| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. தோ³ணப்³ராஹ்மணஸுத்தவண்ணனா
2. Doṇabrāhmaṇasuttavaṇṇanā
192. து³தியே பவத்தாரோதி (தீ³॰ நி॰ டீ॰ 1.285) பாவசனபா⁴வேன வத்தாரோ. யஸ்மா தே தேஸங் மந்தானங் பவத்தனகா, தஸ்மா ஆஹ ‘‘பவத்தயிதாரோ’’தி. ஸுத்³தே³ ப³ஹி கத்வா ரஹோபா⁴ஸிதப்³ப³ட்டே²ன மந்தா ஏவ தங்தங்அத்த²ப்படிபத்திஹேதுதாய மந்தபத³ங். அனுபனீதாஸாதா⁴ரணதாய ரஹஸ்ஸபா⁴வேன வத்தப்³ப³கிரியாய அதி⁴க³மூபாயங். ஸஜ்ஜா²யிதந்தி கா³யனவஸேன ஸஜ்ஜா²யிதங். தங் பன உத³த்தானுத³த்தாதீ³னங் ஸரானங் ஸம்பதா³வஸேனேவ இச்சி²தந்தி ஆஹ ‘‘ஸரஸம்பத்திவஸேனா’’தி. அஞ்ஞேஸங் வுத்தந்தி பாவசனபா⁴வேன அஞ்ஞேஸங் வுத்தங். ஸமுபப்³யூள்ஹந்தி ஸங்க³ஹெத்வா உபரூபரி ஸஞ்ஞூள்ஹங். ராஸிகதந்தி இருவேத³யஜுவேத³ஸாமவேதா³தி³வஸேன, தத்தா²பி பச்சேகங் மந்தப்³ரஹ்மாதி³வஸேன, அஜ்ஜா²யானுவாகாதி³வஸேன ச ராஸிகதங். தேஸந்தி மந்தானங் கத்தூனங். தி³ப்³பே³ன சக்கு²னா ஓலோகெத்வாதி தி³ப்³ப³சக்கு²பரிப⁴ண்டே³ன யதா²கம்மூபக³ஞாணேன ஸத்தானங் கம்மஸ்ஸகதாதி³ங், பச்சக்க²தோ த³ஸ்ஸனட்டே²ன தி³ப்³ப³சக்கு²ஸதி³ஸேன புப்³பே³னிவாஸஞாணேன அதீதகப்பே ப்³ராஹ்மணானங் மந்தஜ்ஜே²னவிதி⁴ஞ்ச ஓலோகெத்வா. பாவசனேன ஸஹ ஸங்ஸந்தெ³த்வாதி கஸ்ஸபஸம்மாஸம்பு³த்³த⁴ஸ்ஸ யங் வசனங் வட்டஸன்னிஸ்ஸிதங், தேன ஸஹ அவிருத்³த⁴ங் கத்வா. ந ஹி தேஸங் விவட்டஸன்னிஸ்ஸிதோ அத்தோ² பச்சக்கோ² ஹோதி. அபராபரேதி அட்ட²காதீ³ஹி அபராபரே பச்சி²மா ஓக்காகராஜகாலாதீ³ஸு உப்பன்னா. பக்கி²பித்வாதி அட்ட²காதீ³ஹி க³ந்தி²தமந்தபதே³ஸு கிலேஸஸன்னிஸ்ஸிதபதா³னங் தத்த² தத்த² பதே³ பக்கி²பனங் கத்வா. விருத்³தே⁴ அகங்ஸூதி ப்³ராஹ்மணத⁴ம்மிகஸுத்தாதீ³ஸு (ஸு॰ நி॰ ப்³ராஹ்மணத⁴ம்மிகஸுத்தங் 286 ஆத³யோ) ஆக³தனயேன ஸங்கிலேஸத்த²தீ³பனதோ பச்சனீகபூ⁴தே அகங்ஸு.
