇਨ 5 ਨ ਰਾਜਪੋਰਿਸੇਨ ਨ ਸਿਪ੍ਪਞ੍ਞਤਰੇਨ, ਕੇવਲਂ ਭਿਕ੍ਖਾਚਰਿਯਾਯ ਕਪਾਲਂ ਅਨਤਿਮਞ੍ਞਮਾਨੋ। ਸੋ ਆਚਰਿਯਸ੍ਸ ਆਚਰਿਯਧਨਂ ਨਿਯ੍ਯਾਦੇਤ੍વਾ 6 ਕੇਸਮਸ੍ਸੁਂ ਓਹਾਰੇਤ੍વਾ ਕਾਸਾਯਾਨਿ વਤ੍ਥਾਨਿ ਅਚ੍ਛਾਦੇਤ੍વਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਤਿ। ਸੋ ਏવਂ ਪਬ੍ਬਜਿਤੋ ਸਮਾਨੋ ਮੇਤ੍ਤਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍વਾ વਿਹਰਤਿ, ਤਥਾ ਦੁਤਿਯਂ ਤਥਾ ਤਤਿਯਂ ਤਥਾ ਚਤੁਤ੍ਥਂ 7, ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾવਨ੍ਤਂ ਲੋਕਂ ਮੇਤ੍ਤਾਸਹਗਤੇਨ ਚੇਤਸਾ વਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅવੇਰੇਨ ਅਬ੍ਯਾਪਜ੍ਜੇਨ 8 ਫਰਿਤ੍વਾ વਿਹਰਤਿ। ਕਰੁਣਾ…ਪੇ॰… ਮੁਦਿਤਾ… ਉਪੇਕ੍ਖਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍વਾ વਿਹਰਤਿ, ਤਥਾ ਦੁਤਿਯਂ ਤਥਾ ਤਤਿਯਂ ਤਥਾ ਚਤੁਤ੍ਥਂ , ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾવਨ੍ਤਂ ਲੋਕਂ ਉਪੇਕ੍ਖਾਸਹਗਤੇਨ ਚੇਤਸਾ વਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅવੇਰੇਨ ਅਬ੍ਯਾਪਜ੍ਜੇਨ ਫਰਿਤ੍વਾ વਿਹਰਤਿ। ਸੋ ਇਮੇ ਚਤ੍ਤਾਰੋ ਬ੍ਰਹ੍ਮવਿਹਾਰੇ ਭਾવੇਤ੍વਾ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਬ੍ਰਹ੍ਮਲੋਕਂ ਉਪਪਜ੍ਜਤਿ। ਏવਂ ਖੋ, ਦੋਣ, ਬ੍ਰਾਹ੍ਮਣੋ ਬ੍ਰਹ੍ਮਸਮੋ ਹੋਤਿ।
‘‘Tattha ca, doṇa, ko dhammo? Neva kasiyā na vaṇijjāya na gorakkhena na issatthena 9 na rājaporisena na sippaññatarena, kevalaṃ bhikkhācariyāya kapālaṃ anatimaññamāno. So ācariyassa ācariyadhanaṃ niyyādetvā 10 kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajati. So evaṃ pabbajito samāno mettāsahagatena cetasā ekaṃ disaṃ pharitvā viharati, tathā dutiyaṃ tathā tatiyaṃ tathā catutthaṃ 11, iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyāpajjena 12 pharitvā viharati. Karuṇā…pe… muditā… upekkhāsahagatena cetasā ekaṃ disaṃ pharitvā viharati, tathā dutiyaṃ tathā tatiyaṃ tathā catutthaṃ , iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyāpajjena pharitvā viharati. So ime cattāro brahmavihāre bhāvetvā kāyassa bhedā paraṃ maraṇā sugatiṃ brahmalokaṃ upapajjati. Evaṃ kho, doṇa, brāhmaṇo brahmasamo hoti.
‘‘ਕਥਞ੍ਚ, ਦੋਣ, ਬ੍ਰਾਹ੍ਮਣੋ ਦੇવਸਮੋ ਹੋਤਿ? ਇਧ, ਦੋਣ, ਬ੍ਰਾਹ੍ਮਣੋ ਉਭਤੋ ਸੁਜਾਤੋ ਹੋਤਿ – ਮਾਤਿਤੋ ਚ ਪਿਤਿਤੋ ਚ, ਸਂਸੁਦ੍ਧਗਹਣਿਕੋ, ਯਾવ ਸਤ੍ਤਮਾ ਪਿਤਾਮਹਯੁਗਾ ਅਕ੍ਖਿਤ੍ਤੋ ਅਨੁਪਕ੍ਕੁਟ੍ਠੋ ਜਾਤਿવਾਦੇਨ । ਸੋ ਅਟ੍ਠਚਤ੍ਤਾਲੀਸવਸ੍ਸਾਨਿ ਕੋਮਾਰਬ੍ਰਹ੍ਮਚਰਿਯਂ ਚਰਤਿ ਮਨ੍ਤੇ ਅਧੀਯਮਾਨੋ। ਅਟ੍ਠਚਤ੍ਤਾਲੀਸવਸ੍ਸਾਨਿ ਕੋਮਾਰਬ੍ਰਹ੍ਮਚਰਿਯਂ ਚਰਿਤ੍વਾ ਮਨ੍ਤੇ ਅਧੀਯਿਤ੍વਾ ਆਚਰਿਯਸ੍ਸ ਆਚਰਿਯਧਨਂ ਪਰਿਯੇਸਤਿ ਧਮ੍ਮੇਨੇવ, ਨੋ ਅਧਮ੍ਮੇਨ। ਤਤ੍ਥ ਚ, ਦੋਣ, ਕੋ ਧਮ੍ਮੋ? ਨੇવ ਕਸਿਯਾ ਨ વਣਿਜ੍ਜਾਯ ਨ ਗੋਰਕ੍ਖੇਨ ਨ ਇਸ੍ਸਤ੍ਥੇਨ ਨ ਰਾਜਪੋਰਿਸੇਨ ਨ ਸਿਪ੍ਪਞ੍ਞਤਰੇਨ, ਕੇવਲਂ ਭਿਕ੍ਖਾਚਰਿਯਾਯ ਕਪਾਲਂ ਅਨਤਿਮਞ੍ਞਮਾਨੋ। ਸੋ ਆਚਰਿਯਸ੍ਸ ਆਚਰਿਯਧਨਂ ਨਿਯ੍ਯਾਦੇਤ੍વਾ ਦਾਰਂ ਪਰਿਯੇਸਤਿ ਧਮ੍ਮੇਨੇવ, ਨੋ ਅਧਮ੍ਮੇਨ।
‘‘Kathañca, doṇa, brāhmaṇo devasamo hoti? Idha, doṇa, brāhmaṇo ubhato sujāto hoti – mātito ca pitito ca, saṃsuddhagahaṇiko, yāva sattamā pitāmahayugā akkhitto anupakkuṭṭho jātivādena . So aṭṭhacattālīsavassāni komārabrahmacariyaṃ carati mante adhīyamāno. Aṭṭhacattālīsavassāni komārabrahmacariyaṃ caritvā mante adhīyitvā ācariyassa ācariyadhanaṃ pariyesati dhammeneva, no adhammena. Tattha ca, doṇa, ko dhammo? Neva kasiyā na vaṇijjāya na gorakkhena na issatthena na rājaporisena na sippaññatarena, kevalaṃ bhikkhācariyāya kapālaṃ anatimaññamāno. So ācariyassa ācariyadhanaṃ niyyādetvā dāraṃ pariyesati dhammeneva, no adhammena.
