| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
১২. দুব্বচসিক্খাপদৰণ্ণনা
12. Dubbacasikkhāpadavaṇṇanā
৪২৪. তেন সমযেন বুদ্ধো ভগৰাতি দুব্বচসিক্খাপদং। তত্থ অনাচারং আচরতীতি অনেকপ্পকারং কাযৰচীদ্ৰারৰীতিক্কমং করোতি। কিং নু খো নামাতি ৰম্ভনৰচনমেতং। অহং খো নামাতি উক্কংসৰচনং। তুম্হে ৰদেয্যন্তি ‘‘ইদং করোথ, ইদং মা করোথা’’তি অহং তুম্হে ৰত্তুং অরহামীতি দস্সেতি। কস্মাতি চে? যস্মা অম্হাকং বুদ্ধো ভগৰা কণ্টকং আরুয্হ মযা সদ্ধিং নিক্খমিত্ৰা পব্বজিতোতিএৰমাদিমত্থং সন্ধাযাহ। ‘‘অম্হাকং ধম্মো’’তি ৰত্ৰা পন অত্তনো সন্তকভাৰে যুত্তিং দস্সেন্তো ‘‘অম্হাকং অয্যপুত্তেন ধম্মো অভিসমিতো’’তি আহ। যস্মা অম্হাকং অয্যপুত্তেন চতুসচ্চধম্মো পটিৰিদ্ধো, তস্মা ধম্মোপি অম্হাকন্তি ৰুত্তং হোতি। সঙ্ঘং পন অত্তনো ৰেরিপক্খে ঠিতং মঞ্ঞমানো অম্হাকং সঙ্ঘোতি ন ৰদতি। উপমং পন ৰত্ৰা সঙ্ঘং অপসাদেতুকামো ‘‘সেয্যথাপি নামা’’তিআদিমাহ। তিণকট্ঠপণ্ণসটন্তি তত্থ তত্থ পতিতং তিণকট্ঠপণ্ণং। অথ ৰা তিণঞ্চ নিস্সারকং লহুকং কট্ঠঞ্চ তিণকট্ঠং। পণ্ণসটন্তি পুরাণপণ্ণং। উস্সারেয্যাতি রাসিং করেয্য।
424.Tena samayena buddho bhagavāti dubbacasikkhāpadaṃ. Tattha anācāraṃ ācaratīti anekappakāraṃ kāyavacīdvāravītikkamaṃ karoti. Kiṃ nu kho nāmāti vambhanavacanametaṃ. Ahaṃ kho nāmāti ukkaṃsavacanaṃ. Tumhe vadeyyanti ‘‘idaṃ karotha, idaṃ mā karothā’’ti ahaṃ tumhe vattuṃ arahāmīti dasseti. Kasmāti ce? Yasmā amhākaṃ buddho bhagavā kaṇṭakaṃ āruyha mayā saddhiṃ nikkhamitvā pabbajitotievamādimatthaṃ sandhāyāha. ‘‘Amhākaṃ dhammo’’ti vatvā pana attano santakabhāve yuttiṃ dassento ‘‘amhākaṃ ayyaputtena dhammo abhisamito’’ti āha. Yasmā amhākaṃ ayyaputtena catusaccadhammo paṭividdho, tasmā dhammopi amhākanti vuttaṃ hoti. Saṅghaṃ pana attano veripakkhe ṭhitaṃ maññamāno amhākaṃ saṅghoti na vadati. Upamaṃ pana vatvā saṅghaṃ apasādetukāmo ‘‘seyyathāpi nāmā’’tiādimāha. Tiṇakaṭṭhapaṇṇasaṭanti tattha tattha patitaṃ tiṇakaṭṭhapaṇṇaṃ. Atha vā tiṇañca nissārakaṃ lahukaṃ kaṭṭhañca tiṇakaṭṭhaṃ. Paṇṇasaṭanti purāṇapaṇṇaṃ. Ussāreyyāti rāsiṃ kareyya.
