| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
১২. দুব্বচসিক্খাপদৰণ্ণনা
12. Dubbacasikkhāpadavaṇṇanā
৪২৪. দ্ৰাদসমে ৰম্ভনৰচনন্তি গরহৰচনং। অপসাদেতুকামোতি খিপিতুকামো, তজ্জেতুকামো ৰা, ঘট্টেতুকামোতি ৰুত্তং হোতি। সটসদ্দো পতিতসদ্দেন সমানত্থো। ৰিসেসনস্স চ পরনিপাতং কত্ৰা তিণকট্ঠপণ্ণসটন্তি ৰুত্তন্তি আহ ‘‘তত্থ তত্থ পতিতং তিণকট্ঠপণ্ণ’’ন্তি। কেনাপীতি ৰাতসদিসেন নদীসদিসেন চ কেনাপি।
424. Dvādasame vambhanavacananti garahavacanaṃ. Apasādetukāmoti khipitukāmo, tajjetukāmo vā, ghaṭṭetukāmoti vuttaṃ hoti. Saṭasaddo patitasaddena samānattho. Visesanassa ca paranipātaṃ katvā tiṇakaṭṭhapaṇṇasaṭanti vuttanti āha ‘‘tattha tattha patitaṃ tiṇakaṭṭhapaṇṇa’’nti. Kenāpīti vātasadisena nadīsadisena ca kenāpi.
৪২৫-৪২৬. ৰত্তুং অসক্কুণেয্যোতি কিস্মিঞ্চি ৰুচ্চমানে অসহনতো ওৰদিতুং অসক্কুণেয্যো। দুক্খং ৰচো এতস্মিং ৰিপ্পটিকূলগ্গাহে ৰিপচ্চনীকৰাদে অনাদরে পুগ্গলেতি দুব্বচো। তেনাহ ‘‘দুক্খেন কিচ্ছেন ৰদিতব্বো’’তিআদি। দুব্বচভাৰকরণীযেহীতি দুব্বচভাৰকারকেহি। কত্তুঅত্থে অনীযসদ্দো দট্ঠব্বো। তেনেৰাহ ‘‘যে ধম্মা দুব্বচং পুগ্গলং করোন্তী’’তিআদি। পাপিকা ইচ্ছা এতস্সাতি পাপিচ্ছো, তস্স ভাৰো পাপিচ্ছতা, অসন্তগুণসম্ভাৰনতা পটিগ্গহণে চ অমত্তঞ্ঞুতা পাপিচ্ছতাতি ৰেদিতব্বা। অত্তুক্কংসকা চ তে পরৰম্ভকা চাতি অত্তুক্কংসকপরৰম্ভকা। যে অত্তানং উক্কংসন্তি উক্খিপন্তি উচ্চে ঠানে ঠপেন্তি, পরঞ্চ ৰম্ভেন্তি গরহন্তি নীচে ঠানে ঠপেন্তি, তেসমেতং অধিৰচনং। তেসং ভাৰো অত্তুক্কংসকপরৰম্ভকতা। কুজ্ঝনসীলো কোধনো, তস্স ভাৰো কোধনতা। কুজ্ঝনলক্খণস্স কোধস্সেতং অধিৰচনং।
425-426.Vattuṃ asakkuṇeyyoti kismiñci vuccamāne asahanato ovadituṃ asakkuṇeyyo. Dukkhaṃ vaco etasmiṃ vippaṭikūlaggāhe vipaccanīkavāde anādare puggaleti dubbaco. Tenāha ‘‘dukkhena kicchena vaditabbo’’tiādi. Dubbacabhāvakaraṇīyehīti dubbacabhāvakārakehi. Kattuatthe anīyasaddo daṭṭhabbo. Tenevāha ‘‘ye dhammā dubbacaṃ puggalaṃ karontī’’tiādi. Pāpikā icchā etassāti pāpiccho, tassa bhāvo pāpicchatā, asantaguṇasambhāvanatā paṭiggahaṇe ca amattaññutā pāpicchatāti veditabbā. Attukkaṃsakā ca te paravambhakā cāti attukkaṃsakaparavambhakā. Ye attānaṃ ukkaṃsanti ukkhipanti ucce ṭhāne ṭhapenti, parañca vambhenti garahanti nīce ṭhāne ṭhapenti, tesametaṃ adhivacanaṃ. Tesaṃ bhāvo attukkaṃsakaparavambhakatā. Kujjhanasīlo kodhano, tassa bhāvo kodhanatā. Kujjhanalakkhaṇassa kodhassetaṃ adhivacanaṃ.
