| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
11. து³ப்³ப³லஸிக்கா²பத³வண்ணனா
11. Dubbalasikkhāpadavaṇṇanā
யதா²ஸந்து²தந்தி யதா²மித்தங். தேனாஹ ‘‘யோ யோ’’தி ஆதி³. தத்த² மித்தஸந்தி³ட்ட²ஸம்ப⁴த்தவஸேனாதி மித்தஸந்தி³ட்ட²ஸம்ப⁴த்தானங் வஸேன. தத்த² மித்தா மித்தாவ. ஸந்தி³ட்டா² தத்த² தத்த² ஸங்க³ம்ம தி³ட்ட²மத்தா நாதித³ள்ஹமித்தா. ஸம்ப⁴த்தா ஸுட்டு² ப⁴த்தா ஸினேஹவந்தோ த³ள்ஹமித்தாதி த³ட்ட²ப்³பா³.
Yathāsanthutanti yathāmittaṃ. Tenāha ‘‘yo yo’’ti ādi. Tattha mittasandiṭṭhasambhattavasenāti mittasandiṭṭhasambhattānaṃ vasena. Tattha mittā mittāva. Sandiṭṭhā tattha tattha saṅgamma diṭṭhamattā nātidaḷhamittā. Sambhattā suṭṭhu bhattā sinehavanto daḷhamittāti daṭṭhabbā.
பஞ்ச க³ருப⁴ண்டா³னீதி ராஸிவஸேன பஞ்ச க³ருப⁴ண்டா³னி, ஸரூபவஸேன பனேதானி ப³ஹூனி ஹொந்தி. தேனாஹ ‘‘ராஸிவஸேன பஞ்ச க³ருப⁴ண்டா³னி வுத்தானீ’’தி. ஆராமோ (சூளவ॰ அட்ட²॰ 321; வி॰ ஸங்க³॰ அட்ட²॰ 227) நாம புப்பா²ராமோ வா ப²லாராமோ வா. ஆராமவத்து² நாம தேஸங்யேவ ஆராமானங் அத்தா²ய பரிச்சி²ந்தி³த்வா ட²பிதோகாஸோ, தேஸு வா ஆராமேஸு வினட்டே²ஸு தேஸங் போராணகபூ⁴மிபா⁴கோ³ . விஹாரோ நாம யங் கிஞ்சி பாஸாதா³தி³ஸேனாஸனங். விஹாரவத்து² நாம தஸ்ஸ பதிட்டா²னோகாஸோ. மஞ்சோ நாம மஸாரகோ பு³ந்தி³காப³த்³தோ⁴, குளீரபாத³கோ, ஆஹச்சபாத³கோதி இமேஸங் புப்³பே³ வுத்தானங் சதுன்னங் மஞ்சானங் அஞ்ஞதரோ. பீட²ங் நாம மஸாரகாதீ³னங்யேவ சதுன்னங் பீடா²னங் அஞ்ஞதரங். பி⁴ஸி நாம உண்ணபி⁴ஸிஆதீ³னங் பஞ்சன்னங் பி⁴ஸீனங் அஞ்ஞதரா. பி³ப்³போ³ஹனங் நாம ருக்க²தூலலதாதூலபோடகிதூலானங் அஞ்ஞதரேன புண்ணங். லோஹகும்பீ⁴ நாம காளலோஹேன வா தம்ப³லோஹேன வா யேன கேனசி லோஹேன கதா கும்பீ⁴. லோஹபா⁴ணகாதீ³ஸுபி ஏஸேவ நயோ. எத்த² பன பா⁴ணகந்தி அரஞ்ஜரோ வுச்சதி. வாரகோதி க⁴டோ. கடாஹங் கடாஹமேவ. வாஸிஆதீ³ஸு, வல்லிஆதீ³ஸு ச து³விஞ்ஞெய்யங் நாம நத்தி². ஏவங் –
Pañca garubhaṇḍānīti rāsivasena pañca garubhaṇḍāni, sarūpavasena panetāni bahūni honti. Tenāha ‘‘rāsivasena pañca garubhaṇḍāni vuttānī’’ti. Ārāmo (cūḷava. aṭṭha. 321; vi. saṅga. aṭṭha. 227) nāma pupphārāmo vā phalārāmo vā. Ārāmavatthu nāma tesaṃyeva ārāmānaṃ atthāya paricchinditvā ṭhapitokāso, tesu vā ārāmesu vinaṭṭhesu tesaṃ porāṇakabhūmibhāgo . Vihāro nāma yaṃ kiñci pāsādādisenāsanaṃ. Vihāravatthu nāma tassa patiṭṭhānokāso. Mañco nāma masārako bundikābaddho, kuḷīrapādako, āhaccapādakoti imesaṃ pubbe vuttānaṃ catunnaṃ mañcānaṃ aññataro. Pīṭhaṃ nāma masārakādīnaṃyeva catunnaṃ pīṭhānaṃ aññataraṃ. Bhisi nāma uṇṇabhisiādīnaṃ pañcannaṃ bhisīnaṃ aññatarā. Bibbohanaṃ nāma rukkhatūlalatātūlapoṭakitūlānaṃ aññatarena puṇṇaṃ. Lohakumbhī nāma kāḷalohena vā tambalohena vā yena kenaci lohena katā kumbhī. Lohabhāṇakādīsupi eseva nayo. Ettha pana bhāṇakanti arañjaro vuccati. Vārakoti ghaṭo. Kaṭāhaṃ kaṭāhameva. Vāsiādīsu, valliādīsu ca duviññeyyaṃ nāma natthi. Evaṃ –
த்³விஸங்க³ஹானி த்³வே ஹொந்தி, ததியங் சதுஸங்க³ஹங்;
Dvisaṅgahāni dve honti, tatiyaṃ catusaṅgahaṃ;
சதுத்த²ங் நவகொட்டா²ஸங், பஞ்சமங் அட்ட²பே⁴த³னங்.
Catutthaṃ navakoṭṭhāsaṃ, pañcamaṃ aṭṭhabhedanaṃ.
