| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
12. து³ப்³ப³சஸிக்கா²பத³வண்ணனா
12. Dubbacasikkhāpadavaṇṇanā
424. தேன ஸமயேன பு³த்³தோ⁴ ப⁴க³வாதி து³ப்³ப³சஸிக்கா²பத³ங். தத்த² அனாசாரங் ஆசரதீதி அனேகப்பகாரங் காயவசீத்³வாரவீதிக்கமங் கரோதி. கிங் நு கோ² நாமாதி வம்ப⁴னவசனமேதங். அஹங் கோ² நாமாதி உக்கங்ஸவசனங். தும்ஹே வதெ³ய்யந்தி ‘‘இத³ங் கரோத², இத³ங் மா கரோதா²’’தி அஹங் தும்ஹே வத்துங் அரஹாமீதி த³ஸ்ஸேதி. கஸ்மாதி சே? யஸ்மா அம்ஹாகங் பு³த்³தோ⁴ ப⁴க³வா கண்டகங் ஆருய்ஹ மயா ஸத்³தி⁴ங் நிக்க²மித்வா பப்³ப³ஜிதோதிஏவமாதி³மத்த²ங் ஸந்தா⁴யாஹ. ‘‘அம்ஹாகங் த⁴ம்மோ’’தி வத்வா பன அத்தனோ ஸந்தகபா⁴வே யுத்திங் த³ஸ்ஸெந்தோ ‘‘அம்ஹாகங் அய்யபுத்தேன த⁴ம்மோ அபி⁴ஸமிதோ’’தி ஆஹ. யஸ்மா அம்ஹாகங் அய்யபுத்தேன சதுஸச்சத⁴ம்மோ படிவித்³தோ⁴, தஸ்மா த⁴ம்மோபி அம்ஹாகந்தி வுத்தங் ஹோதி. ஸங்க⁴ங் பன அத்தனோ வேரிபக்கே² டி²தங் மஞ்ஞமானோ அம்ஹாகங் ஸங்கோ⁴தி ந வத³தி. உபமங் பன வத்வா ஸங்க⁴ங் அபஸாதே³துகாமோ ‘‘ஸெய்யதா²பி நாமா’’திஆதி³மாஹ. திணகட்ட²பண்ணஸடந்தி தத்த² தத்த² பதிதங் திணகட்ட²பண்ணங். அத² வா திணஞ்ச நிஸ்ஸாரகங் லஹுகங் கட்ட²ஞ்ச திணகட்ட²ங். பண்ணஸடந்தி புராணபண்ணங். உஸ்ஸாரெய்யாதி ராஸிங் கரெய்ய.
424.Tena samayena buddho bhagavāti dubbacasikkhāpadaṃ. Tattha anācāraṃ ācaratīti anekappakāraṃ kāyavacīdvāravītikkamaṃ karoti. Kiṃ nu kho nāmāti vambhanavacanametaṃ. Ahaṃ kho nāmāti ukkaṃsavacanaṃ. Tumhe vadeyyanti ‘‘idaṃ karotha, idaṃ mā karothā’’ti ahaṃ tumhe vattuṃ arahāmīti dasseti. Kasmāti ce? Yasmā amhākaṃ buddho bhagavā kaṇṭakaṃ āruyha mayā saddhiṃ nikkhamitvā pabbajitotievamādimatthaṃ sandhāyāha. ‘‘Amhākaṃ dhammo’’ti vatvā pana attano santakabhāve yuttiṃ dassento ‘‘amhākaṃ ayyaputtena dhammo abhisamito’’ti āha. Yasmā amhākaṃ ayyaputtena catusaccadhammo paṭividdho, tasmā dhammopi amhākanti vuttaṃ hoti. Saṅghaṃ pana attano veripakkhe ṭhitaṃ maññamāno amhākaṃ saṅghoti na vadati. Upamaṃ pana vatvā saṅghaṃ apasādetukāmo ‘‘seyyathāpi nāmā’’tiādimāha. Tiṇakaṭṭhapaṇṇasaṭanti tattha tattha patitaṃ tiṇakaṭṭhapaṇṇaṃ. Atha vā tiṇañca nissārakaṃ lahukaṃ kaṭṭhañca tiṇakaṭṭhaṃ. Paṇṇasaṭanti purāṇapaṇṇaṃ. Ussāreyyāti rāsiṃ kareyya.