পুব্বকালে কোধো, অপরকালে উপনাহোতি আহ ‘‘কোধহেতু উপনাহিতা’’তি। তত্থ উপনহনসীলো, উপনাহো ৰা এতস্স অত্থীতি উপনাহী, তস্স ভাৰো উপনাহিতা। পুনপ্পুনং চিত্তপরিযোনদ্ধলক্খণস্স কোধস্সেৰেতং অধিৰচনং। সকিঞ্হি উপ্পন্নো কোধো কোধোযেৰ, ততুত্তরি উপনাহো। অভিসঙ্গোতি দুম্মোচনীযো বলৰউপনাহো। সো অস্স অত্থীতি অভিসঙ্গী, তস্স ভাৰো অভিসঙ্গিতা। দুম্মোচনীযস্স বলৰউপনাহস্সেতং অধিৰচনং। চোদকং পটিপ্ফরণতাতি চোদকস্স পটিৰিরুদ্ধেন পচ্চনীকেন হুত্ৰা অৰট্ঠানং। চোদকং অপসাদনতাতি ‘‘কিং নু খো তুয্হং বালস্স অব্যত্তস্স ভণিতেন, ত্ৰম্পি নাম ভণিতব্বং মঞ্ঞিস্সসী’’তি এৰং চোদকস্স ঘট্টনা। চোদকস্স পচ্চারোপনতাতি ‘‘ত্ৰম্পি খোসি ইত্থন্নামং আপত্তিং আপন্নো, তং তাৰ পটিকরোহী’’তি এৰং চোদকস্স উপরি পটিআরোপনতা।
Pubbakāle kodho, aparakāle upanāhoti āha ‘‘kodhahetu upanāhitā’’ti. Tattha upanahanasīlo, upanāho vā etassa atthīti upanāhī, tassa bhāvo upanāhitā. Punappunaṃ cittapariyonaddhalakkhaṇassa kodhassevetaṃ adhivacanaṃ. Sakiñhi uppanno kodho kodhoyeva, tatuttari upanāho. Abhisaṅgoti dummocanīyo balavaupanāho. So assa atthīti abhisaṅgī, tassa bhāvo abhisaṅgitā. Dummocanīyassa balavaupanāhassetaṃ adhivacanaṃ. Codakaṃ paṭippharaṇatāti codakassa paṭiviruddhena paccanīkena hutvā avaṭṭhānaṃ. Codakaṃ apasādanatāti ‘‘kiṃ nu kho tuyhaṃ bālassa abyattassa bhaṇitena, tvampi nāma bhaṇitabbaṃ maññissasī’’ti evaṃ codakassa ghaṭṭanā. Codakassa paccāropanatāti ‘‘tvampi khosi itthannāmaṃ āpattiṃ āpanno, taṃ tāva paṭikarohī’’ti evaṃ codakassa upari paṭiāropanatā.
