| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
১০. দোসপরিঞ্ঞাসুত্তং
10. Dosapariññāsuttaṃ
১০. ৰুত্তঞ্হেতং ভগৰতা, ৰুত্তমরহতাতি মে সুতং –
10. Vuttañhetaṃ bhagavatā, vuttamarahatāti me sutaṃ –
‘‘দোসং, ভিক্খৰে, অনভিজানং অপরিজানং তত্থ চিত্তং অৰিরাজযং অপ্পজহং অভব্বো দুক্খক্খযায। দোসঞ্চ খো, ভিক্খৰে, অভিজানং পরিজানং তত্থ চিত্তং ৰিরাজযং পজহং ভব্বো দুক্খক্খযাযা’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Dosaṃ, bhikkhave, anabhijānaṃ aparijānaṃ tattha cittaṃ avirājayaṃ appajahaṃ abhabbo dukkhakkhayāya. Dosañca kho, bhikkhave, abhijānaṃ parijānaṃ tattha cittaṃ virājayaṃ pajahaṃ bhabbo dukkhakkhayāyā’’ti. Etamatthaṃ bhagavā avoca. Tatthetaṃ iti vuccati –
‘‘যেন দোসেন দুট্ঠাসে, সত্তা গচ্ছন্তি দুগ্গতিং।
‘‘Yena dosena duṭṭhāse, sattā gacchanti duggatiṃ;
তং দোসং সম্মদঞ্ঞায, পজহন্তি ৰিপস্সিনো।
Taṃ dosaṃ sammadaññāya, pajahanti vipassino;
পহায ন পুনাযন্তি, ইমং লোকং কুদাচন’’ন্তি॥
Pahāya na punāyanti, imaṃ lokaṃ kudācana’’nti.
অযম্পি অত্থো ৰুত্তো ভগৰতা, ইতি মে সুতন্তি। দসমং।
Ayampi attho vutto bhagavatā, iti me sutanti. Dasamaṃ.
পঠমো ৰগ্গো নিট্ঠিতো।
Paṭhamo vaggo niṭṭhito.
তস্সুদ্দানং –
Tassuddānaṃ –
রাগদোসা অথ মোহো, কোধমক্খা মানং সব্বং।
Rāgadosā atha moho, kodhamakkhā mānaṃ sabbaṃ;
মানতো রাগদোসা পুন দ্ৰে, পকাসিতা ৰগ্গমাহু পঠমন্তি॥
Mānato rāgadosā puna dve, pakāsitā vaggamāhu paṭhamanti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৯-১০. লোভদোসপরিঞ্ঞাসুত্তদ্ৰযৰণ্ণনা • 9-10. Lobhadosapariññāsuttadvayavaṇṇanā
