| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. தோ³ணஸுத்தவண்ணனா
6. Doṇasuttavaṇṇanā
36. ச²ட்டே² அந்தரா ச உக்கட்ட²ங் அந்தரா ச ஸேதப்³யந்தி எத்த² உக்கட்டா²தி உக்காஹி தா⁴ரீயமானாஹி மாபிதத்தா ஏவங்லத்³த⁴வோஹாரங் நக³ரங். ஸேதப்³யந்தி அதீதே கஸ்ஸபஸம்மாஸம்பு³த்³த⁴ஸ்ஸ ஜாதனக³ரங். அந்தராஸத்³தோ³ பன காரணக²ணசித்தவேமஜ்ஜ²விவராதீ³ஸு வத்ததி. ‘‘தத³ந்தரங் கோ ஜானெய்ய அஞ்ஞத்ர ததா²க³தா’’தி (அ॰ நி॰ 6.44; 10.75) ச, ‘‘ஜனா ஸங்க³ம்ம மந்தெந்தி, மஞ்ச தஞ்ச கிமந்தர’’ந்தி ச ஆதீ³ஸு (ஸங்॰ நி॰ 1.228) காரணே. ‘‘அத்³த³ஸா மங், ப⁴ந்தே, அஞ்ஞதரா இத்தீ² விஜ்ஜந்தரிகாய பா⁴ஜனங் தோ⁴வந்தீ’’திஆதீ³ஸு (ம॰ நி॰ 2.149) க²ணே. ‘‘யஸ்ஸந்தரதோ ந ஸந்தி கோபா’’திஆதீ³ஸு (உதா³॰ 20) சித்தே. ‘‘அந்தராவோஸானமாபாதீ³’’திஆதீ³ஸு வேமஜ்ஜே². ‘‘அபிசாயங் தபோதா³ த்³வின்னங் மஹானிரயானங் அந்தரிகாய ஆக³ச்ச²தீ’’திஆதீ³ஸு (பாரா॰ 231) விவரே. ஸ்வாயமித⁴ விவரே வத்ததி. தஸ்மா உக்கட்டா²ய ச ஸேதப்³யஸ்ஸ ச விவரேதி ஏவமெத்த² அத்தோ² த³ட்ட²ப்³போ³. அந்தராஸத்³தே³ன பன யுத்தத்தா உபயோக³வசனங் கதங். ஈதி³ஸேஸு ச டா²னேஸு அக்க²ரசிந்தகா ‘‘அந்தரா கா³மஞ்ச நதி³ஞ்ச யாதீ’’தி ஏவங் ஏகமேவ அந்தராஸத்³த³ங் பயுஞ்ஜந்தி, ஸோ து³தியபதே³னபி யோஜேதப்³போ³ ஹோதி, அயோஜியமானே உபயோக³வசனங் ந பாபுணாதி. இத⁴ பன யோஜெத்வா ஏவ வுத்தோ.
36. Chaṭṭhe antarā ca ukkaṭṭhaṃ antarā ca setabyanti ettha ukkaṭṭhāti ukkāhi dhārīyamānāhi māpitattā evaṃladdhavohāraṃ nagaraṃ. Setabyanti atīte kassapasammāsambuddhassa jātanagaraṃ. Antarāsaddo pana kāraṇakhaṇacittavemajjhavivarādīsu vattati. ‘‘Tadantaraṃ ko jāneyya aññatra tathāgatā’’ti (a. ni. 6.44; 10.75) ca, ‘‘janā saṅgamma mantenti, mañca tañca kimantara’’nti ca ādīsu (saṃ. ni. 1.228) kāraṇe. ‘‘Addasā maṃ, bhante, aññatarā itthī vijjantarikāya bhājanaṃ dhovantī’’tiādīsu (ma. ni. 2.149) khaṇe. ‘‘Yassantarato na santi kopā’’tiādīsu (udā. 20) citte. ‘‘Antarāvosānamāpādī’’tiādīsu vemajjhe. ‘‘Apicāyaṃ tapodā dvinnaṃ mahānirayānaṃ antarikāya āgacchatī’’tiādīsu (pārā. 231) vivare. Svāyamidha vivare vattati. Tasmā ukkaṭṭhāya ca setabyassa ca vivareti evamettha attho daṭṭhabbo. Antarāsaddena pana yuttattā upayogavacanaṃ kataṃ. Īdisesu ca ṭhānesu akkharacintakā ‘‘antarā gāmañca nadiñca yātī’’ti evaṃ ekameva antarāsaddaṃ payuñjanti, so dutiyapadenapi yojetabbo hoti, ayojiyamāne upayogavacanaṃ na pāpuṇāti. Idha pana yojetvā eva vutto.