অঞ্ঞেন অঞ্ঞং পটিচরণতাতি অঞ্ঞেন কারণেন, ৰচনেন ৰা অঞ্ঞস্স কারণস্স, ৰচনস্স ৰা পটিচ্ছাদনৰসেন চরণতা। পটিচ্ছাদনত্থো এৰ ৰা চরসদ্দো অনেকত্থত্তা ধাতূনন্তি পটিচ্ছাদনতাতি অত্থো। তায সমন্নাগতো হি পুগ্গলো যং চোদকেন দোসৰিভাৰনকারণং, ৰচনং ৰা ৰুত্তং, তং ততো অঞ্ঞেনেৰ চোদনায অমূলিকভাৰদীপনেন কারণেন, তদত্থবোধকেন ৰচনেন ৰা পটিচ্ছাদেতি। ‘‘আপত্তিং আপন্নোসী’’তি ৰুত্তে ‘‘কো আপন্নো, কিং আপন্নো, কিস্মিং আপন্নো, কং ভণথ, কিং ভণথা’’তি ৰা ৰত্ৰা ‘‘এৰরূপং কিঞ্চি তযা দিট্ঠ’’ন্তি ৰুত্তে ‘‘ন সুণামী’’তি সোতং ৰা উপনামেত্ৰা ৰিক্খেপং করোন্তোপি অঞ্ঞেনঞ্ঞং পটিচ্ছাদেতি। ‘‘ইত্থন্নামং আপত্তিং আপন্নোসী’’তি পুট্ঠে ‘‘পাটলিপুত্তং গতোম্হী’’তি ৰত্ৰা পুন ‘‘ন তৰ পাটলিপুত্তগমনং পুচ্ছাম, আপত্তিং পুচ্ছামা’’তি ৰুত্তে ততো ‘‘রাজগহং গতোম্হী’’তি ৰত্ৰা ‘‘রাজগহং ৰা যাহি ব্রাহ্মণগহং ৰা, আপত্তিং আপন্নোসী’’তি ৰুত্তে ‘‘তত্থ মে সূকরমংসং লদ্ধ’’ন্তিআদীনি ৰত্ৰা বহিদ্ধা কথাৰিক্খিপনম্পি অত্থতো অঞ্ঞেনঞ্ঞং পটিচরণমেৰাতি ৰিসুং ন গহিতং।
Aññena aññaṃ paṭicaraṇatāti aññena kāraṇena, vacanena vā aññassa kāraṇassa, vacanassa vā paṭicchādanavasena caraṇatā. Paṭicchādanattho eva vā carasaddo anekatthattā dhātūnanti paṭicchādanatāti attho. Tāya samannāgato hi puggalo yaṃ codakena dosavibhāvanakāraṇaṃ, vacanaṃ vā vuttaṃ, taṃ tato aññeneva codanāya amūlikabhāvadīpanena kāraṇena, tadatthabodhakena vacanena vā paṭicchādeti. ‘‘Āpattiṃ āpannosī’’ti vutte ‘‘ko āpanno, kiṃ āpanno, kismiṃ āpanno, kaṃ bhaṇatha, kiṃ bhaṇathā’’ti vā vatvā ‘‘evarūpaṃ kiñci tayā diṭṭha’’nti vutte ‘‘na suṇāmī’’ti sotaṃ vā upanāmetvā vikkhepaṃ karontopi aññenaññaṃ paṭicchādeti. ‘‘Itthannāmaṃ āpattiṃ āpannosī’’ti puṭṭhe ‘‘pāṭaliputtaṃ gatomhī’’ti vatvā puna ‘‘na tava pāṭaliputtagamanaṃ pucchāma, āpattiṃ pucchāmā’’ti vutte tato ‘‘rājagahaṃ gatomhī’’ti vatvā ‘‘rājagahaṃ vā yāhi brāhmaṇagahaṃ vā, āpattiṃ āpannosī’’ti vutte ‘‘tattha me sūkaramaṃsaṃ laddha’’ntiādīni vatvā bahiddhā kathāvikkhipanampi atthato aññenaññaṃ paṭicaraṇamevāti visuṃ na gahitaṃ.
