| Library / Tipiṭaka / တိပိဋက • Tipiṭaka / မဟာဝိဘင္ဂ • Mahāvibhaṅga |
၁၂. ဒုဗ္ဗစသိက္ခာပဒံ
12. Dubbacasikkhāpadaṃ
၄၂၄. တေန သမယေန ဗုဒ္ဓော ဘဂဝာ ကောသမ္ဗိယံ ဝိဟရတိ ဃောသိတာရာမေ။ တေန ခော ပန သမယေန အာယသ္မာ ဆန္နော အနာစရံ အာစရတိ။ ဘိက္ခူ ဧဝမာဟံသု – ‘‘မာဝုသော, ဆန္န, ဧဝရူပံ အကာသိ။ နေတံ ကပ္ပတီ’’တိ။ သော ဧဝံ ဝဒေတိ – ‘‘ကိံ နု ခော နာမ တုမ္ဟေ, အာဝုသော, မံ ဝတ္တဗ္ဗံ မညထ? အဟံ ခော နာမ တုမ္ဟေ ဝဒေယ္ယံ။ အမ္ဟာကံ ဗုဒ္ဓော အမ္ဟာကံ ဓမ္မော အမ္ဟာကံ အယ္ယပုတ္တေန ဓမ္မော အဘိသမိတော။ သေယ္ယထာပိ နာမ မဟာဝာတော ဝာယန္တော တိဏကဋ္ဌပဏ္ဏသဋံ 1 ဧကတော ဥသ္သာရေယ္ယ, သေယ္ယထာ ဝာ ပန နဒီ ပဗ္ဗတေယ္ယာ သင္ခသေဝာလပဏကံ ဧကတော ဥသ္သာရေယ္ယ, ဧဝမေဝ တုမ္ဟေ နာနာနာမာ နာနာဂောတ္တာ နာနာဇစ္စာ နာနာကုလာ ပဗ္ဗဇိတာ ဧကတော ဥသ္သရိတာ။ ကိံ နု ခော နာမ တုမ္ဟေ, အာဝုသော, မံ ဝတ္တဗ္ဗံ မညထ? အဟံ ခော နာမ တုမ္ဟေ ဝဒေယ္ယံ! အမ္ဟာကံ ဗုဒ္ဓော အမ္ဟာကံ ဓမ္မော အမ္ဟာကံ အယ္ယပုတ္တေန ဓမ္မော အဘိသမိတော’’တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အာယသ္မာ ဆန္နော ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ ကရိသ္သတီ’’တိ! အထ ခော တေ ဘိက္ခူ အာယသ္မန္တံ ဆန္နံ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တ္ဝံ, ဆန္န, ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ ကရောသီ’’တိ? ‘‘သစ္စံ ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ‘‘ကထဉ္ဟိ နာမ တ္ဝံ, မောဃပုရိသ, ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ ကရိသ္သသိ! နေတံ, မောဃပုရိသ , အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –
424. Tena samayena buddho bhagavā kosambiyaṃ viharati ghositārāme. Tena kho pana samayena āyasmā channo anācaraṃ ācarati. Bhikkhū evamāhaṃsu – ‘‘māvuso, channa, evarūpaṃ akāsi. Netaṃ kappatī’’ti. So evaṃ vadeti – ‘‘kiṃ nu kho nāma tumhe, āvuso, maṃ vattabbaṃ maññatha? Ahaṃ kho nāma tumhe vadeyyaṃ. Amhākaṃ buddho amhākaṃ dhammo amhākaṃ ayyaputtena dhammo abhisamito. Seyyathāpi nāma mahāvāto vāyanto tiṇakaṭṭhapaṇṇasaṭaṃ 2 ekato ussāreyya, seyyathā vā pana nadī pabbateyyā saṅkhasevālapaṇakaṃ ekato ussāreyya, evameva tumhe nānānāmā nānāgottā nānājaccā nānākulā pabbajitā ekato ussaritā. Kiṃ nu kho nāma tumhe, āvuso, maṃ vattabbaṃ maññatha? Ahaṃ kho nāma tumhe vadeyyaṃ! Amhākaṃ buddho amhākaṃ dhammo amhākaṃ ayyaputtena dhammo