| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၂. ဒောဏဗ္ရာဟ္မဏသုတ္တဝဏ္ဏနာ
2. Doṇabrāhmaṇasuttavaṇṇanā
၁၉၂. ဒုတိယေ တ္ဝမ္ပိ နောတိ တ္ဝမ္ပိ နု။ ပဝတ္တာရောတိ ပဝတ္တယိတာရော။ ယေသန္တိ ယေသံ သန္တကံ။ မန္တပဒန္တိ ဝေဒသင္ခာတံ မန္တမေဝ။ ဂီတန္တိ အဋ္ဌကာဒီဟိ ဒသဟိ ပောရာဏကဗ္ရာဟ္မဏေဟိ သရသမ္ပတ္တိဝသေန သဇ္ဈာယိတံ။ ပဝုတ္တန္တိ အညေသံ ဝုတ္တံ, ဝာစိတန္တိ အတ္ထော။ သမီဟိတန္တိ သမုပဗ္ယူဠ္ဟံ ရာသိကတံ, ပိဏ္ဍံ ကတ္ဝာ ဌပိတန္တိ အတ္ထော။ တဒနုဂာယန္တီတိ ဧတရဟိ ဗ္ရာဟ္မဏာ တံ တေဟိ ပုဗ္ဗေဟိ ဂီတံ အနုဂာယန္တိ အနုသဇ္ဈာယန္တိ။ တဒနုဘာသန္တီတိ တံ အနုဘာသန္တိ။ ဣဒံ ပုရိမသ္သေဝ ဝေဝစနံ။ ဘာသိတမနုဘာသန္တီတိ တေဟိ ဘာသိတံ အနုဘာသန္တိ။ သဇ္ဈာယိတမနုသဇ္ဈာယန္တီတိ တေဟိ သဇ္ဈာယိတံ အနုသဇ္ဈာယန္တိ။ ဝာစိတမနုဝာစေန္တီတိ တေဟိ အညေသံ ဝာစိတံ အနုဝာစေန္တိ။ သေယ္ယထိဒန္တိ တေ ကတမေတိ အတ္ထော။ အဋ္ဌကောတိအာဒီနိ တေသံ နာမာနိ။ တေ ကိရ ဒိဗ္ဗေန စက္ခုနာ ဩလောကေတ္ဝာ ပရူပဃာတံ အကတ္ဝာ ကသ္သပသမ္မာသမ္ဗုဒ္ဓသ္သ ဘဂဝတော ပာဝစနေန သဟ သံသန္ဒေတ္ဝာ မန္တေ ဂန္ထေသုံ။ အပရာပရေ ပန ဗ္ရာဟ္မဏာ ပာဏာတိပာတာဒီနိ ပက္ခိပိတ္ဝာ တယော ဝေဒေ ဘိန္ဒိတ္ဝာ ဗုဒ္ဓဝစနေန သဒ္ဓိံ ဝိရုဒ္ဓေ အကံသု။ တ္ယာသ္သု’မေတိ ဧတ္ထ အသ္သူတိ နိပာတမတ္တံ, တေ ဗ္ရာဟ္မဏာ ဣမေ ပဉ္စ ဗ္ရာဟ္မဏေ ပညာပေန္တီတိ အတ္ထော။
192. Dutiye tvampi noti tvampi nu. Pavattāroti pavattayitāro. Yesanti yesaṃ santakaṃ. Mantapadanti vedasaṅkhātaṃ mantameva. Gītanti aṭṭhakādīhi dasahi porāṇakabrāhmaṇehi sarasampattivasena sajjhāyitaṃ. Pavuttanti aññesaṃ vuttaṃ, vācitanti attho. Samīhitanti samupabyūḷhaṃ rāsikataṃ, piṇḍaṃ katvā ṭhapitanti attho. Tadanugāyantīti etarahi brāhmaṇā taṃ tehi pubbehi gītaṃ anugāyanti anusajjhāyanti. Tadanubhāsantīti taṃ anubhāsanti. Idaṃ purimasseva vevacanaṃ. Bhāsitamanubhāsantīti tehi bhāsitaṃ anubhāsanti. Sajjhāyitamanusajjhāyantīti tehi sajjhāyitaṃ anusajjhāyanti. Vācitamanuvācentīti tehi aññesaṃ vācitaṃ anuvācenti. Seyyathidanti te katameti attho. Aṭṭhakotiādīni tesaṃ nāmāni. Te kira dibbena cakkhunā oloketvā parūpaghātaṃ akatvā kassapasammāsambuddhassa bhagavato pāvacanena saha saṃsandetvā mante ganthesuṃ. Aparāpare pana brāhmaṇā pāṇātipātādīni pakkhipitvā tayo vede bhinditvā buddhavacanena saddhiṃ viruddhe akaṃsu. Tyāssu’meti ettha assūti nipātamattaṃ, te brāhmaṇā ime pañca brāhmaṇe paññāpentīti attho.