இதி பஞ்சஹி ராஸீஹி, பஞ்சனிம்மலலோசனோ;
Iti pañcahi rāsīhi, pañcanimmalalocano;
பஞ்சவீஸவித⁴ங் நாதோ², க³ருப⁴ண்ட³ங் பகாஸயி. (சூளவ॰ அட்ட²॰ 321; வி॰ ஸங்க³॰ அட்ட²॰ 227);
Pañcavīsavidhaṃ nātho, garubhaṇḍaṃ pakāsayi. (cūḷava. aṭṭha. 321; vi. saṅga. aṭṭha. 227);
விஸ்ஸஜ்ஜேதுங் வா விப⁴ஜிதுங் வா ந வட்டதீதி மூலச்சே²ஜ்ஜவஸேன விஸ்ஸஜ்ஜேதுங் வா விப⁴ஜிதுங் வா ந வட்டந்தி. பரிவத்தனவஸேன பன விஸ்ஸஜ்ஜந்தஸ்ஸ, விப⁴ஜந்தஸ்ஸ ச அனாபத்தி. தேனாஹ ‘‘தா²வரேனா’’திஆதி³. தத்த² தா²வரேன தா²வரந்தி ஆராமஆராமவத்து²விஹாரவிஹாரவத்து²னா ஆராமங் ஆராமவத்து²ங் விஹாரங் விஹாரவத்து²ங். இதரேனாதி அதா²வரேன, பச்சி²மராஸித்தயேனாதி வுத்தங் ஹோதி. அகப்பியேனாதி ஸுவண்ணமயமஞ்சாதி³னா சேவ அகப்பியபி⁴ஸிபி³ப்³போ³ஹனேஹி ச. மஹக்³க⁴கப்பியேனாதி த³ந்தமயமஞ்சாதி³னா சேவ பாவாராதி³னா ச. இதரந்தி அதா²வரங். கப்பியபரிவத்தனேன பரிவத்தேதுந்தி யதா² அகப்பியங் ந ஹோதி, ஏவங் பரிவத்தேதுங்.
Vissajjetuṃ vā vibhajituṃ vā na vaṭṭatīti mūlacchejjavasena vissajjetuṃ vā vibhajituṃ vā na vaṭṭanti. Parivattanavasena pana vissajjantassa, vibhajantassa ca anāpatti. Tenāha ‘‘thāvarenā’’tiādi. Tattha thāvarena thāvaranti ārāmaārāmavatthuvihāravihāravatthunā ārāmaṃ ārāmavatthuṃ vihāraṃ vihāravatthuṃ. Itarenāti athāvarena, pacchimarāsittayenāti vuttaṃ hoti. Akappiyenāti suvaṇṇamayamañcādinā ceva akappiyabhisibibbohanehi ca. Mahagghakappiyenāti dantamayamañcādinā ceva pāvārādinā ca. Itaranti athāvaraṃ. Kappiyaparivattanena parivattetunti yathā akappiyaṃ na hoti, evaṃ parivattetuṃ.
தத்ராயங் பரிவத்தனநயோ (சூளவ॰ அட்ட²॰ 321; வி॰ ஸங்க³॰ அட்ட²॰ 228) – ஸங்க⁴ஸ்ஸ நாளிகேராராமோ தூ³ரே ஹோதி, கப்பியகாரகாவ ப³ஹுதரங் கா²த³ந்தி, யம்பி ந கா²த³ந்தி, ததோ ஸகடவேதனங் த³த்வா அப்பமேவ ஆஹரந்தி. அஞ்ஞேஸங் பன தஸ்ஸாராமஸ்ஸ அவிதூ³ரே கா³மவாஸீனங் மனுஸ்ஸானங் விஹாரஸ்ஸ ஸமீபே ஆராமோ ஹோதி, தே ஸங்க⁴ங் உபஸங்கமித்வா ஸகேன ஆராமேன தங் ஆராமங் யாசந்தி, ஸங்கே⁴ன ‘‘ருச்சதி ஸங்க⁴ஸ்ஸா’’தி அபலோகெத்வா ஸம்படிச்சி²தப்³போ³. ஸசேபி பி⁴க்கூ²னங் ருக்க²ஸஹஸ்ஸங் ஹோதி, மனுஸ்ஸானங் பஞ்சஸதானி, ‘‘தும்ஹாகங் ஆராமோ கு²த்³த³கோ’’தி ந வத்தப்³ப³ங். கிஞ்சாபி அயங் கு²த்³த³கோ, அத² கோ² இதரதோ ப³ஹுதரங் ஆயங் தே³தி. ஸசேபி ஸமகமேவ தே³தி , ஏவம்பி இச்சி²திச்சி²தக்க²ணே பரிபு⁴ஞ்ஜிதுங் ஸக்காதி க³ஹேதப்³ப³மேவ. ஸசே பன மனுஸ்ஸானங் ப³ஹுதரா ருக்கா² ஹொந்தி, ‘‘நனு தும்ஹாகங் ப³ஹுதரா ருக்கா²’’தி வத்தப்³ப³ங். ஸசே ‘‘அதிரேகங் அம்ஹாகங் புஞ்ஞங் ஹோது, ஸங்க⁴ஸ்ஸ தே³மா’’தி வத³ந்தி, ஜானாபெத்வா ஸம்படிச்சி²துங் வட்டதி. பி⁴க்கூ²னங் ருக்கா² ப²லதா⁴ரினோ, மனுஸ்ஸானங் ருக்கா² ந தாவ ப²லங் க³ண்ஹந்தி. கிஞ்சாபி ந க³ண்ஹந்தி, ந சிரேன க³ண்ஹிஸ்ஸந்தீதி ஸம்படிச்சி²தப்³ப³மேவ. மனுஸ்ஸானங் ருக்கா² ப²லதா⁴ரினோ, பி⁴க்கூ²னங் ருக்கா² ந தாவ ப²லங் க³ண்ஹந்தி, ‘‘நனு தும்ஹாகங் ருக்கா² ப²லதா⁴ரினோ’’தி வத்தப்³ப³ங். ஸசே ‘‘க³ண்ஹத², ப⁴ந்தே, அம்ஹாகங் புஞ்ஞங் ப⁴விஸ்ஸதீ’’தி தெ³ந்தி, ஜானாபெத்வா ஸம்படிச்சி²துங் வட்டதி. ஏவங் ஆராமேன ஆராமோ பரிவத்தேதப்³போ³, ஏதேனேவ நயேன ஆராமவத்து²பி விஹாரோபி விஹாரவத்து²பி ஆராமேன பரிவத்தேதப்³ப³ங். ஆராமவத்து²னா ச மஹந்தேன வா கு²த்³த³கேன வா ஆராமங் ஆராமவத்து²ங் விஹாரங் விஹாரவத்து²ந்தி.