192. Dutiye pavattāroti (dī. ni. ṭī. 1.285) pāvacanabhāvena vattāro. Yasmā te tesaṃ mantānaṃ pavattanakā, tasmā āha ‘‘pavattayitāro’’ti. Sudde bahi katvā rahobhāsitabbaṭṭhena mantā eva taṃtaṃatthappaṭipattihetutāya mantapadaṃ. Anupanītāsādhāraṇatāya rahassabhāvena vattabbakiriyāya adhigamūpāyaṃ. Sajjhāyitanti gāyanavasena sajjhāyitaṃ. Taṃ pana udattānudattādīnaṃ sarānaṃ sampadāvaseneva icchitanti āha ‘‘sarasampattivasenā’’ti. Aññesaṃ vuttanti pāvacanabhāvena aññesaṃ vuttaṃ. Samupabyūḷhanti saṅgahetvā uparūpari saññūḷhaṃ. Rāsikatanti iruvedayajuvedasāmavedādivasena, tatthāpi paccekaṃ mantabrahmādivasena, ajjhāyānuvākādivasena ca rāsikataṃ. Tesanti mantānaṃ kattūnaṃ. Dibbena cakkhunā oloketvāti dibbacakkhuparibhaṇḍena yathākammūpagañāṇena sattānaṃ kammassakatādiṃ, paccakkhato dassanaṭṭhena dibbacakkhusadisena pubbenivāsañāṇena atītakappe brāhmaṇānaṃ mantajjhenavidhiñca oloketvā. Pāvacanena saha saṃsandetvāti kassapasammāsambuddhassa yaṃ vacanaṃ vaṭṭasannissitaṃ, tena saha aviruddhaṃ katvā. Na hi tesaṃ vivaṭṭasannissito attho paccakkho hoti. Aparāpareti aṭṭhakādīhi aparāpare pacchimā okkākarājakālādīsu uppannā. Pakkhipitvāti aṭṭhakādīhi ganthitamantapadesu kilesasannissitapadānaṃ tattha tattha pade pakkhipanaṃ katvā. Viruddhe akaṃsūti brāhmaṇadhammikasuttādīsu (su. ni. brāhmaṇadhammikasuttaṃ 286 ādayo) āgatanayena saṃkilesatthadīpanato paccanīkabhūte akaṃsu.
உஸூனங் அஸனகம்மங் இஸ்ஸத்த²ங், த⁴னுஸிப்பேன ஜீவிகா. இத⁴ பன இஸ்ஸத்த²ங் வியாதி இஸ்ஸத்த²ங், ஸப்³ப³ஆவுத⁴ஜீவிகாதி ஆஹ ‘‘யோதா⁴ஜீவகம்மேனா’’தி, ஆவுத⁴ங் க³ஹெத்வா உபட்டா²னகம்மேனாதி அத்தோ². ராஜபோரிஸங் நாம வினா ஆவுதே⁴ன போரோஹேச்சாமச்சகம்மாதி³ராஜகம்மங் கத்வா ராஜுபட்டா²னங். ஸிப்பஞ்ஞதரேனாதி க³ஹிதாவஸேஸேன ஹத்தி²அஸ்ஸஸிப்பாதி³னா. குமாரபா⁴வதோ பபு⁴தி சரணேன கோமாரப்³ரஹ்மசரியங்.
Usūnaṃ asanakammaṃ issatthaṃ, dhanusippena jīvikā. Idha pana issatthaṃ viyāti issatthaṃ, sabbaāvudhajīvikāti āha ‘‘yodhājīvakammenā’’ti, āvudhaṃ gahetvā upaṭṭhānakammenāti attho. Rājaporisaṃ nāma vinā āvudhena poroheccāmaccakammādirājakammaṃ katvā rājupaṭṭhānaṃ. Sippaññatarenāti gahitāvasesena hatthiassasippādinā. Kumārabhāvato pabhuti caraṇena komārabrahmacariyaṃ.
