| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
१०. दोसपरिञ्ञासुत्तं
10. Dosapariññāsuttaṃ
१०. वुत्तञ्हेतं भगवता, वुत्तमरहताति मे सुतं –
10. Vuttañhetaṃ bhagavatā, vuttamarahatāti me sutaṃ –
‘‘दोसं, भिक्खवे, अनभिजानं अपरिजानं तत्थ चित्तं अविराजयं अप्पजहं अभब्बो दुक्खक्खयाय। दोसञ्च खो, भिक्खवे, अभिजानं परिजानं तत्थ चित्तं विराजयं पजहं भब्बो दुक्खक्खयाया’’ति। एतमत्थं भगवा अवोच। तत्थेतं इति वुच्चति –
‘‘Dosaṃ, bhikkhave, anabhijānaṃ aparijānaṃ tattha cittaṃ avirājayaṃ appajahaṃ abhabbo dukkhakkhayāya. Dosañca kho, bhikkhave, abhijānaṃ parijānaṃ tattha cittaṃ virājayaṃ pajahaṃ bhabbo dukkhakkhayāyā’’ti. Etamatthaṃ bhagavā avoca. Tatthetaṃ iti vuccati –
‘‘येन दोसेन दुट्ठासे, सत्ता गच्छन्ति दुग्गतिं।
‘‘Yena dosena duṭṭhāse, sattā gacchanti duggatiṃ;
तं दोसं सम्मदञ्ञाय, पजहन्ति विपस्सिनो।
Taṃ dosaṃ sammadaññāya, pajahanti vipassino;
पहाय न पुनायन्ति, इमं लोकं कुदाचन’’न्ति॥
Pahāya na punāyanti, imaṃ lokaṃ kudācana’’nti.
अयम्पि अत्थो वुत्तो भगवता, इति मे सुतन्ति। दसमं।
Ayampi attho vutto bhagavatā, iti me sutanti. Dasamaṃ.
पठमो वग्गो निट्ठितो।
Paṭhamo vaggo niṭṭhito.
तस्सुद्दानं –
Tassuddānaṃ –
रागदोसा अथ मोहो, कोधमक्खा मानं सब्बं।
Rāgadosā atha moho, kodhamakkhā mānaṃ sabbaṃ;
मानतो रागदोसा पुन द्वे, पकासिता वग्गमाहु पठमन्ति॥
Mānato rāgadosā puna dve, pakāsitā vaggamāhu paṭhamanti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ९-१०. लोभदोसपरिञ्ञासुत्तद्वयवण्णना • 9-10. Lobhadosapariññāsuttadvayavaṇṇanā