அத்³தா⁴னமக்³க³ப்படிபன்னோ ஹோதீதி அத்³தா⁴னஸங்கா²தங் மக்³க³ங் படிபன்னோ ஹோதி, தீ³க⁴மக்³க³ந்தி அத்தோ². கஸ்மா படிபன்னோதி? தங் தி³வஸங் கிர ப⁴க³வா இத³ங் அத்³த³ஸ ‘‘மயி தங் மக்³க³ங் படிபன்னே தோ³ணோ ப்³ராஹ்மணோ மம பத³சேதியானி பஸ்ஸித்வா பதா³னுபதி³கோ ஹுத்வா மம நிஸின்னட்டா²னங் ஆக³ந்த்வா பஞ்ஹங் புச்சி²ஸ்ஸதி. அத²ஸ்ஸாஹங் ஏகங் ஸச்சத⁴ம்மங் தே³ஸெஸ்ஸாமி . ப்³ராஹ்மணோ தீணி ஸாமஞ்ஞப²லானி படிவிஜ்ஜி²த்வா த்³வாத³ஸபத³ஸஹஸ்ஸபரிமாணங் தோ³ணக³ஜ்ஜிதங் நாம வண்ணங் வத்வா மயி பரினிப்³பு³தே ஸகலஜம்பு³தீ³பே உப்பன்னங் மஹாகலஹங் வூபஸமெத்வா தா⁴துயோ பா⁴ஜெஸ்ஸதீ’’தி. இமினா காரணேன படிபன்னோ. தோ³ணோபி ஸுத³ங் ப்³ராஹ்மணோதி தோ³ணோ ப்³ராஹ்மணோபி தயோ வேதே³ பகு³ணே கத்வா பஞ்சஸதே மாணவகே ஸிப்பங் வாசெந்தோ தங்தி³வஸங் பாதோவ உட்டா²ய ஸரீரபடிஜக்³க³னங் கத்வா ஸதக்³க⁴னகங் நிவாஸெத்வா பஞ்சஸதக்³க⁴னகங் ஏகங்ஸவரக³தங் கத்வா ஆமுத்தயஞ்ஞஸுத்தோ ரத்தவட்டிகா உபாஹனா ஆரோஹித்வா பஞ்சஸதமாணவகபரிவாரோ தமேவ மக்³க³ங் படிபஜ்ஜி. தங் ஸந்தா⁴யேதங் வுத்தங்.
Addhānamaggappaṭipanno hotīti addhānasaṅkhātaṃ maggaṃ paṭipanno hoti, dīghamagganti attho. Kasmā paṭipannoti? Taṃ divasaṃ kira bhagavā idaṃ addasa ‘‘mayi taṃ maggaṃ paṭipanne doṇo brāhmaṇo mama padacetiyāni passitvā padānupadiko hutvā mama nisinnaṭṭhānaṃ āgantvā pañhaṃ pucchissati. Athassāhaṃ ekaṃ saccadhammaṃ desessāmi . Brāhmaṇo tīṇi sāmaññaphalāni paṭivijjhitvā dvādasapadasahassaparimāṇaṃ doṇagajjitaṃ nāma vaṇṇaṃ vatvā mayi parinibbute sakalajambudīpe uppannaṃ mahākalahaṃ vūpasametvā dhātuyo bhājessatī’’ti. Iminā kāraṇena paṭipanno. Doṇopi sudaṃ brāhmaṇoti doṇo brāhmaṇopi tayo vede paguṇe katvā pañcasate māṇavake sippaṃ vācento taṃdivasaṃ pātova uṭṭhāya sarīrapaṭijagganaṃ katvā satagghanakaṃ nivāsetvā pañcasatagghanakaṃ ekaṃsavaragataṃ katvā āmuttayaññasutto rattavaṭṭikā upāhanā ārohitvā pañcasatamāṇavakaparivāro tameva maggaṃ paṭipajji. Taṃ sandhāyetaṃ vuttaṃ.