‘‘ਤਤ੍ਥ ਚ, ਦੋਣ, ਕੋ ਧਮ੍ਮੋ? ਨੇવ ਕਯੇਨ ਨ વਿਕ੍ਕਯੇਨ, ਬ੍ਰਾਹ੍ਮਣਿਂਯੇવ ਉਦਕੂਪਸ੍ਸਟ੍ਠਂ। ਸੋ ਬ੍ਰਾਹ੍ਮਣਿਂਯੇવ ਗਚ੍ਛਤਿ, ਨ ਖਤ੍ਤਿਯਿਂ ਨ વੇਸ੍ਸਿਂ ਨ ਸੁਦ੍ਦਿਂ ਨ ਚਣ੍ਡਾਲਿਂ ਨ ਨੇਸਾਦਿਂ ਨ વੇਨਿਂ 13 ਨ ਰਥਕਾਰਿਂ ਨ ਪੁਕ੍ਕੁਸਿਂ ਗਚ੍ਛਤਿ, ਨ ਗਬ੍ਭਿਨਿਂ ਗਚ੍ਛਤਿ, ਨ ਪਾਯਮਾਨਂ ਗਚ੍ਛਤਿ, ਨ ਅਨੁਤੁਨਿਂ ਗਚ੍ਛਤਿ। ਕਸ੍ਮਾ ਚ, ਦੋਣ, ਬ੍ਰਾਹ੍ਮਣੋ ਨ ਗਬ੍ਭਿਨਿਂ ਗਚ੍ਛਤਿ? ਸਚੇ, ਦੋਣ, ਬ੍ਰਾਹ੍ਮਣੋ ਗਬ੍ਭਿਨਿਂ ਗਚ੍ਛਤਿ, ਅਤਿਮੀਲ਼੍ਹਜੋ ਨਾਮ ਸੋ ਹੋਤਿ ਮਾਣવਕੋ વਾ ਮਾਣવਿਕਾ 14 વਾ । ਤਸ੍ਮਾ, ਦੋਣ, ਬ੍ਰਾਹ੍ਮਣੋ ਨ ਗਬ੍ਭਿਨਿਂ ਗਚ੍ਛਤਿ। ਕਸ੍ਮਾ ਚ, ਦੋਣ, ਬ੍ਰਾਹ੍ਮਣੋ ਨ ਪਾਯਮਾਨਂ ਗਚ੍ਛਤਿ? ਸਚੇ, ਦੋਣ, ਬ੍ਰਾਹ੍ਮਣੋ ਪਾਯਮਾਨਂ ਗਚ੍ਛਤਿ, ਅਸੁਚਿਪਟਿਪੀਲ਼ਿਤੋ ਨਾਮ ਸੋ ਹੋਤਿ ਮਾਣવਕੋ વਾ ਮਾਣવਿਕਾ વਾ। ਤਸ੍ਮਾ, ਦੋਣ, ਬ੍ਰਾਹ੍ਮਣੋ ਨ ਪਾਯਮਾਨਂ ਗਚ੍ਛਤਿ। ਤਸ੍ਸ ਸਾ ਹੋਤਿ ਬ੍ਰਾਹ੍ਮਣੀ ਨੇવ ਕਾਮਤ੍ਥਾ ਨ ਦવਤ੍ਥਾ ਨ ਰਤਤ੍ਥਾ, ਪਜਤ੍ਥਾવ ਬ੍ਰਾਹ੍ਮਣਸ੍ਸ ਬ੍ਰਾਹ੍ਮਣੀ ਹੋਤਿ। ਸੋ ਮੇਥੁਨਂ ਉਪ੍ਪਾਦੇਤ੍વਾ ਕੇਸਮਸ੍ਸੁਂ ਓਹਾਰੇਤ੍વਾ ਕਾਸਾਯਾਨਿ વਤ੍ਥਾਨਿ ਅਚ੍ਛਾਦੇਤ੍વਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਤਿ। ਸੋ ਏવਂ ਪਬ੍ਬਜਿਤੋ ਸਮਾਨੋ વਿવਿਚ੍ਚੇવ ਕਾਮੇਹਿ…ਪੇ॰… ਚਤੁਤ੍ਥਂ ਝਾਨਂ ਉਪਸਮ੍ਪਜ੍ਜ વਿਹਰਤਿ। ਸੋ ਇਮੇ ਚਤ੍ਤਾਰੋ ਝਾਨੇ ਭਾવੇਤ੍વਾ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ। ਏવਂ ਖੋ, ਦੋਣ, ਬ੍ਰਾਹ੍ਮਣੋ ਦੇવਸਮੋ ਹੋਤਿ।
‘‘Tattha ca, doṇa, ko dhammo? Neva kayena na vikkayena, brāhmaṇiṃyeva udakūpassaṭṭhaṃ. So brāhmaṇiṃyeva gacchati, na khattiyiṃ na vessiṃ na suddiṃ na caṇḍāliṃ na nesādiṃ na veniṃ 15 na rathakāriṃ na pukkusiṃ gacchati, na gabbhiniṃ gacchati, na pāyamānaṃ gacchati, na anutuniṃ gacchati. Kasmā ca, doṇa, brāhmaṇo na gabbhiniṃ gacchati? Sace, doṇa, brāhmaṇo gabbhiniṃ gacchati, atimīḷhajo nāma so hoti māṇavako vā māṇavikā 16 vā . Tasmā, doṇa, brāhmaṇo na gabbhiniṃ gacchati. Kasmā ca, doṇa, brāhmaṇo na pāyamānaṃ gacchati? Sace, doṇa, brāhmaṇo pāyamānaṃ gacchati, asucipaṭipīḷito nāma so hoti māṇavako vā māṇavikā