| Library / Tipiṭaka / ติปิฎก • Tipiṭaka / กงฺขาวิตรณี-ปุราณ-ฎีกา • Kaṅkhāvitaraṇī-purāṇa-ṭīkā |
๑๑. ทุพฺพลสิกฺขาปทวณฺณนา
11. Dubbalasikkhāpadavaṇṇanā
อกปฺปิเยน วาติ สุวณฺณรชตมยมญฺจาทินาฯ กปฺปิยมโญฺจ สมฺปฎิจฺฉิตโพฺพติ ‘‘สงฺฆสฺส เทมา’’ติ ทินฺนํ สนฺธาย วุตฺตํ, เตหิ ปน ‘‘วิหารสฺส เทมา’’ติ วุเตฺต สุวณฺณรชตมยาทิอกปฺปิยมญฺจาปิ สมฺปฎิจฺฉิตพฺพาติ จ, ‘‘อรญฺชโร พหุอุทกคณฺหนโก’’ติ จ, ‘‘สงฺฆิกปอโภเคน วาติ สเจ อารามิกาทโย ปฎิสาเมตฺวา ปฎิเทนฺติ, ปริภุญฺชิตุํ วฎฺฎตี’’ติ จ, ‘‘กํสโลหาทิภาชนํ สงฺฆสฺส ทินฺนมฺปิ ปาริหาริยํ น วฎฺฎตี’’ติ (จูฬว. อฎฺฐ. ๓๒๑) สมนฺตปาสาทิกายํ วุตฺตตฺตา อตฺตโน หเตฺถน คเหตฺวา ปฎิสามิตุํ น ลภตีติ จ, ‘‘เวธโก กายพนฺธนสฺสาติ วทนฺตี’’ติ จ, ‘‘หิงฺคุ หิงฺคุลิหริตาลมโนสิลา อญฺชนานี’’ติ ปาโฐติ จ, ‘‘ทารุมโย วา…เป.… อปาทโกปิ สมุโคฺค’’ติ ปาโฐติ จ, ‘‘ทารุมโย ตุโมฺพติ ทารุมโย อุทกตุโมฺพ’’ติ จ, ‘‘ถมฺภตุลาโสปานผลกาทีสู’’ติ จ ลิขิตํฯ
Akappiyena vāti suvaṇṇarajatamayamañcādinā. Kappiyamañco sampaṭicchitabboti ‘‘saṅghassa demā’’ti dinnaṃ sandhāya vuttaṃ, tehi pana ‘‘vihārassa demā’’ti vutte suvaṇṇarajatamayādiakappiyamañcāpi sampaṭicchitabbāti ca, ‘‘arañjaro bahuudakagaṇhanako’’ti ca, ‘‘saṅghikapaabhogena vāti sace ārāmikādayo paṭisāmetvā paṭidenti, paribhuñjituṃ vaṭṭatī’’ti ca, ‘‘kaṃsalohādibhājanaṃ saṅghassa dinnampi pārihāriyaṃ na vaṭṭatī’’ti (cūḷava. aṭṭha. 321) samantapāsādikāyaṃ vuttattā attano hatthena gahetvā paṭisāmituṃ na labhatīti ca, ‘‘vedhako kāyabandhanassāti vadantī’’ti ca, ‘‘hiṅgu hiṅguliharitālamanosilā añjanānī’’ti pāṭhoti ca, ‘‘dārumayo vā…pe… apādakopi samuggo’’ti pāṭhoti ca, ‘‘dārumayo tumboti dārumayo udakatumbo’’ti ca, ‘‘thambhatulāsopānaphalakādīsū’’ti ca likhitaṃ.
ทุพฺพลสิกฺขาปทวณฺณนา นิฎฺฐิตาฯ
Dubbalasikkhāpadavaṇṇanā niṭṭhitā.