abhisamito’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā channo bhikkhūhi sahadhammikaṃ vuccamāno attānaṃ avacanīyaṃ karissatī’’ti! Atha kho te bhikkhū āyasmantaṃ channaṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, channa, bhikkhūhi sahadhammikaṃ vuccamāno attānaṃ avacanīyaṃ karosī’’ti? ‘‘Saccaṃ bhagavā’’ti. Vigarahi buddho bhagavā…pe… ‘‘kathañhi nāma tvaṃ, moghapurisa, bhikkhūhi sahadhammikaṃ vuccamāno attānaṃ avacanīyaṃ karissasi! Netaṃ, moghapurisa , appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
၄၂၅. ‘‘ဘိက္ခု ပနေဝ ဒုဗ္ဗစဇာတိကော ဟောတိ ဥဒ္ဒေသပရိယာပန္နေသု သိက္ခာပဒေသု ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ ကရောတိ – ‘မာ မံ အာယသ္မန္တော ကိဉ္စိ အဝစုတ္ထ ကလ္ယာဏံ ဝာ ပာပကံ ဝာ, အဟံပာယသ္မန္တေ န ကိဉ္စိ ဝက္ခာမိ ကလ္ယာဏံ ဝာ ပာပကံ ဝာ, ဝိရမထာယသ္မန္တော မမ ဝစနာယာ’တိ, သော ဘိက္ခု ဘိက္ခူဟိ ဧဝမသ္သ ဝစနီယော – ‘မာယသ္မာ အတ္တာနံ အဝစနီယံ အကာသိ, ဝစနီယမေဝာယသ္မာ အတ္တာနံ ကရောတု, အာယသ္မာပိ ဘိက္ခူ ဝဒေတု သဟဓမ္မေန, ဘိက္ခူပိ အာယသ္မန္တံ ဝက္ခန္တိ သဟဓမ္မေန။ ဧဝံ သံဝဒ္ဓာ ဟိ တသ္သ ဘဂဝတော ပရိသာ ယဒိဒံ အညမညဝစနေန အညမညဝုဋ္ဌာပနေနာတိ။ ဧဝဉ္စ သော ဘိက္ခုံ ဘိက္ခူဟိ ဝုစ္စမာနော တထေဝ ပဂ္ဂဏ္ဟေယ္ယ, သော ဘိက္ခု ဘိက္ခူဟိ ယာဝတတိယံ သမနုဘာသိတဗ္ဗော တသ္သ ပဋိနိသ္သဂ္ဂာယ။ ယာဝတတိယဉ္စေ သမနုဘာသီယမာနော တံ ပဋိနိသ္သဇ္ဇေယ္ယ, ဣစ္စေတံ ကုသလံ; နော စေ ပဋိနိသ္သဇ္ဇေယ္ယ, သင္ဃာဒိသေသော’’တိ။
425.‘‘Bhikkhu paneva dubbacajātiko hoti uddesapariyāpannesu sikkhāpadesu bhikkhūhi sahadhammikaṃ vuccamāno attānaṃ avacanīyaṃ karoti – ‘mā maṃ āyasmanto kiñci avacuttha kalyāṇaṃ vā pāpakaṃ vā, ahaṃpāyasmante na kiñci vakkhāmi kalyāṇaṃ vā pāpakaṃ vā, viramathāyasmanto mama vacanāyā’ti, so bhikkhu bhikkhūhi evamassa vacanīyo – ‘māyasmā attānaṃ avacanīyaṃ akāsi, vacanīyamevāyasmā attānaṃ karotu, āyasmāpi bhikkhū vadetu sahadhammena, bhikkhūpi āyasmantaṃ vakkhanti sahadhammena. Evaṃ saṃvaddhā hi tassa bhagavato parisā yadidaṃ aññamaññavacanenaaññamaññavuṭṭhāpanenāti. Evañca so bhikkhuṃ bhikkhūhi vuccamāno tatheva paggaṇheyya, so bhikkhu bhikkhūhi yāvatatiyaṃ samanubhāsitabbo tassa paṭinissaggāya. Yāvatatiyañce samanubhāsīyamāno taṃ paṭinissajjeyya, iccetaṃ kusalaṃ; no ce paṭinissajjeyya, saṅghādiseso’’ti.
