| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
၁၂. ဒုဗ္ဗစသိက္ခာပဒဝဏ္ဏနာ
12. Dubbacasikkhāpadavaṇṇanā
၄၂၄. ဒ္ဝာဒသမေ ဝမ္ဘနဝစနန္တိ ဂရဟဝစနံ။ သဋ-သဒ္ဒော ပတိတသဒ္ဒေန သမာနတ္ထော, တသ္သ စ ဝိသေသနသ္သ ပရနိပာတောတိ အာဟ ‘‘တတ္ထ တတ္ထ ပတိတံ တိဏကဋ္ဌပဏ္ဏ’’န္တိ။ ကေနာပီတိ ဝာတာဒိသဒိသေန ဥပဇ္ဈာယာဒိနာ။
424. Dvādasame vambhanavacananti garahavacanaṃ. Saṭa-saddo patitasaddena samānattho, tassa ca visesanassa paranipātoti āha ‘‘tattha tattha patitaṃ tiṇakaṭṭhapaṇṇa’’nti. Kenāpīti vātādisadisena upajjhāyādinā.
၄၂၆. စိတ္တပရိယောနာဟော ဒဠ္ဟကောဓောဝ ဥပနာဟော။ တတောပိ ဗလဝတရော ဒုမ္မောစနီယော ကောဓာဘိသင္ဂော။ စောဒကံ ပဋိပ္ဖရဏတာတိ စောဒကသ္သ ပဋိဝိရုဒ္ဓော ဟုတ္ဝာ အဝဋ္ဌာနံ။ စောဒကံ အပသာဒနာတိ ဝာစာယ ဃဋ္ဋနာ။ ပစ္စာရောပနာတိ ‘‘တ္ဝမ္ပိ သာပတ္တိကော’’တိ စောဒကသ္သ အာပတ္တိအာရောပနာ။ ပဋိစရဏတာတိ ပဋိစ္ဆာဒနတာ။ အပဒာနေနာတိ အတ္တနော စရိယာယ။ န သမ္ပာယနတာတိ ‘‘ယံ တ္ဝံ စောဒကော ဝဒေသိ ‘မယာ ဧသ အာပတ္တိံ အာပန္နော ဒိဋ္ဌော’တိ, တ္ဝံ တသ္မိံ သမယေ ကိံ ကရောသိ, အယံ ကိံ ကရောတိ, ကတ္ထ စ တ္ဝံ အဟောသိ, ကတ္ထ အယ’’န္တိအာဒိနာ နယေန စရိယံ ပုဋ္ဌေန သမ္ပာဒေတ္ဝာ အကထနံ။
426. Cittapariyonāho daḷhakodhova upanāho. Tatopi balavataro dummocanīyo kodhābhisaṅgo. Codakaṃ paṭippharaṇatāti codakassa paṭiviruddho hutvā avaṭṭhānaṃ. Codakaṃ apasādanāti vācāya ghaṭṭanā. Paccāropanāti ‘‘tvampi sāpattiko’’ti codakassa āpattiāropanā. Paṭicaraṇatāti paṭicchādanatā. Apadānenāti attano cariyāya. Na sampāyanatāti ‘‘yaṃ tvaṃ codako vadesi ‘mayā esa āpattiṃ āpanno diṭṭho’ti, tvaṃ tasmiṃ samaye kiṃ karosi, ayaṃ kiṃ karoti, kattha ca tvaṃ ahosi, kattha aya’’ntiādinā nayena cariyaṃ puṭṭhena sampādetvā akathanaṃ.
‘‘ယသ္သ သိယာ အာပတ္တီ’’တိ (မဟာဝ. ၁၃၄) ဣမိနာ နိဒာနဝစနေန သဗ္ဗာပိ အာပတ္တိယော သင္ဂဟိတာတိ အာဟ ‘‘ယသ္သ သိယာ’’တိအာဒိ။ အင္ဂာနိ စေတ္ထ ပဌမသင္ဃဘေဒသဒိသာနိ, အယံ ပန ဝိသေသော ယထာ တတ္ထ ဘေဒာယ ပရက္ကမနံ, ဣဓ အဝစနီယကရဏတာ ဒဋ္ဌဗ္ဗာ။
‘‘Yassa siyā āpattī’’ti (mahāva. 134) iminā nidānavacanena sabbāpi āpattiyo saṅgahitāti āha ‘‘yassa siyā’’tiādi. Aṅgāni cettha paṭhamasaṅghabhedasadisāni, ayaṃ pana viseso yathā tattha bhedāya parakkamanaṃ, idha avacanīyakaraṇatā daṭṭhabbā.
ဒုဗ္ဗစသိက္ခာပဒဝဏ္ဏနာ နိဋ္ဌိတာ။
Dubbacasikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၁၂. ဒုဗ္ဗစသိက္ခာပဒံ • 12. Dubbacasikkhāpadaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၁၂. ဒုဗ္ဗစသိက္ခာပဒဝဏ္ဏနာ • 12. Dubbacasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၁၂. ဒုဗ္ဗစသိက္ခာပဒဝဏ္ဏနာ • 12. Dubbacasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၁၂. ဒုဗ္ဗစသိက္ခာပဒဝဏ္ဏနာ • 12. Dubbacasikkhāpadavaṇṇanā
