| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
து³ப்³பி⁴க்க²கதா²
Dubbhikkhakathā
16. தேன கோ² பன ஸமயேன வேரஞ்ஜா து³ப்³பி⁴க்கா² ஹோதீதி யஸ்மிங் ஸமயே வேரஞ்ஜேன ப்³ராஹ்மணேன ப⁴க³வா வேரஞ்ஜங் உபனிஸ்ஸாய வஸ்ஸாவாஸங் யாசிதோ , தேன ஸமயேன வேரஞ்ஜா து³ப்³பி⁴க்கா² ஹோதி. து³ப்³பி⁴க்கா²தி து³ல்லப⁴பி⁴க்கா²; ஸா பன து³ல்லப⁴பி⁴க்க²தா யத்த² மனுஸ்ஸா அஸ்ஸத்³தா⁴ ஹொந்தி அப்பஸன்னா, தத்த² ஸுஸஸ்ஸகாலேபி அதிஸமக்³கே⁴பி புப்³ப³ண்ணாபரண்ணே ஹோதி. வேரஞ்ஜாயங் பன யஸ்மா ந ததா² அஹோஸி, அபிச கோ² து³ஸஸ்ஸதாய சா²தகதோ³ஸேன அஹோஸி தஸ்மா தமத்த²ங் த³ஸ்ஸெந்தோ த்³வீஹிதிகாதிஆதி³மாஹ. தத்த² த்³வீஹிதிகாதி த்³விதா⁴ பவத்தஈஹிதிகா. ஈஹிதங் நாம இரியா த்³விதா⁴ பவத்தா – சித்தஇரியா, சித்தஈஹா. ‘‘எத்த² லச்சா²ம நு கோ² கிஞ்சி பி⁴க்க²மானா ந லச்சா²மா’’தி, ‘‘ஜீவிதுங் வா ஸக்கி²ஸ்ஸாம நு கோ² நோ’’தி அயமெத்த² அதி⁴ப்பாயோ.
16.Tena kho pana samayena verañjā dubbhikkhā hotīti yasmiṃ samaye verañjena brāhmaṇena bhagavā verañjaṃ upanissāya vassāvāsaṃ yācito , tena samayena verañjā dubbhikkhā hoti. Dubbhikkhāti dullabhabhikkhā; sā pana dullabhabhikkhatā yattha manussā assaddhā honti appasannā, tattha susassakālepi atisamagghepi pubbaṇṇāparaṇṇe hoti. Verañjāyaṃ pana yasmā na tathā ahosi, apica kho dusassatāya chātakadosena ahosi tasmā tamatthaṃ dassento dvīhitikātiādimāha. Tattha dvīhitikāti dvidhā pavattaīhitikā. Īhitaṃ nāma iriyā dvidhā pavattā – cittairiyā, cittaīhā. ‘‘Ettha lacchāma nu kho kiñci bhikkhamānā na lacchāmā’’ti, ‘‘jīvituṃ vā sakkhissāma nu kho no’’ti ayamettha adhippāyo.
அத² வா த்³வீஹிதிகாதி து³ஜ்ஜீவிகா, ஈஹிதங் ஈஹா இரியனங் பவத்தனங் ஜீவிதந்திஆதீ³னி பதா³னி ஏகத்தா²னி. தஸ்மா து³க்கே²ன ஈஹிதங் எத்த² பவத்ததீதி த்³வீஹிதிகாதி அயமெத்த² பத³த்தோ². ஸேதட்டி²காதி ஸேதகானி அட்டீ²னி எத்தா²தி ஸேதட்டி²கா. தி³வஸம்பி யாசித்வா கிஞ்சி அலத்³தா⁴ மதானங் கபணமனுஸ்ஸானங் அஹிச்ச²த்தகவண்ணேஹி அட்டீ²ஹி தத்ர தத்ர பரிகிண்ணாதி வுத்தங் ஹோதி. ஸேதட்டிகாதிபி பாடோ². தஸ்ஸத்தோ² – ஸேதா அட்டி எத்தா²தி ஸேதட்டிகா. அட்டீதி ஆதுரதா ப்³யாதி⁴ ரோகோ³. தத்த² ச ஸஸ்ஸானங் க³ப்³ப⁴க்³க³ஹணகாலே ஸேதகரோகே³ன உபஹதமேவ பச்சி²ன்னகீ²ரங் அக்³க³ஹிததண்டு³லங் பண்ட³ரபண்ட³ரங் ஸாலிஸீஸங் வா யவகோ³தூ⁴மஸீஸங் வா நிக்க²மதி, தஸ்மா ‘‘ஸேதட்டிகா’’தி வுச்சதி.
Atha vā dvīhitikāti dujjīvikā, īhitaṃ īhā iriyanaṃ pavattanaṃ jīvitantiādīni padāni ekatthāni. Tasmā dukkhena īhitaṃ ettha pavattatīti dvīhitikāti ayamettha padattho. Setaṭṭhikāti setakāni aṭṭhīni etthāti setaṭṭhikā. Divasampi yācitvā kiñci aladdhā matānaṃ kapaṇamanussānaṃ ahicchattakavaṇṇehi aṭṭhīhi tatra tatra parikiṇṇāti vuttaṃ hoti. Setaṭṭikātipi pāṭho. Tassattho – setā aṭṭi etthāti setaṭṭikā. Aṭṭīti āturatā byādhi rogo. Tattha ca sassānaṃ gabbhaggahaṇakāle setakarogena upahatameva pacchinnakhīraṃ aggahitataṇḍulaṃ paṇḍarapaṇḍaraṃ sālisīsaṃ vā yavagodhūmasīsaṃ vā nikkhamati, tasmā ‘‘setaṭṭikā’’ti vuccati.
வப்பகாலே ஸுட்டு² அபி⁴ஸங்க²ரித்வாபி வுத்தஸஸ்ஸங் தத்த² ஸலாகா ஏவ ஸம்பஜ்ஜதீதி ஸலாகாவுத்தா; ஸலாகாய வா தத்த² ஜீவிதங் பவத்தெந்தீதி ஸலாகாவுத்தா. கிங் வுத்தங் ஹோதி? தத்த² கிர த⁴ஞ்ஞவிக்கயகானங் ஸந்திகங் கயகேஸு க³தேஸு து³ப்³ப³லமனுஸ்ஸே அபி⁴ப⁴வித்வா ப³லவமனுஸ்ஸாவ த⁴ஞ்ஞங் கிணித்வா க³ச்ச²ந்தி. து³ப்³ப³லமனுஸ்ஸா அலப⁴மானா மஹாஸத்³த³ங் கரொந்தி. த⁴ஞ்ஞவிக்கயகா ‘‘ஸப்³பே³ஸங் ஸங்க³ஹங் கரிஸ்ஸாமா’’தி த⁴ஞ்ஞகரணட்டா²னே த⁴ஞ்ஞமாபகங் நிஸீதா³பெத்வா ஏகபஸ்ஸே வண்ணஜ்ஜ²க்க²ங் நிஸீதா³பேஸுங். த⁴ஞ்ஞத்தி²கா வண்ணஜ்ஜ²க்க²ஸ்ஸ ஸந்திகங் க³ச்ச²ந்தி. ஸோ ஆக³தபடிபாடியா மூலங் க³ஹெத்வா ‘‘இத்த²ன்னாமஸ்ஸ எத்தகங் தா³தப்³ப³’’ந்தி ஸலாகங் லிகி²த்வா தே³தி, தே தங் க³ஹெத்வா த⁴ஞ்ஞமாபகஸ்ஸ ஸந்திகங் க³ந்த்வா தி³ன்னபடிபாடியா த⁴ஞ்ஞங் க³ண்ஹந்தி. ஏவங் ஸலாகாய தத்த² ஜீவிதங் பவத்தெந்தீதி ஸலாகாவுத்தா.