၄၂၆. ဘိက္ခူ ပနေဝ ဒုဗ္ဗစဇာတိကော ဟောတီတိ ဒုဗ္ဗစော ဟောတိ ဒောဝစသ္သကရဏေဟိ ဓမ္မေဟိ သမန္နာဂတော အက္ခမော အပ္ပဒက္ခိဏဂ္ဂာဟီ အနုသာသနိံ။
426.Bhikkhū paneva dubbacajātiko hotīti dubbaco hoti dovacassakaraṇehi dhammehi samannāgato akkhamo appadakkhiṇaggāhī anusāsaniṃ.
ဥဒ္ဒေသပရိယာပန္နေသု သိက္ခာပဒေသူတိ ပာတိမောက္ခပရိယာပန္နေသု သိက္ခာပဒေသု။
Uddesapariyāpannesu sikkhāpadesūti pātimokkhapariyāpannesu sikkhāpadesu.
ဘိက္ခူဟီတိ အညေဟိ ဘိက္ခူဟိ။
Bhikkhūhīti aññehi bhikkhūhi.
သဟဓမ္မိကံ နာမ ယံ ဘဂဝတာ ပညတ္တံ သိက္ခာပဒံ, ဧတံ သဟဓမ္မိကံ နာမ။
Sahadhammikaṃ nāma yaṃ bhagavatā paññattaṃ sikkhāpadaṃ, etaṃ sahadhammikaṃ nāma.
တေန ဝုစ္စမာနော အတ္တာနံ အဝစနီယံ ကရောတိ – ‘‘မာ မံ အာယသ္မန္တော ကိဉ္စိ အဝစုတ္ထ ကလ္ယာဏံ ဝာ ပာပကံ ဝာ, အဟံပာယသ္မန္တေ န ကိဉ္စိ ဝက္ခာမိ ကလ္ယာဏံ ဝာ ပာပကံ ဝာ။ ဝိရမထာယသ္မန္တော မမ ဝစနာယာ’’တိ။
Tena vuccamāno attānaṃ avacanīyaṃ karoti – ‘‘mā maṃ āyasmanto kiñci avacuttha kalyāṇaṃ vā pāpakaṃ vā, ahaṃpāyasmante na kiñci vakkhāmi kalyāṇaṃ vā pāpakaṃ vā. Viramathāyasmanto mama vacanāyā’’ti.
သော ဘိက္ခူတိ ယော သော ဒုဗ္ဗစဇာတိကော ဘိက္ခု။
So bhikkhūti yo so dubbacajātiko bhikkhu.
