| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
8. දුබ්‌බණ්‌ණකරණසික්‌ඛාපදවණ්‌ණනා
8. Dubbaṇṇakaraṇasikkhāpadavaṇṇanā
368-9. අට්‌ඨමෙ – නවං පන භික්‌ඛුනා චීවරලාභෙනාති එත්‌ථ අලභීති ලභො; ලභොයෙව ලාභො. කිං අලභි? චීවරං. කීදිසං? නවං. ඉති ‘‘නවචීවරලාභෙනා’’ති වත්‌තබ්‌බෙ අනුනාසිකලොපං අකත්‌වා ‘‘නවචීවරලාභෙනා’’ති වුත්‌තං; පටිලද්‌ධනවචීවරෙනාති අත්‌ථො. මජ්‌ඣෙ ඨිතපදද්‌වයෙ පනාති නිපාතො. භික්‌ඛුනාති යෙන ලද්‌ධං තස්‌ස නිදස්‌සනං. පදභාජනෙ පන බ්‍යඤ්‌ජනං අනාදියිත්‌වා යං ලද්‌ධං තං දස්‌සෙතුං ‘‘චීවරං නාම ඡන්‌නං චීවරාන’’න්‌තිආදි වුත්‌තං. චීවරන්‌ති එත්‌ථ යං නිවාසෙතුං වා පාරුපිතුං වා සක්‌කා හොති, තදෙව වෙදිතබ්‌බං. තෙනෙව ‘‘විකප්‌පනුපගපච්‌ඡිම’’න්‌ති න වුත්‌තං. කංසනීලන්‌ති චම්‌මකාරනීලං. මහාපච්‌චරියං පන ‘‘අයොමලං ලොහමලං එතං කංසනීලං නාමා’’ති වුත්‌තං. පලාසනීලන්‌ති යො කොචි නීලවණ්‌ණො පණ්‌ණරසො. දුබ්‌බණ්‌ණකරණං ආදාතබ්‌බන්‌ති එතං කප්‌පබින්‌දුං සන්‌ධාය වුත්‌තං; න නීලාදීහි සකලචීවරස්‌ස දුබ්‌බණ්‌ණකරණං. තඤ්‌ච පන කප්‌පං ආදියන්‌තෙන චීවරං රජිත්‌වා චතූසු වා කොණෙසු තීසු වා ද්‌වීසු වා එකස්‌මිං වා කොණෙ මොරස්‌ස අක්‌ඛිමණ්‌ඩලමත්‌තං වා මඞ්‌කුලපිට්‌ඨිමත්‌තං වා ආදාතබ්‌බං. මහාපච්‌චරියං ‘‘පත්‌තෙ වා ගණ්‌ඨියං වා න වට්‌ටතී’’ති වුත්‌තං. මහාඅට්‌ඨකථායං පන ‘‘වට්‌ටතියෙවා’’ති වුත්‌තං. පාළිකප්‌පකණ්‌ණිකකප්‌පාදයො පන සබ්‌බත්‌ථ පටිසිද්‌ධා, තස්‌මා ඨපෙත්‌වා එකං වට්‌ටබින්‌දුං අඤ්‌ඤෙන කෙනචිපි විකාරෙන කප්‌පො න කාතබ්‌බො.
368-9. Aṭṭhame – navaṃ pana bhikkhunā cīvaralābhenāti ettha alabhīti labho; labhoyeva lābho. Kiṃ alabhi? Cīvaraṃ. Kīdisaṃ? Navaṃ. Iti ‘‘navacīvaralābhenā’’ti vattabbe anunāsikalopaṃ akatvā ‘‘navacīvaralābhenā’’ti vuttaṃ; paṭiladdhanavacīvarenāti attho. Majjhe ṭhitapadadvaye panāti nipāto. Bhikkhunāti yena laddhaṃ tassa nidassanaṃ. Padabhājane pana byañjanaṃ anādiyitvā yaṃ laddhaṃ taṃ dassetuṃ ‘‘cīvaraṃ nāma channaṃ cīvarāna’’ntiādi vuttaṃ. Cīvaranti ettha yaṃ nivāsetuṃ vā pārupituṃ vā sakkā hoti, tadeva veditabbaṃ. Teneva ‘‘vikappanupagapacchima’’nti na vuttaṃ. Kaṃsanīlanti cammakāranīlaṃ. Mahāpaccariyaṃ pana ‘‘ayomalaṃ lohamalaṃ etaṃ kaṃsanīlaṃ nāmā’’ti vuttaṃ. Palāsanīlanti yo koci nīlavaṇṇo paṇṇaraso. Dubbaṇṇakaraṇaṃ ādātabbanti etaṃ kappabinduṃ sandhāya vuttaṃ; na nīlādīhi sakalacīvarassa dubbaṇṇakaraṇaṃ. Tañca pana kappaṃ ādiyantena cīvaraṃ rajitvā catūsu vā koṇesu tīsu vā dvīsu vā ekasmiṃ vā koṇe morassa akkhimaṇḍalamattaṃ vā maṅkulapiṭṭhimattaṃ vā ādātabbaṃ. Mahāpaccariyaṃ ‘‘patte vā gaṇṭhiyaṃ vā na vaṭṭatī’’ti vuttaṃ. Mahāaṭṭhakathāyaṃ pana ‘‘vaṭṭatiyevā’’ti vuttaṃ. Pāḷikappakaṇṇikakappādayo pana sabbattha paṭisiddhā, tasmā ṭhapetvā ekaṃ vaṭṭabinduṃ aññena kenacipi vikārena kappo na kātabbo.
371. අග්‌ගළෙතිආදීසු එතානි අග්‌ගළාදීනි කප්‌පකතචීවරෙ පච්‌ඡා ආරොපෙත්‌වා කප්‌පකරණකිච්‌චං නත්‌ථි. සෙසං උත්‌තානමෙව. එළකලොමසමුට්‌ඨානං – කිරියාකිරියං, නොසඤ්‌ඤාවිමොක්‌ඛං, අචිත්‌තකං, පණ්‌ණත්‌තිවජ්‌ජං; කායකම්‌මං, තිචිත්‌තං, තිවෙදනන්‌ති.
371.Aggaḷetiādīsu etāni aggaḷādīni kappakatacīvare pacchā āropetvā kappakaraṇakiccaṃ natthi. Sesaṃ uttānameva. Eḷakalomasamuṭṭhānaṃ – kiriyākiriyaṃ, nosaññāvimokkhaṃ, acittakaṃ, paṇṇattivajjaṃ; kāyakammaṃ, ticittaṃ, tivedananti.
දුබ්‌බණ්‌ණකරණසික්‌ඛාපදං අට්‌ඨමං.
Dubbaṇṇakaraṇasikkhāpadaṃ aṭṭhamaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 6. සුරාපානවග්‌ගො • 6. Surāpānavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 8. දුබ්‌බණ්‌ණකරණසික්‌ඛාපදවණ්‌ණනා • 8. Dubbaṇṇakaraṇasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 8. දුබ්‌බණ්‌ණකරණසික්‌ඛාපදවණ්‌ණනා • 8. Dubbaṇṇakaraṇasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 8. දුබ්‌බණ්‌ණකරණසික්‌ඛාපදවණ්‌ණනා • 8. Dubbaṇṇakaraṇasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 8. දුබ්‌බණ්‌ණකරණසික්‌ඛාපදං • 8. Dubbaṇṇakaraṇasikkhāpadaṃ
