| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
12. து³ப்³ப³சஸிக்கா²பத³வண்ணனா
12. Dubbacasikkhāpadavaṇṇanā
து³க்கே²ன வத்தப்³போ³ அனுஸாஸிதுங் அஸக்குணெய்யோ ஸபா⁴வோ அஸ்ஸாதி து³ப்³ப³சஜாதிகோ, விலோமபா⁴வீ. தேனாஹ ‘‘து³ப்³ப³சஸபா⁴வோ’’திஆதி³. வத்துங் அஸக்குணெய்யோதி கிஸ்மிஞ்சி வுச்சமானே அஸஹனதோ ஓவதி³துங் அஸக்குணெய்யோ. உத்³தி³ஸீயதீதி உத்³தே³ஸோ, பாதிமொக்கோ², தஸ்மிங் பரியாபன்னா அந்தோக³தா⁴ உத்³தே³ஸபரியாபன்னா, தேஸு உத்³தே³ஸபரியாபன்னேஸு. தேனாஹ ‘‘உத்³தே³ஸே’’திஆதி³. அத² ஸப்³பா³னேவ ஸிக்கா²பதா³னி கத²ங் பாதிமொக்கு²த்³தே³ஸபரியாபன்னானீதி ஆஹ ‘‘யஸ்ஸ ஸியா ஆபத்தி, ஸோ ‘ஆவிகரெய்யா’தி ஏவங் ஸங்க³ஹிதத்தா’’தி. ‘‘யஸ்ஸ ஸியா ஆபத்தீ’’தி இமினா ஸப்³பா³பி ஆபத்தியோ நிதா³னுத்³தே³ஸே ஸங்க³ஹிதா ஏவ ஹொந்தி. ஸிக்கா²பதே³ஸூதி அதி⁴ஸீலஸிக்கா²ய அதி⁴க³மூபாயபூ⁴தேஸு வினயபஞ்ஞத்தீஸூதி அத்தோ². ஸோ பன பாகடோயேவாதி அட்ட²கதா²யங் ந வுத்தோ. பஞ்சஹி ஸஹத⁴ம்மிகேஹீதி பி⁴க்கு²பி⁴க்கு²னிஸாமணேரஸாமணேரிஸிக்க²மானாஹி. ஸிக்கி²தப்³ப³த்தாதி லப்³ப⁴மானவஸேன ஸிக்கி²தப்³ப³த்தா. ததா² ஹி தேஹி யதா²ஸகங் ஸிக்கா² ஸிக்கீ²யதி, ந ஸப்³பா³. பு³த்³த⁴பஞ்ஞத்தேனாதி பு³த்³தே⁴ன ட²பிதேன, விஹிதேனாதி அத்தோ². அத² வா ஸஹத⁴ம்மிகேன ஸகாரணேன வுச்சமானோதி ஏவமெத்த² அத்தோ² த³ட்ட²ப்³போ³. வசனாயாதி நிஸ்ஸக்கே ஸம்பதா³னவசனந்தி ஆஹ ‘‘ததோ மம வசனதோ’’தி.
Dukkhena vattabbo anusāsituṃ asakkuṇeyyo sabhāvo assāti dubbacajātiko, vilomabhāvī. Tenāha ‘‘dubbacasabhāvo’’tiādi. Vattuṃ asakkuṇeyyoti kismiñci vuccamāne asahanato ovadituṃ asakkuṇeyyo. Uddisīyatīti uddeso, pātimokkho, tasmiṃ pariyāpannā antogadhā uddesapariyāpannā, tesu uddesapariyāpannesu. Tenāha ‘‘uddese’’tiādi. Atha sabbāneva sikkhāpadāni kathaṃ pātimokkhuddesapariyāpannānīti āha ‘‘yassa siyā āpatti, so ‘āvikareyyā’ti evaṃ saṅgahitattā’’ti. ‘‘Yassa siyā āpattī’’ti iminā sabbāpi āpattiyo nidānuddese saṅgahitā eva honti. Sikkhāpadesūti adhisīlasikkhāya adhigamūpāyabhūtesu vinayapaññattīsūti attho. So pana pākaṭoyevāti aṭṭhakathāyaṃ na vutto. Pañcahi sahadhammikehīti bhikkhubhikkhunisāmaṇerasāmaṇerisikkhamānāhi. Sikkhitabbattāti labbhamānavasena sikkhitabbattā. Tathā hi tehi yathāsakaṃ sikkhā sikkhīyati, na sabbā. Buddhapaññattenāti buddhena ṭhapitena, vihitenāti attho. Atha vā sahadhammikena sakāraṇena vuccamānoti evamettha attho daṭṭhabbo. Vacanāyāti nissakke sampadānavacananti āha ‘‘tato mama vacanato’’ti.
து³ப்³ப³சஸிக்கா²பத³வண்ணனா நிட்டி²தா.
Dubbacasikkhāpadavaṇṇanā niṭṭhitā.