Tatrāyaṃ parivattananayo (cūḷava. aṭṭha. 321; vi. saṅga. aṭṭha. 228) – saṅghassa nāḷikerārāmo dūre hoti, kappiyakārakāva bahutaraṃ khādanti, yampi na khādanti, tato sakaṭavetanaṃ datvā appameva āharanti. Aññesaṃ pana tassārāmassa avidūre gāmavāsīnaṃ manussānaṃ vihārassa samīpe ārāmo hoti, te saṅghaṃ upasaṅkamitvā sakena ārāmena taṃ ārāmaṃ yācanti, saṅghena ‘‘ruccati saṅghassā’’ti apaloketvā sampaṭicchitabbo. Sacepi bhikkhūnaṃ rukkhasahassaṃ hoti, manussānaṃ pañcasatāni, ‘‘tumhākaṃ ārāmo khuddako’’ti na vattabbaṃ. Kiñcāpi ayaṃ khuddako, atha kho itarato bahutaraṃ āyaṃ deti. Sacepi samakameva deti , evampi icchiticchitakkhaṇe paribhuñjituṃ sakkāti gahetabbameva. Sace pana manussānaṃ bahutarā rukkhā honti, ‘‘nanu tumhākaṃ bahutarā rukkhā’’ti vattabbaṃ. Sace ‘‘atirekaṃ amhākaṃ puññaṃ hotu, saṅghassa demā’’ti vadanti, jānāpetvā sampaṭicchituṃ vaṭṭati. Bhikkhūnaṃ rukkhā phaladhārino, manussānaṃ rukkhā na tāva phalaṃ gaṇhanti. Kiñcāpi na gaṇhanti, na cirena gaṇhissantīti sampaṭicchitabbameva. Manussānaṃ rukkhā phaladhārino, bhikkhūnaṃ rukkhā na tāva phalaṃ gaṇhanti, ‘‘nanu tumhākaṃ rukkhā phaladhārino’’ti vattabbaṃ. Sace ‘‘gaṇhatha, bhante, amhākaṃ puññaṃ bhavissatī’’ti denti, jānāpetvā sampaṭicchituṃ vaṭṭati. Evaṃ ārāmena ārāmo parivattetabbo, eteneva nayena ārāmavatthupi vihāropi vihāravatthupi ārāmena parivattetabbaṃ. Ārāmavatthunā ca mahantena vā khuddakena vā ārāmaṃ ārāmavatthuṃ vihāraṃ vihāravatthunti.
கத²ங் விஹாரேன (சூளவ॰ அட்ட²॰ 321; வி॰ ஸங்க³॰ அட்ட²॰ 228) விஹாரோ பரிவத்தேதப்³போ³? ஸங்க⁴ஸ்ஸ அந்தோகா³மே கே³ஹங் ஹோதி, மனுஸ்ஸானங் விஹாரமஜ்ஜே² பாஸாதோ³, உபோ⁴பி அக்³கே⁴ன ஸமகா. ஸசே மனுஸ்ஸா தேன பாஸாதே³ன தங் கே³ஹங் யாசந்தி, ஸம்படிச்சி²துங் வட்டதி. பி⁴க்கூ²னங் சே மஹக்³க⁴தரங் கே³ஹங் ஹோதி, ‘‘மஹக்³க⁴தரங் அம்ஹாகங் கே³ஹ’’ந்தி வுத்தே ‘‘கிஞ்சாபி மஹக்³க⁴தரங் பப்³ப³ஜிதானங் அஸாருப்பங், ந ஸக்கா தத்த² பப்³ப³ஜிதேஹி வஸிதுங், இத³ங் பன ஸாருப்பங், க³ண்ஹதா²’’தி வத³ந்தி, ஏவம்பி ஸம்படிச்சி²துங் வட்டதி. ஸசே பன மனுஸ்ஸானங் மஹக்³க⁴ங் ஹோதி ‘‘நனு தும்ஹாகங் கே³ஹங் மஹக்³க⁴’’ந்தி வத்தப்³ப³ங். ‘‘ஹோது, ப⁴ந்தே, அம்ஹாகங் புஞ்ஞங் ப⁴விஸ்ஸதி, க³ண்ஹதா²’’தி வுத்தே பன ஸம்படிச்சி²துங் வட்டதி. ஏவங் விஹாரேன விஹாரோ பரிவத்தேதப்³போ³. ஏதேனேவ நயேன விஹாரவத்து²பி ஆராமோபி ஆராமவத்து²பி விஹாரேன பரிவத்தேதப்³ப³ங். விஹாரவத்து²னா ச மஹக்³கே⁴ன வா அப்பக்³கே⁴ன வா விஹாரங் விஹாரவத்து²ங் ஆராமங் ஆராமவத்து²ங். ஏவங் தாவ தா²வரேன தா²வரபரிவத்தனங் வேதி³தப்³ப³ங்.
Kathaṃ vihārena (cūḷava. aṭṭha. 321; vi. saṅga. aṭṭha. 228) vihāro parivattetabbo? Saṅghassa antogāme gehaṃ hoti, manussānaṃ vihāramajjhe pāsādo, ubhopi agghena samakā. Sace manussā tena pāsādena taṃ gehaṃ yācanti, sampaṭicchituṃ vaṭṭati. Bhikkhūnaṃ ce mahagghataraṃ gehaṃ hoti, ‘‘mahagghataraṃ amhākaṃ geha’’nti vutte ‘‘kiñcāpi mahagghataraṃ pabbajitānaṃ asāruppaṃ, na sakkā tattha pabbajitehi vasituṃ, idaṃ pana sāruppaṃ, gaṇhathā’’ti vadanti, evampi sampaṭicchituṃ vaṭṭati. Sace pana manussānaṃ mahagghaṃ hoti ‘‘nanu tumhākaṃ gehaṃ mahaggha’’nti vattabbaṃ. ‘‘Hotu, bhante, amhākaṃ puññaṃ bhavissati, gaṇhathā’’ti vutte pana sampaṭicchituṃ vaṭṭati. Evaṃ vihārena vihāro parivattetabbo. Eteneva nayena vihāravatthupi ārāmopi ārāmavatthupi vihārena parivattetabbaṃ. Vihāravatthunā ca mahagghena vā appagghena vā vihāraṃ vihāravatthuṃ ārāmaṃ ārāmavatthuṃ. Evaṃ tāva thāvarena thāvaraparivattanaṃ veditabbaṃ.