vā. Tasmā, doṇa, brāhmaṇo na pāyamānaṃ gacchati. Tassa sā hoti brāhmaṇī neva kāmatthā na davatthā na ratatthā, pajatthāva brāhmaṇassa brāhmaṇī hoti. So methunaṃ uppādetvā kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajati. So evaṃ pabbajito samāno vivicceva kāmehi…pe… catutthaṃ jhānaṃ upasampajja viharati. So ime cattāro jhāne bhāvetvā kāyassa bhedā paraṃ maraṇā sugatiṃ saggaṃ lokaṃ upapajjati. Evaṃ kho, doṇa, brāhmaṇo devasamo hoti.
‘‘ਕਥਞ੍ਚ, ਦੋਣ, ਬ੍ਰਾਹ੍ਮਣੋ ਮਰਿਯਾਦੋ ਹੋਤਿ? ਇਧ, ਦੋਣ, ਬ੍ਰਾਹ੍ਮਣੋ ਉਭਤੋ ਸੁਜਾਤੋ ਹੋਤਿ – ਮਾਤਿਤੋ ਚ ਪਿਤਿਤੋ ਚ, ਸਂਸੁਦ੍ਧਗਹਣਿਕੋ, ਯਾવ ਸਤ੍ਤਮਾ ਪਿਤਾਮਹਯੁਗਾ ਅਕ੍ਖਿਤ੍ਤੋ ਅਨੁਪਕ੍ਕੁਟ੍ਠੋ ਜਾਤਿવਾਦੇਨ। ਸੋ ਅਟ੍ਠਚਤ੍ਤਾਲੀਸવਸ੍ਸਾਨਿ ਕੋਮਾਰਬ੍ਰਹ੍ਮਚਰਿਯਂ ਚਰਤਿ ਮਨ੍ਤੇ ਅਧੀਯਮਾਨੋ। ਅਟ੍ਠਚਤ੍ਤਾਲੀਸવਸ੍ਸਾਨਿ ਕੋਮਾਰਬ੍ਰਹ੍ਮਚਰਿਯਂ ਚਰਿਤ੍વਾ ਮਨ੍ਤੇ ਅਧੀਯਿਤ੍વਾ ਆਚਰਿਯਸ੍ਸ ਆਚਰਿਯਧਨਂ ਪਰਿਯੇਸਤਿ ਧਮ੍ਮੇਨੇવ, ਨੋ ਅਧਮ੍ਮੇਨ । ਤਤ੍ਥ ਚ, ਦੋਣ, ਕੋ ਧਮ੍ਮੋ? ਨੇવ ਕਸਿਯਾ ਨ વਣਿਜ੍ਜਾਯ ਨ ਗੋਰਕ੍ਖੇਨ ਨ ਇਸ੍ਸਤ੍ਥੇਨ ਨ ਰਾਜਪੋਰਿਸੇਨ ਨ ਸਿਪ੍ਪਞ੍ਞਤਰੇਨ, ਕੇવਲਂ ਭਿਕ੍ਖਾਚਰਿਯਾਯ ਕਪਾਲਂ ਅਨਤਿਮਞ੍ਞਮਾਨੋ। ਸੋ ਆਚਰਿਯਸ੍ਸ ਆਚਰਿਯਧਨਂ ਨਿਯ੍ਯਾਦੇਤ੍વਾ ਦਾਰਂ ਪਰਿਯੇਸਤਿ ਧਮ੍ਮੇਨੇવ, ਨੋ ਅਧਮ੍ਮੇਨ।
‘‘Kathañca, doṇa, brāhmaṇo mariyādo hoti? Idha, doṇa, brāhmaṇo ubhato sujāto hoti – mātito ca pitito ca, saṃsuddhagahaṇiko, yāva sattamā pitāmahayugā akkhitto anupakkuṭṭho jātivādena. So aṭṭhacattālīsavassāni komārabrahmacariyaṃ carati mante adhīyamāno. Aṭṭhacattālīsavassāni komārabrahmacariyaṃ caritvā mante adhīyitvā ācariyassa ācariyadhanaṃ pariyesati dhammeneva, no adhammena . Tattha ca, doṇa, ko dhammo? Neva kasiyā na vaṇijjāya na gorakkhena na issatthena na rājaporisena na sippaññatarena, kevalaṃ bhikkhācariyāya kapālaṃ anatimaññamāno. So ācariyassa ācariyadhanaṃ niyyādetvā dāraṃ pariyesati dhammeneva, no adhammena.