অপদানেনাতি অত্তনো চরিযায। অপদীযন্তি হি দোসা এতেন দক্খীযন্তি, লুযন্তি ছিজ্জন্তীতি ৰা অপদানং, সত্তানং সম্মা মিচ্ছা ৰা ৰত্তপ্পযোগো। ন সম্পাযনতাতি ‘‘আৰুসো, ত্ৰং কুহিং ৰসসি, কং নিস্সায ৰসসী’’তি ৰা ‘‘যং ত্ৰং ৰদেসি ‘মযা এস আপত্তিং আপজ্জন্তো দিট্ঠো’তি, ত্ৰং তস্মিং সমযে কিং করোসি, অযং কিং করোতি, কত্থ চ ত্ৰং অহোসি, কত্থ অয’’ন্তি ৰা আদিনা নযেন চরিযং পুট্ঠেন সম্পাদেত্ৰা অকথনং।
Apadānenāti attano cariyāya. Apadīyanti hi dosā etena dakkhīyanti, luyanti chijjantīti vā apadānaṃ, sattānaṃ sammā micchā vā vattappayogo. Na sampāyanatāti ‘‘āvuso, tvaṃ kuhiṃ vasasi, kaṃ nissāya vasasī’’ti vā ‘‘yaṃ tvaṃ vadesi ‘mayā esa āpattiṃ āpajjanto diṭṭho’ti, tvaṃ tasmiṃ samaye kiṃ karosi, ayaṃ kiṃ karoti, kattha ca tvaṃ ahosi, kattha aya’’nti vā ādinā nayena cariyaṃ puṭṭhena sampādetvā akathanaṃ.
মক্খিপল়াসিতাতি এত্থ পরগুণমক্খনলক্খণো মক্খো, সো এতস্স অত্থীতি মক্খী। তাদিসো পুগ্গলো অগারিযো অনগারিযো ৰা সমানো পরেসং সুকতকরণং ৰিনাসেতি। অগারিযোপি হি কেনচি অনুকম্পকেন দলিদ্দো সমানো উচ্চট্ঠানে ঠপিতো, অপরেন সমযেন ‘‘কিং তযা ময্হং কত’’ন্তি তস্স সুকতকরণং ৰিনাসেতি। অনগারিযোপি সামণেরকালতো পভুতি আচরিযেন ৰা উপজ্ঝাযেন ৰা চতূহি পচ্চযেহি উদ্দেসপরিপুচ্ছাদীহি চ অনুগ্গহেত্ৰা ধম্মকথানযপকরণকোসল্লাদীনি সিক্খাপিতো, অপরেন সমযেন রাজরাজমহামত্তাদীহি সক্কতো গরুকতো আচরিযুপজ্ঝাযেসু অচিত্তীকতো চরমানো ‘‘অযং অম্হেহি দহরকালে এৰ অনুগ্গহিতো সংৰদ্ধিতো চ, অথ চ পনিদানি নিস্সিনেহো জাতো’’তি ৰুচ্চমানো ‘‘কিং ময্হং তুম্হেহি কত’’ন্তি তেসং সুকতকরণং ৰিনাসেতি।
Makkhipaḷāsitāti ettha paraguṇamakkhanalakkhaṇo makkho, so etassa atthīti makkhī. Tādiso puggalo agāriyo anagāriyo vā samāno paresaṃ sukatakaraṇaṃ vināseti. Agāriyopi hi kenaci anukampakena daliddo samāno uccaṭṭhāne ṭhapito, aparena samayena ‘‘kiṃ tayā mayhaṃ kata’’nti tassa sukatakaraṇaṃ vināseti. Anagāriyopi sāmaṇerakālato pabhuti ācariyena vā upajjhāyena vā catūhi paccayehi uddesaparipucchādīhi ca anuggahetvā dhammakathānayapakaraṇakosallādīni sikkhāpito, aparena samayena rājarājamahāmattādīhi sakkato garukato ācariyupajjhāyesu acittīkato caramāno ‘‘ayaṃ amhehi daharakāle eva anuggahito saṃvaddhito ca, atha ca panidāni nissineho jāto’’ti vuccamāno ‘‘kiṃ mayhaṃ tumhehi kata’’nti tesaṃ sukatakaraṇaṃ vināseti.