இதரேன இதரபரிவத்தனே பன மஞ்சபீட²ங் மஹந்தங் வா ஹோது, கு²த்³த³கங் வா (சூளவ॰ அட்ட²॰ 321; வி॰ ஸங்க³॰ அட்ட²॰ 228), அந்தமஸோ சதுரங்கு³லபாத³கங் கா³மதா³ரகேஹி பங்ஸ்வாகா³ரகேஸு கீளந்தேஹி கதம்பி ஸங்க⁴ஸ்ஸ தி³ன்னகாலதோ பட்டா²ய க³ருப⁴ண்ட³ங் ஹோதி. ஸசேபி ராஜா வா ராஜமஹாமத்தாத³யோ வா ஏகப்பஹாரேனேவ மஞ்சஸதங் வா மஞ்சஸஹஸ்ஸங் வா தெ³ந்தி, ஸப்³பே³ கப்பியமஞ்சா ஸம்படிச்சி²தப்³பா³, ஸம்படிச்சி²த்வா வுட்³ட⁴ப்படிபாடியா ‘‘ஸங்கி⁴கபரிபோ⁴கே³ன பரிபு⁴ஞ்ஜதா²’’தி தா³தப்³பா³, ந புக்³க³லிகபரிபோ⁴கே³ன தா³தப்³பா³. அதிரேகமஞ்சே ப⁴ண்டா³கா³ராதீ³ஸு பஞ்ஞபெத்வா பத்தசீவரங் நிக்கி²பித்வா பரிபு⁴ஞ்ஜிதும்பி வட்டதி. ப³ஹிஸீமாய ‘‘ஸங்க⁴ஸ்ஸ தே³மா’’தி தி³ன்னமஞ்சோ ஸங்க⁴த்தே²ரஸ்ஸ வஸனட்டா²னே தா³தப்³போ³. தத்த² சே ப³ஹூ மஞ்சா ஹொந்தி, மஞ்சேன கம்மங் நத்தி². யஸ்ஸ வஸனட்டா²னே கம்மங் அத்தி², தத்த² ‘‘ஸங்கி⁴கபரிபோ⁴கே³ன பரிபு⁴ஞ்ஜதா²’’தி தா³தப்³போ³, ந புக்³க³லிகபோ⁴கே³ன. மஹக்³கே⁴ன ஸதக்³க⁴னகேன வா ஸஹஸ்ஸக்³க⁴னகேன வா மஞ்சேன அஞ்ஞங் மஞ்சஸதங் லப⁴தி, பரிவத்தெத்வா க³ஹேதப்³ப³ங். ந கேவலங் மஞ்சேன மஞ்சோயேவ, ஆராமஆராமவத்து²விஹாரவிஹாரவத்து²பீட²பி⁴ஸிபி³ப்³போ³ஹனானிபி பரிவத்தேதுங் வட்டதி. ஏஸேவ நயோ பீட²பி⁴ஸிபி³ப்³போ³ஹனேஸுபி. வரஸேனாஸனாதீ³னங் ஸங்ரக்க²ணத்த²ந்தி ஸசே து³ப்³பி⁴க்க²ங் ஹோதி, பி⁴க்கூ² பிண்ட³பாதேன ந யாபெந்தி, எத்த² ராஜரோக³சோரப⁴யானி, அஞ்ஞத்த² க³ச்ச²ந்தானங் விஹாரா பலுஜ்ஜந்தி, தாலனாளிகேராதி³கே வினாஸெந்தி, ஸேனாஸனபச்சயங் ஸந்தா⁴ய யாபேதுங் ஸக்கா ஹோதி, ஏவரூபே காலே வரஸேனாஸனாதீ³னங் ஸங்ரக்க²ணத்த²ங். லாமகானி விஸ்ஸஜ்ஜேதுந்தி லாமகங் லாமகங் விஸ்ஸஜ்ஜேதுங், லாமககோடியா விஸ்ஸஜ்ஜேதுந்தி அதி⁴ப்பாயோ. விஸ்ஸஜ்ஜெத்வா பரிபு⁴ஞ்ஜிதுங் வட்டதீதி விஸ்ஸஜ்ஜெத்வா ததோ லத்³த⁴யாகு³ப⁴த்தசீவராதீ³னி பரிபு⁴ஞ்ஜிதுங் வட்டதி. காளலோஹதம்ப³லோஹகங்ஸலோஹவட்டலோஹானந்தி எத்த² கங்ஸலோஹங், வட்டலோஹஞ்ச கித்திமலோஹங். தீணி ஹி கித்திமலோஹானி கங்ஸலோஹங், வட்டலோஹங், ஆரகூடந்தி. தத்த² திபுதம்பே³ மிஸ்ஸெத்வா கதங் கங்ஸலோஹங், ஸீததம்பே³ மிஸ்ஸெத்வா கதங் வட்டலோஹங், ரஸகதம்பே³ மிஸ்ஸெத்வா கதங் ஆரகூடங். தேன வுத்தங் ‘‘கங்ஸலோஹங், வட்டலோஹஞ்ச கித்திமலோஹ’’ந்தி. ததோ அதிரேகந்தி ததோ அதிரேகக்³க³ண்ஹனகோ.
