| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
দুব্ভিক্খকথা
Dubbhikkhakathā
১৬. তেন খো পন সমযেন ৰেরঞ্জা দুব্ভিক্খা হোতীতি যস্মিং সমযে ৰেরঞ্জেন ব্রাহ্মণেন ভগৰা ৰেরঞ্জং উপনিস্সায ৰস্সাৰাসং যাচিতো , তেন সমযেন ৰেরঞ্জা দুব্ভিক্খা হোতি। দুব্ভিক্খাতি দুল্লভভিক্খা; সা পন দুল্লভভিক্খতা যত্থ মনুস্সা অস্সদ্ধা হোন্তি অপ্পসন্না, তত্থ সুসস্সকালেপি অতিসমগ্ঘেপি পুব্বণ্ণাপরণ্ণে হোতি। ৰেরঞ্জাযং পন যস্মা ন তথা অহোসি, অপিচ খো দুসস্সতায ছাতকদোসেন অহোসি তস্মা তমত্থং দস্সেন্তো দ্ৰীহিতিকাতিআদিমাহ। তত্থ দ্ৰীহিতিকাতি দ্ৰিধা পৰত্তঈহিতিকা। ঈহিতং নাম ইরিযা দ্ৰিধা পৰত্তা – চিত্তইরিযা, চিত্তঈহা। ‘‘এত্থ লচ্ছাম নু খো কিঞ্চি ভিক্খমানা ন লচ্ছামা’’তি, ‘‘জীৰিতুং ৰা সক্খিস্সাম নু খো নো’’তি অযমেত্থ অধিপ্পাযো।
16.Tena kho pana samayena verañjā dubbhikkhā hotīti yasmiṃ samaye verañjena brāhmaṇena bhagavā verañjaṃ upanissāya vassāvāsaṃ yācito , tena samayena verañjā dubbhikkhā hoti. Dubbhikkhāti dullabhabhikkhā; sā pana dullabhabhikkhatā yattha manussā assaddhā honti appasannā, tattha susassakālepi atisamagghepi pubbaṇṇāparaṇṇe hoti. Verañjāyaṃ pana yasmā na tathā ahosi, apica kho dusassatāya chātakadosena ahosi tasmā tamatthaṃ dassento dvīhitikātiādimāha. Tattha dvīhitikāti dvidhā pavattaīhitikā. Īhitaṃ nāma iriyā dvidhā pavattā – cittairiyā, cittaīhā. ‘‘Ettha lacchāma nu kho kiñci bhikkhamānā na lacchāmā’’ti, ‘‘jīvituṃ vā sakkhissāma nu kho no’’ti ayamettha adhippāyo.
অথ ৰা দ্ৰীহিতিকাতি দুজ্জীৰিকা, ঈহিতং ঈহা ইরিযনং পৰত্তনং জীৰিতন্তিআদীনি পদানি একত্থানি। তস্মা দুক্খেন ঈহিতং এত্থ পৰত্ততীতি দ্ৰীহিতিকাতি অযমেত্থ পদত্থো। সেতট্ঠিকাতি সেতকানি অট্ঠীনি এত্থাতি সেতট্ঠিকা। দিৰসম্পি যাচিত্ৰা কিঞ্চি অলদ্ধা মতানং কপণমনুস্সানং অহিচ্ছত্তকৰণ্ণেহি অট্ঠীহি তত্র তত্র পরিকিণ্ণাতি ৰুত্তং হোতি। সেতট্টিকাতিপি পাঠো। তস্সত্থো – সেতা অট্টি এত্থাতি সেতট্টিকা। অট্টীতি আতুরতা ব্যাধি রোগো। তত্থ চ সস্সানং গব্ভগ্গহণকালে সেতকরোগেন উপহতমেৰ পচ্ছিন্নখীরং অগ্গহিততণ্ডুলং পণ্ডরপণ্ডরং সালিসীসং ৰা যৰগোধূমসীসং ৰা নিক্খমতি, তস্মা ‘‘সেতট্টিকা’’তি ৰুচ্চতি।
Atha vā dvīhitikāti dujjīvikā, īhitaṃ īhā iriyanaṃ pavattanaṃ jīvitantiādīni padāni ekatthāni. Tasmā dukkhena īhitaṃ ettha pavattatīti dvīhitikāti ayamettha padattho. Setaṭṭhikāti setakāni aṭṭhīni etthāti setaṭṭhikā. Divasampi yācitvā kiñci aladdhā matānaṃ kapaṇamanussānaṃ ahicchattakavaṇṇehi aṭṭhīhi tatra tatra parikiṇṇāti vuttaṃ hoti. Setaṭṭikātipi pāṭho. Tassattho – setā aṭṭi etthāti setaṭṭikā. Aṭṭīti āturatā byādhi rogo. Tattha ca sassānaṃ gabbhaggahaṇakāle setakarogena upahatameva pacchinnakhīraṃ aggahitataṇḍulaṃ paṇḍarapaṇḍaraṃ sālisīsaṃ vā yavagodhūmasīsaṃ vā nikkhamati, tasmā ‘‘setaṭṭikā’’ti vuccati.