‘‘বহুস্সুতেপি পুগ্গলে অজ্ঝোত্থরিত্ৰা ঈদিসস্স চেৰ বহুস্সুতস্স অনিযতা গতি, তৰ ৰা মম ৰা কো ৰিসেসো’’তিআদিনা নযেন উপ্পজ্জমানো যুগগ্গাহলক্খণো পল়াসো। সো পরগুণেহি অত্তনো গুণানং সমকরণরসো। তথা হেস পরেসং গুণে ডংসিত্ৰা ৰিয অত্তনো গুণেহি সমে করোতীতি পল়াসোতি ৰুচ্চতি, সো এতস্স অত্থীতি পল়াসী। মক্খী চ পল়াসী চ মক্খিপল়াসিনো, তেসং ভাৰো মক্খিপল়াসিতা। অত্থতো পন মক্খো চেৰ পল়াসো চ।
‘‘Bahussutepi puggale ajjhottharitvā īdisassa ceva bahussutassa aniyatā gati, tava vā mama vā ko viseso’’tiādinā nayena uppajjamāno yugaggāhalakkhaṇo paḷāso. So paraguṇehi attano guṇānaṃ samakaraṇaraso. Tathā hesa paresaṃ guṇe ḍaṃsitvā viya attano guṇehi same karotīti paḷāsoti vuccati, so etassa atthīti paḷāsī. Makkhī ca paḷāsī ca makkhipaḷāsino, tesaṃ bhāvo makkhipaḷāsitā. Atthato pana makkho ceva paḷāso ca.
ইস্সতি পরসম্পত্তিং ন সহতীতি ইস্সুকী। মচ্ছরাযতি অত্তনো সম্পত্তিং নিগূহতি, পরেসং সাধারণভাৰং ন সহতি, মচ্ছেরং ৰা এতস্স অত্থীতি মচ্ছরী। সঠযতি ন সম্মা ভাসতীতি সঠো, অত্তনো অৰিজ্জমানগুণপ্পকাসনলক্খণেন সাঠেয্যেন সমন্নাগতো কেরাটিকপুগ্গলো। কেরাটিকো চ আনন্দমচ্ছো ৰিয হোতি। আনন্দমচ্ছো নাম কির মচ্ছানং নঙ্গুট্ঠং দস্সেতি, সপ্পানং সীসং ‘‘তুম্হেহি সদিসো অহ’’ন্তি জানাপেতুং, এৰমেৰ কেরাটিকো পুগ্গলো যং যং সুত্তন্তিকং ৰা আভিধম্মিকং ৰা উপসঙ্কমতি, তং তং এৰং ৰদতি ‘‘অহং তুম্হাকং অন্তেৰাসী, তুম্হে ময্হং অনুকম্পকা, নাহং তুম্হে মুঞ্চামী’’তি ‘‘এৰমেতে ‘সগারৰো অযং অম্হেসু সপ্পতিস্সো’তি মঞ্ঞিস্সন্তী’’তি। সাঠেয্যেন হি সমন্নাগতস্স পুগ্গলস্স অসন্তগুণসম্ভাৰনেন চিত্তানুরূপকিরিযাৰিহরতো ‘‘এৰংচিত্তো এৰংকিরিযো’’তি দুৰিঞ্ঞেয্যত্তা কুচ্ছিং ৰা পিট্ঠিং ৰা জানিতুং ন সক্কা। যতো সো –
