| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
8. து³ப்³ப³ண்ணகரணஸிக்கா²பத³வண்ணனா
8. Dubbaṇṇakaraṇasikkhāpadavaṇṇanā
368-9. அட்ட²மே – நவங் பன பி⁴க்கு²னா சீவரலாபே⁴னாதி எத்த² அலபீ⁴தி லபோ⁴; லபோ⁴யேவ லாபோ⁴. கிங் அலபி⁴? சீவரங். கீதி³ஸங்? நவங். இதி ‘‘நவசீவரலாபே⁴னா’’தி வத்தப்³பே³ அனுனாஸிகலோபங் அகத்வா ‘‘நவசீவரலாபே⁴னா’’தி வுத்தங்; படிலத்³த⁴னவசீவரேனாதி அத்தோ². மஜ்ஜே² டி²தபத³த்³வயே பனாதி நிபாதோ. பி⁴க்கு²னாதி யேன லத்³த⁴ங் தஸ்ஸ நித³ஸ்ஸனங். பத³பா⁴ஜனே பன ப்³யஞ்ஜனங் அனாதி³யித்வா யங் லத்³த⁴ங் தங் த³ஸ்ஸேதுங் ‘‘சீவரங் நாம ச²ன்னங் சீவரான’’ந்திஆதி³ வுத்தங். சீவரந்தி எத்த² யங் நிவாஸேதுங் வா பாருபிதுங் வா ஸக்கா ஹோதி, ததே³வ வேதி³தப்³ப³ங். தேனேவ ‘‘விகப்பனுபக³பச்சி²ம’’ந்தி ந வுத்தங். கங்ஸனீலந்தி சம்மகாரனீலங். மஹாபச்சரியங் பன ‘‘அயோமலங் லோஹமலங் ஏதங் கங்ஸனீலங் நாமா’’தி வுத்தங். பலாஸனீலந்தி யோ கோசி நீலவண்ணோ பண்ணரஸோ. து³ப்³ப³ண்ணகரணங் ஆதா³தப்³ப³ந்தி ஏதங் கப்பபி³ந்து³ங் ஸந்தா⁴ய வுத்தங்; ந நீலாதீ³ஹி ஸகலசீவரஸ்ஸ து³ப்³ப³ண்ணகரணங். தஞ்ச பன கப்பங் ஆதி³யந்தேன சீவரங் ரஜித்வா சதூஸு வா கோணேஸு தீஸு வா த்³வீஸு வா ஏகஸ்மிங் வா கோணே மோரஸ்ஸ அக்கி²மண்ட³லமத்தங் வா மங்குலபிட்டி²மத்தங் வா ஆதா³தப்³ப³ங். மஹாபச்சரியங் ‘‘பத்தே வா க³ண்டி²யங் வா ந வட்டதீ’’தி வுத்தங். மஹாஅட்ட²கதா²யங் பன ‘‘வட்டதியேவா’’தி வுத்தங். பாளிகப்பகண்ணிககப்பாத³யோ பன ஸப்³ப³த்த² படிஸித்³தா⁴, தஸ்மா ட²பெத்வா ஏகங் வட்டபி³ந்து³ங் அஞ்ஞேன கேனசிபி விகாரேன கப்போ ந காதப்³போ³.
368-9. Aṭṭhame – navaṃ pana bhikkhunā cīvaralābhenāti ettha alabhīti labho; labhoyeva lābho. Kiṃ alabhi? Cīvaraṃ. Kīdisaṃ? Navaṃ. Iti ‘‘navacīvaralābhenā’’ti vattabbe anunāsikalopaṃ akatvā ‘‘navacīvaralābhenā’’ti vuttaṃ; paṭiladdhanavacīvarenāti attho. Majjhe ṭhitapadadvaye panāti nipāto. Bhikkhunāti yena laddhaṃ tassa nidassanaṃ. Padabhājane pana byañjanaṃ anādiyitvā yaṃ laddhaṃ taṃ dassetuṃ ‘‘cīvaraṃ nāma channaṃ cīvarāna’’ntiādi vuttaṃ. Cīvaranti ettha yaṃ nivāsetuṃ vā pārupituṃ vā sakkā hoti, tadeva veditabbaṃ. Teneva ‘‘vikappanupagapacchima’’nti na vuttaṃ. Kaṃsanīlanti cammakāranīlaṃ. Mahāpaccariyaṃ pana ‘‘ayomalaṃ lohamalaṃ etaṃ kaṃsanīlaṃ nāmā’’ti vuttaṃ. Palāsanīlanti yo koci nīlavaṇṇo paṇṇaraso. Dubbaṇṇakaraṇaṃ ādātabbanti etaṃ kappabinduṃ sandhāya vuttaṃ; na nīlādīhi sakalacīvarassa dubbaṇṇakaraṇaṃ. Tañca pana kappaṃ ādiyantena cīvaraṃ rajitvā catūsu vā koṇesu tīsu vā dvīsu vā ekasmiṃ vā koṇe morassa akkhimaṇḍalamattaṃ vā maṅkulapiṭṭhimattaṃ vā ādātabbaṃ. Mahāpaccariyaṃ ‘‘patte vā gaṇṭhiyaṃ vā na vaṭṭatī’’ti vuttaṃ. Mahāaṭṭhakathāyaṃ pana ‘‘vaṭṭatiyevā’’ti vuttaṃ. Pāḷikappakaṇṇikakappādayo pana sabbattha paṭisiddhā, tasmā ṭhapetvā ekaṃ vaṭṭabinduṃ aññena kenacipi vikārena kappo na kātabbo.
371. அக்³க³ளேதிஆதீ³ஸு ஏதானி அக்³க³ளாதீ³னி கப்பகதசீவரே பச்சா² ஆரோபெத்வா கப்பகரணகிச்சங் நத்தி². ஸேஸங் உத்தானமேவ. ஏளகலோமஸமுட்டா²னங் – கிரியாகிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங்; காயகம்மங், திசித்தங், திவேத³னந்தி.
371.Aggaḷetiādīsu etāni aggaḷādīni kappakatacīvare pacchā āropetvā kappakaraṇakiccaṃ natthi. Sesaṃ uttānameva. Eḷakalomasamuṭṭhānaṃ – kiriyākiriyaṃ, nosaññāvimokkhaṃ, acittakaṃ, paṇṇattivajjaṃ; kāyakammaṃ, ticittaṃ, tivedananti.
து³ப்³ப³ண்ணகரணஸிக்கா²பத³ங் அட்ட²மங்.
Dubbaṇṇakaraṇasikkhāpadaṃ aṭṭhamaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 6. ஸுராபானவக்³கோ³ • 6. Surāpānavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 8. து³ப்³ப³ண்ணகரணஸிக்கா²பத³வண்ணனா • 8. Dubbaṇṇakaraṇasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 8. து³ப்³ப³ண்ணகரணஸிக்கா²பத³வண்ணனா • 8. Dubbaṇṇakaraṇasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 8. து³ப்³ப³ண்ணகரணஸிக்கா²பத³வண்ணனா • 8. Dubbaṇṇakaraṇasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 8. து³ப்³ப³ண்ணகரணஸிக்கா²பத³ங் • 8. Dubbaṇṇakaraṇasikkhāpadaṃ
