| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
১২. দুব্বচসিক্খাপদৰণ্ণনা
12. Dubbacasikkhāpadavaṇṇanā
৪২৪. দ্ৰাদসমে ৰম্ভনৰচনন্তি গরহৰচনং। সট-সদ্দো পতিতসদ্দেন সমানত্থো, তস্স চ ৰিসেসনস্স পরনিপাতোতি আহ ‘‘তত্থ তত্থ পতিতং তিণকট্ঠপণ্ণ’’ন্তি। কেনাপীতি ৰাতাদিসদিসেন উপজ্ঝাযাদিনা।
424. Dvādasame vambhanavacananti garahavacanaṃ. Saṭa-saddo patitasaddena samānattho, tassa ca visesanassa paranipātoti āha ‘‘tattha tattha patitaṃ tiṇakaṭṭhapaṇṇa’’nti. Kenāpīti vātādisadisena upajjhāyādinā.
৪২৬. চিত্তপরিযোনাহো দল়্হকোধোৰ উপনাহো। ততোপি বলৰতরো দুম্মোচনীযো কোধাভিসঙ্গো। চোদকং পটিপ্ফরণতাতি চোদকস্স পটিৰিরুদ্ধো হুত্ৰা অৰট্ঠানং। চোদকং অপসাদনাতি ৰাচায ঘট্টনা। পচ্চারোপনাতি ‘‘ত্ৰম্পি সাপত্তিকো’’তি চোদকস্স আপত্তিআরোপনা। পটিচরণতাতি পটিচ্ছাদনতা। অপদানেনাতি অত্তনো চরিযায। ন সম্পাযনতাতি ‘‘যং ত্ৰং চোদকো ৰদেসি ‘মযা এস আপত্তিং আপন্নো দিট্ঠো’তি, ত্ৰং তস্মিং সমযে কিং করোসি, অযং কিং করোতি, কত্থ চ ত্ৰং অহোসি, কত্থ অয’’ন্তিআদিনা নযেন চরিযং পুট্ঠেন সম্পাদেত্ৰা অকথনং।
426. Cittapariyonāho daḷhakodhova upanāho. Tatopi balavataro dummocanīyo kodhābhisaṅgo. Codakaṃ paṭippharaṇatāti codakassa paṭiviruddho hutvā avaṭṭhānaṃ. Codakaṃ apasādanāti vācāya ghaṭṭanā. Paccāropanāti ‘‘tvampi sāpattiko’’ti codakassa āpattiāropanā. Paṭicaraṇatāti paṭicchādanatā. Apadānenāti attano cariyāya. Na sampāyanatāti ‘‘yaṃ tvaṃ codako vadesi ‘mayā esa āpattiṃ āpanno diṭṭho’ti, tvaṃ tasmiṃ samaye kiṃ karosi, ayaṃ kiṃ karoti, kattha ca tvaṃ ahosi, kattha aya’’ntiādinā nayena cariyaṃ puṭṭhena sampādetvā akathanaṃ.
‘‘যস্স সিযা আপত্তী’’তি (মহাৰ॰ ১৩৪) ইমিনা নিদানৰচনেন সব্বাপি আপত্তিযো সঙ্গহিতাতি আহ ‘‘যস্স সিযা’’তিআদি। অঙ্গানি চেত্থ পঠমসঙ্ঘভেদসদিসানি, অযং পন ৰিসেসো যথা তত্থ ভেদায পরক্কমনং, ইধ অৰচনীযকরণতা দট্ঠব্বা।
‘‘Yassa siyā āpattī’’ti (mahāva. 134) iminā nidānavacanena sabbāpi āpattiyo saṅgahitāti āha ‘‘yassa siyā’’tiādi. Aṅgāni cettha paṭhamasaṅghabhedasadisāni, ayaṃ pana viseso yathā tattha bhedāya parakkamanaṃ, idha avacanīyakaraṇatā daṭṭhabbā.
দুব্বচসিক্খাপদৰণ্ণনা নিট্ঠিতা।
Dubbacasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১২. দুব্বচসিক্খাপদং • 12. Dubbacasikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১২. দুব্বচসিক্খাপদৰণ্ণনা • 12. Dubbacasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১২. দুব্বচসিক্খাপদৰণ্ণনা • 12. Dubbacasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১২. দুব্বচসিক্খাপদৰণ্ণনা • 12. Dubbacasikkhāpadavaṇṇanā