Issati parasampattiṃ na sahatīti issukī. Maccharāyati attano sampattiṃ nigūhati, paresaṃ sādhāraṇabhāvaṃ na sahati, maccheraṃ vā etassa atthīti maccharī. Saṭhayati na sammā bhāsatīti saṭho, attano avijjamānaguṇappakāsanalakkhaṇena sāṭheyyena samannāgato kerāṭikapuggalo. Kerāṭiko ca ānandamaccho viya hoti. Ānandamaccho nāma kira macchānaṃ naṅguṭṭhaṃ dasseti, sappānaṃ sīsaṃ ‘‘tumhehi sadiso aha’’nti jānāpetuṃ, evameva kerāṭiko puggalo yaṃ yaṃ suttantikaṃ vā ābhidhammikaṃ vā upasaṅkamati, taṃ taṃ evaṃ vadati ‘‘ahaṃ tumhākaṃ antevāsī, tumhe mayhaṃ anukampakā, nāhaṃ tumhe muñcāmī’’ti ‘‘evamete ‘sagāravo ayaṃ amhesu sappatisso’ti maññissantī’’ti. Sāṭheyyena hi samannāgatassa puggalassa asantaguṇasambhāvanena cittānurūpakiriyāviharato ‘‘evaṃcitto evaṃkiriyo’’ti duviññeyyattā kucchiṃ vā piṭṭhiṃ vā jānituṃ na sakkā. Yato so –
‘‘ৰামেন সূকরো হোতি, দক্খিণেন অজামিগো।
‘‘Vāmena sūkaro hoti, dakkhiṇena ajāmigo;
সরেন নেলকো হোতি, ৰিসাণেন জরগ্গৰো’’তি॥ (দী॰ নি॰ অট্ঠ॰ ২.২৯৬; ৰিভ॰ অট্ঠ॰ ৮৯৪; মহানি॰ অট্ঠ॰ ১৬৬) –
Sarena nelako hoti, visāṇena jaraggavo’’ti. (dī. ni. aṭṭha. 2.296; vibha. aṭṭha. 894; mahāni. aṭṭha. 166) –
এৰং ৰুত্তযক্খসূকরসদিসো হোতি। কতপাপপটিচ্ছাদনলক্খণা মাযা, সা অস্স অত্থীতি মাযাৰী।
Evaṃ vuttayakkhasūkarasadiso hoti. Katapāpapaṭicchādanalakkhaṇā māyā, sā assa atthīti māyāvī.
থম্ভসমঙ্গিতায থদ্ধো। ৰাতভরিতভস্তাসদিসথদ্ধভাৰপগ্গহিতসিরঅনিৰাতৰুত্তিকারকরোতি থম্ভো। যেন সমন্নাগতো পুগ্গলো গিলিতনঙ্গলসদিসো ৰিয অজগরো, ৰাতভরিতভস্তা ৰিয চ থদ্ধো হুত্ৰা গরুট্ঠানিযে দিস্ৰা ওনমিতুম্পি ন ইচ্ছতি, পরিযন্তেনেৰ চরতি। অব্ভুন্নতিলক্খণো অতিমানো, সো এতস্স অত্থীতি অতিমানী।
Thambhasamaṅgitāya thaddho. Vātabharitabhastāsadisathaddhabhāvapaggahitasiraanivātavuttikārakaroti thambho. Yena samannāgato puggalo gilitanaṅgalasadiso viya ajagaro, vātabharitabhastā viya ca thaddho hutvā garuṭṭhāniye disvā onamitumpi na icchati, pariyanteneva carati. Abbhunnatilakkhaṇo atimāno, so etassa atthīti atimānī.