ৰপ্পকালে সুট্ঠু অভিসঙ্খরিত্ৰাপি ৰুত্তসস্সং তত্থ সলাকা এৰ সম্পজ্জতীতি সলাকাৰুত্তা; সলাকায ৰা তত্থ জীৰিতং পৰত্তেন্তীতি সলাকাৰুত্তা। কিং ৰুত্তং হোতি? তত্থ কির ধঞ্ঞৰিক্কযকানং সন্তিকং কযকেসু গতেসু দুব্বলমনুস্সে অভিভৰিত্ৰা বলৰমনুস্সাৰ ধঞ্ঞং কিণিত্ৰা গচ্ছন্তি। দুব্বলমনুস্সা অলভমানা মহাসদ্দং করোন্তি। ধঞ্ঞৰিক্কযকা ‘‘সব্বেসং সঙ্গহং করিস্সামা’’তি ধঞ্ঞকরণট্ঠানে ধঞ্ঞমাপকং নিসীদাপেত্ৰা একপস্সে ৰণ্ণজ্ঝক্খং নিসীদাপেসুং। ধঞ্ঞত্থিকা ৰণ্ণজ্ঝক্খস্স সন্তিকং গচ্ছন্তি। সো আগতপটিপাটিযা মূলং গহেত্ৰা ‘‘ইত্থন্নামস্স এত্তকং দাতব্ব’’ন্তি সলাকং লিখিত্ৰা দেতি, তে তং গহেত্ৰা ধঞ্ঞমাপকস্স সন্তিকং গন্ত্ৰা দিন্নপটিপাটিযা ধঞ্ঞং গণ্হন্তি। এৰং সলাকায তত্থ জীৰিতং পৰত্তেন্তীতি সলাকাৰুত্তা।
Vappakāle suṭṭhu abhisaṅkharitvāpi vuttasassaṃ tattha salākā eva sampajjatīti salākāvuttā; salākāya vā tattha jīvitaṃ pavattentīti salākāvuttā. Kiṃ vuttaṃ hoti? Tattha kira dhaññavikkayakānaṃ santikaṃ kayakesu gatesu dubbalamanusse abhibhavitvā balavamanussāva dhaññaṃ kiṇitvā gacchanti. Dubbalamanussā alabhamānā mahāsaddaṃ karonti. Dhaññavikkayakā ‘‘sabbesaṃ saṅgahaṃ karissāmā’’ti dhaññakaraṇaṭṭhāne dhaññamāpakaṃ nisīdāpetvā ekapasse vaṇṇajjhakkhaṃ nisīdāpesuṃ. Dhaññatthikā vaṇṇajjhakkhassa santikaṃ gacchanti. So āgatapaṭipāṭiyā mūlaṃ gahetvā ‘‘itthannāmassa ettakaṃ dātabba’’nti salākaṃ likhitvā deti, te taṃ gahetvā dhaññamāpakassa santikaṃ gantvā dinnapaṭipāṭiyā dhaññaṃ gaṇhanti. Evaṃ salākāya tattha jīvitaṃ pavattentīti salākāvuttā.
ন সুকরা উঞ্ছেন পগ্গহেন যাপেতুন্তি পগ্গহেন যো উঞ্ছো, তেন যাপেতুং ন সুকরা। পত্তং গহেত্ৰা যং অরিযা উঞ্ছং করোন্তি, ভিক্খাচরিযং চরন্তি, তেন উঞ্ছেন যাপেতুং ন সুকরাতি ৰুত্তং হোতি। তদা কির তত্থ সত্তট্ঠগামে পিণ্ডায চরিত্ৰা একদিৰসম্পি যাপনমত্তং ন লভন্তি।
Na sukarā uñchena paggahena yāpetunti paggahena yo uñcho, tena yāpetuṃ na sukarā. Pattaṃ gahetvā yaṃ ariyā uñchaṃ karonti, bhikkhācariyaṃ caranti, tena uñchena yāpetuṃ na sukarāti vuttaṃ hoti. Tadā kira tattha sattaṭṭhagāme piṇḍāya caritvā ekadivasampi yāpanamattaṃ na labhanti.
তেন খো পন সমযেন উত্তরাপথকা অস্সৰাণিজা…পে॰… অস্সোসি খো ভগৰা উদুক্খলসদ্দন্তি – তেনাতি যস্মিং সমযে ভগৰা ৰেরঞ্জং উপনিস্সায ৰস্সাৰাসং উপগতো তেন সমযেন। উত্তরাপথৰাসিকা উত্তরাপথতো ৰা আগতত্তা এৰং লদ্ধৰোহারা অস্সৰাণিজা উত্তরাপথে অস্সানং উট্ঠানট্ঠানে পঞ্চ অস্সসতানি গহেত্ৰা দিগুণং তিগুণং লাভং পত্থযমানা দেসন্তরং গচ্ছন্তা তেহি অত্তনো ৰিক্কাযিকভণ্ডভূতেহি পঞ্চমত্তেহি অস্সসতেহি ৰেরঞ্জং ৰস্সাৰাসং উপগতা হোন্তি। কস্মা? ন হি সক্কা তস্মিং দেসে ৰস্সিকে চত্তারো মাসে অদ্ধানং পটিপজ্জিতুং। উপগচ্ছন্তা চ বহিনগরে উদকেন অনজ্ঝোত্থরণীযে ঠানে অত্তনো চ ৰাসাগারানি অস্সানঞ্চ মন্দিরং কারাপেত্ৰা ৰতিযা পরিক্খিপিংসু। তানি তেসং ৰসনট্ঠানানি ‘‘অস্সমণ্ডলিকাযো’’তি পঞ্ঞাযিংসু। তেনাহ – ‘‘তেহি অস্সমণ্ডলিকাসু ভিক্খূনং পত্থপত্থপুলকং পঞ্ঞত্তং হোতী’’তি। পত্থপত্থপুলকন্তি একমেকস্স ভিক্খুনো পত্থপত্থপমাণং পুলকং। পত্থো নাম নাল়িমত্তং হোতি, একস্স পুরিসস্স অলং যাপনায। ৰুত্তম্পি হেতং – ‘‘পত্থোদনো নালমযং দুৰিন্ন’’ন্তি (জা॰ ২.২১.১৯২)। পুলকং নাম নিত্থুসং কত্ৰা উস্সেদেত্ৰা গহিতযৰতণ্ডুলা ৰুচ্চন্তি। যদি হি সথুসা হোন্তি, পাণকা ৰিজ্ঝন্তি, অদ্ধানক্খমা ন হোন্তি। তস্মা তে ৰাণিজা অদ্ধানক্খমং কত্ৰা যৰতণ্ডুলমাদায অদ্ধানং পটিপজ্জন্তি ‘‘যত্থ অস্সানং খাদনীযং তিণং দুল্লভং ভৰিস্সতি, তত্থেতং অস্সভত্তং ভৰিস্সতী’’তি।
Tena kho pana samayena uttarāpathakā assavāṇijā…pe… assosi kho bhagavā udukkhalasaddanti – tenāti yasmiṃ samaye bhagavā verañjaṃ upanissāya vassāvāsaṃ upagato tena samayena. Uttarāpathavāsikā uttarāpathato vā āgatattā evaṃ laddhavohārā assavāṇijā uttarāpathe assānaṃ uṭṭhānaṭṭhāne pañca assasatāni gahetvā diguṇaṃ tiguṇaṃ lābhaṃ patthayamānā desantaraṃ gacchantā tehi attano vikkāyikabhaṇḍabhūtehi pañcamattehi assasatehi verañjaṃ vassāvāsaṃ upagatā honti. Kasmā? Na hi sakkā tasmiṃ dese vassike cattāro māse addhānaṃ paṭipajjituṃ. Upagacchantā ca bahinagare udakena anajjhottharaṇīye ṭhāne attano ca vāsāgārāni assānañca mandiraṃ kārāpetvā vatiyā parikkhipiṃsu. Tāni tesaṃ vasanaṭṭhānāni ‘‘assamaṇḍalikāyo’’ti paññāyiṃsu. Tenāha – ‘‘tehi assamaṇḍalikāsu bhikkhūnaṃ patthapatthapulakaṃ paññattaṃ hotī’’ti. Patthapatthapulakanti ekamekassa bhikkhuno patthapatthapamāṇaṃ pulakaṃ. Pattho nāma nāḷimattaṃ hoti, ekassa purisassa alaṃ yāpanāya. Vuttampi hetaṃ – ‘‘patthodano nālamayaṃ duvinna’’nti (jā. 2.21.192). Pulakaṃ nāma nitthusaṃ katvā ussedetvā gahitayavataṇḍulā vuccanti. Yadi hi sathusā honti, pāṇakā vijjhanti, addhānakkhamā na honti. Tasmā te vāṇijā addhānakkhamaṃ katvā yavataṇḍulamādāya addhānaṃ paṭipajjanti ‘‘yattha assānaṃ khādanīyaṃ tiṇaṃ dullabhaṃ bhavissati, tatthetaṃ assabhattaṃ bhavissatī’’ti.