Vappakāle suṭṭhu abhisaṅkharitvāpi vuttasassaṃ tattha salākā eva sampajjatīti salākāvuttā; salākāya vā tattha jīvitaṃ pavattentīti salākāvuttā. Kiṃ vuttaṃ hoti? Tattha kira dhaññavikkayakānaṃ santikaṃ kayakesu gatesu dubbalamanusse abhibhavitvā balavamanussāva dhaññaṃ kiṇitvā gacchanti. Dubbalamanussā alabhamānā mahāsaddaṃ karonti. Dhaññavikkayakā ‘‘sabbesaṃ saṅgahaṃ karissāmā’’ti dhaññakaraṇaṭṭhāne dhaññamāpakaṃ nisīdāpetvā ekapasse vaṇṇajjhakkhaṃ nisīdāpesuṃ. Dhaññatthikā vaṇṇajjhakkhassa santikaṃ gacchanti. So āgatapaṭipāṭiyā mūlaṃ gahetvā ‘‘itthannāmassa ettakaṃ dātabba’’nti salākaṃ likhitvā deti, te taṃ gahetvā dhaññamāpakassa santikaṃ gantvā dinnapaṭipāṭiyā dhaññaṃ gaṇhanti. Evaṃ salākāya tattha jīvitaṃ pavattentīti salākāvuttā.
ந ஸுகரா உஞ்சே²ன பக்³க³ஹேன யாபேதுந்தி பக்³க³ஹேன யோ உஞ்சோ², தேன யாபேதுங் ந ஸுகரா. பத்தங் க³ஹெத்வா யங் அரியா உஞ்ச²ங் கரொந்தி, பி⁴க்கா²சரியங் சரந்தி, தேன உஞ்சே²ன யாபேதுங் ந ஸுகராதி வுத்தங் ஹோதி. ததா³ கிர தத்த² ஸத்தட்ட²கா³மே பிண்டா³ய சரித்வா ஏகதி³வஸம்பி யாபனமத்தங் ந லப⁴ந்தி.
Na sukarā uñchena paggahena yāpetunti paggahena yo uñcho, tena yāpetuṃ na sukarā. Pattaṃ gahetvā yaṃ ariyā uñchaṃ karonti, bhikkhācariyaṃ caranti, tena uñchena yāpetuṃ na sukarāti vuttaṃ hoti. Tadā kira tattha sattaṭṭhagāme piṇḍāya caritvā ekadivasampi yāpanamattaṃ na labhanti.
தேன கோ² பன ஸமயேன உத்தராபத²கா அஸ்ஸவாணிஜா…பே॰… அஸ்ஸோஸி கோ² ப⁴க³வா உது³க்க²லஸத்³த³ந்தி – தேனாதி யஸ்மிங் ஸமயே ப⁴க³வா வேரஞ்ஜங் உபனிஸ்ஸாய வஸ்ஸாவாஸங் உபக³தோ தேன ஸமயேன. உத்தராபத²வாஸிகா உத்தராபத²தோ வா ஆக³தத்தா ஏவங் லத்³த⁴வோஹாரா அஸ்ஸவாணிஜா உத்தராபதே² அஸ்ஸானங் உட்டா²னட்டா²னே பஞ்ச அஸ்ஸஸதானி க³ஹெத்வா தி³கு³ணங் திகு³ணங் லாப⁴ங் பத்த²யமானா தே³ஸந்தரங் க³ச்ச²ந்தா தேஹி அத்தனோ விக்காயிகப⁴ண்ட³பூ⁴தேஹி பஞ்சமத்தேஹி அஸ்ஸஸதேஹி வேரஞ்ஜங் வஸ்ஸாவாஸங் உபக³தா ஹொந்தி. கஸ்மா? ந ஹி ஸக்கா தஸ்மிங் தே³ஸே வஸ்ஸிகே சத்தாரோ மாஸே அத்³தா⁴னங் படிபஜ்ஜிதுங். உபக³ச்ச²ந்தா ச ப³ஹினக³ரே உத³கேன அனஜ்ஜொ²த்த²ரணீயே டா²னே அத்தனோ ச வாஸாகா³ரானி அஸ்ஸானஞ்ச மந்தி³ரங் காராபெத்வா வதியா பரிக்கி²பிங்ஸு. தானி தேஸங் வஸனட்டா²னானி ‘‘அஸ்ஸமண்ட³லிகாயோ’’தி பஞ்ஞாயிங்ஸு. தேனாஹ – ‘‘தேஹி அஸ்ஸமண்ட³லிகாஸு பி⁴க்கூ²னங் பத்த²பத்த²புலகங் பஞ்ஞத்தங் ஹோதீ’’தி. பத்த²பத்த²புலகந்தி ஏகமேகஸ்ஸ பி⁴க்கு²னோ பத்த²பத்த²பமாணங் புலகங். பத்தோ² நாம நாளிமத்தங் ஹோதி, ஏகஸ்ஸ புரிஸஸ்ஸ அலங் யாபனாய. வுத்தம்பி ஹேதங் – ‘‘பத்தோ²த³னோ நாலமயங் து³வின்ன’’ந்தி (ஜா॰ 2.21.192). புலகங் நாம நித்து²ஸங் கத்வா உஸ்ஸேதெ³த்வா க³ஹிதயவதண்டு³லா வுச்சந்தி. யதி³ ஹி ஸது²ஸா ஹொந்தி, பாணகா விஜ்ஜ²ந்தி, அத்³தா⁴னக்க²மா ந ஹொந்தி. தஸ்மா தே வாணிஜா அத்³தா⁴னக்க²மங் கத்வா யவதண்டு³லமாதா³ய அத்³தா⁴னங் படிபஜ்ஜந்தி ‘‘யத்த² அஸ்ஸானங் கா²த³னீயங் திணங் து³ல்லப⁴ங் ப⁴விஸ்ஸதி, தத்தே²தங் அஸ்ஸப⁴த்தங் ப⁴விஸ்ஸதீ’’தி.