உத³கங் பாதெத்வா தெ³ந்தீதி த்³வாரே டி²தஸ்ஸேவ ப்³ராஹ்மணஸ்ஸ ஹத்தே² உத³கங் ஆஸிஞ்சந்தா ‘‘இத³ங் தே, ப்³ராஹ்மண, ப⁴ரியங் போஸாபனத்தா²ய தே³மா’’தி வத்வா தெ³ந்தி. கஸ்மா பன தே ஏவங் ப்³ரஹ்மசரியங் சரித்வாபி தா³ரங் பரியேஸந்தி, ந யாவஜீவங் ப்³ரஹ்மசாரினோ ஹொந்தீதி? மிச்சா²தி³ட்டி²வஸேன. தேஸஞ்ஹீ ஏவங் தி³ட்டி² ஹோதி ‘‘யோ புத்தங் ந உப்பாதே³தி, ஸோ குலவங்ஸச்சே²த³கரோ ஹோதி, ததோ நிரயே பச்சதீ’’தி. சத்தாரோ கிர அபா⁴யிதப்³ப³ங் பா⁴யந்தி க³ண்டு³ப்பாத³கோ, கிகீ, கொந்தினீ, ப்³ராஹ்மணோதி. க³ண்டு³ப்பாதா³ கிர மஹாபத²வியா க²யனப⁴யேன மத்தபோ⁴ஜனா ஹொந்தி, ந ப³ஹுங் மத்திகங் கா²த³ந்தி. கிகீ ஸகுணிகா ஆகாஸபதனப⁴யேன அண்ட³ஸ்ஸ உபரி உத்தானா ஸேதி. கொந்தினீ ஸகுணீ பத²வீகம்பனப⁴யேன பாதே³ஹி பூ⁴மிங் ந ஸுட்டு² அக்கமதி. ப்³ராஹ்மணா குலவங்ஸூபச்சே²த³ப⁴யேன தா³ரங் பரியேஸந்தி. ஆஹு செத்த² –
Udakaṃ pātetvā dentīti dvāre ṭhitasseva brāhmaṇassa hatthe udakaṃ āsiñcantā ‘‘idaṃ te, brāhmaṇa, bhariyaṃ posāpanatthāya demā’’ti vatvā denti. Kasmā pana te evaṃ brahmacariyaṃ caritvāpi dāraṃ pariyesanti, na yāvajīvaṃ brahmacārino hontīti? Micchādiṭṭhivasena. Tesañhī evaṃ diṭṭhi hoti ‘‘yo puttaṃ na uppādeti, so kulavaṃsacchedakaro hoti, tato niraye paccatī’’ti. Cattāro kira abhāyitabbaṃ bhāyanti gaṇḍuppādako, kikī, kontinī, brāhmaṇoti. Gaṇḍuppādā kira mahāpathaviyā khayanabhayena mattabhojanā honti, na bahuṃ mattikaṃ khādanti. Kikī sakuṇikā ākāsapatanabhayena aṇḍassa upari uttānā seti. Kontinī sakuṇī pathavīkampanabhayena pādehi bhūmiṃ na suṭṭhu akkamati. Brāhmaṇā kulavaṃsūpacchedabhayena dāraṃ pariyesanti. Āhu cettha –
‘‘க³ண்டு³ப்பாதோ³ கிகீ சேவ, கொந்தீ ப்³ராஹ்மணத⁴ம்மிகோ;
‘‘Gaṇḍuppādo kikī ceva, kontī brāhmaṇadhammiko;
ஏதே அப⁴யங் பா⁴யந்தி, ஸம்மூள்ஹா சதுரோ ஜனா’’தி. (ஸு॰ நி॰ அட்ட²॰ 2.293);
Ete abhayaṃ bhāyanti, sammūḷhā caturo janā’’ti. (su. ni. aṭṭha. 2.293);
ஸேஸமெத்த² உத்தானமேவ.
Sesamettha uttānameva.
தோ³ணப்³ராஹ்மணஸுத்தவண்ணனா நிட்டி²தா.
Doṇabrāhmaṇasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. தோ³ணப்³ராஹ்மணஸுத்தங் • 2. Doṇabrāhmaṇasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. தோ³ணப்³ராஹ்மணஸுத்தவண்ணனா • 2. Doṇabrāhmaṇasuttavaṇṇanā
