| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. து³ப்³ப³ண்ணியஸுத்தங்
2. Dubbaṇṇiyasuttaṃ
268. ஸாவத்தி²யங் ஜேதவனே. தத்ர கோ²…பே॰… ஏதத³வோச – ‘‘பூ⁴தபுப்³ப³ங், பி⁴க்க²வே, அஞ்ஞதரோ யக்கோ² து³ப்³ப³ண்ணோ ஓகோடிமகோ ஸக்கஸ்ஸ தே³வானமிந்த³ஸ்ஸ ஆஸனே நிஸின்னோ அஹோஸி. தத்ர ஸுத³ங், பி⁴க்க²வே, தே³வா தாவதிங்ஸா உஜ்ஜா²யந்தி கி²ய்யந்தி விபாசெந்தி – ‘அச்ச²ரியங் வத போ⁴, அப்³பு⁴தங் வத, போ⁴! அயங் யக்கோ² து³ப்³ப³ண்ணோ ஓகோடிமகோ ஸக்கஸ்ஸ தே³வானமிந்த³ஸ்ஸ ஆஸனே நிஸின்னோ’’’தி! யதா² யதா² கோ², பி⁴க்க²வே, தே³வா தாவதிங்ஸா உஜ்ஜா²யந்தி கி²ய்யந்தி விபாசெந்தி, ததா² ததா² ஸோ யக்கோ² அபி⁴ரூபதரோ சேவ ஹோதி த³ஸ்ஸனீயதரோ ச பாஸாதி³கதரோ ச.
268. Sāvatthiyaṃ jetavane. Tatra kho…pe… etadavoca – ‘‘bhūtapubbaṃ, bhikkhave, aññataro yakkho dubbaṇṇo okoṭimako sakkassa devānamindassa āsane nisinno ahosi. Tatra sudaṃ, bhikkhave, devā tāvatiṃsā ujjhāyanti khiyyanti vipācenti – ‘acchariyaṃ vata bho, abbhutaṃ vata, bho! Ayaṃ yakkho dubbaṇṇo okoṭimako sakkassa devānamindassa āsane nisinno’’’ti! Yathā yathā kho, bhikkhave, devā tāvatiṃsā ujjhāyanti khiyyanti vipācenti, tathā tathā so yakkho abhirūpataro ceva hoti dassanīyataro ca pāsādikataro ca.
‘‘அத² கோ², பி⁴க்க²வே, தே³வா தாவதிங்ஸா யேன ஸக்கோ தே³வானமிந்தோ³ தேனுபஸங்கமிங்ஸு; உபஸங்கமித்வா ஸக்கங் தே³வானமிந்த³ங் ஏதத³வோசுங் – ‘இத⁴ தே, மாரிஸ, அஞ்ஞதரோ யக்கோ² து³ப்³ப³ண்ணோ ஓகோடிமகோ ஸக்கஸ்ஸ தே³வானமிந்த³ஸ்ஸ ஆஸனே நிஸின்னோ. தத்ர ஸுத³ங், மாரிஸ, தே³வா தாவதிங்ஸா உஜ்ஜா²யந்தி கி²ய்யந்தி விபாசெந்தி – அச்ச²ரியங் வத, போ⁴, அப்³பு⁴தங் வத, போ⁴! அயங் யக்கோ² து³ப்³ப³ண்ணோ ஓகோடிமகோ ஸக்கஸ்ஸ தே³வானமிந்த³ஸ்ஸ ஆஸனே நிஸின்னோதி. யதா² யதா² கோ², மாரிஸ, தே³வா உஜ்ஜா²யந்தி கி²ய்யந்தி விபாசெந்தி, ததா² ததா² ஸோ யக்கோ² அபி⁴ரூபதரோ சேவ ஹோதி த³ஸ்ஸனீயதரோ ச பாஸாதி³கதரோ சாதி. ஸோ ஹி நூன, மாரிஸ, கோத⁴ப⁴க்கோ² யக்கோ² ப⁴விஸ்ஸதீ’’’தி.