‘‘ਤਤ੍ਥ ਚ, ਦੋਣ , ਕੋ ਧਮ੍ਮੋ? ਨੇવ ਕਯੇਨ ਨ વਿਕ੍ਕਯੇਨ, ਬ੍ਰਾਹ੍ਮਣਿਂਯੇવ ਉਦਕੂਪਸ੍ਸਟ੍ਠਂ। ਸੋ ਬ੍ਰਾਹ੍ਮਣਿਂਯੇવ ਗਚ੍ਛਤਿ, ਨ ਖਤ੍ਤਿਯਿਂ ਨ વੇਸ੍ਸਿਂ ਨ ਸੁਦ੍ਦਿਂ ਨ ਚਣ੍ਡਾਲਿਂ ਨ ਨੇਸਾਦਿਂ ਨ વੇਨਿਂ ਨ ਰਥਕਾਰਿਂ ਨ ਪੁਕ੍ਕੁਸਿਂ ਗਚ੍ਛਤਿ, ਨ ਗਬ੍ਭਿਨਿਂ ਗਚ੍ਛਤਿ, ਨ ਪਾਯਮਾਨਂ ਗਚ੍ਛਤਿ, ਨ ਅਨੁਤੁਨਿਂ ਗਚ੍ਛਤਿ। ਕਸ੍ਮਾ ਚ, ਦੋਣ, ਬ੍ਰਾਹ੍ਮਣੋ ਨ ਗਬ੍ਭਿਨਿਂ ਗਚ੍ਛਤਿ? ਸਚੇ, ਦੋਣ, ਬ੍ਰਾਹ੍ਮਣੋ ਗਬ੍ਭਿਨਿਂ ਗਚ੍ਛਤਿ, ਅਤਿਮੀਲ਼੍ਹਜੋ ਨਾਮ ਸੋ ਹੋਤਿ ਮਾਣવਕੋ વਾ ਮਾਣવਿਕਾ વਾ। ਤਸ੍ਮਾ, ਦੋਣ, ਬ੍ਰਾਹ੍ਮਣੋ ਨ ਗਬ੍ਭਿਨਿਂ ਗਚ੍ਛਤਿ। ਕਸ੍ਮਾ ਚ, ਦੋਣ, ਬ੍ਰਾਹ੍ਮਣੋ ਨ ਪਾਯਮਾਨਂ ਗਚ੍ਛਤਿ? ਸਚੇ, ਦੋਣ, ਬ੍ਰਾਹ੍ਮਣੋ ਪਾਯਮਾਨਂ ਗਚ੍ਛਤਿ, ਅਸੁਚਿਪਟਿਪੀਲ਼ਿਤੋ ਨਾਮ ਸੋ ਹੋਤਿ ਮਾਣવਕੋ વਾ ਮਾਣવਿਕਾ વਾ। ਤਸ੍ਮਾ, ਦੋਣ, ਬ੍ਰਾਹ੍ਮਣੋ ਨ ਪਾਯਮਾਨਂ ਗਚ੍ਛਤਿ। ਤਸ੍ਸ ਸਾ ਹੋਤਿ ਬ੍ਰਾਹ੍ਮਣੀ ਨੇવ ਕਾਮਤ੍ਥਾ ਨ ਦવਤ੍ਥਾ ਨ ਰਤਤ੍ਥਾ, ਪਜਤ੍ਥਾવ ਬ੍ਰਾਹ੍ਮਣਸ੍ਸ ਬ੍ਰਾਹ੍ਮਣੀ ਹੋਤਿ। ਸੋ ਮੇਥੁਨਂ ਉਪ੍ਪਾਦੇਤ੍વਾ ਤਮੇવ ਪੁਤ੍ਤਸ੍ਸਾਦਂ ਨਿਕਾਮਯਮਾਨੋ ਕੁਟੁਮ੍ਬਂ ਅਜ੍ਝਾવਸਤਿ, ਨ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਤਿ। ਯਾવ ਪੋਰਾਣਾਨਂ ਬ੍ਰਾਹ੍ਮਣਾਨਂ ਮਰਿਯਾਦੋ ਤਤ੍ਥ ਤਿਟ੍ਠਤਿ, ਤਂ ਨ વੀਤਿਕ੍ਕਮਤਿ। ‘ਯਾવ ਪੋਰਾਣਾਨਂ ਬ੍ਰਾਹ੍ਮਣਾਨਂ ਮਰਿਯਾਦੋ ਤਤ੍ਥ ਬ੍ਰਾਹ੍ਮਣੋ ਠਿਤੋ ਤਂ ਨ વੀਤਿਕ੍ਕਮਤੀ’ਤਿ, ਖੋ, ਦੋਣ, ਤਸ੍ਮਾ ਬ੍ਰਾਹ੍ਮਣੋ ਮਰਿਯਾਦੋਤਿ વੁਚ੍ਚਤਿ। ਏવਂ ਖੋ, ਦੋਣ, ਬ੍ਰਾਹ੍ਮਣੋ ਮਰਿਯਾਦੋ ਹੋਤਿ।
‘‘Tattha ca, doṇa , ko dhammo? Neva kayena na vikkayena, brāhmaṇiṃyeva udakūpassaṭṭhaṃ. So brāhmaṇiṃyeva gacchati, na khattiyiṃ na vessiṃ na suddiṃ na caṇḍāliṃ na nesādiṃ na veniṃ na rathakāriṃ na pukkusiṃ gacchati, na gabbhiniṃ gacchati, na pāyamānaṃ gacchati, na anutuniṃ gacchati. Kasmā ca, doṇa, brāhmaṇo na gabbhiniṃ gacchati? Sace, doṇa, brāhmaṇo gabbhiniṃ gacchati, atimīḷhajo nāma so hoti māṇavako vā māṇavikā vā. Tasmā, doṇa, brāhmaṇo na gabbhiniṃ gacchati. Kasmā ca, doṇa, brāhmaṇo na pāyamānaṃ gacchati? Sace, doṇa, brāhmaṇo pāyamānaṃ gacchati, asucipaṭipīḷito nāma so hoti māṇavako vā māṇavikā vā. Tasmā, doṇa, brāhmaṇo na pāyamānaṃ gacchati. Tassa sā hoti brāhmaṇī neva kāmatthā na davatthā na ratatthā, pajatthāva brāhmaṇassa brāhmaṇī hoti. So methunaṃ uppādetvā tameva puttassādaṃ nikāmayamāno kuṭumbaṃ ajjhāvasati, na agārasmā anagāriyaṃ pabbajati. Yāva porāṇānaṃ brāhmaṇānaṃ mariyādo tattha tiṭṭhati, taṃ na vītikkamati. ‘Yāva porāṇānaṃ brāhmaṇānaṃ mariyādo tattha brāhmaṇo ṭhito taṃ na vītikkamatī’ti, kho, doṇa, tasmā brāhmaṇo mariyādoti vuccati. Evaṃ kho, doṇa, brāhmaṇo mariyādo hoti.