பாதே³ஸூதி பாதே³ஹி அக்கந்தட்டா²னேஸு. சக்கானீதி லக்க²ணசக்கானி. கிங் பன ப⁴க³வதோ க³ச்ச²ந்தஸ்ஸ அக்கந்தட்டா²னே பத³ங் பஞ்ஞாயதீதி? ந பஞ்ஞாயதி . கஸ்மா? ஸுகு²மத்தா மஹாப³லத்தா மஹாஜனானுக்³க³ஹேன ச. பு³த்³தா⁴னஞ்ஹி ஸுகு²மச்ச²விதாய அக்கந்தட்டா²னங் தூலபிசுனோ பதிட்டி²தட்டா²னங் விய ஹோதி, பத³வளஞ்ஜோ ந பஞ்ஞாயதி. யதா² ச ப³லவதோ வாதஜவஸிந்த⁴வஸ்ஸ பது³மினிபத்தேபி அக்கந்தமத்தமேவ ஹோதி, ஏவங் மஹாப³லதாய ததா²க³தேன அக்கந்தட்டா²னங் அக்கந்தமத்தமேவ ஹோதி, ந தத்த² பத³வளஞ்ஜோ பஞ்ஞாயதி. பு³த்³தா⁴னஞ்ச அனுபத³ங் மஹாஜனகாயோ க³ச்ச²தி, தஸ்ஸ ஸத்து² பத³வளஞ்ஜங் தி³ஸ்வா மத்³தி³துங் அவிஸஹந்தஸ்ஸ க³மனவிச்சே²தோ³ ப⁴வெய்ய. தஸ்மா அக்கந்தஅக்கந்தட்டா²னே யோபி பத³வளஞ்ஜோ ப⁴வெய்ய, ஸோ அந்தரதா⁴யதேவ. தோ³ணோ பன ப்³ராஹ்மணோ ததா²க³தஸ்ஸ அதி⁴ட்டா²னவஸேன பஸ்ஸி. ப⁴க³வா ஹி யஸ்ஸ பத³சேதியங் த³ஸ்ஸேதுகாமோ ஹோதி, தங் ஆரப்³ப⁴ ‘‘அஸுகோ நாம பஸ்ஸதூ’’தி அதி⁴ட்டா²தி. தஸ்மா மாக³ண்டி³யப்³ராஹ்மணோ விய அயம்பி ப்³ராஹ்மணோ ததா²க³தஸ்ஸ அதி⁴ட்டா²னவஸேன அத்³த³ஸ.
Pādesūti pādehi akkantaṭṭhānesu. Cakkānīti lakkhaṇacakkāni. Kiṃ pana bhagavato gacchantassa akkantaṭṭhāne padaṃ paññāyatīti? Na paññāyati . Kasmā? Sukhumattā mahābalattā mahājanānuggahena ca. Buddhānañhi sukhumacchavitāya akkantaṭṭhānaṃ tūlapicuno patiṭṭhitaṭṭhānaṃ viya hoti, padavaḷañjo na paññāyati. Yathā ca balavato vātajavasindhavassa paduminipattepi akkantamattameva hoti, evaṃ mahābalatāya tathāgatena akkantaṭṭhānaṃ akkantamattameva hoti, na tattha padavaḷañjo paññāyati. Buddhānañca anupadaṃ mahājanakāyo gacchati, tassa satthu padavaḷañjaṃ disvā maddituṃ avisahantassa gamanavicchedo bhaveyya. Tasmā akkantaakkantaṭṭhāne yopi padavaḷañjo bhaveyya, so antaradhāyateva. Doṇo pana brāhmaṇo tathāgatassa adhiṭṭhānavasena passi. Bhagavā hi yassa padacetiyaṃ dassetukāmo hoti, taṃ ārabbha ‘‘asuko nāma passatū’’ti adhiṭṭhāti. Tasmā māgaṇḍiyabrāhmaṇo viya ayampi brāhmaṇo tathāgatassa adhiṭṭhānavasena addasa.
பாஸாதி³கந்தி பஸாத³ஜனகங். இதரங் தஸ்ஸேவ வேவசனங். உத்தமத³மத²ஸமத²மனுப்பத்தந்தி எத்த² உத்தமத³மதோ² நாம அரஹத்தமக்³கோ³, உத்தமஸமதோ² நாம அரஹத்தமக்³க³ஸமாதி⁴, தது³ப⁴யங் பத்தந்தி அத்தோ² . த³ந்தந்தி நிப்³பி³ஸேவனங். கு³த்தந்தி கோ³பிதங். ஸங்யதிந்த்³ரியந்தி ரக்கி²திந்த்³ரியங். நாக³ந்தி ச²ந்தா³தீ³ஹி அக³ச்ச²னதோ, பஹீனகிலேஸே புன அனாக³ச்ச²னதோ, ஆகு³ங் அகரணதோ, ப³லவந்தட்டே²னாதி சதூஹி காரணேஹி நாக³ங்.
Pāsādikanti pasādajanakaṃ. Itaraṃ tasseva vevacanaṃ. Uttamadamathasamathamanuppattanti ettha uttamadamatho nāma arahattamaggo, uttamasamatho nāma arahattamaggasamādhi, tadubhayaṃ pattanti attho . Dantanti nibbisevanaṃ. Guttanti gopitaṃ. Saṃyatindriyanti rakkhitindriyaṃ. Nāganti chandādīhi agacchanato, pahīnakilese puna anāgacchanato, āguṃ akaraṇato, balavantaṭṭhenāti catūhi kāraṇehi nāgaṃ.