ဘိက္ခူဟီတိ အညေဟိ ဘိက္ခူဟိ။ ယေ ပသ္သန္တိ ယေ သုဏန္တိ တေဟိ ဝတ္တဗ္ဗော – ‘‘မာယသ္မာ အတ္တာနံ အဝစနီယံ အကာသိ။ ဝစနီယမေဝ အာယသ္မာ အတ္တာနံ ကရောတု။ အာယသ္မာပိ ဘိက္ခူ ဝဒေတု သဟဓမ္မေန, ဘိက္ခူပိ အာယသ္မန္တံ ဝက္ခန္တိ သဟဓမ္မေန။ ဧဝံ သံဝဒ္ဓာ ဟိ တသ္သ ဘဂဝတော ပရိသာ ယဒိဒံ အညမညဝစနေန အညမညဝုဋ္ဌာပနေနာ’’တိ။ ဒုတိယမ္ပိ ဝတ္တဗ္ဗော။ တတိယမ္ပိ ဝတ္တဗ္ဗော။ သစေ ပဋိနိသ္သဇ္ဇတိ , ဣစ္စေတံ ကုသလံ; နော စေ ပဋိနိသ္သဇ္ဇတိ, အာပတ္တိ ဒုက္ကဋသ္သ။ သုတ္ဝာ န ဝဒန္တိ, အာပတ္တိ ဒုက္ကဋသ္သ။ သော ဘိက္ခု သင္ဃမဇ္ဈမ္ပိ အာကဍ္ဎိတ္ဝာ ဝတ္တဗ္ဗော – ‘‘မာယသ္မာ အတ္တာနံ အဝစနီယံ အကာသိ။ပေ.။ အညမညဝုဋ္ဌာပနေနာ’’တိ။ ဒုတိယမ္ပိ ဝတ္တဗ္ဗော။ တတိယမ္ပိ ဝတ္တဗ္ဗော။ သစေ ပဋိနိသ္သဇ္ဇတိ, ဣစ္စေတံ ကုသလံ; နော စေ ပဋိနိသ္သဇ္ဇတိ, အာပတ္တိ ဒုက္ကဋသ္သ။ သော ဘိက္ခု သမနုဘာသိတဗ္ဗော။ ဧဝဉ္စ ပန, ဘိက္ခဝေ, သမနုဘာသိတဗ္ဗော။ ဗ္ယတ္တေန ဘိက္ခုနာ ပဋိဗလေန သင္ဃော ဉာပေတဗ္ဗော –
Bhikkhūhīti aññehi bhikkhūhi. Ye passanti ye suṇanti tehi vattabbo – ‘‘māyasmā attānaṃ avacanīyaṃ akāsi. Vacanīyameva āyasmā attānaṃ karotu. Āyasmāpi bhikkhū vadetu sahadhammena, bhikkhūpi āyasmantaṃ vakkhanti sahadhammena. Evaṃ saṃvaddhā hi tassa bhagavato parisā yadidaṃ aññamaññavacanena aññamaññavuṭṭhāpanenā’’ti. Dutiyampi vattabbo. Tatiyampi vattabbo. Sace paṭinissajjati , iccetaṃ kusalaṃ; no ce paṭinissajjati, āpatti dukkaṭassa. Sutvā na vadanti, āpatti dukkaṭassa. So bhikkhu saṅghamajjhampi ākaḍḍhitvā vattabbo – ‘‘māyasmā attānaṃ avacanīyaṃ akāsi…pe… aññamaññavuṭṭhāpanenā’’ti. Dutiyampi vattabbo. Tatiyampi vattabbo. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. So bhikkhu samanubhāsitabbo. Evañca pana, bhikkhave, samanubhāsitabbo. Byattena bhikkhunā paṭibalena saṅgho ñāpetabbo –
၄၂၇. ‘‘သုဏာတု မေ, ဘန္တေ, သင္ဃော။ အယံ ဣတ္ထန္နာမော ဘိက္ခု ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ ကရောတိ။ သော တံ ဝတ္ထုံ န ပဋိနိသ္သဇ္ဇတိ။ ယဒိ သင္ဃသ္သ ပတ္တကလ္လံ, သင္ဃော ဣတ္ထန္နာမံ ဘိက္ခုံ သမနုဘာသေယ္ယ တသ္သ ဝတ္ထုသ္သ ပဋိနိသ္သဂ္ဂာယ။ ဧသာ ဉတ္တိ။
427. ‘‘Suṇātu me, bhante, saṅgho. Ayaṃ itthannāmo bhikkhu bhikkhūhi sahadhammikaṃ vuccamāno attānaṃ avacanīyaṃ karoti. So taṃ vatthuṃ na paṭinissajjati. Yadi saṅghassa pattakallaṃ, saṅgho itthannāmaṃ bhikkhuṃ samanubhāseyya tassa vatthussa paṭinissaggāya. Esā ñatti.