‘‘ਕਥਞ੍ਚ, ਦੋਣ, ਬ੍ਰਾਹ੍ਮਣੋ ਸਮ੍ਭਿਨ੍ਨਮਰਿਯਾਦੋ ਹੋਤਿ? ਇਧ , ਦੋਣ, ਬ੍ਰਾਹ੍ਮਣੋ ਉਭਤੋ ਸੁਜਾਤੋ ਹੋਤਿ – ਮਾਤਿਤੋ ਚ ਪਿਤਿਤੋ ਚ, ਸਂਸੁਦ੍ਧਗਹਣਿਕੋ, ਯਾવ ਸਤ੍ਤਮਾ ਪਿਤਾਮਹਯੁਗਾ ਅਕ੍ਖਿਤ੍ਤੋ ਅਨੁਪਕ੍ਕੁਟ੍ਠੋ ਜਾਤਿવਾਦੇਨ । ਸੋ ਅਟ੍ਠਚਤ੍ਤਾਲੀਸવਸ੍ਸਾਨਿ ਕੋਮਾਰਬ੍ਰਹ੍ਮਚਰਿਯਂ ਚਰਤਿ ਮਨ੍ਤੇ ਅਧੀਯਮਾਨੋ। ਅਟ੍ਠਚਤ੍ਤਾਲੀਸવਸ੍ਸਾਨਿ ਕੋਮਾਰਬ੍ਰਹ੍ਮਚਰਿਯਂ ਚਰਿਤ੍વਾ ਮਨ੍ਤੇ ਅਧੀਯਿਤ੍વਾ ਆਚਰਿਯਸ੍ਸ ਆਚਰਿਯਧਨਂ ਪਰਿਯੇਸਤਿ ਧਮ੍ਮੇਨੇવ, ਨੋ ਅਧਮ੍ਮੇਨ।
‘‘Kathañca, doṇa, brāhmaṇo sambhinnamariyādo hoti? Idha , doṇa, brāhmaṇo ubhato sujāto hoti – mātito ca pitito ca, saṃsuddhagahaṇiko, yāva sattamā pitāmahayugā akkhitto anupakkuṭṭho jātivādena . So aṭṭhacattālīsavassāni komārabrahmacariyaṃ carati mante adhīyamāno. Aṭṭhacattālīsavassāni komārabrahmacariyaṃ caritvā mante adhīyitvā ācariyassa ācariyadhanaṃ pariyesati dhammeneva, no adhammena.
‘‘ਤਤ੍ਥ ਚ, ਦੋਣ, ਕੋ ਧਮ੍ਮੋ? ਨੇવ ਕਸਿਯਾ ਨ વਣਿਜ੍ਜਾਯ ਨ ਗੋਰਕ੍ਖੇਨ ਨ ਇਸ੍ਸਤ੍ਥੇਨ ਨ ਰਾਜਪੋਰਿਸੇਨ ਨ ਸਿਪ੍ਪਞ੍ਞਤਰੇਨ, ਕੇવਲਂ ਭਿਕ੍ਖਾਚਰਿਯਾਯ ਕਪਾਲਂ ਅਨਤਿਮਞ੍ਞਮਾਨੋ। ਸੋ ਆਚਰਿਯਸ੍ਸ ਆਚਰਿਯਧਨਂ ਨਿਯ੍ਯਾਦੇਤ੍વਾ ਦਾਰਂ ਪਰਿਯੇਸਤਿ ਧਮ੍ਮੇਨਪਿ ਅਧਮ੍ਮੇਨਪਿ ਕਯੇਨਪਿ વਿਕ੍ਕਯੇਨਪਿ ਬ੍ਰਾਹ੍ਮਣਿਮ੍ਪਿ ਉਦਕੂਪਸ੍ਸਟ੍ਠਂ। ਸੋ ਬ੍ਰਾਹ੍ਮਣਿਮ੍ਪਿ ਗਚ੍ਛਤਿ ਖਤ੍ਤਿਯਿਮ੍ਪਿ ਗਚ੍ਛਤਿ વੇਸ੍ਸਿਮ੍ਪਿ ਗਚ੍ਛਤਿ ਸੁਦ੍ਦਿਮ੍ਪਿ ਗਚ੍ਛਤਿ ਚਣ੍ਡਾਲਿਮ੍ਪਿ ਗਚ੍ਛਤਿ ਨੇਸਾਦਿਮ੍ਪਿ ਗਚ੍ਛਤਿ વੇਨਿਮ੍ਪਿ ਗਚ੍ਛਤਿ ਰਥਕਾਰਿਮ੍ਪਿ ਗਚ੍ਛਤਿ ਪੁਕ੍ਕੁਸਿਮ੍ਪਿ ਗਚ੍ਛਤਿ ਗਬ੍ਭਿਨਿਮ੍ਪਿ ਗਚ੍ਛਤਿ ਪਾਯਮਾਨਮ੍ਪਿ ਗਚ੍ਛਤਿ ਉਤੁਨਿਮ੍ਪਿ ਗਚ੍ਛਤਿ ਅਨੁਤੁਨਿਮ੍ਪਿ ਗਚ੍ਛਤਿ। ਤਸ੍ਸ ਸਾ ਹੋਤਿ ਬ੍ਰਾਹ੍ਮਣੀ ਕਾਮਤ੍ਥਾਪਿ ਦવਤ੍ਥਾਪਿ ਰਤਤ੍ਥਾਪਿ ਪਜਤ੍ਥਾਪਿ ਬ੍ਰਾਹ੍ਮਣਸ੍ਸ ਬ੍ਰਾਹ੍ਮਣੀ ਹੋਤਿ। ਯਾવ ਪੋਰਾਣਾਨਂ ਬ੍ਰਾਹ੍ਮਣਾਨਂ ਮਰਿਯਾਦੋ ਤਤ੍ਥ ਨ ਤਿਟ੍ਠਤਿ, ਤਂ વੀਤਿਕ੍ਕਮਤਿ। ‘ਯਾવ ਪੋਰਾਣਾਨਂ ਬ੍ਰਾਹ੍ਮਣਾਨਂ ਮਰਿਯਾਦੋ ਤਤ੍ਥ ਬ੍ਰਾਹ੍ਮਣੋ ਨ ਠਿਤੋ ਤਂ વੀਤਿਕ੍ਕਮਤੀ’ਤਿ ਖੋ, ਦੋਣ, ਤਸ੍ਮਾ ਬ੍ਰਾਹ੍ਮਣੋ ਸਮ੍ਭਿਨ੍ਨਮਰਿਯਾਦੋਤਿ વੁਚ੍ਚਤਿ। ਏવਂ ਖੋ, ਦੋਣ, ਬ੍ਰਾਹ੍ਮਣੋ ਸਮ੍ਭਿਨ੍ਨਮਰਿਯਾਦੋ ਹੋਤਿ।