কস্মা পন তেহি তং ভিক্খূনং পঞ্ঞত্তন্তি? ৰুচ্চতে – ‘‘ন হি তে দক্খিণাপথমনুস্সা ৰিয অস্সদ্ধা অপ্পসন্না, তে পন সদ্ধা পসন্না বুদ্ধমামকা, ধম্মমামকা, সঙ্ঘমামকা; তে পুব্বণ্হসমযং কেনচিদেৰ করণীযেন নগরং পৰিসন্তা দ্ৰে তযো দিৰসে অদ্দসংসু সত্তট্ঠ ভিক্খূ সুনিৰত্থে সুপারুতে ইরিযাপথসম্পন্নে সকলম্পি নগরং পিণ্ডায চরিত্ৰা কিঞ্চি অলভমানে। দিস্ৰান নেসং এতদহোসি – ‘‘অয্যা ইমং নগরং উপনিস্সায ৰস্সং উপগতা; ছাতকঞ্চ ৰত্ততি, ন চ কিঞ্চি লভন্তি, অতিৰিয কিলমন্তি। মযঞ্চম্হ আগন্তুকা, ন সক্কোম নেসং দেৰসিকং যাগুঞ্চ ভত্তঞ্চ পটিযাদেতুং। অম্হাকং পন অস্সা সাযঞ্চ পাতো চ দ্ৰিক্খত্তুং ভত্তং লভন্তি। যংনূন মযং একমেকস্স অস্সস্স পাতরাসভত্ততো একমেকস্স ভিক্খুনো পত্থপত্থপুলকং দদেয্যাম। এৰং অয্যা চ ন কিলমিস্সন্তি , অস্সা চ যাপেস্সন্তী’’তি। তে ভিক্খূনং সন্তিকং গন্ত্ৰা এতমত্থং আরোচেত্ৰা ‘‘ভন্তে, তুম্হে পত্থপত্থপুলকং পটিগ্গহেত্ৰা যং ৰা তং ৰা কত্ৰা পরিভুঞ্জথা’’তি যাচিত্ৰা দেৰসিকং পত্থপত্থপুলকং পঞ্ঞপেসুং। তেন ৰুত্তং – ‘‘তেহি অস্সমণ্ডলিকাসু ভিক্খূনং পত্থপত্থপুলকং পঞ্ঞত্তং হোতী’’তি।
Kasmā pana tehi taṃ bhikkhūnaṃ paññattanti? Vuccate – ‘‘na hi te dakkhiṇāpathamanussā viya assaddhā appasannā, te pana saddhā pasannā buddhamāmakā, dhammamāmakā, saṅghamāmakā; te pubbaṇhasamayaṃ kenacideva karaṇīyena nagaraṃ pavisantā dve tayo divase addasaṃsu sattaṭṭha bhikkhū sunivatthe supārute iriyāpathasampanne sakalampi nagaraṃ piṇḍāya caritvā kiñci alabhamāne. Disvāna nesaṃ etadahosi – ‘‘ayyā imaṃ nagaraṃ upanissāya vassaṃ upagatā; chātakañca vattati, na ca kiñci labhanti, ativiya kilamanti. Mayañcamha āgantukā, na sakkoma nesaṃ devasikaṃ yāguñca bhattañca paṭiyādetuṃ. Amhākaṃ pana assā sāyañca pāto ca dvikkhattuṃ bhattaṃ labhanti. Yaṃnūna mayaṃ ekamekassa assassa pātarāsabhattato ekamekassa bhikkhuno patthapatthapulakaṃ dadeyyāma. Evaṃ ayyā ca na kilamissanti , assā ca yāpessantī’’ti. Te bhikkhūnaṃ santikaṃ gantvā etamatthaṃ ārocetvā ‘‘bhante, tumhe patthapatthapulakaṃ paṭiggahetvā yaṃ vā taṃ vā katvā paribhuñjathā’’ti yācitvā devasikaṃ patthapatthapulakaṃ paññapesuṃ. Tena vuttaṃ – ‘‘tehi assamaṇḍalikāsu bhikkhūnaṃ patthapatthapulakaṃ paññattaṃ hotī’’ti.