‘‘Atha kho, bhikkhave, devā tāvatiṃsā yena sakko devānamindo tenupasaṅkamiṃsu; upasaṅkamitvā sakkaṃ devānamindaṃ etadavocuṃ – ‘idha te, mārisa, aññataro yakkho dubbaṇṇo okoṭimako sakkassa devānamindassa āsane nisinno. Tatra sudaṃ, mārisa, devā tāvatiṃsā ujjhāyanti khiyyanti vipācenti – acchariyaṃ vata, bho, abbhutaṃ vata, bho! Ayaṃ yakkho dubbaṇṇo okoṭimako sakkassa devānamindassa āsane nisinnoti. Yathā yathā kho, mārisa, devā ujjhāyanti khiyyanti vipācenti, tathā tathā so yakkho abhirūpataro ceva hoti dassanīyataro ca pāsādikataro cāti. So hi nūna, mārisa, kodhabhakkho yakkho bhavissatī’’’ti.
‘‘அத² கோ², பி⁴க்க²வே, ஸக்கோ தே³வானமிந்தோ³ யேன ஸோ கோத⁴ப⁴க்கோ² யக்கோ² தேனுபஸங்கமி; உபஸங்கமித்வா ஏகங்ஸங் உத்தராஸங்க³ங் கரித்வா த³க்கி²ணஜாணுமண்ட³லங் பத²வியங் நிஹந்த்வா யேன ஸோ கோத⁴ப⁴க்கோ² யக்கோ² தேனஞ்ஜலிங் பணாமெத்வா திக்க²த்துங் நாமங் ஸாவேதி – ‘ஸக்கோஹங் மாரிஸ, தே³வானமிந்தோ³, ஸக்கோஹங், மாரிஸ, தே³வானமிந்தோ³’தி. யதா² யதா² கோ², பி⁴க்க²வே, ஸக்கோ தே³வானமிந்தோ³ நாமங் ஸாவேஸி, ததா² ததா² ஸோ யக்கோ² து³ப்³ப³ண்ணதரோ சேவ அஹோஸி ஓகோடிமகதரோ ச. து³ப்³ப³ண்ணதரோ சேவ ஹுத்வா ஓகோடிமகதரோ ச தத்தே²வந்தரதா⁴யீ’’தி. அத² கோ², பி⁴க்க²வே, ஸக்கோ தே³வானமிந்தோ³ ஸகே ஆஸனே நிஸீதி³த்வா தே³வே தாவதிங்ஸே அனுனயமானோ தாயங் வேலாயங் இமா கா³தா²யோ அபா⁴ஸி –
‘‘Atha kho, bhikkhave, sakko devānamindo yena so kodhabhakkho yakkho tenupasaṅkami; upasaṅkamitvā ekaṃsaṃ uttarāsaṅgaṃ karitvā dakkhiṇajāṇumaṇḍalaṃ pathaviyaṃ nihantvā yena so kodhabhakkho yakkho tenañjaliṃ paṇāmetvā tikkhattuṃ nāmaṃ sāveti – ‘sakkohaṃ mārisa, devānamindo, sakkohaṃ, mārisa, devānamindo’ti. Yathā yathā kho, bhikkhave, sakko devānamindo nāmaṃ sāvesi, tathā tathā so yakkho dubbaṇṇataro ceva ahosi okoṭimakataro ca. Dubbaṇṇataro ceva hutvā okoṭimakataro ca tatthevantaradhāyī’’ti. Atha kho, bhikkhave, sakko devānamindo sake āsane nisīditvā deve tāvatiṃse anunayamāno tāyaṃ velāyaṃ imā gāthāyo abhāsi –
‘‘ந ஸூபஹதசித்தொம்ஹி, நாவத்தேன ஸுவானயோ;
‘‘Na sūpahatacittomhi, nāvattena suvānayo;
ந வோ சிராஹங் குஜ்ஜா²மி, கோதோ⁴ மயி நாவதிட்ட²தி.
Na vo cirāhaṃ kujjhāmi, kodho mayi nāvatiṭṭhati.
‘‘குத்³தா⁴ஹங் ந ப²ருஸங் ப்³ரூமி, ந ச த⁴ம்மானி கித்தயே;
‘‘Kuddhāhaṃ na pharusaṃ brūmi, na ca dhammāni kittaye;
ஸன்னிக்³க³ண்ஹாமி அத்தானங், ஸம்பஸ்ஸங் அத்த²மத்தனோ’’தி.
Sanniggaṇhāmi attānaṃ, sampassaṃ atthamattano’’ti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. து³ப்³ப³ண்ணியஸுத்தவண்ணனா • 2. Dubbaṇṇiyasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. து³ப்³ப³ண்ணியஸுத்தவண்ணனா • 3. Dubbaṇṇiyasuttavaṇṇanā