Itarena itaraparivattane pana mañcapīṭhaṃ mahantaṃ vā hotu, khuddakaṃ vā (cūḷava. aṭṭha. 321; vi. saṅga. aṭṭha. 228), antamaso caturaṅgulapādakaṃ gāmadārakehi paṃsvāgārakesu kīḷantehi katampi saṅghassa dinnakālato paṭṭhāya garubhaṇḍaṃ hoti. Sacepi rājā vā rājamahāmattādayo vā ekappahāreneva mañcasataṃ vā mañcasahassaṃ vā denti, sabbe kappiyamañcā sampaṭicchitabbā, sampaṭicchitvā vuḍḍhappaṭipāṭiyā ‘‘saṅghikaparibhogena paribhuñjathā’’ti dātabbā, na puggalikaparibhogena dātabbā. Atirekamañce bhaṇḍāgārādīsu paññapetvā pattacīvaraṃ nikkhipitvā paribhuñjitumpi vaṭṭati. Bahisīmāya ‘‘saṅghassa demā’’ti dinnamañco saṅghattherassa vasanaṭṭhāne dātabbo. Tattha ce bahū mañcā honti, mañcena kammaṃ natthi. Yassa vasanaṭṭhāne kammaṃ atthi, tattha ‘‘saṅghikaparibhogena paribhuñjathā’’ti dātabbo, na puggalikabhogena. Mahagghena satagghanakena vā sahassagghanakena vā mañcena aññaṃ mañcasataṃ labhati, parivattetvā gahetabbaṃ. Na kevalaṃ mañcena mañcoyeva, ārāmaārāmavatthuvihāravihāravatthupīṭhabhisibibbohanānipi parivattetuṃ vaṭṭati. Eseva nayo pīṭhabhisibibbohanesupi. Varasenāsanādīnaṃ saṃrakkhaṇatthanti sace dubbhikkhaṃ hoti, bhikkhū piṇḍapātena na yāpenti, ettha rājarogacorabhayāni, aññattha gacchantānaṃ vihārā palujjanti, tālanāḷikerādike vināsenti, senāsanapaccayaṃ sandhāya yāpetuṃ sakkā hoti, evarūpe kāle varasenāsanādīnaṃ saṃrakkhaṇatthaṃ. Lāmakāni vissajjetunti lāmakaṃ lāmakaṃ vissajjetuṃ, lāmakakoṭiyā vissajjetunti adhippāyo. Vissajjetvā paribhuñjituṃ vaṭṭatīti vissajjetvā tato laddhayāgubhattacīvarādīni paribhuñjituṃ vaṭṭati. Kāḷalohatambalohakaṃsalohavaṭṭalohānanti ettha kaṃsalohaṃ, vaṭṭalohañca kittimalohaṃ. Tīṇi hi kittimalohāni kaṃsalohaṃ, vaṭṭalohaṃ, ārakūṭanti. Tattha tiputambe missetvā kataṃ kaṃsalohaṃ, sītatambe missetvā kataṃ vaṭṭalohaṃ, rasakatambe missetvā kataṃ ārakūṭaṃ. Tena vuttaṃ ‘‘kaṃsalohaṃ, vaṭṭalohañca kittimaloha’’nti. Tato atirekanti tato atirekaggaṇhanako.
ஸரகோதி மஜ்ஜே² மகுளங் த³ஸ்ஸெத்வா முக²வட்டிவித்த²தங் கத்வா பிட்டி²தோ நாமெத்வா காதப்³ப³ங் ஏகங் பா⁴ஜனங். ‘‘ஸராவ’’ந்திபி வத³ந்தி. ஆதி³ஸத்³தே³ன கஞ்சனகாதீ³னங் கி³ஹிஉபகரணானங் க³ஹணங். தானி ஹி கு²த்³த³கானிபி க³ருப⁴ண்டா³னேவ கி³ஹிஉபகரணத்தாதி. பி-ஸத்³தே³ன பகே³வ மஹந்தானீதி த³ஸ்ஸேதி. இமானி பன பா⁴ஜனீயானி பி⁴க்கூ²பகரணத்தாதி அதி⁴ப்பாயோ. யதா² ச ஏதானி, ஏவங் குண்டி³காபி பா⁴ஜனீயா. வக்க²தி ஹி ‘‘யதா² ச மத்திகாப⁴ண்டே³, ஏவங் லோஹப⁴ண்டே³பி குண்டி³கா பா⁴ஜனீயகொட்டா²ஸமேவ ப⁴ஜதீ’’தி (கங்கா²॰ அட்ட²॰ து³ப்³ப³லஸிக்கா²பத³வண்ணனா). ஸங்கி⁴கபரிபோ⁴கே³னாதி ஆக³ந்துகானங் வுட்³ட⁴தரானங் த³த்வா பரிபோ⁴கே³ன. கி³ஹிவிகடாதி கி³ஹீஹி விகதா பஞ்ஞத்தா, அத்தனோ வா ஸந்தககரணேன விரூபங் கதா. புக்³க³லிகபரிபோ⁴கே³ன ந வட்டதீதி ஆக³ந்துகானங் அத³த்வா அத்தனோ ஸந்தகங் விய க³ஹெத்வா பரிஹரித்வா பரிபு⁴ஞ்ஜிதுங் ந வட்டதி. பிப்ப²லிகோதி கத்தரி. ஆரகண்டகங் ஸூசிவேத⁴கங். தாளங் யந்தங். கத்தரயட்டி²வேத⁴கோ கத்தரயட்டி²வலயங். யதா² ததா² க⁴னகதங் லோஹந்தி லோஹவட்டி லோஹகு³ளோ லோஹபிண்டி³ லோஹசக்கலிகந்தி ஏவங் க⁴னகதங் லோஹங். கீ²ரபாஸாணமயானீதி முது³ககீ²ரவண்ணபாஸாணமயானி.
Sarakoti majjhe makuḷaṃ dassetvā mukhavaṭṭivitthataṃ katvā piṭṭhito nāmetvā kātabbaṃ ekaṃ bhājanaṃ. ‘‘Sarāva’’ntipi vadanti. Ādisaddena kañcanakādīnaṃ gihiupakaraṇānaṃ gahaṇaṃ. Tāni hi khuddakānipi garubhaṇḍāneva gihiupakaraṇattāti. Pi-saddena pageva mahantānīti dasseti. Imāni pana bhājanīyāni bhikkhūpakaraṇattāti adhippāyo. Yathā ca etāni, evaṃ kuṇḍikāpi bhājanīyā. Vakkhati hi ‘‘yathā ca mattikābhaṇḍe, evaṃ lohabhaṇḍepi kuṇḍikā bhājanīyakoṭṭhāsameva bhajatī’’ti (kaṅkhā. aṭṭha. dubbalasikkhāpadavaṇṇanā). Saṅghikaparibhogenāti āgantukānaṃ vuḍḍhatarānaṃ datvā paribhogena. Gihivikaṭāti gihīhi vikatā paññattā, attano vā santakakaraṇena virūpaṃ katā. Puggalikaparibhogena na vaṭṭatīti āgantukānaṃ adatvā attano santakaṃ viya gahetvā pariharitvā paribhuñjituṃ na vaṭṭati. Pipphalikoti kattari. Ārakaṇṭakaṃ sūcivedhakaṃ. Tāḷaṃ yantaṃ. Kattarayaṭṭhivedhako kattarayaṭṭhivalayaṃ. Yathā tathā ghanakataṃ lohanti lohavaṭṭi lohaguḷo lohapiṇḍi lohacakkalikanti evaṃ ghanakataṃ lohaṃ. Khīrapāsāṇamayānīti mudukakhīravaṇṇapāsāṇamayāni.