পব্বতেয্যাতি পব্বতপ্পভৰা, সা হি সীঘসোতা হোতি, তস্মা তমেৰ গণ্হাতি। সঙ্খসেৰালপণকন্তি এত্থ সঙ্খোতি দীঘমূলকো পণ্ণসেৰালো ৰুচ্চতি। সেৰালোতি নীলসেৰালো, অৰসেসো উদকপপ্পটকতিলবীজকাদি সব্বোপি পণকোতি সঙ্খ্যং গচ্ছতি। একতো উস্সারিতাতি একট্ঠানে কেনাপি সম্পিণ্ডিতা রাসীকতাতি দস্সেতি।
Pabbateyyāti pabbatappabhavā, sā hi sīghasotā hoti, tasmā tameva gaṇhāti. Saṅkhasevālapaṇakanti ettha saṅkhoti dīghamūlako paṇṇasevālo vuccati. Sevāloti nīlasevālo, avaseso udakapappaṭakatilabījakādi sabbopi paṇakoti saṅkhyaṃ gacchati. Ekato ussāritāti ekaṭṭhāne kenāpi sampiṇḍitā rāsīkatāti dasseti.
৪২৫-৬. দুব্বচজাতিকোতি দুব্বচসভাৰো ৰত্তুং অসক্কুণেয্যোতি অত্থো। পদভাজনেপিস্স দুব্বচোতি দুক্খেন কিচ্ছেন ৰদিতব্বো, ন সক্কা সুখেন ৰত্তুন্তি অত্থো। দোৰচস্সকরণেহীতি দুব্বচভাৰকরণীযেহি, যে ধম্মা দুব্বচং পুগ্গলং করোন্তি, তেহি সমন্নাগতোতি অত্থো। তে পন ‘‘কতমে চ, আৰুসো, দোৰচস্সকরণা ধম্মা? ইধাৰুসো, ভিক্খু পাপিচ্ছো হোতী’’তিআদিনা নযেন পটিপাটিযা অনুমানসুত্তে (ম॰ নি॰ ১.১৮১) আগতা পাপিচ্ছতা, অত্তুক্কংসকপরৰম্ভকতা, কোধনতা, কোধহেতু উপনাহিতা, কোধহেতুঅভিসঙ্গিতা, কোধহেতুকোধসামন্তৰাচানিচ্ছারণতা, চোদকং পটিপ্ফরণতা, চোদকং অপসাদনতা, চোদকস্স পচ্চারোপনতা, অঞ্ঞেন অঞ্ঞংপটিচরণতা , অপদানেন ন সম্পাযনতা, মক্খিপল়াসিতা, ইস্সুকীমচ্ছরিতা, সঠমাযাৰিতা, থদ্ধাতিমানিতা, সন্দিট্ঠিপরামাসিআধানগ্গহিদুপ্পটিনিস্সগ্গিতাতি একূনৰীসতি ধম্মা ৰেদিতব্বা।
425-6.Dubbacajātikoti dubbacasabhāvo vattuṃ asakkuṇeyyoti attho. Padabhājanepissa dubbacoti dukkhena kicchena vaditabbo, na sakkā sukhena vattunti attho. Dovacassakaraṇehīti dubbacabhāvakaraṇīyehi, ye dhammā dubbacaṃ puggalaṃ karonti, tehi samannāgatoti attho. Te pana ‘‘katame ca, āvuso, dovacassakaraṇā dhammā? Idhāvuso, bhikkhu pāpiccho hotī’’tiādinā nayena paṭipāṭiyā anumānasutte (ma. ni. 1.181) āgatā pāpicchatā, attukkaṃsakaparavambhakatā, kodhanatā, kodhahetu upanāhitā, kodhahetuabhisaṅgitā, kodhahetukodhasāmantavācānicchāraṇatā, codakaṃ paṭippharaṇatā, codakaṃ apasādanatā, codakassa paccāropanatā, aññena aññaṃpaṭicaraṇatā , apadānena na sampāyanatā, makkhipaḷāsitā, issukīmaccharitā, saṭhamāyāvitā, thaddhātimānitā, sandiṭṭhiparāmāsiādhānaggahiduppaṭinissaggitāti ekūnavīsati dhammā veditabbā.
ওৰাদং নক্খমতি ন সহতীতি অক্খমো। যথানুসিট্ঠং অপ্পটিপজ্জনতো পদক্খিণেন অনুসাসনিং ন গণ্হাতীতি অপ্পদক্খিণগ্গাহী অনুসাসনিং।
Ovādaṃ nakkhamati na sahatīti akkhamo. Yathānusiṭṭhaṃ appaṭipajjanato padakkhiṇena anusāsaniṃ na gaṇhātīti appadakkhiṇaggāhī anusāsaniṃ.
