| Library / Tipiṭaka / д̇ибидага • Tipiṭaka / ган̇каавид̇аран̣ий-абхинава-дийгаа • Kaṅkhāvitaraṇī-abhinava-ṭīkā |
12. д̣̇уб̣б̣ажасигкаабад̣̇аван̣н̣анаа
12. Dubbacasikkhāpadavaṇṇanā
д̣̇угкзна вад̇д̇аб̣б̣о анусаасид̇ум̣ асаггун̣зяяо сабхааво ассаад̇и д̣̇уб̣б̣ажаж̇аад̇иго, виломабхаавий. д̇знааха ‘‘д̣̇уб̣б̣ажасабхааво’’д̇иаад̣̇и. вад̇д̇ум̣ асаггун̣зяяод̇и гисмин̃жи вужжамаанз асаханад̇о овад̣̇ид̇ум̣ асаггун̣зяяо. уд̣̇д̣̇исийяад̇ийд̇и уд̣̇д̣̇зсо, баад̇имогко, д̇асмим̣ барияаабаннаа анд̇ог̇ад̇хаа уд̣̇д̣̇зсабарияаабаннаа, д̇зсу уд̣̇д̣̇зсабарияаабаннзсу. д̇знааха ‘‘уд̣̇д̣̇зсз’’д̇иаад̣̇и. ат̇а саб̣б̣аанзва сигкаабад̣̇аани гат̇ам̣ баад̇имогкуд̣̇д̣̇зсабарияаабаннаанийд̇и ааха ‘‘яасса сияаа аабад̇д̇и, со ‘аавигарзяяаа’д̇и звам̣ сан̇г̇ахид̇ад̇д̇аа’’д̇и. ‘‘яасса сияаа аабад̇д̇ий’’д̇и иминаа саб̣б̣ааби аабад̇д̇ияо нид̣̇аануд̣̇д̣̇зсз сан̇г̇ахид̇аа зва хонд̇и. сигкаабад̣̇зсууд̇и ад̇хисийласигкааяа ад̇хиг̇амуубааяабхууд̇зсу винаяабан̃н̃ад̇д̇ийсууд̇и ад̇т̇о. со бана баагадоязваад̇и адтагат̇ааяам̣ на вуд̇д̇о. бан̃жахи сахад̇хаммигзхийд̇и бхигкубхигкунисааман̣зрасааман̣зрисигкамаанаахи. сигкид̇аб̣б̣ад̇д̇аад̇и лаб̣бхамаанавасзна сигкид̇аб̣б̣ад̇д̇аа. д̇ат̇аа хи д̇зхи яат̇аасагам̣ сигкаа сигкийяад̇и, на саб̣б̣аа. б̣уд̣̇д̇хабан̃н̃ад̇д̇знаад̇и б̣уд̣̇д̇хзна табид̇зна, вихид̇знаад̇и ад̇т̇о. ат̇а ваа сахад̇хаммигзна сагааран̣зна вужжамаанод̇и звамзд̇т̇а ад̇т̇о д̣̇адтаб̣б̣о. важанааяаад̇и ниссаггз самбад̣̇аанаважананд̇и ааха ‘‘д̇ад̇о мама важанад̇о’’д̇и.
Dukkhena vattabbo anusāsituṃ asakkuṇeyyo sabhāvo assāti dubbacajātiko, vilomabhāvī. Tenāha ‘‘dubbacasabhāvo’’tiādi. Vattuṃ asakkuṇeyyoti kismiñci vuccamāne asahanato ovadituṃ asakkuṇeyyo. Uddisīyatīti uddeso, pātimokkho, tasmiṃ pariyāpannā antogadhā uddesapariyāpannā, tesu uddesapariyāpannesu. Tenāha ‘‘uddese’’tiādi. Atha sabbāneva sikkhāpadāni kathaṃ pātimokkhuddesapariyāpannānīti āha ‘‘yassa siyā āpatti, so ‘āvikareyyā’ti evaṃ saṅgahitattā’’ti. ‘‘Yassa siyā āpattī’’ti iminā sabbāpi āpattiyo nidānuddese saṅgahitā eva honti. Sikkhāpadesūti adhisīlasikkhāya adhigamūpāyabhūtesu vinayapaññattīsūti attho. So pana pākaṭoyevāti aṭṭhakathāyaṃ na vutto. Pañcahi sahadhammikehīti bhikkhubhikkhunisāmaṇerasāmaṇerisikkhamānāhi. Sikkhitabbattāti labbhamānavasena sikkhitabbattā. Tathā hi tehi yathāsakaṃ sikkhā sikkhīyati, na sabbā. Buddhapaññattenāti buddhena ṭhapitena, vihitenāti attho. Atha vā sahadhammikena sakāraṇena vuccamānoti evamettha attho daṭṭhabbo. Vacanāyāti nissakke sampadānavacananti āha ‘‘tato mama vacanato’’ti.
д̣̇уб̣б̣ажасигкаабад̣̇аван̣н̣анаа нидтид̇аа.
Dubbacasikkhāpadavaṇṇanā niṭṭhitā.