সং অত্তনো দিট্ঠিং পরামসতি সভাৰং অতিক্কমিত্ৰা পরতো আমসতীতি সন্দিট্ঠিপরামাসী। আধানং গণ্হাতীতি আধানগ্গাহী। ‘‘আধান’’ন্তি দল়্হং ৰুচ্চতি, দল়্হগ্গাহীতি অত্থো। যুত্তং কারণং দিস্ৰাৰ লদ্ধিং পটিনিস্সজ্জতীতি পটিনিস্সগ্গী, দুক্খেন কিচ্ছেন কসিরেন বহুম্পি কারণং দস্সেত্ৰা ন সক্কা পটিনিস্সগ্গিং কাতুন্তি দুপ্পটিনিস্সগ্গী, যো অত্তনো দিট্ঠিং ‘‘ইদমেৰ সচ্চ’’ন্তি দল়্হং গণ্হিত্ৰা অপি বুদ্ধাদীহি কারণং দস্সেত্ৰা ৰুচ্চমানো ন পটিনিস্সজ্জতি, তস্সেতং অধিৰচনং। তাদিসো হি পুগ্গলো যং যদেৰ ধম্মং ৰা অধম্মং ৰা সুণাতি, তং সব্বং ‘‘এৰং অম্হাকং আচরিযেহি কথিতং, এৰং অম্হেহি সুত’’ন্তি কুম্মোৰ অঙ্গানি সকে কপালে অন্তোযেৰ সমোদহতি। যথা হি কচ্ছপো অত্তনো পাদাদিকে অঙ্গে কেনচি ঘট্টিতে সব্বানি অঙ্গানি অত্তনো কপালেযেৰ সমোদহতি, ন বহি নীহরতি, এৰমযম্পি ‘‘ন সুন্দরো তৰ গাহো, ছড্ডেহি ন’’ন্তি ৰুত্তো তং ন ৰিস্সজ্জেতি, অন্তোযেৰ অত্তনো হদযে এৰ ঠপেত্ৰা ৰিচরতি। যথা কুম্ভীলা গহিতং ন পটিনিস্সজ্জন্তি, এৰং কুম্ভীলগ্গাহং গণ্হাতি, ন ৰিস্সজ্জেতি। মক্খিপল়াসিতাদিযুগল়ত্তযেন দস্সিতে মক্খপল়াসাদযো ছ ধম্মে ৰিসুং ৰিসুং গহেত্ৰা ‘‘একূনৰীসতি ধম্মা’’তি ৰুত্তং। অনুমানসুত্তট্ঠকথাযং (ম॰ নি॰ অট্ঠ॰ ১.১৮১) পন মক্খপল়াসাদযোপি যুগল়ৰসেন একং কত্ৰা ‘‘সোল়স ধম্মা’’তি ৰুত্তং।
Saṃ attano diṭṭhiṃ parāmasati sabhāvaṃ atikkamitvā parato āmasatīti sandiṭṭhiparāmāsī. Ādhānaṃ gaṇhātīti ādhānaggāhī. ‘‘Ādhāna’’nti daḷhaṃ vuccati, daḷhaggāhīti attho. Yuttaṃ kāraṇaṃ disvāva laddhiṃ paṭinissajjatīti paṭinissaggī, dukkhena kicchena kasirena bahumpi kāraṇaṃ dassetvā na sakkā paṭinissaggiṃ kātunti duppaṭinissaggī, yo attano diṭṭhiṃ ‘‘idameva sacca’’nti daḷhaṃ gaṇhitvā api buddhādīhi kāraṇaṃ dassetvā vuccamāno na paṭinissajjati, tassetaṃ adhivacanaṃ. Tādiso hi puggalo yaṃ yadeva dhammaṃ vā adhammaṃ vā suṇāti, taṃ sabbaṃ ‘‘evaṃ amhākaṃ ācariyehi kathitaṃ, evaṃ amhehi suta’’nti kummova aṅgāni sake kapāle antoyeva samodahati. Yathā hi kacchapo attano pādādike aṅge kenaci ghaṭṭite sabbāni aṅgāni attano kapāleyeva samodahati, na bahi nīharati, evamayampi ‘‘na sundaro tava gāho, chaḍḍehi na’’nti vutto taṃ na vissajjeti, antoyeva attano hadaye eva ṭhapetvā vicarati. Yathā kumbhīlā gahitaṃ na paṭinissajjanti, evaṃ kumbhīlaggāhaṃ gaṇhāti, na vissajjeti. Makkhipaḷāsitādiyugaḷattayena dassite makkhapaḷāsādayo cha dhamme visuṃ visuṃ gahetvā ‘‘ekūnavīsati dhammā’’ti vuttaṃ. Anumānasuttaṭṭhakathāyaṃ (ma. ni. aṭṭha. 1.181) pana makkhapaḷāsādayopi yugaḷavasena ekaṃ katvā ‘‘soḷasa dhammā’’ti vuttaṃ.
