| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[116] 6. து³ப்³ப³சஜாதகவண்ணனா
[116] 6. Dubbacajātakavaṇṇanā
அதிகரமகராசரியாதி இத³ங் ஸத்தா² ஜேதவனே விஹரந்தோ ஏகங் து³ப்³ப³சபி⁴க்கு²ங் ஆரப்³ப⁴ கதே²ஸி. தஸ்ஸ வத்து² நவகனிபாதே கி³ஜ்ஜ²ஜாதகே (ஜா॰ 1.9.1 ஆத³யோ) ஆவி ப⁴விஸ்ஸதி. ஸத்தா² பன தங் பி⁴க்கு²ங் ஆமந்தெத்வா ‘‘பி⁴க்கு² ந த்வங் இதா³னேவ து³ப்³ப³சோ, புப்³பே³பி து³ப்³ப³சோயேவ. து³ப்³ப³சபா⁴வேனேவ பண்டி³தானங் ஓவாத³ங் அகரொந்தோ ஸத்திப்பஹாரேன ஜீவிதக்க²யங் பத்தோஸீ’’தி வத்வா அதீதங் ஆஹரி.
Atikaramakarācariyāti idaṃ satthā jetavane viharanto ekaṃ dubbacabhikkhuṃ ārabbha kathesi. Tassa vatthu navakanipāte gijjhajātake (jā. 1.9.1 ādayo) āvi bhavissati. Satthā pana taṃ bhikkhuṃ āmantetvā ‘‘bhikkhu na tvaṃ idāneva dubbaco, pubbepi dubbacoyeva. Dubbacabhāveneva paṇḍitānaṃ ovādaṃ akaronto sattippahārena jīvitakkhayaṃ pattosī’’ti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ லங்க⁴னடகயோனியங் படிஸந்தி⁴ங் க³ஹெத்வா வயப்பத்தோ பஞ்ஞவா உபாயகுஸலோ அஹோஸி. ஸோ ஏகஸ்ஸ லங்க⁴னகஸ்ஸ ஸந்திகே ஸத்திலங்க⁴னஸிப்பங் ஸிக்கி²த்வா ஆசரியேன ஸத்³தி⁴ங் ஸிப்பங் த³ஸ்ஸெந்தோ விசரதி. ஆசரியோ பனஸ்ஸ சதுன்னங்யேவ ஸத்தீனங் லங்க⁴னஸிப்பங் ஜானாதி, ந பஞ்சன்னங். ஸோ ஏகதி³வஸங் ஏகஸ்மிங் கா³மகே ஸிப்பங் த³ஸ்ஸெந்தோ ஸுராமத³மத்தோ ‘‘பஞ்ச ஸத்தியோ லங்கி⁴ஸ்ஸாமீ’’தி படிபாடியா ட²பேஸி. அத² நங் போ³தி⁴ஸத்தோ ஆஹ ‘‘ஆசரிய, த்வங் பஞ்சஸத்திலங்க⁴னஸிப்பங் ந ஜானாஸி, ஏகங் ஸத்திங் ஹர. ஸசே லங்கி⁴ஸ்ஸஸி, பஞ்சமாய ஸத்தியா வித்³தோ⁴ மரிஸ்ஸஸீ’’தி. ஸோ ஸுட்டு² மத்ததாய ‘‘த்வஞ்ஹி மய்ஹங் பமாணங் ந ஜானாஸீ’’தி தஸ்ஸ வசனங் அனாதி³யித்வா சதஸ்ஸோ லங்கி⁴த்வா பஞ்சமாய ஸத்தியா த³ண்ட³கே மது⁴கபுப்ப²ங் விய ஆவுதோ பரிதே³வமானோ நிபஜ்ஜி. அத² நங் போ³தி⁴ஸத்தோ ‘‘பண்டி³தானங் வசனங் அகத்வா இமங் ப்³யஸனங் பத்தோஸீ’’தி இமங் கா³த²மாஹ –
Atīte bārāṇasiyaṃ brahmadatte rajjaṃ kārente bodhisatto laṅghanaṭakayoniyaṃ paṭisandhiṃ gahetvā vayappatto paññavā upāyakusalo ahosi. So ekassa laṅghanakassa santike sattilaṅghanasippaṃ sikkhitvā ācariyena saddhiṃ sippaṃ dassento vicarati. Ācariyo panassa catunnaṃyeva sattīnaṃ laṅghanasippaṃ jānāti, na pañcannaṃ. So ekadivasaṃ ekasmiṃ gāmake sippaṃ dassento surāmadamatto ‘‘pañca sattiyo laṅghissāmī’’ti paṭipāṭiyā ṭhapesi. Atha naṃ bodhisatto āha ‘‘ācariya, tvaṃ pañcasattilaṅghanasippaṃ na jānāsi, ekaṃ sattiṃ hara. Sace laṅghissasi, pañcamāya sattiyā viddho marissasī’’ti. So suṭṭhu mattatāya ‘‘tvañhi mayhaṃ pamāṇaṃ na jānāsī’’ti tassa vacanaṃ anādiyitvā catasso laṅghitvā pañcamāya sattiyā daṇḍake madhukapupphaṃ viya āvuto paridevamāno nipajji. Atha naṃ bodhisatto ‘‘paṇḍitānaṃ vacanaṃ akatvā imaṃ byasanaṃ pattosī’’ti imaṃ gāthamāha –
116.