পঞ্ঞত্তন্তি নিচ্চভত্তসঙ্খেপেন ঠপিতং। ইদানি ভিক্খূ পুব্বণ্হসমযং নিৰাসেত্ৰাতিআদীসু পুব্বণ্হসমযন্তি দিৰসস্স পুব্বভাগসমযং, পুব্বণ্হসমযেতি অত্থো। পুব্বণ্হে ৰা সমযং পুব্বণ্হসমযং, পুব্বণ্হে একং খণন্তি ৰুত্তং হোতি। এৰং অচ্চন্তসংযোগে উপযোগৰচনং লব্ভতি। নিৰাসেত্ৰাতি পরিদহিত্ৰা, ৰিহারনিৰাসনপরিৰত্তনৰসেনেতং ৰেদিতব্বং। ন হি তে ততো পুব্বে অনিৰত্থা অহেসুং। পত্তচীৰরমাদাযাতি পত্তং হত্থেহি চীৰরং কাযেন আদিযিত্ৰা সম্পটিচ্ছাদেত্ৰা, ধারেত্ৰাতি অত্থো। যেন ৰা তেন ৰা হি পকারেন গণ্হন্তা আদাযইচ্চেৰ ৰুচ্চন্তি, যথা ‘‘সমাদাযেৰ পক্কমতী’’তি (দী॰ নি॰ ১.২১)। পিণ্ডং অলভমানাতি সকলম্পি ৰেরঞ্জং চরিত্ৰা তিট্ঠতু পিণ্ডো, অন্তমসো ‘‘অতিচ্ছথা’’তি ৰাচম্পি অলভমানা।
Paññattanti niccabhattasaṅkhepena ṭhapitaṃ. Idāni bhikkhū pubbaṇhasamayaṃ nivāsetvātiādīsu pubbaṇhasamayanti divasassa pubbabhāgasamayaṃ, pubbaṇhasamayeti attho. Pubbaṇhe vā samayaṃ pubbaṇhasamayaṃ, pubbaṇhe ekaṃ khaṇanti vuttaṃ hoti. Evaṃ accantasaṃyoge upayogavacanaṃ labbhati. Nivāsetvāti paridahitvā, vihāranivāsanaparivattanavasenetaṃ veditabbaṃ. Na hi te tato pubbe anivatthā ahesuṃ. Pattacīvaramādāyāti pattaṃ hatthehi cīvaraṃ kāyena ādiyitvā sampaṭicchādetvā, dhāretvāti attho. Yena vā tena vā hi pakārena gaṇhantā ādāyaicceva vuccanti, yathā ‘‘samādāyeva pakkamatī’’ti (dī. ni. 1.21). Piṇḍaṃ alabhamānāti sakalampi verañjaṃ caritvā tiṭṭhatu piṇḍo, antamaso ‘‘aticchathā’’ti vācampi alabhamānā.
পত্থপত্থপুলকং আরামং আহরিত্ৰাতি গতগতট্ঠানে লদ্ধং একমেকং পত্থপত্থপুলকং গহেত্ৰা আরামং নেত্ৰা। উদুক্খলে কোট্টেত্ৰা কোট্টেত্ৰা পরিভুঞ্জন্তীতি থেরানং কোচি কপ্পিযকারকো নত্থি, যো নেসং তং গহেত্ৰা যাগুং ৰা ভত্তং ৰা পচেয্য। সামম্পি পচনং সমণসারুপ্পং ন হোতি ন চ ৰট্টতি। তে এৰং নো সল্লহুকৰুত্তিতা চ ভৰিস্সতি, সামপাকপরিমোচনঞ্চাতি অট্ঠ অট্ঠ জনা ৰা দস দস জনা ৰা একতো হুত্ৰা উদুক্খলে কোট্টেত্ৰা কোট্টেত্ৰা সকং সকং পটিৰীসং উদকেন তেমেত্ৰা পরিভুঞ্জন্তি। এৰং পরিভুঞ্জিত্ৰা অপ্পোস্সুক্কা সমণধম্মং করোন্তি । ভগৰতো পন তে অস্সৰাণিজা পত্থপুলকঞ্চ দেন্তি, তদুপিযঞ্চ সপ্পিমধুসক্করং। তং আযস্মা আনন্দো আহরিত্ৰা সিলাযং পিসতি। পুঞ্ঞৰতা পণ্ডিতপুরিসেন কতং মনাপমেৰ হোতি। অথ নং পিসিত্ৰা সপ্পিআদীহি সম্মা যোজেত্ৰা ভগৰতো উপনামেসি। অথেত্থ দেৰতা দিব্বোজং পক্খিপন্তি। তং ভগৰা পরিভুঞ্জতি। পরিভুঞ্জিত্ৰা ফলসমাপত্তিযা কালং অতিনামেতি। ন ততো পট্ঠায পিণ্ডায চরতি।
Patthapatthapulakaṃ ārāmaṃ āharitvāti gatagataṭṭhāne laddhaṃ ekamekaṃ patthapatthapulakaṃ gahetvā ārāmaṃ netvā. Udukkhale koṭṭetvā koṭṭetvā paribhuñjantīti therānaṃ koci kappiyakārako natthi, yo nesaṃ taṃ gahetvā yāguṃ vā bhattaṃ vā paceyya. Sāmampi pacanaṃ samaṇasāruppaṃ na hoti na ca vaṭṭati. Te evaṃ no sallahukavuttitā ca bhavissati, sāmapākaparimocanañcāti aṭṭha aṭṭha janā vā dasa dasa janā vā ekato hutvā udukkhale koṭṭetvā koṭṭetvā sakaṃ sakaṃ paṭivīsaṃ udakena temetvā paribhuñjanti. Evaṃ paribhuñjitvā appossukkā samaṇadhammaṃ karonti . Bhagavato pana te assavāṇijā patthapulakañca denti, tadupiyañca sappimadhusakkaraṃ. Taṃ āyasmā ānando āharitvā silāyaṃ pisati. Puññavatā paṇḍitapurisena kataṃ manāpameva hoti. Atha naṃ pisitvā sappiādīhi sammā yojetvā bhagavato upanāmesi. Athettha devatā dibbojaṃ pakkhipanti. Taṃ bhagavā paribhuñjati. Paribhuñjitvā phalasamāpattiyā kālaṃ atināmeti. Na tato paṭṭhāya piṇḍāya carati.