Tena kho pana samayena uttarāpathakā assavāṇijā…pe… assosi kho bhagavā udukkhalasaddanti – tenāti yasmiṃ samaye bhagavā verañjaṃ upanissāya vassāvāsaṃ upagato tena samayena. Uttarāpathavāsikā uttarāpathato vā āgatattā evaṃ laddhavohārā assavāṇijā uttarāpathe assānaṃ uṭṭhānaṭṭhāne pañca assasatāni gahetvā diguṇaṃ tiguṇaṃ lābhaṃ patthayamānā desantaraṃ gacchantā tehi attano vikkāyikabhaṇḍabhūtehi pañcamattehi assasatehi verañjaṃ vassāvāsaṃ upagatā honti. Kasmā? Na hi sakkā tasmiṃ dese vassike cattāro māse addhānaṃ paṭipajjituṃ. Upagacchantā ca bahinagare udakena anajjhottharaṇīye ṭhāne attano ca vāsāgārāni assānañca mandiraṃ kārāpetvā vatiyā parikkhipiṃsu. Tāni tesaṃ vasanaṭṭhānāni ‘‘assamaṇḍalikāyo’’ti paññāyiṃsu. Tenāha – ‘‘tehi assamaṇḍalikāsu bhikkhūnaṃ patthapatthapulakaṃ paññattaṃ hotī’’ti. Patthapatthapulakanti ekamekassa bhikkhuno patthapatthapamāṇaṃ pulakaṃ. Pattho nāma nāḷimattaṃ hoti, ekassa purisassa alaṃ yāpanāya. Vuttampi hetaṃ – ‘‘patthodano nālamayaṃ duvinna’’nti (jā. 2.21.192). Pulakaṃ nāma nitthusaṃ katvā ussedetvā gahitayavataṇḍulā vuccanti. Yadi hi sathusā honti, pāṇakā vijjhanti, addhānakkhamā na honti. Tasmā te vāṇijā addhānakkhamaṃ katvā yavataṇḍulamādāya addhānaṃ paṭipajjanti ‘‘yattha assānaṃ khādanīyaṃ tiṇaṃ dullabhaṃ bhavissati, tatthetaṃ assabhattaṃ bhavissatī’’ti.
கஸ்மா பன தேஹி தங் பி⁴க்கூ²னங் பஞ்ஞத்தந்தி? வுச்சதே – ‘‘ந ஹி தே த³க்கி²ணாபத²மனுஸ்ஸா விய அஸ்ஸத்³தா⁴ அப்பஸன்னா, தே பன ஸத்³தா⁴ பஸன்னா பு³த்³த⁴மாமகா, த⁴ம்மமாமகா, ஸங்க⁴மாமகா; தே புப்³ப³ண்ஹஸமயங் கேனசிதே³வ கரணீயேன நக³ரங் பவிஸந்தா த்³வே தயோ தி³வஸே அத்³த³ஸங்ஸு ஸத்தட்ட² பி⁴க்கூ² ஸுனிவத்தே² ஸுபாருதே இரியாபத²ஸம்பன்னே ஸகலம்பி நக³ரங் பிண்டா³ய சரித்வா கிஞ்சி அலப⁴மானே. தி³ஸ்வான நேஸங் ஏதத³ஹோஸி – ‘‘அய்யா இமங் நக³ரங் உபனிஸ்ஸாய வஸ்ஸங் உபக³தா; சா²தகஞ்ச வத்ததி, ந ச கிஞ்சி லப⁴ந்தி, அதிவிய கிலமந்தி. மயஞ்சம்ஹ ஆக³ந்துகா, ந ஸக்கோம நேஸங் தே³வஸிகங் யாகு³ஞ்ச ப⁴த்தஞ்ச படியாதே³துங். அம்ஹாகங் பன அஸ்ஸா ஸாயஞ்ச பாதோ ச த்³விக்க²த்துங் ப⁴த்தங் லப⁴ந்தி. யங்னூன மயங் ஏகமேகஸ்ஸ அஸ்ஸஸ்ஸ பாதராஸப⁴த்ததோ ஏகமேகஸ்ஸ பி⁴க்கு²னோ பத்த²பத்த²புலகங் த³தெ³ய்யாம. ஏவங் அய்யா ச ந கிலமிஸ்ஸந்தி , அஸ்ஸா ச யாபெஸ்ஸந்தீ’’தி. தே பி⁴க்கூ²னங் ஸந்திகங் க³ந்த்வா ஏதமத்த²ங் ஆரோசெத்வா ‘‘ப⁴ந்தே, தும்ஹே பத்த²பத்த²புலகங் படிக்³க³ஹெத்வா யங் வா தங் வா கத்வா பரிபு⁴ஞ்ஜதா²’’தி யாசித்வா தே³வஸிகங் பத்த²பத்த²புலகங் பஞ்ஞபேஸுங். தேன வுத்தங் – ‘‘தேஹி அஸ்ஸமண்ட³லிகாஸு பி⁴க்கூ²னங் பத்த²பத்த²புலகங் பஞ்ஞத்தங் ஹோதீ’’தி.
Kasmā pana tehi taṃ bhikkhūnaṃ paññattanti? Vuccate – ‘‘na hi te dakkhiṇāpathamanussā viya assaddhā appasannā, te pana saddhā pasannā buddhamāmakā, dhammamāmakā, saṅghamāmakā; te pubbaṇhasamayaṃ kenacideva karaṇīyena nagaraṃ pavisantā dve tayo divase addasaṃsu sattaṭṭha bhikkhū sunivatthe supārute iriyāpathasampanne sakalampi nagaraṃ piṇḍāya caritvā kiñci alabhamāne. Disvāna nesaṃ etadahosi – ‘‘ayyā imaṃ nagaraṃ upanissāya vassaṃ upagatā; chātakañca vattati, na ca kiñci labhanti, ativiya kilamanti. Mayañcamha āgantukā, na sakkoma nesaṃ devasikaṃ yāguñca bhattañca paṭiyādetuṃ. Amhākaṃ pana assā sāyañca pāto ca dvikkhattuṃ bhattaṃ labhanti. Yaṃnūna mayaṃ ekamekassa assassa pātarāsabhattato ekamekassa bhikkhuno patthapatthapulakaṃ dadeyyāma. Evaṃ ayyā ca na kilamissanti , assā ca yāpessantī’’ti. Te bhikkhūnaṃ santikaṃ gantvā etamatthaṃ ārocetvā ‘‘bhante, tumhe patthapatthapulakaṃ paṭiggahetvā yaṃ vā taṃ vā katvā paribhuñjathā’’ti yācitvā devasikaṃ patthapatthapulakaṃ paññapesuṃ. Tena vuttaṃ – ‘‘tehi assamaṇḍalikāsu bhikkhūnaṃ patthapatthapulakaṃ paññattaṃ hotī’’ti.