‘‘Tattha ca, doṇa, ko dhammo? Neva kasiyā na vaṇijjāya na gorakkhena na issatthena na rājaporisena na sippaññatarena, kevalaṃ bhikkhācariyāya kapālaṃ anatimaññamāno. So ācariyassa ācariyadhanaṃ niyyādetvā dāraṃ pariyesati dhammenapi adhammenapi kayenapi vikkayenapi brāhmaṇimpi udakūpassaṭṭhaṃ. So brāhmaṇimpi gacchati khattiyimpi gacchati vessimpi gacchati suddimpi gacchati caṇḍālimpi gacchati nesādimpi gacchati venimpi gacchati rathakārimpi gacchati pukkusimpi gacchati gabbhinimpi gacchati pāyamānampi gacchati utunimpi gacchati anutunimpi gacchati. Tassa sā hoti brāhmaṇī kāmatthāpi davatthāpi ratatthāpi pajatthāpi brāhmaṇassa brāhmaṇī hoti. Yāva porāṇānaṃ brāhmaṇānaṃ mariyādo tattha na tiṭṭhati, taṃ vītikkamati. ‘Yāva porāṇānaṃ brāhmaṇānaṃ mariyādo tattha brāhmaṇo na ṭhito taṃ vītikkamatī’ti kho, doṇa, tasmā brāhmaṇo sambhinnamariyādoti vuccati. Evaṃ kho, doṇa, brāhmaṇo sambhinnamariyādo hoti.
‘‘ਕਥਞ੍ਚ, ਦੋਣ, ਬ੍ਰਾਹ੍ਮਣੋ ਬ੍ਰਾਹ੍ਮਣਚਣ੍ਡਾਲੋ ਹੋਤਿ? ਇਧ, ਦੋਣ, ਬ੍ਰਾਹ੍ਮਣੋ ਉਭਤੋ ਸੁਜਾਤੋ ਹੋਤਿ – ਮਾਤਿਤੋ ਚ ਪਿਤਿਤੋ ਚ, ਸਂਸੁਦ੍ਧਗਹਣਿਕੋ, ਯਾવ ਸਤ੍ਤਮਾ ਪਿਤਾਮਹਯੁਗਾ ਅਕ੍ਖਿਤ੍ਤੋ ਅਨੁਪਕ੍ਕੁਟ੍ਠੋ ਜਾਤਿવਾਦੇਨ। ਸੋ ਅਟ੍ਠਚਤ੍ਤਾਲੀਸવਸ੍ਸਾਨਿ ਕੋਮਾਰਬ੍ਰਹ੍ਮਚਰਿਯਂ ਚਰਤਿ ਮਨ੍ਤੇ ਅਧੀਯਮਾਨੋ। ਅਟ੍ਠਚਤ੍ਤਾਲੀਸવਸ੍ਸਾਨਿ ਕੋਮਾਰਬ੍ਰਹ੍ਮਚਰਿਯਂ ਚਰਿਤ੍વਾ ਮਨ੍ਤੇ ਅਧੀਯਿਤ੍વਾ ਆਚਰਿਯਸ੍ਸ ਆਚਰਿਯਧਨਂ ਪਰਿਯੇਸਤਿ ਧਮ੍ਮੇਨਪਿ ਅਧਮ੍ਮੇਨਪਿ ਕਸਿਯਾਪਿ વਣਿਜ੍ਜਾਯਪਿ ਗੋਰਕ੍ਖੇਨਪਿ ਇਸ੍ਸਤ੍ਥੇਨਪਿ ਰਾਜਪੋਰਿਸੇਨਪਿ ਸਿਪ੍ਪਞ੍ਞਤਰੇਨਪਿ, ਕੇવਲਮ੍ਪਿ ਭਿਕ੍ਖਾਚਰਿਯਾਯ, ਕਪਾਲਂ ਅਨਤਿਮਞ੍ਞਮਾਨੋ।
‘‘Kathañca, doṇa, brāhmaṇo brāhmaṇacaṇḍālo hoti? Idha, doṇa, brāhmaṇo ubhato sujāto hoti – mātito ca pitito ca, saṃsuddhagahaṇiko, yāva sattamā pitāmahayugā akkhitto anupakkuṭṭho jātivādena. So aṭṭhacattālīsavassāni komārabrahmacariyaṃ carati mante adhīyamāno. Aṭṭhacattālīsavassāni komārabrahmacariyaṃ caritvā mante adhīyitvā ācariyassa ācariyadhanaṃ pariyesati dhammenapi adhammenapi kasiyāpi vaṇijjāyapi gorakkhenapi issatthenapi rājaporisenapi sippaññatarenapi, kevalampi bhikkhācariyāya, kapālaṃ anatimaññamāno.