কিং পনানন্দত্থেরো তদা ভগৰতো উপট্ঠাকো হোতীতি? হোতি, নো চ খো উপট্ঠাকট্ঠানং লদ্ধা। ভগৰতো হি পঠমবোধিযং ৰীসতিৰস্সন্তরে নিবদ্ধুপট্ঠাকো নাম নত্থি। কদাচি নাগসমালত্থেরো ভগৰন্তং উপট্ঠাসি, কদাচি নাগিতত্থেরো, কদাচি মেঘিযত্থেরো, কদাচি উপৰাণত্থেরো, কদাচি সাগতত্থেরো, কদাচি সুনক্খত্তো লিচ্ছৰিপুত্তো। তে অত্তনো রুচিযা উপট্ঠহিত্ৰা যদা ইচ্ছন্তি তদা পক্কমন্তি। আনন্দত্থেরো তেসু তেসু উপট্ঠহন্তেসু অপ্পোস্সুক্কো হোতি, পক্কন্তেসু সযমেৰ ৰত্তপটিপত্তিং করোতি। ভগৰাপি কিঞ্চাপি মে ঞাতিসেট্ঠো উপট্ঠাকট্ঠানং ন তাৰ লভতি, অথ খো এৰরূপেসু ঠানেসু অযমেৰ পতিরূপোতি অধিৰাসেসি। তেন ৰুত্তং – ‘‘আযস্মা পনানন্দো পত্থপুলকং সিলাযং পিসিত্ৰা ভগৰতো উপনামেসি, তং ভগৰা পরিভুঞ্জতী’’তি।
Kiṃ panānandatthero tadā bhagavato upaṭṭhāko hotīti? Hoti, no ca kho upaṭṭhākaṭṭhānaṃ laddhā. Bhagavato hi paṭhamabodhiyaṃ vīsativassantare nibaddhupaṭṭhāko nāma natthi. Kadāci nāgasamālatthero bhagavantaṃ upaṭṭhāsi, kadāci nāgitatthero, kadāci meghiyatthero, kadāci upavāṇatthero, kadāci sāgatatthero, kadāci sunakkhatto licchaviputto. Te attano ruciyā upaṭṭhahitvā yadā icchanti tadā pakkamanti. Ānandatthero tesu tesu upaṭṭhahantesu appossukko hoti, pakkantesu sayameva vattapaṭipattiṃ karoti. Bhagavāpi kiñcāpi me ñātiseṭṭho upaṭṭhākaṭṭhānaṃ na tāva labhati, atha kho evarūpesu ṭhānesu ayameva patirūpoti adhivāsesi. Tena vuttaṃ – ‘‘āyasmā panānando patthapulakaṃ silāyaṃ pisitvā bhagavato upanāmesi, taṃ bhagavā paribhuñjatī’’ti.
ননু চ মনুস্সা দুব্ভিক্খকালে অতিৰিয উস্সাহজাতা পুঞ্ঞানি করোন্তি, অত্তনা অভুঞ্জিত্ৰাপি ভিক্খূনং দাতব্বং মঞ্ঞন্তি। তে তদা কস্মা কটচ্ছুভিক্খম্পি ন অদংসু? অযঞ্চ ৰেরঞ্জো ব্রাহ্মণো মহতা উস্সাহেন ভগৰন্তং ৰস্সাৰাসং যাচি, সো কস্মা ভগৰতো অত্থিভাৰম্পি ন জানাতীতি? ৰুচ্চতে – মারাৰট্টনায। ৰেরঞ্জঞ্হি ব্রাহ্মণং ভগৰতো সন্তিকা পক্কন্তমত্তমেৰ সকলঞ্চ নগরং সমন্তা চ যোজনমত্তং যত্থ সক্কা পুরেভত্তং পিণ্ডায চরিত্ৰা পচ্চাগন্তুং, তং সব্বং মারো আৰট্টেত্ৰা মোহেত্ৰা সব্বেসং অসল্লক্খণভাৰং কত্ৰা পক্কামি। তস্মা ন কোচি অন্তমসো সামীচিকম্মম্পি কত্তব্বং মঞ্ঞিত্থ।
Nanu ca manussā dubbhikkhakāle ativiya ussāhajātā puññāni karonti, attanā abhuñjitvāpi bhikkhūnaṃ dātabbaṃ maññanti. Te tadā kasmā kaṭacchubhikkhampi na adaṃsu? Ayañca verañjo brāhmaṇo mahatā ussāhena bhagavantaṃ vassāvāsaṃ yāci, so kasmā bhagavato atthibhāvampi na jānātīti? Vuccate – mārāvaṭṭanāya. Verañjañhi brāhmaṇaṃ bhagavato santikā pakkantamattameva sakalañca nagaraṃ samantā ca yojanamattaṃ yattha sakkā purebhattaṃ piṇḍāya caritvā paccāgantuṃ, taṃ sabbaṃ māro āvaṭṭetvā mohetvā sabbesaṃ asallakkhaṇabhāvaṃ katvā pakkāmi. Tasmā na koci antamaso sāmīcikammampi kattabbaṃ maññittha.
কিং পন ভগৰাপি মারাৰট্টনং অজানিত্ৰাৰ তত্থ ৰস্সং উপগতোতি? নো অজানিত্ৰা। অথ কস্মা চম্পা-সাৰত্থি-রাজগহাদীনং অঞ্ঞতরস্মিং ন উপগতোতি? তিট্ঠন্তু চম্পা-সাৰত্থি-রাজগহাদীনি, সচেপি ভগৰা তস্মিং সংৰচ্ছরে উত্তরকুরুং ৰা তিদসপুরং ৰা গন্ত্ৰা ৰস্সং উপগচ্ছেয্য, তম্পি মারো আৰট্টেয্য। সো কির তং সংৰচ্ছরং অতিৰিয আঘাতেন পরিযুট্ঠিতচিত্তো অহোসি। ইধ পন ভগৰা ইমং অতিরেককারণং অদ্দস – ‘‘অস্সৰাণিজা ভিক্খূনং সঙ্গহং করিস্সন্তী’’তি। তস্মা ৰেরঞ্জাযমেৰ ৰস্সং উপগচ্ছি।
Kiṃ pana bhagavāpi mārāvaṭṭanaṃ ajānitvāva tattha vassaṃ upagatoti? No ajānitvā. Atha kasmā campā-sāvatthi-rājagahādīnaṃ aññatarasmiṃ na upagatoti? Tiṭṭhantu campā-sāvatthi-rājagahādīni, sacepi bhagavā tasmiṃ saṃvacchare uttarakuruṃ vā tidasapuraṃ vā gantvā vassaṃ upagaccheyya, tampi māro āvaṭṭeyya. So kira taṃ saṃvaccharaṃ ativiya āghātena pariyuṭṭhitacitto ahosi. Idha pana bhagavā imaṃ atirekakāraṇaṃ addasa – ‘‘assavāṇijā bhikkhūnaṃ saṅgahaṃ karissantī’’ti. Tasmā verañjāyameva vassaṃ upagacchi.