பஞ்ஞத்தந்தி நிச்சப⁴த்தஸங்கே²பேன ட²பிதங். இதா³னி பி⁴க்கூ² புப்³ப³ண்ஹஸமயங் நிவாஸெத்வாதிஆதீ³ஸு புப்³ப³ண்ஹஸமயந்தி தி³வஸஸ்ஸ புப்³ப³பா⁴க³ஸமயங், புப்³ப³ண்ஹஸமயேதி அத்தோ². புப்³ப³ண்ஹே வா ஸமயங் புப்³ப³ண்ஹஸமயங், புப்³ப³ண்ஹே ஏகங் க²ணந்தி வுத்தங் ஹோதி. ஏவங் அச்சந்தஸங்யோகே³ உபயோக³வசனங் லப்³ப⁴தி. நிவாஸெத்வாதி பரித³ஹித்வா, விஹாரனிவாஸனபரிவத்தனவஸேனேதங் வேதி³தப்³ப³ங். ந ஹி தே ததோ புப்³பே³ அனிவத்தா² அஹேஸுங். பத்தசீவரமாதா³யாதி பத்தங் ஹத்தே²ஹி சீவரங் காயேன ஆதி³யித்வா ஸம்படிச்சா²தெ³த்வா, தா⁴ரெத்வாதி அத்தோ². யேன வா தேன வா ஹி பகாரேன க³ண்ஹந்தா ஆதா³யஇச்சேவ வுச்சந்தி, யதா² ‘‘ஸமாதா³யேவ பக்கமதீ’’தி (தீ³॰ நி॰ 1.21). பிண்ட³ங் அலப⁴மானாதி ஸகலம்பி வேரஞ்ஜங் சரித்வா திட்ட²து பிண்டோ³, அந்தமஸோ ‘‘அதிச்ச²தா²’’தி வாசம்பி அலப⁴மானா.
Paññattanti niccabhattasaṅkhepena ṭhapitaṃ. Idāni bhikkhū pubbaṇhasamayaṃ nivāsetvātiādīsu pubbaṇhasamayanti divasassa pubbabhāgasamayaṃ, pubbaṇhasamayeti attho. Pubbaṇhe vā samayaṃ pubbaṇhasamayaṃ, pubbaṇhe ekaṃ khaṇanti vuttaṃ hoti. Evaṃ accantasaṃyoge upayogavacanaṃ labbhati. Nivāsetvāti paridahitvā, vihāranivāsanaparivattanavasenetaṃ veditabbaṃ. Na hi te tato pubbe anivatthā ahesuṃ. Pattacīvaramādāyāti pattaṃ hatthehi cīvaraṃ kāyena ādiyitvā sampaṭicchādetvā, dhāretvāti attho. Yena vā tena vā hi pakārena gaṇhantā ādāyaicceva vuccanti, yathā ‘‘samādāyeva pakkamatī’’ti (dī. ni. 1.21). Piṇḍaṃ alabhamānāti sakalampi verañjaṃ caritvā tiṭṭhatu piṇḍo, antamaso ‘‘aticchathā’’ti vācampi alabhamānā.
பத்த²பத்த²புலகங் ஆராமங் ஆஹரித்வாதி க³தக³தட்டா²னே லத்³த⁴ங் ஏகமேகங் பத்த²பத்த²புலகங் க³ஹெத்வா ஆராமங் நெத்வா. உது³க்க²லே கொட்டெத்வா கொட்டெத்வா பரிபு⁴ஞ்ஜந்தீதி தே²ரானங் கோசி கப்பியகாரகோ நத்தி², யோ நேஸங் தங் க³ஹெத்வா யாகு³ங் வா ப⁴த்தங் வா பசெய்ய. ஸாமம்பி பசனங் ஸமணஸாருப்பங் ந ஹோதி ந ச வட்டதி. தே ஏவங் நோ ஸல்லஹுகவுத்திதா ச ப⁴விஸ்ஸதி, ஸாமபாகபரிமோசனஞ்சாதி அட்ட² அட்ட² ஜனா வா த³ஸ த³ஸ ஜனா வா ஏகதோ ஹுத்வா உது³க்க²லே கொட்டெத்வா கொட்டெத்வா ஸகங் ஸகங் படிவீஸங் உத³கேன தேமெத்வா பரிபு⁴ஞ்ஜந்தி. ஏவங் பரிபு⁴ஞ்ஜித்வா அப்பொஸ்ஸுக்கா ஸமணத⁴ம்மங் கரொந்தி . ப⁴க³வதோ பன தே அஸ்ஸவாணிஜா பத்த²புலகஞ்ச தெ³ந்தி, தது³பியஞ்ச ஸப்பிமது⁴ஸக்கரங். தங் ஆயஸ்மா ஆனந்தோ³ ஆஹரித்வா ஸிலாயங் பிஸதி. புஞ்ஞவதா பண்டி³தபுரிஸேன கதங் மனாபமேவ ஹோதி. அத² நங் பிஸித்வா ஸப்பிஆதீ³ஹி ஸம்மா யோஜெத்வா ப⁴க³வதோ உபனாமேஸி. அதெ²த்த² தே³வதா தி³ப்³போ³ஜங் பக்கி²பந்தி. தங் ப⁴க³வா பரிபு⁴ஞ்ஜதி. பரிபு⁴ஞ்ஜித்வா ப²லஸமாபத்தியா காலங் அதினாமேதி. ந ததோ பட்டா²ய பிண்டா³ய சரதி.
Patthapatthapulakaṃ ārāmaṃ āharitvāti gatagataṭṭhāne laddhaṃ ekamekaṃ patthapatthapulakaṃ gahetvā ārāmaṃ netvā. Udukkhale koṭṭetvā koṭṭetvā paribhuñjantīti therānaṃ koci kappiyakārako natthi, yo nesaṃ taṃ gahetvā yāguṃ vā bhattaṃ vā paceyya. Sāmampi pacanaṃ samaṇasāruppaṃ na hoti na ca vaṭṭati. Te evaṃ no sallahukavuttitā ca bhavissati, sāmapākaparimocanañcāti aṭṭha aṭṭha janā vā dasa dasa janā vā ekato hutvā udukkhale koṭṭetvā koṭṭetvā sakaṃ sakaṃ paṭivīsaṃ udakena temetvā paribhuñjanti. Evaṃ paribhuñjitvā appossukkā samaṇadhammaṃ karonti . Bhagavato pana te assavāṇijā patthapulakañca denti, tadupiyañca sappimadhusakkaraṃ. Taṃ āyasmā ānando āharitvā silāyaṃ pisati. Puññavatā paṇḍitapurisena kataṃ manāpameva hoti. Atha naṃ pisitvā sappiādīhi sammā yojetvā bhagavato upanāmesi. Athettha devatā dibbojaṃ pakkhipanti. Taṃ bhagavā paribhuñjati. Paribhuñjitvā phalasamāpattiyā kālaṃ atināmeti. Na tato paṭṭhāya piṇḍāya carati.