မန္တေ အဓီယမာနောတိ ဝေဒေ သဇ္ဈာယန္တော ဂဏ္ဟန္တော။ အာစရိယဓနန္တိ အာစရိယဒက္ခိဏံ အာစရိယဘာဂံ။ န ဣသ္သတ္ထေနာတိ န ယောဓာဇီဝကမ္မေန ဥပ္ပာဒေတိ။ န ရာဇပောရိသေနာတိ န ရာဇုပဋ္ဌာကဘာဝေန။ ကေဝလံ ဘိက္ခာစရိယာယာတိ သုဒ္ဓာယ ဘိက္ခာစရိယာယ ဧဝ။ ကပာလံ အနတိမညမာနောတိ တံ ဘိက္ခာဘာဇနံ အနတိမညမာနော။ သော ဟိ ပုဏ္ဏပတ္တံ အာဒာယ သီသံ န္ဟာတော ကုလဒ္ဝာရေသု ဌတ္ဝာ ‘‘အဟံ အဋ္ဌစတ္တာလီသ ဝသ္သာနိ ကောမာရဗ္ရဟ္မစရိယံ စရိံ, မန္တာပိ မေ ဂဟိတာ, အာစရိယသ္သ အာစရိယဓနံ ဒသ္သာမိ, ဓနံ မေ ဒေထာ’’တိ ယာစတိ။ တံ သုတ္ဝာ မနုသ္သာ ယထာသတ္တိ ယထာဗလံ အဋ္ဌပိ သောဠသပိ သတမ္ပိ သဟသ္သမ္ပိ ဒေန္တိ။ ဧဝံ သကလဂာမံ စရိတ္ဝာ လဒ္ဓဓနံ အာစရိယသ္သ နိယ္ယာဒေတိ။ တံ သန္ဓာယေတံ ဝုတ္တံ။ ဧဝံ ခော ဒောဏ ဗ္ရာဟ္မဏော ဗ္ရဟ္မသမော ဟောတီတိ ဧဝံ ဗ္ရဟ္မဝိဟာရေဟိ သမန္နာဂတတ္တာ ဗ္ရာဟ္မဏော ဗ္ရဟ္မသမော နာမ ဟောတိ။
Mante adhīyamānoti vede sajjhāyanto gaṇhanto. Ācariyadhananti ācariyadakkhiṇaṃ ācariyabhāgaṃ. Na issatthenāti na yodhājīvakammena uppādeti. Na rājaporisenāti na rājupaṭṭhākabhāvena. Kevalaṃ bhikkhācariyāyāti suddhāya bhikkhācariyāya eva. Kapālaṃanatimaññamānoti taṃ bhikkhābhājanaṃ anatimaññamāno. So hi puṇṇapattaṃ ādāya sīsaṃ nhāto kuladvāresu ṭhatvā ‘‘ahaṃ aṭṭhacattālīsa vassāni komārabrahmacariyaṃ cariṃ, mantāpi me gahitā, ācariyassa ācariyadhanaṃ dassāmi, dhanaṃ me dethā’’ti yācati. Taṃ sutvā manussā yathāsatti yathābalaṃ aṭṭhapi soḷasapi satampi sahassampi denti. Evaṃ sakalagāmaṃ caritvā laddhadhanaṃ ācariyassa niyyādeti. Taṃ sandhāyetaṃ vuttaṃ. Evaṃ kho doṇa brāhmaṇo brahmasamo hotīti evaṃ brahmavihārehi samannāgatattā brāhmaṇo brahmasamo nāma hoti.