কিং পন মারো ৰাণিজকে আৰট্টেতুং ন সক্কোতীতি? নো ন সক্কোতি, তে পন আৰট্টিতপরিযোসানে আগমিংসু। পটিনিৰত্তিত্ৰা কস্মা ন আৰট্টেতীতি? অৰিসহতায। ন হি সো তথাগতস্স অভিহটভিক্খায নিবদ্ধদানস্স অপ্পিতৰত্তস্স অন্তরাযং কাতুং ৰিসহতি। চতুন্নঞ্হি ন সক্কা অন্তরাযো কাতুং। কতমেসং চতুন্নং? তথাগতস্স অভিহটভিক্খাসঙ্খেপেন ৰা নিবদ্ধদানস্স অপ্পিতৰত্তসঙ্খেপেন ৰা পরিচ্চত্তানং চতুন্নং পচ্চযানং ন সক্কা কেনচি অন্তরাযো কাতুং। বুদ্ধানং জীৰিতস্স ন সক্কা কেনচি অন্তরাযো কাতুং। অসীতিযা অনুব্যঞ্জনানং ব্যামপ্পভায ৰা ন সক্কা কেনচি অন্তরাযো কাতুং। চন্দিমসূরিযদেৰব্রহ্মানম্পি হি পভা তথাগতস্স অনুব্যঞ্জনব্যামপ্পভাপ্পদেসং পত্ৰা ৰিহতানুভাৰা হোন্তি। বুদ্ধানং সব্বঞ্ঞুতঞ্ঞাণস্স ন সক্কা কেনচি অন্তরাযো কাতুন্তি ইমেসং চতুন্নং ন সক্কা কেনচি অন্তরাযো কাতুং। তস্মা মারেন অকতন্তরাযং ভিক্খং ভগৰা সসাৰকসঙ্ঘো তদা পরিভুঞ্জতীতি ৰেদিতব্বো।
Kiṃ pana māro vāṇijake āvaṭṭetuṃ na sakkotīti? No na sakkoti, te pana āvaṭṭitapariyosāne āgamiṃsu. Paṭinivattitvā kasmā na āvaṭṭetīti? Avisahatāya. Na hi so tathāgatassa abhihaṭabhikkhāya nibaddhadānassa appitavattassa antarāyaṃ kātuṃ visahati. Catunnañhi na sakkā antarāyo kātuṃ. Katamesaṃ catunnaṃ? Tathāgatassa abhihaṭabhikkhāsaṅkhepena vā nibaddhadānassa appitavattasaṅkhepena vā pariccattānaṃ catunnaṃ paccayānaṃ na sakkā kenaci antarāyo kātuṃ. Buddhānaṃ jīvitassa na sakkā kenaci antarāyo kātuṃ. Asītiyā anubyañjanānaṃ byāmappabhāya vā na sakkā kenaci antarāyo kātuṃ. Candimasūriyadevabrahmānampi hi pabhā tathāgatassa anubyañjanabyāmappabhāppadesaṃ patvā vihatānubhāvā honti. Buddhānaṃ sabbaññutaññāṇassa na sakkā kenaci antarāyo kātunti imesaṃ catunnaṃ na sakkā kenaci antarāyo kātuṃ. Tasmā mārena akatantarāyaṃ bhikkhaṃ bhagavā sasāvakasaṅgho tadā paribhuñjatīti veditabbo.
এৰং পরিভুঞ্জন্তো চ একদিৰসং অস্সোসি খো ভগৰা উদুক্খলসদ্দন্তি ভগৰা পত্থপত্থপুলকং কোট্টেন্তানং ভিক্খূনং মুসলসঙ্ঘট্টজনিতং উদুক্খলসদ্দং সুণি। ততো পরং জানন্তাপি তথাগতাতি এৰমাদি যং পরতো ‘‘কিন্নু খো সো, আনন্দ, উদুক্খলসদ্দো’’তি পুচ্ছি, তস্স পরিহারদস্সনত্থং ৰুত্তং। তত্রাযং সঙ্খেপৰণ্ণনা – তথাগতা নাম জানন্তাপি সচে তাদিসং পুচ্ছাকারণং হোতি, পুচ্ছন্তি। সচে পন তাদিসং পুচ্ছাকারণং নত্থি, জানন্তাপি ন পুচ্ছন্তি। যস্মা পন বুদ্ধানং অজাননং নাম নত্থি, তস্মা অজানন্তাপীতি ন ৰুত্তং। কালং ৰিদিত্ৰা পুচ্ছন্তীতি সচে তস্সা পুচ্ছায সো কালো হোতি, এৰং তং কালং ৰিদিত্ৰা পুচ্ছন্তি; সচে ন হোতি , এৰম্পি কালং ৰিদিত্ৰাৰ ন পুচ্ছন্তি। এৰং পুচ্ছন্তাপি চ অত্থসংহিতং তথাগতা পুচ্ছন্তি, যং অত্থনিস্সিতং কারণনিস্সিতং, তদেৰ পুচ্ছন্তি, নো অনত্থসংহিতং। কস্মা? যস্মা অনত্থসংহিতে সেতুঘাতো তথাগতানং। সেতু ৰুচ্চতি মগ্গো, মগ্গেনেৰ তাদিসস্স ৰচনস্স ঘাতো, সমুচ্ছেদোতি ৰুত্তং হোতি।
Evaṃ paribhuñjanto ca ekadivasaṃ assosi kho bhagavā udukkhalasaddanti bhagavā patthapatthapulakaṃ koṭṭentānaṃ bhikkhūnaṃ musalasaṅghaṭṭajanitaṃ udukkhalasaddaṃ suṇi. Tato paraṃ jānantāpi tathāgatāti evamādi yaṃ parato ‘‘kinnu kho so, ānanda, udukkhalasaddo’’ti pucchi, tassa parihāradassanatthaṃ vuttaṃ. Tatrāyaṃ saṅkhepavaṇṇanā – tathāgatā nāma jānantāpi sace tādisaṃ pucchākāraṇaṃ hoti, pucchanti. Sace pana tādisaṃ pucchākāraṇaṃ natthi, jānantāpi na pucchanti. Yasmā pana buddhānaṃ ajānanaṃ nāma natthi, tasmā ajānantāpīti na vuttaṃ. Kālaṃ viditvā pucchantīti sace tassā pucchāya so kālo hoti, evaṃ taṃ kālaṃ viditvā pucchanti; sace na hoti , evampi kālaṃ viditvāva na pucchanti. Evaṃ pucchantāpi ca atthasaṃhitaṃ tathāgatā pucchanti, yaṃ atthanissitaṃ kāraṇanissitaṃ, tadeva pucchanti, no anatthasaṃhitaṃ. Kasmā? Yasmā anatthasaṃhite setughāto tathāgatānaṃ. Setu vuccati maggo, maggeneva tādisassa vacanassa ghāto, samucchedoti vuttaṃ hoti.