116.
‘‘அதிகரமகராசரிய , மய்ஹம்பேதங் ந ருச்சதி;
‘‘Atikaramakarācariya , mayhampetaṃ na ruccati;
சதுத்தே² லங்க⁴யித்வான, பஞ்சமாயஸி ஆவுதோ’’தி.
Catutthe laṅghayitvāna, pañcamāyasi āvuto’’ti.
தத்த² அதிகரமகராசரியாதி ஆசரிய அஜ்ஜ த்வங் அதிகரங் அகரி, அத்தனோ கரணதோ அதிரேகங் கரணங் அகரீதி அத்தோ². மய்ஹம்பேதங் ந ருச்சதீதி மய்ஹங் அந்தேவாஸிகஸ்ஸபி ஸமானஸ்ஸ ஏதங் தவ கரணங் ந ருச்சதி, தேன தே அஹங் பட²மமேவ கதே²ஸிந்தி தீ³பேதி. சதுத்தே² லங்க⁴யித்வானாதி சதுத்தே² ஸத்தித²லே அபதித்வா அத்தானங் லங்க⁴யித்வா. பஞ்சமாயஸி ஆவுதோதி பண்டி³தானங் வசனங் அக்³க³ண்ஹந்தோ இதா³னி பஞ்சமாய ஸத்தியா ஆவுதோஸீதி. இத³ங் வத்வா ஆசரியங் ஸத்திதோ அபனெத்வா கத்தப்³ப³யுத்தகங் அகாஸி.
Tattha atikaramakarācariyāti ācariya ajja tvaṃ atikaraṃ akari, attano karaṇato atirekaṃ karaṇaṃ akarīti attho. Mayhampetaṃ na ruccatīti mayhaṃ antevāsikassapi samānassa etaṃ tava karaṇaṃ na ruccati, tena te ahaṃ paṭhamameva kathesinti dīpeti. Catutthe laṅghayitvānāti catutthe sattithale apatitvā attānaṃ laṅghayitvā. Pañcamāyasi āvutoti paṇḍitānaṃ vacanaṃ aggaṇhanto idāni pañcamāya sattiyā āvutosīti. Idaṃ vatvā ācariyaṃ sattito apanetvā kattabbayuttakaṃ akāsi.
ஸத்தா² இமங் அதீதங் ஆஹரித்வா ஜாதகங் ஸமோதா⁴னேஸி – ‘‘ததா³ ஆசரியோ அயங் து³ப்³ப³சோ அஹோஸி, அந்தேவாஸிகோ பன அஹமேவ அஹோஸி’’ந்தி.
Satthā imaṃ atītaṃ āharitvā jātakaṃ samodhānesi – ‘‘tadā ācariyo ayaṃ dubbaco ahosi, antevāsiko pana ahameva ahosi’’nti.
து³ப்³ப³சஜாதகவண்ணனா ச²ட்டா².
Dubbacajātakavaṇṇanā chaṭṭhā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 116. து³ப்³ப³சஜாதகங் • 116. Dubbacajātakaṃ