‘‘သုဏာတု မေ, ဘန္တေ, သင္ဃော။ အယံ ဣတ္ထန္နာမော ဘိက္ခု ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ ကရောတိ။ သော တံ ဝတ္ထုံ န ပဋိနိသ္သဇ္ဇတိ။ သင္ဃော ဣတ္ထန္နာမံ ဘိက္ခုံ သမနုဘာသတိ တသ္သ ဝတ္ထုသ္သ ပဋိနိသ္သဂ္ဂာယ။ ယသ္သာယသ္မတော ခမတိ ဣတ္ထန္နာမသ္သ ဘိက္ခုနော သမနုဘာသနာ တသ္သ ဝတ္ထုသ္သ ပဋိနိသ္သဂ္ဂာယ, သော တုဏ္ဟသ္သ; ယသ္သ နက္ခမတိ, သော ဘာသေယ္ယ။
‘‘Suṇātu me, bhante, saṅgho. Ayaṃ itthannāmo bhikkhu bhikkhūhi sahadhammikaṃ vuccamāno attānaṃ avacanīyaṃ karoti. So taṃ vatthuṃ na paṭinissajjati. Saṅgho itthannāmaṃ bhikkhuṃ samanubhāsati tassa vatthussa paṭinissaggāya. Yassāyasmato khamati itthannāmassa bhikkhuno samanubhāsanā tassa vatthussa paṭinissaggāya, so tuṇhassa; yassa nakkhamati, so bhāseyya.
‘‘ဒုတိယမ္ပိ ဧတမတ္ထံ ဝဒာမိ။ပေ.။ တတိယမ္ပိ ဧတမတ္ထံ ဝဒာမိ – ‘‘သုဏာတု မေ, ဘန္တေ, သင္ဃော။ အယံ ဣတ္ထန္နာမော ဘိက္ခု ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ ကရောတိ။ သော တံ ဝတ္ထုံ န ပဋိနိသ္သဇ္ဇတိ။ သင္ဃော ဣတ္ထန္နာမံ ဘိက္ခုံ သမနုဘာသတိ တသ္သ ဝတ္ထုသ္သ ပဋိနိသ္သဂ္ဂာယ။ ယသ္သာယသ္မတော ခမတိ ဣတ္ထန္နာမသ္သ ဘိက္ခုနော သမနုဘာသနာ တသ္သ ဝတ္ထုသ္သ ပဋိနိသ္သဂ္ဂာယ, သော တုဏ္ဟသ္သ; ယသ္သ နက္ခမတိ, သော ဘာသေယ္ယ။
‘‘Dutiyampi etamatthaṃ vadāmi…pe… tatiyampi etamatthaṃ vadāmi – ‘‘suṇātu me, bhante, saṅgho. Ayaṃ itthannāmo bhikkhu bhikkhūhi sahadhammikaṃ vuccamāno attānaṃ avacanīyaṃ karoti. So taṃ vatthuṃ na paṭinissajjati. Saṅgho itthannāmaṃ bhikkhuṃ samanubhāsati tassa vatthussa paṭinissaggāya. Yassāyasmato khamati itthannāmassa bhikkhuno samanubhāsanā tassa vatthussa paṭinissaggāya, so tuṇhassa; yassa nakkhamati, so bhāseyya.
‘‘သမနုဘဋ္ဌော သင္ဃေန ဣတ္ထန္နာမော ဘိက္ခု တသ္သ ဝတ္ထုသ္သ ပဋိနိသ္သဂ္ဂာယ။ ခမတိ သင္ဃသ္သ, တသ္မာ တုဏ္ဟီ, ဧဝမေတံ ဓာရယာမီ’’တိ။
‘‘Samanubhaṭṭho saṅghena itthannāmo bhikkhu tassa vatthussa paṭinissaggāya. Khamati saṅghassa, tasmā tuṇhī, evametaṃ dhārayāmī’’ti.