தே³வோ நோ ப⁴வங் ப⁴விஸ்ஸதீதி எத்த² ‘‘தே³வோ நோ ப⁴வ’’ந்தி எத்தாவதாபி புச்சா² நிட்டி²தா ப⁴வெய்ய, அயங் பன ப்³ராஹ்மணோ ‘‘அனாக³தே மஹேஸக்கோ² ஏகோ தே³வராஜா ப⁴விஸ்ஸதீ’’தி அனாக³தவஸேன புச்சா²ஸபா⁴கே³னேவ கதெ²ந்தோ ஏவமாஹ. ப⁴க³வாபிஸ்ஸ புச்சா²ஸபா⁴கே³னேவ கதெ²ந்தோ ந கோ² அஹங், ப்³ராஹ்மண, தே³வோ ப⁴விஸ்ஸாமீதி ஆஹ. ஏஸ நயோ ஸப்³ப³த்த². ஆஸவானந்தி காமாஸவாதீ³னங் சதுன்னங். பஹீனாதி போ³தி⁴பல்லங்கே ஸப்³ப³ஞ்ஞுதஞ்ஞாணாதி⁴க³மேனேவ பஹீனா. அனுபலித்தோ லோகேனாதி தண்ஹாதி³ட்டி²லேபானங் பஹீனத்தா ஸங்கா²ரலோகேன அனுபலித்தோ. பு³த்³தோ⁴தி சதுன்னங் ஸச்சானங் பு³த்³த⁴த்தா பு³த்³தோ⁴ இதி மங் தா⁴ரேஹி.
Devo no bhavaṃ bhavissatīti ettha ‘‘devo no bhava’’nti ettāvatāpi pucchā niṭṭhitā bhaveyya, ayaṃ pana brāhmaṇo ‘‘anāgate mahesakkho eko devarājā bhavissatī’’ti anāgatavasena pucchāsabhāgeneva kathento evamāha. Bhagavāpissa pucchāsabhāgeneva kathento na kho ahaṃ, brāhmaṇa, devo bhavissāmīti āha. Esa nayo sabbattha. Āsavānanti kāmāsavādīnaṃ catunnaṃ. Pahīnāti bodhipallaṅke sabbaññutaññāṇādhigameneva pahīnā. Anupalitto lokenāti taṇhādiṭṭhilepānaṃ pahīnattā saṅkhāralokena anupalitto. Buddhoti catunnaṃ saccānaṃ buddhattā buddho iti maṃ dhārehi.
யேனாதி யேன ஆஸவேன. தே³வூபபத்யஸ்ஸாதி தே³வூபபத்தி அஸ்ஸ மய்ஹங் ப⁴வெய்ய. விஹங்க³மோதி ஆகாஸசரோ க³ந்த⁴ப்³ப³காயிகதே³வோ. வித்³த⁴ஸ்தாதி வித⁴மிதா. வினளீகதாதி விக³தனளா விக³தப³ந்த⁴னா கதா. வக்³கூ³தி ஸுந்த³ரங். தோயேன நுபலிப்பதீதி உத³கதோ ரதனமத்தங் அச்சுக்³க³ம்ம டி²தங் ஸரங் ஸோப⁴யமானங் ப⁴மரக³ணங் ஹாஸயமானங் தோயேன ந லிப்பதி. தஸ்மா பு³த்³தொ⁴ஸ்மி ப்³ராஹ்மணாதி தே³ஸனாபரியோஸானே தீணி மக்³க³ப²லானி பாபுணித்வா த்³வாத³ஸஹி பத³ஸஹஸ்ஸேஹி தோ³ணக³ஜ்ஜிதங் நாம வண்ணங் கதே²ஸி, ததா²க³தே ச பரினிப்³பு³தே ஜம்பு³தீ³பதலே உப்பன்னங் மஹாகலஹங் வூபஸமெத்வா தா⁴துயோ பா⁴ஜேஸீதி.
Yenāti yena āsavena. Devūpapatyassāti devūpapatti assa mayhaṃ bhaveyya. Vihaṅgamoti ākāsacaro gandhabbakāyikadevo. Viddhastāti vidhamitā. Vinaḷīkatāti vigatanaḷā vigatabandhanā katā. Vaggūti sundaraṃ. Toyena nupalippatīti udakato ratanamattaṃ accuggamma ṭhitaṃ saraṃ sobhayamānaṃ bhamaragaṇaṃ hāsayamānaṃ toyena na lippati. Tasmā buddhosmi brāhmaṇāti desanāpariyosāne tīṇi maggaphalāni pāpuṇitvā dvādasahi padasahassehi doṇagajjitaṃ nāma vaṇṇaṃ kathesi, tathāgate ca parinibbute jambudīpatale uppannaṃ mahākalahaṃ vūpasametvā dhātuyo bhājesīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. தோ³ணஸுத்தங் • 6. Doṇasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. தோ³ணஸுத்தவண்ணனா • 6. Doṇasuttavaṇṇanā