‘‘ਸੋ ਆਚਰਿਯਸ੍ਸ ਆਚਰਿਯਧਨਂ ਨਿਯ੍ਯਾਦੇਤ੍વਾ ਦਾਰਂ ਪਰਿਯੇਸਤਿ ਧਮ੍ਮੇਨਪਿ ਅਧਮ੍ਮੇਨਪਿ ਕਯੇਨਪਿ વਿਕ੍ਕਯੇਨਪਿ ਬ੍ਰਾਹ੍ਮਣਿਮ੍ਪਿ ਉਦਕੂਪਸ੍ਸਟ੍ਠਂ। ਸੋ ਬ੍ਰਾਹ੍ਮਣਿਮ੍ਪਿ ਗਚ੍ਛਤਿ ਖਤ੍ਤਿਯਿਮ੍ਪਿ ਗਚ੍ਛਤਿ વੇਸ੍ਸਿਮ੍ਪਿ ਗਚ੍ਛਤਿ ਸੁਦ੍ਦਿਮ੍ਪਿ ਗਚ੍ਛਤਿ ਚਣ੍ਡਾਲਿਮ੍ਪਿ ਗਚ੍ਛਤਿ ਨੇਸਾਦਿਮ੍ਪਿ ਗਚ੍ਛਤਿ વੇਨਿਮ੍ਪਿ ਗਚ੍ਛਤਿ ਰਥਕਾਰਿਮ੍ਪਿ ਗਚ੍ਛਤਿ ਪੁਕ੍ਕੁਸਿਮ੍ਪਿ ਗਚ੍ਛਤਿ ਗਬ੍ਭਿਨਿਮ੍ਪਿ ਗਚ੍ਛਤਿ ਪਾਯਮਾਨਮ੍ਪਿ ਗਚ੍ਛਤਿ ਉਤੁਨਿਮ੍ਪਿ ਗਚ੍ਛਤਿ ਅਨੁਤੁਨਿਮ੍ਪਿ ਗਚ੍ਛਤਿ। ਤਸ੍ਸ ਸਾ ਹੋਤਿ ਬ੍ਰਾਹ੍ਮਣੀ ਕਾਮਤ੍ਥਾਪਿ ਦવਤ੍ਥਾਪਿ ਰਤਤ੍ਥਾਪਿ ਪਜਤ੍ਥਾਪਿ ਬ੍ਰਾਹ੍ਮਣਸ੍ਸ ਬ੍ਰਾਹ੍ਮਣੀ ਹੋਤਿ। ਸੋ ਸਬ੍ਬਕਮ੍ਮੇਹਿ ਜੀવਿਕਂ 17 ਕਪ੍ਪੇਤਿ। ਤਮੇਨਂ ਬ੍ਰਾਹ੍ਮਣਾ ਏવਮਾਹਂਸੁ – ‘ਕਸ੍ਮਾ ਭવਂ ਬ੍ਰਾਹ੍ਮਣੋ ਪਟਿਜਾਨਮਾਨੋ ਸਬ੍ਬਕਮ੍ਮੇਹਿ ਜੀવਿਕਂ ਕਪ੍ਪੇਤੀ’ਤਿ? ਸੋ ਏવਮਾਹ – ‘ਸੇਯ੍ਯਥਾਪਿ, ਭੋ, ਅਗ੍ਗਿ ਸੁਚਿਮ੍ਪਿ ਡਹਤਿ ਅਸੁਚਿਮ੍ਪਿ ਡਹਤਿ, ਨ ਚ ਤੇਨ ਅਗ੍ਗਿ ਉਪਲਿਪ੍ਪਤਿ 18; ਏવਮੇવਂ ਖੋ, ਭੋ, ਸਬ੍ਬਕਮ੍ਮੇਹਿ ਚੇਪਿ ਬ੍ਰਾਹ੍ਮਣੋ ਜੀવਿਕਂ ਕਪ੍ਪੇਤਿ, ਨ ਚ ਤੇਨ ਬ੍ਰਾਹ੍ਮਣੋ ਉਪਲਿਪ੍ਪਤਿ’। ‘ਸਬ੍ਬਕਮ੍ਮੇਹਿ ਜੀવਿਕਂ ਕਪ੍ਪੇਤੀ’ਤਿ ਖੋ, ਦੋਣ , ਤਸ੍ਮਾ ਬ੍ਰਾਹ੍ਮਣੋ ਬ੍ਰਾਹ੍ਮਣਚਣ੍ਡਾਲੋਤਿ વੁਚ੍ਚਤਿ। ਏવਂ ਖੋ, ਦੋਣ, ਬ੍ਰਾਹ੍ਮਣੋ ਬ੍ਰਾਹ੍ਮਣਚਣ੍ਡਾਲੋ ਹੋਤਿ।
‘‘So ācariyassa ācariyadhanaṃ niyyādetvā dāraṃ pariyesati dhammenapi adhammenapi kayenapi vikkayenapi brāhmaṇimpi udakūpassaṭṭhaṃ. So brāhmaṇimpi gacchati khattiyimpi gacchati vessimpi gacchati suddimpi gacchati caṇḍālimpi gacchati nesādimpi gacchati venimpi gacchati rathakārimpi gacchati pukkusimpi gacchati gabbhinimpi gacchati pāyamānampi gacchati utunimpi gacchati anutunimpi gacchati. Tassa sā hoti brāhmaṇī kāmatthāpi davatthāpi ratatthāpi pajatthāpi brāhmaṇassa brāhmaṇī hoti. So sabbakammehi jīvikaṃ 19 kappeti. Tamenaṃ brāhmaṇā evamāhaṃsu – ‘kasmā bhavaṃ brāhmaṇo paṭijānamāno sabbakammehi jīvikaṃ kappetī’ti? So evamāha – ‘seyyathāpi, bho, aggi sucimpi ḍahati asucimpi ḍahati, na ca tena aggi upalippati 20; evamevaṃ kho, bho, sabbakammehi cepi brāhmaṇo jīvikaṃ kappeti, na ca tena brāhmaṇo upalippati’. ‘Sabbakammehi jīvikaṃ kappetī’ti kho, doṇa , tasmā brāhmaṇo brāhmaṇacaṇḍāloti vuccati. Evaṃ kho, doṇa, brāhmaṇo brāhmaṇacaṇḍālo hoti.