၄၂၈. ဉတ္တိယာ ဒုက္ကဋံ, ဒ္ဝီဟိ ကမ္မဝာစာဟိ ထုလ္လစ္စယာ, ကမ္မဝာစာပရိယောသာနေ အာပတ္တိ သင္ဃာဒိသေသသ္သ။ သင္ဃာဒိသေသံ အဇ္ဈာပဇ္ဇန္တသ္သ ဉတ္တိယာ ဒုက္ကဋံ, ဒ္ဝီဟိ ကမ္မဝာစာဟိ ထုလ္လစ္စယာ ပဋိပ္ပသ္သမ္ဘန္တိ။
428. Ñattiyā dukkaṭaṃ, dvīhi kammavācāhi thullaccayā, kammavācāpariyosāne āpatti saṅghādisesassa. Saṅghādisesaṃ ajjhāpajjantassa ñattiyā dukkaṭaṃ, dvīhi kammavācāhi thullaccayā paṭippassambhanti.
သင္ဃာဒိသေသောတိ။ပေ.။ တေနပိ ဝုစ္စတိ သင္ဃာဒိသေသောတိ။
Saṅghādisesoti…pe… tenapi vuccati saṅghādisesoti.
၄၂၉. ဓမ္မကမ္မေ ဓမ္မကမ္မသညီ န ပဋိနိသ္သဇ္ဇတိ, အာပတ္တိ သင္ဃာဒိသေသသ္သ။
429. Dhammakamme dhammakammasaññī na paṭinissajjati, āpatti saṅghādisesassa.
ဓမ္မကမ္မေ ဝေမတိကော န ပဋိနိသ္သဇ္ဇတိ, အာပတ္တိ သင္ဃာဒိသေသသ္သ။
Dhammakamme vematiko na paṭinissajjati, āpatti saṅghādisesassa.
ဓမ္မကမ္မေ အဓမ္မကမ္မသညီ န ပဋိနိသ္သဇ္ဇတိ, အာပတ္တိ သင္ဃာဒိသေသသ္သ။
Dhammakamme adhammakammasaññī na paṭinissajjati, āpatti saṅghādisesassa.
အဓမ္မကမ္မေ ဓမ္မကမ္မသညီ, အာပတ္တိ ဒုက္ကဋသ္သ။
Adhammakamme dhammakammasaññī, āpatti dukkaṭassa.
အဓမ္မကမ္မေ ဝေမတိကော, အာပတ္တိ ဒုက္ကဋသ္သ။
Adhammakamme vematiko, āpatti dukkaṭassa.
အဓမ္မကမ္မေ အဓမ္မကမ္မသညီ, အာပတ္တိ ဒုက္ကဋသ္သ။
Adhammakamme adhammakammasaññī, āpatti dukkaṭassa.
၄၃၀. အနာပတ္တိ အသမနုဘာသန္တသ္သ, ပဋိနိသ္သဇ္ဇန္တသ္သ, ဥမ္မတ္တကသ္သ, အာဒိကမ္မိကသ္သာတိ။
430. Anāpatti asamanubhāsantassa, paṭinissajjantassa, ummattakassa, ādikammikassāti.
ဒုဗ္ဗစသိက္ခာပဒံ နိဋ္ဌိတံ ဒ္ဝာဒသမံ။
Dubbacasikkhāpadaṃ niṭṭhitaṃ dvādasamaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၁၂. ဒုဗ္ဗစသိက္ခာပဒဝဏ္ဏနာ • 12. Dubbacasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၁၂. ဒုဗ္ဗစသိက္ခာပဒဝဏ္ဏနာ • 12. Dubbacasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၁၂. ဒုဗ္ဗစသိက္ခာပဒဝဏ္ဏနာ • 12. Dubbacasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၁၂. ဒုဗ္ဗစသိက္ခာပဒဝဏ္ဏနာ • 12. Dubbacasikkhāpadavaṇṇanā