கி³ஹிவிகடானிபி ந வட்டந்தி அனாமாஸத்தா. பி-ஸத்³தே³ன பகே³வ ஸங்கி⁴கபரிபோ⁴கே³ன வா புக்³க³லிகபரிபோ⁴கே³ன வாதி த³ஸ்ஸேதி. ஸேனாஸனபரிபோ⁴கோ³ பன ஸப்³ப³கப்பியோ. தஸ்மா ஜாதரூபாதி³மயா ஸப்³பே³பி ஸேனாஸனபரிக்கா²ரா ஆமாஸா. தேனாஹ ‘‘ஸேனாஸனபரிபோ⁴கே³ பனா’’திஆதி³.
Gihivikaṭānipi na vaṭṭanti anāmāsattā. Pi-saddena pageva saṅghikaparibhogena vā puggalikaparibhogena vāti dasseti. Senāsanaparibhogo pana sabbakappiyo. Tasmā jātarūpādimayā sabbepi senāsanaparikkhārā āmāsā. Tenāha ‘‘senāsanaparibhoge panā’’tiādi.
ஸேஸாதி ததோ மஹத்தரீ வாஸி. யா பனாதி யா குதா³ரீ பன. குதா³லோ அந்தமஸோ சதுரங்கு³லமத்தோபி க³ருப⁴ண்ட³மேவ. நிகா²த³னங் சதுரஸ்ஸமுக²ங் வா ஹோது, தோ³ணிமுக²ங் வா வங்கங் வா உஜுகங் வா, அந்தமஸோ ஸம்முஞ்ஜனித³ண்ட³கவேத⁴னம்பி த³ண்ட³ப³ந்த⁴ங் சே, க³ருப⁴ண்ட³மேவ. தேனாஹ ‘‘குதா³லோ த³ண்ட³ப³ந்த⁴னிகா²த³னங் வா அக³ருப⁴ண்ட³ங் நாம நத்தீ²’’தி. ஸிபாடிகா நாம கு²ரகோஸோ. ஸிக²ரங் பன த³ண்ட³ப³ந்த⁴னிகா²த³னங் அனுலோமேதீதி ஆஹ ‘‘ஸிக²ரம்பி நிகா²த³னேனேவ ஸங்க³ஹித’’ந்தி. ஸசே தம்பி பன அத³ண்ட³கங் ப²லமத்தங், பா⁴ஜனீயங். உபக்க²ரேதி வாஸிஆதி³ப⁴ண்டா³னி.
Sesāti tato mahattarī vāsi. Yā panāti yā kudārī pana. Kudālo antamaso caturaṅgulamattopi garubhaṇḍameva. Nikhādanaṃ caturassamukhaṃ vā hotu, doṇimukhaṃ vā vaṅkaṃ vā ujukaṃ vā, antamaso sammuñjanidaṇḍakavedhanampi daṇḍabandhaṃ ce, garubhaṇḍameva. Tenāha ‘‘kudālo daṇḍabandhanikhādanaṃ vā agarubhaṇḍaṃ nāma natthī’’ti. Sipāṭikā nāma khurakoso. Sikharaṃ pana daṇḍabandhanikhādanaṃ anulometīti āha ‘‘sikharampi nikhādaneneva saṅgahita’’nti. Sace tampi pana adaṇḍakaṃ phalamattaṃ, bhājanīyaṃ. Upakkhareti vāsiādibhaṇḍāni.
பத்தப³ந்த⁴கோ நாம பத்தஸ்ஸ க³ண்டி²காதி³காரகோ. ‘‘படிமாஸுவண்ணாதி³பத்தகாரகோ’’திபி வத³ந்தி. திபுச்சே²த³னகஸத்த²ங், ஸுவண்ணச்சே²த³னகஸத்த²ங், கதபரிகம்மசம்மச்சி²ந்த³னககு²த்³த³கஸத்த²ந்தி இமானி செத்த² தீணி பிப்ப²லிகங் அனுலோமெந்தீதி ஆஹ ‘‘அயங் பன விஸேஸோ’’திஆதி³. இதரானீதி மஹாகத்தரிஆதீ³னி.
Pattabandhako nāma pattassa gaṇṭhikādikārako. ‘‘Paṭimāsuvaṇṇādipattakārako’’tipi vadanti. Tipucchedanakasatthaṃ, suvaṇṇacchedanakasatthaṃ, kataparikammacammacchindanakakhuddakasatthanti imāni cettha tīṇi pipphalikaṃ anulomentīti āha ‘‘ayaṃ pana viseso’’tiādi. Itarānīti mahākattariādīni.
அட்³ட⁴பா³ஹுப்பமாணாதி (ஸாரத்த²॰ டீ॰ சூளவக்³க³ 3.321) கப்பரதோ பட்டா²ய யாவ அங்ஸகூடப்பமாணா, வித³த்தி²சதுரங்கு³லப்பமாணாதி வுத்தங் ஹோதி. தத்த²ஜாதகாதி ஸங்கி⁴கபூ⁴மியங் ஜாதா. ஆரக்க²ஸங்விதா⁴னேன ரக்கி²தத்தா ரக்கி²தா ச ஸா மஞ்ஜூஸாதீ³ஸு பக்கி²த்தங் விய யதா² தங் ந நஸ்ஸதி, ஏவங் கோ³பனதோ கோ³பிதா சாதி ரக்கி²தகோ³பிதா. தத்த²ஜாதகாபி பன அரக்கி²தா க³ருப⁴ண்ட³மேவ ந ஹோதி. ‘‘ஸங்க⁴கம்மே ச சேதியகம்மே ச கதே’’தி இமினா ஸங்க⁴ஸந்தகேன சேதியஸந்தகங் ரக்கி²துங், பரிவத்திதுஞ்ச வட்டதீதி தீ³பேதி. ஸுத்தங் பனாதி வட்டிதஞ்சேவ அவட்டிதஞ்ச ஸுத்தங்.
Aḍḍhabāhuppamāṇāti (sārattha. ṭī. cūḷavagga 3.321) kapparato paṭṭhāya yāva aṃsakūṭappamāṇā, vidatthicaturaṅgulappamāṇāti vuttaṃ hoti. Tatthajātakāti saṅghikabhūmiyaṃ jātā. Ārakkhasaṃvidhānena rakkhitattā rakkhitā ca sā mañjūsādīsu pakkhittaṃ viya yathā taṃ na nassati, evaṃ gopanato gopitā cāti rakkhitagopitā. Tatthajātakāpi pana arakkhitā garubhaṇḍameva na hoti. ‘‘Saṅghakamme ca cetiyakamme ca kate’’ti iminā saṅghasantakena cetiyasantakaṃ rakkhituṃ, parivattituñca vaṭṭatīti dīpeti. Suttaṃ panāti vaṭṭitañceva avaṭṭitañca suttaṃ.