နေဝ ကယေန န ဝိက္ကယေနာတိ နေဝ အတ္တနာ ကယံ ကတ္ဝာ ဂဏ္ဟာတိ, န ပရေန ဝိက္ကယံ ကတ္ဝာ ဒိန္နံ။ ဥဒကူပသ္သဋ္ဌန္တိ ဥဒကေန ဥပသ္သဋ္ဌံ ပရိစ္စတ္တံ။ သော ဟိ ယသ္မိံ ကုလေ ဝယပ္ပတ္တာ ဒာရိကာ အတ္ထိ, ဂန္တ္ဝာ တသ္သ ဒ္ဝာရေ တိဋ္ဌတိ။ ‘‘ကသ္မာ ဌိတောသီ’’တိ ဝုတ္တေ ‘‘အဟံ အဋ္ဌစတ္တာလီသ ဝသ္သာနိ ကောမာရဗ္ရဟ္မစရိယံ စရိံ, တံ သဗ္ဗံ တုမ္ဟာကံ ဒေမိ, တုမ္ဟေ မယ္ဟံ ဒာရိကံ ဒေထာ’’တိ ဝဒတိ။ တေ ဒာရိကံ အာနေတ္ဝာ တသ္သ ဟတ္ထေ ဥဒကံ ပာတေတ္ဝာ ဒေန္တိ။ သော တံ ဥဒကူပသ္သဋ္ဌံ ဘရိယံ ဂဏ္ဟိတ္ဝာ ဂစ္ဆတိ။ အတိမီဠ္ဟဇောတိ အတိမီဠ္ဟေ မဟာဂူထရာသိမ္ဟိ ဇာတော။ တသ္သ သာတိ တသ္သ ဧသာ။ န ဒဝတ္ထာတိ န ကီဠနတ္ထာ။ န ရတတ္ထာတိ န ကာမရတိအတ္ထာ။ မေထုနံ ဥပ္ပာဒေတ္ဝာတိ ဓီတရံ ဝာ ပုတ္တံ ဝာ ဥပ္ပာဒေတ္ဝာ ‘‘ဣဒာနိ ပဝေဏိ ဃဋီယိသ္သတီ’’တိ နိက္ခမိတ္ဝာ ပဗ္ဗဇတိ။ သုဂတိံ သဂ္ဂံ လောကန္တိ ဗ္ရဟ္မလောကမေဝ သန္ဓာယေတံ ဝုတ္တံ။ ဒေဝသမော ဟောတီတိ ဒိဗ္ဗဝိဟာရေဟိ သမန္နာဂတတ္တာ ဒေဝသမော နာမ ဟောတိ။
Nevakayena na vikkayenāti neva attanā kayaṃ katvā gaṇhāti, na parena vikkayaṃ katvā dinnaṃ. Udakūpassaṭṭhanti udakena upassaṭṭhaṃ pariccattaṃ. So hi yasmiṃ kule vayappattā dārikā atthi, gantvā tassa dvāre tiṭṭhati. ‘‘Kasmā ṭhitosī’’ti vutte ‘‘ahaṃ aṭṭhacattālīsa vassāni komārabrahmacariyaṃ cariṃ, taṃ sabbaṃ tumhākaṃ demi, tumhe mayhaṃ dārikaṃ dethā’’ti vadati. Te dārikaṃ ānetvā tassa hatthe udakaṃ pātetvā denti. So taṃ udakūpassaṭṭhaṃ bhariyaṃ gaṇhitvā gacchati. Atimīḷhajoti atimīḷhe mahāgūtharāsimhi jāto. Tassa sāti tassa esā. Na davatthāti na kīḷanatthā. Na ratatthāti na kāmaratiatthā. Methunaṃuppādetvāti dhītaraṃ vā puttaṃ vā uppādetvā ‘‘idāni paveṇi ghaṭīyissatī’’ti nikkhamitvā pabbajati. Sugatiṃ saggaṃ lokanti brahmalokameva sandhāyetaṃ vuttaṃ. Devasamo hotīti dibbavihārehi samannāgatattā devasamo nāma hoti.
တမေဝ ပုတ္တသ္သာဒံ နိကာမယမာနောတိ ယ္ဝာသ္သ ဓီတရံ ဝာ ပုတ္တံ ဝာ ဇာတံ ဒိသ္ဝာ ပုတ္တပေမံ ပုတ္တသ္သာဒော ဥပ္ပဇ္ဇတိ, တံ ပတ္ထယမာနော ဣစ္ဆမာနော။ ကုဋုမ္ဗံ အဇ္ဈာဝသတီတိ ကုဋုမ္ဗံ သဏ္ဌပေတ္ဝာ ကုဋုမ္ဗမဇ္ဈေ ဝသတိ။ သေသမေတ္ထ ဥတ္တာနမေဝာတိ။
Tameva puttassādaṃ nikāmayamānoti yvāssa dhītaraṃ vā puttaṃ vā jātaṃ disvā puttapemaṃ puttassādo uppajjati, taṃ patthayamāno icchamāno. Kuṭumbaṃ ajjhāvasatīti kuṭumbaṃ saṇṭhapetvā kuṭumbamajjhe vasati. Sesamettha uttānamevāti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၂. ဒောဏဗ္ရာဟ္မဏသုတ္တံ • 2. Doṇabrāhmaṇasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၂. ဒောဏဗ္ရာဟ္မဏသုတ္တဝဏ္ဏနာ • 2. Doṇabrāhmaṇasuttavaṇṇanā
