| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
8. து³ப்³ப³ண்ணகரணஸிக்கா²பத³வண்ணனா
8. Dubbaṇṇakaraṇasikkhāpadavaṇṇanā
லாப⁴ஸத்³தோ³யங் கம்மஸாத⁴னோ ‘‘கோ ப⁴வதா லாபோ⁴ லத்³தோ⁴’’திஆதீ³ஸு விய, ஸோ செத்த² அதீதகாலிகோதி ஆஹ ‘‘அலப்³பீ⁴தி லபோ⁴’’தி , லத்³த⁴ந்தி அத்தோ². ‘‘லபோ⁴ ஏவ லாபோ⁴’’தி இமினா ஸகத்தே² ணபச்சயோதி த³ஸ்ஸேதி. கிங் அலப்³பீ⁴தி கிங் லத்³த⁴ங். நவந்தி அபி⁴னவங். எத்தாவதா ச நவஞ்ச தங் சீவரஞ்சாதி நவசீவரங், நவசீவரங் லாபோ⁴ ஏதேனாதி நவசீவரலாபோ⁴தி ஏவமெத்த² ஸமாஸோ த³ட்ட²ப்³போ³தி. யதி³ ஏவங் கத²ங் ‘‘நவங் சீவரலாபே⁴னா’’தி வுத்தந்தி ஆஹ ‘‘இதி நவசீவரலாபே⁴னா’’திஆதி³. எத்த² ச ‘‘விகப்பனுபக³ங் பச்சி²ம’’ந்தி ந வுத்தத்தா சீவரந்தி யங் நிவாஸேதுங் வா பாருபிதுங் வா ஸக்கா ஹோதி, ததே³வ வேதி³தப்³ப³ந்தி ஆஹ ‘‘நிவாஸனபாருபனுபக³ங் சீவர’’ந்தி. ‘‘து³ப்³ப³ண்ணகரணங் ஆதா³தப்³ப³’’ந்தி ஏதங் கப்பபி³ந்து³ங் ஸந்தா⁴ய வுத்தங், ந நீலாதீ³ஹி ஸகலசீவரங் து³ப்³ப³ண்ணகரணங், தஞ்ச பன கப்பங் ஆதி³யந்தேன சீவரங் ரஜித்வா சதூஸு வா கோணேஸு, தீஸு வா த்³வீஸு வா ஏகஸ்மிங் வா கோணே மோரஸ்ஸ அக்கி²மண்ட³லமத்தங் வா மங்கு³லபிட்டி²மத்தங் வா ஆதா³தப்³ப³ந்தி ஆஹ ‘‘தஸ்ஸா’’திஆதி³. கங்ஸனீலேனாதி சம்மகாரனீலேன. மஹாபச்சரியங் பன ‘‘அயோமலங் லோஹமலங், ஏதங் கங்ஸனீலங் நாமா’’தி (பாசி॰ அட்ட²॰ 368) வுத்தங் . பத்தனீலேனாதி யேன கேனசி நீலவண்ணேன பண்ணரஸேன. கப்பபி³ந்து³ங் ஆதி³யித்வாதி வட்டங் ஏகங் கப்பபி³ந்து³ங் ஆதி³யித்வா.
Lābhasaddoyaṃ kammasādhano ‘‘ko bhavatā lābho laddho’’tiādīsu viya, so cettha atītakālikoti āha ‘‘alabbhīti labho’’ti , laddhanti attho. ‘‘Labho eva lābho’’ti iminā sakatthe ṇapaccayoti dasseti. Kiṃ alabbhīti kiṃ laddhaṃ. Navanti abhinavaṃ. Ettāvatā ca navañca taṃ cīvarañcāti navacīvaraṃ, navacīvaraṃ lābho etenāti navacīvaralābhoti evamettha samāso daṭṭhabboti. Yadi evaṃ kathaṃ ‘‘navaṃ cīvaralābhenā’’ti vuttanti āha ‘‘iti navacīvaralābhenā’’tiādi. Ettha ca ‘‘vikappanupagaṃ pacchima’’nti na vuttattā cīvaranti yaṃ nivāsetuṃ vā pārupituṃ vā sakkā hoti, tadeva veditabbanti āha ‘‘nivāsanapārupanupagaṃ cīvara’’nti. ‘‘Dubbaṇṇakaraṇaṃ ādātabba’’nti etaṃ kappabinduṃ sandhāya vuttaṃ, na nīlādīhi sakalacīvaraṃ dubbaṇṇakaraṇaṃ, tañca pana kappaṃ ādiyantena cīvaraṃ rajitvā catūsu vā koṇesu, tīsu vā dvīsu vā ekasmiṃ vā koṇe morassa akkhimaṇḍalamattaṃ vā maṅgulapiṭṭhimattaṃ vā ādātabbanti āha ‘‘tassā’’tiādi. Kaṃsanīlenāti cammakāranīlena. Mahāpaccariyaṃ pana ‘‘ayomalaṃ lohamalaṃ, etaṃ kaṃsanīlaṃ nāmā’’ti (pāci. aṭṭha. 368) vuttaṃ . Pattanīlenāti yena kenaci nīlavaṇṇena paṇṇarasena. Kappabinduṃ ādiyitvāti vaṭṭaṃ ekaṃ kappabinduṃ ādiyitvā.
பாளிகப்பகண்ணிககப்பாத³யோ பன ஸப்³ப³ட்ட²கதா²ஸு படிஸித்³தா⁴. அக்³க³ளாதீ³னி கப்பகதசீவரே பன பச்சா² ஆரோபெத்வா கப்பகரணகிச்சங் நத்தீ²தி ஆஹ ‘‘பச்சா² ஆரோபிதேஸூ’’திஆதி³. அக்³க³ளஅனுவாதபரிப⁴ண்டே³ஸூதி உத்³த⁴ரித்வா அல்லியாபனகக²ண்ட³பிட்டி²அனுவாதகுச்சி²அனுவாதேஸு. கிரியாகிரியந்தி நிவாஸனபாருபனதோ, கப்பஸ்ஸ அனாதா³னதோ கிரியாகிரியங்.
Pāḷikappakaṇṇikakappādayo pana sabbaṭṭhakathāsu paṭisiddhā. Aggaḷādīni kappakatacīvare pana pacchā āropetvā kappakaraṇakiccaṃ natthīti āha ‘‘pacchā āropitesū’’tiādi. Aggaḷaanuvātaparibhaṇḍesūti uddharitvā alliyāpanakakhaṇḍapiṭṭhianuvātakucchianuvātesu. Kiriyākiriyanti nivāsanapārupanato, kappassa anādānato kiriyākiriyaṃ.
து³ப்³ப³ண்ணகரணஸிக்கா²பத³வண்ணனா நிட்டி²தா.
Dubbaṇṇakaraṇasikkhāpadavaṇṇanā niṭṭhitā.