ইদানি অত্থসংহিতন্তি এত্থ যং অত্থসন্নিস্সিতং ৰচনং তথাগতা পুচ্ছন্তি, তং দস্সেন্তো ‘‘দ্ৰীহাকারেহী’’তি আদিমাহ। তত্থ আকারেহীতি কারণেহি। ধম্মং ৰা দেসেস্সামাতি অট্ঠুপ্পত্তিযুত্তং সুত্তং ৰা পুব্বচরিতকারণযুত্তং জাতকং ৰা কথযিস্সাম। সাৰকানং ৰা সিক্খাপদং পঞ্ঞপেস্সামাতি সাৰকানং ৰা তায পুচ্ছায ৰীতিক্কমং পাকটং কত্ৰা গরুকং ৰা লহুকং ৰা সিক্খাপদং পঞ্ঞপেস্সাম আণং ঠপেস্সামাতি।
Idāni atthasaṃhitanti ettha yaṃ atthasannissitaṃ vacanaṃ tathāgatā pucchanti, taṃ dassento ‘‘dvīhākārehī’’ti ādimāha. Tattha ākārehīti kāraṇehi. Dhammaṃ vā desessāmāti aṭṭhuppattiyuttaṃ suttaṃ vā pubbacaritakāraṇayuttaṃ jātakaṃ vā kathayissāma. Sāvakānaṃ vā sikkhāpadaṃpaññapessāmāti sāvakānaṃ vā tāya pucchāya vītikkamaṃ pākaṭaṃ katvā garukaṃ vā lahukaṃ vā sikkhāpadaṃ paññapessāma āṇaṃ ṭhapessāmāti.
অথ খো ভগৰা…পে॰… এতমত্থং আরোচেসীতি এত্থ নত্থি কিঞ্চি ৰত্তব্বং। পুব্বে ৰুত্তমেৰ হি ভিক্খূনং পত্থপত্থপুলকপটিলাভং সল্লহুকৰুত্তিতং সামপাকপরিমোচনঞ্চ আরোচেন্তো এতমত্থং আরোচেসীতি ৰুচ্চতি। ‘‘সাধু সাধু, আনন্দা’’তি ইদং পন ভগৰা আযস্মন্তং আনন্দং সম্পহংসেন্তো আহ। সাধুকারং পন দত্ৰা দ্ৰীসু আকারেসু একং গহেত্ৰা ধম্মং দেসেন্তো আহ – ‘‘তুম্হেহি, আনন্দ, সপ্পুরিসেহি ৰিজিতং, পচ্ছিমা জনতা সালিমংসোদনং অতিমঞ্ঞিস্সতী’’তি। তত্রাযমধিপ্পাযো – তুম্হেহি, আনন্দ, সপ্পুরিসেহি এৰং দুব্ভিক্খে দুল্লভপিণ্ডে ইমায সল্লহুকৰুত্তিতায ইমিনা চ সল্লেখেন ৰিজিতং। কিং ৰিজিতন্তি? দুব্ভিক্খং ৰিজিতং, লোভো ৰিজিতো, ইচ্ছাচারো ৰিজিতো। কথং? ‘‘অযং ৰেরঞ্জা দুব্ভিক্খা, সমন্ততো পন অনন্তরা গামনিগমা ফলভারনমিতসস্সা সুভিক্খা সুলভপিণ্ডা। এৰং সন্তেপি ভগৰা ইধেৰ অম্হে নিগ্গণ্হিত্ৰা ৰসতী’’তি একভিক্খুস্সপি চিন্তা ৰা ৰিঘাতো ৰা নত্থি। এৰং তাৰ দুব্ভিক্খং ৰিজিতং অভিভূতং অত্তনো ৰসে ৰত্তিতং।
Atha kho bhagavā…pe… etamatthaṃ ārocesīti ettha natthi kiñci vattabbaṃ. Pubbe vuttameva hi bhikkhūnaṃ patthapatthapulakapaṭilābhaṃ sallahukavuttitaṃ sāmapākaparimocanañca ārocento etamatthaṃ ārocesīti vuccati. ‘‘Sādhusādhu, ānandā’’ti idaṃ pana bhagavā āyasmantaṃ ānandaṃ sampahaṃsento āha. Sādhukāraṃ pana datvā dvīsu ākāresu ekaṃ gahetvā dhammaṃ desento āha – ‘‘tumhehi, ānanda, sappurisehi vijitaṃ, pacchimā janatā sālimaṃsodanaṃ atimaññissatī’’ti. Tatrāyamadhippāyo – tumhehi, ānanda, sappurisehi evaṃ dubbhikkhe dullabhapiṇḍe imāya sallahukavuttitāya iminā ca sallekhena vijitaṃ. Kiṃ vijitanti? Dubbhikkhaṃ vijitaṃ, lobho vijito, icchācāro vijito. Kathaṃ? ‘‘Ayaṃ verañjā dubbhikkhā, samantato pana anantarā gāmanigamā phalabhāranamitasassā subhikkhā sulabhapiṇḍā. Evaṃ santepi bhagavā idheva amhe niggaṇhitvā vasatī’’ti ekabhikkhussapi cintā vā vighāto vā natthi. Evaṃ tāva dubbhikkhaṃ vijitaṃ abhibhūtaṃ attano vase vattitaṃ.