பப்³ப³தெய்யாதி பப்³ப³தப்பப⁴வா, ஸா ஹி ஸீக⁴ஸோதா ஹோதி, தஸ்மா தமேவ க³ண்ஹாதி. ஸங்க²ஸேவாலபணகந்தி எத்த² ஸங்கோ²தி தீ³க⁴மூலகோ பண்ணஸேவாலோ வுச்சதி. ஸேவாலோதி நீலஸேவாலோ, அவஸேஸோ உத³கபப்படகதிலபீ³ஜகாதி³ ஸப்³போ³பி பணகோதி ஸங்க்²யங் க³ச்ச²தி. ஏகதோ உஸ்ஸாரிதாதி ஏகட்டா²னே கேனாபி ஸம்பிண்டி³தா ராஸீகதாதி த³ஸ்ஸேதி.
Pabbateyyāti pabbatappabhavā, sā hi sīghasotā hoti, tasmā tameva gaṇhāti. Saṅkhasevālapaṇakanti ettha saṅkhoti dīghamūlako paṇṇasevālo vuccati. Sevāloti nīlasevālo, avaseso udakapappaṭakatilabījakādi sabbopi paṇakoti saṅkhyaṃ gacchati. Ekato ussāritāti ekaṭṭhāne kenāpi sampiṇḍitā rāsīkatāti dasseti.
425-6. து³ப்³ப³சஜாதிகோதி து³ப்³ப³சஸபா⁴வோ வத்துங் அஸக்குணெய்யோதி அத்தோ². பத³பா⁴ஜனேபிஸ்ஸ து³ப்³ப³சோதி து³க்கே²ன கிச்சே²ன வதி³தப்³போ³, ந ஸக்கா ஸுகே²ன வத்துந்தி அத்தோ². தோ³வசஸ்ஸகரணேஹீதி து³ப்³ப³சபா⁴வகரணீயேஹி, யே த⁴ம்மா து³ப்³ப³சங் புக்³க³லங் கரொந்தி, தேஹி ஸமன்னாக³தோதி அத்தோ². தே பன ‘‘கதமே ச, ஆவுஸோ, தோ³வசஸ்ஸகரணா த⁴ம்மா? இதா⁴வுஸோ, பி⁴க்கு² பாபிச்சோ² ஹோதீ’’திஆதி³னா நயேன படிபாடியா அனுமானஸுத்தே (ம॰ நி॰ 1.181) ஆக³தா பாபிச்ச²தா, அத்துக்கங்ஸகபரவம்ப⁴கதா, கோத⁴னதா, கோத⁴ஹேது உபனாஹிதா, கோத⁴ஹேதுஅபி⁴ஸங்கி³தா, கோத⁴ஹேதுகோத⁴ஸாமந்தவாசானிச்சா²ரணதா, சோத³கங் படிப்ப²ரணதா, சோத³கங் அபஸாத³னதா, சோத³கஸ்ஸ பச்சாரோபனதா, அஞ்ஞேன அஞ்ஞங்படிசரணதா , அபதா³னேன ந ஸம்பாயனதா, மக்கி²பளாஸிதா, இஸ்ஸுகீமச்ச²ரிதா, ஸட²மாயாவிதா, த²த்³தா⁴திமானிதா, ஸந்தி³ட்டி²பராமாஸிஆதா⁴னக்³க³ஹிது³ப்படினிஸ்ஸக்³கி³தாதி ஏகூனவீஸதி த⁴ம்மா வேதி³தப்³பா³.
425-6.Dubbacajātikoti dubbacasabhāvo vattuṃ asakkuṇeyyoti attho. Padabhājanepissa dubbacoti dukkhena kicchena vaditabbo, na sakkā sukhena vattunti attho. Dovacassakaraṇehīti dubbacabhāvakaraṇīyehi, ye dhammā dubbacaṃ puggalaṃ karonti, tehi samannāgatoti attho. Te pana ‘‘katame ca, āvuso, dovacassakaraṇā dhammā? Idhāvuso, bhikkhu pāpiccho hotī’’tiādinā nayena paṭipāṭiyā anumānasutte (ma. ni. 1.181) āgatā pāpicchatā, attukkaṃsakaparavambhakatā, kodhanatā, kodhahetu upanāhitā, kodhahetuabhisaṅgitā, kodhahetukodhasāmantavācānicchāraṇatā, codakaṃ paṭippharaṇatā, codakaṃ apasādanatā, codakassa paccāropanatā, aññena aññaṃpaṭicaraṇatā , apadānena na sampāyanatā, makkhipaḷāsitā, issukīmaccharitā, saṭhamāyāvitā, thaddhātimānitā, sandiṭṭhiparāmāsiādhānaggahiduppaṭinissaggitāti ekūnavīsati dhammā veditabbā.
ஓவாத³ங் நக்க²மதி ந ஸஹதீதி அக்க²மோ. யதா²னுஸிட்ட²ங் அப்படிபஜ்ஜனதோ பத³க்கி²ணேன அனுஸாஸனிங் ந க³ண்ஹாதீதி அப்பத³க்கி²ணக்³கா³ஹீ அனுஸாஸனிங்.
