8. து³ப்³ப³ண்ணகரணஸிக்கா²பத³ங்

368. அட்ட²மே அலபீ⁴தி லபோ⁴தி வசனத்தே² அபச்சயங் கத்வா ணபச்சயஸ்ஸ ஸ்வத்த²பா⁴வங் த³ஸ்ஸேதுங் வுத்தங் ‘‘லபோ⁴யேவ லாபோ⁴’’தி. அபச்சயமகத்வா பகதியா ணபச்சயோபி யுத்தோயேவாதி த³ட்ட²ப்³ப³ங். ஸத்³த³ந்தரோபி அத்த²ந்தராபா⁴வா ஸமாஸோ ஹோதீதி ஆஹ ‘‘நவசீவரலாபே⁴னாதி வத்தப்³பே³’’தி. அனுனாஸிகலோபந்தி ‘‘நவ’’ந்தி எத்த² நிக்³க³ஹீதஸ்ஸ வினாஸங். நிக்³க³ஹீதஞ்ஹி நாஸங் அனுக³தத்தா ‘‘அனுனாஸிக’’ந்தி வுச்சதி, தஸ்ஸ அத³ஸ்ஸன, மகத்வாதி அத்தோ². மஜ்ஜே² டி²தபத³த்³வயேதி ‘‘நவ’’ந்தி ச ‘‘சீவரலாபே⁴னா’’தி ச த்³வின்னங் பதா³னமந்தரே ‘‘டி²தே பனா’’தி ச ‘‘பி⁴க்கு²னா’’தி ச பத³த்³வயே. நித்³தா⁴ரணே சேதங் பு⁴ம்மவசனங். நிபாதோதி நிபாதமத்தங். அலபீ⁴தி லபோ⁴தி வசனத்த²ஸ்ஸ அபி⁴தெ⁴ய்யத்த²ங் த³ஸ்ஸேதுங் ‘‘பி⁴க்கு²னா’’தி வுத்தந்தி ஆஹ ‘‘பி⁴க்கு²னா’’திஆதி³. பத³பா⁴ஜனே பன வுத்தந்தி ஸம்ப³ந்தோ⁴. யந்தி யங் சீவரங். ‘‘சீவர’’ந்தி எத்த² சீவரஸரூபங் த³ஸ்ஸெந்தோ ஆஹ ‘‘யங் நிவாஸேதுங் வா’’திஆதி³. சம்மகாரனீலந்தி சம்மகாரானங் திப²லே பக்கி²த்தஸ்ஸ அயகூ³த²ஸ்ஸ நீலங். மஹாபச்சரியங் வுத்தந்தி ஸம்ப³ந்தோ⁴. து³ப்³ப³ண்ணோ கரீயதி அனேனாதி து³ப்³ப³ண்ணகரணங், கப்பபி³ந்து³ந்தி ஆஹ ‘‘கப்பபி³ந்து³ங் ஸந்தா⁴யா’’தி. ஆதி³யந்தேன பி⁴க்கு²னா ஆதா³தப்³ப³ந்தி ஸம்ப³ந்தோ⁴. கோணேஸூதி அந்தேஸு. வாஸத்³தோ³ அனியமவிகப்பத்தோ². அக்கி²மண்ட³லமத்தங் வாதி அக்கி²மண்ட³லஸ்ஸ பமாணங் வா கப்பபி³ந்தூ³தி ஸம்ப³ந்தோ⁴. பட்டே வாதி அனுவாதபட்டே வா. க³ண்டி²யங் வாதி க³ண்டி²கபட்டே வா. பாளிகப்போதி த்³வே வா திஸ்ஸோ வா ததோ அதி⁴கா வா பி³ந்து³ஆவலீ கத்வா கதோ கப்போ. கண்ணிககப்போதி கண்ணிகங் விய பி³ந்து³கொ³ச்ச²கங் கத்வா கதோ கப்போ. ஆதி³ஸத்³தே³ன அக்³கி⁴யகப்பாத³யோ ஸங்க³ண்ஹாதி. ஸப்³ப³த்தா²தி ஸப்³பா³ஸு அட்ட²கதா²ஸு. ஏகோபி பி³ந்து³ வட்டோயேவ வட்டதீதி ஆஹ ‘‘ஏகங் வட்டபி³ந்து³’’ந்தி.

371. அக்³க³ளாதீ³னீதி ஆதி³ஸத்³தே³ன அனுவாதபரிப⁴ண்டே³ ஸங்க³ண்ஹாதீதி. அட்ட²மங்.