கிங் பனானந்த³த்தே²ரோ ததா³ ப⁴க³வதோ உபட்டா²கோ ஹோதீதி? ஹோதி, நோ ச கோ² உபட்டா²கட்டா²னங் லத்³தா⁴. ப⁴க³வதோ ஹி பட²மபோ³தி⁴யங் வீஸதிவஸ்ஸந்தரே நிப³த்³து⁴பட்டா²கோ நாம நத்தி². கதா³சி நாக³ஸமாலத்தே²ரோ ப⁴க³வந்தங் உபட்டா²ஸி, கதா³சி நாகி³தத்தே²ரோ, கதா³சி மேகி⁴யத்தே²ரோ, கதா³சி உபவாணத்தே²ரோ, கதா³சி ஸாக³தத்தே²ரோ, கதா³சி ஸுனக்க²த்தோ லிச்ச²விபுத்தோ. தே அத்தனோ ருசியா உபட்ட²ஹித்வா யதா³ இச்ச²ந்தி ததா³ பக்கமந்தி. ஆனந்த³த்தே²ரோ தேஸு தேஸு உபட்ட²ஹந்தேஸு அப்பொஸ்ஸுக்கோ ஹோதி, பக்கந்தேஸு ஸயமேவ வத்தபடிபத்திங் கரோதி. ப⁴க³வாபி கிஞ்சாபி மே ஞாதிஸெட்டோ² உபட்டா²கட்டா²னங் ந தாவ லப⁴தி, அத² கோ² ஏவரூபேஸு டா²னேஸு அயமேவ பதிரூபோதி அதி⁴வாஸேஸி. தேன வுத்தங் – ‘‘ஆயஸ்மா பனானந்தோ³ பத்த²புலகங் ஸிலாயங் பிஸித்வா ப⁴க³வதோ உபனாமேஸி, தங் ப⁴க³வா பரிபு⁴ஞ்ஜதீ’’தி.
Kiṃ panānandatthero tadā bhagavato upaṭṭhāko hotīti? Hoti, no ca kho upaṭṭhākaṭṭhānaṃ laddhā. Bhagavato hi paṭhamabodhiyaṃ vīsativassantare nibaddhupaṭṭhāko nāma natthi. Kadāci nāgasamālatthero bhagavantaṃ upaṭṭhāsi, kadāci nāgitatthero, kadāci meghiyatthero, kadāci upavāṇatthero, kadāci sāgatatthero, kadāci sunakkhatto licchaviputto. Te attano ruciyā upaṭṭhahitvā yadā icchanti tadā pakkamanti. Ānandatthero tesu tesu upaṭṭhahantesu appossukko hoti, pakkantesu sayameva vattapaṭipattiṃ karoti. Bhagavāpi kiñcāpi me ñātiseṭṭho upaṭṭhākaṭṭhānaṃ na tāva labhati, atha kho evarūpesu ṭhānesu ayameva patirūpoti adhivāsesi. Tena vuttaṃ – ‘‘āyasmā panānando patthapulakaṃ silāyaṃ pisitvā bhagavato upanāmesi, taṃ bhagavā paribhuñjatī’’ti.
நனு ச மனுஸ்ஸா து³ப்³பி⁴க்க²காலே அதிவிய உஸ்ஸாஹஜாதா புஞ்ஞானி கரொந்தி, அத்தனா அபு⁴ஞ்ஜித்வாபி பி⁴க்கூ²னங் தா³தப்³ப³ங் மஞ்ஞந்தி. தே ததா³ கஸ்மா கடச்சு²பி⁴க்க²ம்பி ந அத³ங்ஸு? அயஞ்ச வேரஞ்ஜோ ப்³ராஹ்மணோ மஹதா உஸ்ஸாஹேன ப⁴க³வந்தங் வஸ்ஸாவாஸங் யாசி, ஸோ கஸ்மா ப⁴க³வதோ அத்தி²பா⁴வம்பி ந ஜானாதீதி? வுச்சதே – மாராவட்டனாய. வேரஞ்ஜஞ்ஹி ப்³ராஹ்மணங் ப⁴க³வதோ ஸந்திகா பக்கந்தமத்தமேவ ஸகலஞ்ச நக³ரங் ஸமந்தா ச யோஜனமத்தங் யத்த² ஸக்கா புரேப⁴த்தங் பிண்டா³ய சரித்வா பச்சாக³ந்துங், தங் ஸப்³ப³ங் மாரோ ஆவட்டெத்வா மோஹெத்வா ஸப்³பே³ஸங் அஸல்லக்க²ணபா⁴வங் கத்வா பக்காமி. தஸ்மா ந கோசி அந்தமஸோ ஸாமீசிகம்மம்பி கத்தப்³ப³ங் மஞ்ஞித்த².
Nanu ca manussā dubbhikkhakāle ativiya ussāhajātā puññāni karonti, attanā abhuñjitvāpi bhikkhūnaṃ dātabbaṃ maññanti. Te tadā kasmā kaṭacchubhikkhampi na adaṃsu? Ayañca verañjo brāhmaṇo mahatā ussāhena bhagavantaṃ vassāvāsaṃ yāci, so kasmā bhagavato atthibhāvampi na jānātīti? Vuccate – mārāvaṭṭanāya. Verañjañhi brāhmaṇaṃ bhagavato santikā pakkantamattameva sakalañca nagaraṃ samantā ca yojanamattaṃ yattha sakkā purebhattaṃ piṇḍāya caritvā paccāgantuṃ, taṃ sabbaṃ māro āvaṭṭetvā mohetvā sabbesaṃ asallakkhaṇabhāvaṃ katvā pakkāmi. Tasmā na koci antamaso sāmīcikammampi kattabbaṃ maññittha.
கிங் பன ப⁴க³வாபி மாராவட்டனங் அஜானித்வாவ தத்த² வஸ்ஸங் உபக³தோதி? நோ அஜானித்வா. அத² கஸ்மா சம்பா-ஸாவத்தி²-ராஜக³ஹாதீ³னங் அஞ்ஞதரஸ்மிங் ந உபக³தோதி? திட்ட²ந்து சம்பா-ஸாவத்தி²-ராஜக³ஹாதீ³னி, ஸசேபி ப⁴க³வா தஸ்மிங் ஸங்வச்ச²ரே உத்தரகுருங் வா தித³ஸபுரங் வா க³ந்த்வா வஸ்ஸங் உபக³ச்செ²ய்ய, தம்பி மாரோ ஆவட்டெய்ய. ஸோ கிர தங் ஸங்வச்ச²ரங் அதிவிய ஆகா⁴தேன பரியுட்டி²தசித்தோ அஹோஸி. இத⁴ பன ப⁴க³வா இமங் அதிரேககாரணங் அத்³த³ஸ – ‘‘அஸ்ஸவாணிஜா பி⁴க்கூ²னங் ஸங்க³ஹங் கரிஸ்ஸந்தீ’’தி. தஸ்மா வேரஞ்ஜாயமேவ வஸ்ஸங் உபக³ச்சி².
Kiṃ pana bhagavāpi mārāvaṭṭanaṃ ajānitvāva tattha vassaṃ upagatoti? No ajānitvā. Atha kasmā campā-sāvatthi-rājagahādīnaṃ aññatarasmiṃ na upagatoti? Tiṭṭhantu campā-sāvatthi-rājagahādīni, sacepi bhagavā tasmiṃ saṃvacchare uttarakuruṃ vā tidasapuraṃ vā gantvā vassaṃ upagaccheyya, tampi māro āvaṭṭeyya. So kira taṃ saṃvaccharaṃ ativiya āghātena pariyuṭṭhitacitto ahosi. Idha pana bhagavā imaṃ atirekakāraṇaṃ addasa – ‘‘assavāṇijā bhikkhūnaṃ saṅgahaṃ karissantī’’ti. Tasmā verañjāyameva vassaṃ upagacchi.