அட்ட²ங்கு³லஸூசித³ண்ட³மத்தோதி அந்தமஸோ தீ³க⁴ஸோ அட்ட²ங்கு³லமத்தோ, பரிணாஹதோ ஸீஹளபண்ணஸூசித³ண்ட³மத்தோ. எத்தா²தி வேளுப⁴ண்டே³. த³ட்³ட⁴ங் கே³ஹங் யேஸங் தேதி த³ட்³ட⁴கே³ஹா. ந வாரேதப்³பா³தி ‘‘மா க³ண்ஹித்வா க³ச்ச²தா²’’தி ந நிஸேதே⁴தப்³பா³. தே³ஸந்தரக³தேன ஸம்பத்தவிஹாரே ஸங்கி⁴காவாஸே ட²பேதப்³பா³.
Aṭṭhaṅgulasūcidaṇḍamattoti antamaso dīghaso aṭṭhaṅgulamatto, pariṇāhato sīhaḷapaṇṇasūcidaṇḍamatto. Etthāti veḷubhaṇḍe. Daḍḍhaṃ gehaṃ yesaṃ teti daḍḍhagehā. Na vāretabbāti ‘‘mā gaṇhitvā gacchathā’’ti na nisedhetabbā. Desantaragatena sampattavihāre saṅghikāvāse ṭhapetabbā.
அவஸேஸஞ்ச ச²த³னதிணந்தி முஞ்ஜபப்³ப³ஜேஹி அவஸேஸங் யங் கிஞ்சி ச²த³னதிணங். யத்த² பன திணங் நத்தி², தத்த² பண்ணேஹி சா²தெ³ந்தி (சூளவ॰ அட்ட²॰ 321). தஸ்மா பண்ணம்பி திணேனேவ ஸங்க³ஹிதந்தி ஆஹ ‘‘ச²த³னதிணஸங்கே²பக³தேஸூ’’திஆதி³. அட்ட²ங்கு³லப்பமாணோபீதி வித்தா²ரதோ அட்ட²ங்கு³லப்பமாணோ. லிகி²தபொத்த²கோ பன க³ருப⁴ண்ட³ங் ந ஹோதி.
Avasesañca chadanatiṇanti muñjapabbajehi avasesaṃ yaṃ kiñci chadanatiṇaṃ. Yattha pana tiṇaṃ natthi, tattha paṇṇehi chādenti (cūḷava. aṭṭha. 321). Tasmā paṇṇampi tiṇeneva saṅgahitanti āha ‘‘chadanatiṇasaṅkhepagatesū’’tiādi. Aṭṭhaṅgulappamāṇopīti vitthārato aṭṭhaṅgulappamāṇo. Likhitapotthako pana garubhaṇḍaṃ na hoti.
வேளும்ஹி வுத்தப்பமாணோதி ‘‘அட்ட²ங்கு³லஸூசித³ண்ட³கமத்தோபீ’’தி வேளுப⁴ண்டே³ வுத்தப்பமாணோ. ஸங்க⁴ஸ்ஸ தி³ன்னோ வாதி தா³ருது³ல்லப⁴ட்டா²னே ஸங்க⁴ஸ்ஸ தி³ன்னோ வா. குருந்தி³யங் வுத்தக்கமேன தா³ருப⁴ண்ட³வினிச்ச²யங் வத்வா இதா³னி மஹாஅட்ட²கதா²யங் வுத்தக்கமேன வத்துங் ‘‘அபிசா’’திஆதி³மாஹ. ஆஸந்தி³காதீ³னீதி எத்த² ஆஸந்தி³கோதி சதுரஸ்ஸபீட²ங் வுச்சதி. ‘‘உச்சகம்பி ஆஸந்தி³க’’ந்தி வசனதோ ஏகதோபா⁴கே³ன தீ³க⁴பீட²மேவ ஹி அட்ட²ங்கு³லபாத³கங் வட்டதி. சதுரஸ்ஸாஸந்தி³கோ பன பமாணாதிக்கந்தோபி வட்ட²தீதி வேதி³தப்³போ³. ஆதி³ஸத்³தே³ன ‘‘ஸத்தங்கோ³, ப⁴த்³த³பீட²கங், ஏளகபாத³கபீட²ங், ஆமலகவட்டகபீட²ங், ப²லகங், கொச்ச²ங், பலாலபீட²க’’ந்தி (சூளவ॰ அட்ட²॰ 321) இமே ஸங்க³ண்ஹந்தீதி வேதி³தப்³ப³ங். தேனாஹ ‘‘அந்தமஸோ’’திஆதி³. பண்ணேஹி வாதி கத³லிபண்ணாதீ³ஹி வா. ப்³யக்³க⁴சம்மோனத்³த⁴ம்பி வாளரூபபரிக்கி²த்தங் ரதனபரிஸிப்³பி³தங் கொச்ச²கங் க³ருப⁴ண்ட³மேவ.
Veḷumhi vuttappamāṇoti ‘‘aṭṭhaṅgulasūcidaṇḍakamattopī’’ti veḷubhaṇḍe vuttappamāṇo. Saṅghassa dinno vāti dārudullabhaṭṭhāne saṅghassa dinno vā. Kurundiyaṃ vuttakkamena dārubhaṇḍavinicchayaṃ vatvā idāni mahāaṭṭhakathāyaṃ vuttakkamena vattuṃ ‘‘apicā’’tiādimāha. Āsandikādīnīti ettha āsandikoti caturassapīṭhaṃ vuccati. ‘‘Uccakampi āsandika’’nti vacanato ekatobhāgena dīghapīṭhameva hi aṭṭhaṅgulapādakaṃ vaṭṭati. Caturassāsandiko pana pamāṇātikkantopi vaṭṭhatīti veditabbo. Ādisaddena ‘‘sattaṅgo, bhaddapīṭhakaṃ, eḷakapādakapīṭhaṃ, āmalakavaṭṭakapīṭhaṃ, phalakaṃ, kocchaṃ, palālapīṭhaka’’nti (cūḷava. aṭṭha. 321) ime saṅgaṇhantīti veditabbaṃ. Tenāha ‘‘antamaso’’tiādi. Paṇṇehi vāti kadalipaṇṇādīhi vā. Byagghacammonaddhampi vāḷarūpaparikkhittaṃ ratanaparisibbitaṃ kocchakaṃ garubhaṇḍameva.
