| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
12. து³ப்³ப³சஸிக்கா²பத³வண்ணனா
12. Dubbacasikkhāpadavaṇṇanā
424. த்³வாத³ஸமே வம்ப⁴னவசனந்தி க³ரஹவசனங். ஸட-ஸத்³தோ³ பதிதஸத்³தே³ன ஸமானத்தோ², தஸ்ஸ ச விஸேஸனஸ்ஸ பரனிபாதோதி ஆஹ ‘‘தத்த² தத்த² பதிதங் திணகட்ட²பண்ண’’ந்தி. கேனாபீதி வாதாதி³ஸதி³ஸேன உபஜ்ஜா²யாதி³னா.
424. Dvādasame vambhanavacananti garahavacanaṃ. Saṭa-saddo patitasaddena samānattho, tassa ca visesanassa paranipātoti āha ‘‘tattha tattha patitaṃ tiṇakaṭṭhapaṇṇa’’nti. Kenāpīti vātādisadisena upajjhāyādinā.
426. சித்தபரியோனாஹோ த³ள்ஹகோதோ⁴வ உபனாஹோ. ததோபி ப³லவதரோ து³ம்மோசனீயோ கோதா⁴பி⁴ஸங்கோ³. சோத³கங் படிப்ப²ரணதாதி சோத³கஸ்ஸ படிவிருத்³தோ⁴ ஹுத்வா அவட்டா²னங். சோத³கங் அபஸாத³னாதி வாசாய க⁴ட்டனா. பச்சாரோபனாதி ‘‘த்வம்பி ஸாபத்திகோ’’தி சோத³கஸ்ஸ ஆபத்திஆரோபனா. படிசரணதாதி படிச்சா²த³னதா. அபதா³னேனாதி அத்தனோ சரியாய. ந ஸம்பாயனதாதி ‘‘யங் த்வங் சோத³கோ வதே³ஸி ‘மயா ஏஸ ஆபத்திங் ஆபன்னோ தி³ட்டோ²’தி, த்வங் தஸ்மிங் ஸமயே கிங் கரோஸி, அயங் கிங் கரோதி, கத்த² ச த்வங் அஹோஸி, கத்த² அய’’ந்திஆதி³னா நயேன சரியங் புட்டே²ன ஸம்பாதெ³த்வா அகத²னங்.
426. Cittapariyonāho daḷhakodhova upanāho. Tatopi balavataro dummocanīyo kodhābhisaṅgo. Codakaṃ paṭippharaṇatāti codakassa paṭiviruddho hutvā avaṭṭhānaṃ. Codakaṃ apasādanāti vācāya ghaṭṭanā. Paccāropanāti ‘‘tvampi sāpattiko’’ti codakassa āpattiāropanā. Paṭicaraṇatāti paṭicchādanatā. Apadānenāti attano cariyāya. Na sampāyanatāti ‘‘yaṃ tvaṃ codako vadesi ‘mayā esa āpattiṃ āpanno diṭṭho’ti, tvaṃ tasmiṃ samaye kiṃ karosi, ayaṃ kiṃ karoti, kattha ca tvaṃ ahosi, kattha aya’’ntiādinā nayena cariyaṃ puṭṭhena sampādetvā akathanaṃ.
‘‘யஸ்ஸ ஸியா ஆபத்தீ’’தி (மஹாவ॰ 134) இமினா நிதா³னவசனேன ஸப்³பா³பி ஆபத்தியோ ஸங்க³ஹிதாதி ஆஹ ‘‘யஸ்ஸ ஸியா’’திஆதி³. அங்கா³னி செத்த² பட²மஸங்க⁴பே⁴த³ஸதி³ஸானி, அயங் பன விஸேஸோ யதா² தத்த² பே⁴தா³ய பரக்கமனங், இத⁴ அவசனீயகரணதா த³ட்ட²ப்³பா³.
‘‘Yassa siyā āpattī’’ti (mahāva. 134) iminā nidānavacanena sabbāpi āpattiyo saṅgahitāti āha ‘‘yassa siyā’’tiādi. Aṅgāni cettha paṭhamasaṅghabhedasadisāni, ayaṃ pana viseso yathā tattha bhedāya parakkamanaṃ, idha avacanīyakaraṇatā daṭṭhabbā.
து³ப்³ப³சஸிக்கா²பத³வண்ணனா நிட்டி²தா.
Dubbacasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 12. து³ப்³ப³சஸிக்கா²பத³ங் • 12. Dubbacasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 12. து³ப்³ப³சஸிக்கா²பத³வண்ணனா • 12. Dubbacasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 12. து³ப்³ப³சஸிக்கா²பத³வண்ணனா • 12. Dubbacasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 12. து³ப்³ப³சஸிக்கா²பத³வண்ணனா • 12. Dubbacasikkhāpadavaṇṇanā