উদ্দেসপরিযাপন্নেসূতি উদ্দেসে পরিযাপন্নেসু অন্তোগধেসু। ‘‘যস্স সিযা আপত্তি, সো আৰিকরেয্যা’’তি এৰং সঙ্গহিতত্তা অন্তো পাতিমোক্খস্স ৰত্তমানেসূতি অত্থো। সহধম্মিকং ৰুচ্চমানোতি সহধম্মিকেন ৰুচ্চমানো করণত্থে উপযোগৰচনং, পঞ্চহি সহধম্মিকেহি সিক্খিতব্বত্তা তেসং ৰা সন্তকত্তা সহধম্মিকন্তি লদ্ধনামেন বুদ্ধপঞ্ঞত্তেন সিক্খাপদেন ৰুচ্চমানোতি অত্থো।
Uddesapariyāpannesūti uddese pariyāpannesu antogadhesu. ‘‘Yassa siyā āpatti, so āvikareyyā’’ti evaṃ saṅgahitattā anto pātimokkhassa vattamānesūti attho. Sahadhammikaṃ vuccamānoti sahadhammikena vuccamāno karaṇatthe upayogavacanaṃ, pañcahi sahadhammikehi sikkhitabbattā tesaṃ vā santakattā sahadhammikanti laddhanāmena buddhapaññattena sikkhāpadena vuccamānoti attho.
ৰিরমথাযস্মন্তো মম ৰচনাযাতি যেন ৰচনেন মং ৰদথ, ততো মম ৰচনতো ৰিরমথ। মা মং তং ৰচনং ৰদথাতি ৰুত্তং হোতি।
Viramathāyasmanto mama vacanāyāti yena vacanena maṃ vadatha, tato mama vacanato viramatha. Mā maṃ taṃ vacanaṃ vadathāti vuttaṃ hoti.
ৰদতু সহধম্মেনাতি সহধম্মিকেন সিক্খাপদেন সহধম্মেন ৰা অঞ্ঞেনপি পাসাদিকভাৰসংৰত্তনিকেন ৰচনেন ৰদতু। যদিদন্তি ৰুড্ঢিকারণনিদস্সনত্থে নিপাতো। তেন ‘‘যং ইদং অঞ্ঞমঞ্ঞস্স হিতৰচনং আপত্তিতো ৰুট্ঠাপনঞ্চ তেন অঞ্ঞমঞ্ঞৰচনেন অঞ্ঞমঞ্ঞৰুট্ঠাপনেন চ সংৰড্ঢা পরিসা’’তি এৰং পরিসায ৰুড্ঢিকারণং দস্সিতং হোতি। সেসং সব্বত্থ উত্তানমেৰ।
Vadatu sahadhammenāti sahadhammikena sikkhāpadena sahadhammena vā aññenapi pāsādikabhāvasaṃvattanikena vacanena vadatu. Yadidanti vuḍḍhikāraṇanidassanatthe nipāto. Tena ‘‘yaṃ idaṃ aññamaññassa hitavacanaṃ āpattito vuṭṭhāpanañca tena aññamaññavacanena aññamaññavuṭṭhāpanena ca saṃvaḍḍhā parisā’’ti evaṃ parisāya vuḍḍhikāraṇaṃ dassitaṃ hoti. Sesaṃ sabbattha uttānameva.
সমুট্ঠানাদীনি পঠমসঙ্ঘভেদসদিসানেৰাতি।
Samuṭṭhānādīni paṭhamasaṅghabhedasadisānevāti.
দুব্বচসিক্খাপদৰণ্ণনা নিট্ঠিতা।
Dubbacasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১২. দুব্বচসিক্খাপদং • 12. Dubbacasikkhāpadaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১২. দুব্বচসিক্খাপদৰণ্ণনা • 12. Dubbacasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১২. দুব্বচসিক্খাপদৰণ্ণনা • 12. Dubbacasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১২. দুব্বচসিক্খাপদৰণ্ণনা • 12. Dubbacasikkhāpadavaṇṇanā