‘‘ਯੇ ਖੋ ਤੇ, ਦੋਣ, ਬ੍ਰਾਹ੍ਮਣਾਨਂ ਪੁਬ੍ਬਕਾ ਇਸਯੋ ਮਨ੍ਤਾਨਂ ਕਤ੍ਤਾਰੋ ਮਨ੍ਤਾਨਂ ਪવਤ੍ਤਾਰੋ ਯੇਸਮਿਦਂ ਏਤਰਹਿ ਬ੍ਰਾਹ੍ਮਣਾ ਪੋਰਾਣਂ ਮਨ੍ਤਪਦਂ ਗੀਤਂ ਪવੁਤ੍ਤਂ ਸਮੀਹਿਤਂ ਤਦਨੁਗਾਯਨ੍ਤਿ ਤਦਨੁਭਾਸਨ੍ਤਿ ਭਾਸਿਤਮਨੁਭਾਸਨ੍ਤਿ ਸਜ੍ਝਾਯਿਤਮਨੁਸਜ੍ਝਾਯਨ੍ਤਿ વਾਚਿਮਨੁવਾਚੇਨ੍ਤਿ, ਸੇਯ੍ਯਥਿਦਂ – ਅਟ੍ਠਕੋ, વਾਮਕੋ, વਾਮਦੇવੋ, વੇਸ੍ਸਾਮਿਤ੍ਤੋ, ਯਮਦਗ੍ਗਿ, ਅਙ੍ਗੀਰਸੋ, ਭਾਰਦ੍વਾਜੋ, વਾਸੇਟ੍ਠੋ , ਕਸ੍ਸਪੋ, ਭਗੁ; ਤ੍ਯਾਸ੍ਸੁਮੇ ਪਞ੍ਚ ਬ੍ਰਾਹ੍ਮਣੇ ਪਞ੍ਞਾਪੇਨ੍ਤਿ – ਬ੍ਰਹ੍ਮਸਮਂ, ਦੇવਸਮਂ, ਮਰਿਯਾਦਂ, ਸਮ੍ਭਿਨ੍ਨਮਰਿਯਾਦਂ, ਬ੍ਰਾਹ੍ਮਣਚਣ੍ਡਾਲਂਯੇવ ਪਞ੍ਚਮਂ। ਤੇਸਂ ਤ੍વਂ, ਦੋਣ, ਕਤਮੋ’’ਤਿ?
‘‘Ye kho te, doṇa, brāhmaṇānaṃ pubbakā isayo mantānaṃ kattāro mantānaṃ pavattāro yesamidaṃ etarahi brāhmaṇā porāṇaṃ mantapadaṃ gītaṃ pavuttaṃ samīhitaṃ tadanugāyanti tadanubhāsanti bhāsitamanubhāsanti sajjhāyitamanusajjhāyanti vācimanuvācenti, seyyathidaṃ – aṭṭhako, vāmako, vāmadevo, vessāmitto, yamadaggi, aṅgīraso, bhāradvājo, vāseṭṭho , kassapo, bhagu; tyāssume pañca brāhmaṇe paññāpenti – brahmasamaṃ, devasamaṃ, mariyādaṃ, sambhinnamariyādaṃ, brāhmaṇacaṇḍālaṃyeva pañcamaṃ. Tesaṃ tvaṃ, doṇa, katamo’’ti?
‘‘ਏવਂ ਸਨ੍ਤੇ ਮਯਂ, ਭੋ ਗੋਤਮ, ਬ੍ਰਾਹ੍ਮਣਚਣ੍ਡਾਲਮ੍ਪਿ ਨ ਪੂਰੇਮ। ਅਭਿਕ੍ਕਨ੍ਤਂ, ਭੋ ਗੋਤਮ…ਪੇ॰… ਉਪਾਸਕਂ ਮਂ ਭવਂ ਗੋਤਮੋ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤ’’ਨ੍ਤਿ। ਦੁਤਿਯਂ।
‘‘Evaṃ sante mayaṃ, bho gotama, brāhmaṇacaṇḍālampi na pūrema. Abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti. Dutiyaṃ.
Footnotes:
Related texts:
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) / ੨. ਦੋਣਬ੍ਰਾਹ੍ਮਣਸੁਤ੍ਤવਣ੍ਣਨਾ • 2. Doṇabrāhmaṇasuttavaṇṇanā
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੨. ਦੋਣਬ੍ਰਾਹ੍ਮਣਸੁਤ੍ਤવਣ੍ਣਨਾ • 2. Doṇabrāhmaṇasuttavaṇṇanā