கிங் பன மாரோ வாணிஜகே ஆவட்டேதுங் ந ஸக்கோதீதி? நோ ந ஸக்கோதி, தே பன ஆவட்டிதபரியோஸானே ஆக³மிங்ஸு. படினிவத்தித்வா கஸ்மா ந ஆவட்டேதீதி? அவிஸஹதாய. ந ஹி ஸோ ததா²க³தஸ்ஸ அபி⁴ஹடபி⁴க்கா²ய நிப³த்³த⁴தா³னஸ்ஸ அப்பிதவத்தஸ்ஸ அந்தராயங் காதுங் விஸஹதி. சதுன்னஞ்ஹி ந ஸக்கா அந்தராயோ காதுங். கதமேஸங் சதுன்னங்? ததா²க³தஸ்ஸ அபி⁴ஹடபி⁴க்கா²ஸங்கே²பேன வா நிப³த்³த⁴தா³னஸ்ஸ அப்பிதவத்தஸங்கே²பேன வா பரிச்சத்தானங் சதுன்னங் பச்சயானங் ந ஸக்கா கேனசி அந்தராயோ காதுங். பு³த்³தா⁴னங் ஜீவிதஸ்ஸ ந ஸக்கா கேனசி அந்தராயோ காதுங். அஸீதியா அனுப்³யஞ்ஜனானங் ப்³யாமப்பபா⁴ய வா ந ஸக்கா கேனசி அந்தராயோ காதுங். சந்தி³மஸூரியதே³வப்³ரஹ்மானம்பி ஹி பபா⁴ ததா²க³தஸ்ஸ அனுப்³யஞ்ஜனப்³யாமப்பபா⁴ப்பதே³ஸங் பத்வா விஹதானுபா⁴வா ஹொந்தி. பு³த்³தா⁴னங் ஸப்³ப³ஞ்ஞுதஞ்ஞாணஸ்ஸ ந ஸக்கா கேனசி அந்தராயோ காதுந்தி இமேஸங் சதுன்னங் ந ஸக்கா கேனசி அந்தராயோ காதுங். தஸ்மா மாரேன அகதந்தராயங் பி⁴க்க²ங் ப⁴க³வா ஸஸாவகஸங்கோ⁴ ததா³ பரிபு⁴ஞ்ஜதீதி வேதி³தப்³போ³.
Kiṃ pana māro vāṇijake āvaṭṭetuṃ na sakkotīti? No na sakkoti, te pana āvaṭṭitapariyosāne āgamiṃsu. Paṭinivattitvā kasmā na āvaṭṭetīti? Avisahatāya. Na hi so tathāgatassa abhihaṭabhikkhāya nibaddhadānassa appitavattassa antarāyaṃ kātuṃ visahati. Catunnañhi na sakkā antarāyo kātuṃ. Katamesaṃ catunnaṃ? Tathāgatassa abhihaṭabhikkhāsaṅkhepena vā nibaddhadānassa appitavattasaṅkhepena vā pariccattānaṃ catunnaṃ paccayānaṃ na sakkā kenaci antarāyo kātuṃ. Buddhānaṃ jīvitassa na sakkā kenaci antarāyo kātuṃ. Asītiyā anubyañjanānaṃ byāmappabhāya vā na sakkā kenaci antarāyo kātuṃ. Candimasūriyadevabrahmānampi hi pabhā tathāgatassa anubyañjanabyāmappabhāppadesaṃ patvā vihatānubhāvā honti. Buddhānaṃ sabbaññutaññāṇassa na sakkā kenaci antarāyo kātunti imesaṃ catunnaṃ na sakkā kenaci antarāyo kātuṃ. Tasmā mārena akatantarāyaṃ bhikkhaṃ bhagavā sasāvakasaṅgho tadā paribhuñjatīti veditabbo.
ஏவங் பரிபு⁴ஞ்ஜந்தோ ச ஏகதி³வஸங் அஸ்ஸோஸி கோ² ப⁴க³வா உது³க்க²லஸத்³த³ந்தி ப⁴க³வா பத்த²பத்த²புலகங் கொட்டெந்தானங் பி⁴க்கூ²னங் முஸலஸங்க⁴ட்டஜனிதங் உது³க்க²லஸத்³த³ங் ஸுணி. ததோ பரங் ஜானந்தாபி ததா²க³தாதி ஏவமாதி³ யங் பரதோ ‘‘கின்னு கோ² ஸோ, ஆனந்த³, உது³க்க²லஸத்³தோ³’’தி புச்சி², தஸ்ஸ பரிஹாரத³ஸ்ஸனத்த²ங் வுத்தங். தத்ராயங் ஸங்கே²பவண்ணனா – ததா²க³தா நாம ஜானந்தாபி ஸசே தாதி³ஸங் புச்சா²காரணங் ஹோதி, புச்ச²ந்தி. ஸசே பன தாதி³ஸங் புச்சா²காரணங் நத்தி², ஜானந்தாபி ந புச்ச²ந்தி. யஸ்மா பன பு³த்³தா⁴னங் அஜானநங் நாம நத்தி², தஸ்மா அஜானந்தாபீதி ந வுத்தங். காலங் விதி³த்வா புச்ச²ந்தீதி ஸசே தஸ்ஸா புச்சா²ய ஸோ காலோ ஹோதி, ஏவங் தங் காலங் விதி³த்வா புச்ச²ந்தி; ஸசே ந ஹோதி , ஏவம்பி காலங் விதி³த்வாவ ந புச்ச²ந்தி. ஏவங் புச்ச²ந்தாபி ச அத்த²ஸங்ஹிதங் ததா²க³தா புச்ச²ந்தி, யங் அத்த²னிஸ்ஸிதங் காரணனிஸ்ஸிதங், ததே³வ புச்ச²ந்தி, நோ அனத்த²ஸங்ஹிதங். கஸ்மா? யஸ்மா அனத்த²ஸங்ஹிதே ஸேதுகா⁴தோ ததா²க³தானங். ஸேது வுச்சதி மக்³கோ³, மக்³கே³னேவ தாதி³ஸஸ்ஸ வசனஸ்ஸ கா⁴தோ, ஸமுச்சே²தோ³தி வுத்தங் ஹோதி.