Ovādaṃ nakkhamati na sahatīti akkhamo. Yathānusiṭṭhaṃ appaṭipajjanato padakkhiṇena anusāsaniṃ na gaṇhātīti appadakkhiṇaggāhī anusāsaniṃ.
உத்³தே³ஸபரியாபன்னேஸூதி உத்³தே³ஸே பரியாபன்னேஸு அந்தோக³தே⁴ஸு. ‘‘யஸ்ஸ ஸியா ஆபத்தி, ஸோ ஆவிகரெய்யா’’தி ஏவங் ஸங்க³ஹிதத்தா அந்தோ பாதிமொக்க²ஸ்ஸ வத்தமானேஸூதி அத்தோ². ஸஹத⁴ம்மிகங் வுச்சமானோதி ஸஹத⁴ம்மிகேன வுச்சமானோ கரணத்தே² உபயோக³வசனங், பஞ்சஹி ஸஹத⁴ம்மிகேஹி ஸிக்கி²தப்³ப³த்தா தேஸங் வா ஸந்தகத்தா ஸஹத⁴ம்மிகந்தி லத்³த⁴னாமேன பு³த்³த⁴பஞ்ஞத்தேன ஸிக்கா²பதே³ன வுச்சமானோதி அத்தோ².
Uddesapariyāpannesūti uddese pariyāpannesu antogadhesu. ‘‘Yassa siyā āpatti, so āvikareyyā’’ti evaṃ saṅgahitattā anto pātimokkhassa vattamānesūti attho. Sahadhammikaṃ vuccamānoti sahadhammikena vuccamāno karaṇatthe upayogavacanaṃ, pañcahi sahadhammikehi sikkhitabbattā tesaṃ vā santakattā sahadhammikanti laddhanāmena buddhapaññattena sikkhāpadena vuccamānoti attho.
விரமதா²யஸ்மந்தோ மம வசனாயாதி யேன வசனேன மங் வத³த², ததோ மம வசனதோ விரமத². மா மங் தங் வசனங் வத³தா²தி வுத்தங் ஹோதி.
Viramathāyasmanto mama vacanāyāti yena vacanena maṃ vadatha, tato mama vacanato viramatha. Mā maṃ taṃ vacanaṃ vadathāti vuttaṃ hoti.
வத³து ஸஹத⁴ம்மேனாதி ஸஹத⁴ம்மிகேன ஸிக்கா²பதே³ன ஸஹத⁴ம்மேன வா அஞ்ஞேனபி பாஸாதி³கபா⁴வஸங்வத்தனிகேன வசனேன வத³து. யதி³த³ந்தி வுட்³டி⁴காரணனித³ஸ்ஸனத்தே² நிபாதோ. தேன ‘‘யங் இத³ங் அஞ்ஞமஞ்ஞஸ்ஸ ஹிதவசனங் ஆபத்திதோ வுட்டா²பனஞ்ச தேன அஞ்ஞமஞ்ஞவசனேன அஞ்ஞமஞ்ஞவுட்டா²பனேன ச ஸங்வட்³டா⁴ பரிஸா’’தி ஏவங் பரிஸாய வுட்³டி⁴காரணங் த³ஸ்ஸிதங் ஹோதி. ஸேஸங் ஸப்³ப³த்த² உத்தானமேவ.
Vadatu sahadhammenāti sahadhammikena sikkhāpadena sahadhammena vā aññenapi pāsādikabhāvasaṃvattanikena vacanena vadatu. Yadidanti vuḍḍhikāraṇanidassanatthe nipāto. Tena ‘‘yaṃ idaṃ aññamaññassa hitavacanaṃ āpattito vuṭṭhāpanañca tena aññamaññavacanena aññamaññavuṭṭhāpanena ca saṃvaḍḍhā parisā’’ti evaṃ parisāya vuḍḍhikāraṇaṃ dassitaṃ hoti. Sesaṃ sabbattha uttānameva.
ஸமுட்டா²னாதீ³னி பட²மஸங்க⁴பே⁴த³ஸதி³ஸானேவாதி.
Samuṭṭhānādīni paṭhamasaṅghabhedasadisānevāti.
து³ப்³ப³சஸிக்கா²பத³வண்ணனா நிட்டி²தா.
Dubbacasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 12. து³ப்³ப³சஸிக்கா²பத³ங் • 12. Dubbacasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 12. து³ப்³ப³சஸிக்கா²பத³வண்ணனா • 12. Dubbacasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 12. து³ப்³ப³சஸிக்கா²பத³வண்ணனா • 12. Dubbacasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 12. து³ப்³ப³சஸிக்கா²பத³வண்ணனா • 12. Dubbacasikkhāpadavaṇṇanā