পকারেহি আৰহনং পদক্খিণং, ততো পদক্খিণতো গহণসীলো পদক্খিণগ্গাহী, ন পদক্খিণগ্গাহী অপ্পদক্খিণগ্গাহী। যো ৰুচ্চমানো ‘‘তুম্হে মং কস্মা ৰদথ, অহং অত্তনো কপ্পিযাকপ্পিযং সাৰজ্জানৰজ্জং অত্থানত্থং জানামী’’তি ৰদতি, অযং অনুসাসনিং পদক্খিণতো ন গণ্হাতি, ৰামতোৰ গণ্হাতি, তস্মা ‘‘অপ্পদক্খিণগ্গাহী’’তি ৰুচ্চতি, তেনাহ ‘‘যথানুসিট্ঠ’’ন্তিআদি।
Pakārehi āvahanaṃ padakkhiṇaṃ, tato padakkhiṇato gahaṇasīlo padakkhiṇaggāhī, na padakkhiṇaggāhī appadakkhiṇaggāhī. Yo vuccamāno ‘‘tumhe maṃ kasmā vadatha, ahaṃ attano kappiyākappiyaṃ sāvajjānavajjaṃ atthānatthaṃ jānāmī’’ti vadati, ayaṃ anusāsaniṃ padakkhiṇato na gaṇhāti, vāmatova gaṇhāti, tasmā ‘‘appadakkhiṇaggāhī’’ti vuccati, tenāha ‘‘yathānusiṭṭha’’ntiādi.
উদ্দেসেতি পাতিমোক্খুদ্দেসে। অথ সব্বানেৰ সিক্খাপদানি কথং পাতিমোক্খুদ্দেসপরিযাপন্নানীতি আহ ‘‘যস্স সিযা আপত্তি, সো আৰিকরেয্যাতি এৰং সঙ্গহিতত্তা’’তি। ‘‘যস্স সিযা আপত্তী’’তি হি ইমিনা সব্বাপি আপত্তিযো নিদানুদ্দেসে সঙ্গহিতাযেৰ হোন্তি। পঞ্চহি সহধম্মিকেহি সিক্খিতব্বত্তাতি লব্ভমানৰসেন ৰুত্তং। সহধম্মিকেন সহকারণেনাতিপি অত্থো দট্ঠব্বো। ‘‘ৰচনাযা’’তি নিস্সক্কে সম্পদানৰচনন্তি আহ ‘‘ততো মম ৰচনতো’’তি। অঙ্গানি চেত্থ পঠমসঙ্ঘভেদসদিসানি। অযং পন ৰিসেসো – যথা তত্থ ভেদায পরক্কমনং, এৰং ইধ অৰচনীযকরণতা দট্ঠব্বা।
Uddeseti pātimokkhuddese. Atha sabbāneva sikkhāpadāni kathaṃ pātimokkhuddesapariyāpannānīti āha ‘‘yassa siyā āpatti, so āvikareyyāti evaṃ saṅgahitattā’’ti. ‘‘Yassa siyā āpattī’’ti hi iminā sabbāpi āpattiyo nidānuddese saṅgahitāyeva honti. Pañcahi sahadhammikehi sikkhitabbattāti labbhamānavasena vuttaṃ. Sahadhammikena sahakāraṇenātipi attho daṭṭhabbo. ‘‘Vacanāyā’’ti nissakke sampadānavacananti āha ‘‘tato mama vacanato’’ti. Aṅgāni cettha paṭhamasaṅghabhedasadisāni. Ayaṃ pana viseso – yathā tattha bhedāya parakkamanaṃ, evaṃ idha avacanīyakaraṇatā daṭṭhabbā.
দুব্বচসিক্খাপদৰণ্ণনা নিট্ঠিতা।
Dubbacasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১২. দুব্বচসিক্খাপদং • 12. Dubbacasikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১২. দুব্বচসিক্খাপদৰণ্ণনা • 12. Dubbacasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১২. দুব্বচসিক্খাপদৰণ্ণনা • 12. Dubbacasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১২. দুব্বচসিক্খাপদৰণ্ণনা • 12. Dubbacasikkhāpadavaṇṇanā