Evaṃ paribhuñjanto ca ekadivasaṃ assosi kho bhagavā udukkhalasaddanti bhagavā patthapatthapulakaṃ koṭṭentānaṃ bhikkhūnaṃ musalasaṅghaṭṭajanitaṃ udukkhalasaddaṃ suṇi. Tato paraṃ jānantāpi tathāgatāti evamādi yaṃ parato ‘‘kinnu kho so, ānanda, udukkhalasaddo’’ti pucchi, tassa parihāradassanatthaṃ vuttaṃ. Tatrāyaṃ saṅkhepavaṇṇanā – tathāgatā nāma jānantāpi sace tādisaṃ pucchākāraṇaṃ hoti, pucchanti. Sace pana tādisaṃ pucchākāraṇaṃ natthi, jānantāpi na pucchanti. Yasmā pana buddhānaṃ ajānanaṃ nāma natthi, tasmā ajānantāpīti na vuttaṃ. Kālaṃ viditvā pucchantīti sace tassā pucchāya so kālo hoti, evaṃ taṃ kālaṃ viditvā pucchanti; sace na hoti , evampi kālaṃ viditvāva na pucchanti. Evaṃ pucchantāpi ca atthasaṃhitaṃ tathāgatā pucchanti, yaṃ atthanissitaṃ kāraṇanissitaṃ, tadeva pucchanti, no anatthasaṃhitaṃ. Kasmā? Yasmā anatthasaṃhite setughāto tathāgatānaṃ. Setu vuccati maggo, maggeneva tādisassa vacanassa ghāto, samucchedoti vuttaṃ hoti.
இதா³னி அத்த²ஸங்ஹிதந்தி எத்த² யங் அத்த²ஸன்னிஸ்ஸிதங் வசனங் ததா²க³தா புச்ச²ந்தி, தங் த³ஸ்ஸெந்தோ ‘‘த்³வீஹாகாரேஹீ’’தி ஆதி³மாஹ. தத்த² ஆகாரேஹீதி காரணேஹி. த⁴ம்மங் வா தே³ஸெஸ்ஸாமாதி அட்டு²ப்பத்தியுத்தங் ஸுத்தங் வா புப்³ப³சரிதகாரணயுத்தங் ஜாதகங் வா கத²யிஸ்ஸாம. ஸாவகானங் வா ஸிக்கா²பத³ங் பஞ்ஞபெஸ்ஸாமாதி ஸாவகானங் வா தாய புச்சா²ய வீதிக்கமங் பாகடங் கத்வா க³ருகங் வா லஹுகங் வா ஸிக்கா²பத³ங் பஞ்ஞபெஸ்ஸாம ஆணங் ட²பெஸ்ஸாமாதி.
Idāni atthasaṃhitanti ettha yaṃ atthasannissitaṃ vacanaṃ tathāgatā pucchanti, taṃ dassento ‘‘dvīhākārehī’’ti ādimāha. Tattha ākārehīti kāraṇehi. Dhammaṃ vā desessāmāti aṭṭhuppattiyuttaṃ suttaṃ vā pubbacaritakāraṇayuttaṃ jātakaṃ vā kathayissāma. Sāvakānaṃ vā sikkhāpadaṃpaññapessāmāti sāvakānaṃ vā tāya pucchāya vītikkamaṃ pākaṭaṃ katvā garukaṃ vā lahukaṃ vā sikkhāpadaṃ paññapessāma āṇaṃ ṭhapessāmāti.
அத² கோ² ப⁴க³வா…பே॰… ஏதமத்த²ங் ஆரோசேஸீதி எத்த² நத்தி² கிஞ்சி வத்தப்³ப³ங். புப்³பே³ வுத்தமேவ ஹி பி⁴க்கூ²னங் பத்த²பத்த²புலகபடிலாப⁴ங் ஸல்லஹுகவுத்திதங் ஸாமபாகபரிமோசனஞ்ச ஆரோசெந்தோ ஏதமத்த²ங் ஆரோசேஸீதி வுச்சதி. ‘‘ஸாது⁴ ஸாது⁴, ஆனந்தா³’’தி இத³ங் பன ப⁴க³வா ஆயஸ்மந்தங் ஆனந்த³ங் ஸம்பஹங்ஸெந்தோ ஆஹ. ஸாது⁴காரங் பன த³த்வா த்³வீஸு ஆகாரேஸு ஏகங் க³ஹெத்வா த⁴ம்மங் தே³ஸெந்தோ ஆஹ – ‘‘தும்ஹேஹி, ஆனந்த³, ஸப்புரிஸேஹி விஜிதங், பச்சி²மா ஜனதா ஸாலிமங்ஸோத³னங் அதிமஞ்ஞிஸ்ஸதீ’’தி. தத்ராயமதி⁴ப்பாயோ – தும்ஹேஹி, ஆனந்த³, ஸப்புரிஸேஹி ஏவங் து³ப்³பி⁴க்கே² து³ல்லப⁴பிண்டே³ இமாய ஸல்லஹுகவுத்திதாய இமினா ச ஸல்லேகே²ன விஜிதங். கிங் விஜிதந்தி? து³ப்³பி⁴க்க²ங் விஜிதங், லோபோ⁴ விஜிதோ, இச்சா²சாரோ விஜிதோ. கத²ங்? ‘‘அயங் வேரஞ்ஜா து³ப்³பி⁴க்கா², ஸமந்ததோ பன அனந்தரா கா³மனிக³மா ப²லபா⁴ரனமிதஸஸ்ஸா ஸுபி⁴க்கா² ஸுலப⁴பிண்டா³. ஏவங் ஸந்தேபி ப⁴க³வா இதே⁴வ அம்ஹே நிக்³க³ண்ஹித்வா வஸதீ’’தி ஏகபி⁴க்கு²ஸ்ஸபி சிந்தா வா விகா⁴தோ வா நத்தி². ஏவங் தாவ து³ப்³பி⁴க்க²ங் விஜிதங் அபி⁴பூ⁴தங் அத்தனோ வஸே வத்திதங்.
Atha kho bhagavā…pe… etamatthaṃ ārocesīti ettha natthi kiñci vattabbaṃ. Pubbe vuttameva hi bhikkhūnaṃ patthapatthapulakapaṭilābhaṃ sallahukavuttitaṃ sāmapākaparimocanañca ārocento etamatthaṃ ārocesīti vuccati. ‘‘Sādhusādhu, ānandā’’ti idaṃ pana bhagavā āyasmantaṃ ānandaṃ sampahaṃsento āha. Sādhukāraṃ pana datvā dvīsu ākāresu ekaṃ gahetvā dhammaṃ desento āha – ‘‘tumhehi, ānanda, sappurisehi vijitaṃ, pacchimā janatā sālimaṃsodanaṃ atimaññissatī’’ti. Tatrāyamadhippāyo – tumhehi, ānanda, sappurisehi evaṃ dubbhikkhe dullabhapiṇḍe imāya sallahukavuttitāya iminā ca sallekhena vijitaṃ. Kiṃ vijitanti? Dubbhikkhaṃ vijitaṃ, lobho vijito, icchācāro vijito. Kathaṃ? ‘‘Ayaṃ verañjā dubbhikkhā, samantato pana anantarā gāmanigamā phalabhāranamitasassā subhikkhā sulabhapiṇḍā. Evaṃ santepi bhagavā idheva amhe niggaṇhitvā vasatī’’ti ekabhikkhussapi cintā vā vighāto vā natthi. Evaṃ tāva dubbhikkhaṃ vijitaṃ abhibhūtaṃ attano vase vattitaṃ.