কথং লোভো ৰিজিতো? ‘‘অযং ৰেরঞ্জা দুব্ভিক্খা, সমন্ততো পন অনন্তরা গামনিগমা ফলভারনমিতসস্সা সুভিক্খা সুলভপিণ্ডা । হন্দ মযং তত্থ গন্ত্ৰা পরিভুঞ্জিস্সামা’’তি লোভৰসেন একভিক্খুনাপি রত্তিচ্ছেদো ৰা ‘‘পচ্ছিমিকায তত্থ ৰস্সং উপগচ্ছামা’’তি ৰস্সচ্ছেদো ৰা ন কতো। এৰং লোভো ৰিজিতো।
Kathaṃ lobho vijito? ‘‘Ayaṃ verañjā dubbhikkhā, samantato pana anantarā gāmanigamā phalabhāranamitasassā subhikkhā sulabhapiṇḍā . Handa mayaṃ tattha gantvā paribhuñjissāmā’’ti lobhavasena ekabhikkhunāpi ratticchedo vā ‘‘pacchimikāya tattha vassaṃ upagacchāmā’’ti vassacchedo vā na kato. Evaṃ lobho vijito.
কথং ইচ্ছাচারো ৰিজিতো? অযং ৰেরঞ্জা দুব্ভিক্খা, ইমে চ মনুস্সা অম্হে দ্ৰে তযো মাসে ৰসন্তেপি ন কিস্মিঞ্চি মঞ্ঞন্তি। যংনূন মযং গুণৰাণিজ্জং কত্ৰা ‘‘অসুকো ভিক্খু পঠমস্স ঝানস্স লাভী…পে॰… অসুকো ছল়ভিঞ্ঞোতি এৰং মনুস্সানং অঞ্ঞমঞ্ঞং পকাসেত্ৰা কুচ্ছিং পটিজগ্গিত্ৰা পচ্ছা সীলং অধিট্ঠহেয্যামা’’তি একভিক্খুনাপি এৰরূপা ইচ্ছা ন উপ্পাদিতা। এৰং ইচ্ছাচারো ৰিজিতো অভিভূতো অত্তনো ৰসে ৰত্তিতোতি।
Kathaṃ icchācāro vijito? Ayaṃ verañjā dubbhikkhā, ime ca manussā amhe dve tayo māse vasantepi na kismiñci maññanti. Yaṃnūna mayaṃ guṇavāṇijjaṃ katvā ‘‘asuko bhikkhu paṭhamassa jhānassa lābhī…pe… asuko chaḷabhiññoti evaṃ manussānaṃ aññamaññaṃ pakāsetvā kucchiṃ paṭijaggitvā pacchā sīlaṃ adhiṭṭhaheyyāmā’’ti ekabhikkhunāpi evarūpā icchā na uppāditā. Evaṃ icchācāro vijito abhibhūto attano vase vattitoti.
অনাগতে পন পচ্ছিমা জনতা ৰিহারে নিসিন্না অপ্পকসিরেনেৰ লভিত্ৰাপি ‘‘কিং ইদং উত্তণ্ডুলং অতিকিলিন্নং অলোণং অতিলোণং অনম্বিলং অচ্চম্বিলং, কো ইমিনা অত্থো’’তি আদিনা নযেন সালিমংসোদনং অতিমঞ্ঞিস্সতি, ওঞ্ঞাতং অৰঞ্ঞাতং করিস্সতি। অথ ৰা জনপদো নাম ন সব্বকালং দুব্ভিক্খো হোতি। একদা দুব্ভিক্খো হোতি, একদা সুভিক্খো হোতি। স্ৰাযং যদা সুভিক্খো ভৰিস্সতি, তদা তুম্হাকং সপ্পুরিসানং ইমায পটিপত্তিযা পসন্না মনুস্সা ভিক্খূনং যাগুখজ্জকাদিপ্পভেদেন অনেকপ্পকারং সালিৰিকতিং মংসোদনঞ্চ দাতব্বং মঞ্ঞিস্সন্তি। তং তুম্হে নিস্সায উপ্পন্নং সক্কারং তুম্হাকং সব্রহ্মচারীসঙ্খাতা পচ্ছিমা জনতা তুম্হাকং অন্তরে নিসীদিত্ৰা অনুভৰমানাৰ অতিমঞ্ঞিস্সতি, তপ্পচ্চযং মানঞ্চ ওমানঞ্চ করিস্সতি। কথং? কস্মা এত্তকং পক্কং, কিং তুম্হাকং ভাজনানি নত্থি, যত্থ অত্তনো সন্তকং পক্খিপিত্ৰা ঠপেয্যাথাতি।
Anāgate pana pacchimā janatā vihāre nisinnā appakasireneva labhitvāpi ‘‘kiṃ idaṃ uttaṇḍulaṃ atikilinnaṃ aloṇaṃ atiloṇaṃ anambilaṃ accambilaṃ, ko iminā attho’’ti ādinā nayena sālimaṃsodanaṃ atimaññissati, oññātaṃ avaññātaṃ karissati. Atha vā janapado nāma na sabbakālaṃ dubbhikkho hoti. Ekadā dubbhikkho hoti, ekadā subhikkho hoti. Svāyaṃ yadā subhikkho bhavissati, tadā tumhākaṃ sappurisānaṃ imāya paṭipattiyā pasannā manussā bhikkhūnaṃ yāgukhajjakādippabhedena anekappakāraṃ sālivikatiṃ maṃsodanañca dātabbaṃ maññissanti. Taṃ tumhe nissāya uppannaṃ sakkāraṃ tumhākaṃ sabrahmacārīsaṅkhātā pacchimā janatā tumhākaṃ antare nisīditvā anubhavamānāva atimaññissati, tappaccayaṃ mānañca omānañca karissati. Kathaṃ? Kasmā ettakaṃ pakkaṃ, kiṃ tumhākaṃ bhājanāni natthi, yattha attano santakaṃ pakkhipitvā ṭhapeyyāthāti.
দুব্ভিক্খকথা নিট্ঠিতা।
Dubbhikkhakathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৰেরঞ্জকণ্ডং • Verañjakaṇḍaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / উপাসকত্তপটিৰেদনাকথাৰণ্ণনা • Upāsakattapaṭivedanākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / উপাসকত্তপটিৰেদনাকথাৰণ্ণনা • Upāsakattapaṭivedanākathāvaṇṇanā
