| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৩. দোণপাকসুত্তৰণ্ণনা
3. Doṇapākasuttavaṇṇanā
১২৪. ‘‘দোণপাককুর’’ন্তি এত্থ ৰিভত্তিলোপং কত্ৰা নিদ্দেসোতি আহ ‘‘দোণপাকং কুর’’ন্তি। দোণস্সাতি চতুন্নং আল়্হকানং, সোল়সনাল়ীনন্তি অত্থো। তদুপিযন্তি তদনুরূপং, তস্স ৰুত্তপরিমাণস্স অনুচ্ছৰিকন্তি অত্থো। পুব্বেতি তংদিৰসতো পুরিমতরদিৰসেসু। বলৰাতি মহা। ভত্তপরিল়াহোতি ভত্তসম্মদহেতুকো। অস্স রঞ্ঞো উভোসু পস্সেসু গহিততালৰণ্টা বীজন্তি যমকতালৰণ্টেহি। ফাসুৰিহারন্তি ভোজনে মত্তঞ্ঞুতায লদ্ধব্বসুখৰিহারং। ভোজনমত্তঞ্ঞূ হি সুখৰিহারো হোতি। তেনাহ ‘‘তনুকস্স ভৰন্তি ৰেদনা, সণিকং জীরতি আযু পালয’’ন্তি।
124. ‘‘Doṇapākakura’’nti ettha vibhattilopaṃ katvā niddesoti āha ‘‘doṇapākaṃ kura’’nti. Doṇassāti catunnaṃ āḷhakānaṃ, soḷasanāḷīnanti attho. Tadupiyanti tadanurūpaṃ, tassa vuttaparimāṇassa anucchavikanti attho. Pubbeti taṃdivasato purimataradivasesu. Balavāti mahā. Bhattapariḷāhoti bhattasammadahetuko. Assa rañño ubhosu passesu gahitatālavaṇṭā bījanti yamakatālavaṇṭehi. Phāsuvihāranti bhojane mattaññutāya laddhabbasukhavihāraṃ. Bhojanamattaññū hi sukhavihāro hoti. Tenāha ‘‘tanukassa bhavanti vedanā, saṇikaṃ jīrati āyu pālaya’’nti.
তনুকস্সাতি তনুকা অস্স পুগ্গলস্স, ভুত্তপচ্চযা ৰিসভাগৰেদনা ন হোন্তীতি অত্থো। সণিকন্তি মন্দং মুদুকং, অপরিস্সযমেৰাতি অত্থো। জীরতীতি পরিভুত্তাহারো পচ্চতি। আযুপালযন্তি নিরোধো অৰেদনো জীৰিতং রক্খন্তো। অথ ৰা সণিকং জীরতীতি সো ভোজনে মত্তঞ্ঞূ পুগ্গলো পরিমিতাহারতায সণিকং চিরেন জীরতি জরং পাপুণাতি জীৰিতং পালেন্তো।
Tanukassāti tanukā assa puggalassa, bhuttapaccayā visabhāgavedanā na hontīti attho. Saṇikanti mandaṃ mudukaṃ, aparissayamevāti attho. Jīratīti paribhuttāhāro paccati. Āyupālayanti nirodho avedano jīvitaṃ rakkhanto. Atha vā saṇikaṃ jīratīti so bhojane mattaññū puggalo parimitāhāratāya saṇikaṃ cirena jīrati jaraṃ pāpuṇāti jīvitaṃ pālento.
পরিযাপুণিত্ৰাতি এত্থ যথা সব্বং সো পরিযাপুণি, ততো পরঞ্চ যথা পটিপজ্জি, তং দস্সেতুং ‘‘রঞ্ঞা সদ্ধি’’ন্তিআদি ৰুত্তং। তাৰতকে তণ্ডুলে হারেয্যাসি তদুপিযঞ্চ ব্যঞ্জনন্তি আনেত্ৰা সম্বন্ধো।
Pariyāpuṇitvāti ettha yathā sabbaṃ so pariyāpuṇi, tato parañca yathā paṭipajji, taṃ dassetuṃ ‘‘raññā saddhi’’ntiādi vuttaṃ. Tāvatake taṇḍule hāreyyāsi tadupiyañca byañjananti ānetvā sambandho.
পুরিসভাগো এসাতি মজ্ঝিমেন পুরিসেন ভুঞ্জিতব্বভাগো এসো, যদিদং নাল়িকোদনমত্তং। সল্লিখিতসরীরতাতি ভমং আরোপেত্ৰা উল্লিখিতস্স ৰিয সব্বপরিল়াহৰূপসমস্স পুথুলতাপগতসরীরস্স। সীলং সম্পরাযিকত্থোতি ৰুত্তং, কুতো পনেত্থ সীলন্তি আহ ‘‘ভোজনে’’তিআদি। সীলঙ্গং নাম হোতীতি চতুপারিসুদ্ধিসীলস্স অৰযৰো একো ভাগো হোতি।
Purisabhāgo esāti majjhimena purisena bhuñjitabbabhāgo eso, yadidaṃ nāḷikodanamattaṃ. Sallikhitasarīratāti bhamaṃ āropetvā ullikhitassa viya sabbapariḷāhavūpasamassa puthulatāpagatasarīrassa. Sīlaṃ samparāyikatthoti vuttaṃ, kuto panettha sīlanti āha ‘‘bhojane’’tiādi. Sīlaṅgaṃ nāma hotīti catupārisuddhisīlassa avayavo eko bhāgo hoti.
দোণপাকসুত্তৰণ্ণনা নিট্ঠিতা।
Doṇapākasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৩. দোণপাকসুত্তং • 3. Doṇapākasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. দোণপাকসুত্তৰণ্ণনা • 3. Doṇapākasuttavaṇṇanā