க⁴ட்டனப²லகங் நாம யத்த² ட²பெத்வா ரஜிதசீவரங் ஹத்தே²ன க⁴ட்டெந்தி. க⁴ட்டனமுக்³க³ரோ நாம அனுவாதாதி³க⁴ட்டனகோதி வத³ந்தி. த³ண்ட³முக்³க³ரோ நாம யேன ரஜிதசீவரங் போதெ²ந்தி. அம்ப³ணந்தி ப²லகேஹி பொக்க²ரணீ விய கதங் பானீயபா⁴ஜனங். ரஜனதோ³ணீதி பக்கரஜனங் ஆகிரித்வா ட²பனபா⁴ஜனங்.
Ghaṭṭanaphalakaṃ nāma yattha ṭhapetvā rajitacīvaraṃ hatthena ghaṭṭenti. Ghaṭṭanamuggaro nāma anuvātādighaṭṭanakoti vadanti. Daṇḍamuggaro nāma yena rajitacīvaraṃ pothenti. Ambaṇanti phalakehi pokkharaṇī viya kataṃ pānīyabhājanaṃ. Rajanadoṇīti pakkarajanaṃ ākiritvā ṭhapanabhājanaṃ.
அகப்பியசம்மந்தி ஸீஹாதீ³னங் சம்மங். ‘‘பூ⁴மத்த²ரணங் காதுங் வட்டதீ’’தி இத³ங் அகப்பியசம்மங் ஸந்தா⁴ய வுத்தங். ‘‘பச்சத்த²ரணக³திக’’ந்தி இமினா மஞ்சபீடே²பி அத்த²ரிதுங் வட்டதீதி தீ³பேதி. பாவாராதி³பச்சத்த²ரணம்பி க³ருப⁴ண்ட³ந்தி ஏகே. நோதி அபரே. வீமங்ஸித்வா க³ஹேதப்³ப³ங். கப்பியசம்மானீதி மிகா³தீ³னங் சம்மானி.
Akappiyacammanti sīhādīnaṃ cammaṃ. ‘‘Bhūmattharaṇaṃ kātuṃ vaṭṭatī’’ti idaṃ akappiyacammaṃ sandhāya vuttaṃ. ‘‘Paccattharaṇagatika’’nti iminā mañcapīṭhepi attharituṃ vaṭṭatīti dīpeti. Pāvārādipaccattharaṇampi garubhaṇḍanti eke. Noti apare. Vīmaṃsitvā gahetabbaṃ. Kappiyacammānīti migādīnaṃ cammāni.
ஸப்³ப³ங் சக்கயுத்தயானந்தி ரத²ஸகடாதி³கங் ஸப்³ப³சக்கயுத்தயானங். விஸங்க²ரிதசக்கங் பன யானங் பா⁴ஜனீயங். அனுஞ்ஞாதவாஸி நாம யா ஸிபாடிகாய பக்கி²பித்வா பரிஹரிதுங் ஸக்காதி வுத்தா. முட்டி²பண்ணந்தி தாலபத்தங். தஞ்ஹி முட்டி²னா க³ஹெத்வா பரிஹரந்தீதி ‘‘முட்டி²பண்ண’’ந்தி வுச்சதி. முட்டி²பண்ணந்தி ச²த்தச்ச²த³னபண்ணமேவாதி கேசி. அரணிஸஹிதந்தி அரணியுக³ளங், உத்தராரணீ, அத⁴ராரணீதி அரணித்³வயந்தி அத்தோ².
Sabbaṃ cakkayuttayānanti rathasakaṭādikaṃ sabbacakkayuttayānaṃ. Visaṅkharitacakkaṃ pana yānaṃ bhājanīyaṃ. Anuññātavāsi nāma yā sipāṭikāya pakkhipitvā pariharituṃ sakkāti vuttā. Muṭṭhipaṇṇanti tālapattaṃ. Tañhi muṭṭhinā gahetvā pariharantīti ‘‘muṭṭhipaṇṇa’’nti vuccati. Muṭṭhipaṇṇanti chattacchadanapaṇṇamevāti keci. Araṇisahitanti araṇiyugaḷaṃ, uttarāraṇī, adharāraṇīti araṇidvayanti attho.
பா²திகம்மங் கத்வாதி அந்தமஸோ தங்அக்³க⁴னகவாலிகாயபி தா²வரங் வட்³டி⁴கம்மங் கத்வா. பா²திகம்மங் அகத்வா க³ண்ஹந்தேன தத்தே²வ வலஞ்ஜேதப்³போ³. க³மனகாலே ஸங்கி⁴கே ஆவாஸே ட²பெத்வா க³ந்தப்³ப³ங். அஸதியா க³ஹெத்வா க³தேன பஹிணித்வா தா³தப்³போ³. தே³ஸந்தரக³தேன ஸம்பத்தவிஹாரே ஸங்கி⁴காவாஸே ட²பேதப்³போ³. எத்தா²தி மத்திகாப⁴ண்டே³. குண்டி³காதி அயோகுண்டி³கா சேவ தம்ப³லோஹகுண்டி³கா ச. பா⁴ஜனீயகொட்டா²ஸமேவ ப⁴ஜதீதி பா⁴ஜனீயபக்க²மேவ ஸேவதி, ந து க³ருப⁴ண்ட³ந்தி அத்தோ². கஞ்சனகோ பன க³ருப⁴ண்ட³மேவாதி அதி⁴ப்பாயோ. இதரந்தி க³ருப⁴ண்ட³ங்.
Phātikammaṃkatvāti antamaso taṃagghanakavālikāyapi thāvaraṃ vaḍḍhikammaṃ katvā. Phātikammaṃ akatvā gaṇhantena tattheva valañjetabbo. Gamanakāle saṅghike āvāse ṭhapetvā gantabbaṃ. Asatiyā gahetvā gatena pahiṇitvā dātabbo. Desantaragatena sampattavihāre saṅghikāvāse ṭhapetabbo. Etthāti mattikābhaṇḍe. Kuṇḍikāti ayokuṇḍikā ceva tambalohakuṇḍikā ca. Bhājanīyakoṭṭhāsameva bhajatīti bhājanīyapakkhameva sevati, na tu garubhaṇḍanti attho. Kañcanako pana garubhaṇḍamevāti adhippāyo. Itaranti garubhaṇḍaṃ.
து³ப்³ப³லஸிக்கா²பத³வண்ணனா நிட்டி²தா.
Dubbalasikkhāpadavaṇṇanā niṭṭhitā.