கத²ங் லோபோ⁴ விஜிதோ? ‘‘அயங் வேரஞ்ஜா து³ப்³பி⁴க்கா², ஸமந்ததோ பன அனந்தரா கா³மனிக³மா ப²லபா⁴ரனமிதஸஸ்ஸா ஸுபி⁴க்கா² ஸுலப⁴பிண்டா³ . ஹந்த³ மயங் தத்த² க³ந்த்வா பரிபு⁴ஞ்ஜிஸ்ஸாமா’’தி லோப⁴வஸேன ஏகபி⁴க்கு²னாபி ரத்திச்சே²தோ³ வா ‘‘பச்சி²மிகாய தத்த² வஸ்ஸங் உபக³ச்சா²மா’’தி வஸ்ஸச்சே²தோ³ வா ந கதோ. ஏவங் லோபோ⁴ விஜிதோ.
Kathaṃ lobho vijito? ‘‘Ayaṃ verañjā dubbhikkhā, samantato pana anantarā gāmanigamā phalabhāranamitasassā subhikkhā sulabhapiṇḍā . Handa mayaṃ tattha gantvā paribhuñjissāmā’’ti lobhavasena ekabhikkhunāpi ratticchedo vā ‘‘pacchimikāya tattha vassaṃ upagacchāmā’’ti vassacchedo vā na kato. Evaṃ lobho vijito.
கத²ங் இச்சா²சாரோ விஜிதோ? அயங் வேரஞ்ஜா து³ப்³பி⁴க்கா², இமே ச மனுஸ்ஸா அம்ஹே த்³வே தயோ மாஸே வஸந்தேபி ந கிஸ்மிஞ்சி மஞ்ஞந்தி. யங்னூன மயங் கு³ணவாணிஜ்ஜங் கத்வா ‘‘அஸுகோ பி⁴க்கு² பட²மஸ்ஸ ஜா²னஸ்ஸ லாபீ⁴…பே॰… அஸுகோ ச²ளபி⁴ஞ்ஞோதி ஏவங் மனுஸ்ஸானங் அஞ்ஞமஞ்ஞங் பகாஸெத்வா குச்சி²ங் படிஜக்³கி³த்வா பச்சா² ஸீலங் அதி⁴ட்ட²ஹெய்யாமா’’தி ஏகபி⁴க்கு²னாபி ஏவரூபா இச்சா² ந உப்பாதி³தா. ஏவங் இச்சா²சாரோ விஜிதோ அபி⁴பூ⁴தோ அத்தனோ வஸே வத்திதோதி.
Kathaṃ icchācāro vijito? Ayaṃ verañjā dubbhikkhā, ime ca manussā amhe dve tayo māse vasantepi na kismiñci maññanti. Yaṃnūna mayaṃ guṇavāṇijjaṃ katvā ‘‘asuko bhikkhu paṭhamassa jhānassa lābhī…pe… asuko chaḷabhiññoti evaṃ manussānaṃ aññamaññaṃ pakāsetvā kucchiṃ paṭijaggitvā pacchā sīlaṃ adhiṭṭhaheyyāmā’’ti ekabhikkhunāpi evarūpā icchā na uppāditā. Evaṃ icchācāro vijito abhibhūto attano vase vattitoti.
அனாக³தே பன பச்சி²மா ஜனதா விஹாரே நிஸின்னா அப்பகஸிரேனேவ லபி⁴த்வாபி ‘‘கிங் இத³ங் உத்தண்டு³லங் அதிகிலின்னங் அலோணங் அதிலோணங் அனம்பி³லங் அச்சம்பி³லங், கோ இமினா அத்தோ²’’தி ஆதி³னா நயேன ஸாலிமங்ஸோத³னங் அதிமஞ்ஞிஸ்ஸதி, ஓஞ்ஞாதங் அவஞ்ஞாதங் கரிஸ்ஸதி. அத² வா ஜனபதோ³ நாம ந ஸப்³ப³காலங் து³ப்³பி⁴க்கோ² ஹோதி. ஏகதா³ து³ப்³பி⁴க்கோ² ஹோதி, ஏகதா³ ஸுபி⁴க்கோ² ஹோதி. ஸ்வாயங் யதா³ ஸுபி⁴க்கோ² ப⁴விஸ்ஸதி, ததா³ தும்ஹாகங் ஸப்புரிஸானங் இமாய படிபத்தியா பஸன்னா மனுஸ்ஸா பி⁴க்கூ²னங் யாகு³க²ஜ்ஜகாதி³ப்பபே⁴தே³ன அனேகப்பகாரங் ஸாலிவிகதிங் மங்ஸோத³னஞ்ச தா³தப்³ப³ங் மஞ்ஞிஸ்ஸந்தி. தங் தும்ஹே நிஸ்ஸாய உப்பன்னங் ஸக்காரங் தும்ஹாகங் ஸப்³ரஹ்மசாரீஸங்கா²தா பச்சி²மா ஜனதா தும்ஹாகங் அந்தரே நிஸீதி³த்வா அனுப⁴வமானாவ அதிமஞ்ஞிஸ்ஸதி, தப்பச்சயங் மானஞ்ச ஓமானஞ்ச கரிஸ்ஸதி. கத²ங்? கஸ்மா எத்தகங் பக்கங், கிங் தும்ஹாகங் பா⁴ஜனானி நத்தி², யத்த² அத்தனோ ஸந்தகங் பக்கி²பித்வா ட²பெய்யாதா²தி.
Anāgate pana pacchimā janatā vihāre nisinnā appakasireneva labhitvāpi ‘‘kiṃ idaṃ uttaṇḍulaṃ atikilinnaṃ aloṇaṃ atiloṇaṃ anambilaṃ accambilaṃ, ko iminā attho’’ti ādinā nayena sālimaṃsodanaṃ atimaññissati, oññātaṃ avaññātaṃ karissati. Atha vā janapado nāma na sabbakālaṃ dubbhikkho hoti. Ekadā dubbhikkho hoti, ekadā subhikkho hoti. Svāyaṃ yadā subhikkho bhavissati, tadā tumhākaṃ sappurisānaṃ imāya paṭipattiyā pasannā manussā bhikkhūnaṃ yāgukhajjakādippabhedena anekappakāraṃ sālivikatiṃ maṃsodanañca dātabbaṃ maññissanti. Taṃ tumhe nissāya uppannaṃ sakkāraṃ tumhākaṃ sabrahmacārīsaṅkhātā pacchimā janatā tumhākaṃ antare nisīditvā anubhavamānāva atimaññissati, tappaccayaṃ mānañca omānañca karissati. Kathaṃ? Kasmā ettakaṃ pakkaṃ, kiṃ tumhākaṃ bhājanāni natthi, yattha attano santakaṃ pakkhipitvā ṭhapeyyāthāti.
து³ப்³பி⁴க்க²கதா² நிட்டி²தா.
Dubbhikkhakathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / வேரஞ்ஜகண்ட³ங் • Verañjakaṇḍaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / உபாஸகத்தபடிவேத³னாகதா²வண்ணனா • Upāsakattapaṭivedanākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / உபாஸகத்தபடிவேத³னாகதா²வண்ணனா • Upāsakattapaṭivedanākathāvaṇṇanā
